លោក ហូត ហាក់ រដ្ឋមន្ត្រី​ក្រសួង​ទេសចរណ៍​បាន​អះអាង​ថា ការ​​ដាក់​ឲ្យដំណើរការ​អេប​កម្មវិធី​ទស្សនាកម្ពុជា នឹង​ជួយ​​ផ្សព្វផ្សាយ​បង្កើន​ភ្ញៀវ​​ទេសចរ​មក​ទស្សនា​ប្រទេស​កម្ពុជា​កាន់តែ​ច្រើន​ថែម​ទៀត។

​

ថ្លែង​ចូលរួម​​នៅ​ក្នុង​វេទិកា​ពិព័រណ៍វិស័យផ្គត់ផ្គង់ម្ហូបអាហារ ភេសជ្ជៈ សណ្ឋាគារ និងបដិសណ្ឋារកិច្ចអន្តរជាតិនៅ​កម្ពុជា CAMFOOD/​CAMHOTEL នៅ​ព្រឹក​មិញ​នេះ រដ្ឋមន្ត្រី​ក្រសួង​ទេសចរណ៍​បាន​​​គូស​បញ្ជាក់ថា កម្មវិធី​នេះ​អាច​​ផ្តល់​ព័ត៌មាន​ដល់ភ្ញៀវ​ទេសចរជាតិនិងអន្តរជាតិ ​​ស្វែង​យល់​ពី​តំបន់​​សក្ដានុពល​ទេសចរណ៍​ដ៏សំបូរបែប​នៅ​​​ក្នុង​ប្រទេស​កម្ពុជា​ សម្រាប់​ជ្រើសរើស​ជា​គោលដៅ​​មក​កម្សាន្ត។

បើតាមលោក​រដ្ឋមន្រ្តី កម្មវិធីនេះ​នឹង​​ប្រកាស​ដាក់​ឲ្យដំណើរការ​ឆាប់ៗ​នេះ ក្រោម​វត្តមាន​​សម្តេច​ធិបតី ហ៊ុន ម៉ាណែត នាយករដ្ឋមន្រ្តីនៃ​កម្ពុជា។

ថ្លែង​ក្នុង​ឱកាសនោះដែរ​ លោក ហួត ហាក់ ​រដ្ឋមន្ត្រី​ក្រសួង​ទេសចរណ៍ក៏​បាន​បង្ហាញ​ពី​តួលេខ​​​កំណើន​ភ្ញៀវ​ទេសចរ​បរទេស​មក​កម្សាន្ត​ប្រទេស​កម្ពុជា​។

បើតាមលោក​​រដ្ឋមន្ត្រី​ ​នៅ​ក្នុង​​ឆ្នាំ ២០២៤ ទេសចរ​បរទេស​មកទស្សនា​ប្រទេស​កម្ពុជាមាន​ចំនួន ៦.៧ លាន​នាក់ កើន​ឡើង ២៣% បើ​ធៀប​ឆ្នាំ ២០២៣។ ដោយ​ឡែក​ក្នុង​រយៈពេល ៩ ខែ​ឆ្នាំ ២០២៥ កម្ពុជា​ទទួល​បាន​ភ្ញៀវ​ទេសចរ​បរទេស​មក​កម្សាន្ត​ប្រមាណ ៤,៣៨ លាន​នាក់។

វិស័យ​ទេសចរណ៍​បាន​រួម​ចំណែកបង្កើត​ការងារ​​ដល់​ពលរដ្ឋ។ វិស័យ​​គ្មានផ្សែងនេះ​​បាន​ចាក់ចំណូល​​ចូលក្នុង​ចរន្ត​សេដ្ឋកិច្ច​ជាតិរាប់ពាន់លានដុល្លារក្នុងមួយឆ្នាំ។

លើកឡើងក្នុង​វេទិកា​ពិព័រណ៍វិស័យផ្គត់ផ្គង់ម្ហូបអាហារ ភេសជ្ជៈ សណ្ឋាគារ និងបដិសណ្ឋារកិច្ចអន្តរជាតិនៅ​កម្ពុជា លោក លឹម សុជាតិ អនុប្រធាន​សភា​ពាណិជ្ជកម្ម​កម្ពុជា​ ក៏​បានជំរុញ​ឲ្យមានការ​ផ្សព្វផ្សាយពី​​​ទេសចរណ៍​ម្ហូបអាហារ​សម្រាប់​ទាក់ទាញ​ទេសចរមក​កម្សាន្ត​ប្រទេស​កម្ពុជា​។

លោកថា ទេសចរណ៍​ម្ហូបអាហារ គឺជា​ចំណែក​ទីផ្សារហើយ​ជាផលិតផលទេសចរណ៍ដ៏សំខាន់ដែលរួមចំណែកលើទីផ្សារទេសចរណ៍​ទាំងមូល។ ម្ហូបអាហារបង្កើតនូវការចងចាំដ៏ល្អសម្រាប់ទេសចរអំឡុងពេលធ្វើដំណើរ ហើយ​ក៏​អាច​ជា​ចំណែក​មួយសម្រាប់​ទាក់ទាញ​ទេសចរ​មក​កម្សាន្តប្រទេស​កម្ពុជា៕

The post ​App ​ទស្សនា​​កម្ពុជា នឹង​ដាក់​ឲ្យ​ដំណើរការ​ឆាប់ៗ ជំរុញ​ផ្សព្វផ្សាយ​សក្ដានុពល​ទេសចរ​កម្ពុជា​ ទៅ​កាន់​ពិភពលោក appeared first on Kampuchea Thmey Daily.

នេះបើតាម​ក្នុង​ជំនួបរវាង​លោក ហួត ហាក់ រដ្ឋមន្រ្តីក្រសួងទេសចរណ៍ និង​លោក Jacques Pellet ឯកអគ្គរដ្ឋ​ទូត​វិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំនៅកម្ពុជា ដែល​បានជជែក​ពិភាក្សា​សម្រាប់ការ​​ត្រៀមបើកដំណើរ​ការសាលាវិជ្ជាជីវៈទេសចរណ៍ដំបូងគេនៅប្រទេសកម្ពុជា។

សាលាវិជ្ជាជីវៈទេសចរណ៍ ត្រូវបានគាំទ្រនិងផ្តល់ហិរញ្ញប្បទានដោយទីភ្នាក់ងារបារាំងសម្រាប់​ការ​អភិវឌ្ឍន៍ (AFD) សម្រាប់ធ្វើការបណ្តុះបណ្តាលលើ ៤ មុខជំនាញ​ដែលមាន​៖ (១) ផ្នែកសេវាកម្មសណ្ឋាគារ និងស្នាក់នៅទេសចរណ៍ (២) ផ្នែកសេវាកម្មម្ហូបអាហារ និងភេសជ្ជៈ (៣) ផ្នែកសេវាកម្មធ្វើដំណើរ និង (៤) ផ្នែកសេវាកម្មទេសចរណ៍ស្របទៅតាមស្តង់ដាជាតិ និងអាស៊ាន។

សាលាវិជ្ជាជីវៈដែល​ត្រៀម​បើក​ដំណើរការ​មាន ២ ទីតាំង គឺនៅរាជធានីភ្នំពេញស្ថិតនៅផ្លូវលេខ ១០០៣ ភូមិប៉ាយ៉ាប សង្កាត់​ភ្នំពេញថ្មី ខណ្ឌសែនសុខ រាជធានីភ្នំពេញ សាងសង់លើផ្ទៃដីទំហំ ៤,០០០ម² មា​នអគារចំនួន ២ ខាងមុខ ២ ជាន់ និង ខាងក្រោយ ៤ ជាន់ ហើយនៅខេត្តព្រះសីហនុ គឺស្ថិតផ្លូវសុភមង្គល ភូមិ២ សង្កាត់លេខ២ ខេត្តព្រះសីហនុ (ជាទីតាំងមន្ទីរទេសចរណ៍ខេត្ត) សាងសង់លើផ្ទៃដីទំហំ ១.៧៧៥ ម៉ែត្រការ៉េ មានអាគារចំនួន ១ កំពស់ ៤ ជាន់ លយមកខាងមុខ១ជាន់។

បច្ចុប្បន្ននេះ សាលាវិជ្ជាជីវៈទាំងពីរ បានសាងសង់ចប់ជាស្ថាពរ និងបានបំពាក់សម្ភារៈបរិក្ខារស្ទើរតែទាំងស្រុងហើយ គ្រោងបើកដំណើរការសាកល្បងនាថ្ងៃទី២៧ ខែមិថុនា ឆ្នាំ២០២៥ ខាងមុខ៕

The post សាលាវិជ្ជាជីវៈទេសចរណ៍ដំបូងគេនៅកម្ពុជា ​បើក​ដំណើរការ​ចុងខែ​នេះ​ ផ្តោត​សិក្សា​លើ ៤ មុខ​ជំនាញ appeared first on Kampuchea Thmey Daily.

ការកំណត់យកឆ្នាំ២០២៤ ជា “ឆ្នាំនៃការផ្លាស់ប្តូរប្រជាជន​ និងប្រជាជនកម្ពុជា-ចិន” បានពង្រឹងចំណងមិត្តភាព និងកិច្ចសហប្រតិបត្តិការ ​ការបង្កើនទំនាក់ទំនងលើវិស័យទេសចរណ៍ និងពាណិជ្ជកម្ម និងការផ្លាស់ប្តូរវប្បធម៌គ្នាទៅវិញទៅមករវាងប្រជាជនកម្ពុជា​ចិន។

តាម​រយៈ​យុទ្ធនាការ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន» ក៏​មាន​ការ​រៀបចំ​ព្រឹត្តិការណ៍​ធំ​ៗ​ជាច្រើន ដើម្បី​​​ផ្សព្វផ្សាយពីវប្បធម៌ ប្រពៃណី សក្តានុពលទេសចរណ៍ និងទំនាក់ទំនងរវាងប្រជាជន​ទាំងពីរ​ក្នុង​នោះ​មាន​ដូចជា «ព្រឹត្តិការណ៍​ពិព័រណ៍​វប្បធម៌​ទេសចរណ៍ និង​ការ​សម្ដែង​ក្បាច់គុនសាវ​លីញ និង​គុន​ល្បុក្កតោ​នៅអង្គរ (When Shaolin Meets Bokator At Angkor)», ពិព័រណ៍​ម្ហូបអាហារ កម្ពុជា-ចិន នៅ​ខេត្តសៀមរាប, វេទិកា​ទេសចរណ៍ និង​វប្បធម៌ព្រះពុទ្ធសាសនា កម្ពុជា-ចិន នៅខេត្ត​សៀមរាប និង​ព្រឹត្តិការណ៍​ពិព័រណ៍​ទេសចរណ៍​កម្ពុជា-ចិន។

ឆ្នាំ២០២៤ ដែល​ជាឆ្នាំផ្លាស់ប្តូប្រជាជន និងប្រជាជនកម្ពុជា​ចិន ក៏​ឃើញ​​មាន​កំណើន​​ភ្ញៀវទេសចរចិនមក​ទស្សនា​ប្រទេស​កម្ពុជាកើនឡើង​ខ្លាំង​បើធៀបនឹងឆ្នាំ២០២៣។

លោក Wang Wenbin ឯកអគ្គរដ្ឋទូតចិនប្រចាំកម្ពុជាបានគូស​បញ្ជាក់​ថា ក្នុងឆ្នាំ២០២៤ ដែល​ជាឆ្នាំផ្លាស់ប្តូប្រជាជន និងប្រជាជន ភ្ញៀវទេសចរចិនជាង ៨៤០ ០០០នាក់ បានមកទស្សនាកម្ពុជាកើនឡើង ៥៥ ភាគរយ បើធៀបនឹងឆ្នាំ​២០២៣​។

លោក​ក៏​រំពឹង​ទុក​ដែរ​ថា នៅឆ្នាំ២០២៥ ភ្ញៀវទេសចរចិននឹងមកទស្សនាកម្ពុជាកាន់តែច្រើនជាងឆ្នាំ២០២៤។

រយៈពេលប៉ុន្មានឆ្នាំចុងក្រោយនេះ ផ្តើមចេញពី​គោល​​នយោបាយ​នៃ​ចំណងមិត្តភាព​ដែកថែប និង​កិច្ច​សហប្រតិបត្តិ​ការ​ត្បូង​ពេជ្រ​កម្ពុជា​-​ចិន ក្រោម​គំនិត​ផ្តួចផ្តើម​ពី​ថ្នាក់ដឹកនាំ​ក​ម្ពុ​ជា និង​ចិន​ បានបង្កើតកិច្ចសហប្រតិបត្តិការ​រួមទាំង​សម្រេច​បាន​សមិទ្ធផលផ្លែផ្កា​ជាច្រើន​ក្នុងនោះមានដូចជា​ការ​សាងសង់​អាកាសយានដ្ឋានអន្តរជាតិសៀមរាបអង្គរ ដែល​បាន​សម្ពោធ​ដាក់​​ឲ្យដំណើរការ​កាលពីឆ្នាំ ២០២៣​ គម្រោងសាងសង់ផ្លូវល្បឿន​លឿនភ្នំពេញ-សៀមរាប- ប៉ោយប៉ែត មជ្ឈមណ្ឌលឱសថបុរាណចិន-កម្ពុជា និងសាកលវិទ្យាល័យខេមតិច។

កាលពី​ថ្ងៃទី ២៣ ដល់ថ្ងៃទី ២៥ ខែកុម្ភៈ ឆ្នាំ២០២៥ លោក សុខ ចិន្តាសោភា ឧបនាយករដ្ឋមន្ត្រីក៏​បាន​ដឹកនាំប្រតិភូ​​​កម្ពុជា​ចូលរួម​ក្នុងពិធីបិទ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤» ដែល​រៀប​ចំ​ឡើង​រយៈពេល ៣ ថ្ងៃ នៅទីក្រុង Zhengzhou ខេត្ត Henan ប្រទេសចិន។

ក្នុង​ពិធី​បិទ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន» មាន​ការ​បង្ហាញ​ផ្ទាំង​ទស្សនីយភាព ការ​សម្ដែង​សិល្បៈ របាំ​ប្រពៃណី ការសម្ដែងសិល្បៈក្បាច់គុនសាវលីញ និង​ល្បុកតោ និងការប្រគុំតន្ត្រីនិង​សម្ដែង​រួមគ្នា ដោយសិល្បករ សិល្បការនី​នៃប្រទេស​ទាំងពីររាប់រយ​នាក់ ​អមដោយវីដេអូផ្សព្វផ្សាយ​គោលដៅ​ទេសចរណ៍កម្ពុជា​ផង​ដែរ៕

The post បញ្ចប់​យុទ្ធនាការ “ឆាំ្នផ្លាស់ប្ដូរប្រជាជននិង ប្រជាជន កម្ពុជា-ចិន ២០២៤» កម្ពុជា​-ចិន សម្រេច​​បាន​សមិទ្ធផល​អ្វី​ខ្លះ? appeared first on Kampuchea Thmey Daily.

ការប្រកាសដាក់ឱ្យដំណើរការប្រព័ន្ធថ្មីនេះ បានធ្វើឡើងក្រោមអធិបតីភាពរបស់លោកឧបនាយករដ្ឋមន្ត្រី​ នេត​ សាវឿន​ តំណាងសម្តេចធិបតី​ ហ៊ុន​ ម៉ាណែត​ នាយករដ្ឋមន្ត្រីនៃកម្ពុជា​ នៅសណ្ឋាគារសុខាអង្គរ នាទឹកដីខេត្តសៀមរាប។

ការដាក់ឱ្យអនុវត្តជាផ្លូវការប្រព័ន្ធលក់សំបុត្រ និងការត្រួតពិនិត្យសំបុត្រចូ​លទស្ស​នា​​រមណីយដ្ឋានអង្គរនេះ ជាការដាក់ឱ្យអនុវត្តនូវថ្នាលឌីជីថលសម្រាប់ការលក់ និងការគ្រប់គ្រងការលក់សំបុត្រចូលទស្សនារមណីយដ្ឋានអង្គរ និងរមណីយដ្ឋានទេសចរណ៍ពាក់ព័ន្ធផ្សេងទៀត ក្រោមសមត្ថកិច្ចរបស់គ្រឹះស្ថានអង្គរ ដែលជាសមិទ្ធផលថ្មីមួយទៀត របស់រាជរដ្ឋាភិបាល ក្នុងកិច្ចប្រឹងប្រែងធ្វើឱ្យប្រសើរឡើងការផ្តល់សេវាជូនដល់អ្នកទេសចរអន្តរជាតិ, ការជំរុញការទាក់ទាញទេសចរអន្តរជាតិ និង ការលើកកម្ពស់កំណើនសេដ្ឋកិច្ចជាតិ។

រាជរដ្ឋាភិបាល បានចាត់ទុកវិស័យទេសចរណ៍ជាមាសបៃតង និងជាសសរស្តម្ភមួយដ៏សំខាន់ ដែលជួយដល់ការជំរុញកំណើនសេដ្ឋកិច្ច បង្កើតឱកាសការងារ និងលើកស្ទួយវប្បធម៌ជាតិ។ ទេសចរណ៍ ជាវិស័យមួយដែលមានការរីកចម្រើនយ៉ាងរហ័ស តាមរយៈការចាប់យកនូវបច្ចេកវិទ្យាថ្មី ជាពិសេសបច្ចេកវិទ្យាឌីជីថល ដែលរួមចំណែកយ៉ាងសំខាន់ក្នុងការគ្រប់គ្រង និងការស្តារឡើងវិញនៃឧស្សាហកម្មទេសចរណ៍។

លោកឧបនាយករដ្ឋមន្រ្តី នេត​ សាវឿន បានថ្លែងចាត់ទុកសមិទ្ធផលការងារនៅថ្ងៃនេះ ថា បានសរបញ្ជាក់ពីវឌ្ឍនភាពនៃវិស័យទេសចរណ៍បន្ទាប់ពីទទួលរងដោយវិបត្តិកូវីដ១៩ ហើយជាការងារបន្តគ្រប់ស្ថានប័នពាក់ព័ន្ធទាំងអស់ មិនចំពោះតែវិស័យទេចរណ៍នោះទេ ត្រូវរួមគ្នាពង្រឹងគុណភាពបដិសណ្ឋារកិច្ច សេវាកម្មទេសចរណ៍ និងតម្លៃឱ្យបានល្អប្រសើរ ដើម្បីលើកកម្ពស់កិត្យានុភាពរបស់កម្ពុជា តាមរយៈការផ្សព្វផ្សាយសក្តានុពលទេសចរណ៍ សុខសន្តិភាព រួមនឹងសោភ័ណភាព ភាពស្អាតរបស់កម្ពុជាក្នុងចំណោមទេសចរជាតិ និងអន្តរជាតិ។  

រាជរដ្ឋាភិបាល បានបង្កើតគ្រឹះស្ថានអង្គរ ដែលជាគ្រឹះស្ថានសាធារណៈរដ្ឋបាល នៅថ្ងៃទី២១ ខែមករា ឆ្នាំ២០១៦ ជាអង្គភាពថ្មីមួយសម្រាប់ធ្វើការគ្រប់គ្រងការប្រមូល និងការបង់ចំណូលពីការលក់សំបុត្រចូលទស្សនារមណីយដ្ឋានអង្គរ ដោយមានក្រសួងសេដ្ឋកិច្ច និងហិរញ្ញវត្ថុ ជាអាណាព្យាបាលហិរញ្ញវត្ថុ និងក្រសួងទេសចរណ៍ ជាអាណាព្យាបាលបច្ចេកទេស ៕

The post កម្ពុជាដាក់ឱ្យដំណើរការប្រព័ន្ធថ្មីនៃការលក់ និងត្រួតពិនិត្យសំបុត្រ​ចូល​ទស្សនា​រមណីយដ្ឋានអង្គរ appeared first on Kampuchea Thmey Daily.