វិស័យឯកជន Archives - Kampuchea Thmey Daily

វិស័យឯកជនសាទរចំពោះការសម្រេចរបស់រដ្ឋាភិបាលអំពីព្យួរពន្ធលើប្រាក់ចំណេញក្នុងវិស័យកសិកម្ម

Din Thary — Fri, 28 Nov 2025 02:24:59 +0000

ពាក់ព័ន្ធទៅនឹងការព្យួរទុកការបង់ពន្ធដែលចេញដោយរាជរដ្ឋាភិបាលកម្ពុជាកាលពីពេលថ្មីៗកន្លងទៅនេះ វិស័យឯកជនបានសាទរចំពោះកម្មវិធីនេះ និងបានមើលឃើញពីសញ្ញាវិជ្ជមានខ្លាំងសម្រាប់សហគ្រាស អ្នកផលិត ក៏ដូចជាអ្នកកែច្នៃនៅក្នុងវិស័យកសិកម្ម ដែលអាចមានឱកាសខ្ពស់នៅក្នុងការប្រកួតប្រជែងលើទីផ្សារនាំចេញទៅបរទេស។

អគ្គលេខាធិការនៃសហព័ន្ធស្រូវអង្ករកម្ពុជា (CRF) លោក លន់ យ៉េង បានគូសបញ្ជាក់ថា ការលើកលែងនេះ គឺពិតជាមានភាពល្អប្រសើរដល់បណ្តាសហគ្រាសប្រកបអាជីវកម្មផលិត និងសម្រាប់ផ្គត់ផ្គង់នៅក្នុងស្រុកនានា។

លោកថា កម្មវិធីនៃការព្យួរទុកពន្ធនេះ មិនមែនជាកម្មវិធីថ្មីនោះទេ ព្រោះរដ្ឋនឹងបន្តលើកលែងការព្យួរពន្ធបន្តទៀត ដោយសារកម្មវិធីលើកលែងកាលពីឆ្នាំចាស់នឹងត្រូវផុតកំណត់ត្រឹមថ្ងៃទី៣១ ខែឆ្នូ ឆ្នាំ២០២៥ ខាងមុខនេះ ដូច្នេះការលើកលែងនេះ គឺជាការបន្ថែមការលើកលែង ២ ឆ្នាំបន្ថែមទៀត។

ទន្ទឹមនេះ លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងដែរថា ការព្យួរពន្ធ និងការលើកលែងពន្ធដែលបានចែងដូចក្នុងប្រកាសរបស់ក្រសួងសេដ្ឋកិច្ច និងហិរញ្ញវត្ថុ គឺជារឿងល្អមួយ ពីព្រោះថាវិស័យកសិកម្មនៅកម្ពុជាការកែច្នៃនៅមានកម្រិតដោយសារថ្លៃដើមនៃផលិតកម្មនៅមានកម្រិតខ្ពស់នៅឡើយ។

«ដូច្នេះប្រសិនបើអាចបន្ធូរបន្ថយពន្ធ ឬព្យួរពន្ធមួយចំនួននៅក្នុងវិស័យនេះ លោកយល់ថា តាមរយៈនេះនឹងអាចផ្តល់នូវការប្រកួតប្រជែងខ្លះនៅលើទីផ្សារអន្តរជាតិ មានន័យថា គឺអាចប៉ះប៉ូវជាមួយនឹងថ្លៃដើមផលិតរបស់យើងដែលកំពុងតែខ្ពស់ខ្លាំង។ ពីព្រោះ យើងបានដឹងហើយថា កម្ពុជាអាចនាំចេញភាគច្រើនជាវត្ថុធាតុដើមទៅក្រៅប្រទេស ដូច្នេះប្រសិនបើរាជរដ្ឋាភិបាលជួយបន្ធូរបន្ថយពន្ធ និងព្យួរពន្ធមួយចំនួននេះ គឺជារឿងមួយដែលវិជ្ជមានខ្លាំងសម្រាប់ការកែច្នៃនៅក្នុងស្រុក»។ លោក អួន ស៊ីឡុត គូសបញ្ជាក់យ៉ាងដូច្នេះ។

លោកប្រធានក៏បានបន្ថែមដែរថា ពេលនេះការកែច្នៃវត្ថុធាតុដើមនៅក្នុងស្រុកដែលបានមកពីផលិតផលកសិកម្ម ឬការកែច្នៃផលិតផលកសិកម្មនៅក្នុងស្រុកនៅមានកម្រិតទាបនៅឡើយ ដូច្នេះលោកសង្ឃឹមថា នៅពេលដែលរាជរដ្ឋាភិបាលផ្តល់ជាការអនុគ្រោះពន្ធ និងការព្យួរពន្ធនឹងលើកទឹកចិត្តជាច្រើនទៅដល់សហគ្រិន និងសហគ្រាសជាច្រើនឱ្យបន្តការកែច្នៃរបស់ខ្លួន។

លោកប្រធានសមាគមក៏បានបញ្ជាក់ដែរថា «អ្វីដែលយើងព្រួយបារម្ភមួយទៀតនោះ គឺទៅលើកម្ចីផ្នែកកសិកម្មពីធនាគារដែលហាក់បីដូចជានៅមានតិចតួចនៅឡើយ និយាយរួមការខ្ចីពីធនាគារពាណិជ្ជ យើងឮតែការអនុគ្រោះ ប៉ុន្តែធាតុពិតគឺសហគ្រាសពិបាកទទួលយកនូវកម្ចីដែលនិយាយថាអនុគ្រោះនេះណាស់»។

ជាមួយគ្នានេះដែរ លោក ម៉ាក់ នី ប្រធានសមាគមសហព័ន្ធម្រេច និងគ្រឿងទេសកម្ពុជា (CPSF) បានឱ្យ«កម្ពុជាថ្មី» ដែរថា ការយោគយល់ពន្ធរបស់រាជរដ្ឋាភិបាលនាពេលនេះ គឺជារឿងមួយដែលត្រឹមត្រូវក្នុងបរិបទនាពេលបច្ចុប្បន្ន ដែលនេះជាដំណឹងល្អសម្រាប់អ្នកផលិត ក៏ដូចជាអ្នកនាំចេញ និងកែច្នៃមានឱកាសខ្ពស់នៅក្នុងការប្រកួតប្រជែង ដើម្បីចាប់យកចំណែកទីផ្សារណាមួយក្នុងការនាំចូលទៅកាន់បណ្តាប្រទេសផ្សេងៗ ក៏ដូចជាលក់នៅក្នុងស្រុកមិនថាតែសម្រាប់វិស័យម្រេចនោះទេ គឺសម្រាប់វិស័យកសិកម្មទាំងមូល។

តាមរយៈការព្យួរពន្ធខាងលើនេះ លោកសង្ឃឹមថា នឹងមានអ្នករកស៊ីផ្សេងៗក្រៅពីវិស័យកសិកម្មនឹងនាំគ្នាចូលមកជួយលើកស្ទួយវិស័យកសិកម្មឱ្យកាន់តែច្រើនជាងមុនបន្ថែមទៀតដើម្បីបង្កើតសហគ្រាស រោងចក្រ ឬសិប្បកម្មកែច្នៃកសិផលកសិកម្មដើម្បីនាំចេញទៅក្រៅប្រទេស ពីព្រោះថានាពេលបច្ចុប្បន្នជាទូទៅកម្ពុជាលក់តែវត្ថុធាតុដើមទៅក្រៅប្រទេស។

លោកក៏រំពឹងទៀតថា មិនត្រឹមតែអ្នកវិនិយោគក្នុងស្រុកទេដែលមើលឃើញពីឱកាសនេះ អ្នកវិនិយោគទុនក្រៅស្រុកផ្សេងទៀតក៏នឹងមើលឃើញឱកាសល្អនេះ ហើយចូលមកបណ្តាក់ទុននៅក្នុងវិស័យកសិកម្មឱ្យកាន់តែច្រើនបន្ថែមទៀត ដើម្បីជួយលើកស្ទួយសេដ្ឋកិច្ចកម្ពុជាឱ្យរឹតតែប្រសើរឡើងទៅថ្ងៃអនាគត។

សូមជម្រាបថា កាលពីថ្ងៃទី២៤ ខែវិច្ឆិកា ឆ្នាំ២០២៥ កន្លងទៅនេះ រដ្ឋាភិបាលបានសម្រេចការព្យួរទុកការបង់ពន្ធលើប្រាក់ចំណូលរបស់សហគ្រាសប្រកបអាជីវកម្មផលិត និងផ្គត់ផ្គង់ក្នុងស្រុក ឬនាំចេញផលិតផលកសិកម្មមួយចំនួន មានដូចជា ស្រូវ អង្ករ ពោត សណ្ដែកម្រេច ដំឡូងមី ស្វាយចន្ទី ជ័រកៅស៊ូ មៀនប៉ៃលិន ស្វាយ ចេក ការចិញ្ចឹមសត្វ វារីវប្បកម្ម និងផលិតផលដូងប្រេងក្នុងស្រុកដែលជាវត្ថុធាតុដើមសម្រាប់ផលិតចំណីសត្វ។ ការប្រកាសព្យូរនេះ មានគោលបំណងដាក់ចេញនូវវិធានការលើកទឹកចិត្តពន្ធដារចំពោះវិស័យកសិកម្ម៕

ដោយ៖ ឌិន ថារី

The post វិស័យឯកជនសាទរចំពោះការសម្រេចរបស់រដ្ឋាភិបាលអំពីព្យួរពន្ធលើប្រាក់ចំណេញក្នុងវិស័យកសិកម្ម appeared first on Kampuchea Thmey Daily.

ឧប. ស៊ុន ចាន់ថុល ជំរុញដល់អង្គភាពរដ្ឋកាត់បន្ថយភាពស្មុគស្មាញដើម្បីជួយដល់វិស័យឯកជន

hun sirivadh — Thu, 27 Nov 2025 07:58:27 +0000

អនុប្រធានទី១ក្រុមប្រឹក្សាអភិវឌ្ឍន៍កម្ពុជាលោកឧបនាយករដ្ឋមន្ត្រី ស៊ុន ចាន់ថុល បានជំរុញដល់អង្គភាពរដ្ឋទាំងអស់កាត់បន្ថយភាពស្មុគស្មាញឱ្យបានខ្ពស់បំផុតដើម្បីឱ្យវិស័យឯកជនរីកចម្រើន បង្កើនភាពរឹងមាំដល់សេដ្ឋកិច្ចជាតិ។ លោកថាគឺជារឿងឈឺចាប់ណាស់ពេលដែលបរទេសមើលងាយលើភាពទន់ខ្សោយកម្ពុជា។

ថ្លែងប្រាប់ក្រុមអ្នកសារព័ត៌មានបន្ទាប់ពីបើកពិធីផ្សព្វផ្សាយរបាយការណ៍ប្រចាំឆមាសទី១នៃការអនុវត្តវិធានការកែទម្រង់មុតស្រួចជាកញ្ចប់ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ នៅសណ្ឋាគារឡឺរ៉ូយ៉ាល់ភ្នំពេញថ្ងៃទី២៧ ខែវិច្ឆិកា ឆ្នាំ២០២៥នេះ ឧបនាយករដ្ឋមន្ត្រី ស៊ុន ចាន់ថុល មានប្រសាសន៍ថា ការបង្កភាពស្មុគស្មាញដល់វិស័យឯកជនគឺជាការរាំងស្ទះដល់ដំណើរការសេដ្ឋកិច្ច ដែលប៉ះពាល់ដល់ការអភិវឌ្ឍន៍ប្រទេសជាតិទាំងមូល។ លោកថាតួនាទីរបស់រដ្ឋាភិបាលមិនមែនគ្រប់គ្រងលើវិស័យឯកជនទេតែជាកិច្ចការដែលត្រូវសម្របសម្រួលធ្វើយ៉ាងណាឱ្យផ្នែកឯកជនសម្រេចតាមគោលដៅរបស់គេ។

លោកឧបនាយករដ្ឋមន្ត្រី៖ «ភាសាអង់គ្លេសគេថា The economy is growing at night when the government is asleep។ បានន័យថាសេដ្ឋកិច្ចជាតិមានការរីកចម្រើននៅពេលយប់ពេលដែលរដ្ឋាភិបាលគេងលក់។ ដោយសារអី? គឺអត់មានរដ្ឋាភិបាលមកធ្វើការរាំងស្ទះ ការរីកចម្រើនវិស័យឯកជន។ អ៊ីចឹងរៀបចំហើយដកខ្លួនថយ ទុកឱ្យវិស័យឯកជននេះដែលគេយល់ច្បាស់ គេចេះដឹងក្នុងការដឹកនាំក្រុមហ៊ុនសហគ្រាសគេហ្នឹងជាងរដ្ឋាភិបាល។ អ៊ីចឹងជួយទៅ! សូមកាត់បន្ថយនីតិវិធី ហើយទុកឱ្យគាត់ធ្វើការខ្លួនឯងទៅ។ កុំទៅត្រួតពិនិត្យគាត់ច្រើនពេក ខាតពេលគាត់ ខាតពេលយើង»។

ទោះជាយ៉ាងណាលោកក៏ជំរុញដល់វិស័យឯកជនឱ្យហ៊ានធ្វើការប្ដេជ្ញាចិត្តចំពោះរដ្ឋាភិបាលថានឹងគោរពតាមច្បាប់កម្ពុជាឱ្យបានជាប់លាប់ផងដែរ។

ប្រធានសភាពាណិជ្ជកម្មកម្ពុជាអ្នកឧកញ៉ា គិត ម៉េង ស្វាគមន៍ការលើកឡើងរបស់លោកឧបនាយករដ្ឋមន្ត្រី និងជំរុញឱ្យរដ្ឋាភិបាលគិតគូរលើស្ថាប័ន២គឺ គយ និងពន្ធដារ ដែលថាប្រសិនជាអាចកាត់បន្ថយភាពស្មុគស្មាញនៃស្ថាប័នទាំងពីរនេះបានច្រើននោះភាពទាក់ទាញអ្នកវិនិយោគកាន់តែច្រើន ជួយឱ្យរដ្ឋាភិបាលសម្រេចបានជោគជ័យនៃចក្ខុវិស័យឆ្នាំ២០៣០ និងឆ្នាំ២០៥០ខាងមុខ។

លោកថា៖ «ខ្ញុំគាំទ្រឯកឧត្ដមឧបនាយករដ្ឋមន្ត្រីដែលថារដ្ឋាភិបាលគឺជានិយតករ មិនមែនជាអ្នកប្រតិបត្តិករទេ។ ផ្នែកឯកជនជាអ្នកប្រតិបត្តិករដើម្បីរកចំណូលជូនរដ្ឋាភិបាល និងប្រជាពលរដ្ឋ »។

ចំពោះការលើកឡើងពីការចង់ឱ្យវិស័យឯកជនសន្យាជាមួយរដ្ឋាភិបាលក្នុងការគោរពច្បាប់កម្ពុជាម៉ឺងម៉ាត់ អ្នកឧកញ៉ាគិត ម៉េង បានបញ្ជាក់និងជំរុញឱ្យក្រុមហ៊ុនឯកជនទាំងអស់ទៅចុះកិច្ចសន្យាជាមួយអង្គភាពប្រឆាំងអំពើពុករលួយតែម្ដងដើម្បីបង្ហាញពីតម្លាភាពរបស់ក្រុមហ៊ុនឯកជនដែលរកស៊ីនៅកម្ពុជា។

គិតត្រឹមឆមាសទី១ ឆ្នាំ២០២៥ ការអនុវត្តវិធានការកែទម្រង់មុតស្រួចជាកញ្ចប់ដែលបានដាក់ចេញវេទិការាជរដ្ឋាភិបាល-ផ្នែកឯកជនលើកទី១៩ កំពុងឈានសម្រេចពេញលេញ១០០% លើបញ្ហាដែលត្រូវបានលើកឡើងពីវិស័យឯកជនដែលមានចំនួន១៩៦ចំណុច (១៦៦ចំណុចត្រូវបានដោះស្រាយ) បន្ថែមលើនេះតាមរយៈលទ្ធផលនៃការស្ទង់មតិពីវិស័យឯកជនកាលពីខែកក្កដា ឆ្នាំ២០២៥ បានបង្ហាញថាអ្នករកស៊ីភាពច្រើនបានពេញចិត្តចំពោះការដាក់ចេញវិធានការកំណែទម្រង់របស់រដ្ឋដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ផងដែរ៕

អត្ថបទដោយ ហ៊ុន សិរីវឌ្ឍន៍

The post ឧប. ស៊ុន ចាន់ថុល ជំរុញដល់អង្គភាពរដ្ឋកាត់បន្ថយភាពស្មុគស្មាញដើម្បីជួយដល់វិស័យឯកជន appeared first on Kampuchea Thmey Daily.

រោងចក្រកែច្នៃដំណាប់ស្វាយពីរគ្រោងនាំចេញផលិតផលរបស់ខ្លួនទៅកាន់ទីផ្សារចិន អាម៉េរិក និងអឺរ៉ុប

Din Thary — Tue, 19 Aug 2025 02:50:03 +0000

ក្រុមហ៊ុន Long Wo Agriculture (Cambodia) Co., Ltd. និងក្រុមហ៊ុន Zhongbao (Cambodia) Food Co., Ltd. កំពុងរៀបចំការនាំចេញនូវផលិតផលកែច្នៃដំណាប់ស្វាយទៅកាន់ទីផ្សារប្រទេសចិន អាម៉េរិក និងអឺរ៉ុបនាពេលដ៏ខ្លីខាងមុខនេះ។

ការលើកឡើងអំពីផែនការនាំចេញរបស់ក្រុមហ៊ុនទាំងពីរខាងលើនេះធ្វើឡើងក្នុងជំនួបជាមួយរដ្ឋមន្ត្រីក្រសួងពាណិជ្ជកម្ម លោកស្រី ចម និម្មល កាលពីថ្ងៃទី១៨ ខែសីហា ឆ្នាំ២០២៥ នៅទីស្តីការក្រសួង ខណៈតំណាងក្រុមហ៊ុនឯកជនទាំងពីរ បានលើកឡើងពីបច្ចុប្បន្នភាពនៃការកែច្នៃ និងការនាំចេញផលិតផលកសិផលកម្ពុជា និងស្នើសុំការគាំទ្របន្ថែមពីក្រសួងពាណិជ្ជកម្មលើគម្រោងរបស់ក្រុមហ៊ុនក្នុងការពង្រីករោងចក្រកែច្នៃ ជាពិសេសការចុះអនុស្សារណៈនៃការយោគយល់គ្នាលើការទិញ-លក់ដំណាប់ស្វាយទៅកាន់ទីផ្សារប្រទេសចិន អាម៉េរិក និងអឺរ៉ុប។

លោកស្រីរដ្ឋមន្ត្រី ចម និម្មល បានស្វាគមន៍ចំពោះគណៈប្រតិភូរបស់ក្រុមហ៊ុនទាំងពីរ ដែលបានចូលជួបពិភាក្សាការងារ និងរាយការណ៍អំពីបច្ចុប្បន្នភាពនៃដំណើរការផលិតកម្ម ការពង្រីករោងចក្រ ការប្រមូលទិញកសិផលផ្លែឈើ ក៏ដូចជាទិសដៅទីផ្សារសក្តានុពលក្នុងនាំចេញផលិតផលកសិផល និងជាពិសេសដំណាប់ស្វាយចូលទៅកាន់ទីផ្សារប្រទេសចិន អាម៉េរិក និងអឺរ៉ុប។

លោកស្រីរដ្ឋមន្ត្រី បានបង្ហាញការគាំទ្រសម្រាប់គម្រោងពង្រីកផលិតកម្មរបស់រោងចក្រកែច្នៃផ្លែឈើ និងផលិតផលកសិផលខាងលើ ដែលនេះជាការចូលរួមចំណែកមួយជាមួយរដ្ឋាភិបាលក្នុងទិសដៅធ្វើពិពិធកម្មទីផ្សារសម្រាប់កសិផលកម្ពុជាទៅកាន់ទីផ្សារអន្តរជាតិ។

លោកស្រីរដ្ឋមន្រ្តី ក៏បានផ្តល់នូវអនុសាសន៍ណែនាំបន្ថែមពាក់ព័ន្ធនឹងទីផ្សារសក្តានុពលផ្សេងទៀត ដែលកម្ពុជាមានកិច្ចព្រមព្រៀងពាណិជ្ជកម្មសេរីជាមួយ ក៏ដូចជាចែករំលែកអំពីគោលនយោបាយពាណិជ្ជកម្ម កិច្ចសម្រួលពាណិជ្ជកម្ម ការលើកទឹកចិត្តនិងយន្តការគាំទ្រផ្សេងទៀត ដែលរាជរដ្ឋាភិបាលបាននិងកំពុងដាក់ចេញ សំដៅលើកកម្ពស់សមត្ថភាពក្នុងការផលិតនិងកែច្នៃ និងភាពប្រកួតប្រជែងរបស់វិស័យឯកជនកម្ពុជា។

ក្នុងឱកាសនោះ លោកស្រីរដ្ឋមន្រ្តី ក៏បានគូសបញ្ជាក់អំពីសារៈសំខាន់នៃកិច្ចសហប្រតិបត្តិការរវាងវិស័យឯកជន និងរាជរដ្ឋាភិបាលកម្ពុជា ដើម្បីពង្រឹងសមត្ថភាពអ្នកផលិត អ្នកកែច្នៃ និងអ្នកនាំចេញ សំដៅជំរុញការនាំចេញ បង្កើនចំណែកទីផ្សារ និងកិត្យានុភាពរបស់កម្ពុជាលើទីផ្សារអន្តរជាតិ៕

The post រោងចក្រកែច្នៃដំណាប់ស្វាយពីរគ្រោងនាំចេញផលិតផលរបស់ខ្លួនទៅកាន់ទីផ្សារចិន អាម៉េរិក និងអឺរ៉ុប appeared first on Kampuchea Thmey Daily.

សភាពាណិជ្ជកម្មកម្ពុជាបន្តចាប់ដៃជាមួយរដ្ឋាភិបាល ដើម្បីលើកកម្ពស់ធុរកិច្ច ទោះបីជាអាមេរិកតំឡើងពន្ធ

May Kunmakara — Mon, 07 Apr 2025 02:32:45 +0000

ឆ្លើយតបទៅនឹងការប្រកាសដំឡើងពន្ធ ៤៩% សម្រាប់ទំនិញនាំចូលពីកម្ពុជាដោយសហរដ្ឋអាំមេរិកលើមុខទំនិញនាំចូលពីកម្ពុជាបានបង្ករក្តីបារម្ភដល់វិស័យឯកជន ជាពិសេសអ្នកនាំចេញ សភាពាណិជ្ជកម្មកម្ពុជា (CCC) នឹងបន្តអនុវត្តយន្តការវេទិការាជរដ្ឋាភិបាល-ផ្នែកឯកជន ដើម្បីផ្តល់ទំនុកចិត្ត ស្វែងរកដំណោះស្រាយ ដល់វិស័យឯកជនក្នុងកាលៈទេសៈចំពោះមុខនេះ ។

កាលពីថ្ងៃទី៣ ខែមេ សា ឆ្នាំ២០២៥ ថ្មីៗនេះ ប្រធានាធិបតីសហរដ្ឋអាមេរិក “បានប្រកាសដំឡើងពន្ធ ៤៩% សម្រាប់ទំនិញ ផលិតផលនាំចូលពីកម្ពុជា ក៏ដូចគ្នានឹងបណ្តាប្រទេសក្នុងតំបន់អាស៊ាន និងប្រទេសជាច្រើនលើសកល លោក បានកំពុងរងការដំឡើងពន្ធលើផលិតផលនាំចូលទៅសហរដ្ឋអាមេរិក ហើយការអនុវត្តនឹងចូលជា ធរមាននៅថ្ងៃទី០៩ ខែមេសា ឆ្នាំ២០២៥។

យោងតាមសេចក្តីជូនដំណឹងរបស់ CCC កាលពីពេលថ្មីៗនេះ វិធានការរបស់រដ្ឋបាល លោក ដូណាល់ ត្រាំ ប្រធានាធិបតីសហរដ្ឋអាមេរិក បានកំពុងបង្កឱ្យមានការបារម្ភពី វិស័យឯកជន យើងទូទាំងប្រទេស ដែលនឹងទទួលរងផលប៉ះពាល់ក្នុងសកម្មភាព ធុរកិច្ច និងវិនិយោគ របស់ខ្លួននៅកម្ពុជា។

«សភាពាណិជ្ជកម្មកម្ពុជា សូមអំពាវនាវដល់អ្នកវិនិយោគ ក៏ដូចនិយោជិក និងនិយោជក ទាំងអស់ សូមកុំបារម្ភ ព្រោះស្ថានភាព នាំចេញនៅតែមានស្ថេរភាពដដែល ដោយសារប្រទេសកម្ពុជាមានចុះកិច្ចព្រមព្រៀងពាណិជ្ជកម្មសេរី (FTA) ជាមួយបណ្តាប្រទេសជាច្រើនទៀត។ យើងសូមអំពាវនាវ អ្នកវិនិយោគទាំងអស់បន្តរផ្តល់ទំនុក ចិត្តលើរាជរដ្ឋាភិបាលកម្ពុជាក្រោមការដឹកនាំប្រកបដោយចក្ខុវិស័យដ៏វែងឆ្ងាយរបស់ សម្តេចធិបតី នាយករដ្ឋមន្ត្រី ក្នុងការដោះស្រាយបញ្ហាប្រឈមជាមួយគ្នា»។ នេះបើយោងតាម CCC។

ជាមួយគ្នានេះដែរ CCC ថា កម្ពុជានៅក្នុងនាមជាសមាជិក WTO ក៏ដូចគ្នាទៅនឹងសហរដ្ឋអាមេរិក និងប្រទេស១៦៦ផ្សេងទៀត ដែរ សុទ្ធតែជាសមាជិក WTO កម្ពុជាមានការកំណត់នូវបន្ទាត់ពន្ធគយជាមួយគ្នាជារួម ក្នុងនោះ កម្ពុជាបានកំណត់ នៅក្នុងកាតព្វកិច្ចរបស់ខ្លួន គឺការយកពន្ធនៃផលិតផលនាំចូល គឺមានចន្លោះពី ០ រហូតដល់អស់កម្ពស់គឺ ៣៥%។

«សភាពាណិជ្ជកម្មកម្ពុជា សហការួមជាមួយរាជរដ្ឋាភិបាល នឹងនៅតែបន្តលើកទឹកចិត្តនឹងផ្តល់ការ គាំទ្រ ស្វែងរកដំណោះស្រាយ ជូនដល់វិស័យឯកជនទូទាំងប្រទេស បានកំពុងជួបប្រទះបញ្ហា ប្រឈម ក្នុងសកម្មភាពធុរកិច្ច អាជីវកម្ម និងវិនិយោគ មិនថានៅក្នុង ឬ ក្រៅប្រទេសកម្ពុជា»។ នេះបើតាមការថ្លែងរបស់ CCC។

កាលពីថ្ងៃទី៤ ខែមេសា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងតាមរយៈលិខិតស្នើសុំការចរចារជាមួយលោកដូណាល់ត្រាំ ជុំវិញការដាក់ពន្ធមកលើទំនិញកម្ពុជាថា កម្ពុជានឹងកាត់បន្ថយការយកពន្ធលើទំនិញនាំចូលរបស់អាមេរិកចំនួន ១៩ ប្រភេទពី ៣៥% មក ៥%។

សម្ដេចធិបតីបានលើកឡើងនៅក្នុងលិខិតស្នើសុំចរចារជាមួយអាមេរិកជុំវិញការអនុវត្តពន្ធ ៤៩% លើទំនិញនាំចេញពីកម្ពុជាទៅអាមេរិកនៅថ្ងៃទី ០៤ ខែមេសា ឆ្នាំ ២០២៥។

តាមរយៈលិខិតផ្លូវការរបស់សម្ដេចធិបតី លើកឡើងថា ជាការឆ្លើយតបនឹងការប្រកាសរបស់លោក ដូណាល់ ត្រាំ នៅថ្ងៃទី ០២ ខែមេសា ឆ្នាំ ២០២៥ អនុវត្តពន្ធ ៤៩% លើទំនិញកម្ពុជាចាប់ពីថ្ងៃទី ០៩ ខែមេសា ឆ្នាំ ២០២៥ កម្ពុជាស្នើសុំចរចារជាមួយរដ្ឋបាលរបស់លោក ត្រាំ ភ្លាមៗ និងស្នើឱ្យរដ្ឋបាលរដ្ឋរបស់លោកត្រាំ ពន្យាការអនុវត្តពន្ធនាំចូលថ្មីនេះ។

សម្ដេច ហ៊ុន ម៉ាណែត មានប្រសាសន៍ថា៖«ខ្ញុំសូមជម្រាបជូនឯកឧត្តមផងដែរថា អត្រាពន្ធនាំចូលខ្ពស់បំផុតដែលកម្ពុជាកំពុងអនុវត្តជាទូទៅមានត្រឹមតែ ៣៥% ប៉ុណ្ណោះ។ ក្នុងគោលបំណងបង្ហាញនូវសុឆន្ទៈ និងក្នុងស្មារតីនៃការពង្រឹងទំនាក់ទំនងពាណិជ្ជកម្មទ្វេភាគីរបស់យើង, កម្ពុជាប្តេជ្ញាចិត្តខ្ពស់ ក្នុងការជំរុញការ-នាំចូលទំនិញពីសហរដ្ឋអាមេរិក ជាមួយនឹងការបន្ថយភ្លាមៗនូវអត្រាពន្ធនាំចូលទំនិញ ១៩ ប្រភេទ ពីអត្រាអតិបរមា ៣៥% មកត្រឹមអត្រា ៥%»។

យោងតាមក្រសួងពាណិជ្ជកម្ម មុខទំនិញភាគច្រើនជាប្រភេទ សាច់ បន្លែ ផ្លែឈើ ភេសជ្ជៈ និងម៉ូតូ រថយន្ត៕

The post សភាពាណិជ្ជកម្មកម្ពុជាបន្តចាប់ដៃជាមួយរដ្ឋាភិបាល ដើម្បីលើកកម្ពស់ធុរកិច្ច ទោះបីជាអាមេរិកតំឡើងពន្ធ appeared first on Kampuchea Thmey Daily.

សម្តេចធិបតី ជំរុញឱ្យវិស័យឯកជន សហការគ្នាជាកម្លាំងជាតិត្រៀមខ្លួនប្រកួតប្រជែង

Samean Lay — Fri, 14 Mar 2025 10:31:37 +0000

នាពិធី បិទសន្និបាតបូកសរុបលទ្ធផលការងារ ឆ្នាំ២០២៤ និងលើកទិសដៅការងារ ឆ្នាំ២០២៥ របស់សមាគមឧកញ៉ាកម្ពុជា ថ្ងៃទី ១៤ ខែមីនានេះ ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត បានថ្លែងថា វិស័យឯកជនគឺជាដៃគូសំខាន់របស់រដ្ឋ មិនអាចខ្វះបាន ក្នុងការជួយអភិវឌ្ឍប្រទេសជាតិ និងប្រកួតប្រជែងជាមួយអន្តរជាតិ។

នៅចំពោះមុខអ្នកវិនិយោគ និងមន្រ្តីរាជការ សម្តេចធិបតី បានជំរុញឱ្យគ្រប់វិស័យទាំងអស់ ស្ថាប័នរដ្ន និងឯកជនគួរធ្វើទំនាក់ទំនងប្រាស្រ័យទាក់ទងគ្នា ហើយរាជរដ្ឋាភិបាលចាំជួយជានិច្ច។ ក្នុងន័យនេះ សម្តេចលើកទឹកចិត្តដល់វិស័យឯកជន និងស្ថាប័នរដ្ឋ នៅពេលមានគំនិតផ្តួចផ្តើម ឬចង់អភិវឌ្ឍគម្រោងអ្វីមួយអាចពិភាក្សាគ្នា។
សម្តេចថ្លែងថា៖«រដ្ឋាភិបាល ជួនកាលគិតអត់គ្រប់អស់ទេ អ្វីដែលយើងបានផ្តល់បានគឺផ្តល់ អ្វីដែលយើងមិនអាចផ្តល់បានយើងនឹងប្រាប់ ហើយរកវិធីជួយ។ប៉ុន្តែទោះជាយ៉ាងណា ខ្ញុំចង់ឱ្យវិស័យឯកជន និងរដ្ឋ គឺជាដៃគូ ជួយគិត ជួយធ្វើ ហើយជួយទទួលខុសត្រូវ »។

«នេះហើយគឺជាអ្វីដែលខ្ញុំតែងតែនិយាយតាំងពីខ្ញុំមុនឡើងធ្វើជានាយករដ្ឋមន្រ្តី ហើយខ្ញុំនិយាយគ្រប់វេទិកាទាំងអស់ គឺខ្ញុំចង់ឱ្យដៃគូឯកជនជាអ្នកជួយគិត ជួយធ្វើជួយទទួលខុសត្រូវជាកម្លាំងជាតិរបស់យើងដើម្បីរួមគ្នា បង្កើនភាពទាក់ទាញ និងប្រកួតប្រជែងរបស់យើង»។ នេះជាការបញ្ជាក់បន្ថែមរបស់សម្តេចធិបតី។

បើតាមសម្តេចធិបតី បើយើងមិនរួបរួមគ្នាទេ គឺប្រកួតប្រជែងមិនឈ្នះអន្តរជាតិនោះទេ ព្រោះយើងជាប្រទេសតូច និងមានប្រជាជនតិច។ សម្តេចធិបតី បានគូសបញ្ជាក់ថា៖«វិស័យឯកជនដើរតួនាទីសំខាន់ជាចលកររបស់សេដ្ឋកិច្ចជាតិ និងជាដៃគូរបស់រាជរដ្ឋាភិបាលក្នុងការជំរុញការអភិវឌ្ឍសេដ្ឋកិច្ចដោយចីរភាព ដើម្បីលើកកម្ពស់ជីវភាពរបស់នៅប្រទេសជាតិរបស់យើង»៕

The post សម្តេចធិបតី ជំរុញឱ្យវិស័យឯកជន សហការគ្នាជាកម្លាំងជាតិត្រៀមខ្លួនប្រកួតប្រជែង appeared first on Kampuchea Thmey Daily.

បញ្ហាប្រឈមផ្នែកពន្ធដារធំៗចំនួន៥ដែលវិស័យឯកជនក្រុម«ឃ» នឹងដាក់ស្នើទៅរដ្ឋាភិបាល

May Kunmakara — Thu, 13 Mar 2025 07:38:51 +0000

វិស័យឯកជនក្រុម “ឃ” ផ្នែកនីតិកម្ម ពន្ធដារ និងអភិបាលកិច្ច” នៃវេទិការាជរដ្ឋាភិបាល-ផ្នែកឯកជន(D-GPSF) បានលើកអំពីបញ្ហាបញ្ហាប្រឈមធំៗចំនួន៥ដែលរបស់ផ្នែកនេះនឹងដាក់សំណើសុំអន្តរាគមន៍ពីរដ្ឋាភិបាលសំដៅធ្វើយ៉ាងឱ្យបរិយាកាសធុរកិច្ចនៅកម្ពុជាកាន់តែល្អប្រសើរ។

សម្រាប់បញ្ហាប្រឈមទាំង៥ដែលត្រូវបានលើកឡើងដោយវិស័យឯកជនក្រុម “ឃ” “ធ្វើឡើងនៅព្រឹកថ្ងៃព្រហស្បតិ៍ ទី១៣ ខែមីនានេះ នៅអគ្គនាយកដ្ឋានសភាពាណិជ្ជកម្មកម្ពុជា។ បញ្ហាដែលផ្នែកជនលើកឡើងនេះរួមមាន ពន្ធលើផ្ទាំងផ្សព្វផ្សាយ; អាករលើតម្លៃបន្ថែម; ការទទួលស្គាល់អំពីពន្ធលើប្រាក់ចំណូល;បុព្វលាបង្គរ (ឬបៀរវត្សនិងបន្ទុកប្រហាក់ប្រហែល); និង ការចេញលិខិតទារបំណុល រួមនិងបញ្ហាប្រឈមមួយចំនួនផ្សេងទៀតផងដែរ។

បើយោងទៅតាមសភាពាណិជ្ជកម្មកម្ពុជា កិច្ចប្រជុំនេះក៏មានការចូលរួមពីសំណាក់ លោក ងួន ម៉េងតិច អគ្គនាយកសភាពាណិជ្ជកម្មកម្ពុជា និងជាសមាជិកនៃក្រុមការងារចំពោះកិច្ចផ្នែកឯកជន, តំណាងសភាពាណិជ្ជកម្មសហរដ្ឋអាមេរិក, តំណាងសមាគមវិនិយោគិនកម្ពុជា, តំណាងសមាគមយានយន្តថ្មីនៅកម្ពុជា និងសមាជិក សមាជិកានៃក្រុមការងារ “ឃ” ផ្នែកឯកជនជាច្រើនទៀតផងដែរ។

«កិច្ចប្រជុំនេះមានគោលបំណងដើម្បីបន្តពិគ្រោះ ពិនិត្យ ពិភាក្សា នូវបញ្ហាប្រឈមដែលមានស្រាប់ និងជាកង្វល់របស់ផ្នែកឯកជន និងបន្តលើកឡើងនូវបញ្ហាប្រឈមថ្មីបន្ថែមទៀត ពាក់ព័ន្ធនឹងវិស័យនីតិកម្ម ពន្ធដារ និងអភិបាលកិច្ច ដើម្បីដាក់ស្នើសុំដំណោះស្រាយពីសំណាក់ដៃគូ គឺក្រសួងសេដ្ឋកិច្ច និងហិរញ្ញវត្ថុ នាពេលឆាប់ៗខាងមុខនេះ»។ នេះបើយោងតាមសភាពាណិជ្ជកម្មកម្ពុជា៕

The post បញ្ហាប្រឈមផ្នែកពន្ធដារធំៗចំនួន៥ដែលវិស័យឯកជនក្រុម«ឃ» នឹងដាក់ស្នើទៅរដ្ឋាភិបាល appeared first on Kampuchea Thmey Daily.

ក្រុមហ៊ុនមួយរបស់អេមីរាត់អារ៉ាប់រួម ចង់វិនិយោគនៅកម្ពុជាលើវិស័យដឹកជញ្ជូន

Thoeun Vansong — Wed, 20 Nov 2024 05:09:00 +0000

នាព្រឹកថ្ងៃទី២០ ខែវិច្ឆិកា ឆ្នាំ២០២៤ ក្នុងឱកាសចូលជួបសម្ដែងការគួរសម និងពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅវិមានរដ្ឋសភា ប្រធានក្រុមហ៊ុន DP World របស់អេមីរាត់អារ៉ាប់រួម បានបង្ហាញចំណាប់អារម្មណ៍វិនិយោគនៅក្នុងប្រទេសកម្ពុជា។

នៅក្នុងជំនួប លោក Sultan Ahmed Bin Sulayem ប្រធានក្រុមហ៊ុន DP World បានជម្រាបជូនសម្ដេចធិបតី ថា ក្រុមហ៊ុន DP World គឺជាក្រុមហ៊ុនរបស់ប្រទេសអេមីរាត់អារ៉ាប់រួម ដែលមានជំនាញក្នុងវិស័យកំពង់ផែ ឡូជីស្ទីក និងបច្ចេកវិទ្យាខាងខ្សែច្រវាក់ផ្គត់ផ្គង់ និងមានប្រតិបត្តិការអាជីវកម្មនៅក្នុងតំបន់អាស៊ាន និងតាមបណ្ដាប្រទេសជាច្រើនក្នុងពិភពលោក។

លោក ថា ដោយប្រទេសកម្ពុជា មានទីតាំងភូមិសាស្ត្រអំណោយផលដ៏ល្អប្រសើរ នៅក្នុងតំបន់អាស៊ាន ក្រុមហ៊ុន DP World មានចំណាប់អារម្មណ៍ក្នុងការស្វែងរកឱកាសវិនិយោគនៅកម្ពុជាលើវិស័យសំខាន់ៗ រួមមាន៖ វិស័យដឹកជញ្ជូន វិស័យឡូជីស្ទីក និងការអភិវឌ្ឍសួនឧស្សាហកម្ម។

ជាការឆ្លើយតប សម្ដេចធិបតី បានសម្ដែងការស្វាគមន៍ចំពោះចំណាប់អារម្មណ៍របស់ក្រុមហ៊ុន ក្នុងការស្វែងរកកាលានុវត្តភាពវិនិយោគនៅកម្ពុជា។ សម្ដេចធិបតី ហ៊ុន ម៉ាណែត បានគូសបញ្ជាក់អំពីគោលនយោបាយ និងយន្តការនានារបស់រាជរដ្ឋាភិបាល ដែលគាំទ្រដល់ការវិនិយោគ និងបានសង្កត់ធ្ងន់ថា កម្ពុជាមានការតភ្ជាប់ជាមួយនឹងទីផ្សារក្នុងតំបន់ និងពិភពលោក តាមរយៈកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីជាច្រើន ដែលក្នុងនោះ កម្ពុជា និងអេមីរ៉ាតអារ៉ាប់រួម ក៏បានចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយផងដែរ។

សម្ដេចធិបតី បានលើកទឹកចិត្តឱ្យក្រុមហ៊ុនពិចារណាក្នុងការវិនិយោគលើវិស័យឡូជីស្ទីក ក៏ដូចជាការអភិវឌ្ឍសួនឧស្សាហកម្ម ដែលជាវិស័យសក្តានុពល និងបានលើកទឹកចិត្តឱ្យក្រុមហ៊ុនបន្តពិភាក្សាជាមួយក្រសួង-ស្ថាប័នពាក់ព័ន្ធរបស់កម្ពុជា៕

The post ក្រុមហ៊ុនមួយរបស់អេមីរាត់អារ៉ាប់រួម ចង់វិនិយោគនៅកម្ពុជាលើវិស័យដឹកជញ្ជូន appeared first on Kampuchea Thmey Daily.

វិស័យឯកជនកម្ពុជា-សិង្ហបុរី ចុះអនុស្សរណៈយោគយល់គ្នាលើឯកសារចំនួន៣

Thoeun Vansong — Wed, 19 Jun 2024 04:16:50 +0000

ក្នុងវេទិកាធុរកិច្ចកម្ពុជា-សិង្ហបុរី នាព្រឹកថ្ងៃទី១៩ ខែមិថុនា ឆ្នាំ២០២៤នេះ វិស័យឯកជនរបស់កម្ពុជា និងសិង្ហបុរី បានសម្រេចចុះអនុស្សរណៈយោគយល់គ្នាលើឯកសារសំខាន់ៗចំនួន៣។

ឯកសារដែលត្រូវបានចុះហត្ថលេខាពេលនេះ រួមមាន៖ ១) អនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជា និងសហព័ន្ធធុរកិច្ចសិង្ហបុរី។ ២) ការចុះហត្ថលេខាសាក្សីភាពស្តីពីការចាប់ផ្តើមគម្រោងច្រករបៀងតម្លាភាពហិរញ្ញវត្ថុ រវាងគ្រឹះស្ថានធនាគារ និងហិរញ្ញវត្ថុកម្ពុជា និងគ្រឹះស្ថានហិរញ្ញវត្ថុសិង្ហបុរី។ និង៣) អនុស្សរណៈនៃការយោគយល់គ្នា រវាងវិទ្យាស្ថានបណ្តុះបណ្តាលខ្សែច្រវាក់ផ្គត់ផ្គង់ និងភស្តុភារកម្មសិង្ហបុរី និងក្រុមហ៊ុន PPLC Superport & Industrial Co., Ltd. របស់កម្ពុជា។

ពិធីចុះហត្ថលេខាអនុស្សរណៈយោគយល់គ្នារវាងវិស័យឯកជនកម្ពុជា-សិង្ហបុរី បានរៀបចំឡើងក្នុងវេទិកាធុរកិច្ចកម្ពុជា-សិង្ហបុរី ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងឱកាសអញ្ជើញថ្លែងសុន្ទរកថាគន្លឹះពីវេទិកាធុរកិច្ចកម្ពុជា-សិង្ហបុរី នាព្រឹកថ្ងៃទី១៩ ខែមិថុនា។ វេទិកាធុរកិច្ចនេះមានវិនិយោគិនចូលរួមចំនួន៤៨១នាក់ មកពីបណ្តាក្រុមហ៊ុនចំនួន ៣៤៨ក្រុមហ៊ុន។

សម្ដេចធិបតី ហ៊ុន ម៉ាណែត ចាត់ទុកវេទិកាធុរកិច្ចកម្ពុជា-សិង្ហបុរី បានដើរតួនាទីដ៏សំខាន់ក្នុងការទំនាក់ទំនងសហគមន៍ ធុរកិច្ចរបស់កម្ពុជា និងសិង្ហបុរីឱ្យកាន់តែស៊ីជម្រៅ និងបង្កើតកាលានុវត្តភាព ដែលផ្ដល់ប្រយោជន៍ ឱ្យគ្នាទៅវិញទៅមក។ កម្ពុជា និងសិង្ហបុរី អាចរួមគ្នាជំរុញនវានុវត្តន៍ កសាងទំនាក់ទំនងសេដ្ឋកិច្ចរឹងមាំ និងបង្កើតអនាគតប្រកបដោយវិបុលភាពថែមទៀតសម្រាប់ប្រជាជាតិទាំងពីរ៕

The post វិស័យឯកជនកម្ពុជា-សិង្ហបុរី ចុះអនុស្សរណៈយោគយល់គ្នាលើឯកសារចំនួន៣ appeared first on Kampuchea Thmey Daily.