លោក ហូ វណ្ឌី Archives - Kampuchea Thmey Daily

វិស័យឯកជន៖ ព្រលានយន្តហោះថ្មី មិនត្រឹមផ្តល់ផលចំណេញផ្នែកទេសចរណ៍ តែក៏នឹងទាក់ទាញសក្ដានុពលផ្នែកពាណិជ្ជកម្ម

Din Thary — Mon, 15 Sep 2025 01:55:17 +0000

លោក ហូ វណ្ឌី ប្រធានក្រុមប្រឹក្សាភិបាលនៃសមាគមទេសចរណ៍កម្ពុជា មើលឃើញថា វឌ្ឍនភាពព្រលានយន្តហោះអន្តរជាតិតេជោថ្មី មិនត្រឹមតែផ្តល់ផលចំណេញផ្នែកទេសចរណ៍នោះទេ តែក៏នឹងទាក់ទាញសក្តានុពលខាងផ្នែកពាណិជ្ជកម្មផងដែរ។

ថ្លែងប្រាប់ «កម្ពុជាថ្មី» លោក ហូ វណ្ឌី បានមានប្រសាសន៍ថា ព្រលានយន្តហោះថ្មីនេះទាំងរាជរដ្ឋាភិបាល ប្រជាពលរដ្ឋ ទេសចរនៅក្រៅប្រទេស ពលរដ្ឋកម្ពុជារស់នៅក្រៅប្រទេស ជាពិសេសភ្ញៀវទេសចរបរទេស ដែលចូលមកលេងកម្ពុជា សុទ្ធសឹងតែចង់ឃើញនូវសមិទ្ធផលនេះលេចចេញជារូបរាងឡើង។

ជាក់ស្ដែង ក្រោយព្រលានយន្តហោះនេះបើកឱ្យដំណើរការជាផ្លូវការ គឺបានផ្តល់ផលចំណេញជាច្រើនសម្រាប់វិស័យទេសចរណ៍កម្ពុជា។ ដូចយើងបានឃើញហើយថា មិនមែនមានតែភ្ញៀវទេសចរចេញ និងចូលមកក្នុងស្រុកនោះទេ ប៉ុន្តែព្រលានយន្តហោះថ្មីនេះនឹងទាក់ទាញទៅដល់សក្ដានុពលខាងផ្នែកពាណិជ្ជកម្មផងដែរ ជាពិសេសការដឹកទំនិញនាំចេញ និងនាំចូលទាំងក្នុង និងក្រៅប្រទេស។ ព្រោះព្រលានយន្តហោះថ្មីមានផ្លូវចុះចតវែងជាងមុន ដែលផ្តល់ភាពងាយស្រួលអាចឱ្យយន្តហោះទាំងខ្នាតតូច និងខ្នាតធំចុះចតបានយ៉ាងងាយស្រួល។

លោក ហូ វណ្ឌី បានបន្ថែមថា «មកដល់ពេលបច្ចុប្បន្ននេះជាង ៣០ ក្រុមហ៊ុនអាកាសចរណ៍ដែលបាននិងកំពុងរៀបចំជើងហោះហើររបស់ខ្លួននៅអាកាសយានដ្ឋានថ្មី ដូច្នេះ សមិទ្ធផលថ្មីនេះ គឺជារឿងមួយដែលកម្ពុជា អាចទទួលបាន ទី១ ភ្ញៀវទេសចរ ទី២ ការដឹកទំនិញចេញចូល និងទី៣ គឺនឹងទាក់ទាញទៅដល់ក្រុមហ៊ុនអាកាសចរណ៍ឆ្ងាយៗ មកកម្ពុជាបន្ថែមទៀត»។

«ទេសចរណ៍គឺត្រូវការមានការពឹងផ្អែកគ្នាទៅវិញទៅមក មិនអាចធ្វើតែឯកឯងបានទេ ចាំបាច់ត្រូវមានការផ្សារភ្ជាប់ក្នុងតំបន់ និងពិភពលោក។ ជាក់ស្តែងទេសចរ ដែលមកទស្សនាប្រទេសនីមួយៗចាំបាច់ត្រូវចំណាយពេលវេលា និងចំណាយថវិកាជាច្រើន ដូច្នេះពួកគេចាំបាច់ត្រូវទស្សនា ៣ ទៅ ៤ ប្រទេសក្នុងពេលតែមួយ។ នេះគឺជារឿងល្អដែលកម្ពុជាមានប្រលានយន្តហោះអាចចុះចតបានទាំងក្នុងស្រុក និងអន្តរជាតិ ដើម្បីភ្ជាប់ពីតំបន់មួយទៅកាន់តំបន់មួយទៀត»។ លោក ហូ វណ្ឌី បន្ថែមបែបនេះ។

ជាមួយគ្នានេះ លោក ស សារិន អគ្គនាយកហ៊ុនទេសចរណ៍ Channel ជាក្រុមហ៊ុនលក់សំបុត្រយន្តហោះ បានឱ្យ«កម្ពុជាថ្មី» ដឹងដែរថា ព្រលានយន្តហោះអន្តរជាតិតេជោនេះ គឺជាចលករថ្មីដ៏សំខាន់មួយក្នុងការជំរុញសេដ្ឋកិច្ចជាតិនៅក្នុងប្រទេសកម្ពុជា ជាពិសេសការនាំចូលភ្ញៀវទេសចរអន្តរជាតិផ្សេងៗ ក៏ដូចជាអ្នកវិនិយោគ និងការនាំយកនូវកេរ្តិ៍ឈ្មោះ កិត្តិយសរបស់កម្ពុជាទៅលើឆាកអន្តរជាតិតាមរយៈអ្នកចូលមកទស្សនានៅកម្ពុជា។

យ៉ាងណាមិញ កន្លងមកយើងឃើញហើយថា រាជរដ្ឋាភិបាលកម្ពុជា បានដាក់ចេញនូវគោលនយោបាយសំខាន់ៗជាច្រើន ជាពិសេសជំរុញការហោះហើរត្រង់មកកាន់ប្រទេសកម្ពុជា។ មែនទែនទៅ កម្ពុជាក៏មិនពឹងទៅលើប្រទេសជិតខាងក្នុងការនាំយកនូវភ្ញៀវទេសចរមកកាន់ប្រទេសកម្ពុជារហូតនោះទេ ដូច្នេះព្រលានយន្តហោះអន្តរជាតិតេជោថ្មីនេះ លោកជឿថា ការហោះហើរត្រង់ពីប្រទេសធំៗទាំងឡាយនឹងកើនឡើងជាបន្តបន្ទាប់។

លោក ស សារិន បានបន្តដែរថា ជាចំណុចចាប់ផ្តើមនៃការទាញយកភ្ញៀវទេសចរពីផ្លូវឆ្ងាយមកកាន់កម្ពុជា នៅកំឡុងប៉ុន្មានខែខាងមុខនេះ នឹងមានក្រុមហ៊ុនហោះហើរធំៗចំនួន ២ រួមមាន ក្រុមហ៊ុនអាកាសចរណ៍ Emirates Airlines របស់ប្រទេសអារ៉ាប់រួម និង ក្រុមហ៊ុនអាកាសចរណ៍ Turkish Airlines របស់ប្រទេសតួកគី ក្រុមហ៊ុនទាំងពីរនេះនិងធ្វើការហោះហើរត្រង់មកកាន់ព្រលានយន្តហោះរបស់កម្ពុជា។

ទន្ទឹមនេះ លោកក៏បានបញ្ជាក់ដែរថា «នៅក្នុងគោលជំហររបស់ថ្នាក់ដឹកនាំ និងគោលជំហរខាងសមាគមទេសចរណ៍នានារបស់កម្ពុជា គឺជំរុញធ្វើយ៉ាងណាឱ្យប្រទេសកម្ពុជាក្លាយទៅជាគោលដៅទេសចរណ៍ត្រង់មកកាន់ប្រទេសកម្ពុជា និងក្លាយទៅជាគោលដៅទី១ សម្រាប់ទេសចរណ៍ និងការវិនិយោគ ហើយអាចនឹងសាយភាយទៅកាន់ប្រទេសជិតខាងផ្សេងៗទៀត»។

និយាយជារួម ក្នុងនាមវិស័យឯកជននៅក្នុងវិស័យអាកាសចរណ៍ ពិតជាត្រេកអរ ពេលរាជរដ្ឋាភិបាលកម្ពុជាសម្រេចបើកដំណើរការនូវព្រលានយន្តហោះថ្មីនេះ ដោយគ្រប់គ្នាបានត្រៀមខ្លួនរួចជាស្រេចក្នុងការធ្វើការជាមួយរាជរដ្ឋាភិបាល ដើម្បីធ្វើយ៉ាងណាឱ្យសេដ្ឋកិច្ចរបស់ប្រទេសកម្ពុជាមានការរីកចម្រើន។

អាកាសយានដ្ឋានអន្តរជាតិតេជោលំដាប់ 4F តម្លៃ ២ ពាន់លានដុល្លារ ដំណាក់កាលទី១ បានបិទបញ្ចប់ការសាងសង់ទាំងស្រុង ដែលបានបើកឱ្យដំណើរការកាលពីថ្ងៃទី ០៩ ខែកញ្ញា ឆ្នាំ ២០២៥កន្លងទៅថ្មីៗនេះ។

អាកាសយានដ្ឋានអន្តរជាតិតេជោ នឹងមកជំនួសអាកាសយានដ្ឋានអន្តរជាតិភ្នំពេញបច្ចុប្បន្ន ដែលមានសមត្ថភាពបម្រើសេវាកម្មដឹកភ្ញៀវទេសចរណ៍បានរហូតដល់ទៅ ៦ ដងលើសព្រលានបច្ចុប្បន្ន។

អាកាសយានដ្ឋានអន្តរជាតិតេជោមាន ៣ ដំណាក់កាល គឺដំណាក់កាលទី១ តម្លៃ ២ ពាន់លានដុល្លារ សាងសង់រួចរាល់នៅឆ្នាំ ២០២៥ អាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ៕

ដោយ៖ ឌិន ថារី

The post វិស័យឯកជន៖ ព្រលានយន្តហោះថ្មី មិនត្រឹមផ្តល់ផលចំណេញផ្នែកទេសចរណ៍ តែក៏នឹងទាក់ទាញសក្ដានុពលផ្នែកពាណិជ្ជកម្ម appeared first on Kampuchea Thmey Daily.

អ្នកជំនាញបង្ហើបពីយុទ្ធសាស្រ្តទាក់ទាញភ្ញៀវទេសចរអន្តរជាតិ

Sophal Tuon — Tue, 03 Oct 2023 00:00:00 +0000

វិស័យទេសចរណ៍ក្នុងប្រទេសកម្ពុជា នៅតែជារឿងក្តៅ ដែលសាធារណជន កត់សម្គាល់ឃើញថា មានការធ្លាក់ចុះច្រើនក្នុងរយៈពេលចុងក្រោយនេះ ប៉ុន្តែស្ថាបនពាក់ព័ន្ធពិសេសក្រសួងទេសចរណ៍ បានចេញរបាយការណ៍បង្ហាញពីកំណើននៃភ្ញៀវទេសចរមានការកើនឡើង។ អ្នកជំនាញទេសចរ បានកត់សម្គាល់ឃើញថា វិស័យទេសចរណ៍មានកំណើនល្អប្រសើរស្មើនឹងប្រទេសជិតខាងដែរ កាលពីមុនវិបត្តិកូវីដ-១៩។ ប៉ុន្តែក្រោយវិបត្តិកូវីដនេះ ប្រទេសជិតខាងហាក់មានសន្ទុះកើនឡើងខ្លាំង បន្ទាប់ពីមានការដករបាំងទិដ្ឋាការដល់ប្រទេសធំៗជាច្រើន។

លោក ហូ វណ្ឌី ប្រធានក្រុមប្រឹក្សាភិបាលនៃសមាគមទេសចរណ៍កម្ពុជា បានលើកឡើងថា ការលើកលែងទិដ្ឋាការ បានផ្តល់ឱកាសឱ្យប្រទេសថៃ ស្រូបទាញទេសចរអន្តរជាតិប្រមាណ ១០០ប្រទេស ហូរចូលយ៉ាងគំហុក។ ដោយឡែកប្រទេសវៀតណាម ទាក់ទាញបានប្រមាណ ៣០ប្រទេសឱ្យចូលទៅលេងកម្សាន្តប្រទេសរបស់ខ្លួនផងដែរ។ ចំណែកកម្ពុជា ក៏អាចធ្វើដូច្នេះបានដែរ ដើម្បីទាក់ទាញអ្នកទេសចរពីក្រៅប្រទេស។ អ្នកជំនាញទេសចរលោក ហូ វណ្ឌី បានលើកជាទស្សនថា ការលើកលែងទិដ្ឋាការ មិនធ្វើឱ្យបាត់បង់ចំណូលនោះទេ ពោលគឺការហូរចូលយ៉ាងគំហុកនៃវត្តមានភ្ញៀវទេសចរ នឹងបានផ្តល់ផលប្រយោជន៍ជាច្រើនតាមរយៈការចាយវាយរបស់ពួកគេ លើសពីតម្លៃទិដ្ឋាការទៅទៀត។ «បើសិនជាអ្នកទេសចរស្នាក់នៅយូរ ការចាយវាយក៏ច្រើន រដ្ឋក៏ទទួលបានចំណូលពន្ធទៅតាមនោះដែរពីអ្នកដែលរកទទួលទានក្នុងវិស័យនេះ»។ នេះជាការបន្ថែមរបស់លោក ហូ វណ្ឌី។

លោក ខៀវ ធី ប្រធាសមាគមមគ្គទេសក៍ទេសចរណ៍អង្គរ បានលើកឡើងថា គិតមកដល់ពេលនេះ ភ្ញៀវទេសចរអន្តរជាតិ បានកើនឡើងវិញជាបណ្តើរៗហើយ ពោលគឺចាប់ពីខែ តុលានេះទៅ ព្រោះជារដូវ Hight Season របស់ភ្ញៀវទេសចរបរទេស។

ចំពោះការធ្វើយ៉ាងណាឱ្យភ្ញៀវទេសចរចូលមកលេងកម្សាន្តបានយូរ លោកថា កម្ពុជា ត្រូវរៀនពីប្រទេសជិតខាង ដូចជា វៀតណា និងថៃ ដែលជាប្រទេសរីកចម្រើនខ្លាំងលើវិស័យនេះ។

ប្រធាសមាគមមគ្គទេសក៍ទេសចរណ៍ បានបន្តថា ប្រទេសជិតខាងទាក់ទាញបានចំនួនទេសចរច្រើន ដោយសារ ការសម្រួលទិដ្ឋាការសម្រាប់ភ្ញៀវទេសចរ ជាពិសេសមានអាកាសចរជាតិហោះហើរទូទាំងពិភពលោកដោយត្រង់ និងដឹកភ្ញៀវទេសចរចូលក្នុងប្រទេសរបស់ខ្លួនជាដើម។ លើសពីនេះទៀត ការធ្វើបដិសណ្ឋារកិច្ចល្អ សន្តិសុខ សណ្តាប់ធ្នាប់អនាម័យ ហេដ្ឋារចនាសម្ព័ន្ធ សួនច្បារប្រណីត ក៏ជាផ្នែកមួយទាក់ទាញខ្លាំង និងធ្វើឱ្យភ្ញៀវស្នាក់នៅបានយូរផងដែរ។

លោក ខៀវ ធី បានកត់សម្គាល់ឃើញថា ភ្ញៀវទេសចរអន្តរជាតិមកពីបណ្តាប្រទេសផ្សេងៗ ចូលតាមច្រកប្រទេសថៃភាគច្រើនមកទស្សនាអង្គរវត្តកម្ពុជា ហើយក៏ត្រឡប់ទៅវិញ។ ត្រឡប់ទៅវិញ ដោយសារពួកគេយល់ថា នៅកម្ពុជា មិនទាន់មានគ្រប់តម្រូវការដែលពួកគេចង់បាន។

លោកបន្តថា គ្រាន់តែទីវត្តអារាមក៏អាចទាក់ទាញភ្ញៀវទេសចរបានដែរ ប្រសិនបើមានការរៀបចំឱ្យមានសណ្តាប់ធ្នាប់ និងតុបតែងបានស្អាត ព្រោះទេសចរអន្តរជាតិចូលចិត្តទស្សនានៅតាមទំបន់រមណីយដ្ឋានបុរាណ និងវត្តអារាមជាដើម។

តាមពិតទៅ ភ្ញៀវទេសចរ មិនគួរចូលមកទស្សនាអង្គរវត្តហើយត្រឡប់ទៅវិញទេ ព្រោះកម្ពុជា នៅមានរមណីយដ្ឋានតាមតំបន់នានាជាច្រើន ដូចជាតំបន់អេកូទេសចរណ៍ខេត្តមណ្ឌលគិរី រតនគិរី ដែលជាតំបន់ធម្មជាតិ, រាជធានីភ្នំពេញ, ក្រុងបាត់ដំបង ក្រុងកំពង់ចាម ដែលសុទ្ធសឹងជាតំបន់ទាក់ទាញ។ នេះជាការបន្ថែមរបស់លោក ខៀវ ធី។

លោក ហូ វណ្ឌី បានលើកឡើងថា ដើម្បីទាក់ទាញភ្ញៀវទេសចរអន្តរជាតិ កម្ពុជា ត្រូវតែមានការកែសម្រួលទៅលើអត្តចរិតរបស់អ្នកស្ថិតនៅក្នុងវិស័យនេះ ដូចជា ក្រមសីលធម៌ និងវិជ្ជាជីវៈជាដើម។ ជាមួយគ្នានេះ ត្រូវរៀបចំហេដ្ឋរចនាសម្ព័ន្ធ និងចរាចរណ៍នៅតំបន់គោលដៅមួយចំនួន ការតុបតែង ការកែច្នៃ អនាម័យ សណ្តាប់ធ្នាប់ ជាពិសេសនៅរាជធានីភ្នំពេញ ដែលជាតំបន់ប្រវត្តិសាស៍ នយោបាយ សេដ្ឋកិច្ច។ លើសពីនេះទៀត លោក ហូ វណ្ឌី ជំរុញឱ្យមានការរៀបចំផ្លូវសម្រាប់អ្នកថ្មើជើងដើរ នៅក្នុងទីក្រុងភ្នំពេញ គឺជាភាពទាក់ទាញដ៏ខ្លាំងបំផុត សម្រាប់ភ្ញៀវទេសចរ។ ការបង្កើតផ្លូវថ្មើជើង ក៏ជាផ្នែកមួយជួយផ្តល់ការងារដល់ពលរដ្ឋខ្មែរ ប្រកបអាជីវកម្មលក់ដូរតាមចិញ្ចឹមផ្លូវផងដែរ សម្រាប់អ្នកដើរកម្សាន្ត។

ផ្ទុយទៅវិញលោកថា ប្រសិនបើស្ថាបនជំនាញពាក់ព័ន្ធ មិនប្រឹងប្រែងដុតដៃដុតជើងដោះស្រាយឱ្យទាន់ពេលទេ វិស័យនេះ នឹងបន្តជួបបញ្ហាថែមទៀត។ ចំណែកការប្រមូលពន្ធពីវិស័យទេសចរណ៍ ក៏ធ្លាក់ចុះទៅតាមនឹងដែរ ហើយអ្នកដែលរកទទួលទានក្នុងវិស័យនេះ ប្រមាណជាង ១លាននាក់ ក៏រងផលប៉ះពាល់ជីវភាពផងដែរ។

យោងតាមរបាយការណ៍ ក្រសួងទេសចរណ៍ បានបង្ហាញថា រយៈពេល៨ខែ ឆ្នាំ២០២៣ កម្ពុជាទទួលបានទេសចរអន្តរជាតិជាង ៣.៥លាននាក់ កើនឡើង ២៥០.៨% រីឯភ្ញៀវទេសចរជាតិមានប្រមាណ១២.៣៨លាននាក់ កើនឡើង ៦២.៥% ធៀបនឹងរយៈពេលដូចគ្នា នៅឆ្នាំ២០២២។ នៅឆ្នាំ២០២៣នេះ កម្ពុជារំពឹងទទួលបានទេសចរអន្តរជាតិប្រមាណ៥លាននាក់ កើនឡើង ១២០% , ទេសចរជាតិប្រមាណ១៧លាននាក់ និងឆ្នាំ២០២៨ ទេសចរអន្តរជាតិ រំពឹងថា អាចកើនដល់៨លាននាក់៕

The post អ្នកជំនាញបង្ហើបពីយុទ្ធសាស្រ្តទាក់ទាញភ្ញៀវទេសចរអន្តរជាតិ appeared first on Kampuchea Thmey Daily.

សន្ទុះទេសចរអន្តរជាតិ ចូលកម្ពុជា មានកំណើនខ្ពស់ ក្នុងខែមករា

Sophal Tuon — Tue, 07 Feb 2023 04:44:42 +0000

នៅក្នុងខែមករា ឆ្នាំ២០២៣ កម្ពុជា ទទួលបានភ្ញៀវទេសចរអន្តជាតិប្រមាណ៤០ម៉ឺននាក់ កើនឡើង៧៩៤% បើប្រៀបធៀបនឹងរយៈពេលដូចគ្នានៅឆ្នាំ២០២២ និងថយចុះ៣៨% បើប្រៀបធៀបនឹងឆ្នាំ២០១៩។ ក្នុងចំណោមភ្ញៀវ ៤០ម៉ឺននាក់នេះ មានទេសចរចិនប្រមាណ ២៥០០០នាក់។ នេះបើតាមការបញ្ជាក់របស់រដ្ឋមន្រ្តីក្រសួងទេសចរណ៍លោក ថោង ខុន។

ថ្លែងប្រាប់សារព័ត៌មានក្នុងស្រុកលោក ថោ ខុន បានឱ្យដឹងថា ក្នុងចំណោមភ្ញៀវទេសចរអន្តរជាតិទាំង៤០ម៉ឺននាក់នោះ មានភ្ញៀវមកតាមផ្លូវអាកាសប្រមាណ ១៤០,០០០នាក់ កើនឡើង៤៥១%, មកតាមផ្លូវគោកប្រមាណ២៥៥,០០០ម៉ឺននាក់ កើនឡើង១,២៨៤% និងមកតាមផ្លូវទឹកប្រមាណ៥,០០០នាក់ (ពិសេសតាមនាវាទេសចរណ៍ធំៗ) កើនឡើង១,២៨៣% ធៀបនឹងខែមករា ឆ្នាំ២០២២។

ទាក់ទិននឹងកំណើនទេសចរនេះ លោក ហូ វណ្ឌី ប្រធានក្រុមប្រឹក្សាភិបាលសមាគមទេសចរណ៍កម្ពុជា បានលើកឡើងថា កំណើននៃទេសចរអន្តរជាតិនេះ ដោយសារកម្ពុជា បានបើកច្រកជើងហោះហើរទាំងបីឱ្យចូលចុះចតបាន រួមមាន រាជធានីភ្នំពេញ ក្រុងសៀមរាប និងក្រុងព្រះសីហនុ។ ជាមួយគ្នានេះ ក៏មានព្រលានយន្តហោះតារាសាគរ មានការចុះចតម្តងម្កាលផងដែរ។

ថ្លែងប្រាប់កម្ពុជាថ្មី នាព្រឹកថ្ងៃទី ០៧ ខែ កុម្ភៈនេះ លោក ហូ វណ្ឌី មើលឃើញថា ក្រោយពីគោលនយោបាយសេរ៉ូកូវីដរបស់ចិនបានលុបចោល ចិនបានយកប្រទេសចំនួន ២០នៅលើពិភពលោក និងក្នុងតំបន់អាស៊ី សាកល្បងឱ្យពលរដ្ឋខ្លួនចេញទៅកម្សាន្ត ក្នុងនោះក៏មានកម្ពុជាផងដែរ។ លោកថា ទោះជាសម្ទុះទេសចរហូរចូលកម្ពុជា មិនទាន់ខ្លាំងក្លាដូចមុនឆ្នាំ ២០១៩ ប៉ុន្តែមានកំណើនខ្លាំងជាងនៅក្នុងវិបត្តិកូវីដ-១៩ ច្រើនណាស់។ តាមរយៈកំណើនទេសចរនេះ លោកថា កម្ពុជា ចំណេញច្រើន ទាំងចំណូលពលរដ្ឋ ដោយផ្ទាល់ និងប្រយោល ចំណេញដល់ក្រុមហ៊ុនអាកាសចរណ៍ ភាពល្អប្រសើរនៃចរន្តសេដ្ឋកិច្ចក្នុងប្រទេស និងជំរុញកំណើននៃចំណូលពន្ធជាដើម។

បើតាមលោក ថោង ខុន នៅថ្ងៃទី១៦ ខែកុម្ភៈ ឆ្នាំ២០២៣ ខាងមុខនេះ នឹងមានជើងហោះលើកដំបូងពីគួនមីង និងសៀងហៃ ចូលមកខេត្តសៀមរាប ប្រតិបត្តិការដោយក្រុមហ៊ុន China Eastern (Charter Flights)។ លោករដ្ឋមន្រ្តីក្រសួងទេសចរណ៍ បានគូសបញ្ជាក់ថា នៅក្នុងខែមករា ឆ្នាំ២០២៣នេះ ជើងហោះហើរដែលចូលមកដល់កម្ពុជា មានចំនួនសរុប ១,៦៤៨ជើង ក្នុងនោះ អាកាសយានដ្ឋានអន្តរជាតិភ្នំពេញ ទទួលបាន១,១៧៨ជើង។ លោករដ្ឋមន្រ្តី បានឱ្យដឹងទៀតថា គិតជាមធ្យម មានទេសចរអន្តរជាតិចូលមកកម្ពុជា ទាំងតាមផ្លូវអាកាស ផ្លូវគោក និងផ្លូវទឹកប្រមាណ ១២,០០០នាក់ ទៅ ១៣,០០០នាក់ ក្នុងមួយថ្ងៃ៕

The post សន្ទុះទេសចរអន្តរជាតិ ចូលកម្ពុជា មានកំណើនខ្ពស់ ក្នុងខែមករា appeared first on Kampuchea Thmey Daily.

លោក ហូ វណ្ឌី Archives - Kampuchea Thmey Daily

វិស័យឯកជន៖ ព្រលានយន្តហោះថ្មី មិនត្រឹមផ្តល់ផលចំណេញផ្នែកទេសចរណ៍ តែក៏នឹងទាក់ទាញសក្ដានុពលផ្នែកពាណិជ្ជកម្ម

អ្នកជំនាញបង្ហើបពីយុទ្ធសាស្រ្តទាក់ទាញភ្ញៀវទេសចរអន្តរជាតិ

សន្ទុះទេសចរអន្តរជាតិ ចូលកម្ពុជា មានកំណើនខ្ពស់​ ក្នុងខែមករា

សន្ទុះទេសចរអន្តរជាតិ ចូលកម្ពុជា មានកំណើនខ្ពស់ ក្នុងខែមករា