លោក សាយ សាមាន Archives - Kampuchea Thmey Daily

អតីតនាយករដ្ឋមន្ត្រីកម្ពុជា ប្រាថ្នាចង់ទៅឈរនៅតំបន់កន្ទុយនាគ ជំរុញឲ្យរដ្ឋាភិបាលសាងសង់ផ្លូវទៅដល់ឲ្យបាន

Dy Bunnara — Sat, 27 Jul 2024 01:54:53 +0000

ថ្លែងសារពិសេសពាក់ព័ន្ធតំបន់អភិវឌ្ឍន៍ត្រីកោណ (CLV) កម្ពុជា ឡាវ វៀតណាម អតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន ជំរុញឲ្យរដ្ឋាភិបាលសាងសង់កំណាត់ផ្លូវពីក្រុងបានលុងខេត្តរតនគិរី ទៅដល់តំបន់កន្ទុយនាគ ចំណុចប្រសព្វគ្នានៃព្រំដែនប្រទេសកម្ពុជា ឡាវ និងវៀតណាម។

បន្ថែមពីនេះ ប្រធានព្រឹទ្ធសភា សម្តេចតេជោ ក៏បង្ហាញបំណងចង់មានឱកាសបានទៅឈរនៅតំបន់កន្ទុយនាគថែមទៀតផង នៅពេលមានផ្លូវធ្វើដំណើរទៅដល់។

សម្តេចតេជោបានគូសបញ្ជាក់ថា «ខ្ញុំពិតជាចង់ណាស់ទៅឈរនៅមុំ ៣ នេះ។ នៅមុំ ៣ មានបង្គោល ៣ ប្រទេស ហើយខ្ញុំសង្ឃឹមថា រាជរដ្ឋាភិបាលនឹងខិតខំរកថវិកាដើម្បីកសាងផ្លូវជាតិពីទីរួមខេត្តរតនគិរីទៅតំបន់មុំ ៣ ហើយពេលនោះខ្ញុំប្រាថ្នានឹងអាចធ្វើដំណើរនិងទៅឈរនៅទីនោះ»។

កំណាត់ផ្លូវជាតិលេខ ៧៨-៥ ពីក្រុងបានលុងកាត់ស្រុកតាវែងទៅដល់តំបន់កន្ទុយនាគ មានប្រវែង ១៦៦ គីឡូម៉ែត្រ និងទទឹង ៩ ម៉ែត្រ។

សម្តេចគូសបញ្ជាក់បន្ថែមថា បើសិនបានផ្លូវនេះមួយខ្សែទៀត នឹងអាចតភ្ជាប់ទៅផ្លូវជាតិលេខ ៧៨ ពីអូរយ៉ាដាវទៅបានលុង ដែលបានជួយកសាងដោយរដ្ឋាភិបាលវៀតណាម។

«ខ្ញុំជំរុញឲ្យរដ្ឋាភិបាលខិតខំរកថវិកា ក្នុងការស្ថាបនាផ្លូវនេះឲ្យខានតែបាន»។ សម្តេចតេជោ បញ្ជាក់បន្ថែម។

បើតាមប្រធានមន្ទីរសាធារណការនិងដឹកជញ្ជូនខេត្តរតនគិរី រដ្ឋាភិបាលគ្រោងសាងសង់ផ្លូវទៅតំបន់មុំ ៣ (កន្ទុយនាគ) ដែលប្រសព្វគ្នារវាងប្រទេស ៣ គឺកម្ពុជា-ឡាវ-វៀតណាមនៅឆ្នាំ ២០២៨។

ឆ្លើយតបសំនួររបស់កម្ពុជាថ្មី នៅក្នុងសន្និសីទវឌ្ឍនភាពរដ្ឋបាលរាជធានីខេត្តកាលពីដើមឆ្នាំ ២០២៣ លោក សាយ សាមាន ប្រធានមន្ទីរសាធារណការនិងដឹកជញ្ជូនខេត្តរតនគិរីបានគូសបញ្ជាក់ថា ក្នុងសន្និបាតបូកសរុបលទ្ធផលការងាររបស់ក្រសួងសាធារណការនិងដឹកជញ្ជូន ជួសមុខឲ្យថ្នាក់ដឹកនាំខេត្ត លោកបានធ្វើបទអន្តរាគមន៍ស្នើសុំសាងសង់ផ្លូវចំនួនពីរខ្សែក្នុងខេត្តរតនគិរី។

ផ្លូវទាំងពីរខ្សែដែលលោកលើកសំណើនោះមានទីមួយផ្លូវទៅវ៉ឺនសៃ និងមួយខ្សែទៀតគឺផ្លូវទៅតំបន់មុំ ៣ (កន្ទុយនាគ)ប្រសព្វគ្នារវាងកម្ពុជា-ឡាវ-វៀតណាម។

បើតាមលោកសាយ សាមាន ផ្លូវលេខ ៧៨-៥ បានរៀបចំបញ្ចូលជាប្រព័ន្ធផ្លូវជាតិ មានប្រវែងសរុប ១៩១ គ.ម ដែលស្ថានភាពបច្ចុប្បន្នចែកចេញជា ៣ កំណាត់។

កំណាត់ទីមួយពីក្រុងបានលុងទៅភូមិតងណងលិ បានចាក់ស្រោចកៅស៊ូជាប្រភេទ DBST មានប្រវែង ២១.៩៥ គ.ម។ កំណាត់ទីពីរពីភូមិតងណងលិទៅដល់ស្រុកតាវែង ជាផ្លូវល្បាយថ្មមានប្រវែង ២៥.៩ គ.ម និងកំណាត់ទី ៣ ពីស្រុកតាវែងរហូតទៅដល់តំបន់កន្ទុយនាគមានប្រវែង ១៤៣.៩៦ គ.ម បច្ចុប្បន្នមិនទាន់មានផ្លូវធ្វើដំណើរទៅដល់ ហើយបើចង់ធ្វើដំណើរបន្តដល់តំបន់មុំ ៣ (កន្ទុយនាគ) ត្រូវឆ្លងចូលប្រទេសវៀតណាម៕

The post អតីតនាយករដ្ឋមន្ត្រីកម្ពុជា ប្រាថ្នាចង់ទៅឈរនៅតំបន់កន្ទុយនាគ ជំរុញឲ្យរដ្ឋាភិបាលសាងសង់ផ្លូវទៅដល់ឲ្យបាន appeared first on Kampuchea Thmey Daily.

សល់ផ្លូវដីជាង ២០ គីឡូម៉ែត្រភ្ជាប់ទៅស្រុកតាវែងឆ្ពោះទៅឧទ្យានវីរៈជ័យ រង់ចាំថវិកាអភិវឌ្ឍជាផ្លូវកៅស៊ូ

Dy Bunnara — Thu, 11 Jan 2024 02:49:27 +0000

កំណាត់ផ្លូវជាតិមួយខ្សែចេញពីក្រុងបានលុងខេត្តរតនគិរី តភ្ជាប់ទៅទីប្រជុំជនស្រុកតាវែងឆ្ពោះទៅឧទ្យានជាតិវីរៈជ័យនៅមួយកំណាត់ជាផ្លូវដី ត្រូវរង់ចាំថវិកាពីរដ្ឋាភិបាលស្ថាបនាទៅជាផ្លូវកៅស៊ូ។

លោក សាយ សាមាន ប្រធានមន្ទីរសាធារណការនិងដឹកជញ្ជូនខេត្តរតនគិរីបានឲ្យកម្ពុជាថ្មីដឹងថា កំណាត់ផ្លូវជាតិលេខ ៧៨-៥ មានប្រវែងសរុប ៤០ គីឡូម៉ែត្រតភ្ជាប់ពីក្រុងបានលុងឆ្ពោះទៅទីរួមស្រុកតាវែង និងទៅតំបន់ឧទ្យានជាតិវីរៈជ័យ។ ផ្លូវនេះមួយកំណាត់ជាផ្លូវកៅស៊ូនិងមួយកំណាត់ទៀតជាង ២៥ គីឡូម៉ែត្រជាផ្លូវដីគ្រួសក្រហម។

ផ្លូវគ្រួសក្រហមលើកំណាត់ផ្លូវជាតិលេខ ៧៨-៥ នៅស្រុកតាវែង

ទាក់ទងកំណាត់ផ្លូវដីដែលនៅសល់ជាង ២០ គីឡូម៉ែត្រ អាចអភិវឌ្ឍជាផ្លូវកៅស៊ូនៅពេលណា? លោក សាយ សាមាន បានគូសបញ្ជាក់ថា លោកមិនទាន់ដឹងទេដោយសារជាគម្រោងថ្នាក់ជាតិត្រូវរង់ចាំថវិកាពីរដ្ឋាភិបាល។

ប្រធានមន្ទីរសាធារណការខេត្តរតនគិរីបានអះអាងថា កំណាត់ផ្លូវដីដែលមិនទាន់ស្ថាបនាជាកៅស៊ូមានការលំបាកខ្លះជាពិសេសនៅរដូវវស្សា ប៉ុន្តែមន្ទីរក៏តែងតែយកចិត្តទុកដាក់ក្នុងការថែទាំជួសជុលជាប់ជាប្រចាំដើម្បីសម្រួលការធ្វើដំណើររបស់ប្រជាពលរដ្ឋ។

ផ្លូវជាតិលេខ ៧៨-៥ តភ្ជាប់ពីក្រុងបានលុងឆ្ពោះទៅស្រុកអូរជុំ វើនសៃ និងស្រុកតាវែង ដែលជាផ្លូវសំខាន់មួយមានចរាចរណ៍មមាញឹក។

សាលាស្រុកតាវែង

នៅក្នុងពិធីសម្ពោធការដ្ឋានជួសជុលកំណាត់ផ្លូវជាតិ ៧៨-៥ ក្នុងភូមិសាស្ត្រស្រុកតាវែងកាលពីពេលកន្លងទៅ លោក ញ៉ែម សំអឿន អភិបាលខេត្តរតនគិរីបានចាត់ទុកហេដ្ឋារចនាសម្ពន្ធផ្លូវស្ពានជាសរសៃឈាមក្នុងការជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋ។

លោកអភិបាលខេត្តបានលើកឡើងពីកំណាត់ផ្លូវជាតិ ៧៨-៥ ជាផ្លូវសេដ្ឋកិច្ចដ៏សំខាន់ សម្រាប់បម្រើដល់ការដឹកជញ្ជូននិងតភ្ជាប់ការធ្វើដំណើររបស់ប្រជាពលរដ្ឋនៅទីប្រជុំជនស្រុកតាវែង ដែលពលរដ្ឋភាគច្រើនជាជនជាតិដើមភាគតិច៕

The post សល់ផ្លូវដីជាង ២០ គីឡូម៉ែត្រភ្ជាប់ទៅស្រុកតាវែងឆ្ពោះទៅឧទ្យានវីរៈជ័យ រង់ចាំថវិកាអភិវឌ្ឍជាផ្លូវកៅស៊ូ appeared first on Kampuchea Thmey Daily.

ផ្លូវទៅតំបន់កន្ទុយនាគប្រសព្វ ៣ ប្រទេស កម្ពុជា-ឡាវ-វៀតណាម គ្រោងសាងសង់នៅឆ្នាំ ២០២៨

Dy Bunnara — Wed, 05 Apr 2023 08:04:31 +0000

រដ្ឋាភិបាលគ្រោងនឹងសាងសង់ផ្លូវទៅតំបន់មុំ ៣ កន្ទុយនាគដែលប្រសព្វគ្នារវាងប្រទេស ៣ គឺកម្ពុជា-ឡាវ-វៀតណាមនៅឆ្នាំ ២០២៨។

ថ្លែងប្រាប់បណ្ដាញព័ត៌មានក្នុងសន្និសីទកាលពីម្សិលមិញនេះ លោក សាយ សាមាន ប្រធានមន្ទីរសាធារណការនិងដឹកជញ្ជូនខេត្តរតនគិរីបានឲ្យដឹងថា ក្នុងសន្និបាតបូកសរុបលទ្ធផលការងាររបស់ក្រសួងសាធារណការនិងដឹកជញ្ជូន ជួសមុខឲ្យថ្នាក់ដឹកនាំខេត្ត លោកបានធ្វើបទអន្តរាគមន៍ស្នើសុំការសាងសង់ផ្លូវចំនួនពីរខ្សែក្នុងខេត្តរតនគិរី។

ផ្លូវទាំងពីរខ្សែដែលលោកលើកសំណើយ៉ាងទទូចនោះគឺទីមួយផ្លូវទៅវ៉ឺនសៃ និងមួយខ្សែទៀតគឺផ្លូវទៅតំបន់មុំ ៣ កន្ទុយនាគប្រសព្វគ្នារវាងកម្ពុជា-ឡាវ-វៀតណាម។

ជាការឆ្លើយតបរដ្ឋមន្ត្រីក្រសួងសាធារណការបានសន្យានឹងរៀបចំឆាប់ៗ។ បើតាមលោក សាយ សាមាន ផ្លូវទៅតំបន់កន្ទុយនាគ នឹងរៀបចំបញ្ចូលជាប្រព័ន្ធផ្លូវជាតិមានឈ្មោះផ្លូវជាតិលេខ ៧៨-៥។

ផ្លូវនេះសរុបមានប្រវែង ១៩១ គ.ម ចែកចេញជា ៣ កំណាត់។ គឺទីមួយពីក្រុងបានលុងទៅភូមិតងណងលិប្រភេទជា DBST មានប្រវែង ២១.៩៥ គ.ម កំណាត់ទីពីរពីភូមិតងណងលិទៅដល់ស្រុកតាវែងជាផ្លូវល្បាយថ្មដែលមានប្រវែង ២៥.៩ គ.ម និងកំណាត់ទី ៣ ពីស្រុកតាវែងរហូតទៅដល់តំបន់កន្ទុយនាគមានប្រវែង ១៤៣.៩៦ គ.ម។

លោកបន្តថា ផ្លូវទៅតំបន់កន្ទុយនាគបច្ចុប្បន្នអាចធ្វើដំណើរបានត្រឹមស្រុកតាវែង បើចង់ធ្វើដំណើរបន្តដល់តំបន់មុំ ៣ កន្ទុយនាគត្រូវឆ្លងចូលប្រទេសវៀតណាម។

រូបឯកសារ

ដោយឡែកផ្លូវទៅវ៉ឺនសៃ លោក សាយ សាមាន ប្រធានមន្ទីរសាធារណការនិងដឹកជញ្ជូនខេត្តរតនគិរីបានបញ្ជាក់ថា ចែកចេញជាពីរកំណាត់ គឺចេញពីអូរជុំទៅវ៉ឺនសៃជាផ្លូវក្រាលគ្រួសក្រហមមានប្រវែង ២៨.៥២ គ.ម និងមួយកំណាត់ទៀតជាផ្លូវដីពីវ៉ឺនសៃបន្តរហូតដល់ត្រពាំងក្រៀលព្រំប្រទល់កម្ពុជាឡាវមានប្រវែង ១០៤,៤៥ គ.ម។ សរុបផ្លូវមានប្រវែង ១៣២,៩៧ គ.ម។

លោកសាយ សាមាន អះអាងថា ផ្លូវទៅវ៉ឺនសៃជាគម្រោងផ្លូវជាតិ ដែលគ្រោងចាប់ផ្តើមអនុវត្តការសាងសង់នៅឆ្នាំ ២០២៧។ ដោយឡែកផ្លូវទៅតំបន់មុំ ៣ កន្ទុយនាគប្រសព្វរវាងកម្ពុជា-ឡាវ-វៀតណាម គ្រោងចាប់ផ្ដើមអនុវត្តការសាងសង់នៅឆ្នាំ ២០២៨ ប៉ុន្តែអាចលឿនជាការគ្រោងទុកដោយផ្អែកតាមស្ថានភាពជាក់ស្ដែង៕

The post ផ្លូវទៅតំបន់កន្ទុយនាគប្រសព្វ ៣ ប្រទេស កម្ពុជា-ឡាវ-វៀតណាម គ្រោងសាងសង់នៅឆ្នាំ ២០២៨ appeared first on Kampuchea Thmey Daily.

លោក សាយ សាមាន Archives - Kampuchea Thmey Daily

ផ្លូវ​ទៅ​តំបន់​កន្ទុយ​នាគ​ប្រសព្វ​​ ៣ ប្រទេស កម្ពុជា​-​ឡាវ-វៀតណាម​ គ្រោង​សាងសង់​នៅ​ឆ្នាំ ២០២៨

ផ្លូវទៅតំបន់កន្ទុយនាគប្រសព្វ ៣ ប្រទេស កម្ពុជា-ឡាវ-វៀតណាម គ្រោងសាងសង់នៅឆ្នាំ ២០២៨