លោកជំទាវ មិថុនា ភូថង Archives - Kampuchea Thmey Daily

គ្មានពន្យារពេលទៀតទេ ព្រលានយន្តហោះតម្លៃជិត ៤០០ លានដុល្លារខេត្តកោះកុង បើកការហោះហើរពាក់កណ្ដាលឆ្នាំ ២០២៣

Dy Bunnara — Wed, 22 Feb 2023 02:19:37 +0000

ក្រោយពន្យារពេលជាច្រើនដង ព្រលានយន្តហោះតារាសាគរក្នុងខេត្តកោះកុង នឹងចាប់ផ្ដើមប្រតិបត្តិការហោះហើរជាផ្លូវការនៅពាក់កណ្តាលឆ្នាំ២០២៣ នេះ។

ថ្លែងប្រាប់បណ្តាញសារព័ត៌មានក្នុងសន្និសីទកាលពីម្សិលមិញ លោកជំទាវ មិថុនា ភូថង អភិបាលនៃគណៈអភិបាលខេត្តកោះកុងបានឲ្យដឹងថា ព្រលានយន្តហោះតារាសាគរខេត្តកោះកុងបានបញ្ចប់ការសាងសង់ ១០០ % ហើយក្រុមហ៊ុនអះអាងថានឹងចាប់ផ្តើមប្រតិបត្តិការហោះហើរនៅពាក់កណ្តាលឆ្នាំ ២០២៣។

លោកជំទាវបញ្ជាក់យ៉ាងដូច្នេះថា «ព្រលានយន្តហោះតារាសាគរបានបញ្ចប់ ១០០% ក្រុមហ៊ុនសន្យាថានឹងចាប់ផ្តើមសេវាហោះហើរនៅពាក់កណ្តាលឆ្នាំ ២០២៣ គឹអត់មានពន្យារពេលអីទៀតទេ«។

បើតាមលោក សុខ សុទ្ធី អភិបាលរងខេត្តកោះកុង ក្រៅពីព្រលានយន្តហោះតារាសាគរដែលនឹងចាប់ផ្តើមប្រតិបត្តិការហោះហើរឆាប់ៗខាងមុខនេះ ខេត្តកោះកុងក៏នឹងមានព្រលានយន្តហោះមួយទៀតដែលវិនិយោគដោយក្រុមហ៊ុន LYP ជាមួយក្រុមហ៊ុនអាកាសចរថៃមានទីតាំងនៅឃុំទួលគគីរ។ ប៉ុន្តែដោយសារបញ្ហាជំងឺកូវីដ គម្រោងនេះមិនទាន់ចាប់ផ្ដើមដំណើរការនៅឡើយទេ។

ព្រលានយន្តហោះអន្តរជាតិតារាសាគរក្នុងខេត្តកោះកុង អភិវឌ្ឍនៅលើផ្ទៃដីទំហំជាង ២១៨ ហិកតា។ តាមផែនការគ្រោងបញ្ចប់នៅឆ្នាំ ២០២០ និងបើកប្រតិបត្តិការហោះហើរជាលើកដំបូងនៅពាក់កណ្តាលឆ្នាំ២០២១ ប៉ុន្តែត្រូវអាក់ខានដោយសារបញ្ហាជំងឺកូវីដ១៩។

អាកាសយានដ្ឋានកម្រិត 4F នេះ វិនិយោគដោយក្រុមហ៊ុន Tianjin Union Development Group (UDG) របស់ចិន ដែលដំណាក់កាលទី១ ការសាងសង់ត្រូវចំណាយថវិកាប្រមាណ ៣៥០ លានដុល្លារ ជាមួយការអភិវឌ្ឍផ្លូវរត់បណ្តោយប្រវែង ៣២០០ ម៉ែត្រ និងទទឹង៦០ម៉ែត្រ អាចឲ្យយន្តហោះធុន Boeing 777 និង Airbus A340 ខ្នាតធំចុះចតបាន៕

The post គ្មានពន្យារពេលទៀតទេ ព្រលានយន្តហោះតម្លៃជិត ៤០០ លានដុល្លារខេត្តកោះកុង បើកការហោះហើរពាក់កណ្ដាលឆ្នាំ ២០២៣ appeared first on Kampuchea Thmey Daily.

លោកស្រី មិថុនា ភូថង មានឈាមជ័រកូនចៅថ្នាក់ដឹកនាំ មុនឡើងជាអភិបាលខេត្តកោះកុង

Dy Bunnara — Wed, 29 Jun 2022 02:55:21 +0000

លោកស្រី មិថុនា ភូថង បានចូលកាន់តំណែងជាអភិបាលខេត្តកោះកុងកាលពីខែមិថុនា ឆ្នាំ២០១៧។ តាមរយៈតួនាទីជាអភិបាលខេត្តកោះកុង លោកស្រី មិថុនា ភូថង គឺស្រ្តីដំបូងហើយក៏ស្ថិតក្នុងចំណោមអភិបាលខេត្តវ័យក្មេងទាំង ៥ រូប ដែលត្រូវប្រមុខរដ្ឋាភិបាលតែងតាំងតួនាទីជាក្បាលម៉ាស៊ីនដឹកនាំខេត្ត។

គ្រួសារ

លោកស្រី មិថុនា ភូថង កើតនៅខែមិថុនា ឆ្នាំ១៩៨០ បច្ចុប្បន្នមានវ័យ ៤៣ ឆ្នាំ។ លោកស្រីគឺជាកូនស្រីច្បងរបស់លោក យុទ្ធ ភូថង និងជាចៅស្រីរបស់លោក សាយ ភូថង មេដឹកនាំចលនាតស៊ូភាគនិរតី ក្នុងសម័យតស៊ូរំដោះជាតិពីរបបខ្មែរក្រហម។ លោកស្រីមានស្វាមីជាមន្ត្រីនគរបាលជើងទឹក និងមានកូនប្រុសពីរនាក់។

ប្រវត្តិសិក្សា

លោកស្រី មិថុនា ភូថង បានបញ្ចប់ការសិក្សាថ្នាក់បរិញ្ញាបត្រផ្នែកព័ត៌មានវិទ្យា និងបញ្ចប់ថ្នាក់អនុបណ្ឌិតផ្នែកនីតិសាស្ត្រ។

កាន់តំណែងជាអភិបាលខេត្ត

លោកជំទាវ មិថុនា ភូថង ត្រូវបានព្រះមហាក្សត្រត្រាស់បង្គាប់តែងតាំងជាអភិបាលខេត្តកោះកុងកាលអំឡុងឆ្នាំ ២០១៧ តាមការទូលថ្វាយរបស់ប្រមុខរដ្ឋាភិបាល។ ក្នុងវ័យ ៣៩ ឆ្នាំ លោកស្រីគឺជាអភិបាលខេត្តស្ត្រីដំបូងគេ និងក្មេងជាងគេដែលបានកាន់តួនាទីដ៏ខ្ពង់ខ្ពស់នេះ។

បទពិសោធន៍ការងារ

លោកស្រីបានចូលបម្រើការងារក្នុងក្របខណ្ឌមន្ត្រីរាជការកាលពីឆ្នាំ ២០០៩។ មុនចូលបម្រើការងាររដ្ឋ លោកស្រីក៏ធ្លាប់បម្រើការងារនៅក្រុមហ៊ុនឯកជនមួយ។

ក្នុងបទសម្ភាសន៍ជាមួយបណ្តាញព័ត៌មានក្នុងស្រុកមួយ លោកស្រីអភិបាលធ្លាប់បញ្ជាក់ថា លោកស្រីមានការរារែកចូលធ្វើជាមន្ត្រី ព្រោះព្រួយបារម្ភខ្លាចខ្លួនជាស្ត្រីមិនអាចបម្រើការងារជូនសង្គមជាតិបាន។

រាជរដ្ឋាភិបាលបានដាក់ចេញគោលនយោបាយជាច្រើន ដែលផ្តល់ឱកាសដល់ស្ត្រី។ ដោយមើលឃើញគោលនយោបាយរបស់រាជរដ្ឋាភិបាល លោកស្រីបានសម្រេចចិត្តប្រលងចូលបម្រើការងាររាជការ ជាពិសេស លោកស្រី មានឆន្ទៈចូលរួមក្នុងការងាររដ្ឋបាល មានបំណងបម្រើប្រជាពលរដ្ឋ និងប្រទេសជាតិ។

ទិសដៅថ្ងៃខាងមុខ

ក្នុងតំណែងជាអភិបាលខេត្ត លោកស្រី មិថុនា ភូថង បានដាក់គោលដៅនឹងជម្នះឧបសគ្គ និងការលំបាកក្នុងការដឹកនាំខេត្តដាច់ស្រយាលមួយនេះ ដើម្បីរំលេចនូវសមិទ្ធផលជាប្រយោជន៍បម្រើដល់ប្រជាពលរដ្ឋ។ ជាមួយគ្នានេះនឹងបន្តដឹកនាំ គ្រប់គ្រង និងអភិវឌ្ឍខេត្តឱ្យមានការរីកចម្រើន តាមផែនការយុទ្ធសាស្ត្ររបស់រាជរដ្ឋាភិបាល៕

The post លោកស្រី មិថុនា ភូថង មានឈាមជ័រកូនចៅថ្នាក់ដឹកនាំ មុនឡើងជាអភិបាលខេត្តកោះកុង appeared first on Kampuchea Thmey Daily.

លោកស្រី មិថុនា ភូថង បង្គាប់ឱ្យអាជ្ញាធរស្រុកស្រង់ស្ថិតិជនវិកលចរិត

Sorn Phanith — Wed, 15 Dec 2021 08:38:50 +0000

លោកស្រី មិថុនា ភូថង ប្រធានគណៈកម្មាធិការកាកបាទក្រហមកម្ពុជាខេត្តកោះកុង បានបង្គាប់ដល់អភិបាលក្រុងស្រុកកំណត់ស្រង់ស្ថិតិជនវិកលចរិត ដែលរងគ្រោះផ្សេងៗ ជាពិសេសអ្នករងប៉ះពាល់ព្រោះតែឥទ្ធិគ្រឿងញៀន។ មនុស្សបាត់បង់សតិ ដោយសារគ្រោះថ្នាក់អ្វីមួយ ឬសារធាតុគ្រឿងញៀន ជាវិបត្តិមួយដ៏ធ្ងន់ធ្ងរដែលចាំបាច់រួមគ្នាទប់ស្កាត់អប់រំ ដើម្បីចៀសវាងធ្វើឱ្យបញ្ហានេះបន្តកើតមានក្នុងសង្គមគ្រួសារ ក៏ដូចជាប្រទេសជាតិទាំងមូល។

លោកស្រី មិថុនា ភូថង ប្រធានគណៈកម្មាធិការកាកបាទក្រហមកម្ពុជាខេត្តកោះកុង ក្នុងពិធីបំពាក់កន្សែងកាកបាទក្រហមជូនដល់យុវជនចំនួន ១ និងពលរដ្ឋក្រីក្រលំបាកចំនួន៥០គ្រួសារនៅស្រុកបូទុមសាគរ និងស្រុកគិរីសាគរ រសៀលថ្ងៃទី ១៤ ខែធ្នូ ២០២១នេះ បានបង្គាប់ដល់អភិបាលក្រុងស្រុកទាំងអស់ពិនិត្យស្រង់ស្ថិតិជនវិកលចរិត ដោយសារការរងគ្រោះថ្នាក់ផ្សេងៗ និងរងផលប៉ះពាល់ព្រោះគ្រឿងញៀនឱ្យត្រឹមត្រូវ ដើម្បីលុបបំបាត់ពីភាពរើសអើង ព្រមទាំងដោះស្រាយជួយសង្គ្រោះទៅតាមយន្តការនានា។ លោកស្រី មិថុនា ភូថង បន្ថែមថា ក្រោយក្តោបក្តាប់ព័ត៌មានទិន្នន័យបានពេញលេញ ក្រុមការងារមន្ត្រីជំនាញអន្តរវិស័យរបស់រដ្ឋបាលខេត្តរួមគ្នាពិនិត្យដាក់ចេញនូវវិធានការដោះស្រាយទៅតាមកម្រិតជនវិកលចរិតទាំងនោះ។ ដូច្នេះអាជ្ញាធរបន្តប្រឹងប្រែងស្វែងការគាំទ្រពីអង្គការដៃគូអភិវឌ្ឍន៍លើជនអនានិងជនរងគ្រោះទាំងអស់នោះផងដែរ។

ចំណែកឯលោក ទួន ឪទី អភិបាលរងស្រុកគិរីសាគរ ក៏ទទួលយកការបង្គាប់ណែនាំរបស់លោកស្រីមិថុនា ភូថង អនុវត្តជាថ្មី ទោះបីជាកន្លងទៅធ្លាប់ស្រង់ស្ថិតិរួចហើយក៏ដោយ ក៏តម្រូវធ្វើបច្ចុប្បន្នភាពលើការងារសង្គមកិច្ចនេះដែរ។ លោក សាក់ សំណាង ប្រធានការិយាល័យ សុខុមាលភាពសង្គម និងការជួញដូរមនុស្សនៃមន្ទីរសង្គមកិច្ចខេត្តកោះកុង ថ្លែងរសៀលថ្ងៃទី ១៥ ខែធ្នូនេះថា សព្វថ្ងៃ ខេត្តកោះកុង មានមានជនអនាថាមកទទួលសេវាពិគ្រោះដោះស្រាយប្រមាណ១០នាក់ និងជនវិកលចរិតចំនួន៦នាក់។ ភាគច្រើនពួកគាត់បំឡាស់ទីមកពីបណ្តាខេត្តផ្សេងចូលមកខេត្តកោះកុង ។

ការងារគ្រប់គ្រងជនអនាថា ពុំអាចធ្វើតែឯកឯងបានទេ បើគ្មានការចូលរួមពីរដ្ឋបាលក្រុងស្រុក ត្រូវយល់ពីតួនាទីប្រមូលទិន្នន័យ ឬផ្តល់សេវានីតិសម្បទានសង្គមកិច្ចដល់ក្រុមជនអនាថា ឬជនវិកលចរិត។ បញ្ហានេះ លោកក៏សុំគោលការណ៍ទៅរដ្ឋបាលខេត្តមន្ទីរពាក់ព័ន្ធដើម្បីរួមគ្នាបើកកិច្ចដោះស្រាយប្រមូលទិន្នន័យបានសមស្រប ជៀសវាងខ្វះទំនួលខុសត្រូវចំពោះការងារកំណត់ដោយរាជរដ្ឋាភិបាលកម្ពុជា៕

អត្តបទ៖ សិរីវឌ្ឍនៈ

The post លោកស្រី មិថុនា ភូថង បង្គាប់ឱ្យអាជ្ញាធរស្រុកស្រង់ស្ថិតិជនវិកលចរិត appeared first on Kampuchea Thmey Daily.

លោកជំទាវ មិថុនា ភូថង Archives - Kampuchea Thmey Daily

លោក​ស្រី មិថុនា ភូថង មាន​​ឈាម​ជ័រ​កូនចៅ​​ថ្នាក់​ដឹកនាំ មុន​ឡើង​ជាអភិបាលខេត្តកោះកុង

លោកស្រី មិថុនា ភូថង បង្គាប់ឱ្យអាជ្ញាធរស្រុកស្រង់ស្ថិតិជនវិកលចរិត

លោកស្រី មិថុនា ភូថង មានឈាមជ័រកូនចៅថ្នាក់ដឹកនាំ មុនឡើងជាអភិបាលខេត្តកោះកុង