លោក អៀង ដារ៉ាវុធ Archives - Kampuchea Thmey Daily

ផ្លូវទៅតំបន់អេកូទេសចរណ៍អារ៉ែង ឈានទៅចាក់ក្រាលកៅស៊ូស្ទើរបញ្ចប់ ១០០%

Dy Bunnara — Wed, 03 Jun 2026 03:18:03 +0000

ផ្លូវទៅអារ៉ែងដែលជាតំបន់អេកូទេសចរណ៍ដ៏ល្បីល្បាញនៅស្រុកថ្មបាំងខេត្តកោះកុង កំពុងជំរុញនិងគ្រោងបញ្ចប់ក្នុងពេលដ៏ខ្លីខាងមុខនេះ។

លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានឲ្យកម្ពុជាថ្មីដឹងតាមទូរសព្ទថា ផ្លូវចាក់ក្រាលកៅស៊ូឆ្ពោះទៅតំបន់អារ៉ែង ដែលឆ្លងកាត់ស្រុកថ្មបាំងបច្ចុប្បន្ននេះសម្រេចស្ទើរតែ ១០០%។

លោកថា ផ្លូវទៅតំបន់ទេសចរណ៍ស្ទឹងអារ៉ែងចែកចេញជា ៣ កំណាត់ ចាប់ពីចំណុចផ្លូវជាតិលេខ ៤៨ មានប្រវែងសរុបប្រមាណ ៥២ គីឡូម៉ែត្រ។

សម្រាប់កំណាត់ចេញពីផ្លូវជាតិលេខ ៤៨ ត្រង់ផ្លូវបំបែកគីឡូម៉ែត្រលេខ ១១៥ ដល់ទីរួមស្រុកថ្មបាំងដែលមានប្រវែង ២៦ គីឡូម៉ែត្របានបញ្ចប់ការក្រាលកៅស៊ូ ១០០%។ ខណៈកំណាត់ពីស្រុកថ្មបាំងដល់ស្ទឹងអារ៉ែងដែលប្រវែង ១៦ គីឡូម៉ែត្រ (ផ្លូវឬស្សីជ្រុំ-ប្រឡាយ) ក៏ស្ទើរតែរួចរាល់ ១០០% គឺនៅសេសសល់ការងារសំណង់សិល្បការតិចតួចប៉ុណ្ណោះ ដូចជាការធ្វើប្រព័ន្ធលូជាដើម។

លោក អៀង ដារ៉ាវុធ បានបន្តថា កន្លងទៅរាជរដ្ឋាភិបាលតាមរយៈក្រសួងអភិវឌ្ឍន៍ជនបទ បានបញ្ចប់ការស្ថាបនាកំណាត់ផ្លូវប្រវែងជាង ១០ គីឡូម៉ែត្រក្នុងស្រុកថ្មបាំង។

ទន្ទឹមកំណាត់ផ្លូវទៅតំបន់អេកូទេសចរណ៍អារ៉ែងនៅស្រុកថ្មបាំង ចាក់ក្រាលកៅស៊ូស្ទើរបញ្ចប់ទាំងស្រុង ផ្លូវតភ្ជាប់ពីអារែងទៅជីផាតដែលមានប្រវែង ៤០ គីឡូម៉ែត្រ ក៏បានស្ថាបនាតភ្ជាប់គ្នាសម្រួលការធ្វើដំណើរពីតំបន់អេកូទេសចរណ៍ដ៏សក្ដានុពលទាំងពីរនេះបានប្រសើរជាងមុន តាមរយៈបណ្តាញផ្លូវទាំងកៅស៊ូនិងផ្លូវដី។

លោក អៀង ដារ៉ាវុធ បានបញ្ជាក់ថា ទោះបីបច្ចុប្បន្នផ្លូវតភ្ជាប់ពីអារែងទៅជីផាតនៅត្រឹមជាផ្លូវដីក៏ដោយ ប៉ុន្តែតំបន់គោលដៅទេសចរណ៍ទាំងពីរនេះបច្ចុប្បន្នគឺអាចធ្វើដំណើរតភ្ជាប់គ្នាទៅវិញទៅមកបានយ៉ាងងាយស្រួល៕

The post ផ្លូវទៅតំបន់អេកូទេសចរណ៍អារ៉ែង ឈានទៅចាក់ក្រាលកៅស៊ូស្ទើរបញ្ចប់ ១០០% appeared first on Kampuchea Thmey Daily.

បង្កប់តម្លៃប្រវត្តិសាស្រ្ត ១ ពាន់ឆ្នាំមុន ជាហេតុផលទេសចរចូលចិត្តទៅថតរូបថ្ងៃលិចនៅប្រាសាទនាគព័ន្ធ

Dy Bunnara — Wed, 03 Jun 2026 01:59:08 +0000

ចំណុចលេចធ្លោមួយដែលទាក់ទាញទេសចរចូលចិត្តទៅទស្សនា និងថតរូបថ្ងៃលិចនៅប្រាសាទនាគព័ន្ធ ក្រៅពីមានទីធ្លាស្រឡះល្អដែលផ្តល់អារម្មណ៍ស្រស់ស្រាយគឺទីនោះបង្កប់តម្លៃប្រវត្តិសាស្រ្តដែលផ្សារភ្ជាប់អតីតរាជធានីក្នុងរាជ្យព្រះបាទជ័យវរ្ម័នទី៧។ នេះបើតាមលោក ជា សារិទ្ធ បុរាណវិទូ និងជាមន្រ្តីផ្នែកអភិរក្សប្រាសាទនៃអាជ្ញាធរជាតិអប្សរា។

ប្លែកពីប្រាសាទដទៃទៀតដូចជា អង្គរវត្ត ភ្នំបាខែង ភ្នំក្រោម ឬប្រែរូបជាដើម លោក ជា សារិទ្ធ មន្រ្តីផ្នែកអភិរក្សប្រាសាទនៃអាជ្ញាធរជាតិអប្សរាបានបញ្ជាក់ថា ទីតាំងប្រាសាទនាគព័ន្ធទទួលបានការពេញនិយមខ្លាំងសម្រាប់អ្នកទេសចរមកទស្សនាថ្ងៃលិច ខណៈទីតាំងក៏ផ្សារភ្ជាប់ទៅកាន់ប្រវត្តិសាស្ត្រកាលពីជាង ១ ពាន់ឆ្នាំមុន។

«នៅទីនោះប្រៀបបាននឹងគោលនៃរាជធានីមួយ ដែលស្ថិតនៅលើកោះកណ្តាលបារាយណ៍ ដោយមានប្រាសាទតាសោមនៅទិសខាងកើត និងប្រាសាទព្រះខ័ននៅទិសខាងលិច។ នៅពេលដែលយើងទស្សនាថ្ងៃលិច ដោយបែរមុខទៅទិសខាងលិច យើងអាចស្រមៃទៅដល់ប្រាសាទព្រះខ័ន ដែលធ្លាប់ជានគរនិងជារាជវាំងបណ្តោះអាសន្នរបស់ព្រះបាទជ័យវរ្ម័នទី៧»។

លោកបានរំលឹកពីដំណើរប្រវត្តិសាស្ត្រនៅពីក្រោយប្រាសាទព្រះខ័ន ដែលក្រោយព្រះបាទជ័យវរ្ម័នទី ៧ ទទួលបានជ័យជម្នះក្នុងសង្គ្រាម ព្រះអង្គបានគង់នៅនគរជ័យស្រី (ប្រាសាទព្រះខ័ន) ដើម្បីរៀបចំស្តារនិងជួសជុលរាជវាំងនៅអង្គរធំ (យសោធរបុរៈ) ឡើងវិញ បន្ទាប់ពីត្រូវបានពួកចាមវាយបំផ្លាញខ្ទេចខ្ទី។

ក្រោយពីរៀបចំនគរនៅអង្គរធំរួចរាល់ ព្រះអង្គបានយាងចេញពីទីនោះទៅគង់នៅអង្គរធំវិញ ហើយបានកែប្រែប្រាសាទព្រះខ័នឲ្យក្លាយជាប្រាសាទសម្រាប់ឧទ្ទិសថ្វាយដល់ព្រះបិតារបស់ព្រះអង្គ។

បើតាមលោក ជា សារិទ្ធ រចនាសម្ព័ន្ធនៃប្រាសាទទាំងបី (ប្រាសាទនាគព័ន្ធ តាសោម និងព្រះខ័ន) សុទ្ធសឹងតែជាផ្នែកមួយដ៏មានសារៈសំខាន់បំផុតនៃនគរជ័យស្រីក្នុងរាជ្យព្រះបាទព្រះបាទជ័យវរ្ម័នទី ៧៕

The post បង្កប់តម្លៃប្រវត្តិសាស្រ្ត ១ ពាន់ឆ្នាំមុន ជាហេតុផលទេសចរចូលចិត្តទៅថតរូបថ្ងៃលិចនៅប្រាសាទនាគព័ន្ធ appeared first on Kampuchea Thmey Daily.

លែងពិបាកដូចមុន ផ្លូវទៅជីផាតចាក់ក្រាលកៅស៊ូស្ទើររួចរាល់ ១០០% ទេសចរអាចទៅកម្សាន្តទាំងរដូវប្រាំងនិងរដូវវស្សា

Dy Bunnara — Wed, 27 May 2026 04:06:58 +0000

ផ្លូវទៅតំបន់អេកូទេសចរណ៍ជីផាតក្នុងស្រុកថ្មបាំង ខេត្តកោះកុង បានវិវឌ្ឍន៍ពីផ្លូវដីក្រួសក្រហមទៅជាផ្លូវក្រាលកៅស៊ូ ដែលសម្រួលបានការធ្វើដំណើររបស់ភ្ញៀវទេសចរទៅកម្សាន្ត លែងពិបាកដូចមុនបានគ្រប់រដូវមិនថារដូវប្រាំងឬរដូវវស្សា។

ផ្តល់បទសម្ភាសន៍តាមទូរសព្ទដល់កម្ពុជាថ្មីនៅព្រឹកនេះ លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានបង្ហាញពីវឌ្ឍនភាពនៃការស្ថាបនាផ្លូវទៅកាន់តំបន់អេកូទេសចរណ៍ជីផាត ដែលលោកបានបញ្ជាក់ថាគឺជិតរួចរាល់ជាស្ថាពរហើយ ពោលគឺសម្រេចបានជាង ៩០% ដោយនៅសល់ការងារបន្តិចបន្តួចប៉ុណ្ណោះ។

លោកថា តាមរយៈសមិទ្ធផលផ្លូវនេះ ប្រជាពលរដ្ឋក្នុងមូលដ្ឋានមានការអបអរសាទរ និងគាំទ្រយ៉ាងខ្លាំង ខណៈដែលផ្លូវទៅតំបន់អេកូទេសចរណ៍ជីផាតគឺជាខ្សែផ្លូវទេសចរណ៍ដ៏សំខាន់មួយ ដែលទាក់ទាញភ្ញៀវទេសចរចាប់អារម្មណ៍ទៅកម្សាន្តយ៉ាងច្រើន។

«ផលប្រយោជន៍ផ្លូវនេះ ជួយសម្រួលដល់ការធ្វើដំណើររបស់ប្រជាពលរដ្ឋ និងបម្រើដល់វិស័យទេសចរណ៍ ព្រោះតំបន់ជីផាតជាតំបន់ទេសចរណ៍ដ៏សំខាន់មួយ ដែលមានភ្ញៀវទេសចរចូលចិត្តទៅលេងកម្សាន្តច្រើន»។

ដើម្បីធានាឱ្យផ្លូវទើបស្ថាបនាថ្មីអាចប្រើប្រាស់បានយូរអង្វែង មន្រ្តីជំនាញស្នើឲ្យមានការសហការចូលរួមថែរក្សាពីសំណាក់ប្រជាពលរដ្ឋ និងអាជ្ញាធរពាក់ព័ន្ធ។ លោក អៀង ដារ៉ាវុធ បានបញ្ជាក់ថា ហានិភ័យចម្បងនិងធំបំផុតដែលធ្វើឱ្យផ្លូវឆាប់ខូច គឺការដឹកជញ្ជូនលើសទម្ងន់ ពីរថយន្តធុនធ្ងន់ប្រកបអាជីវកម្មនានាដូចជា រថយន្តដឹកដី ដឹកខ្សាច់ និងដឹកថ្ម ត្រូវដឹកឲ្យត្រូវតាមទម្ងន់កំណត់ កុំឲ្យលើសទម្ងន់ ព្រោះបើគ្មានការចូលរួមថែរក្សាទេ ផ្លូវកៅស៊ូនេះនឹងត្រូវខូចខាតទៅវិញក្នុងរយៈពេលតែ ១ ទៅ ២ ឆ្នាំប៉ុណ្ណោះ

ស្របពេលដែលផ្លូវទៅតំបន់ទេសចរណ៍ជីផាតសាងសង់ស្ទើររួចរាល់ ១០០% ពលរដ្ឋស្នើឱ្យមានការសាងសង់ស្ពានឆ្លងកាត់ដៃព្រែកជីផាតបន្ថែម ខណៈអាជ្ញាធរបញ្ជាក់ថាកំពុងធ្វើការដោះស្រាយតាមដំណាក់កាល។

លោក អៀង ដារ៉ាវុធ បានឆ្លើយតបថា «អាជ្ញាធរនឹងធ្វើទៅតាមដំណាក់កាល ដោយត្រូវស្វែងរកដៃគូសហការ ឬកញ្ចប់ថវិកាពីថ្នាក់លើមកជួយ តែមិនទាន់សន្យាថានឹងធ្វើជូន ១០០% ភ្លាមៗនោះទេ ដោយនឹងខិតខំស្វែងរកដៃគូអភិវឌ្ឍន៍ដើម្បីបន្តការសាងសង់»៕

The post លែងពិបាកដូចមុន ផ្លូវទៅជីផាតចាក់ក្រាលកៅស៊ូស្ទើររួចរាល់ ១០០% ទេសចរអាចទៅកម្សាន្តទាំងរដូវប្រាំងនិងរដូវវស្សា appeared first on Kampuchea Thmey Daily.

ផ្លូវថ្មីមួយខ្សែបានឈូសទម្លុះ តភ្ជាប់ពីតំបន់ទេសចរណ៍ជីផាតទៅដល់តំបន់អារ៉ែង មានចម្ងាយជាង ៣០ គីឡូម៉ែត្រ

Dy Bunnara — Wed, 26 Nov 2025 03:56:38 +0000

ផ្លូវថ្មីមួយខ្សែត្រូវបានអាជ្ញាធរឈូសសម្រួលតភ្ជាប់ការធ្វើដំណើរពីតំបន់អេកូទេសចរណ៍ជីផាត ទៅដល់តំបន់អេកូទេសចរណ៍អារ៉ែងក្នុងស្រុកថ្មបាំងខេត្តកោះកុង។

លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានប្រាប់កម្ពុជាថ្មីថា ផ្លូវដែលអាជ្ញាធរបានឈូសសម្រួលនេះមានប្រវែងជាង ៣០ គីឡូម៉ែត្រ ដែលតភ្ជាប់ពីតំបន់ទេសចរណ៍ជីផាតទៅដល់តំបន់អេកូទេសចរណ៍អារ៉ែងក្នុងស្រុកថ្មបាំង។

យ៉ាងណាមិញ ផ្លូវដែលឈូសសម្រួលនេះអាចធ្វើដំណើរបានតែនៅរដូវប្រាំង នៅរដូវវស្សាអាចប្រឈមការដាច់ខ្លះៗដែលបង្កការលំបាកសម្រាប់យានយន្តធ្វើដំណើរឆ្លងកាត់។

ក្រៅពីផ្លូវថ្មីដែលអាជ្ញាធរបានឈូសសម្រួលធ្វើដំណើរបណ្តោះអាសន្ន ផ្លូវទៅអារ៉ែងក្នុងស្រុកថ្មបាំងក៏កំពុងត្រូវបានស្ថាបនាជាផ្លូវកៅស៊ូនិងបេតុងចេញពីផ្លូវជាតិលេខ ៤៨ ដោយប្រើប្រាស់មូលនិធិពីដៃគូអភិវឌ្ឍ។

លោក អៀង ដារ៉ាវុធ បានបញ្ជាក់ថា ផ្លូវដែលកំពុងស្ថាបនាទៅតំបន់អារ៉ែងគឺបំបែកចេញពីផ្លូវជាតិលេខ ៤៨ ត្រង់គីឡូម៉ែត្រលេខ ១១៥។ ផ្លូវនេះសាងសង់ចែកចេញជា ៣ កំណាត់ ដោយកំណាត់ទី ១ ប្រវែង ២៦ គីឡូម៉ែត្រ ជាគម្រោងរបស់ AIB សម្រេចការស្ថាបនាបានប្រហែល ៩០% និងកំណាត់ទីពីរពីស្រុកថ្មបាំងដល់ស្ទឹងអារ៉ែងប្រវែង ១៦ គីឡូម៉ែត្រជាគម្រោងរបស់ CSLEP ដែលទើបបើកការដ្ឋានដែលគ្រោងចំណាយពេលសាងសង់ប្រហែល ១ ឆ្នាំ ខណៈកំណាត់ផ្លូវប្រវែងជាង ១០ គីឡូម៉ែត្រក្នុងទីរួមស្រុកថ្មបាំង ដែលជាគម្រោងរបស់រដ្ឋាភិបាលតាមរយៈក្រសួងអភិវឌ្ឍន៍ជនបទ បានស្ថាបនាបញ្ចប់ដាក់ឲ្យប្រើប្រាស់។

ផ្លូវដែលកំពុងសាងសង់ទៅស្ទឹងអារ៉ែងជាផ្លូវយុទ្ធសាស្ត្រដ៏សំខាន់ ដែលរាប់សិបឆ្នាំមកហើយមិនមានផ្លូវធ្វើដំណើរទៅមកងាយស្រួលនោះទេ។ បើតាមមន្រ្តីមន្ទីរអភិវឌ្ឍន៍ជនបទខេត្តកោះកុង ថ្ងៃខាងមុខផ្លូវមួយខ្សែនេះក៏នឹងអាចតភ្ជាប់ជាមួយខ្សែផ្លូវដែលគ្រោងសាងសង់ចេញពីតំបន់ទេសចរណ៍ភ្នំខ្នងផ្សារក្នុងខេត្តកំពង់ស្ពឺ ដើម្បីតភ្ជាប់ទៅបណ្ដាខេត្តផ្សេងៗទៀតនៅតំបន់ភូមិភាគកណ្តាល៕

The post ផ្លូវថ្មីមួយខ្សែបានឈូសទម្លុះ តភ្ជាប់ពីតំបន់ទេសចរណ៍ជីផាតទៅដល់តំបន់អារ៉ែង មានចម្ងាយជាង ៣០ គីឡូម៉ែត្រ appeared first on Kampuchea Thmey Daily.

ផ្លូវទៅអារ៉ែង ស្ថាបនាជាផ្លូវបេតុង និងកៅស៊ូ ប្រែក្លាយតំបន់ព្រៃភ្នំជាគោលដៅដ៏ទាក់ទាញក្នុងខេត្តកោះកុង

Dy Bunnara — Fri, 21 Nov 2025 03:08:42 +0000

ផ្លូវទៅតំបន់អេកូទេសចរណ៍ស្ទឹងអារ៉ែងកំពុងស្ថាបនាជាផ្លូវកៅស៊ូ និងបេតុង ដែលក្នុងពេលដ៏ខ្លីខាងមុខនេះនឹងប្រែក្លាយតំបន់អេកូទេសចរណ៍តំបន់ព្រៃភ្នំជាគោលដៅទេសចរដ៏ទាក់ទាញក្នុងខេត្តកោះកុង ក្រោយពេលផ្លូវស្ថាបនារួចរាល់ផ្តល់ភាពងាយស្រួលសម្រាប់ទេសចរធ្វើដំណើរទៅមក។

លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានប្រាប់កម្ពុជាថ្មីថា ការស្ថាបនាផ្លូវទៅតំបន់ទេសចរណ៍ស្ទឹងអារ៉ែងចែកចេញជា ៣ កំណាត់ ចាប់ពីចំណុចផ្លូវជាតិលេខ ៤៨ មានប្រវែងសរុបប្រមាណ ៥២ គីឡូម៉ែត្រ។

វឌ្ឍនភាពនៃការស្ថាបនាសម្រាប់កំណាត់ចេញពីផ្លូវជាតិលេខ ៤៨ ត្រង់ផ្លូវបំបែកគីឡូម៉ែត្រលេខ ១១៥ ដល់ទីរួមស្រុកថ្មបាំងមានប្រវែង ២៦ គីឡូម៉ែត្រ បច្ចុប្បន្នសម្រេចបានប្រហែល ៩០% ខណៈកំណាត់ពីស្រុកថ្មបាំងដល់ស្ទឹងអារ៉ែងប្រវែង ១៦ គីឡូម៉ែត្រ ទើបបើកការដ្ឋានសាងសង់គ្រោងចំណាយពេលប្រហែល ១ ឆ្នាំ។

ដោយឡែករាជរដ្ឋាភិបាលតាមរយៈក្រសួងអភិវឌ្ឍន៍ជនបទបានស្ថាបនាកំណាត់ផ្លូវប្រវែងជាង ១០ គីឡូម៉ែត្រក្នុងស្រុកថ្មបាំង ដែលបានសាងសង់បញ្ចប់រួចរាល់។

តាមរយៈសមិទ្ធផលផ្លូវនេះនឹងជួយអភិវឌ្ឍន៍ដល់ស្រុកថ្មបាំង ធ្វើឲ្យជីវភាពប្រជាជនរីកចម្រើនតាមរយៈវិស័យទេសចរណ៍ ខណៈស្រុកថ្មបាំងរាប់សិបឆ្នាំមកហើយមិនមានផ្លូវធ្វើដំណើរបានងាយស្រួលនោះទេ។

លោក អៀង ដារ៉ាវុធ បានបញ្ជាក់ថា ផ្លូវដែលសាងសង់នេះជាផ្លូវយុទ្ធសាស្ត្រដ៏សំខាន់។ ថ្ងៃខាងមុខក៏អាចតភ្ជាប់ខ្សែផ្លូវ ដែលគ្រោងសាងសង់ចេញពីតំបន់ទេសចរណ៍ភ្នំខ្នងផ្សារក្នុងខេត្តកំពង់ស្ពឺ ដែលនឹងអាចតភ្ជាប់ទៅបណ្ដាខេត្តផ្សេងៗនៅភាគកណ្តាល៕

The post ផ្លូវទៅអារ៉ែង ស្ថាបនាជាផ្លូវបេតុង និងកៅស៊ូ ប្រែក្លាយតំបន់ព្រៃភ្នំជាគោលដៅដ៏ទាក់ទាញក្នុងខេត្តកោះកុង appeared first on Kampuchea Thmey Daily.

លោក អៀង ដារ៉ាវុធ Archives - Kampuchea Thmey Daily

ផ្លូវ​ទៅ​តំបន់​អេកូ​ទេសចរណ៍​អារ៉ែង ​ឈាន​ទៅ​ចាក់​ក្រាល​កៅស៊ូ​ស្ទើរ​បញ្ចប់ ១០០%

ផ្លូវទៅតំបន់អេកូទេសចរណ៍អារ៉ែង ឈានទៅចាក់ក្រាលកៅស៊ូស្ទើរបញ្ចប់ ១០០%