លោក អេម៉ានុយអែល ម៉ាក្រុង Archives - Kampuchea Thmey Daily

បារាំងច្រានចោលបង្កើត «G8» ដោយបញ្ចូលរុស្ស៊ីវិញ ចំពេលត្រាំរៀបចំដំណោះស្រាយអ៊ុយក្រែន

Rann Reuy — Sun, 23 Nov 2025 01:41:09 +0000

ប្រធានាធិបតីបារាំងដែលទើបចុះហត្ថលេខាលក់យន្តហោះចម្បាំងប្រភេទ Rafale ១០០គ្រឿង និងប្រព័ន្ធការពារដែនអាកាសទៅឲ្យអ៊ុយក្រែន បានចេញមុខច្រានចោលនូវលទ្ធភាពនៃការបញ្ចូលប្រទេសរុស្ស៊ីនៅក្នុងក្រុមប្រទេសអភិវឌ្ឍន៍ឧស្សាហកម្ម ដោយបង្កើតឡើងវិញនូវក្រុម «G8»។

ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បានប្រាប់អ្នកយកព័ត៌មាន នៅកិច្ចប្រជុំក្រុមប្រទេសអភិវឌ្ឍន៍សេដ្ឋកិច្ចជឿនលឿន ហៅកាត់ថា G-20 នៅប្រទេសអាហ្វ្រិកខាងត្បូង ថា លោកប្រឆាំងចំពោះការបង្កើតឡើងវិញនូវទម្រង់ G-8 ដោយការបញ្ចូលរុស្ស៊ីទៅក្នុងសមាជិកនៃក្រុម Group of Seven (G7) ដែលបច្ចុប្បន្នមានប្រទេសរីកលួតលាស់ឧស្សាហកម្មជាសមាជិក ដូចជា សហរដ្ឋអាមេរិក អង់គ្លេស បារាំង អ៊ីតាលី ជប៉ុន កាណាដា និង អាល្លឺម៉ង់។

លោក ម៉ាក្រុង ត្រូវបានសារព័ត៌មានស្រង់សម្តី ដូចនិយាយថា៖‍«ថ្ងៃនេះ លក្ខខណ្ឌសម្រាប់ការវិលត្រឡប់របស់រុស្ស៊ីទៅបង្កើត G8 មិនមានទេ។ ក្រៅពីនោះ ទម្រង់បង្កើតនេះទាមទារការឯកភាពជាឯកច្ឆន្ទៈពីសមាជិកទាំងអស់នៃ G7» ដោយលោក បានបន្ថែមថា ប្រទេសបារាំងនឹងមិនប្រាប់ប្រទេសផ្សេងៗទៀតអំពីអ្វីដែលខ្លួននឹងធ្វើនោះទេ នៅពេលដែលបារាំងក្លាយជាប្រធាននៃកិច្ចប្រជុំក្រុមប្រទេស G7។

ប្រធានបទសន្តិភាពនៅអ៊ុយក្រែន ត្រូវបានគេជជែកដេញដោយយ៉ាងទូលំទូលាយក្នុងចំណោមមេដឹកនាំពិភពលោក បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បញ្ចេញផែនការសន្តិភាពអ៊ុយក្រែនដែលមាន២៨ចំណុច ដែលក្នុងនោះ ត្រូវបានសារព័ត៌មានបស្ចឹមប្រទេសផ្សព្វផ្សាយថា មានការបញ្ចូលសមាជិកភាពរុស្ស៊ីទៅក្នុងក្រុមប្រទេសឧស្សាហកម្មឡើងវិញ ការកាត់ដីអ៊ុយក្រែនទៅឲ្យរុស្ស៊ីស្របច្បាប់អន្តរជាតិ ការលើកលែងទណ្ឌកម្មប្រឆាំងសេដ្ឋកិច្ចរុស្ស៊ី និង បុគ្គលសំខាន់ៗនៅរុស្ស៊ី ការបោះបង់សមាជិកភាពណាតូរបស់អ៊ុយក្រែន និងការបន្ថយចំនួនកងទ័ពអ៊ុយក្រែន ជាដើម។

ប្រទេសរុស្សីត្រូវបានបណ្តេញចេញពីក្រុម Group of Eight (G8) ក្រោយបានចូលកាន់កាប់តំបន់គ្រីមៀដែនដីបូរណភាពរបស់អ៊ុយក្រែន កាលឆ្នាំ២០១៤ ហើយ ៨ឆ្នាំក្រោយមក រុស្ស៊ីបានលើកទ័ពចូលលុកលុយប៉ុនប៉ងយកអ៊ុយក្រែនទាំងមូល ដោយផ្តួលរំលំរដ្ឋាភិបាលដែលកើតឡើងដោយការបោះឆ្នោតតាមបែបប្រជាធិបតេយ្យ។

តាមសេចក្តីរាយការណ៍របស់ The Wall Street Journal សហរដ្ឋអាមេរិកដែលជាអ្នកដាក់ចេញផែនការសន្តិភាពអ៊ុយក្រែននោះ ក៏បានបង្ហាញពីការធ្វើអាជីវកម្មរួមគ្នាជាមួយរុស្ស៊ីលើវិស័យបញ្ញសិប្បនិម្មិត (AI) វិស័យថាមពល និង រ៉ែកម្រនៅតំបន់អាក់ទិក ថែមទៀតផង។

ទោះបីជាបែបនេះក៏ដោយ តាមសេចក្តីរាយការណ៍របស់ទីភ្នាក់ងារព័ត៌មាន TASS ដោយដកស្រង់សម្តីអ្នកនាំពាក្យវិមានក្រឹមឡាំង លោក Dmitry Peskov និងអ្នកនាំពាក្យក្រសួងការបរទេសរុស្ស៊ី លោកស្រី Maria Zakharova ដែលបញ្ជាក់ដូចគ្នាថា ភាគីរុស្ស៊ីមិនទាន់ទទួលបានផែនការដំណោះស្រាយអ៊ុយក្រែន ២៨ចំណុច ដែលសហរដ្ឋអាមេរិកផ្តួចផ្តើមនោះទេ៕

រ៉ាន់ រើយ

ប្រធានាធិបតីបារាំង លោក Emmanuel Macron ពេលនិយាយទៅកាន់អ្នកសារព័ត៌មាន។ REUTERS

The post បារាំងច្រានចោលបង្កើត «G8» ដោយបញ្ចូលរុស្ស៊ីវិញ ចំពេលត្រាំរៀបចំដំណោះស្រាយអ៊ុយក្រែន appeared first on Kampuchea Thmey Daily.

មេដឹកនាំបារាំង ម៉ាក្រុង ជំរុញឱ្យអឺរ៉ុបផ្អាកការវិនិយោគនៅអាមេរិក ប្រតិកម្មនឹងពន្ធ ត្រាំ

Huon Dina — Fri, 04 Apr 2025 05:05:00 +0000

ប្រធានាធិបតីបារាំង លោក អេម៉ានុយអែល ម៉ាក្រុង បានរិះគន់ការសម្រេចចិត្តរបស់ប្រធានាធិបតីអាមេរិក លោក ដូណាល់ ត្រាំ ក្នុងការដាក់ពន្ធលើប្រទេសស្ទើរតែទាំងអស់ រួមទាំងសហភាពអឺរ៉ុប ថាជា ទង្វើ «ឃោរឃៅ» និង «គ្មានមូលដ្ឋាន» ខណៈស្នើឱ្យមានការផ្អាកជាបណ្ដោះអាសន្ននូវការវិនិយោគនាពេលអនាគតរបស់អឺរ៉ុបនៅសហរដ្ឋអាមេរិក។ នេះបើតាមការផ្សាយរបស់បណ្ដាញទូរទស្សន៍ Euronews។

លោកថ្លែងក្នុងអំឡុងកិច្ចប្រជុំជាមួយតំណាងឧស្សាហកម្មបារាំង ថា ការផ្អាកនោះ គួរតែធ្វើរហូត ទាល់តែអឺរ៉ុបនិយាយឱ្យច្បាស់គ្នាសិន ជាមួយសហរដ្ឋអាមេរិក។ លោកបន្តថា៖ «តើជាសារអ្វីទៅ នៅពេលតួអង្គអឺរ៉ុបសំខាន់ៗចាប់ផ្ដើមវិនិយោគរាប់ពាន់លានអឺរ៉ុបក្នុងសេដ្ឋកិច្ចអាមេរិក នៅពេលគេ(អាមេរិក)កំពុងវាយប្រហារយើង?»

លោកបន្ថែមទៀតថា៖ «យើងត្រូវមានសាមគ្គីភាព ជាសមូហភាព»។

ក្នុងការប្រកាសពន្ធឆ្លើយតបឱ្យស្មើគ្នាម្សិលមិញរបស់ ត្រាំ សហរដ្ឋអាមេរិកនឹងដំឡើងពន្ធ ២០ ភាគរយ លើទំនិញនាំចូលពីសហភាពអឺរ៉ុបជាសម្ព័ន្ធ ដោយចូលជាធរមាននៅថ្ងៃទី ៩ មេសា ខណៈប្លុកនេះបានរងពន្ធ ២៥ ភាគរយ លើដែកថែប អាលុយមីញ៉ូម និងរថយន្ត នាំចេញទៅសហរដ្ឋអាមេរិក រួចហើយ។

ក្នុងសុទ្ទរកថាដដែលកាលពីថ្ងៃព្រហស្បតិ៍ លោក ម៉ាក្រុង បានរិះគន់ធ្ងន់ៗចំពោះចំណាត់ការមិនធ្លាក់មានពីមុនមកនេះរបស់ ត្រាំ។

នៅឆ្នាំ ២០២៣ សហភាពអឺរ៉ុបបានកត់ត្រាអតិរេកពាណិជ្ជកម្មជាមួយអាមេរិកប្រមាណ ១៥៦,៦ ប៊ីលានអឺរ៉ូ ប៉ុន្តែឱនភាពពាណិជ្ជកម្មផ្នែកសេវាកម្មរបស់ប្លុកទៅសហរដ្ឋអាមេរិក មានប្រមាណរហូតដល់ ១០៨,៦ ប៊ីលានអឺរ៉ូ។

លោក ម៉ាក្រុង បាននិយាយថា៖ «ការសម្រេចចិត្តដែលប្រកាសឡើងកាលពីយប់មិញ (ម៉ោងនៅបារាំង) គឺឃោរឃៅ និងគ្មានមូលដ្ឋាន។ វាគ្មានមូលដ្ឋាន ពីព្រោះអតុល្យភាពពាណិជ្ជកម្ម មិនអាចកែតម្រូវបានដោយការកំណត់ពន្ធ នោះទេ»។ លោកបន្តថា៖ «មូលដ្ឋានគ្រឹះនៃទ្រឹស្តីសេដ្ឋកិច្ចបង្ហាញពីភាពផ្ទុយគ្នា ជាពិសេសនៅពេលដែលអតុល្យភាព (ពាណិជ្ជកម្ម) មិនគិតពីសេវាកម្មឌីជីថល»។

ប្រធានាធិបតីបារាំងដដែល បានព្យាករថា ពន្ធគយនឹងបង្ហាញភ្លាមៗ និងគ្មាននិរន្តរភាពសម្រាប់សេដ្ឋកិច្ចអាមេរិក ដោយធ្វើឱ្យក្រុមហ៊ុន និងពលរដ្ឋអាមេរិក «ទន់ខ្សោយ» និង «ក្រីក្រជាងមុន»។ ទោះយ៉ាងណាក៏ដោយ លោកក៏បាននិយាយអំពីផលវិបាកសម្រាប់ទ្វីបអឺរ៉ុប ដ៏ធំគ្រប់វិស័យនៃសេដ្ឋកិច្ច។

លោក ម៉ាក្រុង បានបន្ថែមថា ប្រឈមមុខនឹងបញ្ហាប្រឈម «ដែលមិនធ្លាប់មានពីមុនមក» សហភាពអឺរ៉ុបគួរតែបង្កើនទីផ្សារតែមួយរបស់ខ្លួន ដែលមានអ្នកប្រើប្រាស់ ៤៥០ លាននាក់ ហើយបង្កើតការឆ្លើយតបរួមគ្នា និងប្រកបដោយការតាំងចិត្ត។

ទន្ទឹមនឹងការលើកឡើងរបស់លោក ម៉ាក្រុង គណៈកម្មការអឺរ៉ុបវិញ បានអះអាងថា ខ្លួនបានត្រៀមខ្លួនដើម្បីដាក់ពន្ធសងសឹកប្រឆាំងនឹងពន្ធគយរបស់ ត្រាំ ប៉ុន្តែនៅបន្តផ្ដល់អទិភាពលើការចរចា៕

The post មេដឹកនាំបារាំង ម៉ាក្រុង ជំរុញឱ្យអឺរ៉ុបផ្អាកការវិនិយោគនៅអាមេរិក ប្រតិកម្មនឹងពន្ធ ត្រាំ appeared first on Kampuchea Thmey Daily.

លោក អេម៉ានុយអែល ​ម៉ាក្រុង Archives - Kampuchea Thmey Daily

​បារាំង​​ច្រាន​ចោល​​​បង្កើត​ «G8» ដោយ​បញ្ចូលរុស្ស៊ី​វិញ​ ចំពេលត្រាំ​​​រៀបចំ​ដំណោះស្រាយអ៊ុយក្រែន​

មេដឹកនាំបារាំង ម៉ាក្រុង ជំរុញឱ្យ​អឺរ៉ុបផ្អាកការវិនិយោគនៅអាមេរិក ប្រតិកម្មនឹងពន្ធ ត្រាំ

លោក អេម៉ានុយអែល ម៉ាក្រុង Archives - Kampuchea Thmey Daily

បារាំងច្រានចោលបង្កើត «G8» ដោយបញ្ចូលរុស្ស៊ីវិញ ចំពេលត្រាំរៀបចំដំណោះស្រាយអ៊ុយក្រែន

មេដឹកនាំបារាំង ម៉ាក្រុង ជំរុញឱ្យអឺរ៉ុបផ្អាកការវិនិយោគនៅអាមេរិក ប្រតិកម្មនឹងពន្ធ ត្រាំ