ពូទីន ព្រមានបញ្ចេញប្រតិកម្មទាំងបង្ខំចិត្ត បើលោកខាងលិច​​ បញ្ជូនគ្រាប់ផ្ទុក​សារ​ធាតុ​វិទ្យុ​សកម្ម ទៅឲ្យអ៊ុយក្រែន

រដ្ឋមន្ត្រីក្រសួងការពាររដ្ឋចក្រភពអង់គ្លេសលោកស្រី Annabel Goldie បាននិយាយកាលពីថ្ងៃអង្គារទី២១ខែមីនាថា ទីក្រុងឡុងដ៍ នឹងផ្តល់ឲ្យអ៊ុយក្រែននូវគ្រាប់ផ្លោងសម្រាប់រថក្រោះប្រយុទ្ធដ៏សំខាន់ប្រភេទ Challenger 2 រួមទាំងគ្រាប់ផ្ទុក​សារ​ធាតុ​វិទ្យុ​សកម្ម​អ៊ុយរ៉ានីញ៉ូម​ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីរុស្ស៊ី លោក វ្ល៉ាឌីមៀរ ពូទីន និយាយថា “ថ្ងៃនេះ គេបានដឹងថា ចក្រភពអង់គ្លេស តាមរយៈអនុប្រធានក្រសួងការពារជាតិរបស់ខ្លួន បានប្រកាសមិនត្រឹមតែការផ្គត់ផ្គង់រថក្រោះដល់អ៊ុយក្រែនប៉ុណ្ណោះទេ ប៉ុន្តែថែមទាំងគ្រាប់ផ្លោងជាមួយនឹងសារធាតុអ៊ុយរ៉ានីញ៉ូមចម្រាញ់ផងដែរ។ វាហាក់ដូចជាថា លោកខាងលិច​ពិតជា​សម្រេច​ចិត្ត​ប្រយុទ្ធ​ជាមួយ​រុស្ស៊ី​ដល់​​ចុងក្រោយ មិនមែនគ្រាន់តែ​និយាយ​ឲ្យតែបានបាននោះទេ តែ​ជា​ការពិត” ។

លោកពូទីនបានលើកឡើងថា “ចំពោះរឿងនេះ ខ្ញុំចង់បញ្ជាក់ថា ប្រសិនបើអ្វីៗទាំងអស់នេះកើតឡើងមែននោះ រុស្ស៊ីនឹងត្រូវបង្ខំចិត្តបញ្ចេញប្រតិកម្ម។ លោកខាងលិច បានចាប់ផ្តើមប្រើអាវុធដែលមានធាតុផ្សំនុយក្លេអ៊ែររួចទៅហើយ”។

ការ​អត្ថាធិប្បាយ​របស់​លោក​ បាន​ធ្វើ​ឡើង​បន្ទាប់​ពី​កិច្ច​ប្រជុំ​ជាមួយ​គណៈប្រតិភូ​នៃ​មន្ត្រី​ជាន់​ខ្ពស់​ចិន រួម​ទាំង​លោក​ប្រធានាធិបតី​ ស៊ី ជីនពីង ផង​ដែរ។

អ៊ុយរ៉ានីញ៉ូមចម្រាញ់ គឺជាអនុផលនៃដំណើរការចម្រាញ់សារធាតុអ៊ុយរ៉ាញ៉ូមដែលផ្សំឡើងពីសារធាតុអ៊ុយរ៉ានីញ៉ូម-២៣៨។

សារធាតុប្រភេទនេះ មានជាតិវិទ្យុសកម្មដែលអាចបង្កគ្រោះថ្នាក់ដល់មនុស្ស និងមានជាតិពុលខ្ពស់ ដែលធ្វើឲ្យវាក្លាយជាអាវុធដ៏គ្រោះថ្នាក់រយៈពេលយូរ បន្ទាប់ពីបាញ់ចេញ។

ទីតាំងនៅក្នុងប្រទេសអ៊ីរ៉ាក់ និងយូហ្គោស្លាវី ដែលកងកម្លាំងអាមេរិកបានប្រើប្រាស់សារធាតុអ៊ុយរ៉ានីញ៉ូមចម្រាញ់ដើម្បីវាយប្រហារ បានជួបប្រទះការកើនឡើងនៃពិការភាពពីកំណើត និងជំងឺមហារីកទម្រង់កម្រ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ អាមេរិក ជំរុញឲ្យប្រធានាធិបតីចិន ដាក់សម្ពាធលោក ពូទីន ជុំវិញ ឧក្រិដ្ឋកម្ម សង្រ្គាម នៅ អ៊ុយក្រែន