វិទ្យាសាស្រ្ដ Archives - Kampuchea Thmey Daily

របកគំហើញថ្មី! អ្នកវិទ្យាសាស្ត្រអាចបង្កាត់សត្វមួយប្រភេទដែលផុតពូជជាង ១ម៉ឺនឆ្នាំមុន

Chheang — Tue, 08 Apr 2025 09:17:14 +0000

នៅក្នុងសមិទ្ធិផលវិទ្យាសាស្រ្តដ៏អស្ចារ្យមួយ ក្រុមហ៊ុន Colossal Biosciences បានប្រកាសពីជោគជ័យនៃការបង្កាត់កូនចចកមួយប្រភេទ ដែលគេហៅថា «Dire Wolf»។ ចចកប្រភេទនេះបានផុតពូជតាំងតែពីជាង ១០ ០០០ឆ្នាំមុនមកម៉្លេះ តែមានអ្នកស្គាល់វាច្រើននិងល្បីល្បាញតាមរយៈខ្សែភាពយន្ត «Game of Thrones»។

(រូបថត៖ Colossal Biosciences)

ចចក Dire ដែលអ្នកវិទ្យាសាស្ត្របង្កាត់បាន មានចំនួន៣ក្បាល ដោយមានឈ្មោល២ក្បាលអាយុ៦ខែ ឈ្មោះ Romulus និង Remus និងញី១ក្បាលឈ្មោះ Khaleesi។

ក្រុមហ៊ុន Colossal បានបង្ហោះវីដេអូចចក Dire នៅលើបណ្ដាញសង្គម X ដោយនិយាយថា៖ «អ្នកកំពុងឮសំឡេងចចក Dire ដំបូងគេបំផុតក្នុងរយៈពេលជាង ១០ ០០០ឆ្នាំ។ តោះ! ជួបជាមួយ Romulus និង Remus ដែលជាសត្វផុតពូជដំបូងគេបង្អស់របស់ពិភពលោកដែលកើតនៅថ្ងៃទី១ខែតុលាឆ្នាំ២០២៤»។

SOUND ON. You’re hearing the first howl of a dire wolf in over 10,000 years. Meet Romulus and Remus—the world’s first de-extinct animals, born on October 1, 2024.

The dire wolf has been extinct for over 10,000 years. These two wolves were brought back from extinction using… pic.twitter.com/wY4rdOVFRH
— Colossal Biosciences® (@colossal) April 7, 2025

នាយកប្រតិបត្តិរបស់ក្រុមហ៊ុន Colossal លោក Ben Lamm បានចាត់ទុកថា នេះគឺជា «ជោគជ័យដ៏ធំសម្បើម»។ លោកបានលើកឡើងថា ព្រឹត្តិការណ៍ដ៏ធំនេះគឺជាឧទាហរណ៍ពិតជាក់ស្ដែង ដែលបង្ហាញថា បច្ចេកវិទ្យាបង្កាត់សត្វដែលផុតពូជពិតជាអាចដំណើរការបានប្រាកដមែន។

លោក Lamm បាននិយាយទៀតថា ក្នុងការបង្កាត់ពូជ ក្រុមការងាររបស់លោកបានយក DNA ពីធ្មេញចចក Dire ដែលមានអាយុកាល ១៣ ០០០ឆ្នាំ និងលលាដ៍ក្បាលរបស់វាដែលមានអាយុកាល ៧២ ០០០ឆ្នាំ។

សូមបញ្ជាក់ថា ចចក Dire គឺជាសត្វស៊ីសាច់ និងខ្លាំងមួយប្រភេទ ដែលរស់នៅក្នុងអាមេរិកខាងជើង និងអាមេរិកខាងត្បូង កំឡុងយុគសម័យទឹកកក។ ចចកនេះ បានចាប់កំណើតដំបូងប្រហែល ២៥០ ០០០ឆ្នាំមុន ហើយត្រូវផុតពូជប្រហែល ១២ ៥០០ឆ្នាំមុន៕

ចចក Dire នៅក្នុងរឿង Game of Thrones

ដោយ៖ ឈាង

The post របកគំហើញថ្មី! អ្នកវិទ្យាសាស្ត្រអាចបង្កាត់សត្វមួយប្រភេទដែលផុតពូជជាង ១ម៉ឺនឆ្នាំមុន appeared first on Kampuchea Thmey Daily.

រុស្ស៊ីបាញ់បង្ហោះរ៉ុក្កែតនាំយកយានអវកាសនិងផ្កាយរណបរបស់ខ្លួននិងអ៊ីរ៉ង់ក្នុងថ្ងៃអាមេរិកបោះឆ្នោត

Rann Reuy — Tue, 05 Nov 2024 10:15:33 +0000

ដូចការគ្រោងទុកកាលពីប៉ុន្មានថ្ងៃមុន នៅចំថ្ងៃបោះឆ្នោតប្រធានាធិបតីសហរដ្ឋអាមេរិក រុស្ស៊ីបានបាញ់បង្ហោះរ៉ុក្កែត Soyuz-2.1b ចេញពីស្ថានីយអវកាស Vostochny នៅតំបន់ចុងបូព៌ា (Far East) របស់ប្រទេសរុស្ស៊ី ដោយនាំយកយានអវកាសពីគ្រឿងនិងផ្កាយរណបចំនួន៥៣ របស់រុស្ស៊ីនិងរបស់ប្រទេសអ៊ីរ៉ង់។

តាមការចុះផ្សាយរបស់ទីភ្នាក់ងារព័ត៌មានរុស្ស៊ី TASS ក្រោយការបាញ់បង្ហោះប្រហែលប្រាំបួននាទីកន្លះ គ្រាប់រ៉ុក្កែតនឹងត្រូវផ្តាច់ចេញជាបី ហើយផ្កាយរណប Ionosphere-M ដែលផ្ទុកផ្កាយរណបនិងយានអវកាស ត្រូវបានកំណត់ឱ្យចូលទៅក្នុងគន្លងព្រះអាទិត្យ ក្នុងរយៈពេលមួយម៉ោង។

កាលពីថ្ងៃសៅរ៍កន្លងទៅ ទីភ្នាក់ងារព័ត៌មានរុស្ស៊ី TASS បានផ្សាយថា សាជីវកម្មអវកាសរដ្ឋ Roscosmos បានចេញសេចក្តីថ្លែងការណ៍មួយបានឱ្យដឹងថា រ៉ុក្កែកនាំផ្លូវ Soyuz-2.1b ផ្ទុកយានអវកាស២គ្រឿង ប្រភេទ Ionosfera-M និងផ្កាយរណបតូចៗចំនួន៥៣។

នៅថ្ងៃទី៥ខែវិច្ឆិកា ជាថ្ងៃបោះឆ្នោតប្រធានាធិបតីសហរដ្ឋអាមេរិក ដែលមានបេក្ខជន២រូបគឺ អនុប្រធានាធីបតី លោកស្រី កាម៉ាឡា ហារីស និង អតីតប្រធានាធិបតី លោក ដូណាល់ ត្រាំ ប្រណាំងប្រជែងយកកៅអីសេតវិមានសម្រាប់ការដឹកនាំរយៈពេល៤ឆ្នាំ៕

The post រុស្ស៊ីបាញ់បង្ហោះរ៉ុក្កែតនាំយកយានអវកាសនិងផ្កាយរណបរបស់ខ្លួននិងអ៊ីរ៉ង់ក្នុងថ្ងៃអាមេរិកបោះឆ្នោត appeared first on Kampuchea Thmey Daily.

រកឃើញរណ្ដៅល្អាងដ៏ជ្រៅនៅលើភពព្រះចន្ទ ទំនងអាចសង់មូលដ្ឋានអចិន្ត្រៃយ៍សម្រាប់មនុស្ស

Chheang — Tue, 16 Jul 2024 09:04:19 +0000

ជាលើកដំបូង អ្នកវិទ្យាសាស្ត្របានរកឃើញរណ្ដៅល្អាងដ៏ជ្រៅមួយកន្លែងនៅលើភពព្រះចន្ទ ដែលមានជម្រៅយ៉ាងហោចណាស់ ១០០ម៉ែត្រ ហើយវាអាចក្លាយជាកន្លែងដ៏ល្អសម្រាប់មនុស្សក្នុងការកសាងមូលដ្ឋានអចិន្ត្រៃយ៍នៅទីនោះបាន។

(រូបភាព៖ NASA)

យោងតាមការចុះផ្សាយរបស់សារព័ត៌មាន BBC កាលពីថ្ងៃទី១៥ ខែកក្កដា ឆ្នាំ២០២៤ រណ្ដៅដែលទើបរកឃើញថ្មីនេះ គ្រាន់តែជារណ្ដៅមួយប៉ុណ្ណោះក្នុងចំណោមរណ្ដៅរាប់រយកន្លែងទៀត ដែលក្រុមអ្នកវិទ្យាសាស្ត្រមិនទាន់រកឃើញនៅលើភពព្រះចន្ទ។ អ្នកវិទ្យាសាស្ត្រ២រូបគឺលោក Lorenzo Bruzzone និងលោក Leonardo Carrer នៅសកលវិទ្យាល័យ Trento ប្រទេសអ៊ីតាលី បានប្រើបច្ចេកវិទ្យាប្រព័ន្ធរ៉ាដា Mare Tranquillitatis ក្នុងការវាស់ជម្រៅ និងសណ្ឋានរណ្ដៅល្អាង។

បើតាមពិតទៅ ព្រោះតែមានទំហំធំខ្លាំង រណ្ដៅនេះអាចមើលឃើញដោយភ្នែកទទេពីផែនដី ហើយវាក៏ជាកន្លែងមួយនៅជិតកន្លែងដែលយាន Apollo ទី១១ ធ្លាប់បានចុះចតដែរ កាលពីឆ្នាំ១៩៦៩។ រណ្ដៅនេះទៀតសោត ទំនងជាត្រូវបានបង្កើតឡើងកាលពីរាប់លាន ឬរាប់ពាន់លានឆ្នាំមុន នៅពេលមានកម្អែភ្នំភ្លើងហូរនៅលើភពព្រះចន្ទ ហើយបង្កើតបានជាផ្លូវរូងក្រោមដីយ៉ាងដូច្នេះ។ ឧទាហរណ៍ក្នុងករណីស្រដៀងគ្នាដែលបង្កើតឲ្យមានរណ្ដៅដ៏ជ្រៅបែបនេះនៅលើព្រះចន្ទ គឺរណ្ដៅភ្នំភ្លើងនៅលើកោះ Lanzarote ប្រទេសអេស្ប៉ាញ ដែលក្រុមអ្នកវិទ្យាសាស្ត្របាននាំគ្នាទៅសិក្សានៅទីនោះ ដើម្បីស្វែងយល់បន្ថែមទៀតពីគម្រោងតាំងមូលដ្ឋាននៅលើភពព្រះចន្ទ។

លោកសាស្ត្រចារ្យ Leonardo Carrer បានរៀបរាប់ថា ជីវិតដំបូងនៅលើផែនដីផ្ដើមចេញពីការរស់នៅក្នុងរណ្ដៅល្អាង ហេតុដូច្នោះហើយវាជារឿងសមហេតុផលដែលមនុស្សគួរតែអាចរស់នៅក្នុងរណ្ដៅល្អាងលើភពព្រះចន្ទដូចគ្នា។

កន្លងមក ប្រទេសជាច្រើន កំពុងប្រជែងគ្នា ដើម្បីពាំនាំនូវវត្តមានរបស់មនុស្សទៅតាំងមូលដ្ឋានអចិន្ត្រៃយ៍នៅលើព្រះចន្ទ ខណៈបញ្ហាប្រឈមនាពេលបច្ចុប្បន្ននេះ គឺពួកគេត្រូវការពារអវកាសយានិកពីវិទ្យុសកម្ម បម្រែបម្រួលសីតុណ្ហភាព និងអាកាសធាតុនៅក្នុងលំហ។

អ្នកស្រី Helen Sharman ដែលជាអវកាសយានិកអង់គ្លេសដំបូងគេធ្វើដំណើរទៅកាន់ទីអវកាស បានប្រាប់ BBC ថា រណ្ដៅដែលទើបរកឃើញថ្មី ទំនងជាកន្លែងល្អ អាចយកប្រើប្រាស់សម្រាប់សាងសង់មូលដ្ឋាន។ ទន្ទឹមនោះ អវកាសយានិករូបនេះ បានប៉ាន់ប្រមាណថា មនុស្សអាចទៅរស់នៅក្នុងរណ្ដៅនេះនៅក្នុងរយៈពេល២០ ទៅ៣០ឆ្នាំខាងមុខ។

រណ្ដៅល្អាងនៅលើភពព្រះចន្ទ នឹងផ្ដល់ជាប្រយោជន៍ចំពោះមនុស្សជាតិ ដែលអាចឲ្យយើងដឹងពីប្រវត្តិនៃការកកើតភពព្រះចន្ទ ព្រមទាំងប្រព័ន្ធព្រះអាទិត្យថែមទៀតផង ដោយផ្អែកលើការសិក្សាផ្ទាំងថ្មនៅខាងក្នុងរណ្ដៅល្អាង ដែលមិនធ្លាប់រងការខូចខាត ឬបំផ្លាញដោយសារកត្តាអាកាសធាតុនៅក្នុងលំហនោះទេ ដូច្នេះវាអាចផ្តល់នូវកំណត់ត្រាភូមិសាស្ត្រយ៉ាងទូលំទូលាយដែលមានអាយុកាលរាប់ពាន់លានឆ្នាំ៕

(រូបភាព៖ BBC)

ដោយ៖ ឈាង

The post រកឃើញរណ្ដៅល្អាងដ៏ជ្រៅនៅលើភពព្រះចន្ទ ទំនងអាចសង់មូលដ្ឋានអចិន្ត្រៃយ៍សម្រាប់មនុស្ស appeared first on Kampuchea Thmey Daily.

សម្ដេច ហ៊ុន ម៉ាណែត អំពាវនាវដល់តួអង្គពាក់ព័ន្ធបន្តសហការគ្នាអនុវត្តឯកសារគតិយុត្តគោល ទាក់ទងនឹងវិទ្យាសាស្រ្ដ បច្ចេកវិទ្យា និងនវានុវត្តន៍

sopheak khoun — Sun, 24 Mar 2024 03:00:01 +0000

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវដល់តួអង្គពាក់ព័ន្ធបន្តសហការគ្នាក្នុងការអនុវត្តឯកសារគតិយុត្តគោលមួយចំនួនទាក់ទងនឹងវិទ្យាសាស្រ្ដ បច្ចេកវិទ្យា និងនវានុវត្តន៍ ប្រកបដោយតម្លាភាព និងប្រសិទ្ធភាព ដើម្បីប្រែក្លាយបញ្ហាប្រឈមនានា ឲ្យទៅជាកាលានុវត្តភាព។ ការអំពាវនាវនេះ ធ្វើឡើងក្នុងពិធីបើកទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើកទី ២ នាព្រឹកថ្ងៃទី ២៤ ខែមីនា ឆ្នាំ ២០២៤នេះ។

សម្ដេចធិបតី ហ៊ុន ម៉ាណែត បានថ្លែងថា ការរៀបចំព្រឹត្តិការណ៍ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើកទី ២នេះ គឺជាសក្ខីកម្មបង្ហាញអំពីសក្ដានុពលនៃវិស័យវិទ្យាសាស្រ្ដ បច្ចេកវិទ្យា និងនវានុវត្តន៍ ជាមួយនឹងការយកចិត្តទុកដាក់របស់រាជរដ្ឋាភិបាល ក្នុងការជំរុញ និងលើកទឹកចិត្តឲ្យសហគ្រាសធុនតូច និងមធ្យម តម្រង់ឆ្ពោះ និងចាប់យកវិទ្យាសាស្រ្ដ បច្ចេកវិទ្យា និងនវានុវត្តន៍ ធ្វើជាសសរស្តម្ភ និងក្បាលម៉ាស៊ីន ក្នុងការកសាង និងអភិវឌ្ឍន៍សហគ្រាសនានា ដើម្បីសម្រេចបានប្រព័ន្ធអេកូឡូស៊ីជាតិមួយ ប្រកបដោយនវានុវត្តន៍។

សម្ដេចធិបតី ហ៊ុន ម៉ាណែត បានថ្លែងបន្តថា បច្ចុប្បន្ននេះ កម្ពុជា មានឯកសារគតិយុត្តគោលមួយចំនួន ទាក់ទងនឹងវិទ្យាសាស្រ្ដ បច្ចេកវិទ្យា និងនវានុវត្តន៍ ដែលរួមមាន៖ គោលនយោបាយជាតិ ស្ដីពី វិទ្យាសាស្រ្ដ បច្ចេកវិទ្យា និងនវានុវត្តន៍ ២០២០-២០៣០, ផែនទីបង្ហាញផ្លូវវិទ្យាសាស្រ្ដ បច្ចេកវិទ្យា និងនវានុវត្តន៍កម្ពុជាឆ្នាំ ២០៣០, របៀបវារៈស្រាវជ្រាវជាតិ ២០២៥ និងផែនទីបង្ហាញផ្លូវបច្ចេកវិទ្យាអាទិភាពផ្សេងៗ រួមមាន៖ បច្ចេកវិទ្យាកសិកម្ម, បច្ចេកវិទ្យាអប់រំ, បច្ចេកវិទ្យាសុខាភិបាល ដែលបានអនុម័តព្រមទាំងបណ្ដាឯកសារផែនទីបង្ហាញផ្លូវមួយចំនួនទៀត ដែលបានបញ្ចប់សេចក្ដីព្រាងរួចរាល់ ដូចជា៖ បច្ចេកវិទ្យាថាមពល, បច្ចេកវិទ្យាទេសចរណ៍ និងបច្ចេកវិទ្យាឌីជីថល សម្រាប់ការអនុវត្តតាមក្រសួង-ស្ថាប័នពាក់ព័ន្ធ និងដៃគូក្នុងប្រព័ន្ធនវានុវត្តន៍ជាតិ។

សម្ដេចធិបតី ហ៊ុន ម៉ាណែត បានអំពាវនាវថា «ដោយវិស័យនេះ មានលក្ខណៈអន្តរវិស័យ និងប្រទាក់ក្រឡាគ្នា ខ្ញុំសូមអំពាវនាវ និងលើកទឹកចិត្តដល់តួអង្គពាក់ព័ន្ធ មានជាអាទិ៍ក្រសួង-ស្ថាប័ន សាកលវិទ្យាល័យ មជ្ឈមណ្ឌលស្រាវជ្រាវ វិស័យឯកជន និងសង្គមស៊ីវិល ឲ្យបន្តសហការគ្នាក្នុងការអនុវត្តឯកសារគតិយុត្តទាំងនេះ ប្រកបដោយតម្លាភាព និងប្រសិទ្ធភាព ដើម្បីប្រែក្លាយបញ្ហាប្រឈមនានា ឲ្យទៅជាកាលានុវត្តភាព បង្កើតសក្ដានុពលពីវិវត្តន៍ជាវិជ្ជមាននៃបច្ចេកវិទ្យាសំខាន់ៗ បន្ស៉ាំ និងចាប់យក និងបង្កើតបច្ចេកវិទ្យាថ្មីៗទៀត ក្នុងរយៈពេលខ្លី និងមធ្យម ដែលមានលក្ខណៈនវានុវត្តន៍ក្នុងរយៈពេលវែង សម្រាប់ចូលរួមចំណែកអភិវឌ្ឍន៍សេដ្ឋកិច្ចជាតិ ប្រកបដោយប្រសិទ្ធភាព និងភាពធន់»។

បើតាមសម្ដេចនាយករដ្ឋមន្ត្រី ការអភិវឌ្ឍប្រទេសប្រកបដោយបរិយាប័ន្ន មានភាពធន់ និងចីរភាព ចាំបាច់ត្រូវចូលរួមអនុវត្តកត្តាសំខាន់ៗ រួមមាន៖ ទី១. ការជំរុញសកម្មភាពសេដ្ឋកិច្ច ពាណិជ្ជកម្ម និងការវិនិយោគតាមរយៈការជំរុញការវិនិយោគដោយផ្ទាល់ពីបរទេស ទៅលើវិស័យដែលមានបច្ចេកវិទ្យាជាមូលដ្ឋាន និងមានតម្លៃខ្ពស់ នៅក្នុងក្របខណ្ឌកិច្ចព្រមព្រៀងពាណិជ្ជកម្មសេរី ជាដើម។

ទី២. ជំរុញបន្ទាន់ចំពោះការផ្ទេរបច្ចេកវិទ្យាតាមរយៈខ្សែបណ្ដោយរវាងសហគ្រាស និងសហគ្រាស។ ទី៣. ការផ្ទេរបច្ចេកវិទ្យាអាទិភាព ចំណេះដឹង និងចំណេះធ្វើ ការបណ្ដុះបណ្ដាលជំនាញឡើងវិញ ការលើកកម្ពស់ជំនាញ។ ទី៤. ការជំរុញឲ្យរំហូរអ្នកមានទេពកោសល្យ និងការជំរុញឌីជីថលូបនីយកម្មប្រកបដោយបរិយាប័ន្ន ព្រមទាំងការរៀបចំបរិស្ថានល្អ ដើម្បីរក្សា និងទាក់ទាញអ្នកដែលមានទេពកោសល្យ ជាដើម៕

The post សម្ដេច ហ៊ុន ម៉ាណែត អំពាវនាវដល់តួអង្គពាក់ព័ន្ធបន្តសហការគ្នាអនុវត្តឯកសារគតិយុត្តគោល ទាក់ទងនឹងវិទ្យាសាស្រ្ដ បច្ចេកវិទ្យា និងនវានុវត្តន៍ appeared first on Kampuchea Thmey Daily.

សម្ដេចតេជោ ៖ ទោះបីវិទ្យាសាស្រ្ដជឿនលឿនដល់ណាក៏ដោយ តែបើមនុស្សមិនជឿនលឿន គឺមិនមានអ្វីប្រែប្រួលឡើយ

sopheak khoun — Thu, 27 Apr 2023 01:37:51 +0000

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា ទោះបីជាវិទ្យាសាស្រ្ដ មានការជឿនលឿនដល់ណាក៏ដោយ តែបើមនុស្សមិនមានការជឿនលឿនទេនោះ គឺមិនមានអ្វីប្រែប្រួលឡើយ។

ការលើកឡើងរបស់សម្ដេចតេជោ ហ៊ុន សែន ខាងលើនេះ បានធ្វើឡើងនៅក្នុងពិធីបិទវគ្គបណ្តុះបណ្តាលឆ្នាំ ២០២២ និងបើកវគ្គបណ្តុះបណ្តាលឆ្នាំ ២០២៣ របស់សាលាភូមិន្ទរដ្ឋបាល (ERA) នៅព្រឹកថ្ងៃទី ២៧ ខែមេសា ឆ្នាំ ២០២៣ នេះ។

សម្ដេចតេជោ ហ៊ុន សែន បានថ្លែងដោយណែនាំថា គ្រប់ក្រសួង-ស្ថាប័នជាតិ និងថ្នាក់ក្រោមជាតិ ត្រូវបន្តយកចិត្តទុកដាក់ ពង្រឹងសមត្ថភាពមន្ត្រីរាជការនៅគ្រប់កម្រិត ហើយត្រូវកសាងផែនការជាក់ស្ដែង សម្រាប់អភិវឌ្ឍន៍សមត្ថភាពមន្ត្រីរាជការ ដោយធានាឲ្យបាននូវគុណភាព គុណវុឌ្ឍិ គុណធម៌។

សម្ដេចតេជោ ហ៊ុន សែន បានថ្លែងបន្តថា នៅទីកន្លែងណាក៏ដោយ ហើយបើទោះបីជាវិទ្យាសាស្រ្ដមានការជឿនលឿនដល់ណាក៏ដោយ តែបើមនុស្សមិនមានការជឿនលឿនទេនោះ គឺមិនមានអ្វីប្រែប្រួលឡើយ។

សម្ដេចតេជោ ហ៊ុន សែន ថ្លែងបែបនេះថា «សម័យឌីជីថល ប៉ុន្តែមនុស្សវាអត់ឌីជីថល ធ្វើម៉េច! លើការជាក់ស្ដែងថ្ងៃមុន ខ្ញុំទៅរអ៊ូដាក់នាយកវិទ្យាស្ថានអប់រំ គេដើរដល់សម័យអគារអញ្ចេះ ទោះបីគ្មាអគារអញ្ចេះ គេក៏មានអគារដំបូលអីស្រួលបួលដែរ ឯងនៅដាក់អារោងការជំនាន់ទសវត្សរ៍ ៨០ ហើយឲ្យមន្ត្រីថ្នាក់បរិញ្ញាបូក ១អង្គុយទៀត វាអស់ឆ្ងល់»។

ត្រង់ចំណុចនេះ សម្ដេចតេជោ ហ៊ុន សែន លើកឡើងថា មន្ត្រីនៅទីកន្លែងនោះ មិនមានការកែទម្រង់ខ្លួនឯង ដោយមិនគួរធ្វើអ្វីដដែលៗ ដូចសម័យមុនឡើយ៕

អត្ថបទ៖ ឃួន សុភ័ក្រ

The post សម្ដេចតេជោ ៖ ទោះបីវិទ្យាសាស្រ្ដជឿនលឿនដល់ណាក៏ដោយ តែបើមនុស្សមិនជឿនលឿន គឺមិនមានអ្វីប្រែប្រួលឡើយ appeared first on Kampuchea Thmey Daily.

វិទ្យាសាស្រ្ដ Archives - Kampuchea Thmey Daily

របកគំហើញ​ថ្មី! អ្នក​វិទ្យាសាស្ត្រ​អាច​បង្កាត់​​សត្វមួយ​ប្រភេទ​ដែល​ផុតពូជ​ជាង​ ១ម៉ឺន​ឆ្នាំ​មុន

រកឃើញ​រណ្ដៅល្អាង​ដ៏​ជ្រៅ​នៅ​លើភព​ព្រះ​ចន្ទ ទំនង​អាច​សង់​មូលដ្ឋាន​អចិន្ត្រៃយ៍​សម្រាប់​មនុស្ស

សម្ដេចតេជោ ៖ ទោះបីវិទ្យាសាស្រ្ដជឿនលឿនដល់ណាក៏ដោយ តែបើមនុស្សមិនជឿនលឿន គឺមិនមានអ្វីប្រែប្រួលឡើយ

របកគំហើញថ្មី! អ្នកវិទ្យាសាស្ត្រអាចបង្កាត់សត្វមួយប្រភេទដែលផុតពូជជាង ១ម៉ឺនឆ្នាំមុន

រកឃើញរណ្ដៅល្អាងដ៏ជ្រៅនៅលើភពព្រះចន្ទ ទំនងអាចសង់មូលដ្ឋានអចិន្ត្រៃយ៍សម្រាប់មនុស្ស