​ព្រឹត្តិការណ៍ពាណិជ្ជកម្មនេះ នឹងប្រមូលផ្តុំប្រតិបត្តិករទេសចរណ៍ ភ្នាក់ងារ​ទេសចរណ៍ និងថ្នាក់ដឹកនាំធុរកិច្ចទេសចរណ៍មកពី​ប្រទេសឥណ្ឌាសរុបចំនួន ​៣៥ ​ក្រុមហ៊ុន ដើម្បី​ធ្វើ​ការ​វាយ​តម្លៃលើសក្តា​នុ​ពល​ទេសចរណ៍កម្ពុជា និងពង្រឹងកិច្ចសហប្រតិបត្តិការ​ទ្វេភាគី​រវាង​ប្រទេស​ទាំងពីរ​។​

​ក្រោមការរៀបចំដោយសមាគមទេសចរណ៍ PATA​ និងការចូលរួមគាំទ្រយ៉ាង​ពេញ​ទំហឹងពីក្រសួងទេសចរណ៍ សហព័ន្ធទេសចរណ៍កម្ពុជា សភាពាណិជ្ជកម្មឥណ្ឌា​នៅ​កម្ពុជា​ ព្រមទាំងរដ្ឋបាលខេត្តតាមគោលដៅនីមួយៗ ព្រមទាំងដៃគូពាណិជ្ជកម្មនានា។ ​

ព្រឹត្តិការណ៍នេះ ​មានគោលដៅយុទ្ធសាស្ត្រ​ក្នុងការជំរុញ​ឱកាសធុរកិច្ចដោយផ្ទាល់ ​(B2B) ​ព្រម​ទាំង​លើកកម្ពស់​​កិត្យានុភាព​កម្ពុជា ​ជាគោលដៅទេសចរណ៍​ប្រកបដោយភាពប្រកួតប្រជែង​ភាព​ចម្រុះ​ និង​គោលដៅទេសចរណ៍​ប្រកបដោយតម្លៃខ្ពស់។

ក្នុងរយៈពេល ៦ យប់ ៧ ថ្ងៃ នៃកម្មវិធី គណៈប្រតិភូឥណ្ឌានឹងអញ្ជើញចូលរួមក្នុង​ទស្សនកិច្ចវាយ​តម្លៃ​គោល​ដៅ​ទេសចរណ៍ ជំនួបពាណិជ្ជកម្មទល់មុខ (B2B Meetings) កម្មវិធីបង្កើតបណ្ដាញ​ទំនាក់​ទំនង ពិព័រណ៍​ផលិត​ផលទេសចរណ៍ និងការដកស្រង់បទពិសោធន៍វប្បធម៌ នៅតាមគោលដៅយុទ្ធសាស្ត្ររួមមាន ខេត្តសៀមរាប រាជធានីភ្នំពេញ ក្រុងព្រះសីហនុ និងកោះរ៉ុង។

កម្មវិធីនេះ ត្រូវបានរចនាឡើងយ៉ាងពិសេស ដើម្បីបង្ហាញ​ជូនអ្នកទិញអន្តរជាតិ​មិនត្រឹមតែ​អំពីតំបន់​បេតិ​កភណ្ឌប្រវត្តិសាស្ត្រប៉ុណ្ណោះទេ ​ប៉ុន្តែថែមទាំងរំលេច​នូវផលិតផលទេសចរណ៍ថ្មីៗ ​រួមមាន ទេសចរណ៍ទីក្រុង តំបន់ឆ្នេរ កោះ សុខុមាលភាព ទេសចរណ៍ ប្រណីតភាព កម្មវិធី MICE និងទេសចរណ៍បែបបទពិសោធន៍។

ការរៀបចំកម្មវិធីពិសេសសម្រាប់ទីផ្សារឥណ្ឌា គឺជាយុទ្ធសាស្ត្រស្នូល​រយៈពេលវែង​របស់សមាគម ក្នុងការធ្វើ​ទីផ្សារ​ទេសចរអន្តរជាតិរបស់កម្ពុជា និងពង្រឹងភាពជាដៃគូពាណិជ្ជកម្មជា​មួយ​ទីផ្សារដែលមាន​កំណើនសេដ្ឋកិច្ចលឿនបំផុតមួយនៅលើពិភពលោក។

CTM 2026 Mini-Series ​ជាវេទិកាដ៏មានតម្លៃសម្រាប់សហគ្រាសទេសចរណ៍ក្នុងស្រុក រួមមាន សណ្ឋាគារ រមណីយដ្ឋាន ក្រុមហ៊ុន DMCs និងអ្នកផ្តល់សេវាទេសចរណ៍នានា ក្នុងការតភ្ជាប់​ទំនាក់​ទំនង​ពាណិជ្ជកម្មដោយផ្ទាល់ជាមួយអ្នក ទិញពីឥណ្ឌាដែលមានសក្តានុពលខ្ពស់ ដើម្បីពង្រីកទំហំ​អាជីវកម្ម និងទីផ្សាររបស់ខ្លួន។

​គិតចាប់តាំងពីការដាក់ឱ្យដំណើរការជាផ្លូវការនៅខែមីនា ឆ្នាំ២០២៦ ព្រឹត្តិការណ៍ CTM ទទួលបានជោគជ័យ​​ក្នុងការស្វាគមន៍ប្រតិភូអ្នកទិញអន្តរជាតិចំនួន ៨០ស្ថាប័ន ពីទីផ្សារគោលដៅចំនួន ៧ ដោយសម្រេចបាននូវទំហំពាណិជ្ជកម្មដែលអាចវាស់វែងបានយ៉ាងច្បាស់លាស់។

សមិទ្ធផលលេចធ្លោរួមមាន៖ កំណើនទេសចរណ៍ក្រុមហ៊ុនមកពីវៀតណាម ការពង្រីក​ទីផ្សារ​ថ្មីពី​ឥណ្ឌូ​នេស៊ី​ សក្តានុពលទេសចរណ៍វាយកូនហ្គោលពីសិង្ហបុរី ការតភ្ជាប់​កញ្ចប់ទស្សន​កិច្ចពីមី​យ៉ាន់ម៉ា ​និង​ការរក្សាបាននូវកំណើនពាណិជ្ជកម្មរឹងមាំជាមួយទីផ្សារចិន។

​លោកបណ្ឌិត​ ធួន ស៊ីណាន ​ប្រធានសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា​ មានប្រ​សាសន៍​ថា៖ «CTM ​មិនមែនត្រឹមតែជាព្រឹត្តិការណ៍ជួបជុំទេសចរណ៍នោះទេ ប៉ុន្តែវាជាវេទិកា​ធុរកិច្ច​ជាក់ស្តែង​ដែលតភ្ជាប់អ្នកទិញអន្តរជាតិជាមួយប្រតិបត្តិករក្នុងស្រុក ដើម្បីបង្កើតឱកាសសេដ្ឋកិច្ច​ពិត​ប្រាកដ និងគាំទ្រដល់ចីរភាពនៃឧស្សាហកម្មទេសចរណ៍កម្ពុជា។ យើងជឿជាក់​យ៉ាង​មុត​មាំថា ភាព​ជោគ​ជ័យនៃវិស័យនេះ កើតចេញពីភាពជាដៃគូដ៏រឹងមាំ និងសកម្មភាពជាក់ស្តែង ហើយយើង​អាចរួបរួមគ្នាដើម្បីលើកស្ទួយកម្ពុជា ឱ្យក្លាយជា​គោល​ដៅ​ទេសចរណ៍ដ៏លេច​ធ្លោបំផុត​នៅអាស៊ី»។

​យោងតាមក្រសួងទេសចរណ៍ ​កម្ពុជាស្វាគមន៍​ភ្ញៀវ​ទេសចរ​អន្តរ​ជាតិ​ប្រមាណ​ ១,៥ ​លាននាក់​ នៅ​ក្នុង​រយៈពេល ៥ ​ខែ ២០២៦ ​ធ្លាក់ចុះ ​៤៧% ​ធៀប​នឹង​រយៈពេល​ដូចគ្នា ​នៅ​ឆ្នាំ​ ២០២៥៕

អត្ថបទ៖ ឡេង ដេត

The post ​កម្ពុជា ត្រៀម​ទទួល​បដិសណ្ឋារកិច្ច​​ប្រតិភូទេសចរណ៍​​ឥណ្ឌា ៣៥ ​ក្រុមហ៊ុន​ រយៈពេលមួយសប្ដាហ៍ appeared first on Kampuchea Thmey Daily.

វេទិកានេះរៀបចំឡើងដោយក្រសួងទេសចរណ៍ សហការជាមួយសមាគមទេសចរណ៍​អា​ស៊ីប៉ាស៊ីហ្វិកកម្ពុជា (PATACC) និងសមាគម​អ្នកវិនិយោគ​នវានុវត្តន៍ និងអភិវឌ្ឍន៍ (IDI) ដែលគ្រោងនឹង​រៀបចំរយៈពេល ២ ថ្ងៃ​ចាប់​ពីថ្ងៃទី ២-៣ ខែមិថុនា ឆ្នាំ ២០២៥ នៅសណ្ឋា​គារសុខាភ្នំពេញ។

លោកបណ្ឌិត ធួន ស៊ីណាន ស្ថាបនិក CIM និងជាប្រធាន សមាគមទេសចរណ៍​អា​ស៊ីប៉ាស៊ីហ្វិក​កម្ពុជា (PATACC) មានប្រសាសន៍ថា ព្រឹត្តការណ៍ CIM ២០២៥ គឺជាទម្រង់មួយក្នុងការ​តភ្ជាប់​រវាងអ្នករកស៊ីទទួលទានក្នុងស្រុក ជាមួយអ្នកវិនិយោគអន្តរជាតិ។

លោក ធួន ស៊ីណាន បន្ថែមថា៖ «វេទិកានេះ មិនត្រឹមតែតភ្ជាប់វិនិយោគិនក្នុងស្រុក និងអ្នកដាក់​ទុនមកពីក្រៅស្រុកទេ ប៉ុន្តែអ្នកដែលនៅក្នុងស្រុកក៏មានឱកាសក្នុងការចាប់ដៃគូ ដែលជាលំ​ហូរនៃ​ការធ្វើពាណិជ្ជកម្ម ជាវេទិកាមួយមិនត្រឹមតែយើងណាត់ឱ្យជួបរវាងអ្នករកស៊ីក្នុងស្រុក និងអ្នក​នៅ​ក្រៅប្រទេសនោះទេ CIM មានការសម្របសម្រួលតាមផ្លូវច្បាប់ធ្វើម៉េចឱ្យជាក់ច្បាស់​នូវទុនដែល​អ្នក​​វិនិយោគដែលគាត់ដាក់មកឱ្យស្របតាមផែនការ»។

លោក ធួន ស៊ីណាន បញ្ជាក់ថា វេទិកានេះគឺជាក​តាលីករមួ​យ​សម្រាប់​ការផ្លាស់ប្តូរសេដ្ឋកិច្ច តាមរយៈការភ្ជាប់អាជីវកម្មកម្ពុជា​ដែលមានការត្រួត​ពិនិត្យជា​មួយ​មូល​ធន​អន្តរជាតិ ជាមូល​ដ្ឋានគ្រឹះ​សម្រាប់ការបង្កើតឱកាសការងារ ដើម្បីបង្កើនសេដ្ឋកិច្ច រយៈ​ពេល​វែង ប្រកប​ដោយនិរន្តរភាព។

រដ្ឋលេខាធិការក្រសួងទេសចរណ៍ លោក នី ផល្លី មានប្រសាសន៍ថា៖ «CIM គឺជាយន្តការមួយពិសេសដែលយើងអាចធ្វើការណាត់ជួបគ្នា រវាងអ្នកវិនិយោគនៅក្នុងវិស័យទេសចរណ៍ ដែលជាថ្នាលមួយក្នុការបំពេញបន្ថែម ដើម្បីពង្រឹងក្នុងខ្សែច្រវាក់ផលិតកម្មក្នុងវិស័យទេសចរណ៍ឱ្យមានភាពរឹងមាំជាងមុន»។

ព្រឹត្តិការណ៍ CIM 2025 មានការចូលរួមពីសហគ្រិនកម្ពុជាជាង ១៥០ នាក់​ និងក្រុមហ៊ុន​វិនិយោគ​អន្តរជាតិចំនួន ៩០ មកពីទូទាំងអាស៊ី មជ្ឈិមបូព៌ា និងបណ្តា​ប្រទេសផ្សេងទៀត។

វេទិកាជំនួបវិនិយោគកម្ពុជាឆ្នាំ ២០២៥ រៀបចំឡើងស្របតាមយុទ្ធសាស្ត្របញ្ចកោណ ដំណាក់ការទី១ នៃអាណត្តិទី ៧ របស់រាជរដ្ឋាភិបាលកម្ពុជា (២០២៣-២០២៨)។

ព្រឹត្តិការណ៍នេះពង្រឹងអាទិភាពជាតិ ដើម្បីធ្វើពិធកម្មសេដ្ឋកិច្ច ក៏ដូចជាជំរុញកំណើនវិស័យឯកជន ពង្រីកលទ្ធភាពហិរញ្ញវត្ថុ និងលើកកំពស់ជំហររបស់កម្ពុជាជាគោលដៅប្រកួតប្រជែងលើការវិនិយោគ។

គំនិតផ្តួចផ្តើមនេះក៏ជាចំណុចសំខាន់ក្នុងការជំរុញការអភិវឌ្ឍន៍ទេសចរណ៍ប្រកបដោយនិរន្តរភាព និងជំរុញរដូវកាលបៃតងរបស់កម្ពុជា ប្រែក្លាយទៅជារយៈពេលនៃការវិនិយោគដ៏មានតម្លៃខ្ពស់ និងមានការផ្តល់យុទ្ធសាស្ត្ររបស់អ្នកចូលរួម។

ចំណុចសំខាន់ៗក្នុងកម្មវីធី៖

• យុទ្ធសាស្រ្តផ្គូរផ្គងអាជីវកម្ម៖ មានវិនិយោគិនប្រមាណ ៥០០ នាក់ និងជួបពិភាក្សា គ្នានិងគ្នា តាមប្រព័ន្ធកិច្ចប្រជុំជំនួប

• គណៈប្រតិភូវិនិយោគិន៖ មានការចូលរួមប្រមាណ ១០ ប្រទេស រួមមាន ប្រទេសថៃ ម៉ាឡេស៊ី ចិន កូរ៉េ ជប៉ុន និងម៉ាល់ឌីវ។ល។

• ព្រឹត្តិការណ៍បណ្តាញ Gala៖ មតិសំណេះសំណាល និងពិសារអាហារទំនាក់ទំនងពាណិជ្ជកម្ម។

• ការប្រឹក្សាផ្នែកច្បាប់ និងបទប្បញ្ញត្តិ៖ ប្រឹក្សាផ្ទាល់លើផ្នែកច្បាប់ និងបទប្បញ្ញត្តិ ដោយតំណាងក្រុមប្រឹក្សាអភិវឌ្ឍន៍កម្ពុជា (CDC) ក្រសួងពាណិជ្ជកម្ម និងអ្នកជំនាញផ្នែកច្បាប់ឯកជន។

ការផ្តោតទៅលើវិស័យកំណើនខ្ពស់

• ទេសចរណ៍ និងបដិសណ្ឋារកិច្ច – ឱកាសវិនិយោគដែលរួចរាល់នៅក្នុងវិស័យរមណីយដ្ឋានកំរិតខ្ពស់ ក្រុមហ៊ុនដឹកជញ្ជូនទេសចរណ៍ (DMC) ទេសចរណ៍សុខភាព និង SMART Tourism។

• Agri-Tourism – កសិ-ទេសចរណ៍តាមសហគមន៍ដែលភ្ជាប់ជាមួយកសិកម្មសរីរាង្គ និងការអភិវឌ្ឍន៍ជនបទ។

• វិស័យទេសចរណ៍អចលនៈទ្រព្យ – ការរួមបញ្ជូលរវាងអចលនទ្រព្យ និងសណ្ឋាគារដើម្បីការអភិវឌ្ឍន៍តំបន់ប្រកបដោយនិរន្តរភាព។

• បច្ចេកវិទ្យា និងការច្នៃប្រឌិត—ទាក់ទងនឹងការចាប់ផ្តើមអាជីវកម្ម Fintech, E-commerce, និងសេវាកម្មឌីជីថលដែលរួមចំណែកដល់វិស័យអេកូទេសចរណ៍៕

The post រដ្ឋចាប់ដៃជាមួយឯកជន ផ្គូរផ្គងអ្នកវិនិយោគក្នុងស្រុកនិងអន្តរជាតិ ដាក់ទុនក្នុងវិស័យទេសចរណ៍ appeared first on Kampuchea Thmey Daily.