ព័ត៌មានជាតិ

សល់ផ្លូវដីជាង ២០ គីឡូម៉ែត្រភ្ជាប់ទៅស្រុកតាវែងឆ្ពោះទៅឧទ្យានវីរៈជ័យ រង់ចាំថវិកាអភិវឌ្ឍជាផ្លូវកៅស៊ូ

បានផុស

២ years មុន

នៅ

ថ្ងៃព្រហស្បតិ៍ ១១ មករា ២០២៤

ដោយ

កំណាត់ផ្លូវជាតិមួយខ្សែចេញពីក្រុងបានលុងខេត្តរតនគិរី តភ្ជាប់ទៅទីប្រជុំជនស្រុកតាវែងឆ្ពោះទៅឧទ្យានជាតិវីរៈជ័យនៅមួយកំណាត់ជាផ្លូវដី ត្រូវរង់ចាំថវិកាពីរដ្ឋាភិបាលស្ថាបនាទៅជាផ្លូវកៅស៊ូ។

លោក សាយ សាមាន ប្រធានមន្ទីរសាធារណការនិងដឹកជញ្ជូនខេត្តរតនគិរីបានឲ្យកម្ពុជាថ្មីដឹងថា កំណាត់ផ្លូវជាតិលេខ ៧៨-៥ មានប្រវែងសរុប ៤០ គីឡូម៉ែត្រតភ្ជាប់ពីក្រុងបានលុងឆ្ពោះទៅទីរួមស្រុកតាវែង និងទៅតំបន់ឧទ្យានជាតិវីរៈជ័យ។ ផ្លូវនេះមួយកំណាត់ជាផ្លូវកៅស៊ូនិងមួយកំណាត់ទៀតជាង ២៥ គីឡូម៉ែត្រជាផ្លូវដីគ្រួសក្រហម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវគ្រួសក្រហមលើកំណាត់ផ្លូវជាតិលេខ ៧៨-៥ នៅស្រុកតាវែង

ទាក់ទងកំណាត់ផ្លូវដីដែលនៅសល់ជាង ២០ គីឡូម៉ែត្រ អាចអភិវឌ្ឍជាផ្លូវកៅស៊ូនៅពេលណា? លោក សាយ សាមាន បានគូសបញ្ជាក់ថា លោកមិនទាន់ដឹងទេដោយសារជាគម្រោងថ្នាក់ជាតិត្រូវរង់ចាំថវិកាពីរដ្ឋាភិបាល។

ប្រធានមន្ទីរសាធារណការខេត្តរតនគិរីបានអះអាងថា កំណាត់ផ្លូវដីដែលមិនទាន់ស្ថាបនាជាកៅស៊ូមានការលំបាកខ្លះជាពិសេសនៅរដូវវស្សា ប៉ុន្តែមន្ទីរក៏តែងតែយកចិត្តទុកដាក់ក្នុងការថែទាំជួសជុលជាប់ជាប្រចាំដើម្បីសម្រួលការធ្វើដំណើររបស់ប្រជាពលរដ្ឋ។

ផ្លូវជាតិលេខ ៧៨-៥ តភ្ជាប់ពីក្រុងបានលុងឆ្ពោះទៅស្រុកអូរជុំ វើនសៃ និងស្រុកតាវែង ដែលជាផ្លូវសំខាន់មួយមានចរាចរណ៍មមាញឹក។

សាលាស្រុកតាវែង

នៅក្នុងពិធីសម្ពោធការដ្ឋានជួសជុលកំណាត់ផ្លូវជាតិ ៧៨-៥ ក្នុងភូមិសាស្ត្រស្រុកតាវែងកាលពីពេលកន្លងទៅ លោក ញ៉ែម សំអឿន អភិបាលខេត្តរតនគិរីបានចាត់ទុកហេដ្ឋារចនាសម្ពន្ធផ្លូវស្ពានជាសរសៃឈាមក្នុងការជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋ។

លោកអភិបាលខេត្តបានលើកឡើងពីកំណាត់ផ្លូវជាតិ ៧៨-៥ ជាផ្លូវសេដ្ឋកិច្ចដ៏សំខាន់ សម្រាប់បម្រើដល់ការដឹកជញ្ជូននិងតភ្ជាប់ការធ្វើដំណើររបស់ប្រជាពលរដ្ឋនៅទីប្រជុំជនស្រុកតាវែង ដែលពលរដ្ឋភាគច្រើនជាជនជាតិដើមភាគតិច៕