សម្ភារៈសង្គ្រោះ Archives - Kampuchea Thmey Daily

គណៈកម្មាធិការជាតិគ្រប់គ្រងគ្រោះមហន្តរាយចុះត្រួតពិនិត្យសម្ភារៈត្រៀមជួយសង្គ្រោះពលរដ្ឋ

KC Virak — Tue, 22 Jun 2021 05:10:03 +0000

ភ្នំពេញ៖ លោកឧត្តមសេនីយ៍ឯក ច័ន្ទ លំផាត់ អនុប្រធាន គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) តំណាង នាយឧត្តមសេនីយ៍ គន់ គីម ទេសរដ្ឋមន្ត្រី អនុប្រធានទី១ គ.ជ.គ.ម. បានដឹកនាំក្រុមការងារចុះត្រួតពិនិត្យសម្ភារៈសង្គ្រោះគ្រោះមហន្តរាយ នៅទីបញ្ជាការដ្ឋានវិស្វកម្ម ដើម្បីត្រៀមជួយសង្គ្រោះដល់ប្រជាពលរដ្ឋខណៈរដូវទឹកឡើងនឹងឈានចូលមកដល់នាពេលដ៏ខ្លីខាងមុខនេះ។

លោកមេបញ្ជាការរងនៃបញ្ជាការដ្ឋានវិស្វកម្ម បានមានប្រសាសន៍ថា កងកម្លាំងវិស្វកម្មតែងបានចូលរួមចំណែកយ៉ាងសកម្មក្នុងបេសកកម្មឆ្លើយតបសង្គ្រោះគ្រោះមហន្តរាយផ្សេងៗ ពិសេសការរលំបាក់អគារ ទឹកជំនន់ ហើយបច្ចុប្បន្នកងកម្លាំងមួយចំនួនធំកំពុងចុះបំពេញបេសកកម្មនៅតាមបណ្តាខណ្ឌនានាក្នុងរាជធានីភ្នំពេញ លើការងារពាក់ព័ន្ធកូវីដ-១៩។

លោកបានបញ្ជាក់ថា ទូក និងសម្ភារៈសង្គ្រោះផ្សេងៗដែលនាយឧត្តមសេនីយ៍ ទេសរដ្ឋមន្ត្រី បានផ្តល់ជូនកន្លងមក គឺត្រូវបានរក្សាទុក និងថែទាំយ៉ាងល្អសម្រាប់ប្រើប្រាស់ក្នុងការជួយសង្គ្រោះប្រជាជន។ ចំពោះកងកម្លាំង ក៏ត្រូវបានបញ្ជូនឱ្យធ្វើការហ្វឹកហ្វឺនជាមួយកងពលផ្សេងៗដូចជា បញ្ជាការដ្ឋានទ័ពពិសេស ង៧០ជាដើម និងតែងធ្វើការប្រជុំតាមប្រព័ន្ធវីដេអូជាមួយកងកម្លាំងសង្គ្រោះទៀងទាត់រៀងរាល់សប្តាហ៍ ដើម្បីដាស់តឿន និងពង្រឹងសមត្ថភាពកងកម្លាំង។

លោក ច័ន្ទ លំផាត់ បានកោតសរសើរចំពោះកងកម្លាំង ដែលបានចូលរួមយ៉ាងសកម្មក្នុងការចល័តកម្លាំងជួយក្នុងបេសកកម្មឆ្លើយតបសង្គ្រោះប្រជាជនរងគ្រោះដោយគ្រោះមហន្តរាយផ្សេងៗ និងបញ្ហាកូវីដ-១៩ នាពេលបច្ចុប្បន្ននេះ។

ក្នុងឱកាសនោះ លោក ច័ន្ទ លំផាត់ បានលើកទឹកចិត្តឱ្យកងកម្លាំងទាំងអស់ហ្វឹកហាត់ដុសខាត់ជំនាញឱ្យបានជាប្រចាំ ដើម្បីត្រៀមឆ្លើយតបទឹកជំនន់ ដែលអាចកើតឡើងក្នុងឆ្នាំ២០២១នេះ និងការសង្គ្រោះលើមុខសញ្ញាផ្សេងៗទៀតជាយថាហេតុ។

ចំណែកលោក គីម វីរៈ ទីប្រឹក្សា គ.ជ.គ.ម. ក៏បានលើកទឹកចិត្តដល់កងកម្លាំងហ្វឹកហ្វឺនលើការប្រើប្រាស់សម្ភារៈដែលបានផ្តល់ជូនកន្លងមក និងត្រៀមខ្លួនជាប្រចាំ ព្រោះគ្រោះមហន្តរាយនឹងអាចកើតឡើងដោយពុំប្រាប់យើងមុនឡើយ៕

អត្ថបទ៖ សំអឿន

The post គណៈកម្មាធិការជាតិគ្រប់គ្រងគ្រោះមហន្តរាយចុះត្រួតពិនិត្យសម្ភារៈត្រៀមជួយសង្គ្រោះពលរដ្ឋ appeared first on Kampuchea Thmey Daily.

សម្ភារៈសង្គ្រោះគ្រោះមហន្តរាយទម្ងន់១៥តោន ត្រូវបាននាវាកងទ័ពជើងទឹកឥណ្ឌា ដឹកមកជូនកម្ពុជាដោយផ្ទាល់

Kang Tola — Wed, 30 Dec 2020 11:00:21 +0000

សម្ភារៈសង្គ្រោះគ្រោះមហន្តរាយទម្ងន់១៥តោន សរុបជាថវិកាប្រមាណ១១ ម៉ឺនដុល្លារ ត្រូវបានរដ្ឋាភិបាល នៃសាធារណរដ្ឋឥណ្ឌា ដឹកមកជូនរាជរដ្ឋាភិបាល និងប្រជាជននៃព្រះរាជាណាចក្រកម្ពុជាដោយផ្ទាល់ តាមរយៈនាវាកងទ័ពជើងទឹកឥណ្ឌា១គ្រឿង និងបានចូលចតកាលពីថ្ងៃទី៣០ ខែធ្នូ ឆ្នាំ២០២០ នៅមូលដ្ឋានកងទ័ពជើងទឹកសមុទ្ររាម ហើយពិធីប្រគល់ និងទទួលជំនួយរបស់រដ្ឋាភិបាលឥណ្ឌានេះ បានធ្វើឡើងកាលពីថ្ងៃទី៣០ ខែធ្នូ ឆ្នាំ២០២០។

លោក កែវ វី ទីប្រឹក្សាជាន់ខ្ពស់ នៃគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ អ្នកសារព័ត៌មានថា នាវាកងទ័ពជើងទឹកឥណ្ឌាដឹកសម្ភារសម្រាប់ការងារជួយសង្គ្រោះសរុបជា ថវិកាប្រមាណ១១ម៉ឺនដុល្លារមកប្រគល់ជូនគណៈកម្មាធិការជាតិគ្រប់គ្រងគ្រោះមហន្តរាយ ហើយសម្ភារទាំងនោះរួមមាន កន្ទេលសំយោគចំនួន៣០០០ ភួយចំនួន៣០០០ សម្ភារសម្រាប់ កងកម្លាំងជួយសង្គ្រោះបុរស ១៥០០ឃីត ឬកញ្ចប់ (១ឃីតមានចំនួន១៥ ប្រភេទ) និងសម្ភារ សម្រាប់កងកម្លាំងស្ដ្រី១៥០០ ឃីតផងដែរ។

សូមបញ្ជាក់ថា នាវាកងទ័ពជើងទឹកសាធារណរដ្ឋឥណ្ឌា១គ្រឿង ដែលមានឈ្មោះថា “INS KILTAN” មាន ទទឹង១៣ម., បណ្តោយ ១១០ម., ជម្រៅទឹក ០៧ម. និងទម្ងន់ផ្ទុក៣.១៥០តោន បានចូលចតនៅកំពង់ផែស្វយ័តក្រុងព្រះសីហនុ កាលពីថ្ងៃទី២៩ ខែធ្នូ ឆ្នាំ២០២០ ដើម្បីប្រគល់សម្ភារសង្គ្រោះទឹកជំនន់មួយចំនួនជូនដល់គណៈកម្មាធិការជាតិគ្រប់គ្រងគ្រោះមហន្តរាយកម្ពុជា។

នាវាកងទ័ពជើងទឹកឥណ្ឌានេះ ដឹកនាំដោយលោកវរនាវីទោ BK PONNAPPA ជាមេបញ្ជាការនិងជាប្រធានគណៈប្រតិភូកងទ័ពជើងទឹកសាធារណរដ្ឋឥណ្ឌា ដែលមាននាវិកសរុបចំនួន២០០នាក់ ហើយក្នុងដំណើរចូលចតរបស់នាវាកងទ័ពជើងទឹកឥណ្ឌានេះ មានការទទួលស្វាគមន៍ពីលោកឧត្តមនាវីត្រី អ៊ិន សុខេមរ៉ា នាយសេនាធិការរងតំណាងមូលដ្ឋានសមុទ្រកងទ័ពជើងទឹក និងនាយនាវីចំនួន១៥រូបផ្សេងទៀត។

ពិធីប្រគល់ និងទទួលបានធ្វើឡើងកាលពីព្រឹកថ្ងៃទី៣០ ខែធ្នូ ឆ្នាំ២០២០នេះ ក្រោមអធិបតីភាពលោក ជា សាមឿន អនុប្រធានគណៈកម្មាការជាតិគ្រប់គ្រងគ្រោះមហន្តរាយ និងមានការចូលរួមពីលោកឧត្តមនាវីត្រី អ៊ិន សុខេមរា នាយសេនាធិការរង តំណាងមូលដ្ឋានសមុទ្រ ហើយប្រគល់ជូនដោយលោក B.Subba Rao ភារធារីឥណ្ឌាប្រចាំព្រះរាជាណាចក្រកម្ពុជា។

បើតាមការគ្រោងទុក នាវាកងទ័ពជើងទឹកសាធារណរដ្ឋឥណ្ឌា ដែលមានឈ្មោះថា “INS KILTAN” នឹងត្រឡប់ចាកចេញពីកម្ពុជាវិញ នៅវេលាម៉ោង៩ព្រឹក ថ្ងៃសុក្រ ទី០១ ខែមករា ឆ្នាំ២០២១ ខាងមុខ៕
ដោយ ៖ កោះកែវ

The post សម្ភារៈសង្គ្រោះគ្រោះមហន្តរាយទម្ងន់១៥តោន ត្រូវបាននាវាកងទ័ពជើងទឹកឥណ្ឌា ដឹកមកជូនកម្ពុជាដោយផ្ទាល់ appeared first on Kampuchea Thmey Daily.