លោក ស៊ិន ចន្ធី Archives - Kampuchea Thmey Daily

លោក ស៊ិន ចន្ធី៖ សង្គ្រាមមជ្ឈិមបូព៌ា ធ្វើឱ្យតម្លៃបន្ថែមលើការដឹកជញ្ជូនតាមផ្លូវទឹកកើនឡើង

Din Thary — Mon, 09 Mar 2026 06:52:18 +0000

លោក ស៊ិន ចន្ធី ប្រធានសមាគមភស្តុភារកម្មកម្ពុជា បានថ្លែងថា សង្គ្រាមក្នុងតំបន់មជ្ឈិមបូព៌ា រវាងអាមេរិក អ៊ីស្រាអែល ជាមួយ អ៊ីរ៉ង់ បង្កឱ្យមានផលប៉ះពាល់យ៉ាងធ្ងន់ធ្ងរលើថាមពលប្រេង ជាពិសេសក្នុងវិស័យដឹកជញ្ជូន និងភស្តុភារ។

ថ្លែងប្រាប់«កម្ពុជាថ្មី» លោក ស៊ិន ចន្ធី បានលើកឡើងថា ជាការពិតគិតត្រឹមថ្ងៃទី០៦ ខែមីនា គឺមានរយៈពេល ៧ ថ្ងៃហើយ ដែលអាមេរិកចាប់ដៃគ្នាជាមួយអីស្រាអែល វាយប្រហារលើអ៊ីរ៉ង់។

ចំពោះសង្គ្រាមនាពេលនេះ ក្នុងវិស័យដឹកជញ្ជូន និងភស្តុភារ យើងដឹងច្បាស់ថា នឹងរងផលប៉ះពាល់ទី១ ចាប់តាំងពីថ្ងៃទី៣ នៃសង្គ្រាមក្រុមហ៊ុនកប៉ាល់ធំៗមួយចំនួនបានចាប់ផ្តើមដាក់ចេញនៅការគិតថ្លៃបន្ថែមទៅលើថ្លៃដឹកជញ្ជូន ឬហៅថា ការគិតថ្លៃបន្ថែមនៃជម្លោះបន្ទាន់ (Emergency Conflict Surcharges) (ECS) ដែលមានតម្លៃខ្ពស់។

ក្នុងនោះការគិតថ្លៃបន្ថែម ២ ពាន់ដុល្លារអាមេរិក ទៅលើកុងតឺន័រទំហំ ២០ ហ្វីត (20ft Container) បន្ថែមពីលើការដឹកជញ្ជូន គិតថ្លៃបន្ថែម ៣ ពាន់ដុល្លារ ទៅលើកុងតឺន័រទំហំ ៤០ ហ្វីត បន្ថែមទៅលើការដឹកជញ្ជូន និង ៤ ពាន់ដុល្លារ គិតថ្លៃបន្ថែមទៅលើការដឹកជញ្ជូនសម្រាប់កុងតឺន័រត្រជាក់ដែលដឹកជញ្ជូននូវផលិតផលត្រូវការសីតុណ្ហភាពត្រជាក់។

លោក បានបញ្ជាក់ថា កាលពីថ្ងៃទី៥ និងទី៦ តម្លៃនៃការដឹកជញ្ជូននេះ ក៏មានការកើនឡើងខ្ពស់សម្រាប់ទំនិញដែលចេញពីតំបន់អាស៊ី រួមទាំងកម្ពុជាទៅកាន់តំបន់អារ៉ាប់រួម។

ចំណែកឯទំនិញដែលត្រូវនាំចេញទៅសហរដ្ឋអាមេរិក ក៏ដូចទៅអ៊ឺរ៉ុប នៅមិនទាន់មានការឡើងថ្លៃអ្វីជាគំហុកនោះទេសម្រាប់ផ្លូវទឹក ប៉ុន្តែសម្រាប់ផ្លូវអាកាសក៏ដូចគ្នា ដោយក្រុមហ៊ុនអាកាសចរណ៍ធំៗដែលត្រូវហោះឆ្លងកាត់តំបន់មជ្ឈិមបូព៌ា មានការឡើងថ្លៃ ហើយក្រុមហ៊ុនអាកាសចរណ៍មួយចំនួនទៀត ក៏មានការផ្លាស់ប្តូរ លុបចោលនូវជើងហោះហើរ និងមិនទាន់ទទួលការកក់បន្ថែមទៀតផងដែរ។

ទន្ទឹមនេះអំពីកម្ពុជា ប្រធានសមាគមភស្តុភារកម្មកម្ពុជារូបនេះ បានអះអាងថា បើនិយាយពីកម្ពុជាជម្រើសសម្រាប់ការធ្វើពាណិជ្ជកម្មទាក់ទងនឹងផ្លូវដឹកជញ្ជូនទៅកាន់មជ្ឈិមបូព៌ាដូចជាមិនទំហំធំនោះទេ តាមការប៉ាន់ស្មានអាចមានទំហំប្រមាណតិចជាង ១% នៅឡើយ ដូច្នេះវាស្ថិតនៅក្នុងទំហំតូច។ ទី២ ជម្រើសរបស់កម្ពុជាមួយទៀតដែរ ឃើញថាកម្ពុជាភាគច្រើនគឺនាំចេញទៅកាន់ទីផ្សារសហរដ្ឋអាមេរិក និងអ៊ឺរ៉ុប ដូច្នេះផលប៉ះពាល់ខ្លាំងមកដល់ម៉ោងនេះនៅមិនទាន់មាននៅឡើយទេ។

លោកថា បើទោះបីជាយ៉ាងណាយើងនៅតែរង់ចាំមើល ប្រសិនបើសង្គ្រាមនេះនៅតែបន្តអូសបន្លាយពេល ឬកាន់តែរីករាលដាលធំជាងនេះ គឺអាចនឹងប៉ះពាល់ទៅដល់ផ្លូវដឹកជញ្ជូនទៅសហរដ្ឋអាមេរិក ក៏ដូចជាអ៊ឺរ៉ុប។

អាស្រ័យហេតុនេះហើយជម្រើសរបស់កម្ពុជា ប្រសិនបើតំបន់ផ្សេងៗទៀត ហើយសង្គ្រាមនេះកាន់តែរីករាយដាល និងអូសបន្លាយពេលយូទៀត ជម្រើសរបស់យើងមានតែផ្លាស់ប្តូរនូវខ្សែសង្វាក់ផ្គត់ផ្គង់ (supply chain) ក៏ដូចជាទីផ្សារនៅក្នុងតំបន់អាស៊ីប៉ាស៊ីហ្វិក ដែលនេះគឺជាការគិតទុករបស់អ្នកផលិត ក៏ដូចជាអ្នកនាំចេញ ហើយយើងមានតែជំរុញនៅក្នុងតំបន់ឱ្យបានច្រើន ជាជាងតំបន់ដែលមានបញ្ហា។

លោក ស៊ិន ចន្ធី បន្ថែមថា យើងឃើញថាមកដល់ពេលបច្ចុប្បន្ននេះ សង្គ្រាមទើបតែមានរយៈពេល ៧ ថ្ងៃតែប៉ុណ្ណោះ គិតត្រឹមថ្ងៃទី៦ ខែមិនា ដូច្នេះយើងមិនទាន់អាចវាយតម្លៃបានទេ គឺនៅបន្តតាមដាន តើវាអាចវិវត្តទៅដល់កម្រិតណាទៀត ប្រសិនបើសង្គ្រាមអូសបន្លាយពេលយូ នោះយើងត្រូវមានផែនការថ្មី ក៏ដូចជាជម្រើសផ្សេងបន្ថែមទៀតដើម្បីដោះស្រាយ៕

ដោយ៖ ឌិន ថារី

The post លោក ស៊ិន ចន្ធី៖ សង្គ្រាមមជ្ឈិមបូព៌ា ធ្វើឱ្យតម្លៃបន្ថែមលើការដឹកជញ្ជូនតាមផ្លូវទឹកកើនឡើង appeared first on Kampuchea Thmey Daily.

ឆ្នាំ ២០២៤ គម្រោងអភិវឌ្ឍតាមផ្លូវទឹកធំៗចំនួន ៨ បានបញ្ចប់ដាក់ឲ្យដំណើរការ

Dy Bunnara — Tue, 04 Feb 2025 03:34:17 +0000

បើតាមក្រសួងសាធារណការនិងដឹកជញ្ជូន នៅឆ្នាំ ២០២៤ មានគម្រោងអភិវឌ្ឍហេដ្ឋារចនាសម្ព័ន្ធតាមផ្លូវទឹកធំៗចំនួន ៨ បានបញ្ចប់ការសាងសង់និងដាក់ឲ្យប្រើប្រាស់ ដែលបានជួយជំរុញបន្ថែមនូវសក្តានុពលនៃការដឹកជញ្ជូន និងពង្រីកលទ្ធភាពការប្រកួតប្រជែងរបស់កម្ពុជាជាមួយបណ្តាប្រទេសនៅក្នុងតំបន់។

គម្រោងអភិវឌ្ឍហេដ្ឋារចនាសម្ព័ន្ធដឹកជញ្ជូនតាមផ្លូវទឹកដែលបានបញ្ចប់ និងសម្ពោធដាក់ឱ្យប្រើប្រាស់រួមមានដូចជា ចំណតផែកុងតឺន័រនៃកំពង់ផែស្វយ័តក្រុងព្រះសីហនុប្រវែង ២៥៣ ម៉ែត្រ, កំពង់ផែពហុបំណងកំពត, ឃ្លាំងសន្និធិគយបណ្តោះអាសន្ននៃចំណតផែកុងតឺន័រ LM១៧ ចំណតផែរណបពហុបំណង TS11 UM2 និង LM26 របស់កំពង់ផែស្វយ័តភ្នំពេញ, ឃ្លាំងលើកដាក់ និងស្តុកទំនិញត្រជាក់របស់ក្រុមហ៊ុន ខ្មែរ ខូល ឆេន ស្ថិតក្នុងបរិវេណចំណតផែកុងតឺន័រ LM17 របស់កំពង់ផែស្វយ័តភ្នំពេញ, និងការបើកឱ្យដំណើរការបណ្តោះអាសន្នកំពង់ផែទេសចរណ៍អន្តរជាតិខេត្តកំពត ដែលកំពង់ផែនេះគ្រោងនឹងសម្ពោធជាផ្លូវការ ក្រោមអធិបតីភាពសម្ដេចធិបតីនាយករដ្ឋមន្ត្រី នៅថ្ងៃ ទី៣ ខែមេសា ឆ្នាំ២០២៥។

ថ្លែងនៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅបន្ដឆ្នាំ២០២៥ របស់ក្រសួងសាធារណការ និងដឹកជញ្ជូន កាលពីថ្ងៃទី២៣ ខែមករា ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានថ្លែងថា រាជរដ្ឋាភិបាលនីតិកាលទី៧ នៃរដ្ឋសភា នៅតែបន្តចាត់ទុកវិស័យសាធារណការ និងដឹកជញ្ជូន ជាវិស័យអាទិភាពគន្លឹះក្នុងការរួមចំណែកដល់ការអភិវឌ្ឍប្រទេសជាតិ និងលើកកម្ពស់កំណើនសេដ្ឋកិច្ច តាមរយៈការតភ្ជាប់ប្រទាក់ក្រឡា និងសមាហរណកម្មផ្ទៃក្នុង និងតំបន់, ប្រសិទ្ធភាពនៃការដឹកជញ្ជូន និងការរីកចម្រើននៃប្រព័ន្ធឡូជីស្ទីក។

ចាប់តាំងពីដើមអាណត្តិទី៧ រហូតមកដល់ដំណាច់ ឆ្នាំ២០២៤ ក្រសួងសាធារណការ និងដឹកជញ្ជូន សម្រេចបាននូវសមិទ្ធផលជាច្រើន ឆ្លើយតបបានទៅនឹងអាទិភាព នៃយុទ្ធសាស្ត្របញ្ចកោណ-ដំណាក់កាលទី១ ជាពិសេសការកំណត់នូវចក្ខុវិស័យសំខាន់ៗចំនួន ២ គឺ១៖ ការលើកកម្ពស់សេវាដឹកជញ្ជូន តាមរយៈការអភិវឌ្ឈ និងបន្តធ្វើទំនើបកម្មការប្រើប្រាស់បច្ចេកវិទ្យាឌីជីថល ក្នុងការគ្រប់គ្រង និងការផ្តល់សេវាលឿន រហ័ស តម្លាភាព ប្រសិទ្ធភាព ងាយស្រួល និងជឿទុកចិត្ត និង២៖ ការលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្ទីក និងការអភិវឌ្ឍហេដ្ឋារចនាសម្ព័ន្ធដឹកជញ្ជូនឲ្យមានគុណភាព សុវត្ថិភាព ចីរភាព ភាពធន់ និងបរិយាប័ន្ន។

លោក ស៊ិន ចន្ធី អគ្គនាយកក្រុមហ៊ុន ឡាញហល អេចប្រេស ខេមបូឌា និងជាអ្នកជំនាញក្នុងវិជ្ជាជីវៈវិស័យដឹកជញ្ជូន និងភស្តុភារកម្មក្នុងក្រុមប្រឹក្សាភិបាល នៃសមាគមភស្តុភារកម្មកម្ពុជាបានប្រាប់កម្ពុជាថ្មីថា ជាការពិតការដឹកជញ្ជូនតាមផ្លូវទឹក មានសារសំខាន់ និងមានទំហំធំគ្របដណ្តប់ស្ទើរតែ ៨០% នៃការធ្វើពាណិជ្ជកម្មក្នុងប្រទេសកម្ពុជា។

លោកថា បើធៀបឆ្នាំ ២០២៤ និងឆ្នាំ ២០២៣ ការដឹកជញ្ជូនផ្លូវទឹកមានកំណើនជាង ២០% ទាំងនៅកំពង់ផែក្រុងព្រះសីហនុ និងកំពង់ផែនៅភ្នំពេញ ដែលនេះអាចបញ្ជាក់បានថាការដឹកជញ្ជូនតាមផ្លូវទឹកមានសក្ដានុពល កំណើន ហើយជាតម្រូវការចាំបាច់។

រដ្ឋាភិបាលនៅតែបន្តដាក់អាទិភាពលើការអភិវឌ្ឍហេដ្ឋារចនាសម្ព័ន្ធតាមផ្លូវទឹក ដើម្បីកាត់បន្ថយថ្លៃដើម ចម្ងាយ ពេលវេលានៃការដឹកជញ្ជូនទំនិញ ដែលផ្តល់លទ្ធភាពពង្រីកការតភ្ជាប់ជាមួយពហុមធ្យោបាយដឹកជញ្ជូនផ្សេងទៀត។ ជាក់ស្តែងគម្រោងព្រែកជីកហ្វូណនតេជោដែលជាគម្រោងទាញសមុទ្រឲ្យជាប់ទន្លេ ចាយទុនប្រមាណ ១,៧ ពាន់លានដុល្លារ ដែលតាមរយៈគម្រោងនេះ នឹងជួយពង្រឹងនូវឯករាជ្យភាពខាងនយោបាយរបស់កម្ពុជាលើការដឹកជញ្ជូនតាមផ្លូវទឹក ដែលរួមចំណែកដល់ការជំុញដល់ការអភិវដ្ឍសេដ្ឋកិច្ចសង្គមកម្ពុជា៕

The post ឆ្នាំ ២០២៤ គម្រោងអភិវឌ្ឍតាមផ្លូវទឹកធំៗចំនួន ៨ បានបញ្ចប់ដាក់ឲ្យដំណើរការ appeared first on Kampuchea Thmey Daily.

រថយន្តដឹកទំនិញពីចិនចាយពេល ៥ ថ្ងៃ លើចម្ងាយផ្លូវ ២៥០០ គីឡូម៉ែត្រ ទើបមកដល់ប្រទេសកម្ពុជា

Dy Bunnara — Wed, 03 Jul 2024 04:40:30 +0000

រថយន្តដឹកទំនិញដែលមានដឹកបន្លែស្រស់ សម្ភារការិយាល័យ គ្រឿងសង្ហារិម និងទំនិញផ្សេងៗទៀត បានចាកចេញទីក្រុងគុនមីនប្រទេសចិន មកដល់រាជធានីភ្នំពេញប្រទេសកម្ពុជាដោយជោគជ័យ ដែលជាដំណើរការរត់សាកល្បងឆ្លងកាត់ព្រំដែនលើកដំបូងនៃប្រទេសមហាអនុតំបន់ទន្លេមេគង្គ។

អនុវត្តតាមកិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែននៃមហាអនុតំបន់មេគង្គ (ហៅកាត់ថា GMS CBTA) ការដាក់ឲ្យដំណើរការរត់សាកល្បងរថយន្តដឹកទំនិញ (EH Trial Run) ពីទីក្រុងគុនមីន ប្រទេសចិន ដែលបានបើកឆ្លងកាត់ប្រទេសឡាវ ប្រទេសថៃ និងមកដល់រាជធានីភ្នំពេញ បានប្រើប្រាស់រយៈពេលចំនួន ៥ ថ្ងៃ លើចម្ងាយផ្លូវ ២៥០០ គីឡូម៉ែត្រ។ រយៈពេលនៃការធ្វើដំណើរនេះ ក៏មានរួមបញ្ចូលទាំងការឈប់សម្រាក និងការបំពេញបែបបទផ្សេងៗតាមច្រកព្រំដែនប្រទេសដែលឆ្លងកាត់។

ឧកញ៉ាបណ្ឌិត ស៊ិន ចន្ធី អគ្គនាយកក្រុមហ៊ុន ឡាញហល អេចប្រេស ខេមបូឌា និងជាអ្នកជំនាញក្នុងវិជ្ជាជីវៈវិស័យដឹកជញ្ជូន និងភស្តុភារកម្មក្នុងក្រុមប្រឹក្សាភិបាលនៃសមាគមភស្តុភារកម្មកម្ពុជា ដែលបានចូលរួមសិក្សាគម្រោងដាក់ឲ្យសាកល្បងរថយន្តដឹកទំនិញ នៅក្នុងប្រទេសមហាអនុតំបន់មេគង្គបានឲ្យកម្ពុជាថ្មីដឹងថា ក្នុងប្រវែងចម្ងាយផ្លូវជាង ២,៥០០ គីឡូម៉ែត្រពីទីក្រុងគុនមីងប្រទេសចិនមកដល់ប្រទេសកម្ពុជា ការធ្វើដំណើរបានចំណាយពេលវេលាចំនួន ៥ ថ្ងៃ ដែលរួមមានទាំងការឈប់សម្រាក និងការបំពេញបែបបទផ្សេងៗឆ្លងកាត់តាមច្រកព្រំដែន។

លោកបន្តថា ដំណើរឆ្លងកាត់ប្រទេសនីមួយៗ ក្នុងនោះពីទីក្រុងគុនមីងប្រទេសចិនមកទីក្រុងវៀងចន្ទន៍ប្រទេសឡាវដែលមានចម្ងាយ ១,៣៨០ គីឡូម៉ែត្រ បានប្រើប្រាស់ពេលពី ២៤-៣៦ ម៉ោង។ ពីទីក្រុងវៀងចន្ទន៍ទៅថៃដែលមានចម្ងាយ ៦៥០ គីឡូម៉ែត្រ ប្រើប្រាស់ពេលពី ១២-២៨ ម៉ោង និងពីថៃមកកម្ពុជាចម្ងាយ ៤០០ គីឡូម៉ែត្រ ប្រើប្រាស់ពេលពី ៨-១២ ម៉ោង។

ទាក់ទងការដាក់ឲ្យរត់សាកល្បងរថយន្តដឹកទំនិញឆ្លងកាត់ព្រំដែននៃប្រទេសមហាអនុតំបន់មេគង្គ ឧកញ៉ាបណ្ឌិត ស៊ិន ចន្ធី បានគូសបញ្ជាក់ថា គ្រាន់តែជាការបើកផ្លូវ នៅមិនទាន់សិក្សាលម្អិតពីតម្លៃដឹកជញ្ជូននៅឡើយទេ។ ជាបទពិសោធន៍ បើតាមឧកញ៉ា ស៊ិន ចន្ទី ការដឹកជញ្ជូនតាមផ្លូវគោកគឺប្រសើរជាងផ្លូវអាកាស ប៉ុន្តែលោកទទួលស្គាល់ថាក៏មិនថោកជាងការដឹកជញ្ជូនតាមផ្លូវទឹកដែរ ប៉ុន្តែការដឹកជញ្ជូនតាមផ្លូវគោក អាចចំណាយពេលតិចជាងនិងប្រសិទ្ធភាពជាង។

ឧកញ៉ាបណ្ឌិត ស៊ិន ចន្ធី លើកឡើងបន្តថា ការធ្វើពាណិជ្ជកម្មមិនថាតែជាមួយប្រទេសចិននិងពិភពលោក មានពាក់ព័ន្ធប្រព័ន្ធមធ្យោបាយដឹកជញ្ជូនសំខាន់ចំនួន ៣។ មានទំនិញខ្លះមិនអាចដឹកជញ្ជូនតាមយន្តហោះបានទេ ទំនិញខ្លះក៏មិនអាចដឹកជញ្ជូនតាមផ្លូវទឹកបានស្រួលដែរ អីចឹងត្រូវប្រើប្រាស់ផ្លូវគោក។

បើតាមឧកញ៉ា ស៊ិន ចន្ធី ការសិក្សាមធ្យោបាយដឹកជញ្ជូនកុំមើលតែមួយផ្នែក ត្រូវមើលឲ្យគ្រប់ជ្រុងជ្រោយទាំងផ្លូវអាកាស ផ្លូវទឹក និងផ្លូវគោក។

ឧកញ៉ា ស៊ិន ចន្ធី បានលើកឡើងបន្តទៀតថា កម្ពុជាត្រូវតែស្វែងយល់ពីកិច្ចព្រមព្រៀងដឹកជញ្ជូននេះដោយយកចិត្តទុកដាក់បំផុត ដើម្បីទាញជាប្រយោជន៍សម្រាប់បម្រើដល់វិស័យដឹកជញ្ជូនប្រទេសកម្ពុជានៅថ្ងៃខាងមុខ។

បើតាមក្រសួងសាធារណការនិងដឹកជញ្ជូនកម្ពុជា កិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែននៃមហាអនុតំបន់មេគង្គ (GMS CBTA) ជួយឱ្យប្រតិបត្តិករដឹកជញ្ជូន កាត់បន្ថយពេលវេលាសម្រាប់ការជម្រះបែបបទពាក់ព័ន្ធ ឬនីតិវិធីឆ្លងកាត់ព្រំដែនជាអន្តរជាតិ ដោយមិនតម្រូវឱ្យមានការលើកដាក់ទំនិញឡើងវិញ។

តាមកិច្ចព្រមព្រៀង ប្រទេសជាសមាជិក GMS មានកូតាយានយន្តចំនួន ៥០០ គ្រឿង (យានយន្តដឹកទំនិញ និងយានយន្តដឹកអ្នកដំណើរ) ដែលអនុញ្ញាតឱ្យដឹកជញ្ជូនទំនិញ និងអ្នកដំណើរតាមបណ្តាញផ្លូវតភ្ជាប់ប្រទេស GMS ទាំង ៦ (រួមមាន កម្ពុជា ចិន ឡាវ មីយ៉ាន់ម៉ា ថៃ និងវៀតណាម)។

ឧកញ៉ា សួរ វីរៈ អគ្គនាយកក្រុមហ៊ុន វីរៈប៊ុនថាំ អេចប្រេស ដែលត្រូវបានគេស្គាល់ថាជាក្រុមហ៊ុនដឹកជញ្ជូនអ្នកដំណើរ និងបញ្ញើអីវ៉ាន់ឈានមុខគេមួយនៅប្រទេសកម្ពុជា និងបានពង្រីកសាខាទៅក្រៅប្រទេសមាន ថៃ វៀតណាម រួមទាំងចិនផងនោះមានសុទិដ្ឋិនិយមថា បើសិនដំណើរគម្រោងនេះទទួលបានជោគជ័យ នឹងនាំប្រយោជន៍យ៉ាងច្រើនសម្រាប់វិស័យដឹកជញ្ជូនប្រទេសកម្ពុជា។

អគ្គនាយកក្រុមហ៊ុន វីរៈប៊ុនថាំ អេចប្រេសបានបញ្ជាក់ថា កន្លងទៅលោកក៏ធ្លាប់សិក្សាពីការដឹកជញ្ជូនតាមផ្លូវគោកទៅប្រទេសចិន ខណៈការដឹកជញ្ជូនតាមផ្លូវអាកាសមានការចំណាយខ្ពស់ ហើយតាមផ្លូវទឹកឆ្លងកាត់នីតិវិធីច្រើនចាយពេលវេលាយូរ។

លោកសម្លឹងឃើញថា មានតែមធ្យោបាយដឹកជញ្ជូនតាមផ្លូវគោកជាជម្រើសដ៏ល្អប្រសើរបំផុត ដែលសម្រួលបានចំណេញទាំងពេលវេលានិងថ្លៃដឹកជញ្ជូន៕

The post រថយន្តដឹកទំនិញពីចិនចាយពេល ៥ ថ្ងៃ លើចម្ងាយផ្លូវ ២៥០០ គីឡូម៉ែត្រ ទើបមកដល់ប្រទេសកម្ពុជា appeared first on Kampuchea Thmey Daily.

រថយន្តដឹកទំនិញ រត់សាកល្បងជោគជ័យពីទីក្រុងគុនមីនប្រទេសចិន មកដល់រាជធានីភ្នំពេញ

Dy Bunnara — Mon, 01 Jul 2024 04:02:45 +0000

អនុវត្តតាមកិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែននៃមហាអនុតំបន់មេគង្គ (ហៅកាត់ថា GMS CBTA)ដំណើរការរត់សាកល្បងរថយន្តដឹកទំនិញ (EH Trial Run) ពីទីក្រុងគុនមីន ប្រទេសចិន ឆ្លងកាត់ប្រទេសឡាវ ប្រទេសថៃ បានមកដល់រាជធានីភ្នំពេញដោយជោគជ័យ។

ក្បួនរថយន្តចំនួន ០៧ គ្រឿង បានធ្វើដំណើរចំណាយជាង ២ ០០០ គ.ម ដោយមានទាំងយានយន្តដឹកទំនិញ ០៥ គ្រឿង បានដឹកបន្លែស្រស់ សម្ភារការិយាល័យ គ្រឿងសង្ហារិម និងយានយន្តដឹកអ្នកដំណើរចំនួន ០២ គ្រឿងទៀត បានដឹកប្រតិភូមហាអនុតំបន់មេគង្គ ប្រតិបត្តិករដឹកជញ្ជូន អ្នកជំនាញការ និងអ្នកកាសែតសម្រាប់ចូលរួមដំណើរការរត់សាកល្បងនេះ។

តាមកិច្ចព្រមព្រាងសម្រួលការដឹកជញ្ជូនឆ្លងកាត់ព្រំដែននៃមហាអនុតំបន់មេគង្គ ប្រទេសជាសមាជិក GMS មានកូតាយានយន្តចំនួន ៥០០ គ្រឿង (យានយន្តដឹកទំនិញ និងយានយន្តដឹកអ្នកដំណើរ) ដែលអនុញ្ញាតឱ្យដឹកជញ្ជូនទំនិញ និងអ្នកដំណើរតាមបណ្តាញផ្លូវតភ្ជាប់ប្រទេស GMS ទាំង ៦ (រួមមាន កម្ពុជា ចិន ឡាវ មីយ៉ាន់ម៉ា ថៃ និងវៀតណាម)។

កិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែននៃមហាអនុតំបន់មេគង្គ (GMS CBTA) អាចជួយឱ្យប្រតិបត្តិករដឹកជញ្ជូន កាត់បន្ថយពេលវេលាសម្រាប់ការជម្រះបែបបទពាក់ព័ន្ធ ឬនីតិវិធីឆ្លងកាត់ព្រំដែនជាអន្តរជាតិ ដោយមិនតម្រូវឱ្យមានការលើកដាក់ទំនិញឡើងវិញ។ ចំពោះអ្នកដំណើរនៅតែអាចអង្គុយលើយានយន្តដឹកអ្នកដំណើរនោះដដែល។

ឧកញ៉ា បណ្ឌិត សុិន ចន្ធី អគ្គនាយកក្រុមហ៊ុន ឡាញហល អេចប្រេស ខេមបូឌា និងជាអ្នកជំនាញវិជ្ជាជីវៈក្នុងវិស័យដឹកជញ្ជូន និងភស្តភាកម្មក្នុងក្រុមប្រឹក្សាភិបាលនៃសមាគមភស្តុភាកម្មកម្ពុជាបានឲ្យកម្ពុជាថ្មីដឹងថា ជារឿងល្អដែលកម្ពុជាត្រូវតែស្វែងយល់ពីកិច្ចព្រមព្រៀងដឹកជញ្ជូននេះដោយយកចិត្តទុកដាក់បំផុត។

ការធ្វើពាណិជ្ជកម្មមិនថាតែជាមួយប្រទេសចិននិងពិភពលោក មានពាក់ព័ន្ធប្រព័ន្ធមធ្យោបាយដឹកជញ្ជូនសំខាន់ចំនួន ៣។ មានទំនិញខ្លះមិនអាចដឹកជញ្ជូនតាមយន្តហោះបានទេ ទំនិញខ្លះក៏មិនអាចដឹកជញ្ជូនតាមផ្លូវទឹកបានស្រួលដែរ អីចឹងត្រូវប្រើប្រាស់ផ្លូវគោក។ បើតាមឧកញ៉ា ស៊ិន ចន្ធី ការសិក្សាមធ្យោបាយដឹកជញ្ជូន កុំមើលតែមួយផ្នែក ត្រូវមើលឲ្យគ្រប់ជ្រុងជ្រោយទាំងផ្លូវអាកាស ផ្លូវទឹក និងផ្លូវគោក។

យ៉ាងណាមិញ ឧកញ៉ាបណ្ឌិត សុិន ចន្ធី ដែលបានចូលរួមសិក្សាពីកិច្ចព្រមព្រៀងដឹកជញ្ជូននេះបានបន្ថែមថា ការសាកល្បងនេះគ្រាន់តែជាការបើកផ្លូវ នៅមិនទាន់សិក្សាលម្អិតពីតម្លៃដឹកជញ្ជូននៅឡើយទេ។ ជាបទពិសោធន៍ការដឹកជញ្ជូនតាមផ្លូវគោកគឺប្រសើរជាងផ្លូវអាកាស ប៉ុន្តែលោកទទួលស្គាល់ថាក៏មិនថោកជាងការដឹកជញ្ជូនតាមផ្លូវទឹកដែរ ប៉ុន្តែការដឹកជញ្ជូនតាមផ្លូវគោក អាចចំណាយពេលតិចជាងនិងប្រសិទ្ធភាពជាង។

មហាអនុតំបន់មេគង្គ គឺជាក្របខ័ណ្ឌនៃកិច្ចសហប្រតិបត្តិការមួយដែលមានសមាជិកចំនួន ០៦ ប្រទេស រួមមាន៖ ព្រះរាជាណាចក្រកម្ពុជា សាធារណរដ្ឋប្រជាមានិតចិន (ខេត្តយូណាន និងតំបន់ស្វយ័តក្វាងស៊ីជុង) សាធារណរដ្ឋប្រជាធិបតេយ្យប្រជាមានិតឡាវ សាធារណរដ្ឋសហព័ន្ធមីយ៉ាន់ម៉ា ព្រះរាជាណាចក្រថៃ និងសាធារណរដ្ឋសង្គមនិយមវៀតណាម។

ចំពោះកិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែននៃមហាអនុតំបន់មេគង្គ (ហៅកាត់ថា GMS CBTA) គឺជាគំនិតផ្តួចផ្តើមដ៏សំខាន់មួយរបស់មហាអនុតំបន់មេគង្គ (GMS) ដែលបង្កើតឡើងក្នុងគោលបំណងដើម្បីកាត់បន្ថយថ្លៃដឹកជញ្ជូនផ្លូវគោកជាអន្តរជាតិ និងជំរុញកិច្ចខិតខំប្រឹងប្រែងរបស់ប្រទេសជាសមាជិក GMS ជាធ្លុងមួយឱ្យអស់ពីលទ្ធភាព ក្នុងការវិនិយោគលើហេដ្ឋារចនាសម្ព័ន្ធដឹកជញ្ជូនផ្លូវថ្នល់។

គួរបញ្ជាក់ថា ពិធីទទួលស្វាគមន៍ក្បួនរថយន្តរត់សាកល្បង EH Trial Run ពីទីក្រុងគុនមីន (ប្រទេសចិន) ឆ្លងកាត់តាមប្រទេសឡាវ ប្រទេសថៃ មករាជធានីភ្នំពេញបានធ្វើឡើងកាលពីសប្តាហ៍មុននេះ ដោយមានការចូលរួមពីមន្រ្តីក្រសួងសាធារណការនិងដឹកជញ្ជូនកម្ពុជាដែលតំណាងដោយលោក តូច ចាន់កុសល រដ្ឋលេខាធិការ និងជាប្រធានគណៈកម្មាធិការជាតិសម្របសម្រួលការដឹកជញ្ជូនឆ្លងកាត់ មន្ត្រីជាន់ខ្ពស់ក្រសួងដឹកជញ្ជូនសាធារណរដ្ឋប្រជាមានិតឡាវ ប្រធានប្រតិភូនៃក្រសួងដឹកជញ្ជូនចិន តំណាងធនាគារអភិវឌ្ឍន៍អាស៊ី ប្រតិភូតំណាងប្រទេសចិន កម្ពុជា ឡាវ ថៃ និងទីប្រឹក្សានៃគម្រោងផងដែរ៕

The post រថយន្តដឹកទំនិញ រត់សាកល្បងជោគជ័យពីទីក្រុងគុនមីនប្រទេសចិន មកដល់រាជធានីភ្នំពេញ appeared first on Kampuchea Thmey Daily.

លោក ស៊ិន ចន្ធី Archives - Kampuchea Thmey Daily

លោក ស៊ិន ចន្ធី៖ សង្គ្រាមមជ្ឈិមបូព៌ា ធ្វើឱ្យតម្លៃបន្ថែមលើការដឹកជញ្ជូនតាមផ្លូវទឹកកើនឡើង

ឆ្នាំ ២០២៤ ​គម្រោង​អភិវឌ្ឍ​តាម​ផ្លូវ​ទឹក​ធំៗ​ចំនួន ៨ បាន​បញ្ចប់​ដាក់​ឲ្យ​ដំណើរការ

រថយន្ត​ដឹក​ទំនិញ​ពី​ចិន​ចាយ​ពេល ៥ ថ្ងៃ​ លើ​ចម្ងាយ​ផ្លូវ ២៥០០ គីឡូម៉ែត្រ​ ទើប​មក​ដល់​ប្រទេស​កម្ពុជា

រថយន្តដឹកទំនិញ ​​រត់សាកល្បង​​ជោគជ័យ​ពីទីក្រុង​គុនមីនប្រទេសចិន មកដល់រាជធានីភ្នំពេញ

ឆ្នាំ ២០២៤ គម្រោងអភិវឌ្ឍតាមផ្លូវទឹកធំៗចំនួន ៨ បានបញ្ចប់ដាក់ឲ្យដំណើរការ

រថយន្តដឹកទំនិញពីចិនចាយពេល ៥ ថ្ងៃ លើចម្ងាយផ្លូវ ២៥០០ គីឡូម៉ែត្រ ទើបមកដល់ប្រទេសកម្ពុជា

រថយន្តដឹកទំនិញ រត់សាកល្បងជោគជ័យពីទីក្រុងគុនមីនប្រទេសចិន មកដល់រាជធានីភ្នំពេញ