គោលបំណងនៃការបើកវគ្គសិក្សាសាមគ្គីអូឡាំពិកស្តីពី «រដ្ឋបាល» កីឡានេះ ដើម្បីពង្រឹងចំណេះដឹងក្នុងការងារដឹកនាំ គ្រប់គ្រង និងរៀបចំព្រឹត្តិការណ៍កីឡា ដល់ថ្នាក់ដឹកនាំកីឡា មន្ដ្រី កីឡា គ្រូបង្វឹកកីឡា ដែលបំរើការងារកីឡានៅតាម សហព័ន្ធកីឡាជាតិ និងនៅតាមអង្គភាពកីឡា នៅទូទាំងប្រទេស ។ ការសិក្សារយៈពេល ៤ ថ្ងៃ​ គឺបានផ្តោតសំខាន់លើការសិក្សា ៤ ចំណុច។ ទី ១ ការសិក្សាលើ វិទ្យាសាស្ត្រកីឡា ដើម្បីឱ្យមានការយល់ដឹងពីវិធីការពារ និងបង្ការគ្រោះថ្នាក់ពីការហ្វឹកហាត់ ​ការ​ប្រកួត និងយល់ដឹងពីការសង្គ្រោះបឋម។ ទី ២ សិក្សាលើការរៀបចំព្រឹត្តិការណ៍កីឡា។ ទី ៣ សិក្សាលើ​ សារធាតុហាមឃាត់ ដែលត្រូវបាន​ហាមប្រើក្នុងវិស័យកីឡា និង ទី ៤ សិក្សាអំពីគុណធម៌ក្នុងកីឡា។

ក្រុមកម្មវិធីបិទវគ្គបញ្ចប់ការសិក្សាសាមគ្គីអូឡាំពិកស្តីពី «រដ្ឋបាលកីឡា» លោក ថោង ខុន មានប្រសាសន៍ ថា៖ «រដ្ឋបាលកីឡាត្រូវសិក្សារៀនសូត្រ និងយល់ដឹងច្បាស់លាស់នូវនិយាមរដ្ឋបាលកីឡាជាតិ និងនិយាម​រដ្ឋបាលកីឡាអន្តរជាតិ។ មានន័យថា កម្ពុជាមានគោលនយោបាយកីឡាជាតិ មានគោលការណ៍យុទ្ធសាស្រ្ត និងអភិវឌ្ឍកីឡាជាតិ ដែលជាបន្ទាត់នយោបាយតម្រង់ទិសក្នុងការអភិវឌ្ឍវិស័យកីឡាជាតិ ក៏ប៉ុន្តែរាល់ការអនុវត្តត្រូវពិនិត្យឱ្យបានគ្រប់ជ្រុងជ្រោយ និងមានសង្គតិភាព អនុលោមភាពទៅ​តាម​គោលការណ៍គ្រឹះកីឡាអន្តរជាតិ និងធម្មនុញ្ញអូឡាំពិកអន្តរជាតិ នោះទើបកីឡាមានការអភិវឌ្ឍប្រកបដោយនិរន្តរភាព»។

លោក​មានប្រសាសន៍បន្ត ថា៖ «វគ្គសិក្សានេះ បានផ្ដល់នូវពុទ្ធិល្អៗ ថ្មីៗ ទាំងរដ្ឋបាលកីឡា បច្ចេកទេសកីឡា វិទ្យាសាស្រ្តកីឡា និងទ្រឹស្ដីកីឡា អាចឱ្យប្អូនៗសិក្ខាកាម យកទៅបម្រើការក្នុងសហព័ន្ធកីឡាជាតិប្រកបដោយប្រសិទ្ធភាព។ ប៉ុន្តែកត្តាសំខាន់ គឺត្រូវយកលទ្ធផលនៃចំណេះដឹងជំនាញពីការសិក្សាទៅអនុវត្តឱ្យបានត្រឹមត្រូវ និងបន្តចែករំលែកដល់គ្រួសារកីឡារបស់ខ្លួនបន្ថែមទៀត ទើបអាចផ្ដល់ផលវិជ្ជមាន និងទទួលបានលទ្ធផលជាក់ស្ដែង ក្នុងការកសាង និងអភិវឌ្ឍវិស័យកីឡាជំនាញនៅតាមសហព័ន្ធកីឡាជាតិ»។

វគ្គសិក្សាសាមគ្គីអូឡាំពិកស្តីពី «រដ្ឋបាល» កីឡាបានធ្វើឡើងដំបូងនៅថ្ងៃទី ៩ ខែវិច្ឆិកា ឆ្នាំ១៩៩៨ មកទល់ពេលនេះបានចំនួន ៨២ វគ្គរួចមកហើយ ដោយ​មានសិក្ខាកាមសរុប​ ២.២៧៩ នាក់ ក្នុងនោះមាន នារី ចំនួន ៣០០នាក់ ។ ក្នុងចំនួន ៨២ វគ្គនេះដោយឡែក រាជធានីភ្នំពេញបើកបាន ចំនួន២១ វគ្គ មានសិក្ខាកាមចូលរួមសិក្សាចំនួន ៧៨១ នាក់ ក្នុងនោះមាន នារី ចំនួន ១៨៣ នាក់ ។

សម្រាប់ឆ្នាំ ២០២៥ មានសិក្សាកាមចំនួន ៥៦ នាក់ បានចូលរួមក្រោយការសិក្សារយៈពេល ៤ ថ្ងៃមកនេះ សិក្ខាកាមទាំងអស់ទទួលបានលទ្ធផលដូចតទៅ និទ្ទេសល្អណាស់ ៤០ នាក់ = ៧១ %, និទ្ទេសល្អ ៧ នាក់ = ១៣ %, និង និទ្ទេសមធ្យម ៩ នាក់ = ១៦ %៕

អត្ថបទ៖ សេម កុសល

The post វគ្គសិក្សា រដ្ឋបាលកីឡា ៤ ថ្ងៃ ផ្តោតលើការបង្រៀនដល់សិក្ខាកាម ៤ ចំណុចធំៗ appeared first on Kampuchea Thmey Daily.

លោកទេសរដ្ឋមន្ត្រី បានមានប្រសាសន៍ថា សម្រាប់ការតាមដាន និងត្រួតពិនិត្យក្នុងកិច្ចប្រជុំនាពេលនេះ គឺផ្ដោតសំខាន់លើការដាក់ឱ្យប្រើប្រាស់សូចនាករត្រួតពិនិត្យ តាមដាន និងវាយតម្លៃការអនុវត្តវិធានការគន្លឹះអភិវឌ្ឍន៍ទេសចរណ៍ខេត្តសៀមរាបឆ្នាំ២០២៥, ឯកសារទស្សនទានគម្រោងលើកកម្ពស់ភាពទាក់ទាញទេសចរណ៍សម្រាប់សហគមន៍ធម្មជាតិកំពង់ភ្លុក, វឌ្ឍនភាព និងទិសដៅអភិវឌ្ឍន៍ទេសចរណ៍ភ្នំគូលែន, ចុងឃ្នៀស និងក្រុងសៀមរាប។

ឆ្លងកាត់ការពិនិត្យរួចមក លោក ថោង ខុន បានកោតសរសើរ ចំពោះរបាយការណ៍វឌ្ឍនភាពផែនការអភិវឌ្ឍន៍ទេសចរណ៍នៅចុងឃ្នៀស និងក្រុងសៀមរាប។ ជាមួយនោះ លោកក៏បានស្នើឱ្យអង្គភាពគ្រប់គ្រងគោលដៅនីមួយៗ ជាពិសេសគ្រឹះស្ថានអង្គរ បន្តខិតខំជំរុញការងាររបស់ខ្លួនឱ្យស្របតាមទិសដៅដែលបានគ្រោងទុក។ ដោយឡែកចំពោះគម្រោងលើកកម្ពស់ភាពទាក់ទាញទេសចរណ៍សម្រាប់សហគមន៍ធម្មជាតិកំពង់ភ្លុក គម្រោងនេះ អង្គប្រជុំនឹងគោរពជូនសម្ដេចធិបតី នាយករដ្ឋមន្ត្រី ដើម្បីពិនិត្យ និងផ្តល់អនុសាសន៍ណែនាំ សំដៅឈានទៅរៀបចំប្លង់លម្អិត។

លោកបន្ថែមថា ចំពោះគោលដៅភ្នំគូលែន អង្គប្រជុំបានស្នើឱ្យក្រសួងបរិស្ថាន និងក្រសួងទេសចរណ៍ បន្តកិច្ចសហការ និងពិភាក្សាគ្នាលម្អិតបន្ថែមទៀតទៅលើទិដ្ឋភាពនៃការថែរក្សា អភិរក្សធនធានធម្មជាតិ បរិស្ថាន និងការរៀបចំគ្រប់គ្រង និងអភិវឌ្ឍន៍ផលិតផល និងសេវាកម្មទេសចរណ៍នៅទីនោះ។ គ.អ.ទ.ស. នឹងធ្វើការកោះប្រជុំដោយឡែកស្ដីពីការគ្រប់គ្រង និងអភិវឌ្ឍតំបន់គោលដៅទេសចរណ៍ភ្នំគូលែននេះ។

ជាមួយគ្នានេះ លោកទេសរដ្ឋមន្ត្រី បានថ្លែងអំណរគុណដល់សម្ដេចធិបតី ហ៊ុន ម៉ាណែត ដែលបានយកចិត្តទុកដាក់ខ្ពស់ដល់ការអភិវឌ្ឍវិស័យទេសចរណ៍ និងបានដាក់ចេញសេចក្ដីសម្រេចស្ដីពីការដាក់ឱ្យអនុវត្តវិធានការគន្លឹះអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៥។ អង្គប្រជុំប្ដេជ្ញាសហការបំពេញភារកិច្ច អនុវត្តប្រកបដោយការទទួលខុសត្រូវខ្ពស់ តាមការចង្អុលបង្ហាញក្នុងសកម្មភាពនីមួយៗនៃវិធានការគន្លឹះនេះ ព្រមទាំងបានឯកភាពគ្នារៀបចំបូកសរុបលទ្ធផល និងការងារសម្រេចបានសម្រាប់រយៈពេល ៩ខែ និង១២ខែ នៃការអនុវត្តវិធានការគន្លឹះនេះ។ ករណីប្រសិនបើមានសកម្មភាពណាដែលមិនទាន់អនុវត្តចប់ទាំងស្រុង ឬមិនទាន់បានអនុវត្ត ត្រូវស្នើសុំជាគោលការណ៍ដ៏ខ្ពង់ខ្ពស់ពីរាជរដ្ឋាភិបាល ដើម្បីធ្វើការរំកិលសកម្មភាពអនុវត្តទៅឆ្នាំ២០២៦ តាមលទ្ធភាពជាក់ស្ដែងផងដែរ៕

ដោយ៖ គឿនវេត

The post លោក ថោង ខុន ស្នើដល់ភាគីពាក់ព័ន្ធបន្តជំរុញការអភិវឌ្ឍគោលដៅទេសចរណ៍ក្នុងខេត្តសៀមរាប បន្ថែមទៀត appeared first on Kampuchea Thmey Daily.

ក្នុងបណ្តុះបណ្តាល​មានសិក្ខកាមចូលរួមចំនួន២៤រូប មកពីបណ្ដា១៤រាជធានី-ខេត្ត និង២សមាគមក្រសួង​ដែល​សុទ្ធ​ជាគ្រូបង្វឹកជម្រើសជាតិ គ្រូបង្វឹកសមាគមរាជធានី-ខេត្ត និងក្រសួង គ្រូអប់រំកាយ និងគរុសិស្សនៅវិទ្យាស្ថានជាតិអប់រំកាយ និងកីឡា។ វណ្ណុះបណ្តាល​នេះបង្រៀនដោយ​គ្រូឧទ្ទេស លោក Jayalal Rathnasooriya ជនជាតិស្រីលង្កា និងលោក បូរ ពុធរាត្រី ជនជាតិខ្មែរ​ដែលជា​គ្រូឧទ្ទេសអន្តរជាតិរបស់ World Athletics។

ក្នុងពិធីបិទ​វគ្គសាមគ្គីអូឡាំពិកស្តីពី​គ្រូបង្វឹកកីឡាអត្តពលកម្ម CECS កម្រិត១ នៅ​ព្រឹកថ្ងៃទី២០ ខែមីនា ឆ្នាំ២០២៤ ទេសរដ្ឋ​មន្ត្រី​ទទួលបន្ទុក​អភិវឌ្ឍកីឡា​ លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា បានជំរុញឲ្យសិក្ខាកាមទាំងអស់យកចិត្តទុកដាក់ក្នុងការបណ្ដុះបណ្ដាលយុវជនអាយុក្រោម១៦ឆ្នាំ នៅតាមគ្រឹះស្ថានសិក្សា​ទាំង​សាធារណៈនិង​ឯកជន​ ដើម្បីចូលរួមអភិវឌ្ឍធនធានថ្នាល សម្រាប់​ការ​ប្រកួតជាលក្ខណៈអន្តរជាតិ​នានា ជាពិសេសឆ្ពោះទៅការប្រកួតកីឡាយុវជនអាស៊ី លើកទី៥ ឆ្នាំ២០២៩ ដែលកម្ពុជាធ្វើជាម្ចាស់ផ្ទះ។

លោក ថោង ខុន មាន​ប្រសាសន៍​ថា ៖«សូមអ្នកគ្រូ លោកគ្រូទាំងអស់ ត្រូវមានការជំរុញឲ្យសកម្មភាពកីឡារគ្រប់សាលា គ្រប់គ្រឹះ​ស្ថានសារធារណៈ។ ឥឡូវនេះយើងមានគ្រូហើយ ដូច្នេះត្រូវខំបង្ហាត់ពួកគេទៅ ដើម្បីឱកាស​ប្រជែងមេដាយ​មាស»។

បន្ទាប់ពីការលោកឡើងរបស់ប្រធានគណៈកម្មាធិការជាតិអូឡាំពិកកម្ពុជា ពាក់ព័ន្ធនិងការជំរុញការបណ្ដុះបណ្ដាលយុវជនអាយុក្រោម១៦ឆ្នាំ នៅតាមគ្រឹះស្ថានសិក្សា​ទាំង​សាធារណៈនិង​ឯកជន លោក Jayalal Rathnasooriya មានការគាំទ្រយ៉ាងខ្លាំង នូវការយកចិត្តទុកដាក់ចំពោះលើយុវជនបែបនេះ ព្រោះថាយុវជនជាទំពាំងស្នងឬស្សីនាពេលអនាគត។

ជា​មួយ​គ្នា​នេះ លោក Jayalal Rathnasooriya បាននិយាយថា៖«ខ្ញុំមានការពេញចិត្តជាខ្លាំង ក្រោយទទួលព័ត៌មាន​ថា មានការជំរុញឲ្យសិក្ខាកាមអនុវត្តសកម្មភាពកីឡា នៅក្នុងសាលារៀន។ រឿងមួយសំខាន់ពួកគាត់ត្រូវតែចេះឆ្នៃប្រឌិត នូវកន្លែងហ្វឹកហាត់និងសម្ភារៈ ដើម្បីឲ្យសិស្សានុសិស្ស​ បានចូលរួមក្នុងសកម្មភាពកីឡា»។

សិក្ខាកាម​២៤រូប មកពី​១៤ រាជធានី-ខេត្តគឺ​ រាជធានីភ្នំពេញ ខេត្ត​កោះកុង​ ស្ទឹងត្រែង កំពង់ឆ្នាំង​សៀមរាប ពោធិ៍សាត់ ត្បូងឃ្មុំ កំពង់ធំ ស្វាយរៀង ឧត្តរមានជ័យ កំពត ប៉ៃលិន ព្រះវិហារ និងខេត្តកំពង់ចាម ព្រម​ទាំង​​សមាគម​​កីឡា​ក្រសួងមហាផ្ទៃ និងក្រសួងការពារជាតិ។

វគ្គ​បណ្តុះ​បណ្តាល​ផ្តោត​សំខាន់​គោល​សំខាន់​ធំ​២​គឺ​១.​ទ្រឹស្តី៖ ការរៀបចំកម្មវីធីហ្វឹកហាត់​ ការណែនាំ​ពី​សុវត្ថិភាព​កីឡាអត្តពលកម្ម គោលការណ៍បង្រៀននិងបង្វឹក​ ការបង្ហាញ​វីដេអូស្តីពីបច្ចេកទេស​ មូលដ្ឋានគ្រឹះនៃការ​ចាប់ផ្តើម​កីឡាអត្តពលកម្ម​ ការណែនាំស្តីពី WADA និង ការណែនាំពីអាហាររូបត្ថម្ភ។ ​២. អនុវត្តជាក់ស្តែង នៅពហុកីឡដ្ឋានជាតិអូឡំាពិក។

អត្ថបទ៖ ផា រតនា

The post លោក ថោង ខុន ជំរុញសិក្ខាកាម CECS ផ្ដោតលើការបណ្ដុះបណ្ដាលថ្នាលតាមសាលា appeared first on Kampuchea Thmey Daily.

ក្នុង​សេចក្តីប្រកាស រាជរដ្ឋាភិបាលសម្រេចប្រគល់ភារកិច្ចជូនលោក ថោង ខុន ទេសរដ្ឋមន្ត្រីទទួលបន្ទុកបេសកកម្ម ពិសេសដូចខាងក្រោម៖

១- ជាប្រធានគណៈកម្មាធិការជាតិអភិវឌ្ឍន៍ទេសចរណ៍ និងជាប្រធានគណៈកម្មការគ្រប់គ្រងនិងអភិវឌ្ឍន៍ទេសចរណ៍សៀមរាប-អង្គរ។
២- ត្រូវរៀបចំសមាសភាពគណៈកម្មាធិការជាតិអភិវឌ្ឍន៍ទេសចរណ៍ និងគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ ឡើងវិញ ដើម្បីគោរពស្នើសុំសម្ដេចធិបតី នាយករដ្ឋមន្ត្រី ពិនិត្យ សម្រេច ស្របតាមសមាសភាព​នៃរាជរដ្ឋាភិបាល នីតិកាលទី៧ នៃរដ្ឋសភា។
៣- ត្រូវរៀបចំធ្វើបច្ចុប្បន្នភាពយន្តការការងារអភិវឌ្ឍន៍វិស័យទេសចរណ៍ឱ្យបានសមស្រប ប្រកបដោយប្រសិទ្ធភាពខ្ពស់។

The post ប្រគល់​ភារកិច្ច​អតីតរដ្ឋមន្រ្តីក្រសួង​ទេសចរណ៍ ដឹកនាំគណៈកម្មការអភិវឌ្ឍ​ន៍​ទេសចរណ៍​សៀមរាប​-អង្គរ appeared first on Kampuchea Thmey Daily.

លោក​ មូហាំម៉េតនីយ៉ះ ម៉ាស្សាឡូវ ឯក​អគ្គរដ្ឋទូតតួកម៉េនីស្ថានបាន​លើកឡើង​ថា រដ្ឋាភិបាល​តួកម៉េនីស្ថាន​មាន​​បំណង​ចង់​ភ្ជាប់​ជើង​ហោះ​ហើរ​ត្រង់​ពី​ប្រទេស​ខ្លួន​មក​ខេត្ត​សៀមរាប ដែល​ជា​គោលដៅ​ទេសចរណ៍​ដ៏​សំខាន់​ក្នុង​តំបន់​អាស៊ាន ដើម្បី​ឱ្យ​ភ្ញៀវ​ទេសចរ​នៅ​ប្រទេស​តួកម៉េនីស្ថាន និង​ភ្ញៀវ​ទេសចរ​ប្រទេស​ជុំវិញ​បាន​មក​ទស្សនា​ខេត្ត​សៀមរាប តំបន់​រមណីយដ្ឋាន​អង្គរ​ដែល​ជា​តំបន់​បេតិកភណ្ឌ ពិភពលោក ក៏​ដូច​ជា​ទូទាំង​ប្រទេស​កម្ពុជា​ផងដែរ។

បន្ទាប់​ពី​បាន​មើល​ឃើញ​នៅ​កត្តា​សក្ដានុពល​អំពី​វិស័យ​ទេសចរណ៍​នៅ​ក្នុង​ប្រទេស​កម្ពុជា​ លោក​ មូហាំម៉េតនីយ៉ះ ម៉ាស្សាឡូវ ក៏មាន​គោល​បំណង​ចង់​ពង្រឹង​ទំនាក់ទំនង​ជា​មួយ​កម្ពុជា​លើ​វិស័យ​ទេសចរណ៍​នេះ​ឱ្យ​កាន់​តែ​រឹងមាំ​ឡើង និង​ដើម្បី​ជំរុញ​រំហូរ​ទេសចរ​ទៅវិញ​ទៅមក និង​ទេសចរ​ប្រទេស​ទី៣។

​

ជាក់ស្ដែង​ លោក​ក៏​បាន​លើក​ជា​សំណើ​ឱ្យ​មាន​ការ​រៀប​ចំ​ព្រឹត្តិការណ៍​ទេសចរណ៍​នៅ​ប្រទេស​កម្ពុជា និង​នៅ​ប្រទេស​តួកម៉េនីស្ថាន ក្នុង​ហេតុ​ផល​មួយ​​ផ្សព្វផ្សាយ​ពី​សក្ដានុពល​ទេសចរណ៍ គោលដៅ​ទេសចរណ៍​រវាង​ប្រទេស​ទាំង​ពីរ​ទៅ​កាន់​ប្រតិបត្តិករ​ទេសចរណ៍ ក៏​ដូច​ជា​ភ្ញៀវ​ទេសចរ​ជាតិ-អន្តរជាតិ​បន្ថែម​ទៀត​។

នៅ​ក្នុង​សប្ដាហ៍​នេះ​ដែរ ​ឯកអគ្គ​រដ្ឋទូត​តួកម៉េនីស្ថាន​ក៏​នឹង​ទៅ​ទស្សនកិច្ច​នៅ​តំបន់​រមណីយ​ដ្ឋានអង្គរ ខេត្ត​សៀមរាប ដើម្បី​ស្វែង​យល់​ពី​សក្ដានុពល​ទេសចរណ៍​បន្ថែម​។

ជា​ការ​ឆ្លើយ​តប រដ្ឋមន្ត្រី​ក្រសួង​ទេសចរណ៍​បាន​បង្ហាញ​នូវ​ការ​គាំ​ទ្រ​ពេញ​ទំហឹង​ចំពោះ​គោល​បំណង​ពង្រឹង​កិច្ច​សហប្រតិបត្តិការ​លើ​វិស័យ​ទេសចរណ៍​ និង​ផ្ដល់​​ជា​យោបល់​ឱ្យ​មាន​ការ​រៀប​ចំ​អនុស្សរណៈ​នៃ​ការ​យោគ​យល់​គ្នា​រវាង​ភាគី​កម្ពុជា និង​ភាគី​តួកម៉េនីស្ថាន ដើម្បី​ជា​ផែនទី​បង្ហាញ​ផ្លូវ​មួយ​សម្រាប់​អនុវត្ត​ផែនការ​​សកម្មភាព​ដែល​ពាក់ព័ន្ធ​កិច្ច សហប្រតិបត្តិការ​លើ​វិស័យ​ទេសចរណ៍ និង​​ជា​សក្ខីភាព​ដ៏​រឹងមាំ​នៃ​ចំណង​មិត្តភាព និង​កិច្ច​សហប្រតិបត្តិការ​រវាង​​ប្រទេស​ទាំង​ពីរ។

លោក ថោង ខុន រដ្ឋ​មន្ត្រី​ក្រសួង​ទេសចរណ៍​ក៏​បាន​ចង្អុល​បង្ហាញ​បន្ថែម​ដល់​ឯកអគ្គរដ្ឋទូត​តួកម៉េនីស្ថាន​នៅ​ប្រទេស​កម្ពុជា ពី​សក្ដានុពល​នៃ​វិស័យ​ទេសចរណ៍​នៅ​ក្នុង​ប្រទេស​កម្ពុជា​ និង​កត្តា​សុខ​សន្តិភាព ស្ថិរភាព និង​ការ​អភិវឌ្ឍ​នៅ​ប្រទេស​កម្ពុជា​នា​ពេល​​បច្ចុប្បន្ន​។

លោក​រដ្ឋមន្រ្តី​បានបង្ហាញ​ថា ត្រឹម​​រយៈ​ពេលតែ ៧ ​ខែ​ ដើម​ឆ្នាំ ​២០២៣ កម្ពុជា​ទទួល​ទេសចរ​អន្តរ​ជាតិ​ជាង ៣.០៤​លាន​នាក់​។

គួរ​ជម្រាប​ថា តួកម៉េនីស្ថានជា​ប្រទេស​មួយ​ក្នុង​ចំណោម​ក្រុម​ប្រទេស​នៅ​តំបន់​អាស៊ី​កណ្ដាលទាំង ៥ (កាហ្សាក់ស្ថាន កៀរ​ហ្ស៉ីស៊ីស្ថាន តាជី​គីស្ថាន តួកម៉េនី​ស្ថាន និង​អ៊ូបេគីស្ថាន) ដែល​ក្រុម​ប្រទេស​នៅ​តំបន់​អាស៊ី​កណ្ដាល​ទាំង​ ៥ នេះ នៅ​​មិនទាន់​មាន​ប្រទេស​ណា​ភ្ជាប់​ជើង​ហោះ​ហើរ​ត្រង់​មក​កាន់​កម្ពុជា​នៅ​ឡើយ​ទេ៕

The post ប្រទេសនៅអាស៊ីកណ្ដាល​មួយ​ ចង់ភ្ជាប់ជើង​ហោះហើរ​ជាមួយកម្ពុជា​ឱ្យបានមុនគេ appeared first on Kampuchea Thmey Daily.

​

ថ្លែង​ឡើង​ក្នុង​សន្និបាត​បូក​សរុប​ការងារ​ទេសចរណ៍នៅ​ថ្ងៃ​ទី​២១ ខែ​មិថុនា ​លោក ថោង ខុន បាន​មាន​ប្រសាសន៍​ថា ឆ្នាំ​២០២៣​ នេះ គឺ​ជា​ឆ្នាំ​ដ៏​វិសេស​​មួយ​សម្រាប់​កម្ពុជា ក្រោយ​រង់​ចាំ​អស់​រយៈ​ពេល ៦៤ ឆ្នាំ ក្នុង​ការ​រៀប​ចំ​ជា​ម្ចាស់​ផ្ទះ​នៃ​ព្រឹត្តិការណ៍​​កីឡា​ស៊ីហ្គេម លើកទី៣២ និង​​អាស៊ានប៉ារ៉ាហ្គេម លើកទី១២ ឆ្នាំ២០២៣។

​ព្រឹត្តិការណ៍​នេះពិត​ជា​បាន​​ចូលរួម​យ៉ាង​សំខាន់​ដល់​ការ​ពង្រឹង​កិត្យានុភាព​របស់​កម្ពុជា​ក្នុង​នាម​ជា «ប្រទេស​តូច បេះដូង​ធំ​ទូលាយ» និង​ជា​គោលដៅ​ទេសចរណ៍​ដ៏​ទាក់ទាញ ជំរុញ​លំហូរ​ភ្ញៀវ​ទេសចរ​នៅ​ក្នុង​ស្រុក និង​ពី​អន្តរជាតិ​បន្ថែម​ទៀត។

​

លោក​ ថោង ខុន សង្កត់​ដូច្នេះ​ថា ​«យើង​សង្ឃឹម​ថា​ជោគជ័យ​នៃ​ការ​រៀប​ចំ​ព្រឹត្តិការណ៍​ជា​ប្រវត្តិសាស្ត្រ​នេះ នឹង​ជួយ​ជំរុញ​ដល់​ការ​ផ្សព្វផ្សាយ​ពី​​រូបភាព​វិជ្ជមាន​​របស់​​កម្ពុជា ជា​គោលដៅ​ទេសចរណ៍​​ដ៏​ទាក់ទាញ ទាំង​ក្នុង​ពេល​បច្ចុប្បន្ន និង​ទៅ​អនាគត ក្នុង​រយៈ​​ពេល​មធ្យម និង​វែង ស្រប​តាម​ប្រសាសន៍​ដ៏​​ខ្ពង់ខ្ពស់​របស់​សម្ដេច​តេជោ​នាយករដ្ឋមន្ត្រី ដែល​បាន​លើក​ឡើង​ថា “លុយ​អាច​ចាយ​អស់ ប៉ុន្តែ​កេរ្តិ៍​ឈ្មោះ​ចាយ​មិន​អស់​នោះ​ទេ កេរ្តិ៍​ឈ្មោះ​ដែល​កម្ពុជា​ធ្វើ​ស៊ីហ្គេម និង​ប៉ារ៉ាហ្គេម ឆ្នាំ​២០២៣ ទុក​បន្សល់​ឱ្យ​កូនចៅ​យើង រាប់​រយ​ឆ្នាំ​ត​ទៅ​​ទៀត»។

រាជ​រដ្ឋាភិបាល​បាន​ដាក់​ចេញ​នូវ​យុទ្ធនាការ «ឆ្នាំ​ទស្សនា​កម្ពុជា ២០២៣» ក្នុង​គោលបំណង​លើក​កម្ពស់​កិត្តិនាម​​ទេសចរណ៍ «កម្ពុជា ព្រះរាជាណាចក្រ​អច្ឆរិយ» នៅ​លើ​ទីផ្សារ​ទេសចរណ៍​ឱ្យ​កាន់​តែ​ខ្លាំងក្លា ព្រម​ទាំង​ដើម្បី​លើក​​កម្ពស់​ភាព​ប្រកួត​ប្រជែង, និរន្តរភាព និង​បរិយាបន្ន​នៃ​វិស័យ​ទេសចរណ៍​កម្ពុជា៕

The post ជោគជ័យក្នុងស៊ីហ្គេម-ប៉ារ៉ាហ្គេម ជំរុញកម្ពុជាជាគោលដៅទេសចរណ៍ទាំងបច្ចុប្បន្ន និង​អនាគត appeared first on Kampuchea Thmey Daily.

លោក ថោង ខុន រដ្ឋមន្ត្រីក្រសួងទេសចរណ៍ នៅក្នុងជំនួបពិភាក្សាជាមួយលោក រ៉ាវ ឈាន (Rao Quan) អនុរដ្ឋមន្ត្រីក្រសួងវប្បធម៌ និងទេសចរណ៍ចិន កាលពីពេលថ្មីៗនេះ បានស្នើឱ្យមានការជំរុញការហោះហើរត្រង់ពីទីក្រុងសំខាន់ៗនៅប្រទេសចិន មកកាន់អាកាសយានដ្ឋានអន្តរជាតិនៅប្រទេសកម្ពុជាឱ្យបានកាន់តែច្រើនទៀត។ ជាពិសេសគឺអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិសៀមរាប និងអាកាសយានដ្ឋានអន្តរជាតិព្រះសីហនុ ខណៈអាកាសយានដ្ឋានអន្តរជាតិសៀមរាបថ្មីត្រៀមដាក់ឱ្យដំណើរការនាចុងឆ្នាំ២០២៣ឆាប់ៗខាងមុខ និងអាកាសយានដ្ឋានអន្តរជាតិភ្នំពេញថ្មីក៏នឹងបើកដំណើរការនៅចុងឆ្នាំ២០២៤ ឬដើមឆ្នាំ២០២៥។

ទន្ទឹមនឹងនោះ លោក រ៉ាវ ឈាន បានលើកឡើងពីបំណងចង់ពង្រីកជើងហោះហើរត្រង់ពីទីក្រុងដែលមានការហោះហើរត្រង់មកកាន់កម្ពុជាស្រាប់ និងរៀបចំឱ្យមានជើងហោះហើរត្រង់ថ្មីសម្រាប់អាកាសយានដ្ឋានដែលមិនទាន់មានការហោះហើរត្រង់ជាមួយគ្នា។ ភាគីទាំងពីរមានសុទិដ្ឋិនិយមថា ការពង្រីកបន្ថែមជើងហោះហើរត្រង់រវាងប្រទេសទាំងពីរនេះ គឺជាកាលនុវត្តភាពមួយក្នុងការទាក់ទាញរំហូរទេសចរពីប្រទេសចិនមកកាន់កម្ពុជា និងពីកម្ពុជាទៅកាន់ប្រទេសចិន ក៏ដូចជាទេសចរមកពីប្រទេសផ្សេងទៀតដែរ។

ជាមួយគ្នានោះ អនុរដ្ឋមន្ត្រី​ រ៉ាវ ឈាន បានសន្យាពាំនាំសំណើទាំងនេះ ក៏ដូចជាព័ត៌មាន នៃកិច្ចពិភាក្សានេះជូនទៅកាន់ក្រសួង ស្ថាប័ន អាជ្ញាធរពាក់ព័ន្ធក្នុងការពិចារណាជំរុញឱ្យមានការហោះហើរត្រង់មកកាន់កម្ពុជាបន្ថែមទៀត៕

The post រដ្ឋមន្ត្រីទេសចរណ៍ ស្នើភាគីចិនពង្រីកបន្ថែមការហោះហើរត្រង់ មកកាន់កម្ពុជា appeared first on Kampuchea Thmey Daily.

​

កន្លង​មក​​​កម្ពុជានិង​អេមីរ៉ាត​អារ៉ាប់រួម ធ្លាប់​មាន​ការ​តភ្ជាប់​ជើង​ហោះ​ហើរ​ ឌូបៃ-យ៉ាងហ្គូន-ភ្នំពេញ ដែល​ជា​មធ្យោបាយ​សម្រាប់​​ការ​ធ្វើ​ដំណើរ​របស់​ទេសចរ​ទៅ​មក​ និង​ទាក់ទាញ​លំហូរ​ទេសចរ​នៃ​ប្រទេស​ទាំង​ពីរ។

បើ​តាម​លោក​ ថោង ខុន កម្ពុជានិង​អេមីរ៉ាត​អារ៉ាប់រួមបាន​ចុះ​អនុស្សាណ​យោគយល់​ស្តី​ពី​កិច្ច​សហប្រតិបត្តិការ​លើ​វិស័យ​ទេសចរណ៍​ ដែល​ធ្លាប់​បាន​ចុះ​ហត្ថលេខា​កាល​ពី​ឆ្នាំ​២០១២ កន្លង​ទៅ​នេះ។ ការ​ជំរុញ​ជើង​ហោះ​ហើរ​ត្រង់​ពី​ឌូបៃមក​កម្ពុជា​ ជា​ថ្មី​​ម្តង​ទៀត ដើម្បី​ជួយ​លើក​កម្ពស់​កំណើន​ទេសចរណ៍​នៅ​ក្នុង​ប្រទេស​កម្ពុជា​ឱ្យ​មាន​លក្ខណៈល្អ​ប្រសើរ​បន្ថែម​ទៀត។

​ក្នុង​ឱកាស​ដដែល​នោះ លោករដ្ឋមន្ត្រី​ក៏​បាន​លើកបង្ហាញពីឱកាសវិនិយោគលើវិស័យទេសចរណ៍នៅកម្ពុជា ដល់រដ្ឋមន្ត្រីពាណិជ្ជកម្មអន្តរជាតិអេមីរ៉ាតអារ៉ាប់រួមថា កម្ពុជា​មាន​ឱកាស​វិនិយោគ​ច្រើន ជា​ពិសេស​គឺ​វិស័យ​ទេសចរណ៍​ ដែល​កំពុង​​ត្រូវ​ការ​ការ​អភិវឌ្ឍ​បង្កើត​ផលិតផល​ទេសចរណ៍​ថ្មី​ៗ​ ដើម្បី​រួម​ចំណែក​ក្នុង​គោលនយោបាយ​ទាក់ទាញ​ភ្ញៀវ​ទេសចរ​អន្តរជាតិ​។

បច្ចុប្បន្ន​ប្រទេស​កម្ពុជា​កំពុង​មាន​ការ​អភិវឌ្ឍន៍​ទៅ​លើ​គ្រប់​វិស័យ​មួយ​ចំនួន​ដូច​ជា៖ សុខ​សន្តិភាព ស្ថិរភាព ការ​អភិវឌ្ឍ​ហេដ្ឋារចនាសម្ព័ន្ធទី​ក្រុង ផ្លូវ​ល្បឿន​លឿន ដែល​ទាំង​នេះ​ជា​កត្តា​​មួយដែលបង្ហាញ​ឱ្យ​អ្នក​វិនិយោគ​មើល​ឃើញ​ពី​សក្ដានុពល​នៃ​ការ​វិនិយោគ​នៅ​ក្នុងប្រទេសកម្ពុជា​៕

ប្រភព៖ ក្រសួងទេសចរណ៍

The post រដ្ឋមន្រ្តីក្រសួងទេសចរណ៍ ស្នើ​ឱ្យ​ភ្ជាប់​​ជើង​ហោះ​ហើរ​ត្រង់​ពី​ឌូប៉ៃ​​មក​កម្ពុជា​ឡើង​វិញ appeared first on Kampuchea Thmey Daily.