ព័ត៌មានជាតិ

សាលាវិជ្ជាជីវៈទេសចរណ៍ដំបូងគេនៅកម្ពុជា បើកដំណើរការចុងខែនេះ ផ្តោតសិក្សាលើ ៤ មុខជំនាញ

បានផុស

១ year មុន

នៅ

ថ្ងៃព្រហស្បតិ៍ ១៩ មិថុនា ២០២៥

ដោយ

សាលាវិជ្ជាជីវៈទេសចរណ៍ដំបូងគេនៅកម្ពុជា ដែលផ្តោតលើការបណ្តុះបណ្តាលជំនាញទេសចរណ៍ និងបដិសណ្ឋាកិច្ចត្រៀមនឹងចាប់ផ្តើមបើកឲ្យដំណើការនៅចុងខែមិថុនានេះ ក្រោយបញ្ចប់ការសាងសង់រួចរាល់។

នេះបើតាមក្នុងជំនួបរវាងលោក ហួត ហាក់ រដ្ឋមន្រ្តីក្រសួងទេសចរណ៍ និងលោក Jacques Pellet ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំនៅកម្ពុជា ដែលបានជជែកពិភាក្សាសម្រាប់ការត្រៀមបើកដំណើរការសាលាវិជ្ជាជីវៈទេសចរណ៍ដំបូងគេនៅប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាលាវិជ្ជាជីវៈទេសចរណ៍ ត្រូវបានគាំទ្រនិងផ្តល់ហិរញ្ញប្បទានដោយទីភ្នាក់ងារបារាំងសម្រាប់ការអភិវឌ្ឍន៍ (AFD) សម្រាប់ធ្វើការបណ្តុះបណ្តាលលើ ៤ មុខជំនាញដែលមាន៖ (១) ផ្នែកសេវាកម្មសណ្ឋាគារ និងស្នាក់នៅទេសចរណ៍ (២) ផ្នែកសេវាកម្មម្ហូបអាហារ និងភេសជ្ជៈ (៣) ផ្នែកសេវាកម្មធ្វើដំណើរ និង (៤) ផ្នែកសេវាកម្មទេសចរណ៍ស្របទៅតាមស្តង់ដាជាតិ និងអាស៊ាន។

សាលាវិជ្ជាជីវៈដែលត្រៀមបើកដំណើរការមាន ២ ទីតាំង គឺនៅរាជធានីភ្នំពេញស្ថិតនៅផ្លូវលេខ ១០០៣ ភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ សាងសង់លើផ្ទៃដីទំហំ ៤,០០០ម² មានអគារចំនួន ២ ខាងមុខ ២ ជាន់ និង ខាងក្រោយ ៤ ជាន់ ហើយនៅខេត្តព្រះសីហនុ គឺស្ថិតផ្លូវសុភមង្គល ភូមិ២ សង្កាត់លេខ២ ខេត្តព្រះសីហនុ (ជាទីតាំងមន្ទីរទេសចរណ៍ខេត្ត) សាងសង់លើផ្ទៃដីទំហំ ១.៧៧៥ ម៉ែត្រការ៉េ មានអាគារចំនួន ១ កំពស់ ៤ ជាន់ លយមកខាងមុខ១ជាន់។

បច្ចុប្បន្ននេះ សាលាវិជ្ជាជីវៈទាំងពីរ បានសាងសង់ចប់ជាស្ថាពរ និងបានបំពាក់សម្ភារៈបរិក្ខារស្ទើរតែទាំងស្រុងហើយ គ្រោងបើកដំណើរការសាកល្បងនាថ្ងៃទី២៧ ខែមិថុនា ឆ្នាំ២០២៥ ខាងមុខ៕