​​ទីភ្នាក់ងារ​ព័ត៌មាន​​​រុស្ស៊ី TASS បាន​រាយ​ការ​ណ៍ថា​ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova ថា ប្រទេសរុស្ស៊ីនឹងបញ្ជូន​​កំណត់​ទូត​​តវ៉ាទៅកាន់ប្រទេសស៊ុយអែត បន្ទាប់ពីការវាយប្រហារដោយយន្តហោះគ្មានមនុស្សបើកលើស្ថាន​ទូត​រុស្ស៊ី​នៅ​ក្នុងប្រទេសស៊ុយអែត។ ​

លោកស្រី Maria Zakharova និយាយថា៖«​ទីក្រុងស្តុកខុម នឹងទទួលបានកំណត់ត្រានៃការតវ៉ា។ ស៊ុយអែតត្រូវតែទប់ទល់​នឹងភាពជ្រុលនិយមរបស់ខ្លួន គ្រប់គ្រងស្ថានការណ៍ និងគោរពយ៉ាងតឹងរឹងនូវអនុសញ្ញាទីក្រុងវីយែន»​។

ស្ថានទូត​រុស្ស៊ី​​ប្រចាំ​​នៅទីក្រុងស្តុកខុម (Stockholm) ​ត្រូវ​រាយការណ៍​​ថា​ នៅថ្ងៃទី ២៥​ ខែឧសភា ខ្លួន​ត្រូវបានវាយប្រហារដោយយន្តហោះគ្មានមនុស្សបើក ដែលបានទម្លាក់​​ធុង​​ដែលមានថ្នាំពណ៌​នៅជិតច្រកចូលអគារ ដែល​​​រឿង​នេះ​បាន​បង្ក​ការ​ព្រួយបារម្ភ​ដល់​បញ្ហាអ​សន្តិសុខ​ដែល​កំពុង​មាន​និន្នាការ​កើន​ឡើង​​​​។

​ប្រទេសស៊ុយអែត​បាន​បោះបង់​​​ជំហរ​គោល​នយោ​បាយ​ការបរទេស​​​ស្ថិតនៅជាអព្យាក្រឹត្យ​ មិន​ចូលបក្សសម្ព័ន្ធ​ ដោយ​​​ដាក់​ពាក្យចូល​ជាសមាជិក​របស់​អង្គការ​​ប្រដាប់​អាវុធ​ណាតូកាល​ពីឆ្នាំ​២០២២ ពោល​គឺ​ក្រោយ​ប៉ុន្មានខែ​បន្ទាប់​ពីរុស្ស៊ី​លើក​ទ័ព​​លុកលុយ​ចូលប្រទេសអ៊ុយក្រែន​កាល​ពី​​ខែ​កុម្ភៈឆ្នាំ​២០២២​។ ​

​​ប្រទេស​ស៊ុយអែត​ក៏បាន​ក្លាយ​សមាជិក​​ពេញសិទ្ធិរបស់​អង្គការ​ណាតូ កាល​ខែ​មីនា​ឆ្នាំ​២០២៤ បន្ទាប់​ពី​ការខិតខំប្រឹងប្រែង​ផ្នែក​ការទូត​​​ជាច្រើន​ ជាពិសេស​ត្រូវ​​ដោះស្រាយការ​ជំទាស់​របស់​ប្រទេស​តួកគីដែល​ប្រឆាំង​និង​ចោទ​ប្រកាន់​ស៊ុយអែត​ជុំវិញ​ការ​គាំទ្រ​​​ក្រុម​​តស៊ូ​នៅប្រទេសស៊ីរី​ដែលតួកគី​ចោទ​ថា​ជាភេរវករ​។ ​ប្រទេសហុងគ្រី​ ក៏បាន​ពន្យារ​ពេលយូរ​ជាង​គេ​ក្នុងការ​ផ្តល់សច្ចាប័ន​ឲ្យស៊ុយអែត​ចូលជាសមាជិក​របស់​ណាតូ ដោយសារ​តែ​​សម្ព័ន្ធ​ភាព​ជិត​ស្និទ្ធ​របស់​នាយករដ្ឋមន្ត្រី​ ហុងគ្រី លោក Viktor Orban និង​ប្រធានាធិបតី​ រុស្ស៊ី លោក វ្ល៉ាឌីមៀរ ពូទីន​៕​

ដោយ រ៉ាន់ រើយ​

The post ​ក្រសួង​​ការបរទេស​រុស្ស៊ី​តវ៉ា​ទៅ​​ស៊ុយអែត ក្រោយ​ស្ថានទូតខ្លួន​​​រងការវាយប្រហារ​ ​ appeared first on Kampuchea Thmey Daily.

ថ្លែងទៅកាន់វិទ្យុ Sputnik កាលពីថ្ងៃពុធទី២២ខែមីនា លោកស្រីបានទទូចថា សេចក្តីថ្លែងការណ៍របស់ទីក្រុងឡុងដ៍ គឺជាសញ្ញានៃភាពព្រហើន ភាពគ្មានទំនួលខុសត្រូវ និងនិទណ្ឌភាពរបស់សហរដ្ឋអាមេរិក និងអង់គ្លេស។

លោកស្រីសង្កត់ធ្ងន់ថា គ្រាប់អ៊ុយរ៉ានីញ៉ូមចម្រាញ់ មិនត្រឹមតែមានកម្លាំងខ្លាំង និងមានសមត្ថភាពជ្រាបចូលកាន់តែធំប៉ុណ្ណោះទេ ប៉ុន្តែវាថែមទាំងបំពុលដីដោយជាតិវិទ្យុសកម្ម ផ្តល់ការខូចខាតយូរអង្វែងដល់បរិស្ថាន និងប៉ះពាល់ដល់ប្រជាជនជាច្រើនជំនាន់ដែលរស់នៅក្នុងតំបន់នោះផងដែរ។

លោកស្រី Zakharova បន្តថា “អ្វីគ្រប់យ៉ាងដែលយើងបានឮពីសហរដ្ឋអាមេរិក និងចក្រភពអង់គ្លេស ទាក់ទិននឹងសន្តិភាព ការដោះស្រាយជម្លោះ អនាគតរបស់អ៊ុយក្រែន សុខុមាលភាពរបស់ប្រជាជនអ៊ុយក្រែន វាគឺជាការកុហក ការបោកប្រាស់ និងការវង្វេងវង្វាន់របស់សហគមន៍អន្តរជាតិ ហើយការពិត គោលដៅគឺខុសគ្នាទាំងស្រុង” ។

លើសពីនេះ លោកស្រីបានគូសបញ្ជាក់ថា “បន្ទាប់ពីចក្រភពអង់គ្លេស ប្រកាសពីផែនការផ្គត់ផ្គង់គ្រាប់អ៊ុយរ៉ានីញ៉ូមដល់រដ្ឋាភិបាលក្រុងកៀវ គ្មានអ្វីត្រូវងឿងឆ្ងល់ទេថា ចេតនាច្បាស់ៗរបស់លោកខាងលិច ដែលដឹកនាំដោយសហរដ្ឋអាមេរិក និងចក្រភពអង់គ្លេស គឺចង់​ឃើញប្រទេស​អ៊ុយក្រែន ​ត្រូវ​បាន​កម្ទេច​ទាំង​ស្រុង” ។

គួរបញ្ជាក់ជាថ្មី រដ្ឋមន្ត្រីក្រសួងការពាររដ្ឋចក្រភពអង់គ្លេសលោកស្រី Annabel Goldie បាននិយាយកាលពីថ្ងៃអង្គារទី២១ខែមីនាថា ទីក្រុងឡុងដ៍ នឹងផ្តល់ឲ្យអ៊ុយក្រែននូវគ្រាប់ផ្លោងសម្រាប់រថក្រោះប្រយុទ្ធដ៏សំខាន់ប្រភេទ Challenger 2 រួមទាំងគ្រាប់ផ្ទុក​សារ​ធាតុ​វិទ្យុ​សកម្ម​អ៊ុយរ៉ានីញ៉ូម​ផងដែរ។

ជាការឆ្លើយតប ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានព្រមានបញ្ចេញប្រតិកម្មទាំងបង្ខំចិត្ត បើលោកខាងលិច​​ ពិតជាបញ្ជូនគ្រាប់ផ្ទុក​សារ​ធាតុ​វិទ្យុ​សកម្ម ទៅឲ្យអ៊ុយក្រែនមែន៕

ប្រែសម្រួល៖ Vann Vann

ប្រភព៖ RT

ចុចអាន៖ ពូទីន ព្រមានបញ្ចេញប្រតិកម្មទាំងបង្ខំចិត្ត បើលោកខាងលិច​​ បញ្ជូនគ្រាប់ផ្ទុក​សារ​ធាតុ​វិទ្យុ​សកម្ម ទៅឲ្យអ៊ុយក្រែន

The post រុស្ស៊ី ថា លោកខាងលិច ច្បាស់ជាចង់ឃើញអ៊ុយក្រែនខ្ទេចហើយ ទើបបញ្ជូនគ្រាប់អ៊ុយរ៉ានីញ៉ូមទៅ appeared first on Kampuchea Thmey Daily.