រាជបណ្ឌិត្យសភាកម្ពុជា-សមាគមអ្នកភ្លេង នឹងមានការចងក្រងឯកសារមរតករស់រួមគ្នា នាពេលខាងមុខ

Din Thary — Tue, 21 May 2024 10:08:58 +0000

លោក សុខ ទូច ប្រធានរាជបណ្ឌិតសភាកម្ពុជាបានគូសបញ្ជាក់ថា នាពេលខាងមុខនេះ រាជបណ្ឌិត្យសភាកម្ពុជា នឹងសហការជាមួយសមាគមអ្នកភ្លេង ចងក្រងឯកសារមរតករស់ដើម្បីរួមចំណែកថែរក្សាមរតកខ្មែរឱ្យបានគង់វង្ស។

លោកសុខ ទូច បានឲ្យដឹងថា កាលពីថ្ងៃទី ២០ ឧសភា ឆ្នាំ២០២៤ លោកបានជួបពិភាក្សាការងារដោយផ្ទាល់ជាមួយថ្នាក់ដឹកនាំសមាគមអ្នកភ្លេង ដោយស្ថាប័នទាំងពីរនឹងសហការរួមគ្នាក្នុងការសិក្សាស្រាវជ្រាវ និងចងក្រងឯកសារមរតកមនុស្សរស់បន្ទាន់ ព្រោះពួកគាត់មានវ័យកាន់តែចាស់ណាស់ទៅហើយ ដែលពួកគាត់ភាគច្រើនមានវ័យចាប់ពី ៧០ឆ្នាំឡើងទៅ។

បណ្ឌិតសភាចារ្យ សុខ ទូច អះអាងបន្ថែមថា រាជបណ្ឌិត្យសភាកម្ពុជា នឹងសហការជាមួយសមាគមអ្នកភ្លេង គឺនឹងធ្វើការចងក្រងឯកសារមរតករស់ មួយចំនួនដូចជា យីកេ, របាំ, ល្ខោន, ចម្លាក់ និងភ្លេងខ្មែរ ជាដើម៕

The post រាជបណ្ឌិត្យសភាកម្ពុជា-សមាគមអ្នកភ្លេង នឹងមានការចងក្រងឯកសារមរតករស់រួមគ្នា នាពេលខាងមុខ appeared first on Kampuchea Thmey Daily.

ឯកឧត្ដម ហ៊ុន ម៉ានី ៖ ការអប់រំផ្សព្វផ្សាយអំពី វប្បធម៌ អរិយធម៌ខ្មែរ តាមរយៈបទភ្លេង ពិតជាមានសារៈសំខាន់ណាស់

អ៊ិន ពិសី — Mon, 25 Mar 2024 09:24:46 +0000

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ លើកឡើងថា ការអប់រំ និងការផ្សព្វផ្សាយអំពី វប្បធម៌ អរិយធម៌ខ្មែរ តាមរយៈបទភ្លេង ពិតជាមានសារៈសំខាន់ណាស់។

ការលើកឡើងនេះ ក្នុងឱកាស ឯកឧត្ដម ហ៊ុន ម៉ានី បានទទួលជួបសម្ដែងការគួរសម និងសំណេះសំណាលជាមួយប្រតិភូសមាគមអ្នកភ្លេង នៅទីស្ដីការក្រសួងមុខងារសាធារណៈ កាលពីព្រឹកថ្ងៃទី ២៥ ខែមីនា ឆ្នាំ ២០២៤ នេះ។

នាឱកាសនោះដែរ ឯកឧត្ដម ហ៊ុន ម៉ានី បានចូលរួមអបអរសាទរ និងគាំទ្រយ៉ាងពេញទំហឹងទៅលើការបង្កើតសមាគមអ្នកភ្លេង ដោយ ឯកឧត្ដម បញ្ជាក់អំពីសារៈសំខាន់ នៃវប្បធម៌ អរិយធម៌ និងសារៈសំខាន់ នៃបទភ្លេង ដែលជាការផ្សារភ្ជាប់ដួងព្រលឹងបុព្វបុរសខ្មែរសម័យមុន ជាមួយនឹងសម័យបច្ចុប្បន្ន និងឆ្ពោះទៅកាន់ការថែរក្សាបាននូវអត្តសញ្ញាណ នៃវប្បធម៌ខ្មែរ ឆ្ពោះទៅថ្ងៃអនាគត។

ទន្ទឹមនោះ ឯកឧត្ដមឧបនាយករដ្ឋមន្ត្រី បានលើកឡើងថា «ការអប់រំ និងការផ្សព្វផ្សាយអំពីវប្បធម៌ អរិយធម៌ខ្មែរ តាមរយៈបទភ្លេង ពិតជាមានសារៈសំខាន់ណាស់ ហើយក៏បានលើកទឹកចិត្ត និងផ្ដល់ជាអនុសាសន៍ជូនទៅដល់សមាគមអ្នកភ្លេង ចូលរួមជាផ្នែកណាមួយនៅក្នុងយន្តការរបស់រាជរដ្ឋាភិបាល ដើម្បីធ្វើឲ្យសមាគមកាន់តែមានសកម្មភាពផុលផុស និងធ្វើការផ្សព្វផ្សាយវប្បធម៌ អរិយធម៌ តាមរយៈបទភ្លេងឲ្យកាន់តែទូលំទូលាយ»។

ជាមួយគ្នានោះ ឯកឧត្ដមសាស្ត្រាចារ្យ ព្រឿង ឈៀង ដែលតំណាងដល់សមាគមអ្នកភ្លេងទាំងអស់ បានរៀបរាប់អំពីរបាយការណ៍ និងសកម្មភាព ដោយលើកឡើងថា សមាគមអ្នកភ្លេង ត្រូវបានបង្កើតឡើង កាលពីថ្ងៃទី ២៧ ខែមេសា ឆ្នាំ ២០២៣ ដោយឈរលើចក្ខុវិស័យ និងមានបេសកកម្មរបស់សមាគមអ្នកភ្លេង មានសូចនាករ ៣ ក្នុងវិស័យវប្បធម៌ ៖ ១-ការអប់រំ បញ្ញា និងចែករំលែក។ ២-ការស្រាវជ្រាវ ចងក្រងសិល្បៈវប្បធម៌បុរាណខ្មែរ និង ៣-បង្កើតការងារឲ្យយុវជន និងលើកស្ទួយការងារសង្គមកិច្ច។

គួរជម្រាបថា ប្រតិភូអញ្ជើញចូលរួម នាព្រឹកមិញនេះ សុទ្ធសឹងតែជាសាស្ត្រាចារ្យដែលបានឆ្លងកាត់នូវការវិវត្តន៍របស់សង្គម និងវប្បធម៌ជាច្រើនជំនាន់៕

អត្ថបទ ៖ ពិសី

The post ឯកឧត្ដម ហ៊ុន ម៉ានី ៖ ការអប់រំផ្សព្វផ្សាយអំពី វប្បធម៌ អរិយធម៌ខ្មែរ តាមរយៈបទភ្លេង ពិតជាមានសារៈសំខាន់ណាស់ appeared first on Kampuchea Thmey Daily.

សមាគមអ្នកភ្លេង Archives - Kampuchea Thmey Daily

រាជបណ្ឌិត្យសភាកម្ពុជា-សមាគមអ្នកភ្លេង នឹងមានការចងក្រងឯកសារមរតករស់រួមគ្នា នាពេលខាងមុខ

ឯកឧត្ដម ហ៊ុន ម៉ានី ៖ ការអប់រំផ្សព្វផ្សាយអំពី វប្បធម៌ អរិយធម៌ខ្មែរ តាមរយៈបទភ្លេង ពិតជាមានសារៈសំខាន់ណាស់