សង្កាត់ស្ទឹងមានជ័យ Archives - Kampuchea Thmey Daily

អាជ្ញាធរសង្កាត់ស្ទឹងមានជ័យ ២ ចុះរៀបចំសណ្ដាប់ធ្នាប់ចំណុចសំខាន់ៗ មួយចំនួន សម្រួលការកកស្ទះ

អ៊ិន ពិសី — Wed, 02 Jul 2025 01:52:57 +0000

អាជ្ញាធរខណ្ឌស្ទឹងមានជ័យ ២ ដឹកនាំកម្លាំងគណៈបញ្ជាការឯកភាពសង្កាត់ ចុះរៀបចំសណ្ដាប់ធ្នាប់នៅចំណុចសំខាន់ៗ មួយចំនួន ក្នុងមូលដ្ឋាន ដើម្បីកាត់បន្ថយការកកស្ទះលើដងផ្លូវ។

ក្រោមការចង្អុលបង្ហាញរបស់ លោកចៅសង្កាត់ស្ទឹងមានជ័យទី ២ បានចាត់ឲ្យគណៈកម្មការសណ្ដាប់ធ្នាប់សង្កាត់ សហការជាមួយកម្លាំងប៉ុស្តិ៍រដ្ឋបាល ប្រជាការពារសង្កាត់ និងកម្លាំងភូមិ ចុះធ្វើសណ្ដាប់ធ្នាប់នៅផ្សារក្រមួនភូមិឫស្សី និងធ្វើការណែនាំដល់អាជីវករលក់ដូរតាមដងផ្លូវផងដែរ។

លោក ទូច សំអុល ចៅសង្កាត់ស្ទឹងមានជ័យទី ២ បានប្រាប់កម្ពុជាថ្មីថា ចំណុចទីតាំងសំខាន់ៗ ក្នុងមូលដ្ឋានសង្កាត់ស្ទឹងមានជ័យទី ២ ដែលតែងតែមានការកកស្ទះចរាចរណ៍ដោយសារការដាក់តាំងលក់ម្ហូបអាហារគ្មានសណ្ដាប់ធ្នាប់ ដោយក្រុមអាជីវករខ្លះបានលក់លើផ្លូវសាធារណៈ ជាហេតុនាំឲ្យមានការកកស្ទះ លំហូរចរាចរណ៍យឺត ពិបាកក្នុងការធ្វើដំណើរ។

លោកបានបញ្ជាក់បន្ថែមថា ចំណុចដែលកម្លាំងគណៈបញ្ជាការឯកភាពសង្កាត់ចុះរៀបចំមានចំនួន ២ ទីតាំង ដោយទីតាំងទី ១.ផ្សារក្រមួនភូមិឫស្សី នៅលើកំណាត់ផ្លូវលេខ ២១៧ ជិតស្រុកស្ពានដែកចំការដូង តែងតែមានក្រុមអ្នកលក់ម្ហូបខ្លះបានយកចំណីផ្លូវសាធារណៈធ្វើអាជីវកម្ម និងទីតាំងទី ២. កំណាត់ផ្លូវលេខ ២៧១ ត្រង់ចំណុចមុខពេទ្យរុស្សីដែលមានក្រុមអាជីវករលក់ម្ហូបអាហារ បានយកផ្លូវសាធារណៈដាក់តាំងលក់ ធ្វើឲ្យលំហូរចរាចរណ៍កកស្ទះផងដែរ និងអាជ្ញាធរបានធ្វើការណែនាំអាជីវករលក់ដូរតាមចិញ្ចើមផ្លូវឲ្យគាត់ដាក់តាំងសម្ភារៈស្លាកឲ្យមានរបៀបរៀបរយ។

ជាមួយគ្នានេះ អាជ្ញាធរ ក៏បានសំណូមពរដល់អាជីវករទាំងអស់ សូមមេត្តាដាក់តាំងលក់ម្ហូបអាហារ របស់របរផ្សេងៗ ឲ្យមានសណ្ដាប់ធ្នាប់ ជៀសវាងតាំងលក់លើចំណីផ្លូវសាធារណៈ គ្មានសណ្ដាប់ធ្នាប់ និងចូលរួមថែរក្សាបរិស្ថាន អនាម័យ វេចខ្ចប់សំរាមឲ្យបានត្រឹមត្រូវ៕

អត្ថបទ ៖ ម៉េង

The post អាជ្ញាធរសង្កាត់ស្ទឹងមានជ័យ ២ ចុះរៀបចំសណ្ដាប់ធ្នាប់ចំណុចសំខាន់ៗ មួយចំនួន សម្រួលការកកស្ទះ appeared first on Kampuchea Thmey Daily.

១សប្ដាហ៍ នគរបាលសង្កាត់ស្ទឹងមានជ័យទី១ ឃាត់ម៉ូតូជិះបញ្ច្រាសជាង៥០គ្រឿង និងកង់បីឥណ្ឌា២គ្រឿង

Ngoeul Narath — Fri, 14 Feb 2025 04:25:29 +0000

កម្លាំងប៉ុស្ដិ៍នគរបាលរដ្ឋបាលស្ទឹងមានជ័យទី១ ឃាត់ម៉ូតូជាង៥០គ្រឿង និងកង់បីឥណ្ឌា២គ្រឿង ដែលជិះបញ្ជា្រាស រាប់ចាប់ពីថ្ងៃទី០៦ មកដល់ថ្ងៃទី១៤ ខែកុម្ភៈ ឆ្នាំ២០២៥ នេះ បញ្រ្ចាសទិសនៅលេីកំណាត់ផ្លូវ ២១៧ សង្កាត់ស្ទឹងមានជ័យទី១។

ទំព័រហ្វេសប៊ុកសាលាសង្កាត់ស្ទឹងមានជ័យ សរសេរអំពីលទ្ធផល នៃការឃាត់ទុកម៉ូតូដែលបើកបរបញ្ច្រាសទិសក្នុងន័យដើមដូច្នេះ៖« អនុវត្តន៍ចាប់បញ្រ្ចាសតាំងពីថ្ងៃទី៦.២.២០២៥ មកដល់ថ្ងៃទី១៤.២.២០២៥ ឃាត់ម៉ូតូមករក្សាទុកនៅប៉ុស្ដិ៍សរុប:+ម៉ូតូ៥៤គ្រឿង +កង់បីផាសអាប់០២គ្រឿង»។

សាលាសង្កាត់ស្ទឹងមានជ័យទី១ ឱ្យដឹងចំពោះយានយន្តដែលឃាត់ទុក គឺសមត្ថកិច្ច ឃាត់រក្សាទុកនៅប៉ុស្តិ៍នគរបាលរដ្ឋបាលស្ទឹងមានជ័យត្រឹមតែរយៈពេល០១ថ្ងៃប៉ុណ្ណោះ ដេីម្បីធ្វើការអប់រំណែនាំ និងធ្វើកិច្ចសន្យា រួចប្រគល់ជូនម្ចាស់យានយន្តវិញ ដោយពុំមានការផាកពិន័យឡេីយ ។

សាលាសង្កាត់ ក៏បានឱ្យដឹងថា នៅថ្ងៃទី១៤ខែកុម្ភៈ ឆ្នាំ២០២៥ នេះ កម្លាំងប៉ុស្ដិ៍នគរបាលរដ្ឋបាលស្ទឹងមានជ័យទី១ សហការជាមួយកម្លាំង គណ:បញ្ជាការឯកភាពខណ្ឌមានជ័យ និង សង្កាត់ស្ទឹងមានជ័យទី១ ដឹកនាំដោយ លោក ជា សារ៉េត ចៅសង្កាត់ស្ទឹងមានជ័យទី១ បានធ្វេីការអនុវត្តន៍ ច្បាប់ចរាចរណ៍ចំពោះអ្នកជិះបញ្រ្ចាសទិស នៅលេីកំណាត់ផ្លូវ ២១៧ សង្កាត់ស្ទឹងមានជ័យទី១ ដោយឃាត់បានម៉ូតូជិះបញ្ជ្រាសម៉ូតូចំនួន០៥គ្រឿង យកមករក្សាទុកនៅប៉ុស្ដិ៍នគរបាលរដ្ឋបាលស្ទឹងមានជ័យទី១ រង់ចាំចំណាត់ការជំនាញបន្ដ ។

ជាការកត់សម្គាល់ ចាប់តាំងពីសមត្ថកិច្ចសង្កាត់ស្ទឹងមានជ័យទី១ ចាប់ផ្ដើមឃាត់ទុកម៉ូតូដែលជិះបញ្ច្រាស និងជិះបញ្ចា្រសតាមរថយន្តសឺរ៉ែនរបស់អគ្គនាយកដ្ឋានពន្ធនាគារ អ្នកប្រើប្រាស់បណ្ដាញសង្គម បានសាទរ និងគាំទ្រចំពោះវិធានការមួយនេះ និងស្នើឱ្យអនុវត្តន៍ឱ្យបានជាប់ជាប្រចាំ និងត្រូវតែដាក់ពិន័យឱ្យបានតឹងតែងចំពោះម្ចាស់យានយន្តដែលជិះបញ្ច្រាស៕

ដោយ៖ ង៉ិល ណារ៉ាត់

The post ១សប្ដាហ៍ នគរបាលសង្កាត់ស្ទឹងមានជ័យទី១ ឃាត់ម៉ូតូជិះបញ្ច្រាសជាង៥០គ្រឿង និងកង់បីឥណ្ឌា២គ្រឿង appeared first on Kampuchea Thmey Daily.

រដ្ឋបាលសង្កាត់ស្ទឹងមានជ័យទី ១ បើកយុទ្ធនាការបាញ់ថ្នាំសម្លាប់សត្វមូស ក្នុងភូមិទាំង ៨

អ៊ិន ពិសី — Tue, 14 Jan 2025 01:47:13 +0000

អាជ្ញាធរ បើកយុទ្ធនាការបាញ់ថ្នាំសម្លាប់សត្វមូសក្នុងភូមិទាំង ៨ ជាបន្តបន្ទាប់ នៅមូលដ្ឋានសង្កាត់ស្ទឹងមានជ័យ ១ ដើម្បីលុបបំបាត់ជម្រកមូសខ្លា និងរួមចំណែកទប់ស្កាត់ការចម្លងជំងឺគ្រុនឈាម។

ដោយមានការយកចិត្តទុកដាក់ និងណែនាំពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ ដែលបានគិតគូរពីបញ្ហាសុខភាពសាធារណៈរបស់ប្រជាពលរដ្ឋរស់នៅក្នុងមូលដ្ឋាន អាជ្ញាធរទាំង ១៤ ខណ្ឌ សហការជាមួយក្រុមការងាររបស់មន្ទីរសុខាភិបាលរាជធានីភ្នំពេញ បានបើកយុទ្ធនាការចុះបាញ់ថ្នាំសម្លាប់សត្វមូសនៅមូលដ្ឋានខ្លួនជាបន្តបន្ទាប់ ដើម្បីបង្ការ និងទប់ស្កាត់ជំងឺគ្រុនឈាម។

គួររំលឹកថា លោកវេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញ បានឲ្យដឹងថា នៅដើមខែមករានេះ ចាប់ពីល្ងាចថ្ងៃទី ២ ខែមករា ឆ្នាំ ២០២៥ កម្មវិធីគ្រុនឈាមមន្ទីរសុខាភិបាលរាជធានីភ្នំពេញ មានការចូលរួមពី ការិយាល័យសុខាភិបាលមេគង្គ សហការជាមួយមណ្ឌលសុខភាព និងមន្ទីរបង្អែកនានា ក្នុងមូលដ្ឋានខណ្ឌនីមួយៗ ទាំង ១៤ ក្នុងភូមិសាស្ត្ររាជធានីភ្នំពេញ បន្តចុះបាញ់ថ្នាំសម្លាប់សត្វមូលដ្ឋានតាមកម្មវិធីជារៀងរាល់ថ្ងៃ ដើម្បីបង្ការទប់ស្កាត់ជំងឺគ្រុនឈាម។

ក្នុងនោះ អាជ្ញាធរសង្កាត់ស្ទឹងមានជ័យទី ១ បានចាប់ផ្ដើមបើកយុទ្ធនាការបាញ់ថ្នាំសម្លាប់សត្វមូស ដើម្បីការពារជំងឺគ្រុនឈាម ដោយធ្វើឡើងចាប់ផ្ដើមពីចំណុចភូមិថ្មី ថ្ងៃទី ១៣ ខែមករា ឆ្នាំ ២០២៥ វេលាម៉ោង ១៨-១៩ , ២/-ចំណុចចាប់ផ្ដើម ភូមិទ្រា ថ្ងៃទី ១៤ ខែមករា ឆ្នាំ ២០២៥ វេលាម៉ោង ១៨-១៩ , ៣/-ចំណុចចាប់ផ្ដើម ភូមិទ្រា ១ ថ្ងៃទី ១៥ ខែមករា ឆ្នាំ ២០២៥ វេលាម៉ោង ១៨-១៩ , ៤/-ចំណុចចាប់ផ្ដើម ភូមិទ្រា ២ ថ្ងៃទី ១៦ ខែមករា ឆ្នាំ ២០២៥ វេលាម៉ោង ១៨-១៩ , ៥/-ចំណុចចាប់ផ្ដើម ភូមិទ្រា ៣ ថ្ងៃទី ១៧ ខែមករា ឆ្នាំ ២០២៥ វេលាម៉ោង ១៨-១៩ , ៦/-ចំណុចចាប់ផ្ដើម ភូមិមានជ័យ ថ្ងៃទី ១៨ ខែមករា ឆ្នាំ ២០២៥ វេលាម៉ោង ១៨-១៩ , ៧/-ចំណុចចាប់ផ្ដើម ភូមិមានជ័យ ១ ថ្ងៃទី ១៩ ខែមករា ឆ្នាំ ២០២៥ វេលាម៉ោង ១៨-១៩ , ៨/-ចំណុចចាប់ផ្ដើម ភូមិមានជ័យ ២ ថ្ងៃទី ២០ ខែមករា ឆ្នាំ ២០២៥ វេលាម៉ោង ១៨-១៩៕

អត្ថបទ ៖ ម៉េង

The post រដ្ឋបាលសង្កាត់ស្ទឹងមានជ័យទី ១ បើកយុទ្ធនាការបាញ់ថ្នាំសម្លាប់សត្វមូស ក្នុងភូមិទាំង ៨ appeared first on Kampuchea Thmey Daily.

ពលរដ្ឋសង្កាត់ស្ទឹងមានជ័យទី ១ បន្តរួសរាន់ទៅពិនិត្យ និងចុះឈ្មោះបោះឆ្នោត ខណៈថ្ងៃបិទបញ្ចប់កាន់តែកៀកចូលមកដល់

អ៊ិន ពិសី — Tue, 10 Sep 2024 07:24:58 +0000

ប្រជាពលរដ្ឋនៅមូលដ្ឋានសង្កាត់ស្ទឹងមានជ័យទី ១ បន្តរួសរាន់ទៅពិនិត្យ និងចុះឈ្មោះបោះឆ្នោត ខណៈថ្ងៃបិទបញ្ចប់ការចុះឈ្មោះបោះឆ្នោតប្រចាំឆ្នាំជិតនឹងបញ្ចប់ នាថ្ងៃទី ១៦ ខែកញ្ញា ឆ្នាំ ២០២៤ ខាងមុខនេះ។

ពលរដ្ឋបានឱ្យដឹងថា ការអញ្ជើញទៅពិនិត្យផ្ទៀងផ្ទាត់ និងចុះឈ្មោះសម្រាប់ការចូលរួមបោះឆ្នោត គឺជាកាតព្វកិច្ចក្នុងនាមជាពលរដ្ឋល្អក្នុងសង្គមជាតិ ព្រោះការបោះឆ្នោតជារឿងសំខាន់ ដែលប្រជាជនគ្រប់រូប គ្រប់អាយុ មានសិទ្ធិចូលរួមបោះឆ្នោតជ្រើសរើសថ្នាក់ដឹកនាំមូលដ្ឋាន និងការបោះជ្រើសរើស នៅរៀងរាល់ ១ អាណត្តិ ម្តង មានរយៈពេល ៥ ឆ្នាំ ដើម្បីរើសថ្នាក់ដឹកនាំប្រទេស បន្តការអភិវឌ្ឍប្រទេស។

លោក ជា សារ៉េត ចៅសង្កាត់ស្ទឹងមានជ័យទី ១ ជាសង្កាត់មួយក្នុងចំណោមសង្កាត់ទាំង ០៧ ក្នុងខណ្ឌមានជ័យ បានឱ្យដឹងថា ក្រុមការងារ នៃរដ្ឋបាលសង្កាត់ បានយកចិត្តទុកដាក់ណាស់ ក្នុងការបំពេញជូនពលរដ្ឋលើកិច្ចការងារចុះឈ្មោះ , ពិនិត្យឈ្មោះ និងកែតម្រូវឈ្មោះ សម្រាប់ការត្រៀមបោះឆ្នោត ទាំងការបោះឆ្នោតជ្រើសតាំងក្រុមប្រឹក្សាឃុំ-សង្កាត់ និងការបោះឆ្នោតសកល។

លោកបន្តថា រយៈពេល ១០ ថ្ងៃ មកនេះ ពោលគិតចាប់តាំងពីថ្ងៃទី ១ ខែកញ្ញា ឆ្នាំ ២០២៤ មានពលរដ្ឋជាច្រើនបានមកទទួលការពិនិត្យ និងចុះឈ្មោះផងដែរ បន្ទាប់ពីអាជ្ញាធរបានចុះផ្សព្វផ្សាយយ៉ាងទូលំទូលាយពីកិច្ចការងារនេះ ជូនពួកគាត់រួចមក។

សូមបញ្ជាក់ថា ការពិនិត្យកែតម្រូវ និងចុះឈ្មោះបោះឆ្នោតនេះ បានធ្វើឡើងតាំងពីថ្ងៃទី ១ ខែកញ្ញា ហើយក៏បិទបញ្ចប់នៅថ្ងៃទី ១៦ ខែកញ្ញា ឆ្នាំ ២០២៤ នេះ។ កិច្ចការងារនេះ អាជ្ញាធរមូលដ្ឋាននៅតាមរដ្ឋបាលឃុំសង្កាត់ តែងតែធ្វើជាប្រចាំឆ្នាំ ដើម្បីអាចឱ្យប្រជាពលរដ្ឋទៅពិនិត្យឱ្យបានជាក់លាក់ពីបញ្ជីឈ្មោះរបស់ខ្លួន និងបានចុះឈ្មោះឱ្យបានជាស្រេច សម្រាប់ការបោះឆ្នោតបំពេញកាតព្វកិច្ចជាពលរដ្ឋល្អក្នុងសង្គមជាតិ៕

អត្ថបទ ៖ សុភា

The post ពលរដ្ឋសង្កាត់ស្ទឹងមានជ័យទី ១ បន្តរួសរាន់ទៅពិនិត្យ និងចុះឈ្មោះបោះឆ្នោត ខណៈថ្ងៃបិទបញ្ចប់កាន់តែកៀកចូលមកដល់ appeared first on Kampuchea Thmey Daily.

អាជ្ញាធរសម្រុកជួសជុលផ្លូវបេតុង នៅសង្កាត់ស្ទឹងមានជ័យ២ បញ្ចៀសចរាចរណ៍ផ្លូវ៣៧១

deth leng — Sat, 13 Jul 2024 04:08:29 +0000

នៅចំពេលដែលកំណើនអ្នកធ្វើដំណើរលើកំណាត់ផ្លូវ៣៧១ ឆ្ពោះមកផ្លូវមុនីរ៉េតកាន់តែកើនឡើង ទើបធ្វើឲ្យអាជ្ញាធរបង្កើនការជួសជុលផ្លូវចាក់ក្រាលបេតុងឆ្អឹងដែក ក្នុងមូលដ្ឋានសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។

លោក សេង វ៉ាន់ថា ចៅរងទី១ សង្កាត់ស្ទឹងមានជ័យទី២ បានឲ្យកម្ពុជាថ្មីដឹងក្នុងពេលដែលលោកកំពុងចុះពិនិត្យមើលការដ្ឋានជួសជុលផ្លូវ១ខ្សែ ស្ថិតក្នុងក្រុមទី២ ភូមិដំណាក់ធំ១ គឺខណៈនេះសាលាខណ្ឌមានជ័យកំពុងជួសជុលផ្លូវដែលរងការខូចខាតឲ្យស្អាតឡើងវិញ ដើម្បីបញ្ចៀសចរាចរណ៍ចេញពីផ្លូវ៣៧១ ឆ្ពោះមកផ្លូវមុនីរ៉េត។

លោក សេង វ៉ាន់ថា បានបញ្ជាក់ទៀតថា ភូមិសាស្ត្រសង្កាត់ស្ទឹងមានជ័យទី២ គឺនៅចន្លោះកណ្តាលសង្កាត់បឹងទំពន់ សង្កាត់ស្ទឹងមានជ័យទី១ និងទី៣ហើយចន្លោះកណ្តាលនេះគឺអ្នកធ្វើដំណើរច្រើនតែមកឆ្លងកាត់សង្កាត់ស្ទឹងមានជ័យទី២ងាយស្រួលទៅផ្លូវមុនីរ៉េតផ្សារស្ទឹងមានជ័យចាស់ និងផ្សារស្ទឹងមានជ័យចាស់ទៀតផង។

អ្វីដែលច្រើនតែកកស្ទះចរាចរណ៍គឺស្ថិតក្នុងម៉ោង៦ព្រឹកដល់ម៉ោង៩ព្រឹក។ ម៉ោង១៣រសៀលដល់ម៉ោង១៩យប់ខណះដែលកម្មកររោងចក្រ និងមន្ត្រីរាជការចេញពីធ្វើការ។

ដូច្នេះហើយទើបអាជ្ញាធរសម្រុកជួសជុលផ្លូវបេតុងឆ្អឹងដែកឲ្យល្អស្អាតឡើងវិញ ដែលកន្លងមកផ្លូវរងការខូចខាតធ្វើឲ្យអ្នកដំណើរនាំគ្នាជិះគេចហើយទៅកកស្ទះលើកំណាត់ផ្លូវ៣៧១ និងផ្លូវមុនីរ៉េតជារៀងរាល់ថ្ងៃ។

ផ្លូវនេះអាចធ្វើដំណើរបាននៅសប្តាហ៍ក្រោយប៉ុន្តែបានត្រឹមម៉ូតូប៉ុណ្ណោះ ព្រោះមិនទាន់ទទួលទម្ងន់ធ្ងន់នៅឡើយ៕

អត្ថបទ៖ នរា

The post អាជ្ញាធរសម្រុកជួសជុលផ្លូវបេតុង នៅសង្កាត់ស្ទឹងមានជ័យ២ បញ្ចៀសចរាចរណ៍ផ្លូវ៣៧១ appeared first on Kampuchea Thmey Daily.

ផ្លូវជាប់ស្ពានអាកាសស្ទឹងមានជ័យរងការបាក់ស្រុតមន្ត្រីជំនាញកំពុងជួសជុល

deth leng — Tue, 10 Oct 2023 04:02:37 +0000

មន្ត្រីជំនាញ នៃមន្ទីរសារធារណការរាជធានីភ្នំពេញនៅព្រឹកថ្ងៃទី ១០ ខែតុលា ឆ្នាំ ២០២៣នេះ កំពុងធ្វើការជួសជុលផ្លូវបាក់ស្រុតនៅខាងលិចស្ពានអាកាសស្ទឹងមានជ័យ ភូមិមានជ័យ១ សង្កាត់ស្ទឹងមានជ័យ១ ខណ្ឌមានជ័យរាជធានីភ្នំពេញ។

ចៅសង្កាត់ស្ទឹងមានជ័យ១បានឱ្យដឹងថា ផ្លូវបាក់ស្រុតនេះបានកើតឡើងនៅអំឡុងម៉ោង១ រំលងអធ្រាត្រឈានចូលថ្ងៃទី១០ខែតុលានេះ។ ហើយភ្លាមៗកម្លាំងអាជ្ញាធរបានធ្វើការហ៊ុពទ្ធ័ខ្សែជុំវិញទីតាំងផ្លូវបាក់ស្រុតរងចាំឲ្យមន្ទីរជំនាញចុះមកសិក្សាជួសជុល។

អាជ្ញាធរសុំធ្វើការអំពាវនាវដល់អ្នកធ្វើដំណើរមេត្តារកផ្លូវវាងព្រោះប្រឈម និងការកកស្ទះចរាចរណ៍ផងនោះ៕