លោក ម៉ែន គុង Archives - Kampuchea Thmey Daily

វារីអគ្គិសនីសេសានក្រោម ២ ជាវារីអគ្គិសនីមានខ្នងប្រឡាយវែងបំផុតនៅតំបន់អាស៊ី

Dy Bunnara — Tue, 17 Mar 2026 01:57:41 +0000

ទំនប់វារីអគ្គិសនីសេសានក្រោមពីរ ដែលបានដាក់ឲ្យដំណើរការនៅក្នុងឆ្នាំ ២០១៨ គឺជាប្រភពថាមពលអគ្គិសនីដ៏មានអានុភាពបំផុតរបស់ប្រទេសកម្ពុជា ដែលមានទីតាំងស្ថិតនៅក្នុងភូមិសាស្ត្រនៃឃុំភ្លុក ស្រុកសេសាន ខេត្តស្ទឹងត្រែង។

ទំនប់វារីអគ្គិសនីសេសានក្រោមពីរ ក្រៅពីមានសមត្ថភាពផលិតអគ្គិសនីដ៏ធំបំផុតក្នុងប្រទេសកម្ពុជា ក៏ត្រូវបានគេវាយតម្លៃជាប្រភពវារីអគ្គិសនី ដែលមានខ្នងទំនប់វែងជាងគេបំផុតនៅក្នុងតំបន់អាស៊ី ដែលមានប្រវែងរហូតដល់ ៦.៥ គីឡូម៉ែត្រ។ នេះបើតាលោក ម៉ែន គុង មន្រ្តីអ្នកនាំពាក្យរដ្ឋបាលខេត្តស្ទឹងត្រែងប្រាប់ក្រុមអ្នកសារព័ត៌មាន ក្នុងដំណើរទស្សនកិច្ចទំនប់វារីអគ្គិសនីសេសានក្រោម ២ ក្នុងខេត្តស្ទឹងត្រែង។

លោកថា ទំនប់ដ៏ធំមហិមានេះមានសមត្ថភាពផលិតថាមពលបានរហូតដល់ ៤០០ មេហ្គាវ៉ាត់ គឺធំបំផុតក្នុងប្រទេសកម្ពុជា ដោយប្រើប្រាស់តួប៊ីនចំនួន ៨ ដែលក្នុងមួយតួប៊ីនមានកម្លាំង ៥០ មេហ្គាវ៉ាត់។

លោកបានលើកឡើងពីដំណើរការផលិតថាមពលចេញពីទំនប់វារីអគ្គិសនីសេសានក្រោមពីរ ត្រូវបានលក់ទៅឱ្យអគ្គិសនីកម្ពុជា (EDC) តាមរយៈខ្សែបញ្ជូនទៅកាន់រាជធានីភ្នំពេញ ខេត្តរតនគិរី និងបណ្តាខេត្តធំៗមួយចំនួនទៀត។

តាមរយៈគម្រោងវារីអគ្គិសនីសេសានក្រោម ២ បានជួយរួមចំណែកដល់ស្ថេរភាពថាមពល និងការបង្កើតជីវិតបៃតង តាមរយៈការប្រើប្រាស់ថាមពលកកើតឡើងវិញ។

លោក ម៉ែន គុង បានបញ្ជាក់ថា គម្រោងវិនិយោគចាយទុនពាន់លានដុល្លារនេះ ក្រៅពីជាប្រភពផ្គត់ផ្គង់ថាមពលអគ្គិសនីដ៏ចាំបាច់សម្រាប់ជាតិ ក៏បានរួមចំណែកផ្តល់ការងារធ្វើដល់ប្រជាពលរដ្ឋមកពីតំបន់ផ្សេងៗ និងបម្រើដល់វិស័យកសិកម្មដែលប្រជាពលរដ្ឋនៅផ្នែកខាងលើអាចប្រើប្រាស់ទឹកពីក្នុងអាងទំនប់សម្រាប់ការងារកសិកម្ម ហើយក៏បានរួមចំណែកយ៉ាងសំខាន់ដល់ការងារទេសចរណ៍ផងដែរ៕

The post វារីអគ្គិសនីសេសានក្រោម ២ ជាវារីអគ្គិសនីមានខ្នងប្រឡាយវែងបំផុតនៅតំបន់អាស៊ី appeared first on Kampuchea Thmey Daily.

សណ្ឋាគារលំដាប់ផ្កាយ ៥ នឹងលេចរូបរាងក្នុងខេត្តស្ទឹងត្រែងនៃភូមិភាគឦសាន

Dy Bunnara — Tue, 30 Dec 2025 03:37:09 +0000

សណ្ឋាគារលំដាប់ផ្កាយ ៥ នឹងលេចរូបរាងក្នុងខេត្តស្ទឹងត្រែង ក្រោមកម្មវិធីពិសេសជំរុញការវិនិយោគខេត្តភូមិភាគឦសាន។

លោក ម៉ែន គុង អភិបាលរងខេត្តស្ទឹងត្រែងបានឲ្យកម្ពុជាថ្មីដឹងថា នៅឆ្នាំ ២០២៥ ខេត្តស្ទឹងត្រែងទទួលបានគម្រោងវិនិយោគក្នុងវិស័យទេសចរណ៍ និងហេដ្ឋារចនាសម្ព័ន្ធ រួមទាំងកសិកម្ម។

លោកបានលើកពីគម្រោងវិនិយោគក្នុងវិស័យទេសចរណ៍ ក្នុងនោះមានការសាងសង់សណ្ឋាគារលំដាប់ផ្កាយ ៥ នៅក្នុងក្រុងស្ទឹងត្រែង ដែលនឹងចាប់ផ្ដើមអនុវត្តចាប់ពីឆ្នាំ ២០២៦ ទៅ។

ក្រោមយន្តការនៃ «កម្មវិធីពិសេសជំរុញការវិនិយោគខេត្តភូមិភាគឦសាន» ខេត្តស្ទឹងត្រែងទទួលបានការវិនិយោគសាងសង់មន្ទីរព្យាបាល សាកលវិទ្យាល័យ ដែលមានទីតាំងស្ថិតនៅក្នុងក្រុងស្ទឹងត្រែង។ ក្រៅនេះក៏មានគម្រោងពាក់ព័ន្ធវិស័យកសិកម្ម កសិឧស្សាហកម្ម និងគម្រោងសំខាន់ៗផ្សេងទៀតដែលផ្តោតលើការដាំដុះដំណាំហូបផ្លែ និងដំណាំរយៈពេលវែង។

បើតាមលោក ម៉ែន គុង ដំណាំដែលត្រូវបានលើកទឹកចិត្តក្នុងការវិនិយោគរួមមាន កៅស៊ូ ចេក និងធុរេនជាដើម។

រដ្ឋាភិបាលបានប្រកាសដាក់ឱ្យអនុវត្ត «កម្មវិធីពិសេសជំរុញការវិនិយោគខេត្តភាគឦសាន» ដែលមានវិសាលាភាពគ្របដណ្តប់លើខេត្តចំនួន ៤ គឺ ខេត្តក្រចេះ ស្ទឹងត្រែង រតនគិរី និង ខេត្តមណ្ឌលគិរី ។

ក្រោម «កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន» ក្រុមការងារ «ច្រកចេញចូលតែមួយ» ត្រូវបានបង្កើតឡើង ដើម្បីពិនិត្យ និងអនុម័តលើកទឹកចិត្តពិសេស ជូនគម្រោងវិនិយោគ, ផ្តល់លិខិតអនុញ្ញាត ឬ អាជ្ញាបណ្ណនានា ជាកញ្ចប់ ស្របតាមអភិក្រម “ជវភាពនៃប្រព័ន្ធតួអង្គតែមួយ” តាមរយៈការចូលរួមសម្រេចចិត្តរួមគ្នា ប្រកបដោយប្រសិទ្ធភាព និង តម្លាភាព។

រាជរដ្ឋាភិបាលនឹងផ្តល់ការគាំទ្រ តាមរយៈវិធានការសំខាន់ៗចំនួន ៣ ក្នុងនោះ រួមមាន៖ ទី១). វិធានការផ្នែកពន្ធដារ និង ពន្ធគយ, ទី២). ការផ្តល់ហិរញ្ញប្បទាន ក្រោមអត្រាការប្រាក់សមរម្យ, និង ទី៣). ការជួយកាត់បន្ថយថ្លៃដើមផលិតកម្ម, ការសម្រួល នីតិវិធី និងការគាំទ្រសកម្មភាពវិនិយោគឯកជន៕

The post សណ្ឋាគារលំដាប់ផ្កាយ ៥ នឹងលេចរូបរាងក្នុងខេត្តស្ទឹងត្រែងនៃភូមិភាគឦសាន appeared first on Kampuchea Thmey Daily.

ក្រុងស្ទឹងត្រែងកាន់តែប្រែប្រួលមុខមាត់ ទាក់ទាញទេសចរទៅកម្សាន្តខេត្តជាប់ព្រំដែនឡាវ

Dy Bunnara — Mon, 29 Dec 2025 02:43:53 +0000

ក្រុងស្ទឹងត្រែងកាន់តែទទួលបានការចាប់អារម្មណ៍ពីពលរដ្ឋនិងទេសចរទៅកម្សាន្ត ក្រោយគម្រោងកែលម្អសោភណភាពក្នុងក្រុងបានលេចរូបរាងឡើងសម្រេចលទ្ធផលជាបន្តបន្ទាប់។

លោក ម៉ែន គុង អភិបាលរងខេត្តស្ទឹងត្រែងបានរំលេចពីគម្រោងសំខាន់ៗនិងសមិទ្ធផលថ្មីៗពីការអភិវឌ្ឍក្នុងក្រុងស្ទឹងត្រែង តាមរយៈគម្រោងកែលម្អសោភណភាពក្នុងក្រុង និងការលើកកម្ពស់ស្តារហេដ្ឋារចនាសម្ព័ន្ធនានាឲ្យល្អប្រសើរឡើង។

លោក ម៉ែន គុង អភិបាលរងខេត្តស្ទឹងត្រែង

ផ្តល់បទសម្ភាសន៍ដល់កម្ពុជាថ្មី លោក ម៉ែន គុង បានបញ្ជាក់ថា មានគម្រោងជាច្រើនកំពុងអនុវត្តដូចជាទីលានតេជោសន្តិភាព និងវេទិកានាគជ័យ ដែលជាកន្លែងពហុបំណងសម្រាប់រៀបចំព្រឹត្តិការណ៍នានា និងជាកន្លែងសម្រាកលំហែរបស់ប្រជាពលរដ្ឋ។ សួនសម្តេចបវរធិបតី ក៏ត្រូវបានកែលម្អឲ្យជាសួនច្បារសាធារណៈដ៏ស្រស់ស្អាតសម្រាប់ពលរដ្ឋមកកម្សាន្ត។

សួនសុវណ្ណភូមិ ដែលស្ថិតនៅតាមបណ្ដោយទន្លេសេកុង ក្រៅពីរៀបចំដើម្បីលើកសោភណភាព ក៏មានចារឹកបង្ហាញពីប្រវត្តិសាស្ត្រខេត្តស្ទឹងត្រែង ដែលមានការផ្សារភ្ជាប់ជាមួយអង្គព្រះមហាក្សត្រសម័យមុនៗ។

អាជ្ញាធរខេត្តក៏បានរៀបចំនិមិត្តរូបតំណាងខេត្ត ដែលមានដាក់តាំងរូបសំណាកមច្ឆាជាតិ រុក្ខជាតិ និងការបង្ហាញពីវប្បធម៌ប្រពៃណីទំនៀមទម្លាប់ក្នុងតំបន់។ ក្រៅពីនេះក៏មានរៀបចំកន្លែងកម្សាន្តសម្រាប់កុមារ (Playground) និងកន្លែងហាត់ប្រាណសម្រាប់មនុស្សពេញវ័យនៅតាមមាត់ទន្លេ។

ជាមួយគ្នានេះ អាជ្ញាធរក៏កំពុងសាងសង់រង្វង់មូលចំនួនពីរបន្ថែមទៀត នៅចំណុចផ្លូវបំបែកអូរពងមាន់ និងនៅផ្លូវបំបែកផ្លូវជាតិលេខ ៩ និងលេខ ៧ ចាស់។

ដោយទទួលបានការគាំទ្រពីគម្រោង ADB ផ្លូវថ្មើរជើងប្រវែងជាង ៧០០ ម៉ែត្រ ក៏ត្រូវបានស្ថាបនាតាមមាត់ទន្លេសេកុង រួមទាំងបានរៀបចំហេដ្ឋារចនាសម្ព័ន្ធផ្សេងៗ ដើម្បីលើកកម្ពស់សោភណភាពនិងបរិស្ថានក្នុងក្រុងឲ្យកាន់តែមានភាពស្រស់បំព្រង។

ការអភិវឌ្ឍហេដ្ឋារចនាសម្ព័ន្ធផ្លូវថ្នល់ជាចក្ខុវិស័យចម្បងរបស់ខេត្ត គឺការប្រែក្លាយផ្លូវដីឱ្យទៅជាផ្លូវបេតុងជាពិសេសនៅក្នុងតំបន់ប្រជុំជន និងតំបន់ទេសចរណ៍។ បច្ចុប្បន្នផ្លូវក្នុងក្រុងភាគច្រើនត្រូវបានស្ថាបនាជាផ្លូវកៅស៊ូ ឬផ្លូវបេតុងរួចរាល់អស់ហើយ។

លោក ម៉ែន គុង បានបញ្ជាក់ថា គម្រោងទាំងអស់ភាគច្រើនបានបញ្ចប់សព្វគ្រប់ ប៉ុន្តែនៅសេសសល់ការងារមួយចំនួនទៀតដូចជា ការរៀបចំរង្វង់មូល ការដំឡើងបង្គោលភ្លើងបំភ្លឺផ្លូវ និងការដាំដើមឈើលម្អបន្ថែម នឹងត្រូវអនុវត្តបន្តបន្ទាប់ទៀត។

ក្រៅពីការអភិវឌ្ឍក្នុងក្រុង បើតាមមន្រ្តីរដ្ឋបាលខេត្តស្ទឹងត្រែងបានឲ្យដឹងថា ខេត្តក៏មានគម្រោងស្ថាបនាផ្លូវភ្ជាប់ពីក្រុងស្ទឹងត្រែងទៅដល់ឃុំអូរម្រះ ក្នុងស្រុកសៀមបូក ដែលជាតំបន់អេកូទេសចរណ៍ដែលមានត្រីផ្សោតទឹកសាបជាសក្ដានុពលទាក់ទាញទេសចរ។

ដោយឡែកផ្លូវទៅទឹកធ្លាក់ព្រះនិមិត្តដែលជាគោលដៅទេសចរណ៍ដ៏សំខាន់ក្នុងខេត្ត ដែលមានប្រវែងប្រហែល ៤០ គីឡូម៉ែត្រ ក៏កំពុងត្រូវបានសាងសង់ តាមរយៈរបស់ក្រសួងសាធារណការ និងដឹកជញ្ជូន ដែលទទួលបន្ទុកសាងសង់ភ្ជាប់ពីផ្លូវជាតិលេខ ៩ ទៅដល់ឃុំព្រះរំកិល និងក្រសួងអភិវឌ្ឍន៍ជនបទទទួលបន្ទុកសាងសង់ផ្នែកខ្លះជាផ្លូវកៅស៊ូ៕

The post ក្រុងស្ទឹងត្រែងកាន់តែប្រែប្រួលមុខមាត់ ទាក់ទាញទេសចរទៅកម្សាន្តខេត្តជាប់ព្រំដែនឡាវ appeared first on Kampuchea Thmey Daily.

លោក ម៉ែន គុង Archives - Kampuchea Thmey Daily

វារីអគ្គិសនី​សេសាន​ក្រោម ២ ជា​វារីអគ្គិសនី​មាន​ខ្នង​ប្រឡាយ​វែង​បំផុត​នៅ​តំបន់​​អាស៊ី

សណ្ឋាគារ​លំដាប់​ផ្កាយ ៥ នឹង​លេច​រូបរាង​ក្នុង​ខេត្ត​ស្ទឹងត្រែង​នៃ​ភូមិ​ភាគ​ឦសាន

ក្រុង​ស្ទឹងត្រែង​កាន់តែប្រែប្រួល​មុខមាត់ ទាក់​ទាញ​​ទេសចរ​ទៅកម្សាន្ត​ខេត្ត​ជាប់ព្រំដែនឡាវ

វារីអគ្គិសនីសេសានក្រោម ២ ជាវារីអគ្គិសនីមានខ្នងប្រឡាយវែងបំផុតនៅតំបន់អាស៊ី

សណ្ឋាគារលំដាប់ផ្កាយ ៥ នឹងលេចរូបរាងក្នុងខេត្តស្ទឹងត្រែងនៃភូមិភាគឦសាន

ក្រុងស្ទឹងត្រែងកាន់តែប្រែប្រួលមុខមាត់ ទាក់ទាញទេសចរទៅកម្សាន្តខេត្តជាប់ព្រំដែនឡាវ