អ្នកជំងឺកូវីដ១៩ រត់គេចចេញពីកន្លែងព្យាបាលបាន ៣ ថ្ងៃ អាជ្ញាធររកឃើញវិញ

deth leng — Wed, 29 Sep 2021 07:37:36 +0000

អ្នកជំងឺកូវីដ-១៩ ម្នាក់ដែលបានលួចរត់ចេញពីមណ្ឌលព្យាបាល ក្នុងខេត្តឧត្តរមានជ័យ កាលពីយប់ថ្ងៃទី២៦ ខែកញ្ញា ឆ្នាំ២០២១ ត្រូវបានរកឃើញវិញដោយអ្នកជំងឺបានព្រមប្រគល់ខ្លួនឱ្យអាជ្ញាធរខេត្តកំពង់ធំ កាលពីវេលាម៉ោង ១១៖៣០ នាទីព្រឹក ថ្ងៃទី២៨ ខែកញ្ញា ឆ្នាំ២០២១។

សេចក្តីជួនដំណឹងរបស់រដ្ឋបាលខេត្តឧត្តរមានជ័យបានឱ្យដឹងថា កាលពីវេលាយប់ ថ្ងៃទី២៦ ខែកញ្ញា ឆ្នាំ២០២១ មានករណីអ្នកជំងឺកូវីដ-១៩ ម្នាក់ឈ្មោះ ព្រំ សុធារិទ្ធ ភេទប្រុស អាយុ ៤៩ឆ្នាំ រស់នៅភូមិអូរស្មាច់ សង្កាត់អូរស្មាច់ ក្រុងសំរោង ខេត្តឧត្តរមានជ័យ បានលួចរត់ចេញពីមណ្ឌលព្យាបាលផ្លុង ស្ថិតនៅភូមិផ្លុង សង្កាត់កូនក្រៀល ក្រុងសំរោង ខេត្តឧត្តរមានជ័យ ដែលបុគ្គលអ្នកជំងឺខាងលើត្រូវបានធ្វើតេស្ដរកឃើញវិជ្ជមានជំងឺកូវីដ-១៩ នៅថ្ងៃទី ០៤ ខែកញ្ញាឆ្នាំ២០២១។

រដ្ឋបាលខេត្តបានបន្តថា ដោយប្រើប្រាស់យុទ្ធសាស្ត្រលួងលោមតាមទូរស័ព្ទរបស់កងកម្លាំងរាជអាវុធហត្ថខេត្តឧត្តរមានជ័យ បុគ្គលវិជ្ជមានជំងឺកូវីដ-១៩ ខាងលើបានព្រមប្រគល់ខ្លួនកាលពីវេលាម៉ោង ១១៖ ៣០នាទីព្រឹក ថ្ងៃទី ២៨ ខែកញ្ញា ឆ្នាំ២០២១ នៅខេត្តកំពង់ធំ បន្ទាប់ពីមានចេតនាចង់គេចទៅលាក់ខ្លួននៅខេត្តកំពង់ចាម និងត្រូវបានអាជ្ញាធរ ព្រមទាំងសមត្ថកិច្ចជំនាញខេត្តកំពង់ធំ ជួយសម្របសម្រួលដាក់ឱ្យព្យាបាលបន្ត នៅមណ្ឌលព្យាបាលសាលាបឋមសិក្សាបល្ល័ង្ក ស្ថិតនៅភូមិបល្ល័ង្កលិច សង្កាត់ ដំរីជាន់ខ្លា ក្រុងស្ទឹងសែន ខេត្តកំពង់ធំ។

រដ្ឋបាលខេត្តអំពាវនាវដល់ប្រជាពលរដ្ឋដែលមានការពាក់ព័ន្ធដោយផ្ទាល់ ឬដោយប្រយោល ជាមួយបុគ្គលវិជ្ជមានកូវីដ-១៩ខាងលើ ត្រូវដាក់ខ្លួនដាច់ ដោយឡែករយៈពេល១៤ថ្ងៃ៕

អត្ថបទៈ សំអឿន

The post អ្នកជំងឺកូវីដ១៩ រត់គេចចេញពីកន្លែងព្យាបាលបាន ៣ ថ្ងៃ អាជ្ញាធររកឃើញវិញ appeared first on Kampuchea Thmey Daily.

ឈ្មោះ ធឿន ប៊ុនពេជ្រ ដែលរត់គេចខ្លួន បានចូលខ្លួនទទួលការព្យាបាលហើយ

Kang Tola — Mon, 19 Jul 2021 11:43:24 +0000

ឈ្មោះ ធឿន ប៊ុនពេជ្រ បានចូលខ្លួនមកទទួលការព្យាបាលហើយ បន្ទាប់ពីឈ្មោះនេះបានរត់គេចខ្លួនកាលពីថ្ងៃទី១៦ ខែកក្កដា ឆ្នាំ២០២១ ហើយក្រោយពីពីទទួលបានព័ត៌មាននេះ កម្លាំងអធិការដ្ឋាននគរបាល ក្រុងសិរីសោភ័ណ បានចុះស្រាវជ្រាវភ្លាមៗ និងបានកំណត់រកឃើញក្រុមគ្រួសារ ធឿន ប៊ុនពេជ្រ ដែលមានអាសយដ្ឋានស្ថិតនៅជើងភ្នំកន្ទួត ភូមិភ្នំកន្ទួត សង្កាត់កំពង់ស្វាយ ក្រុងសិរីសោភ័ណ។

ក្រោយពីមានការចុះទៅធ្វើការពន្យល់ណែនាំ ក្រុមគ្រួសារ អ្នកជំងឺ ធឿន ប៊ុនពេជ្រ ឲ្យចូលរួមសហការជាមួយសមត្ថកិច្ច ដើម្បីទាក់ទងទៅអ្នកជំងឺឲ្យចូលខ្លួន មកទទួលការព្យាបាល និងហានិភ័យឆ្លងដល់ប្រជាពលរដ្ឋផ្សេងៗទៀតរួចមក អ្នកជំងឺ រួមទាំងប្រពន្ធ ដែលកំពុងមានផ្ទៃពោះផងនោះ បានសម្រេចចិត្តជិះម៉ូតូ ពីទីកន្លែងលាក់ខ្លួន ដើម្បីមកទទួលការព្យបាលនៅមណ្ឌលវិទ្យាល័យខ្លាកូន ភូមខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ នៅថ្ងៃទី១៩ ខែកក្កដា ឆ្នាំ២០២១។

សូមបញ្ជាក់ថា ឈ្មោះ ធឿន ប៊ុនពេជ្រ ភេទប្រុស អាយុ៣០ឆ្នាំ ដែលមានទីលំនៅភូមិភ្នំកន្ទួត សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ទើបត្រឡប់មកពីប្រទេសថៃវិញ តេស្តមានវិជ្ជមានមេរោគកូវីដ១៩ ប៉ុន្តែមុនចេញលទ្ធផល បុរសនេះ បានរត់គេចបាត់ពីមណ្ឌលចត្តាឡីស័ក កាលថ្ងៃទី១៦ ខែកក្កដា ឆ្នាំ២០២១ នេះបើតាមការបញ្ជាក់ពីអនុគណ:កម្មការស្រាវជ្រាវជំងឺកូវីដ១៩។

ជាមួយគ្នានោះ អនុគណៈកម្មការស្រាវជ្រាវជំងឺកូវីដ១៩ បានអំពាវនាវដល់ប្រជាពលរដ្ឋ ដែលបានជួប ឬមានទំនាក់ទំនងជាមួយបុរសខាងលើតាមដានសុខភាពរបស់ខ្លួន ឬប្រសិនបើមានអាការៈ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬសង្ស័យ ត្រូវប្រញាប់ទៅធ្វើតេស្ដ ហើយត្រូវរាយការណ៍ទៅអាជ្ញាធរមូលដ្ឋានបន្ទាន់ ប្រសិនបើដឹងពីដំណើររបស់បុគ្គលខាងលើ ឬអ្នកដែលបានពាក់ព័ន្ធជាមួយបុគ្គលខាងលើនេះ៕

ដោយ ៖ កោះកែវ

The post ឈ្មោះ ធឿន ប៊ុនពេជ្រ ដែលរត់គេចខ្លួន បានចូលខ្លួនទទួលការព្យាបាលហើយ appeared first on Kampuchea Thmey Daily.

រត់គេចពីចត្តាឡីស័ក Archives - Kampuchea Thmey Daily

អ្នកជំងឺកូវីដ១៩ រត់គេចចេញពីកន្លែងព្យាបាលបាន ៣ ថ្ងៃ អាជ្ញាធររកឃើញវិញ

ឈ្មោះ ធឿន ប៊ុន​ពេជ្រ ដែល​រត់គេចខ្លួន បាន​ចូលខ្លួន​ទទួល​ការព្យាបាល​ហើយ​

ឈ្មោះ ធឿន ប៊ុនពេជ្រ ដែលរត់គេចខ្លួន បានចូលខ្លួនទទួលការព្យាបាលហើយ