ព័ត៌មានជាតិ

អាជ្ញាធរសង្កាត់ស្ទឹងមានជ័យ ២ ចុះរៀបចំសណ្ដាប់ធ្នាប់ចំណុចសំខាន់ៗ មួយចំនួន សម្រួលការកកស្ទះ

បានផុស

១ year មុន

នៅ

ថ្ងៃពុធ ២ កក្កដា ២០២៥

ដោយ

អាជ្ញាធរខណ្ឌស្ទឹងមានជ័យ ២ ដឹកនាំកម្លាំងគណៈបញ្ជាការឯកភាពសង្កាត់ ចុះរៀបចំសណ្ដាប់ធ្នាប់នៅចំណុចសំខាន់ៗ មួយចំនួន ក្នុងមូលដ្ឋាន ដើម្បីកាត់បន្ថយការកកស្ទះលើដងផ្លូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមការចង្អុលបង្ហាញរបស់ លោកចៅសង្កាត់ស្ទឹងមានជ័យទី ២ បានចាត់ឲ្យគណៈកម្មការសណ្ដាប់ធ្នាប់សង្កាត់ សហការជាមួយកម្លាំងប៉ុស្តិ៍រដ្ឋបាល ប្រជាការពារសង្កាត់ និងកម្លាំងភូមិ ចុះធ្វើសណ្ដាប់ធ្នាប់នៅផ្សារក្រមួនភូមិឫស្សី និងធ្វើការណែនាំដល់អាជីវករលក់ដូរតាមដងផ្លូវផងដែរ។

លោក ទូច សំអុល ចៅសង្កាត់ស្ទឹងមានជ័យទី ២ បានប្រាប់កម្ពុជាថ្មីថា ចំណុចទីតាំងសំខាន់ៗ ក្នុងមូលដ្ឋានសង្កាត់ស្ទឹងមានជ័យទី ២ ដែលតែងតែមានការកកស្ទះចរាចរណ៍ដោយសារការដាក់តាំងលក់ម្ហូបអាហារគ្មានសណ្ដាប់ធ្នាប់ ដោយក្រុមអាជីវករខ្លះបានលក់លើផ្លូវសាធារណៈ ជាហេតុនាំឲ្យមានការកកស្ទះ លំហូរចរាចរណ៍យឺត ពិបាកក្នុងការធ្វើដំណើរ។

លោកបានបញ្ជាក់បន្ថែមថា ចំណុចដែលកម្លាំងគណៈបញ្ជាការឯកភាពសង្កាត់ចុះរៀបចំមានចំនួន ២ ទីតាំង ដោយទីតាំងទី ១.ផ្សារក្រមួនភូមិឫស្សី នៅលើកំណាត់ផ្លូវលេខ ២១៧ ជិតស្រុកស្ពានដែកចំការដូង តែងតែមានក្រុមអ្នកលក់ម្ហូបខ្លះបានយកចំណីផ្លូវសាធារណៈធ្វើអាជីវកម្ម និងទីតាំងទី ២. កំណាត់ផ្លូវលេខ ២៧១ ត្រង់ចំណុចមុខពេទ្យរុស្សីដែលមានក្រុមអាជីវករលក់ម្ហូបអាហារ បានយកផ្លូវសាធារណៈដាក់តាំងលក់ ធ្វើឲ្យលំហូរចរាចរណ៍កកស្ទះផងដែរ និងអាជ្ញាធរបានធ្វើការណែនាំអាជីវករលក់ដូរតាមចិញ្ចើមផ្លូវឲ្យគាត់ដាក់តាំងសម្ភារៈស្លាកឲ្យមានរបៀបរៀបរយ។

ជាមួយគ្នានេះ អាជ្ញាធរ ក៏បានសំណូមពរដល់អាជីវករទាំងអស់ សូមមេត្តាដាក់តាំងលក់ម្ហូបអាហារ របស់របរផ្សេងៗ ឲ្យមានសណ្ដាប់ធ្នាប់ ជៀសវាងតាំងលក់លើចំណីផ្លូវសាធារណៈ គ្មានសណ្ដាប់ធ្នាប់ និងចូលរួមថែរក្សាបរិស្ថាន អនាម័យ វេចខ្ចប់សំរាមឲ្យបានត្រឹមត្រូវ៕

អត្ថបទ ៖ ម៉េង