លោក ខៀវ ធី Archives - Kampuchea Thmey Daily

ភ្ញៀវទេសចរនៅខេត្តសៀមរាបធ្លាក់ចុះ ដោយសារសង្គ្រាមថៃឈ្លានពានកម្ពុជា

Din Thary — Tue, 16 Dec 2025 04:23:50 +0000

លោក ខៀវ ធី ប្រធានសមាគមមគ្គុទ្ទេសក៍អង្គរខេត្តសៀមរាប បានឱ្យដឹងថា ការអូសបន្លាយនៃសង្គ្រាមថៃឈ្លានពានមកលើកម្ពុជា បានធ្វើឱ្យភ្ញៀវទេសចរចូលមកទស្សនាខេត្តសៀមរាបធ្លាក់ចុះ ដែលតំបន់អង្គរធ្លាប់តែអូរអរ ប៉ុន្តែពេលនេះប្រែមកជាស្ងប់ស្ងាត់ខុសពីរាល់ដង។

លោក ខៀវ ធី ប្រាប់កម្ពុជាថ្មី នៅថ្ងៃទី ១៦ ខែធ្នូ ឆ្នាំ ២០២៥ថា ចំពោះបញ្ហាបុណ្យឆ្លងឆ្នាំសាកល ២០២៥-២០២៦ គឺប្រហែលជាពុំមានភ្ញៀវទេសចរមកលេងកម្សាន្តច្រើននោះទេ។ ប៉ុន្តែយើងក៏នៅរង់ចាំមើលកិច្ចប្រជុំរដ្ឋមន្ត្រីការបរទេសអាស៊ានដែលនឹងត្រូវធ្វើឡើងនៅថ្ងៃទី ២២ ខែឆ្នូ ខាងមុខនេះ ប្រសិនបើលទ្ធផលនៃកិច្ចប្រជុំអាចទទួលបានផលវិជ្ជមាន នោះឆ្លងឆ្នាំខាងមុខអាចនឹងមានភ្ញៀវទេសចរចូលមកលេងកម្សាន្តច្រើនកុះករវិញ។

លោក ខៀវ ធី យល់ឃើញថា៖ «ប្រសិនបើកិច្ចប្រជុំនៅថ្ងៃទី២២ ទទួលបានលទ្ធផលអវិជ្ជមានថៃនៅតែបន្តរឹងទទឹងមិនព្រមទទួលយកបទឈប់បាញ់ជាមួយកម្ពុជាទេនោះ នោះសម្រាប់បុណ្យឆ្លងឆ្នាំខាងមុខនឹងមិនមានការរៀបចំកម្មវិធីធំឱ្យមានភាពគគ្រឹកគគ្រេងនោះទេ»។

លោក ខៀវ ធី បន្ថែមថា បច្ចុប្បន្នភ្ញៀវទេសចរដែលចូលមកលេងខេត្តសៀមរាប គឺចាប់ផ្តើមមានការធ្លាក់ចុះជាបណ្តើរៗហើយ ក្នុងនោះការកក់ថ្មីៗ ក៏លែងមាន ហើយការកក់ចាស់ៗ ក៏ចាប់ផ្តើមលុបជាបណ្តើរៗ ចាប់តាំងពីសង្គ្រាមផ្ទុះឡើងសារជាថ្មី ដែលយោធាថៃបានបើកការវាយប្រហារមកលើកម្ពុជា កាលពីថ្ងៃទី០៧ ខែធ្នូ កន្លងមក។

យោងតាមគ្រឹះស្ថានអង្គរ ភ្ញៀវទេសចរអន្តរជាតិចំនួនជាង ៨៦ ម៉ឺននាក់ (៨៦៧ ១៩៥) បានទិញសំបុត្រចូលទស្សនារមណីយដ្ឋានអង្គរ ដែលនាំឱ្យកម្ពុជារកចំណូលបាន ៤០ ៤៨០៩៤៥ ដុល្លារ នៅក្នុងរយៈពេល ១១ ខែ ឆ្នាំ ២០២៥ ធ្លាក់ចុះ ៣,៤១% ប្រៀបធៀបនឹង រយៈពេលដូចគ្នានៅឆ្នាំ ២០២៤៕

The post ភ្ញៀវទេសចរនៅខេត្តសៀមរាបធ្លាក់ចុះ ដោយសារសង្គ្រាមថៃឈ្លានពានកម្ពុជា appeared first on Kampuchea Thmey Daily.

Turkish Airline មើលឃើញភាពវិជ្ជមានកម្ពុជា ៣ ចំណុច នាំឱ្យបើកជើងហោះហើរត្រង់

Din Thary — Mon, 08 Dec 2025 03:48:50 +0000

លោក ស សារិន អគ្គនាយកក្រុមហ៊ុនទេសចរណ៍ Channel ជាក្រុមហ៊ុនលក់សំបុត្រយន្តហោះ បានគូសបញ្ជាក់ថា ក្រុមហ៊ុមអាកាសចរណ៍ Turkish Airline បានមើលឃើញពីភាពវិជ្ជមានរបស់កម្ពុជា ៣ ចំណុចដែលជំរុញឱ្យពួកគេបើកជើងហោះហើរត្រង់មកកាន់ប្រទេសកម្ពុជា។

ថ្លែងប្រាប់ «កម្ពុជាថ្មី» លោក ស សារិន បានឱ្យដឹងថា ជាធម្មតាក្រុមហ៊ុនអាកាសចរណ៍មួយមុនពេលដែលសម្រេចចិត្តចូលទៅកាន់ប្រទេសណាមួយ គេនឹងសម្លឹងមើលទៅលើចំណុចជាច្រើន ដែលអាចជាឱកាសសម្រាប់ក្រុមហ៊ុនអាកាសចរណ៍នោះ។

ទី១ គេអាចសម្លឹងមើលទៅលើបញ្ហានយោបាយ ថាតើប្រទេសនឹងមានស្ថេរភាពនយោបាយ ឬក៏អត់ ទី២ មើលទៅលើសេដ្ឋកិច្ច ថាតើប្រទេសដែលត្រូវហោះចូលមកមានសេដ្ឋកិច្ចបែបណាដែរ និងទី៣ គឺទំនាក់ទំនងរវាងប្រទេស និងប្រទេស ប្រជាជន និងប្រជាជន ជាពិសេសមើលទៅលើវិស័យទេសចរ និងការដឹកជញ្ជូនផ្សេងៗ។

លោកថា៖ «ក្រុមហ៊ុនអាកាសចរណ៍មួយៗ មុនដំណើរការ គឺមាន ២ ចំណុចសំខាន់ ទី១ គឺការដឹកភ្ញៀវទេសចរ ដូច្នេះលុះត្រាតែមានឱកាសនៅក្នុងការដឹកភ្ញៀវទេសចរណ៍បានច្រើន ទើបសម្រេចចិត្តបើក។ ទី២ ការដឹកទំនិញពីប្រទេសមួយ ទៅកាន់ប្រទេសមួយ ដូច្នេះប្រសិនបើគេមើលឃើញថា ប្រទេសកម្ពុជា ជាប្រទេសដែលមានសក្តានុពលក្នុងចំណុចទាំងពីរខាងលើនេះ នោះក្រុមហ៊ុមអាកាសចរណ៍នោះនឹងសម្រេចចិត្តហោះមក»។

ជាក់ស្តែង Turkish Airline មុននឹងសម្រេចចិត្តហោះចូលមកកម្ពុជា គឺបានរៀបចំ និងសម្រេចចិត្តបានដិតដល់ជាទីបំផុត ដែលនេះគឺជាការបើកច្រកដ៏សំខាន់មួយសម្រាប់សេដ្ឋកិច្ចខ្មែរទៅទូទាំងពិភពលោក មិនមែនតែ Turkish មួយនោះទេ ព្រោះក្រុមហ៊ុនអាកាសចរណ៍តួគី ក៏ជាក្រុមហ៊ុនអាកាសចរណ៍អន្តរជាតិដ៏ធំមួយ ដូច្នេះនៅពេលដែល Turkish Airline ហោះមកកាន់កម្ពុជាក៏នឹងនាំមកនូវភ្ញៀវទេសចរពីបណ្តាប្រទេសផ្សេងៗជាច្រើនផងដែរ។

លោកក៏បានបន្ថែមថា នៅពេលដែល Turkish Airline ដឹកភ្ញៀវមកកម្ពុជា កម្ពុជាអាចទទួលបានទាំងភ្ញៀវទេសចរ និងឱកាសវិនិយោគ ព្រោះអ្នកដែលហោះចូលមកមិនមែនជាអ្នកដើរលេងទាំងអស់នោះទេ អាចមានអ្នករកស៊ី មានអ្នកវិនិយោគិនមកបណ្តាក់ទុន ក៏បើកអាជីវកម្មផ្សេងៗនៅកម្ពុជា។

ទន្ទឹមនេះ លោក ខៀវ ធី ប្រធានសមាគមន៍មគ្គុទេសករខេត្តសៀមរាប បានឱ្យដឹងថា នេះគឺជាឱកាសល្អដែលជាបន្តបន្ទាប់ប្រទេសកម្ពុជាទទួលបានជើងហោះហើរត្រង់ពីបណ្តាប្រទេសសំខាន់ៗ ដូចជាពី ឥណ្ឌ មកកាន់ក្រុងសៀមរាប ជើងហោះត្រង់ពីតួគី មកកាន់ក្រុងភ្នំពេញ នេះសុទ្ធសឹងតែជាការរួមចំណែកក្នុងការអភិវឌ្ឍន៍វិស័យទេសចរណ៍។

លោក ខៀវ ធី បានមានប្រសាសន៍ថា ការហោះហើរត្រង់ពីតួគីមកកាន់ក្រុងភ្នំពេញ គឺជាកត្តាល្អ ដោយសារតែមិនមែនមានតែភ្ញៀវទេសចរណ៍តួកគីប៉ុណ្ណោះទេ តែថែមទាំងមានភ្ញៀវជាជនជាតិអឺរ៉ុបនាំមកកាន់កម្ពុជាដូចគ្នាដែរ។

ទន្ទឹមនេះ កម្ពុជាក៏ត្រូវតែធ្វើការផ្សព្វផ្សាយពីសក្តានុពលទេសចរណ៍ និងកត្តាសុវត្តិភាព ព្រោះបច្ចុប្បន្នយើងឃើញមានការនិយាយមិនល្អពីប្រទេសកម្ពុជាពាក់ព័ន្ធនឹងការចាប់ជម្រិតជាដើម ដែលនេះជារឿងមិនល្អ ជាការទទួលបាននូវព័ត៌មានមិនពិត។ ដូច្នេះ បញ្ហានេះ លោកសំណូមពរដល់ក្រសួងទេសចរណ៍ ក្រសួងការបរទេស ក្រសួងមហាផ្ទៃធ្វើយុទ្ធាការណ៍ទស្សនាកម្ពុជាក្នុងលក្ខណៈសុវត្ថិភាព ១០០% ដើម្បីនាំភ្ញៀវទេសចរមកកាន់កម្ពុជា ស្របពេលដែលយើងកំពុងតែមានជើងហោះហើរត្រង់ជាបន្តបន្ទាប់។

ក្រុមហ៊ុនអាកាសចរណ៍តួកគី Turkish Airline នឹងតភ្ជាប់ជើងហោះហើរត្រង់ពីទីក្រុង អ៊ីស្តង់ប៊ូល (Istanbul) មកកាន់រាជធានីភ្នំពេញ ចាប់ពីថ្ងៃទី ១១ ខែធ្នូ ឆ្នាំ២០២៥ ខាងមុខនេះ ដើម្បីពង្រឹងទំនាក់ទំនងទេសចរណ៍ ធុរកិច្ច និងវិនិយោគ។

ការតភ្ជាប់ជើងហោះហើរថ្មីនេះ នឹងជួយលើកកម្ពស់វិស័យទេសចរណ៍ និងបើកឱកាសថ្មីៗ សម្រាប់ការផ្លាស់ប្តូរវប្បធម៌ និងសហប្រតិបត្តិការសេដ្ឋកិច្ចរវាងប្រទេសទាំងពីរ ក៏ដូចជាពង្រីកជើងមេឃកម្ពុជាឱ្យកាន់តែទូលាយ ពង្រឹងនូវចំណងការទូតរវាងរាជរដ្ឋាភិបាលកម្ពុជា និងតួគី៕

The post Turkish Airline មើលឃើញភាពវិជ្ជមានកម្ពុជា ៣ ចំណុច នាំឱ្យបើកជើងហោះហើរត្រង់ appeared first on Kampuchea Thmey Daily.

អ្នកជំនាញថា វិស័យទេសចរណ៍កាន់តែរីកចម្រើន ក្រោយតភ្ជាប់ជើងហោះហើរត្រង់កម្ពុជា-ឥណ្ឌា

Din Thary — Wed, 19 Nov 2025 04:12:20 +0000

លោក ធួន ស៊ីណាន ប្រធានសមាគមន៍ទេសចរណ៍កម្ពុជា បានឱ្យដឹងថា នេះគឺជាលើកទីមួយនៅក្នុងប្រវត្តិសាស្ត្រ សម្រាប់ការហោះហើរត្រង់ពីទីក្រុងកុលកាតា ប្រទេសឥណ្ឌា មកកាន់ខេត្តសៀមរាប ដែលមានសារៈសំខាន់ក្នុងការអភិវឌ្ឍខ្សែទស្សនកិច្ច, អភិវឌ្ឍវិស័យទេសចរណ៍ និងការវិនិយោគរវាងកម្ពុជា-ឥណ្ឌា។

ថ្លែងប្រាប់ «កម្ពុជាថ្មី» លោក ធួន ស៊ីណាន បានលើកឡើងថា នេះគឺជាខ្សែទី២ ហើយ ដែលឥណ្ឌាបានតភ្ជាប់ជើងហោះហើរត្រង់មកកាន់កម្ពុជា ដោយខ្សែទី១ ហោះហើរទៅកាន់រាជធានីភ្នំពេញ និងខ្សែទី២ ហោះហើរមកកាន់ខេត្តសៀមរាប។

លោកថា ប្រសិនបើយើងធៀបជាមួយប្រទេសវៀតណាមវិញ ជារៀងរាល់ថ្ងៃ គឺមានការហោះហើរត្រង់មកកាន់ទីក្រុងរបស់គេ ៣ ទៅ ៤ ទីក្រុង ដោយឡែកសម្រាប់កម្ពុជាយើងទើបតែមាន ២ ខ្សែប៉ុណ្ណោះ មកកាន់រាជធានីភ្នំពេញ និងខេត្តសៀមរាបនេះ។

«បើទោះបីជាមិនទាន់មានខ្សែហោះហើរត្រង់ច្រើនជើងក៏ដោយ ប៉ុន្តែនេះ គឺជាសមិទ្ធផលថ្មីដែលយើងត្រូវតែរីករាយអបអរសាទរ ជួយគាំទ្រនៅក្នុងការផ្សព្វផ្សាយដើម្បីធ្វើយ៉ាងណាឱ្យការហោះហើរនេះនឹងពង្រីកការបន្ថែមបន្តបន្ទាប់ទៀត»។ លោក ធួន ស៊ីណាន បន្ថែមយ៉ាងដូច្នេះ។

ទន្ទឹមនេះ លោក ខៀវ ធី ប្រធានសមាគមន៍មគ្គុទេសករខេត្តសៀមរាបក៏បានឱ្យ«កម្ពុជាថ្មី» ដឹងបន្ថែមថា ពាក់ព័ន្ធនឹងជើងហោះហើររបស់ក្រុមហ៊ុនអាកាសចរណ៍ Indigo មកកាន់ខេត្តសៀមរាបនេះ គឺជាកត្តាមួយដែលល្អខ្លាំង ហើយក៏ជាជោគជ័យផ្នែកនយោបាយទេសចរណ៍របស់រាជរដ្ឋាភិបាលកម្ពុជា។ ព្រោះយើងអាចឱ្យអន្តរជាតិហោះត្រង់មកកាន់ប្រទេសកម្ពុជា ជាពិសេសឱ្យមកឃើញប្រសាទសាសនាព្រាហ្មណ៍របស់ខ្មែរយើងនៅសម័យអង្គរ ព្រោះថាភ្ញៀវទេសចរឥណ្ឌា គឺមានមោទនភាពណាស់ដែលមានប្រសាទសាសនាហិណ្ឌូនៅក្រៅប្រទេស។

ម្យ៉ាងទៀត ភ្ញៀវទេសចរឥណ្ឌាក៏ចូលចិត្តទៅលេងនៅភ្នំគូលែន ស្ទឹងលិង្គ ១០០០ ដែលជានិមិត្តរូបនៃសាសនាព្រាហ្មណ៍ ដែលនេះគឺជាទីទាក់ទាញភ្ញៀវទេសចរឥណ្ឌាមកទស្សនាកម្ពុជាកាន់តែច្រើន។ មួយវិញទៀត មិនត្រឹមតែទាក់ទាញភ្ញៀវទេសចរឥណ្ឌាប៉ុណ្ណោះទេ ទេសចរដទៃទៀតដូចជា អឺរ៉ុប អាមេរិក អូស្ត្រាលី កាណាដា ជាដើមនោះ ក៏អាចតជើងហោះហើរត្រង់ពីឥណ្ឌាមកកាន់កម្ពុជាផងដែរ។

លោក ខៀវ ធី បន្ថែមដែរថា យើងបានដឹងហើយថា កាលណាមានភ្ញៀវទេសចរចូលមកទស្សនាប្រទេសយើងកាន់តែច្រើន ដូច្នេះវិស័យសេដ្ឋកិច្ច ក៏ដូចជាកសិកម្មនឹងរីកចម្រើនដូចគ្នាដែរ ព្រោះកសិករកម្ពុជា ៨០% ប្រកបរបរដាំដំណាំស្រូវ បន្លែ ផ្លែ ឈើផ្សេងៗ ហើយភ្ញៀវទេសចរត្រូវការអាហារបរិភោគ ដូច្នេះតាមរយៈនេះនឹងជួយរុញច្រានជីវភាពប្រជាជនឱ្យមានការរីកចម្រើនជាបន្តបន្ទាប់។

លោកបានសង្កត់ធ្ងន់ថា ទេសចរណ៍ជាវិស័យបៃតង ដូច្នេះទេសចរណ៍រីកចម្រើន វានឹងទៅជួយទាញវិស័យផ្សេងៗទៀតឱ្យមានការរីកចម្រើនទៅព្រមៗគ្នា។

គួរបញ្ជាក់ថា ក្រុមហ៊ុនអាកាសចរណ៍ IndiGo Airlines របស់ឥណ្ឌា ទើបតែបានតភ្ជាប់ជើងហោះហើរត្រង់លើកដំបូងរបស់ខ្លួនពីទីក្រុង Kolkata មកខេត្តសៀមរាប ចាប់ពីថ្ងៃទី ១៣ ខែវិច្ឆិកា ឆ្នាំ ២០២៥ កន្លងទៅ ដែលធ្វើការហោះហើរចំនួន ៣ ជើងក្នុងមួយសប្តាហ៍។

ការហោះហើរត្រង់មកកម្ពុជាដំណើរការដោយយន្តហោះ Airbus A320neo ដែលនឹងចូលរួម ពង្រឹងវិស័យទេសចរណ៍ និងពាណិជ្ជកម្មទ្វេភាគីកម្ពុជា-ឥណ្ឌា៕

The post អ្នកជំនាញថា វិស័យទេសចរណ៍កាន់តែរីកចម្រើន ក្រោយតភ្ជាប់ជើងហោះហើរត្រង់កម្ពុជា-ឥណ្ឌា appeared first on Kampuchea Thmey Daily.

ការប៉ះទង្គិចគ្នារវាងកម្ពុជា-ថៃ បង្កផលប៉ះដល់លំហូភ្ញៀវក្នុងវិស័យទេសចរណ៍

Din Thary — Sat, 07 Jun 2025 01:08:00 +0000

អ្នកនៅក្នុងឧស្សាហកម្មទេសចរណ៍បានលើកឡើងថា ប៉ុន្មានថ្ងៃបន្ទាប់ពីមានការប៉ះទង្គិចគ្នារវាងប្រទេសជិតខាងទាំងពីរកាលពីថ្ងៃទី២៨ ខែឧសភាកន្លងទៅនេះបានកំពុងជះផលអវិជ្ជមាននៃវិស័យទេសចរណ៍ ខណៈកញ្ចប់គម្រោងទស្សនកិច្ចពីខាងប្រទេសថៃចូលមកកាន់កម្ពុជាត្រូវបានលុបចោលស្ទើរតែទាំងអស់ ហើយសម្រាប់កញ្ចប់ទេសចរណ៍កម្ពុជាទៅកាន់ប្រទេសថៃវិញក៏ត្រូវបានលុបចោលវិញដូចគ្នាដែរ។

ជុំវិញបញ្ហាជម្លោះព្រំដែន រវាងកម្ពុជា-ថៃនេះ លោក ធួន ស៊ីណាន ប្រធានសមាគមទេសចរណ៍អាស៊ី ប៉ាស៊ីហ្វិកកម្ពុជា បានលើកឡើងថា បញ្ហាដែលកំពុងតែប៉ះទង្កិចរវាងប្រទេសទាំងពីរនេះ វាបានបង្កផលប៉ះដល់ដូចគ្នាទៅដល់វិស័យទេសចរណ៍នៃប្រទេសទាំងពីរ។ លោកថា៖«សូម្បីតែសំបុត្រយន្តហោះក៏ត្រូវបានលុបចោល ព្រោះដូចយើងបានដឹងស្រាប់ហើយថាប្រទេសថៃ គឺជាគោលដៅដ៏ពេញនិយមមួយរបស់កម្ពុជា ប៉ុន្តែចាប់តាំងពីមានបញ្ហាមក ប្រជាជនថៃ និងប្រជាជនកម្ពុជា បានផ្អាកការធ្វើដំណើរកម្សាន្ត លើកលែងតែអ្នកដែលត្រូវពិនិត្យជំងឺ និងអ្នកដែលមានការងារសំខាន់ៗដែលពាក់ព័ន្ធទៅនិងបញ្ហាសុខភាព និងពាណិជ្ជកម្មរបស់ខ្លួនប៉ុណ្ណោះ»។

ស្របពេលជាមួយគ្នានេះ លោក ខៀវ ធី ប្រធានសមាគមមគ្គុទេសក៍ទេសចរអង្គរ បានឱ្យដឹងថា ចាប់តាំងពីប្រសាទព្រះវិហារបានចូលជាសម្បត្តិ បេតិកភណ្ឌពិភពលោកកាលពីឆ្នាំ២០០៨ មក ទេសចរថៃ ដែលចូលមកទស្សនាប្រសាទអង្ករវត្តមានការធ្លាក់ចុះច្រើន បើទោះបីជាមានក៏ក្នុងរង្វង់តិចតួចប៉ុណ្ណោះ។

ដោយសារតែភ្ញៀវទេសចរថៃថយចុះជាបន្តបន្ទាប់ ក្នុងនោះមគ្គុទ្ទេសក៍ទេសចរភាសាថៃ ក៏ងាកមកចាប់ផ្តើមរៀនភាសាផ្សេងៗមួយចំនួនវិញផងដែរ។

ប៉ុន្តែប្រសិនបើនិយាយពីកាស៊ីណូ នៅតាមបណ្តោយព្រំដែនវិញ លោក ខៀវ ធី បានមានប្រសាសន៍ថា «តាមកាស៊ីណូគឺនៅតែមានជនជាតិថៃឆ្លងដែនចូលមកលេងខ្លះៗ ប៉ុន្តែសម្រាប់ភ្ញៀវទេសចរដែលដើរកម្សាន្តនៅប្រសាទអង្គរវត្ត និងចូលជ្រៅមកកាន់កម្ពុជា គឺមិនមាននោះទេ»។

លោក ខៀវ ធី បានលើកឡើងថា «ខ្ញុំយល់ថា ដោយសារជនជាតិថៃ ជាជនជាតិ ជាតិនិយម ដូច្នេះនៅពេលដែលមាន អរិភាពជាមួយប្រទេសណាហើយ តែងតែមានចិត្តឆេវឆាវ ហើយការប៉ះទង្គិចគ្នារវាងកម្ពុជា-ថៃ នេះទៀតសោទ ពិតណាស់ថាជនជាតិនេះនឹងមិនចូលមកទស្សនាកម្ពុជាច្រើនដូចនៅមុនឆ្នាំ២០០៨ កន្លងមកអញ្ចឹង»។

«ដោយឡែកចំពោះស្ថានភាពភ្ញៀវទេសចរទូទៅវិញ ដូចជាភ្ញៀវទេសចរអឺរ៉ុប អូស្ត្រាលី អាមេរិក កាណាដា ជប៉ុន និងទេសចរមួយចំនួន គឺនៅតែចូលមកទស្សនាប្រទេសកម្ពុជាដដែល មិនមានអ្វីគួរឱ្យព្រួយបារម្ភនោះទេ។ ក្នុងនោះចំពោះភ្ញៀវទេសចរថៃ យើងមិនបារម្ភនោះទេថា ពួកគេមកឬមិនមកទស្សនានៅកម្ពុជា ព្រោះយើងផ្តោតសំខាន់ទៅលើភ្ញៀវជនជាតិអឺរ៉ុបតែប៉ុណ្ណោះ»។ លោក ខៀវ ធី បន្ថែមបែបនេះ។

លោកបានអះអាងថា «ភ្ញៀវទេសចរអឺរ៉ុប ចូលចិត្តវប្បធម៌ ប្រពៃណី ទំនៀមទម្លាប់ខ្មែរ និងអង្គរវត្តរបស់ខ្មែរ ដូច្នេះច្បាស់ណាស់ថាគេនឹងនៅតែមកលេងកម្ពុជា។ មួយវិញទៀត ទេសចរចិន តាមរយៈការធ្វើគោលនយោបាយរបស់រាជរដ្ឋាភិបាល លោកសង្ឃឹមថា ភ្ញៀវទេសចរចិននឹងចូលមកទស្សនាកម្ពុជាកាន់តែច្រើន តាមរយៈការដោះដូរប្រជាជន និងប្រជាជនរវាងប្រទេសទាំងពីរ»។

ជាមួយគ្នានេះ លោក រនតា នរិន្ទ អ្នកគ្រប់គ្រងទូទៅនៃសណ្ឋាគារ ភីតអេលីត ប៊ូទិក ខេត្តសៀមរាប បានឱ្យដឹងថា ទាក់ទងទៅនិងការកក់បន្ទប់សណ្ឋាគារនាពេលបច្ចុប្បន្ននេះគឺនៅមានចំនួនថេរនៅឡើយមិនទាន់មានការថយចុះនោះទេ ដែលភាគច្រើនជាជនខ្មែរ និងជនបរទេសជាដើម គឺមិនមានភ្ញៀវជាជនជាតិថៃនោះទេ។

ក្នុងនោះ នៅក្នុងខែឧសភា កន្លងទៅនេះ មានភ្ញៀវប្រមាណជាង ៦០០នាក់ ដែលបានចូលមកកក់សណ្ឋាគារនៅ ក្នុងខេត្តសៀមរាបផ្ទាល់។

ដោយឡែក ផ្ទះសំណាក់ព្រះសំណាក់មរតព្រះវិហារ នាខេត្តព្រះវិហារឯណោះវិញ ក៏បានឱ្យដឹងដែរថា បច្ចុប្បន្នការចូលស្នាក់គឺមិនសូវជាមានចំនួនច្រើននោះទេ ក្នុងនោះមានភ្ញៀវមានប្រមាណ ២០% ដែលធ្វើការកក់ចូលស្នាក់នៅ និងភ្ញៀវប្រមាណ ៨០% ទៀត ចូលមកស្នាក់នៅផ្ទាល់ៗ ទាំងភ្ញៀវទេសចរនៅក្នុងស្រុក និងជនជាតិបរទេសជាដើម។

យោងតាមក្រសួងទេសចរណ៍ បានឱ្យដឹងថា កម្ពុជាទទួលបានភ្ញៀវទេសចរអន្តរជាតិជាង ២,៤ លាននាក់ នៅក្នុងរយៈពេល ៤ ខែ ដើមឆ្នាំ ២០២៥ (មករា-មេសា) កើនឡើង ១៣,៦% ធៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមភ្ញៀវទេសចរជាង ៦,៧ លាននាក់ ទេសចរណ៍ថៃឈរនៅលំដាប់លេខរៀងទី ១ មានចំនួន ២,១៤ លាននាក់ កើនជិត ១៨%៕

The post ការប៉ះទង្គិចគ្នារវាងកម្ពុជា-ថៃ បង្កផលប៉ះដល់លំហូភ្ញៀវក្នុងវិស័យទេសចរណ៍ appeared first on Kampuchea Thmey Daily.

៨ ខែ ឆ្នាំ ២០២៤ កម្ពុជាទទួលបានទេសចរបរទេសមកទស្សនាជាង ៤ លាននាក់

Dy Bunnara — Tue, 08 Oct 2024 04:03:42 +0000

ក្នុងរយៈពេល ៨ ខែ ឆ្នាំ ២០២៤ កម្ពុជាទទួលបានទេសចរបរទេសមកទស្សនាជាង ៤ លាន ២ សែននាក់។ នេះបើតាមលោក តុប សុភ័ក្រ រដ្ឋលេខាធិការ និងជាអ្នកនាំពាក្យក្រសួងទេសចរណ៍បានឲ្យកម្ពុជាថ្មីដឹងនៅរសៀលថ្ងៃ ៧ ខែតុលា ឆ្នាំ ២០២៤។

បើធៀបរយៈពេលដូចគ្នាឆ្នាំ ២០២៣ ការវិលត្រឡប់របស់ទេសចរបរទេសសម្រេចបានប្រមាណជាង ៩៧% នៅក្នុងក្របខណ្ឌទូទាំងប្រទេស។

យ៉ាងណាមិញ មន្រ្តីក្រសួងទេសចរណ៍រូបនេះបានបញ្ជាក់ថា ការងើបឡើងវិញនៃវិស័យទេសចរណ៍មានភាពខុសៗគ្នាតាមតំបន់គោលដៅទេសចរណ៍ដូចជា តំបន់អេកូទេសចរណ៍នៅភូមិភាគឦសាន តំបន់បេតិកភណ្ឌនៅខេត្តសៀមរាប និងតំបន់មាត់សមុទ្រ តែនិយាយជារួមក្នុងក្របខ័ណ្ឌទូទាំងប្រទេសការវិលត្រឡប់មកវិញនៃទេសចរបរទេសសម្រេចបានប្រហែល ៩៧%។

កម្ពុជាកំពុងស្តារវិស័យទេសចរណ៍ឡើងវិញ ហើយបើតាមការព្យាករណ៍ឆ្នាំ ២០២៤ កម្ពុជាអាចទទួលបានទេសចរបរទេសក្នុងរង្វង់ ៦ លាននាក់។ លោក តុប សុភ័ក្រ បានបន្តថា ចាប់ពីខែតុលានេះទៅ កម្ពុជានឹងទទួលបានកំណើនទេសចរអន្តរជាតិកាន់តែច្រើនថែមទៀត ខណៈជារដូវដែលទេសចរដើរកម្សាន្តច្រើន។

នៅឆ្នាំ ២០១៩ កម្ពុជាទទួលបានទេសចរបរទេសមកទស្សនាប្រមាណ ៦ លាន ៦ សែននាក់ ដែលជាកំណត់ត្រាខ្ពស់បំផុត។ យ៉ាងណាមិញ វិបត្តិជំងឺកូវីដបានធ្វើឲ្យប៉ះពាល់រំខានដល់ការធ្វើដំណើររបស់ភ្ញៀវទេសចរ។ ឆ្នាំ ២០២០ ទេសចរបរទេសធ្វើដំណើរមកទស្សនាប្រទេសកម្ពុជា បានថយចុះមកត្រឹមប្រមាណ ១ លាន ១ សែននាក់ និងនៅឆ្នាំ ២០២១ ធ្លាក់មកត្រឹម ១៩ ម៉ឺននាក់។ នៅឆ្នាំ ២០២២ ស្ថានភាពវិស័យទេសចរណ៍ប្រទេសកម្ពុជា ចាប់ផ្តើមងើបឡើងវិញបន្តិច ដោយកម្ពុជាទទួលបានទេសចរបរទេសមកទស្សនាប្រមាណ ២ លាន ២ សែន នាក់ ខណៈឆ្នាំ២០២៣ កម្ពុជាទទួលបានភ្ញៀវទេសចរបរទេសប្រមាណ ៥ លាន ៤ សែននាក់ កើនឡើង ១៣៩.៥% បើធៀបនឹងឆ្នាំ២០២២។

មន្រ្តីក្រសួងទេសចរណ៍បានអះអាងថា នៅឆ្នាំ ២០២៥ ការងើបឡើងវិញនៃវិស័យទេសចរណ៍របស់ប្រទេសកម្ពុជា នឹងវិលត្រឡប់ទៅរកស្ថានភាពដូចមុនវិបត្តិកូវីដ-១៩។

«ឆ្នាំ ២០២៣ លំហូរនៃការធ្វើដំណើររបស់ទេសចរបរទេស ចាប់ផ្តើមមានការកើនឡើង។ ឆ្នាំ ២០២៣ កម្ពុជាបានស្តារឡើងវិញនៃវិស័យទេសចរណ៍បាន ៨៣% ហើយឆ្នាំ ២០២៥ កម្ពុជារំពឹងនឹងឈានសម្រេចគោលដៅទទួលបានកំណើនភ្ញៀវទេសចរបរទេសដូចមុនវិបត្តិជំងឺកូវីដ»។ លោក តុប សុភ័ក្របញ្ជាក់បន្ថែម។

ជាមួយគ្នានេះ លោកក៏លើកឡើងពាក់ព័ន្ធការដាក់ឲ្យដំណើរការប្រព័ន្ធសាលាកបត្រចូលប្រទេស E arrival ដែលរដ្ឋាភិបាលបានដាក់ឲ្យដំណើរការនៅតាមច្រកព្រលានយន្តហោះអន្តរជាតិ ដែលបានជួយសម្រួលដល់ការធ្វើដំណើររបស់ភ្ញៀវទេសចរនិងអ្នកដំណើរមិនឲ្យមានការរំខាន ដែលធ្វើឲ្យចេញចូលកាន់តែមានភាពងាយស្រួល ប្រសើរជាងមុនក៏បានជួយទាក់ទាញទេសចរមកកម្សាន្តប្រទេសកម្ពុជាកាន់តែច្រើនថែមទៀត។

យ៉ាងណាមិញ លោក ខៀវ ធី ប្រធានសមាគមន៍មគ្គុទ្ទេសក៍ទេសចរអង្គរបានឲ្យកម្ពុជាថ្មីដឹងថា លោកមិនទាន់ហ៊ានរំពឹងទុកថា កំណើនទេសចរមកកម្សាន្តប្រទេសកម្ពុជា អាចនឹងមានស្ថានភាពល្អប្រសើរដូចមុនកូវីដ ដោយសារលោកមើលឃើញបញ្ហាមួយចំនួនបានសម្អុយឈ្មោះប្រទេសកម្ពុជា ឲ្យទេសចរបរទេសរារែកចិត្តក្នុងការធ្វើដំណើរមកទស្សនាប្រទេសកម្ពុជា។

លោកលើកឡើងករណីការផ្សព្វផ្សាយពីករណីឆបោកតាមអនឡាញ បញ្ហាចាប់ជំរិតរួមទាំងបញ្ហាសន្តិសុខសុវត្ថិភាពដែលបានប៉ះពាល់ដល់អារម្មណ៍ភ្ញៀវទេសចរ។

ជាមួយគ្នានេះ កង្វះខាតការតភ្ជាប់នៃការធ្វើដំណើររបស់ទេសចរ ដែលត្រូវចំណាយខ្ពស់បើធៀបប្រទេសជិតខាង ក៏បង្អាក់ទាក់ទាញទេសចរមកកម្សាន្តប្រទេសកម្ពុជាផងដែរ៕

The post ៨ ខែ ឆ្នាំ ២០២៤ កម្ពុជាទទួលបានទេសចរបរទេសមកទស្សនាជាង ៤ លាននាក់ appeared first on Kampuchea Thmey Daily.

ប្រធានសមាគមស្នើឱ្យកែប្រែ៦ចំណុច ដើម្បីទាក់ទាញភ្ញៀវទេសចរអន្តរជាតិ

Sophal Tuon — Fri, 23 Feb 2024 07:19:44 +0000

ប្រធានមគ្គទេសក៍ទេសចរណ៍ បានលើកឡើងនូវចំណុចអវិជ្ជមានចំនួន៧ ដែលត្រូវពង្រឹង និងកែប្រែ ដើម្បីទាក់ទាញភ្ញៀវទេសចរឱ្យចូល ទៅកម្សាន្តនៅខេត្តសៀមរាប។

ចំណុចទាំង៧នោះ រួមមានដូចជា ការពង្រឹងផ្នែកបដិសណ្ឋារកិច្ច បរិស្ថាន(សំរាមតាមដងផ្លូវ) គំនូសចរាចរណ៍ សណ្តាប់ធ្នាប់ការចតយានយន្ត ការកែច្នៃសួនច្បារតាមដងផ្លូវ និងវត្តអារាម ជាដើម។

លោក ខៀវ ធី ប្រធានសមាគមមគ្គទេសក៍ទេសចរណ៍អង្គរ បានពន្យល់នូវចំណុចនីមួយៗដូច្នេះថា ការពង្រឹងផ្នែកសេវាកម្មបដិសណ្ឋារកិច្ច ចាប់ពីប៉ូលិស អន្តោប្រវេសន៍ អ្នកបើកបរ រត់តាក់ស៊ី អ្នកសេវាកម្មក្នុងសណ្ឋាគារ ផ្ទះសំណាក់ និងភោជនីយដ្ឋាន ជាដើម ត្រូវចេះបង្កើនកិច្ចសហការ ញញឹម រួសរាយរាក់ទាក់ ដែលជាគន្លឹះធ្វើឱ្យអ្នកទេសចរមានក្តីសប្បាយរីករាយ កោតសរសើរ និងត្រឡប់នាំគ្រួសារមកលេងបន្តបន្ទាប់ទៀត។

ទន្ទឹមនឹងនេះ ទាក់ទងនឹងបញ្ហាបរិស្ថាន លោក ខៀវ ធី មើលឃើញថា បញ្ហាបរិស្ថាន សំរាម គឺជារឿងស្មុគស្មាញដែលពិបាកដោះស្រាយ។ លោកថ្លែងប្រាប់កម្ពុជាថ្មីថា«នៅក្នុងប្រទេសយើង សំរាមពង្រាយគ្រប់ទីកន្លែង ធ្វើឱ្យយើងមានការអាម៉ាស់ចំពោះភ្ញៀវ..ជាក់ស្តែងបើយើងធ្វើដំណើរតាម ផ្លូវគោកពីភ្នំពេញ ទៅសៀមរាប ក្រឡែកឃើញសំរាមនៅតាមដងផ្លូវច្រើនណាស់ ដែលធ្វើឱ្យអ្នកទេសចរវាយតម្លៃថា ស្រុកយើងគ្មានអនាម័យ និងវិន័យល្អ»។ បញ្ហានេះ លោកស្នើដល់អាជ្ញាធរ គួរដាក់ពិន័យ ឬបម្រាមកុំឱ្យមានការចោលសំរាមពាសវាលពាសកាល ហើយអាជ្ញាធរត្រូវសម្អាតនៅតាមមូលដ្ឋានខ្លួន ជាពិសេសនៅតាមផ្លូវជាតិ។

ជាមួយគ្នានេះ បញ្ហាគំនូសចរាចរណ៍ ក៏ជាផ្នែកមួយធ្វើឱ្យប៉ះពាល់ទៅដល់អ្នកទេសចរផងដែរ។ លោក ខៀវ ធី លើកឡើងថា នៅតាមដងផ្លូវជាតិជាច្រើន មិនមានគំនូសចរាចរណ៍នោះទេ ខុសពីប្រទេសជិតខាង ថៃ វៀតណាម តាមដងផ្លូវប្រទេសគេមានគំនូសច្បាស់ងាយស្រួលសម្រាប់អ្នកទេសចរធ្វើដំណើរពីតំបន់មួយទៅតំបន់មួយទៀត។ ដូច្នេះក្រសួងសាធារណការ និងដឹកជញ្ជូន និងថ្នាក់ដឹកនាំខេត្តនីមួយៗ គួរតែពង្រឹងលើបញ្ហានេះ ព្រោះហេដ្ឋារចនាសម្ព័នផ្លូវថ្នល់រលោងស្អាតហើយ ប៉ុន្តែខ្វះចន្លោះគំនូសផ្លូវឱ្យបានត្រឹមត្រូវ។

ចំណែកការចតយានយន្តពុំមានសណ្តាប់ធ្នាប់ និងលក់ដូរលើផ្លូវថ្មើរជើង ក៏ជាបញ្ហាប៉ះពាល់ដល់វិស័យទេសចរណ៍ផងដែរ។

ប្រធានសមាគមមគ្គទេសក៍ទេសចរណ៍ មើលឃើញទៀតថា នៅតាមដងផ្លូវ និងតំបន់ទេសចរណ៍មានសួនច្បារជាច្រើនខ្វែងខ្វាត់ ប៉ុន្តែខ្វះការយកចិត្តទុកដាក់ពីអាជ្ញាធរដែនដី ធ្វើឱ្យបាត់បង់សម្រស់សួន ដែលជាការទាក់ទាញទេសចរដ៏សំខាន់ផងដែរ។

ចំណុចចុងក្រោយដែលជាកន្លែងទាក់ទាញទេសចរផងដែរនោះ គឺទីវត្តអារាម។ លោក ខៀវ ធី បានលើកឡើងថា ភ្ញៀវទេសចរបរទេសចូលចិត្តទស្សនាទីវត្តអារាមខ្លាំងណាស់។ នៅកម្ពុជា មានវត្តអារាមចំណាស់ជាច្រើន ដែលទាក់ទាញទេសចរ។ ប៉ុន្តែទីវត្តអារាមខ្លះ មានបរិស្ថានមិនល្អ បង្កឱ្យបាត់បង់សណ្តាប់ធ្នាប់ និងប៉ះពាល់ដល់ទេសចរណ៍។

បើតាមប្រធានសមាគមមគ្គទេសក៍ទេសចរណ៍ វិស័យទេសចរណ៍មានកំណើនខ្ពស់ ចំណូលពន្ធដារក៏កើនឡើងពលរដ្ឋអាចរកចំណូលបានច្រើន និងជួយកំណើនសេដ្ឋកិច្ចជាតិ៕

The post ប្រធានសមាគមស្នើឱ្យកែប្រែ៦ចំណុច ដើម្បីទាក់ទាញភ្ញៀវទេសចរអន្តរជាតិ appeared first on Kampuchea Thmey Daily.

អ្នកជំនាញបង្ហើបពីយុទ្ធសាស្រ្តទាក់ទាញភ្ញៀវទេសចរអន្តរជាតិ

Sophal Tuon — Tue, 03 Oct 2023 00:00:00 +0000

វិស័យទេសចរណ៍ក្នុងប្រទេសកម្ពុជា នៅតែជារឿងក្តៅ ដែលសាធារណជន កត់សម្គាល់ឃើញថា មានការធ្លាក់ចុះច្រើនក្នុងរយៈពេលចុងក្រោយនេះ ប៉ុន្តែស្ថាបនពាក់ព័ន្ធពិសេសក្រសួងទេសចរណ៍ បានចេញរបាយការណ៍បង្ហាញពីកំណើននៃភ្ញៀវទេសចរមានការកើនឡើង។ អ្នកជំនាញទេសចរ បានកត់សម្គាល់ឃើញថា វិស័យទេសចរណ៍មានកំណើនល្អប្រសើរស្មើនឹងប្រទេសជិតខាងដែរ កាលពីមុនវិបត្តិកូវីដ-១៩។ ប៉ុន្តែក្រោយវិបត្តិកូវីដនេះ ប្រទេសជិតខាងហាក់មានសន្ទុះកើនឡើងខ្លាំង បន្ទាប់ពីមានការដករបាំងទិដ្ឋាការដល់ប្រទេសធំៗជាច្រើន។

លោក ហូ វណ្ឌី ប្រធានក្រុមប្រឹក្សាភិបាលនៃសមាគមទេសចរណ៍កម្ពុជា បានលើកឡើងថា ការលើកលែងទិដ្ឋាការ បានផ្តល់ឱកាសឱ្យប្រទេសថៃ ស្រូបទាញទេសចរអន្តរជាតិប្រមាណ ១០០ប្រទេស ហូរចូលយ៉ាងគំហុក។ ដោយឡែកប្រទេសវៀតណាម ទាក់ទាញបានប្រមាណ ៣០ប្រទេសឱ្យចូលទៅលេងកម្សាន្តប្រទេសរបស់ខ្លួនផងដែរ។ ចំណែកកម្ពុជា ក៏អាចធ្វើដូច្នេះបានដែរ ដើម្បីទាក់ទាញអ្នកទេសចរពីក្រៅប្រទេស។ អ្នកជំនាញទេសចរលោក ហូ វណ្ឌី បានលើកជាទស្សនថា ការលើកលែងទិដ្ឋាការ មិនធ្វើឱ្យបាត់បង់ចំណូលនោះទេ ពោលគឺការហូរចូលយ៉ាងគំហុកនៃវត្តមានភ្ញៀវទេសចរ នឹងបានផ្តល់ផលប្រយោជន៍ជាច្រើនតាមរយៈការចាយវាយរបស់ពួកគេ លើសពីតម្លៃទិដ្ឋាការទៅទៀត។ «បើសិនជាអ្នកទេសចរស្នាក់នៅយូរ ការចាយវាយក៏ច្រើន រដ្ឋក៏ទទួលបានចំណូលពន្ធទៅតាមនោះដែរពីអ្នកដែលរកទទួលទានក្នុងវិស័យនេះ»។ នេះជាការបន្ថែមរបស់លោក ហូ វណ្ឌី។

លោក ខៀវ ធី ប្រធាសមាគមមគ្គទេសក៍ទេសចរណ៍អង្គរ បានលើកឡើងថា គិតមកដល់ពេលនេះ ភ្ញៀវទេសចរអន្តរជាតិ បានកើនឡើងវិញជាបណ្តើរៗហើយ ពោលគឺចាប់ពីខែ តុលានេះទៅ ព្រោះជារដូវ Hight Season របស់ភ្ញៀវទេសចរបរទេស។

ចំពោះការធ្វើយ៉ាងណាឱ្យភ្ញៀវទេសចរចូលមកលេងកម្សាន្តបានយូរ លោកថា កម្ពុជា ត្រូវរៀនពីប្រទេសជិតខាង ដូចជា វៀតណា និងថៃ ដែលជាប្រទេសរីកចម្រើនខ្លាំងលើវិស័យនេះ។

ប្រធាសមាគមមគ្គទេសក៍ទេសចរណ៍ បានបន្តថា ប្រទេសជិតខាងទាក់ទាញបានចំនួនទេសចរច្រើន ដោយសារ ការសម្រួលទិដ្ឋាការសម្រាប់ភ្ញៀវទេសចរ ជាពិសេសមានអាកាសចរជាតិហោះហើរទូទាំងពិភពលោកដោយត្រង់ និងដឹកភ្ញៀវទេសចរចូលក្នុងប្រទេសរបស់ខ្លួនជាដើម។ លើសពីនេះទៀត ការធ្វើបដិសណ្ឋារកិច្ចល្អ សន្តិសុខ សណ្តាប់ធ្នាប់អនាម័យ ហេដ្ឋារចនាសម្ព័ន្ធ សួនច្បារប្រណីត ក៏ជាផ្នែកមួយទាក់ទាញខ្លាំង និងធ្វើឱ្យភ្ញៀវស្នាក់នៅបានយូរផងដែរ។

លោក ខៀវ ធី បានកត់សម្គាល់ឃើញថា ភ្ញៀវទេសចរអន្តរជាតិមកពីបណ្តាប្រទេសផ្សេងៗ ចូលតាមច្រកប្រទេសថៃភាគច្រើនមកទស្សនាអង្គរវត្តកម្ពុជា ហើយក៏ត្រឡប់ទៅវិញ។ ត្រឡប់ទៅវិញ ដោយសារពួកគេយល់ថា នៅកម្ពុជា មិនទាន់មានគ្រប់តម្រូវការដែលពួកគេចង់បាន។

លោកបន្តថា គ្រាន់តែទីវត្តអារាមក៏អាចទាក់ទាញភ្ញៀវទេសចរបានដែរ ប្រសិនបើមានការរៀបចំឱ្យមានសណ្តាប់ធ្នាប់ និងតុបតែងបានស្អាត ព្រោះទេសចរអន្តរជាតិចូលចិត្តទស្សនានៅតាមទំបន់រមណីយដ្ឋានបុរាណ និងវត្តអារាមជាដើម។

តាមពិតទៅ ភ្ញៀវទេសចរ មិនគួរចូលមកទស្សនាអង្គរវត្តហើយត្រឡប់ទៅវិញទេ ព្រោះកម្ពុជា នៅមានរមណីយដ្ឋានតាមតំបន់នានាជាច្រើន ដូចជាតំបន់អេកូទេសចរណ៍ខេត្តមណ្ឌលគិរី រតនគិរី ដែលជាតំបន់ធម្មជាតិ, រាជធានីភ្នំពេញ, ក្រុងបាត់ដំបង ក្រុងកំពង់ចាម ដែលសុទ្ធសឹងជាតំបន់ទាក់ទាញ។ នេះជាការបន្ថែមរបស់លោក ខៀវ ធី។

លោក ហូ វណ្ឌី បានលើកឡើងថា ដើម្បីទាក់ទាញភ្ញៀវទេសចរអន្តរជាតិ កម្ពុជា ត្រូវតែមានការកែសម្រួលទៅលើអត្តចរិតរបស់អ្នកស្ថិតនៅក្នុងវិស័យនេះ ដូចជា ក្រមសីលធម៌ និងវិជ្ជាជីវៈជាដើម។ ជាមួយគ្នានេះ ត្រូវរៀបចំហេដ្ឋរចនាសម្ព័ន្ធ និងចរាចរណ៍នៅតំបន់គោលដៅមួយចំនួន ការតុបតែង ការកែច្នៃ អនាម័យ សណ្តាប់ធ្នាប់ ជាពិសេសនៅរាជធានីភ្នំពេញ ដែលជាតំបន់ប្រវត្តិសាស៍ នយោបាយ សេដ្ឋកិច្ច។ លើសពីនេះទៀត លោក ហូ វណ្ឌី ជំរុញឱ្យមានការរៀបចំផ្លូវសម្រាប់អ្នកថ្មើជើងដើរ នៅក្នុងទីក្រុងភ្នំពេញ គឺជាភាពទាក់ទាញដ៏ខ្លាំងបំផុត សម្រាប់ភ្ញៀវទេសចរ។ ការបង្កើតផ្លូវថ្មើជើង ក៏ជាផ្នែកមួយជួយផ្តល់ការងារដល់ពលរដ្ឋខ្មែរ ប្រកបអាជីវកម្មលក់ដូរតាមចិញ្ចឹមផ្លូវផងដែរ សម្រាប់អ្នកដើរកម្សាន្ត។

ផ្ទុយទៅវិញលោកថា ប្រសិនបើស្ថាបនជំនាញពាក់ព័ន្ធ មិនប្រឹងប្រែងដុតដៃដុតជើងដោះស្រាយឱ្យទាន់ពេលទេ វិស័យនេះ នឹងបន្តជួបបញ្ហាថែមទៀត។ ចំណែកការប្រមូលពន្ធពីវិស័យទេសចរណ៍ ក៏ធ្លាក់ចុះទៅតាមនឹងដែរ ហើយអ្នកដែលរកទទួលទានក្នុងវិស័យនេះ ប្រមាណជាង ១លាននាក់ ក៏រងផលប៉ះពាល់ជីវភាពផងដែរ។

យោងតាមរបាយការណ៍ ក្រសួងទេសចរណ៍ បានបង្ហាញថា រយៈពេល៨ខែ ឆ្នាំ២០២៣ កម្ពុជាទទួលបានទេសចរអន្តរជាតិជាង ៣.៥លាននាក់ កើនឡើង ២៥០.៨% រីឯភ្ញៀវទេសចរជាតិមានប្រមាណ១២.៣៨លាននាក់ កើនឡើង ៦២.៥% ធៀបនឹងរយៈពេលដូចគ្នា នៅឆ្នាំ២០២២។ នៅឆ្នាំ២០២៣នេះ កម្ពុជារំពឹងទទួលបានទេសចរអន្តរជាតិប្រមាណ៥លាននាក់ កើនឡើង ១២០% , ទេសចរជាតិប្រមាណ១៧លាននាក់ និងឆ្នាំ២០២៨ ទេសចរអន្តរជាតិ រំពឹងថា អាចកើនដល់៨លាននាក់៕

The post អ្នកជំនាញបង្ហើបពីយុទ្ធសាស្រ្តទាក់ទាញភ្ញៀវទេសចរអន្តរជាតិ appeared first on Kampuchea Thmey Daily.