វិស័យដឹកជញ្ជូន Archives - Kampuchea Thmey Daily

វិស័យដឹកជញ្ជូន ជាឆ្អឹងខ្នងសេដ្ឋកិច្ចជាតិ និងកំណត់សមត្ថភាពប្រកួតប្រជែងរបស់កម្ពុជា

deth leng — Thu, 07 May 2026 08:38:03 +0000

លោក ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា វិស័យភស្ភុភារកម្មគឺជាឆ្អឹងខ្នងនៃសេដ្ឋកិច្ចជាតិ និងជាកត្តាកំណត់សមត្ថភាពប្រកួតប្រជែងរបស់កម្ពុជា ក្នុងការទាក់ទាញការវិនិយោគផ្ទាល់ពីបរទេស (FDI)។

ឧបនាយករដ្ឋមន្ត្រីលើកឡើងនៅថ្ងៃទី ០៦ ឧសភា ២០២៦ ក្នុងពេលអញ្ជើញជាអធិបតីសិក្ខាសាលាផ្សព្វផ្សាយស្តីពី «សន្ទស្សន៍ប្រតិបត្តិការភស្ភុភារកម្មថ្មី (Logistics Performance Index-LPI 2.0) និងវិធីសាស្ត្រគណនាដោយធនាគារពិភពលោក» ដោយមានការអញ្ជើញចូលរួមពីលោកស្រី Tania Meyer នាយកគ្រប់គ្រងធនាគារពិភពលោកប្រចាំកម្ពុជា។

សិក្ខាសាលានេះត្រូវបានរៀបចំឡើងក្នុងគោលបំណងពង្រឹងការយល់ដឹងដល់តំណាងក្រសួង-ស្ថាប័នពាក់ព័ន្ធ សមាគមដឹកជញ្ជូន និងផ្នែកឯកជន អំពីការផ្លាស់ប្តូរវិធីសាស្ត្រវាយតម្លៃរបស់ធនាគារពិភពលោក ដែលប្តូរពីការផ្អែកលើការស្ទង់មតិបែបមតិយោបល់ (Survey-based) មកជាការប្រើប្រាស់ទិន្នន័យជាក់ស្តែង (Key Performance Indicators-KPIs) ដើម្បីវាស់វែងប្រសិទ្ធភាពភស្ភុភារកម្មរបស់ប្រទេសនីមួយៗ។

មន្ត្រីជាន់ខ្ពស់ធនាគារពិភពលោក ក៏បានធ្វើបទបង្ហាញសំខាន់ៗចំនួន ៣ រួមមាន៖ សូចនាករប្រតិបត្តិការភស្តុភារកម្មថ្មី និងវិធីសាស្រ្តគណនា, ប៉ាណូឡិកាភស្តុភារកម្ម និងមជ្ឈមណ្ឌលព័ត៌មានភស្តុភារកម្មជាតិ។

ឧបនាយករដ្ឋមន្ត្រី បន្ថែមថា ការយល់ដឹងច្បាស់អំពីសន្ទស្សន៍ LPI 2.0 នឹងជួយឱ្យកម្ពុជាអាចកំណត់បាននូវចំណុចខ្វះខាត និងដាក់ចេញនូវវិធានការកែទម្រង់ចំគោលដៅ ដើម្បីកាត់បន្ថយចំណាយភស្ភុភារកម្ម និងបង្កើនប្រសិទ្ធភាពច្រវាក់ផ្គត់ផ្គង់។

ឧបនាយករដ្ឋមន្ត្រី ក៏បានជំរុញឱ្យគ្រប់ភាគីពាក់ព័ន្ធ បន្តខិតខំប្រឹងប្រែងធ្វើឌីជីថលូបនីយកម្មក្នុងប្រព័ន្ធដឹកជញ្ជូន និងការសម្រួលបែបបទឆ្លងកាត់ព្រំដែនឱ្យកាន់តែមានភាពរហ័ស និងតម្លាភាពស្របតាមស្តង់ដារអន្តរជាតិ៕

The post វិស័យដឹកជញ្ជូន ជាឆ្អឹងខ្នងសេដ្ឋកិច្ចជាតិ និងកំណត់សមត្ថភាពប្រកួតប្រជែងរបស់កម្ពុជា appeared first on Kampuchea Thmey Daily.

លោក ស៊ិន ចន្ធី៖ សង្គ្រាមមជ្ឈិមបូព៌ា ធ្វើឱ្យតម្លៃបន្ថែមលើការដឹកជញ្ជូនតាមផ្លូវទឹកកើនឡើង

Din Thary — Mon, 09 Mar 2026 06:52:18 +0000

លោក ស៊ិន ចន្ធី ប្រធានសមាគមភស្តុភារកម្មកម្ពុជា បានថ្លែងថា សង្គ្រាមក្នុងតំបន់មជ្ឈិមបូព៌ា រវាងអាមេរិក អ៊ីស្រាអែល ជាមួយ អ៊ីរ៉ង់ បង្កឱ្យមានផលប៉ះពាល់យ៉ាងធ្ងន់ធ្ងរលើថាមពលប្រេង ជាពិសេសក្នុងវិស័យដឹកជញ្ជូន និងភស្តុភារ។

ថ្លែងប្រាប់«កម្ពុជាថ្មី» លោក ស៊ិន ចន្ធី បានលើកឡើងថា ជាការពិតគិតត្រឹមថ្ងៃទី០៦ ខែមីនា គឺមានរយៈពេល ៧ ថ្ងៃហើយ ដែលអាមេរិកចាប់ដៃគ្នាជាមួយអីស្រាអែល វាយប្រហារលើអ៊ីរ៉ង់។

ចំពោះសង្គ្រាមនាពេលនេះ ក្នុងវិស័យដឹកជញ្ជូន និងភស្តុភារ យើងដឹងច្បាស់ថា នឹងរងផលប៉ះពាល់ទី១ ចាប់តាំងពីថ្ងៃទី៣ នៃសង្គ្រាមក្រុមហ៊ុនកប៉ាល់ធំៗមួយចំនួនបានចាប់ផ្តើមដាក់ចេញនៅការគិតថ្លៃបន្ថែមទៅលើថ្លៃដឹកជញ្ជូន ឬហៅថា ការគិតថ្លៃបន្ថែមនៃជម្លោះបន្ទាន់ (Emergency Conflict Surcharges) (ECS) ដែលមានតម្លៃខ្ពស់។

ក្នុងនោះការគិតថ្លៃបន្ថែម ២ ពាន់ដុល្លារអាមេរិក ទៅលើកុងតឺន័រទំហំ ២០ ហ្វីត (20ft Container) បន្ថែមពីលើការដឹកជញ្ជូន គិតថ្លៃបន្ថែម ៣ ពាន់ដុល្លារ ទៅលើកុងតឺន័រទំហំ ៤០ ហ្វីត បន្ថែមទៅលើការដឹកជញ្ជូន និង ៤ ពាន់ដុល្លារ គិតថ្លៃបន្ថែមទៅលើការដឹកជញ្ជូនសម្រាប់កុងតឺន័រត្រជាក់ដែលដឹកជញ្ជូននូវផលិតផលត្រូវការសីតុណ្ហភាពត្រជាក់។

លោក បានបញ្ជាក់ថា កាលពីថ្ងៃទី៥ និងទី៦ តម្លៃនៃការដឹកជញ្ជូននេះ ក៏មានការកើនឡើងខ្ពស់សម្រាប់ទំនិញដែលចេញពីតំបន់អាស៊ី រួមទាំងកម្ពុជាទៅកាន់តំបន់អារ៉ាប់រួម។

ចំណែកឯទំនិញដែលត្រូវនាំចេញទៅសហរដ្ឋអាមេរិក ក៏ដូចទៅអ៊ឺរ៉ុប នៅមិនទាន់មានការឡើងថ្លៃអ្វីជាគំហុកនោះទេសម្រាប់ផ្លូវទឹក ប៉ុន្តែសម្រាប់ផ្លូវអាកាសក៏ដូចគ្នា ដោយក្រុមហ៊ុនអាកាសចរណ៍ធំៗដែលត្រូវហោះឆ្លងកាត់តំបន់មជ្ឈិមបូព៌ា មានការឡើងថ្លៃ ហើយក្រុមហ៊ុនអាកាសចរណ៍មួយចំនួនទៀត ក៏មានការផ្លាស់ប្តូរ លុបចោលនូវជើងហោះហើរ និងមិនទាន់ទទួលការកក់បន្ថែមទៀតផងដែរ។

ទន្ទឹមនេះអំពីកម្ពុជា ប្រធានសមាគមភស្តុភារកម្មកម្ពុជារូបនេះ បានអះអាងថា បើនិយាយពីកម្ពុជាជម្រើសសម្រាប់ការធ្វើពាណិជ្ជកម្មទាក់ទងនឹងផ្លូវដឹកជញ្ជូនទៅកាន់មជ្ឈិមបូព៌ាដូចជាមិនទំហំធំនោះទេ តាមការប៉ាន់ស្មានអាចមានទំហំប្រមាណតិចជាង ១% នៅឡើយ ដូច្នេះវាស្ថិតនៅក្នុងទំហំតូច។ ទី២ ជម្រើសរបស់កម្ពុជាមួយទៀតដែរ ឃើញថាកម្ពុជាភាគច្រើនគឺនាំចេញទៅកាន់ទីផ្សារសហរដ្ឋអាមេរិក និងអ៊ឺរ៉ុប ដូច្នេះផលប៉ះពាល់ខ្លាំងមកដល់ម៉ោងនេះនៅមិនទាន់មាននៅឡើយទេ។

លោកថា បើទោះបីជាយ៉ាងណាយើងនៅតែរង់ចាំមើល ប្រសិនបើសង្គ្រាមនេះនៅតែបន្តអូសបន្លាយពេល ឬកាន់តែរីករាលដាលធំជាងនេះ គឺអាចនឹងប៉ះពាល់ទៅដល់ផ្លូវដឹកជញ្ជូនទៅសហរដ្ឋអាមេរិក ក៏ដូចជាអ៊ឺរ៉ុប។

អាស្រ័យហេតុនេះហើយជម្រើសរបស់កម្ពុជា ប្រសិនបើតំបន់ផ្សេងៗទៀត ហើយសង្គ្រាមនេះកាន់តែរីករាយដាល និងអូសបន្លាយពេលយូទៀត ជម្រើសរបស់យើងមានតែផ្លាស់ប្តូរនូវខ្សែសង្វាក់ផ្គត់ផ្គង់ (supply chain) ក៏ដូចជាទីផ្សារនៅក្នុងតំបន់អាស៊ីប៉ាស៊ីហ្វិក ដែលនេះគឺជាការគិតទុករបស់អ្នកផលិត ក៏ដូចជាអ្នកនាំចេញ ហើយយើងមានតែជំរុញនៅក្នុងតំបន់ឱ្យបានច្រើន ជាជាងតំបន់ដែលមានបញ្ហា។

លោក ស៊ិន ចន្ធី បន្ថែមថា យើងឃើញថាមកដល់ពេលបច្ចុប្បន្ននេះ សង្គ្រាមទើបតែមានរយៈពេល ៧ ថ្ងៃតែប៉ុណ្ណោះ គិតត្រឹមថ្ងៃទី៦ ខែមិនា ដូច្នេះយើងមិនទាន់អាចវាយតម្លៃបានទេ គឺនៅបន្តតាមដាន តើវាអាចវិវត្តទៅដល់កម្រិតណាទៀត ប្រសិនបើសង្គ្រាមអូសបន្លាយពេលយូ នោះយើងត្រូវមានផែនការថ្មី ក៏ដូចជាជម្រើសផ្សេងបន្ថែមទៀតដើម្បីដោះស្រាយ៕

ដោយ៖ ឌិន ថារី

The post លោក ស៊ិន ចន្ធី៖ សង្គ្រាមមជ្ឈិមបូព៌ា ធ្វើឱ្យតម្លៃបន្ថែមលើការដឹកជញ្ជូនតាមផ្លូវទឹកកើនឡើង appeared first on Kampuchea Thmey Daily.

ឡានដឹកអ្នកដំណើរតាមផ្លូវជាតិលេខ១ ដែលបើកគ្មានវិជ្ជាជីវៈ រដ្ឋមន្ត្រីមហាផ្ទៃឱ្យសមត្ថកិច្ចចាត់វិធានការ

Thoeun Vansong — Fri, 28 Feb 2025 08:31:02 +0000

រដ្ឋមន្ត្រីក្រសួងមហាផ្ទៃ បានណែនាំដល់អគ្គស្នងការដ្ឋាននគរបាលជាតិ អនុវត្តវិធានការលើក្រុមរថយន្តដឹកអ្នកដំណើរផ្លូវជាតិលេខ១ ពីភ្នំពេញទៅកាន់ព្រំដែនកម្ពុជា-វៀតណាម ក្រោយមានការរិះគន់ពីប្រជាពលរដ្ឋ ថា រថយន្តដឹកអ្នកដំណើរតាមផ្លូវជាតិមួយនេះ បានបើកបរគ្មានវិជ្ជាជីវៈ បង្កគ្រោះថ្នាក់ញឹកញាប់។

បើតាមលោក រ៉េន រតនៈ ជំនួយការ និងជាអ្នកនាំពាក្យលោក ស សុខា ឱ្យដឹងនាថ្ងៃទី២៨ ខែកុម្ភៈ ឆ្នាំ២០២៥ ថា លោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានចំណារណែនាំឱ្យអគ្គស្នងការដ្ឋាននគរបាលជាតិ ត្រៀមអនុវត្តវិធានការមួយចំនួន ដើម្បីបង្ការ ទប់ស្កាត់ គ្រោះថ្នាក់ចរាចរណ៍តាមបណ្ដោយផ្លូវជាតិលេខ១ ពីរាជធានីភ្នំពេញទៅព្រំដែនកម្ពុជា-វៀតណាម ដោយផ្តោតលើរថយន្តដឹកអ្នកដំណើរទៅមក ភ្នំពេញ-វៀតណាម។

លោក រ៉េន រតនៈ បន្តថា ចំណារណែនាំពីប្រមុខក្រសួងមហាផ្ទៃ បានធ្វើឡើងបន្ទាប់ពីការសង្កេតឃើញថា រថយន្តដឹកអ្នកដំណើរទៅមក ភ្នំពេញ-វៀតណាម មួយចំនួនទទួលរងការរិះគន់ និងមានការបង្ហាញក្ដីបារម្ភពីសំណាក់ប្រជាពលរដ្ឋដែលធ្វើដំណើរតាមដងផ្លូវ និងពលរដ្ឋរស់នៅតាមបណ្ដាផ្លូវជាតិលេខ១ ថា បើកបរលើសល្បឿនកំណត់ វ៉ាជែងគ្នា ដែលបានបង្កជាហានិភ័យ និងបណ្ដាលឱ្យមានគ្រោះថ្នាក់ជាញឹកញាប់។

«កត្ដាដែលនាំឱ្យកើតមានបញ្ហានេះ ជាអាទិ៍ មានអ្នកបើកបរគ្មានវិជ្ជាជីវៈ មិនគោរពច្បាប់ និងអ្នកបើកបរប្រញាប់ដឹកអ្នកដំណើរឱ្យទាន់ពេលកំណត់»។ នេះជាការបន្ថែមរបស់លោក រ៉េន រតនៈ។

សូមបញ្ជាក់ថា កន្លងមក មិនថាតែប្រជាពលរដ្ឋទូទៅនោះទេ ក្រុមអ្នកសារព័ត៌មាន ព្រមទាំងព្រះសង្ឃ ក៏បានផ្សព្វផ្សាយ និងមានសង្ឃដីកា ស្នើឱ្យក្រសួងមហាផ្ទៃ ចាត់វិធានការលើបញ្ហានេះ ដើម្បីធានាបាននូវសុវត្ថិភាពចរាចរណ៍តាមដងផ្លូវ ជាពិសេសគឺនៅផ្លូវជាតិលេខ១ ដែលមានសភាពតូចចង្អៀត និងមានការធ្វើចរាចរណ៍ច្រើន ដើម្បីផ្ដល់ភាពកក់ក្ដៅដល់ភ្ញៀវទេសចរវៀតណាម និងភ្ញៀវអន្តរជាតិផ្សេងទៀត ដែលធ្វើដំណើរមកលេងកម្សាន្តនៅកម្ពុជាតាមផ្លូវគោក៕

The post ឡានដឹកអ្នកដំណើរតាមផ្លូវជាតិលេខ១ ដែលបើកគ្មានវិជ្ជាជីវៈ រដ្ឋមន្ត្រីមហាផ្ទៃឱ្យសមត្ថកិច្ចចាត់វិធានការ appeared first on Kampuchea Thmey Daily.

ក្រុមហ៊ុន YCH Group ចង់វិនិយោគលើវិស័យដឹកជញ្ជូន និងឡូជីស្ទីកនៅកម្ពុជា

Thoeun Vansong — Thu, 28 Nov 2024 08:00:21 +0000

នៅក្នុងជំនួបសម្ដែងការគួរសមនាព្រឹកថ្ងៃទី២៨ ខែវិច្ឆិកា ឆ្នាំ២០២៤ ប្រធានក្រុមហ៊ុន YCH Group បានជម្រាបសម្ដេចធិបតី នាយករដ្ឋមន្ត្រី អំពីបំណងចង់វិនិយោគលេីហេដ្ឋារចនាសម្ព័ន្ធតភ្ជាប់នៅកម្ពុជា គឺវិស័យដឹកជញ្ជូន និងឡូជីស្ទីក។

លោក Robert Yap ប្រធានក្រុមប្រឹក្សាភិបាលក្រុមហ៊ុន YCH Group បានជម្រាបជូនសម្ដេចធិបតីអំពីអាជីវកម្មរបស់ក្រុមហ៊ុន ដែលកំពុងប្រតិបត្តិការនៅតាមបណ្ដាប្រទេសចំនួន ១៦ ហើយក្រុមហ៊ុនមានឧត្តមភាពទៅលើវិស័យដឹកជញ្ជូន និងឡូជីស្ទីក ដែលបានធ្វើឱ្យក្រុមហ៊ុនប្រែក្លាយជាក្រុមហ៊ុនឈានមុខមួយក្នុងខ្សែច្រវាក់ផ្គត់ផ្គង់សម្រាប់តំបន់អាស៊ី។

លោកប្រធានក្រុមហ៊ុន បានសម្ដែងការចាប់អារម្មណ៍យ៉ាងខ្លាំងចំពោះកម្ពុជា ដែលសម្រេចបាននូវកំណើនសេដ្ឋកិច្ចមួយដ៏ខ្ពស់ប្រកបដោយចីរភាព ហើយតាមរយៈនេះ ក្រុមហ៊ុនក៏បានសម្លឹងឃើញនូវកាលានុវត្តភាព និងសក្ដានុពលជាច្រើននៅក្នុងប្រទេសកម្ពុជា ដោយក្រុមហ៊ុនបានបង្ហាញបំណងវិនិយោគទៅលើហេដ្ឋារចនាសម្ព័ន្ធតភ្ជាប់ ដែលរួមមាន វិស័យដឹកជញ្ជូន និងឡូជីស្ទីក ជាដើម។

ជាការឆ្លើយតប សម្ដេចធិបតី ហ៊ុន ម៉ាណែត បានសម្ដែងក្ដីរីករាយចំពោះក្រុមហ៊ុន ដែលមានចំណាប់អារម្មណ៍នៅក្នុងការស្វែងរកឱកាសវិនិយោគនៅកម្ពុជា ពិសេសពាក់ព័ន្ធលើហេដ្ឋារចនាសម័្ពន្ធតភ្ជាប់។ សម្ដេចធិបតី គូសបញ្ជាក់អំពីសារសំខាន់នៃវិស័យនេះ ដែលធានាបានភាពប្រកួតប្រជែងរបស់កម្ពុជា ទាំងក្នុងតំបន់ និងពិភពលោក។ ក្នុងន័យនេះ រាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំងលើការកសាងប្រព័ន្ធហេដ្ឋារចនាសម័្ពន្ធតភ្ជាប់ ដើម្បីគាំទ្រទៅដល់វិស័យដឹកជញ្ជូន និងឡូជីស្ទីក ជាអាទិ៍ អាកាសយានដ្ឋានអន្តរជាតិ កំពង់ផែទឹកជ្រៅ ផ្លូវល្បឿនលឿន ការលើកកម្ពស់គុណភាពផ្លូវដែក និងហេដ្ឋារចនាសម្ព័ន្ធផ្លូវ ស្ពាន ថ្នល់។

សម្ដេចធិបតី បានបន្តប្រាប់ក្រុមហ៊ុន ថា ទន្ទឹមនឹងការទាក់ទាញវិនិយោគិនថ្មីៗមកកម្ពុជា រាជរដ្ឋាភិបាលតែងតែយកចិត្តទុកដាក់ជាអាទិភាពចំពោះការធានាឱ្យបានបរិយាកាសអំណោយផល ភាពប្រកួតប្រជែង ភាពរីកចម្រើន និងជោគជ័យរបស់វិស័យឯកជន ដែលកំពុងតែមានប្រតិបត្តិការអាជីវកម្ម និងវិនិយោគនៅកម្ពុជា។ សម្ដេចធិបតីក៏បានលើកទឹកចិត្តឱ្យក្រុមហ៊ុន បន្តពិភាក្សាឱ្យបានលម្អិត និងគ្រប់ជ្រុងជ្រោយបន្ថែមទៀតជាមួយក្រសួង-ស្ថាប័នពាក់ព័ន្ធរបស់រាជរដ្ឋាភិបាល ក្នុងការរៀបចំផែនការអាជីវកម្មសម្រាប់ពេលអនាគតរបស់ក្រុមហ៊ុន៕

The post ក្រុមហ៊ុន YCH Group ចង់វិនិយោគលើវិស័យដឹកជញ្ជូន និងឡូជីស្ទីកនៅកម្ពុជា appeared first on Kampuchea Thmey Daily.

បណ្តាញដឹកជញ្ជូនពិភពលោកព្រមានចាយពេលយូរទម្រាំទំនិញដល់ដៃ អតិថិជន ព្រោះវាងផ្លូវសង្គ្រាម

Mean Ratana — Fri, 19 Jan 2024 09:09:09 +0000

បណ្តាញដឹកជញ្ជូនឡូជីស្ទីកខ្នាតធំដូចជា ក្រុមហ៊ុន Maersk បានជូនដំណឹងទៅកាន់បណ្តាអតិថិជនខ្លួនអំពីហានិភ័យសង្គ្រាមនៅសមុទ្រក្រហម ដែលអាចនឹងធ្វើឲ្យកើតមានវិបត្តិផ្នែកដឹកជញ្ជូនអូសបន្លាយរយៈពេលដល់ច្រើនខែ ។

ប្រភពព័ត៌មានពី RT ក្រុមហ៊ុនឡូជីស្ទីកខ្នាតយក្ស Maersk ដែលគេច្រើនស្គាល់តាមរយៈស្លាកកុងតឺន័របានប្រកាសជូនដំណឹងអំពីបញ្ហាខាងលើជូនទៅអតិថិជន ក្រោយវាយតម្លៃពីហានិភ័យនេះជាកម្រិតបណ្តាញសាកល ។ “យើងសង្ឃឹមថា នឹងមានដំណោះស្រាយឆាប់ៗ និងធ្វើអ្វីតាមដែលអាចធ្វើបានសម្រាប់ដោះស្រាយ ។ ពួកយើងសូមអំពាវនាវឲ្យអតិថិជនត្រៀមខ្លួនប្រឈមសម្រាប់បញ្ហាលំបាកជាសាកលនេះ ពិសេសការទ្រាំទ្រនឹងបញ្ហារំខានទៅដល់បណ្តាញដឹកជញ្ជូនរបស់យើង” ។ នេះបើតាមការជូនដំណឹងដល់អតិថិជនរបស់ក្រុមហ៊ុន Maersk ។

ទន្ទឹមនឹងនោះ ក្រុមហ៊ុនក៏បានផ្តល់ជម្រើសឲ្យអតិថិជនរបស់ខ្លួន អាចបង្វែរពីការដឹកជញ្ជូនទំនិញតាមផ្លូវទឹក ទៅតាមជើងអាកាសវិញ មិនថានៅអាកាសយានដ្ឋានតាមប្រទេសអូម៉ង់ ឬអារ៉ាប់រួមនោះទេ ដើម្បីមានលទ្ធភាពអាចបញ្ជូនទំនិញដល់ទីដៅចុងក្រោយនៅតំបន់អឺរ៉ុប ឬអាមេរិក ។

ជាមួយគ្នានោះផងដែរ អត្រាទំនិញផ្ញើសម្រាប់ជំនួញពាណិជ្ជកម្មអន្តរជាតិ តាមជើងហោះហើរមានការកើនឡើងគំហុក ហើយលទ្ធផលនេះ ក៏ដោយសារតែសហរដ្ឋអាមេរិក និងអង់គ្លេសបានបើកប្រតិបត្តិការបាញ់ប្រហារ ទៅលើក្រុមឧទ្ទាមហ៊ូធីនៅប្រទេសយែម៉ែន ក្នុងទិសដៅការពារប្រយោជន៍នៃជំនួញពាណិជ្ជកម្មតាមផ្លូវទឹក ពិសេសផ្លូវកាត់ដែលមមាញឹក នៅតំបន់សមុទ្រក្រហម និងផ្លូវទឹក Bab-el-Mandeb ក្បែរប្រទេសយេម៉ែន ។

គួររំឭកផងដែរថា ក្រុមហ៊ុនដឹកជញ្ជូនធំៗ ដូចជា Maersk របស់ដាណឺម៉ាក និង Hapag-Lloyd របស់អាល្លឺម៉ង់ បានបង្ខំចិត្តបញ្ជូនកប៉ាល់ដឹកទំនិញជាច្រើនគ្រឿងបង្វែរទិសដៅវាងទៅតំបន់ផ្លូវកំពង់ផែនៅអាហ្រ្វិកខាងត្បូង។ ការធ្វើនេះ បណ្តាលឲ្យការដឹកជញ្ជូនទំនិញស៊ីរយៈពេលវែង និងថ្លៃដើមដឹកជញ្ជូនខ្ពស់ជាងមុន ពោលគឺក្រោយពីក្រុមឧទ្ទាមហ៊ូធីបានប្រកាសបិទផ្លូវទឹកមិនឲ្យទំនិញចេញចូលបានតាមសមុទ្រក្រហម និងតំបន់ព្រែកជីកស៊ុយអេនៅអេហ្ស៊ីប ៕

អត្ថបទដោយ៖ មាន រតនា

The post បណ្តាញដឹកជញ្ជូនពិភពលោកព្រមានចាយពេលយូរទម្រាំទំនិញដល់ដៃ អតិថិជន ព្រោះវាងផ្លូវសង្គ្រាម appeared first on Kampuchea Thmey Daily.

ពេជ្រ សូលីកា ក្លាយជាម្តាយដ៏រឹងមាំ ក្រោយឆ្លងកាត់ការបែកបាក់

Din Thary — Wed, 23 Aug 2023 09:32:35 +0000

បន្ទាប់ពីបានឆ្លងកាត់ជីវិតដ៏លំបាក និងការតស៊ូជាច្រើនកន្លងមក បានបង្រៀនឱ្យជីវិតរបស់តារាចម្រៀង ពេជ្រ សូលីកា កាន់តែមានភាពរឹងមាំ។ ម្យ៉ាងទៀតគេក៏កត់សម្គាល់ថា ពេជ្រ សូលីកា សព្វថ្ងៃក៏បានបំពេញតួនាទីយ៉ាងល្អ ក្នុងការមើលថែរក្សាកូន ថ្វីត្បិតនាងក្លាយជាស្រ្តីមេម៉ាយក្នុងពេលប៉ុន្មានឆ្នាំមកនេះ។

ទោះបីជា ពេជ្រ សូលីកា មួយរយៈពេលកន្លងមកនេះ នាងបានជួបប្រទះនូវរឿងរ៉ាវស្មុគស្មាញមិនសប្បាយចិត្តមួយចំនួនក៏ដោយ ពោលគឺចាប់តាំងពីមានដំណឹងនៃការបែកបាក់ស្វាមី យ៉ាងណាក្តី ប៉ុន្តែក្ដីសង្ឃឹមរបស់នាងបានបង្ហាញពីភាពជឿជាក់ជានិច្ចលើវិថីជីវិតរស់នៅចិញ្ចឹមកូន។ សូលីកា បច្ចុប្បន្នគេញថា អ្នកម្ដាយ Single រូបនេះបានរលាស់ខ្លួនចេញពីបញ្ហាមួយចំនួនដោយភាពរឹងមាំ។

ជាមួយគ្នានេះកាលពីថ្មីៗកន្លងទៅ ពេជ្រ សូលីកា ធ្លាប់បានអះអាងថា ជីវិតSingle Momបានបង្រៀននាងមកច្រើនណាស់ ការក្លាយជា Single Mom គ្មានអ្វីគួរឱ្យខ្លាចនោះទេ ប៉ុន្តែអ្វីដែលគួរឱ្យខ្លាច គឺការរស់នៅដោយមានសម្ពាធផ្លូវចិត្ត នឹងគ្មានតម្លៃ។ នាងបញ្ជាក់ថា “ដោយសារ បញ្ហាទើប ធ្វើឱ្យខ្ញុំរឹងមាំមកដល់ថ្ងៃនេះ” ។

ឆ្លងកាត់រឿងរ៉ាវជីវិតលំបាកជាច្រើនទើបតារា ចម្រៀង ពេជ្រ សូលីកា ត្រូវបានមហាជន និងគាំទ្រាចាត់ទុកថា នាងជាស្រ្តីម្នាក់ដែលមានភាពរឹងមាំគ្រប់ជំហាន ទោះបីជា កន្លងមកតារាស្រីរូបនេះ ជួបបញ្ហាប្រឈមមុខជាច្រើនស្ទើររាប់មិនអស់។

ដោយឡែកថ្មីៗនេះ សូលីកា ក៏បានពន្លយពាក្យក្នុងចិត្តមួយប្រយោគពាក់ព័ន្ធនឹងការស្រឡាញ់ដូច្នេះថា “ បើស្រលាញ់នរណាម្នាក់ កុំទាមទារចង់ឱ្យគេធ្វើអី្វដើម្បីយើង បើគេពិតជាស្រលាញ់យើង គេនឹងធ្វើឱ្យយើងដោយមិនបាច់សុំ”៕

អត្ថបទ៖ ចាន់រ៉ា

The post ពេជ្រ សូលីកា ក្លាយជាម្តាយដ៏រឹងមាំ ក្រោយឆ្លងកាត់ការបែកបាក់ appeared first on Kampuchea Thmey Daily.

តើវិស័យដឹកជញ្ជូនប្រឈមនឹងផលវិបាកអ្វីខ្លះ នៅពេលប្រេងបន្តហក់ឡើងថ្លៃ?

Sophal Tuon — Tue, 22 Aug 2023 08:29:49 +0000

វិស័យដឹកជញ្ជូនបាននិងកំពុងប្រឈមបញ្ហាធ្លាក់ចុះចំណូល នៅពេលដែលតម្លៃប្រេងហក់ឡើងថ្លៃជាបន្តបន្ទាប់។

លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវ៉ាក់ផ្គត់ផ្គង់នៅកម្ពុជា មើលឃើញថា បើទោះបីជាបច្ចុប្បន្ននេះ តម្លៃប្រេងឡើងថ្លៃយ៉ាងណា ប៉ុន្តែមិនទាន់ឈានដល់ចំណុចប្រកាសអាសន្ននៅឡើយ។ តែទោះយ៉ាងណា ការឡើងថ្លៃនេះ ត្រូវតែប៉ះពាល់ដល់វិស័យផ្សេងៗ ជាពិសេសវិស័យដឹកជញ្ជូន។

លោកបានបន្តដូច្នេះថា« ជាទូទៅនៅពេលដែលមានការឡើងថ្លៃប្រេង វិស័យដឹកជញ្ជូនត្រូវតែប្រឈមហើយ មានន័យថា ជាធម្មតាគាត់ធ្លាប់ចំណេញច្រើនពីសេវាដឹកជញ្ជូន បែរជាធ្លាក់ចុះចំណូលវិញ ព្រោះការឡើងថ្លៃប្រេង»។ បើតាមលោក ចាន់ដារ៉ា ការឡើងថ្លៃប្រេងនេះ មិនត្រឹមតែប៉ះពាល់ដល់វិស័យដឹកជញ្ជូនទេ វិស័យផ្សេងទៀត ក៏រងផលប៉ះពាល់ផងដែរ ដូចជា នៅតាមរោងចក្រ សហគ្រាសជាដើម។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនឌរាជបណ្ឌិត្យសភាកម្ពុជា បានលើកឡើងថា កត្ដាដែលនាំឱ្យថ្លៃប្រេងកើនឡើង ដោយសាតែការផ្គត់ផ្គង់ប្រេងឆៅលើសកលលោកត្រូវបានកាត់បន្ថយពីបណ្ដាប្រទេស OPEC និងប្រទេសរុស្សី។

លោកបណ្ឌិត គី សេរីវឌ្ឍន៍ បានផ្ដល់ជាយុទ្ធសាស្រ្តទប់ស្កាត់ការឡើងថ្លៃប្រេងនាពេលអនាគតដូច្នេះថា «រដ្ឋាភិបាលគួរពិចារណា លើការសហការជាមួយវិយ័យឯកជន ក្នុងការបង្កើតកន្លែងស្ដុបប្រេងឱ្យធំជាអតិបរមា ដើម្បីទិញប្រេងរក្សាទុក នៅពេលដែលតម្លៃប្រេងធ្លាក់ចុះ ដោយកុំទាន់បញ្ចេញនៅក្នុងទីផ្សារ។ ពេលណាដែលមានវិបត្តិសេដ្ឋកិច្ច ឬវិបត្តិអ្វីផ្សេងផ្ទុះឡើង ពេលនោះយើងអាចបញ្ចេញប្រេង ដើម្បីរក្សាស្ថិរភាពថ្លៃក្នុងរយៈពេលមួយ សម្រាប់តម្លៃប្រេងសាំងទីផ្សារក្នុងនៅស្រុក»។

សូមបញ្ជាក់ថា នៅក្នុងសប្តាហ៍ទី៣ ខែ សីហានេះ ប្រេងម៉ាស៊ូត បន្តរក្សាតម្លៃដដែល ៤៧០០រៀល ក្នុងមួយលីត្រ បន្ទាប់ពីហក់ឡើងខ្លាំងកាលពីសប្តាហ៍មុន។ ប៉ុន្តែតម្លៃប្រេងសាំង បានបន្តឡើង ១០០រៀលបន្ថែមពីតម្លៃដើម ពោលគឺ តម្លៃលក់រាយក្នុងសប្តាហ៍នេះ ៤៦៥០រៀល ក្នុងមួយលីត្រ។ នេះបើតាមប្រកាសរបស់ក្រសួងពាណិជ្ជកម្ម នៅថ្ងៃទី ២១ សីហានេះ។

ក្រសួងពាណិជ្ជកម្ម បានចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែប្រួលថ្លៃប្រេងឥន្ធនៈនៅលើសកលលោក៕

អន្ថបទ៖ ផល ធារិត

The post តើវិស័យដឹកជញ្ជូនប្រឈមនឹងផលវិបាកអ្វីខ្លះ នៅពេលប្រេងបន្តហក់ឡើងថ្លៃ? appeared first on Kampuchea Thmey Daily.

តើការបើកច្រកដឹកទំនិញតាមឡាវទៅចិននឹងចំណេញដល់វិស័យដឹកជញ្ជូនកម្ពុជាបែបណា?

Sophal Tuon — Sat, 29 Jul 2023 00:00:00 +0000

ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា លោក ជា ចាន់ដារ៉ា បានលើកឡើងថា ប្រសិនបើកម្ពុជា អាចសម្របសម្រួលដឹកជញ្ជូនទំនិញ ឬកសិផលឆ្លងកាត់ប្រទេសឡាវតាមផ្លូវគោក ឆ្ពោះទៅចិនជោគជ័យ នឹងធ្វើឱ្យវិស័យដឹកជញ្ជូនកម្ពុជា កាន់តែមានដំណើរការល្អ ដឹកជញ្ជូនបានច្រើន និងលឿន ជាពិសេសធ្វើឱ្យចរន្តសេដ្ឋកិច្ចកាន់តែមានភាពរីចម្រើននៅថ្ងៃខាងមុខ។

លោក ជា ចាន់ដារ៉ា បានបន្តថា កន្លងមកកម្ពុជា ដឹកជញ្ជូនទំនិញ ឬកសិផលផ្សេងៗទៅទីផ្សារចិនតាមកំពង់ផែខេត្តព្រះសីហនុ និងតាមផ្លូវគោកច្រកបាវិត ចូលទៅផែកាត់ឡៃ ប្រទេសវៀតណាម និងទៅតាមប្រទេសប្រទេសថៃជាដើម។

លោកមើលឃើញពីចំណុចវិជ្ជមាននៃគម្រោងបើកច្រកដឹកជញ្ជូនថ្មីនេះថា« ទី១ នឹងជួយបើកច្រកសេដ្ឋកិច្ចរវាងប្រទេសឡាវ និងកម្ពុជា លើវិស័យដឹកជញ្ជូននាំចេញនាំចូលរវាងប្រទេសទាំងពីរ និងទី២ ពាក់ព័ន្ធការដឹកជញ្ជូនលក្ខណៈអន្តរជាតិ តាមផ្លូវគោក នឹងចំណាយពេលវេលាតិចជាងមុន ពោលគឺអាចលឿនជាងដឹកតាមផ្លូវទឹក»។

ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានគូសបញ្ជាក់ទៀតថា ខេត្តមួយចំនួននៃប្រទេសចិន នៅជាប់ព្រំដែនឡាវ គឺពុំមានផ្លូវទឹកនោះទេ ដូច្នេះគឺត្រូវតែដឹកជញ្ជូនតាមផ្លូវគោក ដែលអំណោយផលល្អសម្រាប់កម្ពុជា ដឹកជញ្ជូនទំនិញតាមច្រកនេះ។

បើតាមលោក ជា ចាន់ដារ៉ា ការបើកច្រកដឹកជញ្ជូនស្មើនឹងបើកច្រកសេដ្ឋកិច្ច នឹងមានលំហូរទំនិញទៅវិញទៅមក និងការនាំចេញទំនិញឆ្លងកាត់ពីប្រទេសមួយទៅប្រទេសមួយទៀត ដែលជួយឱ្យមានចរន្តសេដ្ឋកិច្ចរីកចម្រើន។

អ្នកវិនិយោគិនចិន ដែលមានរោងចក្រនៅកម្ពុជា បានស្នើឱ្យក្រសួង សម្របសម្រួលផ្នែកច្បាប់ ដើម្បីងាកមកដឹកជញ្ជូនកសិផល តាមរយៈប្រទេសឡាវ ទៅកាន់ចិនវិញ ដោយសារការដឹកជញ្ជូនតាមរយៈប្រទេសថៃ និងវៀតណាម មានភាពស្មុគស្មាញ និងថ្លៃចំណាយខ្ពស់។

ក្នុងកិច្ចពិភាក្សារវាងអ្នកវិនិយោគិនចិន និងទីប្រឹក្សាសមាគមស្វាយចន្ទីកម្ពុជា នៅថ្ងៃទី២៤ ខែកក្កដា លោក គង់ វិមាន នាយកខុទ្ទកាល័យ និងអ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា កម្ពុជា កំពុងសម្របសម្រួលឱ្យមានការដឹកជញ្ជូនកសិផលដោយឆ្លងកាត់ប្រទេសឡាវ ទៅកាន់ទីផ្សារចិនតាមមធ្យោបាយផ្លូវគោក។ បើតាមលោក គង់ វិមាន ការធ្វើបែបនេះ ដើម្បីបន្ធូរបន្ថយការចំណាយលើថ្លៃដឹកជញ្ជូន និងភាពស្មុគស្មាញ ដែលកម្ពុជាធ្លាប់តែពឹងលើថៃ និងវៀតណាម។ សព្វថ្ងៃនេះ កសិផល ដែលនាំចេញទៅចិនតាមច្រកទាំងពីរនេះភាគច្រើនមានដូចជា ស្វាយ, ទុរេន, ស្វាយចន្ទី, ម្នាស់ និងស្រូវអង្ក ជាដើម។

អ្នកនាំពាក្យក្រសួងសាធារណការ រំពឹងថា ប្រសិនបើដំណើរការផ្លូវពាណិជ្ជកម្មនេះជោគជ័យ ការនាំចេញកសិផលរបស់កម្ពុជាទៅកាន់ទីផ្សារចិន កាន់តែមានភាពងាយស្រួល និងកាត់បន្ថយថ្លៃចំណាយ។

កញ្ញា សឿន សុទ្ធនីតា សហស្ថាបនិកសិប្បកម្មកែច្នៃស្វាយចន្ធីស្ទឹងត្រែង បានលើកឡើងថា ការសម្របសម្រួលឱ្យមានការដឹកជញ្ជូនតាមប្រទេសឡាវទៅកាន់ទីផ្សារចិន គឺជារឿងប្រសើរបំផុត ជាពិសេសសម្រាប់ក្រុមហ៊ុនកញ្ញាដែលមានទីតាំងស្ថិតនៅខេត្តស្ទឹងត្រែងជាប់ព្រំប្រទល់ឡាវស្រាប់។

ដូចគ្នានេះដែរ លោក វណ្ណ ឬទ្ធី នាយកប្រតិបត្តិនាយកដ្ឋាននាំចេញកសិផលនៃក្រុមហ៊ុនអង្គរហ្រ្គីន បានលើកឡើងថា កន្លងមកការនាំចេញទៅចិនត្រូវឆ្លងកាត់ប្រទេសថៃ និងវៀតណាម មានភាពស្មុគស្មាញច្រើន ពិបាកក្នុងដឹកជញ្ជូន។ លោកថា ប្រសិនបើមានការសម្របសម្រួលឱ្យមានការនាំចេញតាមច្រកប្រទេសឡាវ ដោយពុំមានរបាំងសាំញ៉ាំច្រើន ជាឱកាសសម្រាប់នាំចេញទំនិញកសិផលរបស់កម្ពុជា កាន់តែធំបន្ថែមទៀត ទៅទីផ្សារចិន៕

The post តើការបើកច្រកដឹកទំនិញតាមឡាវទៅចិននឹងចំណេញដល់វិស័យដឹកជញ្ជូនកម្ពុជាបែបណា? appeared first on Kampuchea Thmey Daily.