លោក សេង សុភាព បាន​ឲ្យ​ដឹង​ថា ​ស្ទើរតែ​គ្រប់​ធនាគារទាំងអស់បានចាប់ផ្តើមប្រើប្រាស់ AI ជាពិសេសលើប្រព័ន្ធផ្ទេរប្រាក់ និង​ប្រព័ន្ធ​សុវត្ថិភាព។ ក្នុង​នោះក៏​មានការ​បង្កើត​ប្រព័ន្ធជំនួយការឆ្លើយតប (Chatbot) ជាភាសាខ្មែរ ដើម្បីជួយ​សម្រួល​ដល់​ការសួរនាំផ្សេងៗរបស់អតិថិជន។

ចំពោះ​វិស័យអប់រំវិញ បច្ចេកវិទ្យា AI ​ត្រូវបានយក​ទៅប្រើប្រាស់​ដើម្បីជួយ​ដល់​កុមារ​ដែល​មាន​ពិការភាព​ភ្នែកតាម​រយៈ​បច្ចេកវិទ្យា​អានអត្ថបទ​ជាសំឡេង​ភាសាខ្មែរនិង​ការបកប្រែ​ជាដើម ដើម្បី​ឱ្យ​ពួកគេ​មាន​លទ្ធភាពរៀនសូត្រ​បានកាន់តែប្រសើរ។

លើវិស័យសុខាភិបាល បច្ចេកវិទ្យា​សិប្បនិមិត្ត AI បាន​ដើរតួនាទីយ៉ាងសំខាន់​ក្នុងការជួយសង្គ្រោះជីវិត ដោយក្រុម​អ្នក​ស្រាវជ្រាវ​បានយក​ទិន្នន័យ​ពី​មន្ទីរពេទ្យ​មក​បង្កើត​ម៉ូដែល AI ដើម្បី​សិក្សា​ពីភាព​ស៊ាំនៃការប្រើប្រាស់​​ថ្នាំអង់ទីប៊ីយ៉ូទិកនៅក្នុង​ប្រទេស​កម្ពុជា។

លោក សេង សុភាព ​បញ្ជាក់ថា ដោយសារ​ពលរដ្ឋទូទៅច្រើន​ទិញថ្នាំ​ប្រើប្រាស់​ដោយខ្លួនឯង ដែលធ្វើឱ្យមេរោគស៊ាំនឹងថ្នាំ ហើយ​ដែល​ AI អាច​ជួយ​វិភាគ​ដឹងថា តើជំងឺឆ្លងណាខ្លះត្រូវប្រើជាមួយថ្នាំប្រភេទណាទើបមានប្រសិទ្ធភាព។

ក្នុងករណីជំងឺធ្ងន់ធ្ងរដែលទាមទារការសង្គ្រោះបន្ទាន់ AI ជួយ​ឱ្យ​គ្រូពេទ្យ​អាចធ្វើការសម្រេចចិត្តពឹងផ្អែកលើទិន្នន័យបានលឿននិងត្រឹមត្រូវជាងមុន ជាជាង​ការ​ពឹងផ្អែក​លើបទពិសោធន៍តែមួយមុខ។ បន្ថែមពីនេះ AI ក៏ត្រូវបានប្រើប្រាស់សម្រាប់ការវិភាគទិន្នន័យសុខភាពសាធារណៈ ដូចជាបញ្ហាជំងឺឆ្កែឆ្កួត។ លោក សេង សុភាព បន្ថែម។

ពាក់ព័ន្ធវិស័យកសិកម្ម លោក សេង សុភាព​ បាន​អះអាង​ថា មានការប្រមូលទិន្នន័យទាក់ទងនឹងដំណាំ​ស្រូវនិង​ជំងឺ​លើស្រូវមកវិភាគតាមរយៈប្រព័ន្ធ AI ដើម្បី​អាច​យល់ដឹង​ពីស្ថានភាព​កសិកម្ម និង​ជួយដោះស្រាយបញ្ហាផ្សេងៗជាមុន។

ដើម្បី​កសាងសមត្ថភាពពី​បច្ចេកវិទ្យា AI លោក​ សេង សុភាព បាន​ថ្លែង​ថា កម្ពុជា​មិន​អាចពឹងផ្អែក​លើ​ការទិញ​ប្រព័ន្ធ AI ពីបរទេសទាំងស្រុង​នោះទេ ព្រោះ​បរិបទនិង​ទិន្នន័យ​មិន​ដូចគ្នា។ កម្ពុជាចាំ​បាច់ត្រូវតែបង្វឹកម៉ូដែល AI ផ្ទាល់ខ្លួន​ដោយប្រើប្រាស់ទិន្នន័យក្នុងស្រុក និង​អ្នក​ជំនាញ​កម្ពុជា។

លោកអះអាង​ថា ដើម្បីគាំទ្រដល់កិច្ចការនេះ ក្រសួងប្រៃសណីយ និងទូរគមនាគមន៍ គ្រោង​រៀបចំបង្កើតមជ្ឈមណ្ឌល AI ដើម្បីជាឱកាសឱ្យអ្នកស្រាវជ្រាវខ្មែរអាចអភិវឌ្ឍម៉ូដែល AI សម្រាប់​ប្រើប្រាស់​ក្នុងស្រុក​បាន៕

The post ​លើ​ផ្នែក​កសិកម្ម អប់រំ ធនាគារ ​និង​សុខាភិបាល​ តើ​បច្ចេកវិទ្យា (AI) ​កំពុង​ប្រើជួយអ្វីខ្លះ? appeared first on Kampuchea Thmey Daily.

លោក សេង សុភាព ប្រធាន​បណ្ឌិត្យសភា​បច្ចេកវិទ្យា​ឌីជីថលកម្ពុជា​បាន​ឲ្យ​ដឹង​ថា AI កំពុង​ដើរតួនាទី​យ៉ាងសំខាន់​ក្នុង​កា​រ​ជួយ​សង្គ្រោះជីវិត តាមរយៈ​ការប្រើប្រាស់ទិន្នន័យ​វិភាគ​​លើ​ការប្រើប្រាស់​​ថ្នាំអង់ទីប៊ីយ៉ូទិក​ឲ្យ​មាន​ប្រសិទ្ធភាព។

លោកថា ក្រុម​អ្នក​ស្រាវជ្រាវ​បាន​យក​ទិន្នន័យ​ពី​មន្ទីរពេទ្យ​មក​បង្កើត​ម៉ូដែល AI ដើម្បីដោះស្រាយបញ្ហាភាពស៊ាំនឹងថ្នាំអង់ទីប៊ីយ៉ូទិក ដោយ​មានការ​សហការ​ជាមួយ​សាលាពេទ្យ និង​មន្ទីរពេទ្យកាល់ម៉ែត្រ។

ប្រជាជនកម្ពុជាភាគច្រើនមានបញ្ហាស៊ាំនឹងថ្នាំដោយសារទម្លាប់នៃការប្រើប្រាស់ថ្នាំតាំងពីក្មេង និងការប្តូរប្រភេទថ្នាំញឹកញាប់ ដែលធ្វើឲ្យបាក់តេរី និងវីរុសបង្កើតភាពស៊ាំនៅក្នុងបរិស្ថានកម្ពុជា។

បើតាមលោក សេង សុភាព តាមរយៈការប្រើប្រាស់ទិន្នន័យពីមន្ទីរពេទ្យ ក្រុមអ្នកស្រាវជ្រាវបានបង្កើតម៉ូដែល AI ដែលជួយវិភាគថាតើការឆ្លងមេរោគប្រភេទណា គួរប្រើប្រាស់ថ្នាំអង់ទីប៊ីយ៉ូទិកមួយណាទើបមានប្រសិទ្ធភាពខ្ពស់ ឬមានឱកាសជោគជ័យជាងគេសម្រាប់បុគ្គលម្នាក់ៗ។

ពីមុនមកគ្រូពេទ្យតែងតែពឹងផ្អែកលើបទពិសោធន៍ផ្ទាល់ខ្លួន ក្នុងការសម្រេចចិត្តជ្រើសរើសថ្នាំ។ ប៉ុន្តែម៉ូដែល AI ជួយ​ឱ្យ​ពួកគេអាចធ្វើការសម្រេចចិត្តបានកាន់តែប្រសើរ ដោយផ្អែកលើទិន្នន័យជាក់លាក់។

ការសម្រេចចិត្តបានត្រឹមត្រូវនិងទាន់ពេលវេលានេះ គឺមានសារៈសំខាន់ខ្លាំងណាស់ក្នុងការសង្គ្រោះជីវិត ជាពិសេសសម្រាប់ករណីឆ្លងមេរោគធ្ងន់ធ្ងរក្នុងខ្លួន ឬខួរក្បាល ដែលការយឺតយ៉ាវតែ ២ ទៅ ៣ ថ្ងៃអាចបណ្តាលឲ្យបាត់បង់ជីវិតបាន។ លោក សេង សុភាព​ បញ្ជាក់។

លោក សេង​ សុភាព បាន​​បន្ត​ថា ក្នុង​វិស័យ​សុខាភិបាល​នេះ​ដែរ អ្នកជំនាញក៏​បាន​ធ្វើ​សហការជាមួយវិទ្យាស្ថានប៉ាស្ទ័រកម្ពុជាសិក្សាពីជំងឺឆ្កែឆ្កួតដែលត្រូវបានគេចាត់ទុកថាជា “ឃាតករដ៏ស្ងាត់កំបាំង” ដើម្បីស្វែងយល់ និងដោះស្រាយការគំរាមកំហែងដល់សុខភាពសាធារណៈដែលបណ្តាលមកពីជំងឺមួយនេះនៅកម្ពុជា។

ជា​អ្នកស្រាវជ្រាវដែលមានបទពិសោធន៍ជាង ២៥ ឆ្នាំ លោក សេង សុភាព បានបង្ហាញពីក្តីរំភើបយ៉ាងខ្លាំងដែលជាលើក​ទី​១ ដែល​ចំណេះដឹងផ្នែក AI អាចជួយសង្គ្រោះអាយុជីវិតមនុស្សពិតៗ និង​ជួយ​កែលម្អវិស័យសុខាភិបាលនៅកម្ពុជាបានយ៉ាងច្រើន។

​បច្ចេកវិទ្យាបញ្ញាសិប្បនិម្មិត (AI) កំពុងត្រូវបានយកមកអភិវឌ្ឍ និង​ប្រើប្រាស់​យ៉ាង​សកម្ម​លើ​វិស័យ​ជាច្រើន​ដូចជា​​ផ្នែក​​សុខាភិបាល អប់រំ ធនាគារ កសិកម្ម​ជាដើម។

ដោយ​មើលឃើញពី​នវានុវត្តន៍នៃការប្រើប្រាស់​បច្ចេកវិទ្យា AI តាមវិស័យនីមួយៗ ក្រសួងប្រៃណីយនិង​ទូរគមនាគមន៍ ​រៀបចំ​​បង្កើតមជ្ឈ​មណ្ឌល AI ដើម្បីជាឱកាស​ឱ្យអ្នកស្រាវជ្រាវ​ខ្មែរអាចអភិវឌ្ឍម៉ូដែល AI សម្រាប់​ប្រើប្រាស់​ក្នុងស្រុក​បាន។

អ្នកជំនាញ​បាន​អះអាង​ថា កម្ពុជា​មិន​អាច​ពឹង​ផ្អែក​លើ​ការទិញ​ប្រព័ន្ធ AI ពី​បរទេស​ទាំងស្រុង​នោះទេ ព្រោះ​បរិបទ​​និង​ទិន្នន័យ​មិន​ដូចគ្នា។ ឧទាហរណ៍ បញ្ហាភាព​ស៊ាំថ្នាំនៅកម្ពុជា​គឺខុសពីប្រទេសបារាំង ដូច្នេះ​ការ​យក​ម៉ូដែល​ពី​បារាំង​ម​កប្រើគឺមិនត្រឹមត្រូវឡើយ។ ប្រព័ន្ធ AI សម្គាល់ផ្ទៃមុខបើ​ទិញពី​សហរដ្ឋអាមេរិក ក៏​អាច​នឹង​មាន​បញ្ហា​ក្នុងការ​បែងចែក​ទម្រង់មុខជនជាតិខ្មែរដែរ។ ហេតុនេះកម្ពុជាចាំបាច់ត្រូវតែបង្វឹកម៉ូដែល AI ផ្ទាល់ខ្លួន​ដោយ​ប្រើប្រាស់​ទិន្នន័យ​ក្នុងស្រុក និង​អ្នក​ជំនាញ​កម្ពុជា៕

The post កម្ពុជា​ប្រើប្រាស់​បច្ចេកវិទ្យា​សិប្បនិម្មិត AI ដើម្បី​សិក្សា​ពីភាព​ស៊ាំនៃ​ការប្រើប្រាស់​ថ្នាំ​អង់ទីប៊ីយ៉ូទិក appeared first on Kampuchea Thmey Daily.

ក្នុងពិធីបើកវគ្គបណ្តុះបណ្តាលនាព្រឹកថ្ងៃទី៣០ ខែមិថុនា ឆ្នាំ២០២៣នេះ គឺមានការចូលរួមពី លោក លីវ សុផាណារិទ្ធ រដ្ឋលេខា​ធិការ​ក្រសួង​ប្រៃសណីយ៍ និងទូរគមនាគមន៍ លោកបណ្ឌិត សេង សុភាព ប្រធានបណ្ឌិត្យ​សភា​បច្ចេកវិទ្យាឌីជីថល​កម្ពុជា និងលោក ពុយ គា ប្រធានក្លិបអ្នកកាសែតកម្ពុជា ព្រមទាំងអ្នកសារព័ត៌មានដែលជាសិក្ខាកាមចំនួន៣៤នាក់ មកពី២៦ ស្ថាប័ន។

វគ្គបណ្តុះបណ្តាលនេះ រៀបចំឡើងដើម្បីផ្តល់ឱកាសដល់អ្នកសារព័ត៌មាននូវចំណេះដឹងបន្ថែមអំពីការប្រើប្រាស់កម្មវិធីថត កាត់តវីដេអូតាមទូរស័ព្ទដៃ ការកែរូបភាព ដាក់ក្រេឌីតលើរូបភាពតាមរយៈទូរស័ព្ទដៃ និងការប្រើប្រាស់បណ្តាញទំនាក់ទំនង​សង្គម ( Messenger, Telegram, What’s App ) ជាដើម។ 

បើតាមលោក សេង សុភាព ប្រធានបណ្ឌិត្យសភាបច្ចេកវិទ្យាឌីជីថលកកម្ពុជា វិទ្យាស្ថានអភិបាលកិច្ចឌីជីថល បានបើកដំណើរការរយៈជាង ២ឆ្នាំហើយ ហើយមានសិស្សទទួលការបណ្តុះបណ្តាលប្រហែល ៧០០នាក់។ កន្លងមក វិទ្យាស្ថានឌីជីថលកម្ពុជា បានបណ្តុះបណ្តាលចំណេះដឹងទាក់ទងនឹងបច្ចេកវិទ្យា ដល់បុគ្គលិកក្រសួងមួយចំនួនផងដែរ។ លោកគូសបញ្ជាក់ថា វគ្គបណ្តុះបណ្តាលនេះ ក៏នឹងមានរៀបចំជាបន្តបន្ទាប់ទៀត៕

The post វិទ្យាស្ថានអភិបាលកិច្ចឌីជីថល បើកវគ្គបណ្តុះបណ្តាលជាលើកដំបូង ដល់ក្រុមអ្នកសារព័ត៌មានកម្ពុជា appeared first on Kampuchea Thmey Daily.