លោក Borisov បានប្រាប់លោកប្រធានាធិបតី Vladimir Putin ក្នុងអំឡុងកិច្ចប្រជុំនៅវិមានក្រឹមឡាំងថា ទីក្រុងមូស្គូ មានបំណងបំពេញកាតព្វកិច្ចរបស់ខ្លួនទាំងអស់ ចំពោះដៃគូបរទេស ជាផ្នែកមួយនៃគម្រោង ISS ប៉ុន្តែការសម្រេចចិត្តដកខ្លួនចេញពីស្ថានីយ៍នេះក្រោយឆ្នាំ២០២៤ ត្រូវបានធ្វើឡើង។

ប្រធានទីភ្នាក់ងារអវកាស​រូប​នេះ​បាន​បន្ថែម​ថា​ “​ខ្ញុំ​គិត​ថា​នៅ​ពេល​នោះ យើង​នឹង​ចាប់​ផ្តើម​ដាក់​ស្ថានីយ​គន្លងអវកាស​របស់​រុស្ស៊ី ឲ្យ​ចូល​រួមជាមួយគេដែរ​”។

យោងតាមចក្ខុវិស័យរបស់លោក Borisov, ការហោះហើរក្នុងលំហអាកាសរបស់រុស្ស៊ី គួរតែជាផ្នែកនៃកម្មវិធីវិទ្យាសាស្ត្រជាប្រព័ន្ធ ដូច្នេះបេសកកម្មនីមួយៗ នឹងផ្តល់ចំណេះដឹងថ្មីៗដល់ប្រទេសរុស្ស៊ី។

អតីតប្រធាន Roscosmos លោក Dmitry Rogozin បានព្យាករណ៍ថា គម្រោង ISS ដែល NASA គ្រោងនឹងដំណើរការរហូតដល់ឆ្នាំ ២០៣០ នឹងត្រូវដួលរលំនៅពេលនោះ លុះត្រាតែចំនួនទឹកប្រាក់ដ៏ច្រើនសន្ធឹកសន្ធាប់ ត្រូវបានបណ្តាក់ទុកក្នុងការជួសជុលរបស់វា។

លោកបានចង្អុលបង្ហាញថា កិច្ចខិតខំប្រឹងប្រែងដើម្បីរក្សាស្ថានីយ៍នេះនៅក្នុងគន្លងគោចរ លែងមានប្រសិទ្ធភាពសម្រាប់ប្រទេសរុស្ស៊ីទៀតហើយ ដោយសារតែបរិយាកាសភូមិសាស្ត្រនយោបាយនាពេលបច្ចុប្បន្ន។

ISS ត្រូវ​បាន​បាញ់​បង្ហោះ​ក្នុង​ឆ្នាំ ១៩៩៨ ជា​កិច្ច​ប្រឹងប្រែង​រួម​ដោយ​ទីភ្នាក់ងារ​អវកាស​រុស្ស៊ី អាមេរិក ជប៉ុន កាណាដា និង​អឺរ៉ុប។

វា​ត្រូវ​បាន​បែង​ចែក​ជា​ផ្នែក​រុស្ស៊ី និង​អាមេរិក ខណៈ​ផ្នែក​ចុង​ក្រោយ​ត្រូវ​បាន​គ្រប់គ្រង​ដោយ​សហរដ្ឋ​អាមេរិក និង​អ្នក​ចូលរួម​ផ្សេងទៀត​នៃ​គម្រោងនេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី គ្រោងធ្វើសមយុទ្ធទ្រង់ទ្រាយធំ ដើម្បីបង្ហាញថា កម្លាំងយោធារបស់ខ្លួន នៅតែខ្លាំង

The post រុស្ស៊ី សម្រេចចិត្ត ដកខ្លួនចេញពី ស្ថានីយ៍អវកាសអន្តរជាតិ ក្រោយឆ្នាំ ២០២៤ (មានវីដេអូ) appeared first on Kampuchea Thmey Daily.