ហាត់យូហ្គា Archives - Kampuchea Thmey Daily

ដេកអត់លក់ ហាត់ប្រាណពិសេសមួយនេះ អាចជួយឲ្យដេកលក់ស្កប់ស្កល់

Sonya — Sun, 29 Aug 2021 09:51:00 +0000

គ្នាយើងខ្លះច្បាស់ជាដឹងឮពីផលប្រយោជន៍ជាច្រើនពីការហាត់យ៉ូហ្កាសម្រាប់សុខភាព ក្នុងនោះរឿងសំខាន់មួយ គឺយ៉ូហ្កា ជួយឲ្យអ្នកមានបញ្ហាគេងអត់លក់ ទៅជាលក់ស្រួលវិញ។ ម៉េចបានអ៊ីចឹង អត្ថបទនេះនឹងបង្ហាញហេតុផលដូចខាងក្រោម៖

១- គេងមិនលក់ គ្រោះថ្នាក់ធំ

ដំណាក់កាលដំបូង គេងមិនលក់ អាចកើតឡើងដោយឯកឯង មិនបណ្តាលមកពីបញ្ហាថ្នាំទេ។ ដំណាក់កាលទី២ គេងមិនលក់ ជាសញ្ញាព្រមាន ដោយសារបញ្ហាសុខភាពណាមួយ។ មានជំងឺច្រើន ក៏ធ្វើឲ្យពិបាកគេងដែរ ដូចជា មហារីក រលាកសន្លាក់ ជំងឺដុំស្បូន និងបាក់ទឹកចិត្ត។ ឯថ្នាំខ្លះអាចបង្កឲ្យគេងមិនលក់ ដូចជា ពុលសារធាតុញៀនជាដើម។

គេងមិនលក់ ឬមិនគ្រប់គ្រាន់ ធ្វើឲ្យការគិតចុះខ្សោយ តាមរយៈការបំផ្លាញប្រព័ន្ធប្រសាទ ហើយមានគ្រោះថ្នាក់ដល់ជីវិត ដោយបង្កឲ្យមានបញ្ហាសុខភាព ខ្សោយ ឬគាំងបេះដូង ឡើងសម្ពាធឈាម ធាត់ហួសកម្រិត ឬស្ត្រេស។

២- ប្រសិទ្ធភាពយ៉ូហ្គាលើបញ្ហាគេងមិនលក់

យ៉ូហ្កា ជួយបង្កើនគុណភាពដំណេកសម្រាប់គ្នាយើងមានបញ្ហាគេងមិនលក់។ ក្នុងការសិក្សាលើអ្នកមានបញ្ហាគេងមិនលក់ ទាំងដំណាក់កាលបឋម និងដំណាក់កាលទី២ ពួកគេត្រូវតម្រូវឲ្យហាត់យ៉ូហ្កាយ៉ាងហោច ៨ សប្តាហ៍ ហើយអ្នកស្រាវជ្រាវរកឃើញថា យ៉ូហ្កាពិតជាមានឥទ្ធិពលវិជ្ជមានលើករណីគេងមិនលក់មែន។ ទម្លាប់គេងមិនលក់ គេងបានតិច ឬភ្ញាក់ញឹកញាប់អាចដោះស្រាយ ដោយហាត់យ៉ូហ្កាជាប្រចាំ។

៣- ភស្តុតាងវិទ្យាសាស្ត្រផ្សេងៗទៀត

យ៉ូហ្កាមានឥរិយាបថជាច្រើន ជួយសម្រួលឲ្យឈាមរត់ចូលសរសៃឈាមខួរក្បាលបានល្អ ព្រោះបើយើងមិនផ្គត់ផ្គង់ឈាមគ្រប់គ្រាន់ទៅខួរក្បាលទេ អាចនឹងជួបបញ្ហាគេងមិនលក់។

ហាត់យ៉ូហ្កា ២ ដងក្នុង១សប្តាហ៍ អាចជួយកាត់បន្ថយមហារីកបាន។ ស្រីៗគ្នាយើងដែលកំពុងមករដូវ និងមានអការៈឈឺចាប់ ក៏អាចកាត់បន្ថយដែរ បន្ទាប់ពីហាត់យ៉ូហ្កាទៀងទាត់។ ហាត់យ៉ូហ្កាពេលល្ងាច ធ្វើឲ្យគេងលក់ស្រួល។

ថ្នាំងងុយគេងមិនប្រាកដថា មានប្រសិទ្ធភាពចំពោះការគេងមិនលក់គ្រប់ពេលនោះទេ ទោះថ្នាំនោះល្អក៏ដោយ។ យ៉ូហ្កា ស័ក្ដិសមបំផុត ធ្វើឲ្យរបៀបរស់នៅមានសុខភាពល្អ និងគេងលក់ស្កប់ស្កល់៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ គិតច្រើនពិបាកគេង សាកល្បងសម្រួលខួរក្បាលតាមវិធីងាយៗប៉ុន្មាននេះ

ចុចអាន៖ រុក្ខជាតិ ៥ ប្រភេទ បំបាត់ភាពថប់បារម្ភក្នុងបន្ទប់គេង និងជាឱសថទិព្វព្យាបាលរោគដេកមិនលក់

The post ដេកអត់លក់ ហាត់ប្រាណពិសេសមួយនេះ អាចជួយឲ្យដេកលក់ស្កប់ស្កល់ appeared first on Kampuchea Thmey Daily.

ខ្លាចបាក់ទឹកចិត្ត គួរស្វែងរកសន្តិភាពផ្លូវចិត្តពីសមាធិ និងយូហ្គា

Sonya — Fri, 23 Apr 2021 04:57:10 +0000

ការធ្វើសមាធិ និងយូហ្គា មានផលប្រយោជន៍ខ្លាំង ពិសេសគ្នាយើងកំពុងរងសម្ពាធផ្លូវចិត្តខ្លាំងតែម្តង។ ចង់ដឹង! ខាងក្រោមនេះ គឺជាចម្លើយ។

តាំងពីទសវត្សរ៍ឆ្នាំ ៧០ សមាធិ និងយូហ្គា ត្រូវបានគេសិក្សាឃើញថា ជាការព្យាបាល ដ៏មានប្រសិទ្ធភាពបំផុតសម្រាប់សុខភាពផ្លូវចិត្ត ពិសេសជំងឺបាក់ទឹកចិត្ត និងជំងឺថប់បារម្ភ។ មានការសិក្សាជាច្រើន សុទ្ធតែរកឃើញប្រសិទ្ធភាពក្នុងការព្យាបាលផ្លូវចិត្ត ដោយធ្វើសមាធិ និងយូហ្គា ជាហេតុនាំឲ្យវិធីព្យាបាលកាន់តែពេញនិយមនាពេលបច្ចុប្បន្ន។

១- សមាធិ

ធ្វើសមាធិបាន ជាការផ្តោតអារម្មណ៍លើអ្វីមួយកំពុងកើតឡើង។ សមាធិ ជាការសង្កេតអ្វីកំពុងកើតឡើងពីខាងក្នុង ឧទាហរណ៍ អ្វីយើងបានគិត មានអារម្មណ៍ ទទួលអារម្មណ៍ពីរាងកាយ និងការសង្កេតអ្វីកើតឡើងពីខាងក្រៅ ដូចជា ប្រតិកម្មជុំវិញខ្លួន បើកចិត្តឲ្យទូលាយ មិនវាយតម្លៃអ្វីមួយដោយមិនបានពិចារណា។

ធ្វើសមាធិ ជួយយើងអាចប្រឈមមុខ និងយកចិត្តទុកដាក់គ្រប់ស្ថានភាពលំបាកទាំងឡាយ។ ដោយសារសមាធិ ទាមទារឲ្យយកដកដង្ហើមមួយៗ អាចជួយឲ្យយើងធ្វើចិត្តស្ងប់ រកឃើញសន្តិភាពផ្លូវចិត្ត មានអត្ថប្រយោជន៍ទាំងផ្លូវកាយ ផ្លូវចិត្ត និងផ្លូវអារម្មណ៍។ អាចនិយាយបានថា អត្ថប្រយោជន៍ផ្លូវចិត្ត និងការគិតសំខាន់បំផុតទាំង ៥ ទទួលបានពីការធ្វើសមាធិ៖

– ចេះសង្កេត ដឹងច្បាស់ពីអ្វីកំពុងកើតឡើងក្នុងខួរក្បាលយើង និងអាចពិនិត្យមើលឃើញ ពីផលប៉ះពាល់របស់វាមកលើអារម្មណ៍ និងសកម្មភាពរបស់យើង
– ចេះកំណត់ និងទប់ស្កាត់ភាពរវើរវាយ ដែលអាចបន្ថែមភាពស្មុគស្មាញមកលើយើង
– ផ្លាស់ប្តូរទម្លាប់គួរឲ្យធុញទ្រាន់
– បង្កើតចន្លោះរវាងការគិតពិចារណា និងប្រតិកម្ម ជួយឲ្យយើងឈប់ធ្វើអ្វីដែលអត់ប្រយោជន៍
– បង្កើតអារម្មណ៍មានសន្តិភាព និងសុខមាលភាព ពង្រឹងសេចក្តីសប្បុរស និងមេត្តាធម៌។

ដើម្បីដឹងថា ការធ្វើសមាធិរបស់យើង ជោគជ័យ ឬមិនជោគជ័យ មនុស្សជាច្រើននិយាយពីការគិតយ៉ាងល្អិតល្អន់របស់ពួកគេតាមរយៈវិធីជាច្រើន។ គ្នាយើងខ្លះ អាចទទួលបានភាពភ្លឺស្វាង តាមរយៈពន្លឺ ខណៈខ្លះទៀតស្គាល់តាមរយៈចំងាយ រូបភាព និងពណ៌នៃអារម្មណ៍។ គ្នាយើងខ្លះទៀតអាចនឹងថាខ្លួនជោគជ័យ ជាមួយអារម្មណ៍អ្វីមួយ ប៉ុន្តែពិបាកនឹងពិពណ៌នា ហើយពេលខ្លះទទួលបានបទពិសោធន៍ពីការធ្វើសមាធិ ស្ថិតនៅចំណុចសុខមាលភាពផ្លូវចិត្តខ្ពស់បំផុត ជាភាពកក់ក្តៅ និងសន្តិភាពចេញពីក្នុងខ្លួនយើងផ្ទាល់។ ទាំងអស់នេះ គឺបញ្ជាក់ពីជោគជ័យនៃការធ្វើសមាធិម្តងៗ។

២- យូហ្គា

យូហ្គា មានដើមកំណើតពីប្រទេសឥណ្ឌា បន្សល់ទុកដោយបុព្វបុរសឥណ្ឌា រាប់រយពាន់ឆ្នាំកន្លងមកហើយ ខណៈជាច្រើនឆ្នាំកន្លងមកនេះ យូហ្គា ត្រូវគេចាត់ទុកជាប្រព័ន្ធអនុវត្តដ៏មានប្រសិទ្ធភាព សម្រាប់ទាំងសុខភាពផ្លូវកាយ ផ្លូវចិត្ត និងផ្លូវអារម្មណ៍។

តាមរយៈការហាត់ យូហ្គា យើងនឹងបានទទួលការហ្វឹកហាត់ឲ្យខួរក្បាលសម្រាក ដោយការដកដង្ហើមវែងៗ និងផ្តោតអារម្មណ៍នៅពេលយើងទប់ដង្ហើម។ ហាត់ យូហ្គា មិនគ្រាន់តែល្អសម្រាប់រាងកាយប៉ុណ្ណោះទេ ថែមទាំងធ្វើឲ្យយើងមានអារម្មណ៍ជ្រាលជ្រៅអាចធ្វើឲ្យផ្លូវចិត្តមានសុខភាពល្អទៀតផង។

កម្រិតហាត់ យូហ្គា អាចចាប់ផ្តើមពីវិធីហាត់ ថើៗ និងសម្រាក ទៅដល់វិធីពិបាក ត្រូវការប្រឹងប្រែងខ្លាំង។ ជម្រើសរបៀបនីមួយៗ អាស្រ័យលើសមត្ថភាពនៃរាងកាយ និង ចំណង់ចំណូលចិត្តយើងម្នាក់ៗ។ Hatha យូហ្គា ជាជម្រើសមួយដ៏សាមញ្ញបំផុតសម្រាប់ហាត់ មានធាតុផ្សំបីយ៉ាង មានឥរិយាបទរាងកាយ (Asanas) អនុវត្តគ្រប់គ្រងដង្ហើមចេញចូលភ្ជាប់ទៅនឹង Asanas និងធ្វើសមាធិ ឬសម្រួលអារម្មណ៍រយៈពេលខ្លី។

គុណសម្បត្តិ យូហ្គា ជួយផ្លាស់ប្តូរ ខួរក្បាល អារម្មណ៍ និងបង្កើតសុខភាពផ្លូវចិត្ត ដូចជា៖

– បង្កើនសុខមាលភាពរូបរាងកាយ និងផ្លូវចិត្ត
– ជួយព្យាបាលជំងឺថប់បារម្ភ និងបាក់ទឹកចិត្ត
– បង្កើនការចងចាំ និងប្រមូលអារម្មណ៍
– កាត់បន្ថយឥទ្ធិពលបណ្តាលមកពីអារម្មណ៍តក់ស្លុត
– ទប់ស្កាត់បញ្ហាផ្លូវចិត្តទាំងអស់ ដែលភាគច្រើនតែងកើតមានចំពោះវ័យជំទង់។

ជាទូទៅ ពេលយើងស្វែងយល់ពី យូហ្គា និងសមាធិ គួរចាំថា ទាំងសុខភាព ទាំងអារម្មណ៍ និងមានភាពខុសគ្នាពីមួយថ្ងៃទៅមួយថ្ងៃ ជួយឲ្យយើងហ៊ានប្រឈម តស៊ូជាមួយការប្រកួតប្រជែងថ្មីៗជានិច្ច។ ជំងឿចិត្ត ភាពជឿជាក់ ក្នុងខ្លួនយើង នៅតែមានដដែល អ្វីយើងត្រូវធ្វើ សង្កេត និងគ្រប់គ្រងអារម្មណ៍ក្នុងខ្លួន ត្រូវចេះស្វែងរកក្តីសុខសម្រាប់ខ្លួនឯង៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ចាប់ផ្ដើមសមាធិ អាចជួយផ្លូវចិត្តធូរស្រាលអំឡុងវិបត្តិកូវីដ-១៩

ចុចអាន៖ ការរាំងខ្ទប់ដោយសារកូវីដ-១៩ អប់រំផ្លូវចិត្ត ៥ យ៉ាងនេះ

The post ខ្លាចបាក់ទឹកចិត្ត គួរស្វែងរកសន្តិភាពផ្លូវចិត្តពីសមាធិ និងយូហ្គា appeared first on Kampuchea Thmey Daily.

អត្ថប្រយោជន៍ដ៏អស្ចារ្យ ៧យ៉ាងពីការហាត់ Yoga

Sonya — Thu, 29 Oct 2020 07:47:20 +0000

អស់រយៈពេលជាច្រើនសតវត្សរ៍មកហើយ មនុស្សបានអនុវត្តហាត់ការយូហ្គាដើម្បីភ្ជាប់ទំនាក់ទំនងរវាងចិត្ត រាងកាយ និងព្រលឹង។ លើសពីការបន្ធូរអារម្មណ៍ វាជួយបង្កើនចលនាឈាមរត់ និងជំនួយសាច់ដុំនិងសន្លាក់។

ទាំងនេះជាហេតុផលថ្មីដែលមិននឹកស្មានចំនួន ៧យ៉ាងពីការហាត់យូហ្គា៖

១. ប្រឆាំងនឹងជំងឺធ្លាក់ទឹកចិត្ត

មិនមែនជារឿងអាថ៌កំបាំងទេ ដែលមនុស្សប្រើយូហ្គាដើម្បីលើកកម្ពស់សុខភាពរាងកាយ។ មិនតែប៉ុណ្ណោះយូហ្គាត្រូវបានគេទទួលស្គាល់ថា មានឥទ្ធិពលដ៏អស្ចារ្យដល់ផ្លូវចិត្តផងដែរ។ ការសិក្សាពីមជ្ឈមណ្ឌលវេជ្ជសាស្ត្រនៃសាកលវិទ្យាល័យ Duke បានរកឃើញថា យូហ្គាអាចផ្តល់អត្ថប្រយោជន៍ដល់អ្នកដែលរស់នៅជាមួយជំងឺធ្លាក់ទឹកចិត្ត ជំងឺវិកលចរឹក និងស្ថានភាពវិកលចរឹកដទៃទៀត។ ការហាត់យូហ្គាជាប្រចាំអាចបង្កើនឱ្យមានកម្រិត Serotonin ខ្ពស់ជាអរម៉ូនសុភមង្គល ដែលធ្វើឲ្យអារម្មណ៍ប្រសើរឡើងនិងប្រឆាំងនឹងជំងឺធ្លាក់ទឹកចិត្ត។

២. គេងលក់ស្រួល

អ្នកស្រាវជ្រាវនៅសាលាវេជ្ជសាស្ត្រ Harvard បានរកឃើញថា ការអនុវត្តយូហ្គាប្រចាំថ្ងៃអាចបន្ធូរអារម្មណ៍ឲ្យស្រស់ថ្លា ធ្វើឲ្យគេងលក់ស្រួល ពិសេសអ្នកដែលមានជំងឺគេងមិនលក់រ៉ាំរ៉ៃ។ ពេលដែលបានហាត់យូហ្គា នឹងធ្វើឱ្យគេងលក់ដោយស្វ័យប្រវត្តិ និងជួយបង្កើតទម្លាប់គេងទៀងទាត់។ ការបញ្ចូលលំហាត់ដកដង្ហើម២-៣ដងក្នុងពេលហាត់យូហ្គា អាចបំបាត់ភាពច្របូកច្របល់នៃគំនិតដើម្បីជំរុញឱ្យការគេងកាន់តែប្រសើរ។

៣. ជំនួយសុខភាពបេះដូង

យូហ្គាអាចជួយកាត់បន្ថយកត្តាហានិភ័យនៃជំងឺរ៉ាំរ៉ៃមួយចំនួន ជាពិសេសជំងឺបេះដូង។ សមាគមបេះដូងរបស់អាមេរិកបានថ្លែងថា សកម្មភាពរាងកាយ ១៥០ នាទីក្នុងមួយសប្តាហ៍ នៃការធ្វើលំហាត់ប្រាណយូហ្គាកម្រិតមធ្យម គឺជាទម្រង់នៃការហាត់ប្រាណដែលមានសុខភាពល្អ ដើម្បីពង្រឹងសុខភាពបេះដូង។

៤. កាត់បន្ថយជំងឺប្រកាំង

ការស្រាវជ្រាវពីមជ្ឈមណ្ឌលជាតិព័ត៌មានជីវបច្ចេកវិទ្យាបានបង្ហាញថា អ្នកដែលមានជំងឺឈឺក្បាលប្រកាំងតិចជាងមុន និងកាត់បន្ថយការឈឺចាប់បន្ទាប់ពីហាត់យូហ្គាបានរយៈពេល ៣ ខែ។ វាត្រូវបានគេអះអាងថា អាចជួយបញ្ចេញភាពតានតឹងនៃរោគសញ្ញាឈឺក្បាល និងប្រកាំង។

៥. ជួយឲ្យជំងឺហឺតធូរស្រាល

យោងតាម មជ្ឈមណ្ឌលគ្រប់គ្រងនិងបង្ការជំងឺ បានឲ្យដឹងថា ជនជាតិអាមេរិកាំងជិត ១៩ លាននាក់ដែលមានជំងឺហឺត និងដកដង្ហើមខ្លីៗដែលត្រូវបានគេហៅថាជា ជំងឺផ្លូវដង្ហើម។ ការហាត់យូហ្គា ជួយសម្រួលរោគសញ្ញានេះឲ្យធូរស្បើយ និងដើម្បីបង្កើនលំហូរខ្យល់ដកដង្ហើមបានស្រួល។ ការសិក្សាឆ្នាំ ២០១២ បានរកឃើញថា ការហ្វឹកហាត់យូហ្គាក្នុងរយៈពេល ១០ សប្តាហ៍ធ្វើឲ្យស្ត្រីធូរស្រាលពីជំងឺហឺតស្រាលនិងមធ្យម។

៦. ជួយជំងឺរលាកសន្លាក់

លំហាត់ប្រាណរាងកាយទៀងទាត់ គឺជាផ្នែកសំខាន់មួយនៃការព្យាបាលប្រកបដោយប្រសិទ្ធភាពនៃជំងឺរលាកសន្លាក់ឆ្អឹង និងរលាកសន្លាក់រ៉ាំរ៉ៃ។ ចលនាទន់ភ្លន់នៃយូហ្គាជួយបង្កើនភាពបត់បែនរាងកាយបានប្រសើរ និងបង្វឹកភាពស៊ាំនៃសាច់ដុំ។

៧. ជួយព្យាបាលការឈឺឆ្អឹងខ្នង

ការសិក្សាជាច្រើនចង្អុលបង្ហាញថា យូហ្គាជាជម្រើសមួយដ៏មានប្រសិទ្ធភាពក្នុងការព្យាបាលការឈឺឆ្អឹងខ្នង។ នៅក្នុងការសិក្សាដែលចេញផ្សាយដោយ Annals of Internal Medicine និយាយថា អ្នកដែលមានអាការៈឈឺឆ្អឹងខ្នងរ៉ាំរ៉ៃ នឹងមានភាពប្រសើរឡើងវិញបន្ទាប់ពី២-៣ខែនៃការហាត់យូហ្គាទៀងទាត់។ ទោះបីង្នកខ្លះមិនឈឺឆ្អឹងខ្នងរ៉ាំរ៉ៃ យូហ្គាក៏ជាមធ្យោបាយដ៏មានប្រសិទ្ធិភាពក្នុងការកែលម្អរការបត់បែនឆ្អឹងខ្នងនិងការពារការរងរបួសខ្នងផងដែរ ៕

ប្រែសម្រួល៖ សន្យា

ចុចអាន៖ ឧស្សាហ៍រងាខុសធម្មតា គួរតែមើលពីមូលហេតុនិងវិធីទប់ស្កាត់ទាំងនេះ

The post អត្ថប្រយោជន៍ដ៏អស្ចារ្យ ៧យ៉ាងពីការហាត់ Yoga appeared first on Kampuchea Thmey Daily.

ហាត់យូហ្គា Archives - Kampuchea Thmey Daily

ដេក​អត់លក់ ហាត់​ប្រាណ​ពិសេស​មួយ​នេះ អាច​ជួយឲ្យ​ដេក​លក់​ស្កប់ស្កល់

ខ្លាចបាក់ទឹកចិត្ត គួរស្វែង​រក​សន្តិភាព​ផ្លូវ​ចិត្តពីសមាធិ និងយូហ្គា

អត្ថប្រយោជន៍ដ៏អស្ចារ្យ ៧យ៉ាងពីការហាត់ Yoga

ដេកអត់លក់ ហាត់ប្រាណពិសេសមួយនេះ អាចជួយឲ្យដេកលក់ស្កប់ស្កល់

ខ្លាចបាក់ទឹកចិត្ត គួរស្វែងរកសន្តិភាពផ្លូវចិត្តពីសមាធិ និងយូហ្គា