សមាគមនារីកម្ពុជា Archives - Kampuchea Thmey Daily

សមាគមនារីកម្ពុជា និងមូលនិធិសប្បុរសធម៌វ័នរ៉ូដ ចែកសម្ភារៈសិក្សាជូនសិស្សជាង ៣០០ នាក់ នៅសាលាបឋមសិក្សាភូមិថ្មី

អ៊ិន ពិសី — Thu, 08 Aug 2024 04:09:37 +0000

នាថ្ងៃទី ៨ ខែសីហា ឆ្នាំ ២០២៤ នេះ សមាគមនារីកម្ពុជា ដើម្បីសន្តិភាព និងអភិវឌ្ឍន៍សាខាក្រសួងព័ត៌មាន និងមូលនិធិសប្បុរសធម៌វ័នរ៉ូដ បានរួមគ្នាធ្វើសកម្មភាពមនុស្សធម៌ក្នុងខេត្តក្រចេះ ដោយចែកសម្ភារៈសិក្សាជូនដល់សិស្សានុសិស្សជាង ៣០០ នាក់ នៅសាលាបឋមសិក្សាភូមិថ្មី ស្ថិតក្នុងភូមិថ្មី ឃុំខ្សាច់អណ្តែត ស្រុកឆ្លូង ខេត្តក្រចេះ។

នេះជាសកម្មភាពមនុស្សធម៌ផ្តល់ស្នាមញញឹមដល់កុមារ ជាពិសេសកុមារមកពីគ្រួសារដែលមានជីវភាពខ្វះខាត ដើម្បីពួកគេមានសម្ភារៈប្រើប្រាស់សម្រាប់គាំទ្រដល់ការសិក្សារៀនសូត្រ។

ពិធីចែកអំណោយជាសម្ភារៈសិក្សាដល់សិស្សានុសិស្សនេះ ប្រព្រឹត្តទៅក្រោមអធិបតីភាពរបស់ លោកស្រី ទុយ សិរីរតនៈ នេត្រ ភក្ត្រា ប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍន៍សាខាក្រសួងព័ត៌មាន រួមជាមួយសមាជិកកិត្តិយស និងសមាជិកាសមាគមដែលជាថ្នាក់ដឹកនាំ និងភរិយាថ្នាក់ដឹកនាំក្រសួង រួមនឹងមន្ត្រីរាជការ នៃក្រសួងព័ត៌មាន ដោយមានវត្តមានចូលរួមពីអគ្គនាយកក្រុមហ៊ុនរថយន្ត Great Wall Motor (GWM) និងអង្គការមូលនិធិសប្បុរសធម៌ វ័នរ៉ូដ និងក្រុមការងារ។

នាឱកាសនោះ លោកស្រី ទុយ សិរីរតនៈ នេត្រ ភក្ត្រា បានថ្លែងការវិនិយោគលើកុមារថ្ងៃនេះ សំដៅបង្កើនមូលធនមនុស្ស ក្នុងយុគសម័យបរិវត្តកម្មឌីជីថល។

លោកស្រី បានជូនពរ កុមារា កុមារី ទាំងអស់ ទទួលបាននូវសុខភាពល្អ ប្រាជ្ញាវាងវៃ ដើម្បីក្លាយខ្លួនជាទំពាំងស្នងឫស្សីរបស់ប្រទេសជាតិ និងបានលើកឡើងថា ស្នាមញញឹមរបស់ កុមារា កុមារី ជាស្នាមញញឹមរបស់ មាតា បិតា និងថ្នាក់ដឹកនាំគ្រប់លំដាប់ថ្នាក់។

ជាមួយនេះ លោកស្រី ក៏បានថ្លែងអំណរគុណដល់មូលនិធិសប្បុរសធម៌ វ័នរ៉ូដ ដែលចូលរួមគាំទ្របេសកកម្មមនុស្សធម៌របស់សមាគមនារីកម្ពុជា ដើម្បីសន្តិភាព និងអភិវឌ្ឍន៍ និងផ្តល់ស្នាមញញឹមដល់កុមារកម្ពុជា៕

The post សមាគមនារីកម្ពុជា និងមូលនិធិសប្បុរសធម៌វ័នរ៉ូដ ចែកសម្ភារៈសិក្សាជូនសិស្សជាង ៣០០ នាក់ នៅសាលាបឋមសិក្សាភូមិថ្មី appeared first on Kampuchea Thmey Daily.

ឯកឧត្តម ហ៊ុន ម៉ានី ត្រូវបានប្រកាសជាប្រធានកិត្តិយសសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងមុខងារសាធារណៈ

Thoeun Vansong — Sun, 23 Jun 2024 03:34:55 +0000

ឯកឧត្តម ហ៊ុន ម៉ានី ត្រូវប្រកាសជាប្រធានកិត្តិយសគណៈកម្មការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ ក្រសួងមុខងារសាធារណៈ។ ពិធីប្រកាសទទួលស្គាល់សមាសភាពគណៈកម្មការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងមុខងារសាធារណៈ រៀបចំឡើងក្រោមអធិបតីសម្តេចកិត្តិសង្គហបណ្ឌិត ម៉ែន សំអន ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍។

ពិធីនេះប្រព្រឹត្តិទៅនាព្រឹកថ្ងៃទី២៣ ខែមិថុនា ឆ្នាំ២០២៤ ដោយមានការអញ្ជើញចូលរួមពីឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ លោក លោកស្រី ជារដ្ឋលេខាធិការ អនុរដ្ឋលេខាធិការ និងលោកស្រីជាឧត្តមភរិយារបស់ថ្នាក់ដឹកនាំជាន់ខ្ពស់ក្រសួងដែលត្រូវទទួលប្រកាសថ្មីជាច្រើនរូប។

ថ្លែងក្នុងពិធីនេះ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រនៃកម្ពុជា និងជាប្រធានសមាគមនារី កម្ពុជាដើម្បីសន្តិភាព និងអភិវឌ្ឍន៍ បាននាំយកការផ្តាំផ្ញើសាកសួរសុខទុក្ខ និងការនឹករលឹកពីសំណាក់សម្តេចកិត្តិ ព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍន៍ ជូនដល់សមាជិកសមាជិកាទាំងអស់ ដែលបានចូលរួមនាថ្ងៃនេះ។

សម្តេចកិត្តិសង្គហបណ្ឌិត បានរំលឹកដល់សាវតារបស់សមាគម ដោយបានរំលេចនូវប្រវត្តិនៃការកកើតសមាគម រួមទាំងដំណើរវិវត្តរបស់សមាគមតាំងពីដំណាក់កាលចូលរួមពលីរំដោះជាតិមាតុភូមិ និងការចូលរួមក្នុងសកម្មភាពសង្គម មនុស្សធម៌ជាបន្តបន្ទាប់ក្នុងសម័យសន្តិភាព។ ស្របពេលជាមួយគ្នានេះ សម្តេចកិត្តិសង្គហបណ្ឌិត ក៏បានលើកឡើងនូវគំរូវីរភាព របស់ថ្នាក់ដឹកនាំដែលបានលះបង់កម្លាំងកាយចិត្ត ប្រាជ្ញាស្មារតី ស្វែងរកបាននូវសុខសន្តិភាព និងការអភិវឌ្ឍរហូតមកដល់សព្វថ្ងៃនេះ។

សម្តេចកិត្តិសង្គហបណ្ឌិត បានចូលរួមអបអរសាទរចំពោះឯកឧត្តម ហ៊ុន ម៉ានី ដែលត្រូវបានប្រកាសជាប្រធានកិត្តិយសគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងមុខងារសាធារណៈ។ សម្ដេច បានផ្តាំផ្ញើដល់គណៈកម្មការសាខាសមាគមនារីក្រសួង ដែលបានប្រកាសកែសម្រួល និងបំពេញបន្ថែមសមាសភាពនាថ្ងៃនេះ ត្រូវបន្តការខិតខំប្រឹងប្រែងគ្រប់សកម្មភាព ដូចជាពង្រឹងរបៀបរបបធ្វើការ របបរាយការណ៍ ការបែងចែកតួនាទីភារកិច្ច និងទទួលខុសត្រូវទៅថ្នាក់ដឹកនាំ នៃគណៈកម្មការសមាគមនារីសាខា អនុសាខា ទូទាំងអង្គភាពកាន់តែទូលំទូលាយ និងឱ្យបានស៊ីជម្រៅទៅតាមគោលនយោបាយរបស់ប្រមុខរាជរដ្ឋាភិបាលកម្ពុជា ដែលបានទទួលស្គាល់ថា «ស្ត្រីគឺជាឆ្អឹងខ្នងដ៏រឹងមាំ នៃសេដ្ឋកិច្ច និង សង្គមជាតិរបស់យើងទាំងអស់គ្នា»៕

The post ឯកឧត្តម ហ៊ុន ម៉ានី ត្រូវបានប្រកាសជាប្រធានកិត្តិយសសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងមុខងារសាធារណៈ appeared first on Kampuchea Thmey Daily.

សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មានផ្តល់អំណោយអង្ករវីតាមីនចំនួន ៤០០ កេសជូនកាកបាទក្រហមកម្ពុជា

Kang Tola — Wed, 19 Jun 2024 12:12:23 +0000

សាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងព័ត៌មានដឹកនាំដោយលោកជំទាវ ទុយ សិរីរតនៈ នេត្រភក្ត្រា ប្រធានកិត្តិយសសមាគម បាននាំយកអំណោយអង្ករវីតាមីនចំនួន ៤០០ កេស ជូនកាកបាទក្រហមកម្ពុជានៅព្រឹកថ្ងៃទី១៩ ខែមិថុនា ឆ្នាំ២០២៤នេះ។ ពិធីប្រគល់ទទួលនេះប្រព្រឹត្តទៅក្រោមអធិបតីភាពលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា។

លោកជំទាវអគ្គលេខាធិការបានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តាំផ្ញើសួរសុខទុក្ខ និងការថ្លែងអំណរគុណយ៉ាងជ្រាលជ្រៅ ចំពោះទឹកចិត្តសប្បុរសធម៌របស់សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មាន ដែលបានបរិច្ចាគអង្ករវីតាមីនចំនួន ៤០០កេសដែលជាការឧបត្ថម្ភលើកទី៣ ជូនដល់កាកបាទក្រហមកម្ពុជា សម្រាប់ប្រតិបត្តិការមនុស្សធម៌ជួយ សម្រាលការលំបាកដល់ប្រជាពលរដ្ឋរងគ្រោះ និងងាយរងគ្រោះបំផុត។

លោកជំទាវអគ្គលេខាធិការបានឱ្យដឹងថា ជារៀងរាល់ឆ្នាំ កាកបាទក្រហមកម្ពុជាទាំងថ្នាក់កណ្តាល និងសាខាទាំងអស់ តែងតែធ្វើការកៀរគរ រកជំនួយពីសប្បុរសជននានា ក្នុងឱកាសទិវា ៨ ឧសភា ដើម្បីទុកជួយទៅដល់ប្រជាពលរដ្ឋ ដែលត្រូវការជំនួយជាចាំបាច់។

លោកជំទាវបានបញ្ជាក់ថា ការកៀរគររកជំនួយនេះដែរ បើសាខាណាមិនមានលទ្ធភាពគ្រប់គ្រាន់ និងផ្តល់ជំនួយទៅដល់ប្រជាពលរដ្ឋបានទាន់ពេលវេលាទេ ថ្នាក់កណ្តាលនឹងយកទៅបំពេញបន្ថែម ហើយអំណោយទាំងអស់ និងយកទៅចែកជូនដល់ដៃប្រជាពលរដ្ឋដោយផ្ទាល។ លោកជំទាវបញ្ជាក់ថា អំណោយដែលទទួលបានពីសប្បុរសនានា កាកបាទក្រហមកម្ពុជា នឹងយកទៅប្រើប្រាស់ឱ្យចំគោលដៅមនុស្សធម៌ ដោយមិនប្រកាន់ពូជសាសន៍ ពណ៌សម្បុរ ឬនិន្នាការនយោបាយណាមួយឡើយ។ ជាពិសេសជនចាស់ជរាឥតទីពឹង និងកុមារកំព្រា ស្ត្រីមេម៉ាយកូនច្រើន និងផ្ទុកមេរោគអេដស៍ជាដើម។

លោកជំទាវ ទុយ សិរីរតនៈ នេត្រភក្ត្រា ប្រធានកិត្តិយសសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងព័ត៌មានបានឱ្យដឹងថា លោកជំទាវនិងក្រុមការងារ មានការពេញចិត្តគោរពស្រឡាញ់ និងកោតសរសើរយ៉ាងខ្លាំងក្លាចំពោះកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានបានខិតខំប្រឹងប្រែងជួយដល់ប្រជាពលរដ្ឋ ដែលមានជីវភាពខ្សត់ខ្សោយ និងជួបទុក្ខលំបាកបានទាន់ពេលវេលា។

លោកជំទាវជឿជាក់ថា អង្ករវីតាមីនទាំងនេះ នឹងទៅដល់ដៃប្រជាពលរដ្ឋងាយគ្រោះ និងជួយឱ្យប្រជាពលរដ្ឋមានសុខភាពល្អ ហើយលោកជំទាវនិងបន្តជួយដល់ កាកបាទក្រហមកម្ពុជា នូវអង្ករវីតាមីននេះជាបន្តបន្ទាប់ទៀត។

សូមជម្រាបថា សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងព័ត៌មាន បានឧបត្ថម្ភអង្ករវីតាមីនដល់កាកបាទក្រហមកម្ពុជាចំនួន ៣ លើករួចមកហើយ ដោយលើកទី១ នៅថ្ងៃទី២៣ ខែកក្តដា ឆ្នាំ២០១៦ ឧបត្ថម្ភអាហារវីតាមីនចំនួន២០០កេស, លើកទី២ នៅថ្ងៃទី៨ ខែធ្នូ ឆ្នាំ២០២៣ ឧបត្ថម្ភអង្ករវីតាមីនចំនួន២០០កេស, និងលើកទី៣ នៅថ្ងៃទី១៩ ខែមិថុនា ឆ្នាំ២០២៤នេះ បានឧបត្ថម្ភអង្ករវីតាមីនចំនួន ៤០០កេស៕

The post សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មានផ្តល់អំណោយអង្ករវីតាមីនចំនួន ៤០០ កេសជូនកាកបាទក្រហមកម្ពុជា appeared first on Kampuchea Thmey Daily.

លោកជំទាវ ម៉ែន សំអន ផ្តល់អនុសាសន៍ ៦ចំណុច ដល់គណៈចលនាស្ត្រី និងសមាគមនារីកម្ពុជា

sopheak khoun — Wed, 24 Aug 2022 06:33:37 +0000

លោកជំទាវ ម៉ែន សំអន ប្រធានសមាគមន៍នារីកម្ពុជា ដើម្បីសន្តិភាព និងអភិវឌ្ឍន៍ បានផ្ដល់អនុសាសន៍ ៦ចំណុច ដល់គណៈចលនាស្ត្រី និងសមាគមនារីកម្ពុជា ដើម្បីវឌ្ឍនភាពការងារក្នុងឆ្នាំ ២០២២ឲ្យកាន់តែប្រសើរឡើងថែមទៀត។

លោកជំទាវ ម៉ែន សំអន ផ្ដល់អនុសាសន៍បែបនេះ ខណៈអញ្ជើញបានដឹកនាំកិច្ចប្រជុំវឌ្ឍនៈភាពការងារ ដែលបានអនុវត្តរយៈពេល ៦ខែកន្លងមក និងលើកទិសដៅអនុវបន្ត រួមជាមួយនឹងការពិភាក្សាអំពីផែនការឆ្ពោះទៅកាន់ការបោះឆ្នោត ឆ្នាំ ២០២៣ នៅវិមាន៧មករា នាព្រឹកថ្ងៃទី ២៤ ខែសីហា ឆ្នាំ២០២២នេះ។

លោកជំទាវ ក៏បាននាំយកការផ្តាំផ្ញើសាកសួរសុខទុក្ខ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់អង្គពិធីទាំងមូលនូវក្តីនឹករលឹក និងការគិតគូរអំពីសុខទុក្ខប្រជាពលរដ្ឋ នៅទូទាំងប្រទេស។

ដើម្បីវឌ្ឍនភាពការបន្តទៀតលោកជំទាវ ម៉ែន សំអន បានផ្តល់អនុសាសន៍ចំនួន ៦ចំណុច មានដូចខាងក្រោម៖

១- បំផុសចលនា អប់រំ ផ្សព្វផ្សាយឲ្យបានទូលំទូលាយជាប្រចាំ តាមគ្រប់រូបភាព និងគ្រប់មធ្យោបាយ ជាពិសេស គោលនយោបាយ ភូមិ-ឃុំមានសុវត្ថិភាព។ ក្នុងនោះ ត្រូវផ្តោតសំខាន់លើការផ្តល់សេវាសាធារណៈ ឲ្យបានឆាប់រហ័យប្រកបដោយប្រសិទ្ធិភាព និងតាមខ្លឹមសារ សេចក្តីសម្រេចនានារបស់រាជរដ្ឋាភិបាល។

២- ចូលរួមផ្សព្វផ្សាយឲ្យបានទូលំទូលាយ នូវខ្លឹមសារសន្និបាតលើកទី ៤៣ អាណត្តិទី ៥ កាលពីថ្ងៃទី ២៣ ខែធ្នូ ឆ្នាំ ២០២១។

៣- ចូលរួមអនុវត្តឲ្យបានជោគជ័យ នូវផែនការសកម្មភាពសម្រាប់រយៈពេល ៤ឆ្នាំ (២០២០-២០២៣) របស់សមាគមនារីកម្ពុជា ដើម្បីសន្តិភាពនិងអភិវឌ្ឍន៍ ដើម្បីតម្រង់ទិសទៅដណ្តើមជោគជ័យក្នុងការបោះឆ្នោត ២០២២-២០២៣។

៤- ពង្រឹងនិងថែរក្សានូវស្មារតីសាមគ្គីភាព ឯកភាពគ្នាខាងទស្សនៈ គោលជំហរនយោបាយសតិអារម្មណ៍ ចាត់តាំងឲ្យកាន់តែរឹងមាំ។

៥- ដើម្បីបន្តចូលរួមទប់ស្កាត់ជំងឺកូវីដ-១៩ សូមលោក-លោកស្រីទាំងអស់ បន្តផ្សព្វផ្សាយវិធានការណ៍របស់ក្រសួងសុខាភិបាល និងអនុសាសន៍ ណែនាំរបស់សម្តេចតេជោ ៣កុំ ៣ការពារ ឲ្យបានខ្ជាប់ខ្ជួន។ ខណៈដែលមេរោគកូវីដ-១៩ បំប្លែងខ្លួនថ្មី អូមីក្រុង ត្រូវបានរកឃើញជាបន្តបន្ទាប់។

៦- ជំរុញឲ្យប្រជាពលរដ្ឋក្នុងមូលដ្ឋាននីមួយៗ បានទទួលការចាក់វ៉ាក់សាំងទាំងដូសទី ១ និង ដូសជំរុញតបតាមការអំពាវនាវរបស់រាជរដ្ឋាភិបាលកម្ពុជា៕

អត្ថបទ៖ វិមាន

The post លោកជំទាវ ម៉ែន សំអន ផ្តល់អនុសាសន៍ ៦ចំណុច ដល់គណៈចលនាស្ត្រី និងសមាគមនារីកម្ពុជា appeared first on Kampuchea Thmey Daily.

លោកជំទាវ ម៉ែន សំអន ៖ សមាគមនារីកម្ពុជា មានកាតព្វកិច្ចដ៏សំខាន់ ក្នុងការចូលរួមចំណែកអភិវឌ្ឍន៍ ជាមួយរាជរដ្ឋាភិបាល

sopheak khoun — Mon, 27 Dec 2021 08:01:36 +0000

លោកជំទាវ ម៉ែន សំអន ឧបនាយករដ្ឋមន្ត្រី ក្នុងនាមគណៈចលនាស្ត្រី និងសមាគមនារីកម្ពុជា ដើម្បីសន្តិភាព និងអភិវឌ្ឍន៍ បានថ្លែងថា សមាគមនារីកម្ពុជា មានកាតព្វកិច្ចដ៏សំខាន់ ក្នុងការចូលរួមចំណែកអភិវឌ្ឍន៍ ជាមួយរាជរដ្ឋា ភិបាល នូវគ្រប់ហេដ្ឋានរចនាសម្ព័ន្ធ ដើម្បីឆ្ពោះទៅរកការរីកចំរើនបន្ថែមទៀត។

លោកជំទាវ ម៉ែន សំអន បានថ្លែងបែបនេះ ខណៈអញ្ជើញជាអធិបតីភាពក្នុងពិធីបិទកិច្ចប្រជុំ ស្តីពី វឌ្ឍនៈភាពរយៈពេល ១ឆ្នាំ និងលើកទិសដៅសម្រាប់អនុវត្តឆ្នាំ ២០២២ របស់គណៈទាំងពីរ នាព្រឹកថ្ងៃទី២៧ ខែធ្នូ ឆ្នាំ ២០២១នេះ នៅស្នាក់ការកណ្តាល គណបក្សប្រជាជនកម្ពុជា។

លោកជំទាវ បានថ្លែងថា សមាគមនារីកម្ពុជា ដើម្បីសន្តិភាព និងអភិវឌ្ឍន៍ ក៏ជាផ្នែកមួយនៃការចូលរួមសកម្មភាពជាមួយរាជរដ្ឋាភិបាល ក្នុងការអភិវឌ្ឍប្រទេសជាតិ និងការលើកកម្ពស់សិទ្ធិស្ត្រី ផងដែរ។

ថ្លែងនៅក្នុងឱកាសនោះ លោកជំទាវ ម៉ែន សំអន ក៏បានកោតសសើរ នូវរាល់សកម្មភាពរបស់ស្ត្រី ជារដ្ឋមន្ត្រី រដ្ឋលេខាធិការ អនុរដ្ឋលេខាធិការ អគ្គនាយក ដោយបានផ្តោតលើការងារស្នូលរបស់នារី នៅគ្រប់ស្ថាប័ន ក៏ដូចជាការងារចូលរួមចំណែកយ៉ាងសំខាន់ នៅគ្រប់អង្គភាពពាក់ព័ន្ធ ក្នុងការប្រយុទ្ធប្រឆាំងនឹងជំងឺកូវីដ-១៩ ផងដែរ។

នៅចំពោះមុខដ៏ខ្លីខាងមុខ លោកជំទាវបានឲ្យនារីយើង ទាញការចាប់អារម្មណ៍ ទៅលើសកម្មភាពនារីនៅក្នុងការត្រៀមលក្ខណៈសម្បត្តិគ្រប់បែបយ៉ាង ចូលរួមក្នុងការងារបោះឆ្នោតក្រុមប្រឹក្សាឃុំ-សង្កាត់ អាណាត្តិទី ៥ ឆ្នាំ ២០២២ និងការបោះឆ្នោត ជ្រើសតាំងតំណាងរាស្ត្រនៅឆ្នាំ ២០២៣ នាពេលខាងមុខនេះ។

ជាមួយគ្នានេះ លោកជំទាវ ម៉ែន សំអន បានស្នើឲ្យស្ត្រីទាំងអស់ ត្រូវចូលរួមទប់ស្កាត់ការរាលដាល នៃ ជំងឺកូវីដ-១៩ តាមរយៈការបន្តរក្សា និងអនុវត្តគោលការណ៍បង្ការទប់ស្កាត់ និងវិធានសុខាភិបាល «៣ ការពារ-៣កុំ» ពិសេសត្រូវនាំគ្នាទៅចាក់វ៉ាក់សាំងការពារកូវីដ-១៩ ឲ្យបានគ្រប់ៗគ្នាដើម្បីបង្កើន « ភាពស៊ាំសហគមន៍ រឹងមាំពិតប្រាកដមួយ» ដែលជាមូលដ្ឋានដ៏សំខាន់ សម្រាប់ការពារអាយុជីវិតប្រជាជនពីមេរោគកូវីដ-១៩ ជាពិសេសប្រភេទដែលតា ឬប្រភេទបំប្លែងខ្លួនថ្មី និងអូមីក្រុងជាដើម៕

អត្ថបទ៖ វិមាន

The post លោកជំទាវ ម៉ែន សំអន ៖ សមាគមនារីកម្ពុជា មានកាតព្វកិច្ចដ៏សំខាន់ ក្នុងការចូលរួមចំណែកអភិវឌ្ឍន៍ ជាមួយរាជរដ្ឋាភិបាល appeared first on Kampuchea Thmey Daily.