ចាប់ពីព្រឹកថ្ងៃទី១០ ខែមេសា ឆ្នាំ២០២៦ តទៅ នៅឯសួនរុក្ខជាតិអង្គរ (ក្បែរផ្លូវចូលទៅកាន់ប្រាសាទអង្គរវត្ត) បងប្អូនភ្ញៀវទេសចរអាចចូលមកកម្សាន្ត និងស្វែងយល់ពី៖ វត្តមានសត្វព្រៃដែលកំពុងរស់នៅដូចក្នុងព្រៃធម្មជាតិ។ សត្វសំខាន់រួមមាន៖ សត្វទោចមង្កុដ ភេខ្លួនរលោង ឈ្លូស ស្វា ឆ្មារដាវ សំពោចក្រអូប និងសត្វស្លាបស្អាតៗដូចជា ក្ងោក កេងកងតូច កេងកងធំ និងសត្វភូវាំង និងសត្វល្អិតតូចៗ។

លើសពីនេះ លោកអ្នកនឹងបានឃើញអាថ៌កំបាំងនៃពិភពសត្វល្អិត ដែលមាន រូបភាពប្លែកៗនៃស្រមោច កណ្ដៀរ ចង្រិត កណ្ដូប មេអំបៅ និងពីងពាង ដែលជាអ្នកថែរក្សាតុល្យភាពបរិស្ថាននៅក្នុងតំបន់អង្គរ។
រមណីយដ្ឋានអង្គរ មិនមែនមានតែប្រាសាទទេ តែមានទាំងធម្មជាតិ និងជីវិតសត្វព្រៃ។ លោក ជូ រ៉ាឌីណា អនុប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ បានបញ្ជាក់ថា ការតាំងបង្ហាញនេះចង់បង្ហាញពិភពលោកថា អង្គរបច្ចុប្បន្នជាទីកន្លែងដែល “វប្បធម៌ និងធម្មជាតិ រស់នៅជាមួយគ្នា”។ ក្រៅពីប្រាសាទបុរាណ ភ្ញៀវទេសចរនឹងបានឃើញព្រៃឈើខៀវស្រងាត់ និងសត្វព្រៃដែលកំពុងវិលត្រឡប់មកផ្ទះចាស់របស់ពួកគេវិញ។

ជោគជ័យដ៏ធំធេងមួយដែលត្រូវបានលើកឡើងដោយ លោក Nick Marx ទីប្រឹក្សាផ្នែកជីវចម្រុះ គឺចាប់តាំងពីឆ្នាំ២០១៣ មក សត្វព្រៃដែលបានព្រលែងបានកកើតយ៉ាងខ្លាំង ជាពិសេសសត្វទោចម្កុដ ដែលបង្កើតកូនបានរហូតដល់ ១១ក្បាល ក្នុងព្រៃអង្គរ។

លោកបានសង្កត់ធ្ងន់ថា៖ «ព្រៃអង្គរគឺជាកន្លែងលេខមួយ! ការការពារសត្វព្រៃ និងព្រៃឈើ ក៏សំខាន់មិនចាញ់ការថែរក្សាប្រាសាទបុរាណឡើយ»។

ចំពោះសារៈសំខាន់នៃ “សត្វល្អិតតូចៗ” ចំពោះពិភពលោក លោក Stephane De Greef អ្នកជំនាញខាងសត្វល្អិតតូចៗ បានរំលឹកថា បើគ្មានសត្វល្អិត ជីវិតនៅលើលោកក៏មិនអាចបន្តបានដែរ។ សត្វល្អិតជាអ្នកជួយលម្អងផ្កា និងជាចំណីអាហារក្នុងខ្សែចង្វាក់អាហារធម្មជាតិ។ លោកលើកទឹកចិត្តឱ្យយើងគ្រប់គ្នាឈប់ភ័យខ្លាច ឬសម្លាប់សត្វល្អិត តែត្រូវរៀនរស់នៅជាមួយពួកវា និងការពារពួកវាដើម្បីភាពគង់វង្សនៃធម្មជាតិ។

សូមអញ្ជើញមកកម្សាន្តក្នុងឱកាសសង្ក្រាន្តឆ្នាំថ្មី និងរួមគ្នាថែរក្សាបេតិកភណ្ឌខ្មែរទាំងវប្បធម៌ និងធម្មជាតិឱ្យបានគង់វង្ស!

អត្ថបទ៖ការិយាល័យផ្សព្វផ្សាយ
រូបភាព៖លោក ហាប់ គឹមអាន និងលោក ស៊ិន ប្រណី

The post បើលោកអ្នកមកលេងអង្គរក្នុងពេលចូលឆ្នាំថ្មីនេះ សូមកុំភ្លេចចូលទស្សនា “មិត្តសត្វព្រៃ និងពិភពសត្វល្អិត” នៅសួនរុក្ខជាតិអង្គរ appeared first on Kampuchea Thmey Daily.

លោក មាឃ បូរ៉ា អ្នកគ្រប់គ្រងទូទៅ នៃសួនរុក្ខជាតិអង្គរ បានឱ្យដឹងថា ក្នុងឱកាសបុណ្យចូលឆ្នាំថ្មីខាងមុខនេះ សួននឹងរៀបចំ “ពិព័រណ៍សត្វល្អិត និងសត្វស្លាប” ដើម្បីបង្ហាញពីជីវៈចម្រុះដែលកំពុងរស់នៅក្នុងបរិវេណសួន និងក្នុងតំបន់អង្គរ។ ការរៀបចំនេះ មានគោលបំណងចម្បងដើម្បីឱ្យភ្ញៀវទេសចរបានស្វែងយល់កាន់តែច្បាស់ពីដង្ហើមជីវិតរបស់សត្វលោក ដែលផ្សារភ្ជាប់យ៉ាងជិតស្និទ្ធជាមួយធម្មជាតិ។ បន្ថែមពីនេះ ក៏មានការតាំងបង្ហាញពីសត្វព្រៃកម្រមួយចំនួនដែលកំពុងមានវត្តមានក្នុងតំបន់អង្គរ ដូចជា ៖ សត្វភេ ទោចម្កុដ និងសត្វស្លាបចម្រុះប្រភេទ ដែលសុទ្ធសឹងជាសត្វទទួលបានការថែរក្សា និងអភិរក្សយ៉ាងយកចិត្តទុកដាក់ពីសំណាក់អាជ្ញាធរជាតិអប្សរា។

ក្រៅពីពិព័រណ៍សត្វ និងសួនរុក្ខជាតិដែលមានស្រាប់ សួនរុក្ខជាតិអង្គរ ក៏បានបង្កើនសោភ័ណភាពបន្ថែមតាមរយៈការរៀបចំ សួនផ្កាកូលាប និង សួនកេសរកូល (ផ្កាឡំអង់) ដើម្បីផ្តល់នូវចំណីចក្ខុដ៏ស្រស់ត្រកាលសម្រាប់អ្នកទស្សនា។ ទន្ទឹមនឹងនោះ ក៏មានការរៀបចំតំបន់កម្សាន្តសម្រាប់កុមារ និងការតុបតែងលម្អតាមរចនាប័ទ្មបុណ្យចូលឆ្នាំ ដើម្បីបង្កបរិយាកាសសប្បាយរីករាយជូនដល់ភ្ញៀវទេសចរមកពីគ្រប់ទិសទី។

គួររំឮកផងដែរថា សួនរុក្ខជាតិអង្គរ ត្រូវបានកែលម្អ និងបើកដំណើរការជាផ្លូវការកាលពីឆ្នាំ ២០២២។ គិតមកទល់ពេលនេះ សួនទទួលបានភ្ញៀវទេសចរចូលទស្សនាប្រមាណជាង ៦០ ម៉ឺននាក់ហើយ។ សួនរុក្ខជាតិអង្គរ បើកជូនសាធារណជនចូលទស្សនាដោយឥតគិតថ្លៃ ចាប់ពីថ្ងៃពុធ ដល់ថ្ងៃចន្ទ (ឈប់សម្រាករៀងរាល់ថ្ងៃអង្គារ) ចាប់ពីម៉ោង ៨:០០ ព្រឹក ដល់ម៉ោង ៦:០០ ល្ងាច៕

អត្ថបទ ៖ អាជ្ញាធរជាតិអប្សរា

The post សួនរុក្ខជាតិអង្គរ ត្រៀមរៀបចំព្រឹត្តិការណ៍ពិសេសៗ ដើម្បីស្វាគមន៍ភ្ញៀវទេសចរក្នុងឱកាសបុណ្យចូលឆ្នាំថ្មី appeared first on Kampuchea Thmey Daily.

លោក មាឃ បូរ៉ា មន្ត្រីគ្រប់គ្រងសួនរុក្ខជាតិអង្គរ បានឱ្យដឹងថា ក្នុងទំហំផ្ទៃដីប្រមាណ១៥ហិកតា សួនរុក្ខជាតិអង្គរ ត្រូវបានបែងចែកជា៥ផ្នែកខុសៗគ្នា រួមមាន៖ សួនឱសថ សួនផ្កា សួនអម្បូរត្នោត សួនលំនៅឋានខែ្មរ និងសត្វព្រៃជាដើម។ មកដល់ពេលនេះ អាជ្ញាធរជាតិអប្សរា បានយកចិត្តទុកដាក់ក្នុងការថែទាំ និងរៀបចំរហូតមានការវិវដ្ដរីកចម្រើនថ្មីៗ ដូចជា សួនផ្កាកូលាប និងសួនកេសកូល ក៏បានបង្កើតបន្ថែម រហូតមានភាពទាក់ទាញទេសចរជាតិ និងអន្តរជាតិ បានចូលមកទស្សនាជាហូរហែ។ ចាប់តាំងពីបើកដំណើរការមក ទេសចរជាតិ និងអន្តរជាតិ ចំនួនប្រមាណ៦០ម៉ឺននាក់ហើយ បានចូលមកទស្សនានៅទីនេះ ដោយឥតបង់ថ្លៃ។

លោក មាឃ បូរ៉ា បន្តថា សួនរុក្ខជាតិអង្គរ គឺជាមជ្ឈមណ្ឌលមួយ ដែលប្រមូលផ្តុំទៅដោយរុក្ខជាតិកម្រៗ ជិតផុតពូជជាច្រើនប្រភេទ ដោយរុក្ខជាតិខ្លះ ភ្ញៀវទេសចរនៅមិនទាន់បានស្គាល់នៅឡើយ។ ហេតុដូច្នេះទេសចរ មិនត្រឹមតែទស្សនា ដើម្បីទទួលបានអារម្មណ៍ថ្មីប្លែកជាមួយទេសភាពបៃតង និងទស្សនាសត្វកម្រៗប៉ុណ្ណោះទេ ប៉ុន្តែសួនរុក្ខជាតិអង្គរ ជាទីតាំងសិក្សាស្រាវជ្រាវបន្ថែម សម្រាប់សិស្សានុសិស្សថែមទៀតផង។ ត្បិតសួនរុក្ខជាតិអង្គរ មានទំហំធំលាតសន្ធឹងរហូតដល់១៥ហិកតា ដូច្នេះការថែទាំសួន ត្រូវការកម្លាំងពលកម្មច្រើន ដោយបែងចែកការថែទាំទៅតាមលក្ខណៈបច្ចេកទេសរៀងៗខ្លួន។

មន្ត្រីគ្រប់គ្រង សួនរុក្ខជាតិអង្គរបានបន្ថែមទៀតថា តាមរយៈចក្ខុវិស័យវែងឆ្ងាយ របស់ថ្នាក់ដឹកនាំអាជ្ញាធរជាតិអប្សរា និងបន្តអភិវឌ្ឍន៍សួនរុក្ខជាតិអង្គរ ឱ្យក្លាយជាសួនកម្រិតស្តងដារអន្តរជាតិ ដូចសួនដទៃទៀតនៅលើពិភពលោក។

សូមជម្រាបថា សួនរុក្ខជាតិអង្គរ មានទីតាំងនៅតាមបណ្ដោយ រុក្ខវិថីព្រះសីហនុ ជិតបុរីប្រិមប្រិយ។ សួនរុក្ខជាតិអង្គរ បើកឱ្យទេសចរជាតិ និងអន្តរជាតិ ចូលទស្សនាដោយឥតគិតថ្លៃ ចាប់ពីម៉ោង៨ព្រឹក រហូតដល់ម៉ោង៦ល្ងាច ចាប់ពីថ្ងៃពុធ រហូតដល់ថ្ងៃច័ន្ទ និងថ្ងៃបុណ្យជាតិ លើកលែងថ្ងៃអង្គារប៉ុណ្ណោះ៕

អត្ថបទ៖ ជុន កុសល

The post សួនរុក្ខជាតិអង្គរ ជាមជ្ឈមណ្ឌលប្រមូលផ្តុំទៅដោយសត្វ និងរុក្ខជាតិកម្រ សម្រាប់សាធារណជនបានស្គាល់ និងស្វែងយល់ appeared first on Kampuchea Thmey Daily.

គ្រប​ដណ្តប់​លើ​ផ្ទៃដី​ទំហំ​ជាង ១៥ ហិកា សួន​រុក្ខជាតិ​ចម្រុះ​នេះ​ប្រមូល​ផ្តុំ​​ដោយ​រុក្ខជាតិ​រាប់​រយ​ប្រភេទ ខណៈ​សួន​ផ្កា​កុលាប និង​កេសរកូល ជា​គោលដៅ​​ដែល​ទាក់ទាញ​ភ្ញៀវទេសចរ​ចូល​ចិត្ត​ទៅ​ទស្សនា​បំផុត។

លោក មាឃ បូរ៉ា មន្រ្តី​គ្រប់គ្រង​សួន​រុក្ខជាតិ​អង្គរ​បាន​បញ្ជាក់​ថា សួន​រុក្ខជាតិ​អង្គរ​បែងចែក​ជា ៥ ផ្នែក​មាន សួន​ឱសថ​និង​គ្រឿងទេស សួន​ផ្កា​ស្មៅ និង​ផ្កា​ចម្រុះ សួន​អម្បូរ​ត្នោត សួន​លំនៅដ្ឋាន​ខ្មែរ​ និង​សួន​ព្រៃឈើ និង​សត្វ​ព្រៃអង្គរ។​

សូន​សួន​រុក្ខជាតិ​អង្គរ​ បាន​ក្លាយ​ជា​ទី​ចាប់អារម្មណ៍​ថ្មី​បន្ថែម​សម្រាប់​ទេសចរ​បរទេស​និង​ពលរដ្ឋ​ខ្មែរ​ ពេល​ចូលទៅ​កម្សាន្តនៅ​រមណីយដ្ឋាន​អង្គរ។ បើ​តាម​លោក មាឃ បូរ៉ាទេសចរ​ដែល​មក​ទស្សនា​សួន​រុក្ខជាតិ​អង្គរ​ក្រៅ​ពី​ដើម្បី​កម្សាន្ត​អារម្មណ៍ និង​មួយ​ចំនួន​ក៏​ចូលចិត្ត​មក​ដើម្បី​សិក្សា​ស្វែង​យល់​ពី​រុក្ខជាតិ​កម្រ​ទាំង​ក្នុង​ស្រុក និង​មួយ​ចំនួន​ត្រូវ​បាន​នាំ​មក​ពី​ក្រៅ​ប្រទេស​។

មន្រ្តី​គ្រប់គ្រង​សួន​រុក្ខជាតិ​អង្គរបានគូស​បញ្ជាក់ថា សួន​រុក្ខជាតិ​អង្គរ​បើក​​ឲ្យ​ភ្ញៀវ​ទេសចរ​ចូល​​ទស្សនា​ដោយ​សេរី ដោយ​ចាប់​បើក​ពី​ថ្ងៃ ពុធ ដល់​ថ្ងៃ​ច័ន្ទ និង​សម្រាក​មួយ​ថ្ងៃ​គឺ​ថ្ងៃ​អង្គារ។

“សួនរុក្ខជាតិអង្គរ ” ប្រមូលផ្តុំ​នូវរុក្ខជាតិ​កម្រ ផ្កាភ្ញី និង​ដើមឈើ​ចម្រុះ​​ដែលបាន​នាំយក​មក​ពី​តំបន់​អង្គរ បណ្តា​ខេត្តនានា​ទូទាំង​ប្រទេស និងមួយ​ចំនួនក៏​ត្រូវ​បាន​នាំ​យក​មកពី​ក្រៅប្រទេស​សរុប​មាន​ជាង ៥០០ប្រភេទ ដែលមាន​ដូចជាប្រភេទ​ឈើប្រណិត និង​ឈើ​ព្រៃ​សរុប​ ៥០ ប្រភេទ ឱសថ គ្រឿងទេស និង​បន្លែ ១០០ ប្រភេទ រុក្ខជាតិអំបូរត្នោត ៥០ ប្រភេទ ដើម​ឈើ​ហូប​ផ្លែ ៩០ ប្រភេទ ប្រទាល ៥០ ប្រភេទ កេសរកូល ប៉ប្រក និងវល្លិ៍ ៤០ ប្រភេទ ដើមផ្កា ៥០ ​ប្រភេទ ផ្កា​តាមរដូវ ៤០ ប្រភេទ ​ផ្កាស្មៅ និង​ត្រែង ១០ ប្រភេទ ផ្កា​ខ្មែរ និង​ផ្កា​ក្រអូប ២០ ប្រភេទ ព្រម​ទាំង​រុក្ខជាតិ​ទឹក និង​រុក្ខជាតិ​ផ្សេងៗ​ជាច្រើនទៀតសរុប​រាប់ម៉ឺន​ដើម−គុម្ព។

ដើម្បីបង្កើនភាពទាក់ទាញបន្ថែម​ទៀត​ដល់​ភ្ញៀវ​ដែលមកទស្សនា ក្នុង​បរិវេណ​សួន​ក៏មានរៀបចំ​លម្អដោយកូនភ្នំ ស្រះ ប្រឡាយ​ទឹក ទឹកធ្លាក់​ខ្នាតតូច និង​ប្រព័ន្ធស្រោចស្រព​ស្វ័យប្រវត្តិ ព្រមទាំងសត្វព្រៃនិង​សត្វ​ចិញ្ចឹម​មួយ​ចំនួន​ផងដែរ។

ស្រប​តាមចក្ខុវិស័យ​បង្កើន​ភាពបៃតងក្នុង​រមណីយដ្ឋានអង្គរ អាជ្ញាធរជាតិ​អប្សរា​គ្រោង​នឹង​ពង្រីក​សួន​រុក្ខជាតិ​អង្គរ​បន្ថែម​រហូត​ទៅដល់​កសិន្ធុ​ខាងត្បូង​នៃ​ប្រាសាទ​អង្គរវត្ត​លើ​ផ្ទៃដីប្រមាណ ១៣០​ហិកតា ដើម្បី​ឲ្យ​សួន​មាន​សក្ដានុពល វិសាលភាព​ធំ​ទូលាយ និង​សម្បូរ​បែប​ជាង​មុន សម្រាប់​ប្រយោជន៍​សាធារណៈជ​នក៏ដូចជាចូលរួមចំណែកក្នុងកិច្ចការអភិរក្ស និង​លើក​តម្លៃ​រមណីយដ្ឋាន​អង្គរ​ជា​បេតិកភណ្ឌ​ពិភពលោក៕

The post សួន​កុលាប ​និង​កេសរកូល ​ទាក់ទាញ​ទេសចរ​បំផុត​​នៅ​សួន​រុក្ខជាតិ​អង្គរ appeared first on Kampuchea Thmey Daily.