រុស្ស៊ី គ្រោងធ្វើសមយុទ្ធទ្រង់ទ្រាយធំ ដើម្បីបង្ហាញថា កម្លាំងយោធារបស់ខ្លួន នៅតែខ្លាំង

រុស្ស៊ី គ្រោងនឹងធ្វើសមយុទ្ធយោធាជាយុទ្ធសាស្ត្រនៅភាគខាងកើតប្រទេស ដោយចាប់ផ្តើមនៅខែក្រោយនេះ។ នេះបើតាមការឲ្យដឹងពីក្រសួងការពារជាតិក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធ “Vostok” នឹងប្រព្រឹត្តទៅចាប់ពីថ្ងៃទី៣០ខែសីហា ដល់ថ្ងៃទី៥ខែកញ្ញា។

សមយុទ្ធនេះ ហាក់ដូចជាមានបំណងផ្ញើសារថា ទោះបីជាមានសង្គ្រាមរយៈពេលប្រាំខែនៅអ៊ុយក្រែនក៏ដោយ ក៏រុស្ស៊ី នៅតែផ្តោតលើការការពារទឹកដីទាំងមូលរបស់ខ្លួន និងមានសមត្ថភាពយោធាខ្លាំងដូចធម្មតា។

នៅក្នុងសេចក្តីថ្លែងការណ៍មួយ ក្រសួងបានសង្កត់ធ្ងន់ថា សមត្ថភាពរបស់ខ្លួនក្នុងការរៀបចំសមយុទ្ធបែបនេះ គឺមិនមានផលប៉ះពាល់អ្វីឡើយចំពោះអ្វីដែលខ្លួនហៅថា “ប្រតិបត្តិការយោធាពិសេស” នៅអ៊ុយក្រែន។

រុស្ស៊ីមិនបានលុបចោលសកម្មភាពហ្វឹកហ្វឺន ឬកិច្ចសហប្រតិបត្តិការអន្តរជាតិណាមួយឡើយ ហើយសមយុទ្ធនេះ នឹងត្រូវបានផ្គត់ផ្គង់ជាមួយយោងធា អាវុធ និងឧបករណ៍ចាំបាច់ទាំងអស់។

សមយុទ្ធនាពេលខាងមុខ នឹងធ្វើឡើងនៅស្រុកយោធាភាគខាងកើត ដែលរួមបញ្ចូលផ្នែកខ្លះនៃតំបន់ស៊ីបេរី និងនៅតំបន់ Khabarovsk ជិតព្រំដែនចិន។

ក្រសួងការពារជាតិរុស្ស៊ីបាននិយាយថា សមយុទ្ធនេះនឹងមានការចូលរួមពីកងទ័ព លើការធ្វើសមយុទ្ធនៅទីតាំងបាញ់កាំភ្លើងចំនួន ១៣កន្លែងនៃស្រុកយោធាភាគខាងកើត។ អង្គភាពទ័ពអាកាស យន្តហោះទម្លាក់គ្រាប់បែករយៈចម្ងាយឆ្ងាយ និងយន្តហោះដឹកទំនិញយោធា ក៏នឹងចូលរួមក្នុងសមយុទ្ធសង្គ្រាមនេះផងដែរ។

ក្រសួងបញ្ជាក់ថា ក៏នឹងមានការចូលរួមពីសំណាក់ កងកម្លាំងបរទេសមួយចំនួនផងដែរ ប៉ុន្តែមិនបានបញ្ជាក់ថាមកពីប្រទេសណានោះទេ។

ទោះបីជាយ៉ាងណាក៏ដោយ កងទ័ព​មក​ពី​ប្រទេស​អាមេនី ឥណ្ឌា កាហ្សាក់ស្ថាន កៀហ្ស៊ីស៊ីស្ថាន និង​ម៉ុងហ្គោលី បាន​ចូល​រួម​ក្នុង​សមយុទ្ធ​ធំៗ​នៅ​​ប្រទេស​រុស្ស៊ី និង​បេឡារុស ​កាល​ពី​ឆ្នាំ​មុន៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ សមយុទ្ធ អាមេរិក-ជប៉ុន នៅជិតព្រំដែន រុស្ស៊ី កំពុងគំរាមកំហែងសន្តិសុខ ក្រុងមូស្គូ