ក្រោយការចូលនិវត្តន៍ពីតំណែងជាអភិបាលរាជធានីភ្នំពេញ លោក កែប ជុតិមា បានឈរឈ្មោះជាបេក្ខជនតំណាងរាស្ត្រ ហើយលោក បានជាប់ឆ្នោតជាសមាជិករដ្ឋសភា និងជាអ្នកតំណាងរាស្ត្រ នៃកូតាគណបក្សប្រជាជនកម្ពុជា នៅមណ្ឌលរាជធានីភ្នំពេញ ចាប់តាំងនីតិកាលទី៥ ទី៦ និងក្នុងនីតិកាលទី៧នេះ លោក កែប ជុតិមា ក៏បានបន្តជាប់ជាតំណាងរាស្ត្ររាជធានីភ្នំពេញដដែល។ ក្នុងនីតិកាលទី៧ អតីតអភិបាលរាជធានីភ្នំពេញរូបនេះ ត្រូវបានអង្គរដ្ឋសភា បោះឆ្នោតជ្រើសតាំងជាប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា (គណៈកម្មការទី៤ )។

រំលឹកថា លោក កែប ជុតិមា បានកាន់តួនាទីជាអភិបាលរាជធានីភ្នំពេញ រយៈពេល១០ឆ្នាំ ពោល គឺពីឆ្នាំ២០០៣ ដល់ឆ្នាំ២០១៣ ខណៈនៅចន្លោះឆ្នាំ១៩៩៥ ដល់ឆ្នាំ១៩៩៩ លោក ក៏ធ្វើជាអភិបាលខេត្តរតនគិរី។ សម្រាប់កិច្ចការគណបក្ស លោក កែប ជុតិមា ជាសមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខណ្ឌដង្កោ។

ឥស្សរជនមួយរូបទៀត ដែលជាអតីតអភិបាលរាជធានីភ្នំពេញ ហើយបច្ចុប្បន្នកំពុងកាន់តួនាទីជាប្រធានគណៈកម្មការជំនាញរបស់រដ្ឋសភានោះ គឺលោក ប៉ា សុជាតិវង្ស។ ក្នុងនីតិកាលទី៧ នេះ លោក ប៉ា សុជាតិវង្ស បានជាប់ឆ្នោតជាតំណាងរាស្ត្រ មណ្ឌលរាជធានីភ្នំពេញ ហើយត្រូវបានជ្រើសតាំងជាប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃរដ្ឋសភា (គណៈកម្មការទី៧)។​ លោក ប៉ា សុជាតិវង្ស ធ្លាប់ធ្វើជា​អភិបាលរាជធានីភ្នំពេញ ចាប់ពីឆ្នាំ២០១៣ ដល់ឆ្នាំ២០១៧ ពោល គឺបន្ត​ពី​លោក ​កែប ជុតិមា។

ក្រោយការបញ្ចប់តំណែងពីអភិបាលរាជធានីភ្នំពេញ លោក ប៉ា សុជាតិវង្ស បានឈរឈ្មោះជាបេក្ខជនតំណាងរាស្រ្តម្ដងរួចមក ក្នុងនីតិកាលទី៦ នាឆ្នាំ២០១៨ ហើយនៅពេលនេះ លោក ក៏បានជាប់ឆ្នោតជាសមាជិករដ្ឋសភា និងជាប្រធានគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា (គណៈកម្មការទី១)។

ប៉ុន្តែ ក្នុងឆ្នាំ២០១៩ លោក ប៉ា សុជាតិវង្ស បានលាលែងតំណែងតំណាងរាស្រ្ត និងប្រធានគណៈកម្មការនេះ ដើម្បី​មកកាន់​តំណែងជាប្រធានក្រុមប្រឹក្សារាជធានីភ្នំពេញ។ មិនប៉ុន្មាន អតីតអភិបាលរាជធានីភ្នំពេញរូបនេះ ក៏ត្រូវបានដំឡើងជាទេសរដ្ឋមន្ត្រី នៃរាជរដ្ឋាភិបាលកម្ពុជា នីតិកាលទី៦៕

The post អតីតអភិបាលរាជធានីភ្នំពេញចំនួន២រូប កំពុងកាន់ជាប្រធានគណៈកម្មការជំនាញរបស់រដ្ឋសភា appeared first on Kampuchea Thmey Daily.

ក្នុង​ចំណោម​ឥស្សរជន​ទាំង ១០ ដែល​ទទួល​​តំណែង​ជា​ប្រធានគណៈកម្មការ​ជំនាញ​ក្នុង​រដ្ឋសភាក្នុង​នីតិកាលទី ៧ ក៏​មាន​អតីត​អភិបាល​រាជធានី​ខេត្ត​ចំនួន ៤ ដែលទទួល​តួនាទី​​ដឹកនាំ​ក្នុង​គណៈកម្មការ​ជំនាញ​ ៤ ផ្សេង​គ្នា។

លោក កែប ជុតិមា

លោក កែប ជុតិមា ទទួល​មុខ​តំណែង​ជា​ប្រធាន​គណៈកម្មការ​មហាផ្ទៃ ការពារ​ជាតិ និង​មុខងារ​សាធារណៈ​នៃ​រដ្ឋសភា។លោក​កែប ជុតិមា គឺ​ជា​អតីត​អភិបាល​ខេត្ត​រតនគីរី​ពី​ឆ្នាំ​១៩៩៥ ដល់ ១៩៩៩ មុន​ផ្លាស់​មក​ដឹកនាំ​ជា​អភិបាល​រាជធានី​ភ្នំពេញ​ជំនួស​លោក ជា សុផារ៉ា ពី​ឆ្នាំ ២០០៣ ដល់​២០១៣។ ក្រៅ​ពី​ជា​ប្រធាន​​គណៈកម្មការ​មហាផ្ទៃ ការពារ​ជាតិ និង​មុខងារ​សាធារណៈ​នៃ​រដ្ឋសភា លោក​ក៏​ជា​តំណាង​រាស្រ្ត​នៅ​មណ្ឌល​រាជធានី​ភ្នំពេញ។

លោក សរ ចំរុង

លោក សរ ចំរុង ជា​ប្រធានគណៈកម្មការសិទ្ធិមនុស្ស ទទួល​ពាក្យ​បណ្តឹង អង្កេត ទំនាក់ទំនង​រដ្ឋសភា ព្រឹទ្ធសភា។

លោក​ជា​អតីត​អភិបាល​ខេត្ត​ក្រចេះ។ មុន​ទទួល​បាន​ការ​តែងតាំង​ជា​អភិបាល​ខេត្ត​ក្រចេះ​នៅ​ឆ្នាំ ២០១២ ជំនួស​លោក ខាំ ភឿន លោក​ជា​អតីត​អភិបាលរង​ខេត្ត​បន្ទាយមានជ័យ។

លោក សរ ចំរុង ត្រូវ​បាន​ផ្លាស់ប្តូរ​​ចេញ​ពី​តំណែង​អភិបាល​ខេត្ត​ក្រចេះ​កាលពី​ថ្ងៃ​ទី​២៦ ខែ​មេសា ឆ្នាំ​២០១៨ ជំនួស​វិញ​ដោយ​លោក វ៉ា ថន ដែល​ជា​អភិបាលរង​ខេត្ត។ ការ​ផ្លាស់ប្តូរ​នេះ ដោយសារ​លោក​សរ ចំរុង ដល់​អាយុ​​ត្រូវ​ចូលនិវត្តន៍​។

លោក ឡូយ សូផាត

លោក ឡូយ សូផាត ជា​ប្រធាន​គណៈកម្មការ​ផែនការ វិនិយោគ កសិកម្ម អភិវឌ្ឍន៍​ជនបទ បរិស្ថាន​ និង​ធនធាន​ទឹក។ លោក​ជា​អតីត​អភិបាល​ខេត្ត​ស្ទឹងត្រែង និង​បច្ចុប្បន្នក៏​ជា​តំណាងរាស្រ្ត​មណ្ឌលខេត្ត​ស្ទឹងត្រែង​ផង​ដែរ។

លោក ប៉ា សុជាតិវង្ស

លោក ប៉ា សុជាតិវង្ស ប្រធាន​គណៈកម្មការ អប់រំ យុវជន​ កីឡា ធម្មការ កិច្ចការ​សាសនា​ វប្បធម៌ និង​ទេសចរណ៍​។

លោក ប៉ា សុជាតិវង្ស ធ្លាប់ត្រូវបានដំឡើងឋានៈ​ជាប្រធាន​គណៈកម្មការទី១ នៃរដ្ឋសភាអាណត្តិទី ៦ ប៉ុន្តែក្រោយមកលោកបានលាលែងពីតំណែងតំណាងរាស្រ្ត និងប្រធានគណៈកម្មការនេះ ដើម្បី​មកកាន់​តំណែងជាប្រធានក្រុមប្រឹក្សារាជធានីភ្នំពេញ។ លោកក៏ធ្លាប់ជា​អភិបាលរាជធានីភ្នំពេញចាប់ពីឆ្នាំ២០១៣ ដល់ឆ្នាំ២០១៧ បន្ត​ពី​លោក​កែប ជុតិមា។

គួរ​បញ្ជាក់ថា នា​សម័យ​ប្រជុំ​រដ្ឋសភា​លើក​ទី ១ នីតិកាល​ទី ៧ កាល​ពី​ថ្ងៃ ២២ សីហា ឆ្នាំ ២០២៣ បាន​បោះឆ្នោត​ជ្រើសតាំង​​ប្រធាន អនុប្រធាន​រដ្ឋសភា ប្រធាន អនុប្រធាន​គណៈកម្មការ​ជំនាញ​ទាំង​អស់​នៃ​រដ្ឋសភា។

ការ​បោះឆ្នោតអនុម័តដោយលើកដៃ បាន​ជ្រើសបាន​​សមាសភាពប្រធាន អនុប្រធានរដ្ឋសភា ប្រធាន អនុប្រធានគណៈកម្មការជំនាញទាំងអស់នៃរដ្ឋសភា ដោយ​ទទួលបានសំឡេងយល់ព្រមចំនួន ១២៣ សំឡេង នៃចំនួនសមាជិកទាំងមូល។

សមាសភាពប្រធាន អនុប្រធានរដ្ឋសភា និងប្រធាន អនុប្រធានគណៈកម្មការជំនាញទាំងអស់នៃរដ្ឋសភា​មានដូចតទៅ៖

១- ប្រធានរដ្ឋសភា៖ សម្តេច​កិត្តិសង្គហបណ្ឌិត ឃួន សុដារី
២- អនុប្រធានទី១ រដ្ឋសភា៖ លោក​កិត្តិសេដ្ឋាបណ្ឌិត ជាម យៀប
៣- អនុប្រធានទី២ រដ្ឋសភា៖ លោក វង សូត

ដោយឡែកគណៈកម្មការ​ជំនាញ​ទាំង ១០ មាន​៖

១- គណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា

-ប្រធាន៖ លោក សរ ចំរុង
-អនុប្រធាន៖ លោក សម តារា

២- គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម

-ប្រធាន៖ លោក ឈាង វុន
-អនុប្រធាន៖ លោក ឡោក ហ៊ួរ

៣- គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក

-ប្រធាន៖ លោក ឡូយ សុផាត
-អនុប្រធាន៖ លោក ម៉ា ឈឿន

៤- គណៈកម្មការមហាផ្ទៃ ការពារជាតិ មុខងារសាធារណៈ

-ប្រធាន៖ លោក កែប ជុតិមា
-អនុប្រធាន៖ លោក ច័ន្ទ សុផល

៥- គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន

-ប្រធាន៖ លោក សួស យ៉ារ៉ា
-អនុប្រធាន៖ លោក នឹម ច័ន្ទតារា

៦- គណៈកម្មការនីតិកម្ម និង​យុត្តិធម៌

-ប្រធាន៖ លោក អង្គ វង្សវឌ្ឍនា
-អនុប្រធាន៖ លោកជំទាវ គ្រួច សំអាន

៧- គណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍

-ប្រធាន៖ លោក ប៉ា សុជាតិវង្ស
-អនុប្រធាន៖ លោកជំទាវ ខេង សំវ៉ាដា

៨- គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្តុះ បណ្តាល​វិជ្ជាជីវៈ និងកិច្ចការនារី

-ប្រធាន៖ លោកជំទាវ ឡោក ខេង
-អនុប្រធាន៖ លោក សោម ចិន

៩- គណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់

-ប្រធាន៖ លោកជំទាវ និន សាផុន
-អនុប្រធាន៖ លោក លី ឆេង

១០ -គណៈកម្មការអង្កេត បោសសំអាត និង​ប្រឆាំងអំពើពុករលួយ

-ប្រធាន៖ លោក ប៉ែន ស៊ីម៉ន
-អនុប្រធាន៖ លោក កែវ វីរៈ

The post ​អតីត​អភិបាលរាជធានី​-​ខេត្ត ៤ ​រូប​ មាន​​ឈ្មោះ​ជា​ប្រធាន​គណៈកម្មការ​ជំនាញ​ទាំង ៤ នៅ​រដ្ឋសភា appeared first on Kampuchea Thmey Daily.

ការបោះឆ្នោតនេះ បានធ្វើឡើងគ្រាដែលរដ្ឋសភា នៃព្រះរាជាណាចក្រកម្ពុជា នៅព្រឹកថ្ងៃទី២៥ ខែតុលា ឆ្នាំ២០២១ បានបន្តសម័យប្រជុំរដ្ឋសភា លើកទី៦ នីតិកាលទី៦ ក្រោមអធិបតីភាពសម្ដេចពញាចក្រី ហេង សំរិន ប្រធានរដ្ឋសភា ដោយមានរបៀបវារៈ ចំនួន ៤ គឺ៖

១- ការបោះឆ្នោតផ្តល់សេចក្តីទុកចិត្ត លើការបំពេញបន្ថែមសមាសភាពសមាជិក នៃរាជរដ្ឋាភិបាលដល់ ឯកឧត្តម ប៉ា សុជាតិវង្ស ជាទេសរដ្ឋមន្រ្តីទទួលបន្ទុកបេសកកម្មពិសេស។

២- ការពិភាក្សា និងអនុម័តសេចក្តីព្រាងច្បាប់ធម្មនុញ្ញស្តីពី វិសោធនកម្មមាត្រា១៩ថ្មី មាត្រា៨២ថ្មី មាត្រា១០៦ថ្មី(មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា៣ និងមាត្រា៤ នៃច្បាប់ធម្មនុញ្ញបន្ថែម សំដៅធានានូវដំណើរការជាប្រក្រតី នៃស្ថាប័នជាតិ។

៣- ការពិភាក្សា និងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងបន្ថែមទៅលើកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិ ទាក់ទងទៅនឹងការកាត់សេចក្តី នៅក្រោមច្បាប់កម្ពុជានូវឧក្រិដ្ឋកម្មដែលប្រព្រឹត្តឡើងនៅក្នុងរយៈកាល នៃកម្ពុជាប្រជាធិបតេយ្យ ស្តីពីការរៀបចំក្នុងពេលអន្តរកាល និងការបញ្ចប់ការងាររបស់អង្គជំនុំជម្រះវិសាមញ្ញ។

៤- ការពិភាក្សា និងអនុម័តសេចក្តីព្រាងច្បាប់ស្តីពី ភាពជាដៃគូរវាងរដ្ឋ និងឯកជន៕

The post លោក ប៉ា សុជាតិវង្ស ត្រូវបានបោះឆ្នោតផ្ដល់សេចក្ដីទុកចិត្ត ជា​​​ទេសរដ្ឋមន្រ្តីទទួលបន្ទុកបេសកកម្មពិសេស appeared first on Kampuchea Thmey Daily.

ការសម្តែង​ការកោតសរសើរ​ពី​សំណាក់ប្រធាន​ក្រុមប្រឹក្សា​រាជធានី​ភ្នំពេញ​ នេះ​ បាន​ធ្វើឡើងក្នុង​កិច្ចប្រជុំ​សាមញ្ញ​លើក​ទី​២៩​ របស់​ក្រុមប្រឹក្សា​រាជធានី​ភ្នំពេញ នា​ព្រឹក​ថ្ងៃទី​១៣ ខែតុលា ​ឆ្នាំ​២០២១​នេះ ក្រោម​វត្តមាន​លោក ប៉ា សុជាតិ​វង្ស ប្រធាន​ក្រុមប្រឹក្សា​រាជធានី​ភ្នំពេញ លោក​ មាន ចាន់​យ៉ា​ដា អភិបាលរង​រាជធានី​ភ្នំពេញ ​តំណាងអោយ​លោក ​ឃួ​ង ស្រេង​ អភិបាល​រាជធានី​ភ្នំពេញ ​នៅ​សាលា​រាជធានី​ភ្នំពេញ​។​

លោក ប៉ា សុជាតិ​វង្ស បាន​មានប្រសាសន៍​លើកឡើងថា រដ្ឋបាល​រាជធានី​ភ្នំពេញ ​នៅក្នុង​ត្រីមាស​ទី​៣ ឆ្នាំ​២០២១​នេះ បាន​អនុវត្ត​ការងារបាន​យ៉ាង​ល្អប្រសើរ ដូចជា ការងារ​អនុវត្ត​គោលនយោបាយ “​ភូមិ​-​សង្កាត់​» មាន​សុវត្ថិភាព លោក​សូម​កោតសរសើរ​ដល់​សមត្ថ​កិច្ច ពាក់ព័ន្ធ​ដែល​បាន​យកចិត្តទុកដាក់​បង្ក្រាប​បទ​ល្មើស​ព្រហ្មទណ្ឌ​បាន​ស្ទើរតែ ១០០% គឺ​បង្ក្រាបបាន ៧៧​ករណី លើ ៧៨​ករណី ។ ការងារ​គ្រប់គ្រង​សំណល់ បរិស្ថាន និង​អនាម័យ ដោយបាន​ពិនិត្យ​ទម្ងន់​បានល្អ (​ការពិនិត្យ​ជញ្ជឹង លាង​សម្អាត ថ្លឹង​បាន​ត្រឹមត្រូវ និង​ពិនិត្យ​រថយន្ត​ចាក់សំរាម​មិនឱ្យ​សល់​ក្នុង​ឡាន​..​។​ល​។​ និង​ការជំរុញ ចលនា​ដឹកជញ្ជូន​សំរាម​ពេល​បុណ្យ​ភ្ជុំបិណ្ឌ​បាន​ស្អាត​ពុំមាន​កកស្ទះ​។ ចំណែក​ការងារ​ធនធានទឹក និង​ឧតុនិយម ឃើញថា សកម្មភាព​របស់​ការ​ងារ​ធនធានទឹក ជំរុញ​អនុវត្ត​ការងារ​បាន ១០០% លើ​ចំណុច​មួយចំនួនធំ​។ ដោយឡែក សម្រាប់​ការងារ​ដែនដី​នគរូបនីយកម្ម សំណង់ និង​សុរិយោដី​វិញ បាន​ខិតខំ​ជំរុញ​ការអនុវត្ត​ប្រមូល​ពន្ធ​ប្រថាប់ត្រា​គួរ​ជាទី​មោទនៈ រហូតដល់ ៥០.៦៧៧,៨៥ លាន​រៀល គិត​ជា​មធ្យម​ប្រហែល​ជាជាង ៤​លាន​ដុល្លា​ក្នុង​១​ខែ​។​

លោក​បន្តទៀតថា ក្រៅពី​ការងារ​ខាងលើ ពាក់ព័ន្ធ​ការងារ​ដោះស្រាយ​ជំនន់​ទឹកភ្លៀង រដ្ឋបាល​រាជធានី​ភ្នំពេញ បាន​ដោះស្រាយបាន​យ៉ាង​ល្អ​ផងដែរ​។​

លោក ​មាន ចាន់​យ៉ា​ដា ក្នុង​កិច្ចប្រជុំ​នេះ​ក៏បាន​លើកឡើង​ដែរ​ថា រដ្ឋបាល​ភ្នំពេញ សម្រាប់​ការងារ​គ្រប់គ្រង​ជំងឺ​កូ​វីដ​-១៩ បាន​សហការ​ជាមួយ​គណៈកម្មការ​ជាង​១០ ដោយ​យើង​បាន​ដើរតួ​ជា​ប្រតិបត្តិ​ករ ដោះស្រាយ​លើ​ការព្យាបាល​អ្នក​ជំងឺ​កូ​វីដ​-១៩ និង​ធ្វើ​ច​ត្តា​ឡី​ស័ក​ជាដើម​។ លោក​បន្តថា ចាប់ពីពេលនេះ​តទៅ យើង​លែងមាន​ការធ្វើ​តេស្ត​រហ័ស ជា​ទ្រង់ទ្រាយ​ធំ​ទៀតហើយ បន្ត​ការអនុវត្ត​ការព្យាបាល​តាម​ផ្ទះ ដែល​ការព្យា​បាល​តាម​ផ្ទះ​នេះ បានទទួល​ការគាំទ្រ​និង​កោតសរសើរ​យ៉ាងខ្លាំង​ពី​សំណាក់​ប្រជាពលរដ្ឋ​៕​

អត្ថបទ៖ ស្រីរ័ត្ន​

The post លោក ប៉ា សុជាតិវង្ស សម្តែងការកោតសរសើរចំពោះរដ្ឋបាលរាជធានីភ្នំពេញ ដែលអនុវត្តការងារបានល្អ​ក្នុងត្រីមាសទី៣ឆ្នាំ២០២១នេះ​ appeared first on Kampuchea Thmey Daily.

ពួកគាត់​សុំ​តែ​ម្យ៉ាង​គឺ ជំរុញ​ឲ្យ​អាជ្ញាធរ​រាជធានី​ភ្នំពេញ​ជួយ​ដោះស្រាយ​កង្វល់​របស់​ពួកគាត់​ពាន់​ព័ន្ធ​នឹង​ការ​ជួយ​កសាង​ហេដ្ឋារចនាសម្ព័ន្ធ​នៅក្នុង​មូលដ្ឋាន​ដែល​មាន​ដូចជា​ការ​ស្ថាបនា​ផ្លូវ លូ ប្រឡាយ និង​ការដាក់​ភ្លើង​បំភ្លឺ​សាធារណៈ​ជាដើម​។

វេទិកាសាធារណៈ​នៅពេល​ព្រឹក​ថ្ងៃទី​៣០​ខែធ្នូ​នេះ​បាន​ធ្វើឡើង​នៅក្នុង​មូលដ្ឋាន​ខណ្ឌ ចំការមន​ដែល​
​មាន​ទីតាំងនៅ​សាលាខណ្ឌ​ចំការមន ក្រោម​អធិបតីភាព លោកប៉ា សុជាតិ​វង្ស​ប្រធាន​ក្រុមប្រឹក្សា​រាជធានី​ភ្នំពេញ​និង​លោក​នួន ផា​រ័ត្ន អភិបាលរង​រាជធានី​ភ្នំពេញ ហើយ​ពេល​ល្ងាច​ធ្វើឡើង​នៅ​ខណ្ឌ​ច្បារអំពៅ ក្រោម​អធិបតីភាព​លោកប៉ា សុជាតិ​វង្ស​និង​លោក​ហួត ហៃ​អភិបាលរង​រាជធានី​ភ្នំពេញ។

ក្នុង​វេទិកា​ផ្សព្វផ្សាយ និង​ពិគ្រោះ​យោបល់​របស់​ក្រុមប្រឹក្សា​រាជធានី​ភ្នំពេញ​ដែល​បាន​ធ្វើឡើង​នៅ​ខណ្ឌចំការមន នា​ព្រឹក​ថ្ងៃ​៣០​ធ្នូ ប្រជាពលរដ្ឋ​បាន​ស្នើ​សុំ​ឲ្យ​អាជ្ញាធរ​បន្ត​ជួយ​ដោះស្រាយ លើ​បញ្ហា​ជួស​ផ្លូវ​សំបុ​ក្រ​មាន់ នៅ​តាម​សង្កាត់​មួយចំនួន បញ្ហា​ប្រព័ន្ធ​លូ ការ​កាត់​បណ្តាញ​អគ្គិសនី​ដែល​មិន​រៀបរយ​តាម​ដងផ្លូវ កាត់​លះ​មែកឈើ ស្តា​ប្រឡាយ​បឹងត្របែក​ឱ្យ​ចរន្តទឹក​ហូរ​ទៅ​ស្ថានីយ​បាន​លឿន និង​ស្នើសុំ​បង្គោល​ភ្លើង​ជាដើម​។

ចំណែក​វេទិកាសាធារណៈ​ដែល​បានធ្វើ​ឡើង ល្ងាច​ថ្ងៃទី​៣០​ខែធ្នូ​ឆ្នាំ​២០២០​នៅ​ខណ្ឌ​ច្បារអំពៅ ប្រជាពលរដ្ឋ​បានលើកឡើង​ពី​ការ​សុំ​ការពង្រីក​តួ​ស្ពាន​ការ​សុំ​ធ្វើ​ទ្វា​ទឹក ដើម្បី​ងាយស្រួល​បើក បិទ​ទឹក ការសុំ​ដាក់​អំពូល​ភ្លើង បង្គោល​ភ្លើង​សាធារណៈ​ជាមួយនឹង​ការសុំ​ការស្ថាបនា លូ​និង​ទឹកស្អាត​ផងដែរ។

ប្រធាន​ក្រុមប្រឹក្សា​រាជធានី​ភ្នំពេញ លោកប៉ា សុជាតិ​វង្ស បាន​ចាត់​ទុក​ការផ្តល់​សេវា​សាធារណៈ ជូន​ប្រជាពលរដ្ឋ នៅ​តាម​មូលដ្ឋាន គឺជា​តួនាទី​ភារកិច្ច របស់​មន្ត្រី​សាធារណៈ​ដែល​ត្រូវ​បំពេញ​និង​បម្រើ​ដោយ​ឥត​លក្ខខណ្ឌ ស្របតាម​ការណែនាំ​រប​ស់​ប្រមុខ​រាជរដ្ឋាភិបាល​ឱ្យ​មន្ត្រី​បំរើ​រាស្ត្រ​ដោយស្មោះ​ត្រង់ និង​ឆ្លើយតប​នឹង​តម្រូវ​ការចាំបាច់​។

លោក ប៉ា សុជាតិ​វង្ស បាន​ជំរុញ​ឲ្យ​មន្ត្រី​ពាក់ព័ន្ធ​ទាំងអស់ រាប់​តាំងពី​មន្ត្រី​រដ្ឋបាល​ខណ្ឌ សង្កាត់​ត្រូវ​បន្ត​យកចិត្តទុកដាក់ ចុះ​បំពេញ​តួនាទី​ភារកិច្ច និង​ចុះ​សួរសុខទុក្ខ​ប្រជាពលរដ្ឋនៅក្នុង​មូលដ្ឋាន​គ្រប់គ្រង​របស់ខ្លួន​ឱ្យបាន​ជាប់​ជាប្រចាំ ក៏ដូចជា​ដោះស្រាយ​បញ្ហា​ប្រឈម​នានា ដើម្បី​ឆ្លើយតប​នឹង​សេចក្តីត្រូវការ​ប្រចាំថ្ងៃ​របស់​ប្រជាពលរដ្ឋ​។

លោក ប៉ា សុជាតិ​វង្ស បាន​បញ្ជាក់​ថា វេទិកា​ផ្សព្វផ្សាយ​និង​ពិគ្រោះ​យោបល់​របស់​ក្រុមប្រឹក្សា​រាជធានី​ភ្នំពេញ​នេះ គឺ​ផ្តោត​សំខាន់​ពាក់ព័ន្ធ​និង​កង្វល់​ផ្ទាល់​របស់​ប្រជាពលរដ្ឋ ក្នុងនោះ​រួមមាន បញ្ហា​សន្តិសុខ សណ្តាប់ធ្នាប់ បញ្ហា​បរិស្ថាន និង​បញ្ហា​អភិវឌ្ឍ​ន៍​នៅ​មូលដ្ឋាន ដើម្បីឱ្យ​អាជ្ញា​ធរមាន​ដឹងលឺ និង​រក​យន្តការ​ដោះស្រាយ​ជូន​។ សម្រាប់​ការចូលរួម​មតិយោបល់ និង​លើកឡើង​នូវ​សំណើ សំណួរ សំណូមពរ​របស់​ប្រជាពលរដ្ឋ ពិតជា​បាន​នាំមក​នូវ​សក្តានុពល​យ៉ាង​ធំធេង និង​បានធ្វើ​ឲ្យ​រដ្ឋបាល​រាជធានី​ភ្នំពេញ ឆ្លុះបញ្ចាំង​នូវ​ចំណុច​អសកម្ម​នា​របស់ខ្លួន​ពេលកន្លងមក ដើម្បី​ធ្វើការ​កែលម្អ​ឡើងវិញ និង​អភិវឌ្ឍន៍​ក្នុង​មូលដ្ឋាន​ឲ្យ​បានល្អ​ប្រសើរ និង​ស្វែងរក​នូវ​ដំណោះស្រាយ ជូន​ប្រជាពលរដ្ឋ​ឲ្យ មាន​តម្លាភាព និង​មាន​ប្រសិទ្ធភាព ក្នុងនាម​ជា​តំណាង​ឲ្យ​រដ្ឋបាល​សាធារណៈ​។

សូម​បញ្ជាក់​ថា វេទិកា​ផ្សព្វផ្សាយ និង​ពិគ្រោះ​យោបល់​របស់​ក្រុមប្រឹក្សា​រាជធានី​ភ្នំបេញ ត្រូវ​បាន​ធ្វើ ឡើង​ក្នុង​១​ឆ្នាំ​ម្តង សម្រាប់​មួយ​ខណ្ឌៗ ស្រប​ពេល​ដែល​រដ្ឋបាល​រាជធានី​ភ្នំពេញ បាន​បើក​វេទិកា​នេះ បាន​ចំនួន​១៣​ខណ្ឌ​មក​ហើយ រួម​ទាំង​ខណ្ឌចំការមន​នេះ នៅ​សល់​តែ​១​ខណ្ឌ​ទៀត​នឹង​បញ្ចប់ ដូច្នេះ រាល់​កង្វល់ សំណូមពរ​និង​សំណើ​របស់​ប្រជាពលរដ្ឋ នឹង​ត្រូវបាន​ដោះស្រាយ​ជូន​ជា​បន្តបន្ទាប់ សម្រាប់​ឆ្នាំ​២០២០​នេះ​៕
ដោយ ៖ ស្រីរ័ត្ន

The post វេទិកា​សាធារណៈ​ថ្នាក់​រាជធានី ១​ថ្ងៃ​ធ្វើឡើង​នៅក្នុង​ខណ្ឌ​ចំនួន​២ តែ​ប្រជាពលរដ្ឋ​មិនបាន​លើកឡើង​ពី​កង្វល់​ពាក់ព័ន្ធ​នឹង​សន្តិសុខ​នោះទេ appeared first on Kampuchea Thmey Daily.