លោក សឿន ដារ៉ា Archives - Kampuchea Thmey Daily

ក្រុមហ៊ុនចំនួន ៥ ទៀត កំពុងរៀបចំរចនាសម្ព័ន្ធឈានទៅដំណើរការរោងចក្រដំឡើងរថយន្តនៅកម្ពុជា

Dy Bunnara — Mon, 29 Apr 2024 03:16:28 +0000

បើតាមការគូសបញ្ជាក់ពីរដ្ឋមន្រ្តីក្រសួងពាណិជ្ជកម្ម មានក្រុមហ៊ុនចំនួន ៥ ទៀត កំពុងរៀបចំរចនាសម្ព័ន្ធផលិតកម្មដើម្បីឈានទៅបើកដំណើរការសង្វាក់ផលិតកម្មរោងចក្រដំឡើងរថយន្តនៅក្នុងប្រទេសកម្ពុជា។

ថ្លែងនៅក្នុងពិព័រណ៍រថយន្តដែលរៀបចំឡើងកាលពីចុងសប្តាហ៍មុននេះ លោកស្រី ចម និម្មល រដ្ឋមន្ត្រីក្រសួងពាណិជ្ជកម្មបានឲ្យដឹងថា បច្ចុប្បន្នមានក្រុមហ៊ុនចំនួន ៣ បានចាប់ផ្តើមដំណើរការខ្សែសង្វាក់ផលិតកម្មដំឡើងរថយន្តនៅក្នុងប្រទេសកម្ពុជាដែលមានក្រុមហ៊ុន Camko Motor (Hyundai) នៅខេត្តកោះកុង ក្រុមហ៊ុន RMA (Ford) នៅខេត្តពោធិ៍សាត់ និងក្រុមហ៊ុន DAEHAN Auto (Ssangyong) នៅខេត្តស្វាយរៀង ខណៈក្រុមហ៊ុនចំនួន ៥ ទៀត កំពុងរៀបចំរចនាសម្ព័ន្ធផលិតកម្មត្រៀមបើកដំណើរការរោងចក្រដំឡើងរថយន្តនៅពេលខាងមុខរួមមាន៖ ក្រុមហ៊ុន HGB Motors Assembly, ក្រុមហ៊ុន EM Automotive, ក្រុមហ៊ុន GTV Motor, ក្រុមហ៊ុន TOYOTA, និងក្រុមហ៊ុន China Matrix Technology។

លោក សឿន ដារ៉ា នាយកប្រតិបត្តិសហព័ន្ធឧស្សាហកម្មយានយន្ដកម្ពុជាបានឲ្យកម្ពុជាថ្មីដឹងថា តម្រូវការរថយន្តថ្មីក្នុងប្រទេសកម្ពុជាមួយឆ្នាំមានប្រមាណ ២ ម៉ឺនគ្រឿង។

ទាក់ទងវត្តមានរោងចក្រដំឡើងរថយន្តនៅក្នុងប្រទេសកម្ពុជា នាយកប្រតិបត្តិសហព័ន្ធឧស្សាហកម្មយានយន្ដកម្ពុជាបានឲ្យដឹងថា នឹងជួយកាត់បន្ថយការនាំចូលរថយន្តពីក្រៅបានមួយចំណែកផងដែរ។ យ៉ាងណាមិញ បើតាមនាយកប្រតិបត្តិសហព័ន្ធឧស្សាហកម្មយានយន្ដកម្ពុជា ទោះបីមានរថយន្តដំឡើងក្នុងស្រុក ប៉ុន្តែតម្លៃអាចនឹងមិនប្រែប្រួលច្រើនទេ។

លោកបានលើកពីមូលហេតុដោយសារបរិមាណផលិតនៅតិច តម្រូវការទាប ថ្លៃដើមផលិតនៅខ្ពស់នៅឡើយ ( high overhead cost/fixed cost)។ ក្រុមហ៊ុនភាគច្រើននាំចូលគ្រឿងបង្គុំស្ទើរទាំងស្រុងពីបរទេស ខណៈកម្លាំងពលកម្មនិងកម្មករជំនាញនៅមិនទាន់គ្រប់គ្រាន់។

រាជរដ្ឋាភិបាលបានចាប់យកវិស័យយានយន្ត និងអេឡិចត្រូនិចជាវិស័យអាទិភាពមួយ ក្នុងការជំរុញវិស័យឧស្សាហកម្ម និងសេដ្ឋកិច្ច កាត់បន្ថយការនាំចូលរថយន្តពីក្រៅប្រទេស អីចឹងវិស័យនេះនឹងបន្តមានការគាំទ្រពីរដ្ឋាភិបាល និងបន្តរីកចម្រើនទៅមុខទៀត។

លោក សឿន ដារ៉ា មានការជឿជាក់ថា ការដាក់ចេញយុទ្ធសាស្ត្ររបស់រដ្ឋាភិបាលប្រែក្លាយប្រទេសកម្ពុជាពីប្រទេសអភិវឌ្ឍតិចតួច ទៅជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងចំណូលកម្រិតខ្ពស់នៅឆ្នាំ ២០៥០។ នៅពេលដែលប្រជាជនមានចំណូលខ្ពស់ នោះតម្រូវការយានយន្តថ្មីនឹងកើនឡើងនិងបន្តទាក់ទាញវិនិយោគិនមកវិនិយោគបន្ថែមទៀត។

ថ្លែងនៅក្នុងពិព័ណ៍រថយន្ត រដ្ឋមន្ត្រីក្រសួងពាណិជ្ជកម្ម លោកស្រី ចម និម្មល បានលើកទឹកចិត្តដល់ធុរជននិងដៃគូវិនិយោគ ពិចារណាក្នុងការបណ្តាក់ទុនរកស៊ីឱ្យកាន់តែទូលំទូលាយ និងការបង្កើតមូលដ្ឋានផលិតកម្មនៅកម្ពុជា ដើម្បីទាញយកអត្ថប្រយោជន៍ជាច្រើនដែលកម្ពុជាកំពុងមានរួមមាន៖ កិច្ចព្រមព្រៀងពាណិជ្ជកម្មអាស៊ានបូក និងប្រព័ន្ធអនុគ្រោះពន្ធដែលកម្ពុជាទទួលបានពីប្រទេសអភិវឌ្ឍន៍ កិច្ចព្រមព្រៀងពាណិជ្ជសេរី និងក្របខណ្ឌនៃកិច្ចសម្រួលពាណិជ្ជកម្មនិងវិនិយោគថ្នាក់ជាតិ ព្រមទាំងមកវិនិយោគលើការបង្កើតរោងចក្រផលិតរថយន្ត សម្រាប់ផ្គត់ផ្គង់ទីផ្សារក្នុងស្រុក និងនាំចេញ ពិសេសការវិនិយោគលើរថយន្តអគ្គិសនី (Electric Vehicles)៕

The post ក្រុមហ៊ុនចំនួន ៥ ទៀត កំពុងរៀបចំរចនាសម្ព័ន្ធឈានទៅដំណើរការរោងចក្រដំឡើងរថយន្តនៅកម្ពុជា appeared first on Kampuchea Thmey Daily.

៥ សំនួរ ជុំវិញស្ថានភាពការវិនិយោគឧស្សាហកម្មដំឡើងរថយន្តនៅកម្ពុជា

Dy Bunnara — Fri, 26 Apr 2024 03:21:08 +0000

ជាង ១០ ឆ្នាំចុងក្រោយ កម្ពុជាទទួលបានការចាប់អារម្មណ៍ពីវិនិយោគិន ដែលបានបោះទុនរាប់សិបលានដុល្លារវិនិយោគ បង្កើតរោងចក្រដំឡើងរថយន្តសម្រាប់លក់ចែកចាយនៅក្នុងស្រុក។

កម្ពុជាត្រូវបានគេមើលឃើញទីផ្សារប្រើប្រាស់រថយន្តថ្មីនៅមានចំនួនតិចនៅឡើយ ខណៈរថយន្តជជុះនាំចូលកាន់កាប់ចំណែកទីផ្សារ ៦០ ទៅ ៧០ ភាគរយ។

កម្ពុជាថ្មីបានសម្ភាសន៍ លោក សឿន ដារ៉ា នាយកប្រតិបត្តិសហព័ន្ធឧស្សាហកម្មយានយន្ដកម្ពុជា (CAIF) ដើម្បីស្វែងយល់ពីស្ថានភាពវិស័យឧស្សាហកម្មដំឡើងយានយន្តនៅកម្ពុជា និងអនាគតឧស្សាហកម្មធុនធ្ងន់នេះនឹងវិវឌ្ឍន៍ទៅបែបណា?

លោក សឿន ដារ៉ា នាយកប្រតិបត្តិសហព័ន្ធឧស្សាហកម្មយានយន្ដកម្ពុជា (CAIF)

កម្ពុជាថ្មី៖ បច្ចុប្បន្នតើលោកដឹងមានក្រុមហ៊ុនដំឡើងរថយន្តប៉ុន្មាន ដែលបានបើករោងចក្រដំឡើងរថយន្តក្នុងប្រទេសកម្ពុជា?

លោក សឿន ដារ៉ា៖ បច្ចុប្បន្នក្រុមហ៊ុនចំនួន ៩ បានបោះទុនវិនិយោគបង្កើតរោងចក្រដំឡើងរថយន្តក្នុងប្រទេសកម្ពុជា។ ក្រុមហ៊ុនទាំង ៩ មានក្រុមហ៊ុន Hyundai នៅខេត្តកោះកុង ដែលដំឡើងរថយន្តលក្ខណៈគ្រួសារ (Passenger Car) និងរថយន្តដឹកទំនិញ (Truck) ក្រុមហ៊ុន Ssangyong នៅខេត្តស្វាយរៀង ដំឡើងរថយន្តដឹកទំនិញ (Truck) ក្រុមហ៊ុន Isuzu នៅខេត្តកំពង់ស្ពឺដំឡើងរថយន្តដឹកទំនិញ (Truck) ក្រុមហ៊ុន FORD នៅខេត្តពោធិ៍សាត់ ដំឡើងរថយន្តលក្ខណៈគ្រួសារ (Ford Ranger Pick- Up និងEverest SUV) ក្រុមហ៊ុន Kia នៅខេត្តបន្ទាយមានជ័យ ដំឡើងរថយន្តលក្ខណៈគ្រួសារ ក្រុមហ៊ុន GTV នៅខេត្តកណ្តាល ដំឡើងរថយន្តលក្ខណៈគ្រួសារ ក្រុមហ៊ុន Toyota នៅតំបន់សេដ្ឋកិច្ចពិសេសភ្នំពេញ ដំឡើងរថយន្តលក្ខណៈគ្រួសារ (Toyota Hilux Pick- Up និង Fortuner SUV) ក្រុមហ៊ុន EM AUTOMOBILE នៅខេត្តកោះកុង ផ្គុំដំឡើងរថយន្តសណ្តោង និងរថយន្តដឹកទំនិញធុនធ្ងន់ និងក្រុមហ៊ុន China Matrix Technology Group-Horche នៅខេត្តកោះកុង ដំឡើងរថយន្តអគ្គិសនី។

ក្នុងចំណោមក្រុមហ៊ុនទាំង ៩ មានក្រុមហ៊ុនចំនួន ៨ ដែលបានចាប់ផ្តើមដំណើរការខ្សែសង្វាក់ផលិតកម្ម។

កម្ពុជាថ្មី៖ តើវត្តមានរោងចក្រដំឡើងរថយន្តដ៏ច្រើននៅពេលនេះ អាចលើសតម្រូវការទីផ្សារដ៏តូចដូចកម្ពុជា?

លោក សឿន ដារ៉ា៖ មិនមានបញ្ហាទេ ដោយសារបច្ចុប្បន្នរោងចក្រដំឡើងក្នុងស្រុកមានសមត្ថភាពដំឡើងបានប្រមាណជាង ១ ម៉ឺនគ្រឿងក្នុង ១ ឆ្នាំ ឬ ៥០% នៃតម្រូវការរថយន្តថ្មីប៉ុណ្ណោះ ឬប្រមាណ២០% នៃទីផ្សាររថយន្តទាំងមូល។

កម្ពុជាថ្មី៖ តើតម្រូវការរថយន្តថ្មីនៅកម្ពុជាមួយឆ្នាំមានប៉ុន្មានគ្រឿង?

លោក សឿន ដារ៉ា៖ មានប្រមាណជាង ២ ម៉ឺនគ្រឿងក្នុង ១ ឆ្នាំ ខណៈឆ្នាំ ២០២៣ ចំនួនលក់រថយន្តថ្មីមានប្រមាណ ២៣ ០០០ គ្រឿង។

កម្ពុជាថ្មី៖ តើលោកមើលឃើញមានកត្តាប្រឈមអីខ្លះ សម្រាប់ឧស្សាហកម្មដំឡើងរថយន្តនៅកម្ពុជា?

លោក សឿន ដារ៉ា៖ បរិមាណផលិតតិចដោយសារតម្រូវការទាបនាំឲ្យថ្លៃដើមនៅខ្ពស់នៅឡើយ ជាហេតុធ្វើឲ្យរថយន្តនៅមានតម្លៃថ្លៃ ( high overhead cost/fixed cost)។ គ្រឿងបង្គុំសម្រាប់ដំឡើង នាំចូលសឹងទាំងស្រុងពីបរទេស។ កម្លាំងពលកម្ម កម្មករជំនាញមិនទាន់គ្រប់គ្រាន់និងសម្បូរបែប ក្រុមហ៊ុនមួយចំនួនត្រូវចំណាយច្រើនដើម្បីបញ្ជូនបុគ្គលិកទៅបណ្តុះបណ្តាលនៅបរទេស។

បរិមាណតម្រូវការយានយន្តថ្មីមានចំនួនតិចបើធៀបជាមួយប្រទេសជិតខាង។ ការទិញរថយន្តអាចប្រែប្រួលលឿន អាស្រ័យលើការពេញនិយមរបស់ប្រជាពលរដ្ឋ អាចនាំឲ្យរោងចក្រដែលពុំសូវពេញនិយមអាចខាតបង់ឬបិទទ្វារក្នុងពេលណាមួយ។

កម្ពុជាថ្មី៖ តើនៅពេលខាងមុខ វិស័យនេះនឹងមានការវិវឌ្ឍន៍បែបណាវិញ?

លោក សឿន ដារ៉ា៖ ទីផ្សាររថយន្តនៅក្នុងប្រទេសកម្ពុជា នៅមានសក្តានុពលខ្ពស់នៅឡើយ ដោយបច្ចុប្បន្នរថយន្តថ្មីដែលកំពុងចែកចាយដោយក្រុមហ៊ុនផ្លូវការមានប្រមាណ ៣៥% ប៉ុណ្ណោះ អីចឹងទីផ្សារប្រមាណ ៦៥% ទៀត អាចបន្តពង្រីកបាន។

រាជរដ្ឋាភិបាល បានដាក់ចេញយុទ្ធសាស្ត្រប្រែក្លាយប្រទេសកម្ពុជាពីប្រទេសអភិវឌ្ឍតិចតួច ទៅជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និង ចំណូលកម្រិតខ្ពស់នៅឆ្នាំ ២០៥០។ នៅពេលប្រជាជនមានចំណូលខ្ពស់ នោះតម្រូវការយានយន្តថ្មីនឹងកើនឡើង និងបន្តទាក់ទាញវិនិយោគិនមកវិនិយោគបន្ថែមទៀត៕

The post ៥ សំនួរ ជុំវិញស្ថានភាពការវិនិយោគឧស្សាហកម្មដំឡើងរថយន្តនៅកម្ពុជា appeared first on Kampuchea Thmey Daily.

សន្ទុះប្រើប្រាស់រថយន្តថ្មីនៅកម្ពុជា កើនឡើង ៤៥% ខណៈរថយន្តជជុះរក្សាបានទីផ្សារ៥៥%

Sophal Tuon — Tue, 06 Feb 2024 03:13:47 +0000

សន្ទុះនៃការប្រើប្រាស់រថយន្តថ្មីនៅកម្ពុជា មានការផ្លាស់ប្តូរទាំងស្រុង ដោយគិតត្រឹមឆ្នាំ ២០១៣ រថយន្តជជុះគ្របដណ្តប់ទីផ្សារប្រមាណ ៩០ភាគរយ ហើយរថយន្តថ្មីមានត្រឹម ១០ភាគរយប៉ុណ្ណោះ។ ប៉ុន្តែ១ទសវត្សក្រោយមក នៅឆ្នាំ ២០២៣ ការប្រើប្រាស់រថយន្តថ្មីបានកើនឡើងរហូតដល់ ៤៥ភាគរយ ខណៈរថយន្តជជុះរក្សាបានទីផ្សារនៅត្រឹម ៥៥ភាគរយប៉ុណ្ណោះ។ នេះបើតាមការបញ្ជាក់របស់លោក សឿន ដារ៉ា នាយកប្រតិបត្តិសហព័ន្ធឧស្សាហកម្មយានយន្តកម្ពុជា។

លោក សឿន ដារ៉ា បានលើកឡើងថា កម្ពុជា បានអនុម័តច្បាប់វិនិយោគថ្មីនៅក្នុងខែ កញ្ញា ឆ្នាំ ២០២១ និងផែនទីបង្ហាញផ្លូវក្នុងការអភិវឌ្ឍវិស័យយានយន្ត និងអេឡិចត្រនិកនៅចុងឆ្នាំ ២០២២។ បន្ទាប់ពីគោលការណ៍ទាំងពីរនេះ ត្រូវបានអនុម័ត កម្ពុជា ទទួលបានការវិនិយោគជាបន្តបន្ទាប់ពីក្រុមហ៊ុនបរទេសលើវិស័យយានយន្ត។ ជាក់ស្តែងមានដូចជា ក្រុមហ៊ុន Ford នៅពោធិ៍សាត់ ក្រុមហ៊ុន Kia Cambodia នៅប៉ោយប៉ែត ក្រុមហ៊ុន ISUZU Cambodia នៅកំពង់ស្ពឺ និងថ្មីៗនេះ ក្រុមហ៊ុន GTV ជាដើម ហើយនៅពាក់កណ្តាលឆ្នាំ ២០២៤ ក្រុមហ៊ុន Toyota នឹងបើកសម្ពោធក្រុមហ៊ុនរបស់ខ្លួននៅជាយរាជធានីភ្នំពេញផងដែរ។

នាយកប្រតិបត្តិសហព័ន្ធឧស្សាហកម្មយានយន្តកម្ពុជា បានកត់សម្គាល់ឃើញថា កន្លងមកកម្ពុជា គឺជាប្រទេសនាំចូលរថយន្តសឹងតែទាំងស្រុងពីក្រៅប្រទេស ពោលគឺជាប្រទេសដែលប្រើប្រាស់រថយន្តមួយទឹក ឬរថយន្តជជុះ។ ប៉ុន្តែចាប់ពីពេលនេះទៅ កម្ពុជា អាចដំឡើងរថយន្តនៅក្នុងស្រុកបាន និងកាត់បន្ថយការប្រើប្រាស់ឡានជជុះ ងាកមកប្រើប្រាស់ឡានថ្មីជំនួសវិញ។

បើតាមលោក ដារ៉ា ភាគច្រើនដែលពេញនិយម គឺរថយន្តប្រភេទគ្រួសារ SUV ខ្នាតមធ្យម និងខ្នាតតូច ដែលមានតម្លៃជាង ២ម៉ឺន ទៅ ៣ម៉ឺនដុល្លារស្តើង គឺកំពុងមានទីផ្សារខ្លាំង។ «កន្លែងនេះ គឺបញ្ជាក់ច្បាស់ពីសេដ្ឋកិច្ចកម្ពុជា តែម្តង នៅពេលសេដ្ឋកិច្ចកើនឡើងប្រជាពលរដ្ឋមានចំណូលខ្ពស់ តម្រូវការរថយន្តថ្មី មានគុណភាព និងសុវត្ថិភាព ក៏មានការកើនឡើងផងដែរ»។ នេះជាការមើលឃើញរបស់លោក សឿន ដារ៉ា។

លើសពីនេះទៀត លោក សឿន ដារ៉ា បានសង្កត់ធ្ងន់ថា រថយន្តថ្មីដែលដំឡើងនៅកម្ពុជា បានអនុលោមតាមស្តង់ដារទីផ្សារអន្តរជាតិ ដោយមានការអនុម័តពីវិទ្យាស្ថានស្តង់ដារក្រសួង ឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍។

លោក ចាន់ សុផា អគ្គនាយកនៃអគ្គនាយកដ្ឋានស្តង់ដារកម្ពុជា បានលើកឡើងថា បច្ចុប្បន្នរាជរដ្ឋាភិបាល បានដាក់ចេញនូវស្តង់ដារសុវត្ថិភាពចំនួន ២២ ដែលជាបទប្បញត្តិពាក់ព័ន្ធនឹងសុវត្ថិភាពរថយន្ត ដើម្បីបំពេញតាមលក្ខខណ្ឌច្បាប់ និងតម្រូវចិត្តអថិតិជន។ ដូច្នេះរថយន្តដែលដំឡើងនៅកម្ពុជាទាំងអស់ ត្រូវតែបំពេញនូវលក្ខខណ្ឌសុវត្ថិភាពទាំង ២២នេះ៕

The post សន្ទុះប្រើប្រាស់រថយន្តថ្មីនៅកម្ពុជា កើនឡើង ៤៥% ខណៈរថយន្តជជុះរក្សាបានទីផ្សារ៥៥% appeared first on Kampuchea Thmey Daily.

លោក សឿន ដារ៉ា Archives - Kampuchea Thmey Daily

ក្រុមហ៊ុនចំនួន ៥ ទៀត កំពុងរៀបចំរចនាសម្ព័ន្ធ​ឈានទៅ​​​ដំណើរការរោងចក្រដំឡើងរថយន្តនៅកម្ពុជា

៥ សំនួរ​ ជុំវិញ​ស្ថានភាព​ការ​វិនិយោគ​ឧស្សាហកម្ម​ដំឡើង​រថយន្ត​នៅ​កម្ពុជា

សន្ទុះប្រើប្រាស់រថយន្តថ្មីនៅកម្ពុជា កើនឡើង ៤៥% ខណៈរថយន្តជជុះរក្សាបានទីផ្សារ៥៥%

ក្រុមហ៊ុនចំនួន ៥ ទៀត កំពុងរៀបចំរចនាសម្ព័ន្ធឈានទៅដំណើរការរោងចក្រដំឡើងរថយន្តនៅកម្ពុជា

៥ សំនួរ ជុំវិញស្ថានភាពការវិនិយោគឧស្សាហកម្មដំឡើងរថយន្តនៅកម្ពុជា