​លោក យឹម លាត ទេសាភិបាលរង ធនាគារជាតិនៃកម្ពុជា ​មានប្រសាសន៍នៅក្នុងសិក្ខា​សាលាលើក​កម្ពស់​បរិយា​បន្ន​ហិរញ្ញវត្ថុនៅកម្ពុជា ស្តីពី “វិស័យមីក្រូហិរញ្ញវត្ថុនៅកម្ពុជា៖ ការអភិវឌ្ឍ តួនាទី និង​ទស្សន​វិស័យ” នៅថ្ងៃទី ៣០ ខែមីនា ២០២៦ ដោយបានសង្កត់ធ្ងន់លើការពង្រីកលទ្ធភាពទទួលបាន​សេវាហិរញ្ញវត្ថុដល់សហគ្រាសធុនមីក្រូ តូច និងមធ្យម (MSMEs) ស្ត្រី និងក្រុមងាយរងគ្រោះ ព្រម​ទាំងលើកឡើងពីសារៈសំខាន់នៃការការពារអតិថិជន និង​ចំណេះដឹងហិរញ្ញវត្ថុ ​សំដៅ​ជំរុញ​ការ​ប្រើ​ប្រាស់ ​សេវាហិរញ្ញវត្ថុ​ឱ្យ​មានប្រសិទ្ធភាព ​និង​ការ​ទទួលខុសត្រូវ។ ​

​សិក្ខាសាលានេះមានការចូលរួមពីតំណាងស្ថាប័នរដ្ឋ និងឯកជន ដៃគូអភិវឌ្ឍន៍ គ្រឹះស្ថានធនាគារ​ និង​ហិរញ្ញវត្ថុ អ្នកស្រាវជ្រាវ និងនិស្សិត សរុបប្រមាណ ១០០ រូប។​

​គោលបំណងនៃការរៀបចំសិក្ខាសាលានេះ គឺដើម្បីបង្ហាញពីសារៈសំខាន់នៃបរិយាបន្នហិរញ្ញវត្ថុ និងលទ្ធផលស្រាវជ្រាវពាក់ព័ន្ធ ព្រមទាំងដើម្បីលើកកម្ពស់ការយល់ដឹង និងជំរុញការចូលរួមពីភាគីពាក់ព័ន្ធ ក្នុងការគាំទ្រការអភិវឌ្ឍវិស័យ​ហិរញ្ញវត្ថុឱ្យមានភាពរឹងមាំ ប្រសិទ្ធភាព និងចីរភាព។

​សិក្ខាសាលានេះក៏បានរំលេចពីតួនាទីសំខាន់នៃគោលនយោបាយផ្អែកលើភស្តុតាងស្រាវជ្រាវ និងការបន្តកិច្ចសហប្រតិបត្តិការរវាងធនាគារជាតិនៃកម្ពុជា និង JICA ក្នុងការលើកកម្ពស់បរិយាបន្នហិរញ្ញវត្ថុឱ្យមានភាពច្នៃប្រឌិតទូលំទូលាយ និងចីរភាព៕

The post ​ធនាគារ​ជាតិ​​ ជំរុញ​ការ​លើកកម្ពស់​បរិយាបន្នហិរញ្ញវត្ថុ​​ appeared first on Kampuchea Thmey Daily.

លោក មាស សុខសេនសាន រដ្ឋលេខាធិការ នៃក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការរងនៃ អគ្គលេខា​ធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ ថ្លែងអំណរគុណចំពោះសហភាពអឺរ៉ុប និងវេទិកានៃអង្គការមិនមែនរដ្ឋាភិបាល ដែលបានផ្តល់ការគាំទ្រ និងកិច្ចសហការល្អ ជាមួយរាជរដ្ឋាភិបាលនាពេលកន្លងមក ដែលជាលទ្ធផលពិន្ទុ អង្កេតលើការបើកចំហថវិកា (OBS)របស់កម្ពុជាមានការកើនឡើងខ្លាំងនៅឆ្នាំ ២០២៣  ដោយទទួលបាន ៤៣ ពិន្ទុ ធៀបនឹង ៣៣ ពិន្ទុ នៅឆ្នាំ២០២១ ” ។ លោកបន្តថា ការលើកកម្ពស់តម្លាភាព និងគណនេយ្យភាពក្នុងការគ្រប់គ្រងថវិកា ត្រូវបានយកចិត្តទុកដាក់ពី ក្រសួងសេដ្ឋកិច្ច សម្រាប់ការចូលរួមការអង្កេតលើការបើកចំហថវិកា ដែលប្រព្រឹត្តទៅជារៀងរាល់ ២ឆ្នាំម្តង ចាប់ពីឆ្នាំ២០០៨ មក ។

លោក Bryan FORNARI ប្រធានកិច្ចសហប្រតិបត្តិការ សហភាពអឺរ៉ុបប្រចាំនៅកម្ពុជា បានថ្លែងថាគម្រោងដែលផ្តល់មូលនិធិដោយសហភាពអឺរ៉ុបនេះបញ្ជាក់បន្ថែមពីការប្តេជ្ញាចិត្តរួមគ្នារវាងសហភាពអឺរ៉ុប និងរាជរដ្ឋាភិបាលកម្ពុជាដើម្បីពង្រឹងតម្លាភាពសារពើពន្ធ និងគណនេយ្យភាព ដោយមានការចូលរួមពីប្រជាពលរដ្ឋ។ លោកបានកត់សម្គាល់ថា តាមរយៈការពង្រឹងយន្តការត្រួតពិនិត្យ និងបង្កើតឲ្យមានលំហរចូលរួមជាសាធារណៈថែមទៀត គម្រោងនេះរួមចំណែកដល់អភិបាលកិច្ចបែបបរិយាបន្ន និង ឆ្លើយតប។ លោកបានបញ្ជាក់ថា ៖«ការលើកកម្ពស់សិទ្ធិដល់ពលរដ្ឋក្នុងការចូលរួមការគ្រប់គ្រងធនធានសាធារណៈមានសារៈសំខាន់ណាស់ដើម្បីកសាងទំនុកចិត្តសាធារណៈ និងធ្វើឲ្យប្រសើរសេវាសាធារណៈ»។

លោកស្រី ភាណ សោភ័ណ នាយិកាអង្គការអុកស្វាម មានប្រសាសន៍ថា  អភិបាលកិច្ចបែបប្រជាធិបតេយ្យចាប់ផ្តើមពីការចូលរួមរបស់ពលរដ្ឋដែលទទួលបានព័ត៌មានគ្រប់គ្រាន់។ តាមរយៈគម្រោងនេះ  យើងមានមោទនភាពក្នុងសហការជាមួយអង្គការដៃគូ ដើម្បីពង្រឹងការចូលរួមរបស់ពលរដ្ឋ  និងចូលរួមចំណែកធ្វើឱ្យប្រព័ន្ធហិរញ្ញវត្ថុសាធារណៈកាន់តែមានតម្លាភាព និងគណនេយ្យភាព តាមរយៈកិច្ចសន្ទនាររវាងភាគីពាក់ព័ន្ធ។  លោកស្រីបញ្ជាក់ថា៖«គម្រោងនេះមិនត្រឹមតែចូលរួមចំណែកក្នុងដំណើរការនៃការកែទម្រង់ការគ្រប់គ្រងហិរញ្ញវត្ថុសាធារណៈប៉ុណ្ណោះទេ  ហើយថែមទាំងបង្កើននូវសម្លេងរបស់ពលរដ្ឋ និងធានាថាធនធានត្រូវបានប្រើប្រាស់ដើម្បីបម្រើផលប្រយោជន៍សាធារណៈយ៉ាងពិតប្រាកដ»។

រាជរដ្ឋាភិបាលកម្ពុជាបានចាប់ផ្តើមដំណើរការកម្មវិធីកែទម្រង់ការគ្រប់គ្រងហិរញ្ញវត្ថុសារធារណៈ ចាប់តាំងពីឆ្នាំ២០០៤ ដោយបានពង្រឹងប្រព័ន្ធនៃការគ្រប់គ្រងថិវកា ជាពិសេសនៅថ្នាក់ជាតិ។ ជាពិសេស ការកែទម្រង់ការគ្រប់គ្រងហិរញ្ញវត្ថុសារធារណៈ បានពង្រឹងការប្រមូលចំណូលសារធារណៈ តាមរយៈការធ្វើទំនើបកម្ម និងឌីជីថលលូបនីយកម្ម នៃប្រព័ន្ធគយ និងពន្ធដារ ការធ្វើឱ្យប្រសើរឡើងនូវសេវាសម្រាប់អ្នកបង់ពន្ធ ការពង្រីកមូលដ្ឋានគិតពន្ធ និងការពង្រឹងអនុលោមភាព។ ការអនុវត្តប្រព័ន្ធបច្ចេកព័ត៌មានវិទ្យាសម្រាប់ការគ្រប់គ្រងហិរញ្ញវត្ថុសាធារណៈ បានចូលរួមលើកកម្ពស់តម្លាភាព, គណនេយ្យភាព និងប្រសិទ្ធភាព ក្នុងការគ្រប់គ្រងហិរញ្ញវត្ថុសាធារណៈ តាមរយៈការធ្វើស្វ័យប្រវត្តកម្មលើដំណើរការនានា រួមមាន ប្រតិបត្តិការរបស់រតនាគារ របាយការណ៍ហិរញ្ញវត្ថុ លទ្ធកម្មសាធារណៈ និងនីតិវិធីអនុវត្តហិរញ្ញវត្ថុ។

ទោះបីមានការរីកចម្រើនក៏ដោយ កម្ពុជានៅតែប្រឈមនឹងបញ្ហាប្រឈមលើតម្លាភាពថវិកា និងប្រសិទ្ធភាពនៃការគ្រប់គ្រងហិរញ្ញវត្ថុសាធារណៈ។ គម្រោងនេះត្រូវបានរៀវចំឡើងដើម្បីរួមចំណែក្នុងការឆ្លើយតបទៅនឹងគម្លាតទាំងនេះតាមរយៈវិធីសាស្ត្រជាយុទ្ធសាស្រ្ត រួមទាំងការលើកកម្ពស់ការចូលរួមរបស់ពលរដ្ឋ ការពង្រឹងការត្រួតពិនិត្យថវិកា ការចូលរួមជាមួយស្ថាប័នរដ្ឋាភិបាល សង្គមស៊ីវិល ដៃគូអភិវឌ្ឍន៍ និងសាធារណៈជនក្នុងការលើកកម្ពស់ចក្ខុវិស័យរួមនៃអភិបាលកិច្ចរួមគ្នា និងការគ្រប់គ្រងហិរញ្ញវត្ថុកាន់តែរឹងមាំ៕

The post អឺរ៉ុបផ្តល់ថវិកា ៣,៥ លានអឺរ៉ូ ដល់កម្ពុជា ដើម្បីពង្រឹងការចូលរួមរបស់ពលរដ្ឋ ក្នុងការគ្រប់គ្រងហិរញ្ញវត្ថុសាធារណៈ appeared first on Kampuchea Thmey Daily.

បើតាមទំព័រហ្វេសប៊ុករបស់ Youth Assembly គម្រោង “រៀនពីលុយ ៣.០” ជាគម្រោងរៀបចំ និងដឹកនាំដោយយុវជន ដែលមានអនុវត្តជាការបង្រៀនវគ្គខ្លី ដល់សិស្សានុសិស្ស កម្រិតអនុវិទ្យាល័យ និងវិទ្យាល័យ នៅតាមរាជធានី-ខេត្ត។ គម្រោងនេះ ចុះទៅចែករំលែកចំណេះដឹងពីការគ្រប់គ្រងចំណូល ចំណាយ និងការការពារខ្លួនពីការឆបោក ផ្នែកហិរញ្ញវត្ថុ។ សម្រាប់គោលបំណងធំនៃគម្រោង គឺចង់ឲ្យសិស្សទទួលបានចំណេះដឹងពីចំណូល ចំណាយ និងចេះសន្សំ មួយវិញទៀត អាចការពារខ្លួនពីការឆបោកផ្នែកហិរញ្ញវត្ថុបានគ្រប់សកម្មភាពនៃការឆបោក ដើម្បីជួយខ្លួនឯង គ្រួសារ សហគមន៍ និងសង្គមជាតិ។ ជាក់ស្តែង ចំពោះការចុះទៅបង្រៀននៅខេត្តកំពង់ចាមនេះ ធ្វើដោយក្រុមការងារគម្រោង “រៀនពីលុយ ៣.០” នៃសភាយុវជន Youth Assembly សហការជាមួយក្រុមការងារនៃ ធនាគារជាតិនៃកម្ពុជា និងក្រុមការងារសមាគមមីក្រូហិរញ្ញវត្ថុកម្ពុជា។

ក្នុងឱកាសនោះ ក្រៅពីសិស្សានុសិស្សទទួលបានចំណេះដឹងផ្នែកហិរញ្ញវត្ថុ ក៏បានស្វែងយល់ពី ប្រវត្តិនៃធនាគារនៃកម្ពុជា ច្បាប់ និងបទបញ្ញតិ្ត ការឆបោកផ្នែកហិរញវត្ថុ សកម្មភាពនៃការឆបោក សេវាហិរញ្ញវត្ថុក្រៅប្រព័ន្ធ ផលវិបាកនៃការប្រើប្រាស់កម្ចីក្រៅផ្លូវការ ដែលចែករំលែកដោយ ក្រុមការងារនៃធនាគារជាតិនៃកម្ពុជាថែមទៀតផង។  

ចំណែក សមាគមមីក្រូហិរញ្ញវត្ថុកម្ពុជា ក៏បានលើកទឹកចិត្តដល់សិស្សានុសិស្ស ឱ្យមានការចាយវាយសន្សំសំចៃ និងចេះសន្សំប្រាក់ ព្រមទាំងចែករំលែកចំណេះដឹងបន្តដល់សិស្សានុសិស្សឯទៀតនៅក្នុងសាលារៀនដែរ៕  

The post ក្រុមយុវជន ចុះទៅបង្រៀនសិស្សពីចំណេះដឹងផ្នែកហិរញ្ញវត្ថុនៅខេត្តកំពង់ចាម ដើម្បីការពារខ្លួនពីការឆបោក appeared first on Kampuchea Thmey Daily.

កម្មវិធីនេះ មានគោលបំណងប្រមូលផ្តុំអ្នកសារព័ត៌មាន អ្នកជំនាញផ្នែកប្រព័ន្ធផ្សព្វផ្សាយ និងអ្នកបង្កើតមាតិកា ដើម្បីពិភាក្សាអំពីតួនាទីរបស់ប្រព័ន្ធផ្សព្វផ្សាយក្នុងការរាយការណ៍ និងលើកកម្ពស់ការយល់ដឹងអំពីចំណេះដឹងផ្នែកហិរញ្ញវត្ថុ ដែលនឹងជួយដល់គ្រួសារកម្ពុជាក្នុងការលើកកម្ពស់ការសន្សំរបស់ពួកគេឱ្យបានទូលំទូលាយផងដែរ។ បន្ថែមពីនេះ វេទិកាការីនិពន្ធនេះ ក៏ត្រូវបានរៀបចំឡើងជាផ្នែកមួយនែការប្រកួតប្រជែងការផលិតមាតិកាពហុមេឌា ក្រោមប្រធានបទ «ពង្រឹងការសន្សំសម្រាប់គ្រួសារកម្ពុជា» ដែលនឹងប្រព្រឹត្តទៅនៅថ្ងៃទី១៧ ខែកញ្ញា រហូតដល់ថ្ងៃទី១ ខែវិច្ឆិកា ឆ្នាំ២០២៤។

ជាមួយគ្នានេះ លោក អ៊ុង ប៊ុនអ៉ី ប្រធានប្រព័ន្ធផ្សព្វផ្សាយនិងសារគមនាគមន៍ (DMC) បានលើកឡើងថា កម្មវិធីនេះ រៀបចំឡើងដើម្បីរំលេចដល់អ្នកសារព័ត៌មានគ្រប់រូបចូលរួមផ្សព្វផ្សាយអក្ខរកម្មផ្នែកហិរញ្ញវត្ថុឱ្យបានច្រើន ដើម្បីឱ្យប្រជាជនកម្ពុជាបានដឹង និងយល់ច្បាស់ពីហិរញ្ញវត្ថុរបស់ពួកគេ ជាពិសេសគឺការសន្សំ និងទុកដាក់ហិរញ្ញវត្ថុឱ្យបានត្រឹមត្រូវ។

លោកសង្ឃឹមថា តាមរយៈវេទិកានេះ ប្រព័ន្ធផ្សព្វផ្សាយដូចជាអ្នកសារព័ត៌មាន អ្នកផលិតមាតិកាជាដើម នឹងចូលរួមចំណែកក្នុងការពង្រឹងការយល់ដឹងផ្នែកហិរញ្ញវត្ថុ ដល់សាធារណជន ពាក់ព័ន្ធនឹងវិស័យហិរញ្ញវត្ថុដើម្បីជួយលើកកម្ពស់ការយល់ដឹងដល់ពលរដ្ឋទូទៅពាក់ព័ន្ធនឹងការសន្សំ ការវិនិយោគ និងការរៀបចំផែនការហិរញ្ញវត្ថុជាដើម។

ជាមួយគ្នានេះ វេទិកាការីនិពន្ធ ក៏មានការចូលរួមពីអ្នកជំនាញហិរញ្ញវត្ថុ និពន្ធនាយកស្ថាប័ននានា ការីនិពន្ធ អ្នកសារព័ត៌មាន និងអ្នកផលិតមាតិកាផងដែរ។ លើសពីនេះ ក៏មានវាគ្មិនកិត្តិយសសុទ្ធតែអ្នកជំនាញៗចូលរួមចែករំលែកបទពិសោធជុំវិញអក្ខរកម្មហិរញ្ញវត្ថុដូចគ្នា៕

The post ដេប៉ាតឺម៉ង DMC បានរៀបចំវេទិកាស្តីពីតួនាទីប្រព័ន្ធផ្សព្វផ្សាយរាយការណ៍ពីអក្ខរកម្មហិរញ្ញវត្ថុ appeared first on Kampuchea Thmey Daily.

ការលើកឡើងរបស់លោក ស៊ូ សុជាតិធ្វើឡើងនាឪកាសដែលលោកបានដឹកនាំគណៈប្រតិភូចូលរួមកិច្ចប្រជុំសកលលើកទី៨ របស់ SBFN នៅទីក្រុង Rio de Janeiro ប្រទេសប្រេស៊ីលក្នុងនាមជាសមាជិក SBFN ក្រោមកិច្ចសហការរៀបចំដោយបណ្តាញធនាគារ និងហិរញ្ញវត្ថុនិរន្តរភាព (Sustainable Banking and Finance Network-SBFN), សាជីវកម្មហិរញ្ញវត្ថុអន្តរជាតិ (IFC), ធនាគារកណ្តាលប្រេស៊ីល និងធនាគារសហព័ន្ធប្រេស៊ីល (FEBRABAN)។ ​ខណៈដែល SERC បានចូលជាសមាជិកនៃ SBFN កាលពីថ្ងៃទី១២ ខែសីហា គ.ស.២០២៤។

លោក​ ស៊ូ សុជាតិ​បានមានប្រសាសន៍ថា ក្នុងនាមជានិយ័តករគ្រប់គ្រងវិស័យមូលបត្រនៅក្នុងប្រទេសកម្ពុជា ន.ម.ក. ប្តេជ្ញាចិត្តយ៉ាងមោះមុតចូលរួមជំរុញគំនិតផ្តួចផ្តើមនិរន្តរភាពហិរញ្ញវត្ថុ ក្នុងប្រទេសកម្ពុជា និងក្នុងតំបន់អាស៊ាន ដោយស្របទៅតាមបេសកកម្មរបស់ SBFN ក្នុងដំណើរនាំពិភពលោកឆ្ពោះទៅរកសមាហរណកម្មបរិស្ថាន សង្គម និងអភិបាលកិច្ច (ESG) ដែលប្រកបដោយភាពបៃតង និងវិបុលភាពកាន់តែប្រសើរ។ ការរួបរួមគ្នា យើងអាចសម្រេចបាននូវគោលដៅរួមរបស់កម្ពុជា។

លោកបានថ្លែងថា៖«ការសម្រេចចិត្ត និងសកម្មភាពរបស់យើង នឹងត្រួសត្រាយផ្លូវសម្រាប់កូនចៅជំនាន់ក្រោយរបស់យើង។ យើងមានឱកាសដ៏ពិសេសនៅក្នុងការបង្កើតនូវភាពខុសប្លែកដ៏ល្អប្រសើរសម្រាប់ពិភពលោកនេះ ដូចនេះយើងត្រូវតែចាប់យកឱកាសនេះ និងបំពេញបេសកកម្មនេះ»។

កិច្ចប្រជុំនេះ មានការចូលរួមពីសមាជិក និងវាគ្មិនជំនាញជាន់ខ្ពស់នៃគំនិតផ្តួចផ្តើមសកលនៃ G20 SFWG, SBFN, IFC និងធនាគារពិភពលោក និងបានប្រព្រឹត្តទៅដោយរលូន និងប្រកបដោយផ្លែផ្កាខ្ពស់ក្នុងស្មារតីរួមនាំពិភពលោកឆ្ពោះទៅកាន់ការអភិវឌ្ឍប្រកបដោយនិរន្តរភាព។

SBFN គឺជាសហគមន៍អ្នកស្ម័គ្រចិត្តដែលត្រូវបានបង្កើតឡើងកាលពីឆ្នាំ​២០១២ ដោយមាន IFC ជាលេខាធិការដ្ឋាន និងមានការគាំទ្រពីធនាគារពិភពលោក (WB) ក្នុងគោលបំណង​ជួយប្រមូលព័ត៌មាន និងធនធាន និងផ្តល់នូវការគាំទ្រជាក់ស្តែងសម្រាប់សមាជិកក្នុងការរៀបចំ និងអនុវត្តគំនិតផ្តួចផ្តើមថ្នាក់ជាតិ ដែលជំរុញដល់ហិរញ្ញវត្ថុនិរន្តរភាពកម្រិតថ្នាក់ជាតិ តំបន់ និងសកលលោក តាមរយៈវេទិកាចែករំលែកចំណេះដឹង និងការកសាងសមត្ថភាពស្តីពីហិរញ្ញវត្ថុនិរន្តរភាព សម្រាប់និយ័តករផ្នែកហិរញ្ញវត្ថុ និងសមាគមឧស្សាហកម្មនៅទូទាំងទីផ្សារដែលកំពុងងើបឡើង។ បច្ចុប្បន្ន SBFN មានសមាជិកដែលជាស្ថាប័ននីតិបុគ្គល ចំនួន ៩៦ តំណាងឱ្យប្រទេសចំនួន ៧២ មកពីតំបន់អាមេរិក អាស៊ី អាហ្រ្វិក និងអឺរ៉ុប។

កិច្ចប្រជុំសកល SBFN លើកទី៨ នេះ ត្រូវបានរៀបចំឡើងគោលបំណងដើម្បីចែករំលែកនូវវឌ្ឍនភាព និងពិភាក្សាអំពីយុទ្ធសាស្ត្រអាទិភាព និងការសម្រេចបាននៃក្រុមការងារដែលជាសមាជិករបស់ SBFN ពាក់ព័ន្ធនឹងហិរញ្ញវត្ថុនិរន្តរភាព ក៏ដូចជាការចែករំលែកបទពិសោធដោយអ្នកជំនាញសកល និងកិច្ចសន្ទនារបស់ថ្នាក់ដឹកនាំកំពូលអំពីនិន្នាការ, កាលានុវត្តភាព និងបញ្ហាប្រឈមនៃហិរញ្ញវត្ថុនិរន្តរភាពនៅក្នុងទីផ្សារកំពុងងើបឡើង។

បន្ថែមពីនេះ ក៏មានការចូលរួមជាដៃគូចែករំលែកចំណេះដឹងដោយក្រុមការងារហិរញ្ញវត្ថុនិរន្តរភាព (SFWG) នៃប្រទេស G20 ដែលបានចែករំលែកនូវចំណេះដឹងដ៏មានតម្លៃ និងអាចនាំយកនូវសម្លេងរបស់ទីផ្សារកំពុងងើបឡើងនៅក្នុងរបៀបវារៈសកល ផងដែរ៕

The post SERC៖ កម្ពុជាប្តេជ្ញាជំរុញប្រតិបត្តិការនិរន្តរភាព​ហិរញ្ញវត្ថុក្នុងដំណើរនាំពិភពលោកឆ្ពោះទៅរក​ESG​ ​ប្រកបដោយភាពបៃតង ​ appeared first on Kampuchea Thmey Daily.

១. ធ្វើ​ការ​មិន​ប្រកាន់​ខ្លួន​

ការ​ស្វែង​រក​ចំណូល​បន្ថែម​ក្នុង​ទី​ផ្សារ​ការងារ ប្រាកដ​ណាស់ការ​ងារ​​មួយ​ចំនួន​គឺ​ត្រូវ​នឹង​មុខ​វិជ្ជា​សិក្សាដែល​កំពុង​រៀន ប៉ុន្តែការងារ​ខ្លះ​ទៀត​ក៏​មិន​ត្រូវ​នឹង​ជំនាញ​​ដែល​​កំពុង​រៀ​​ន​នៅ​សាលានោះដែរ ដូច​ជា​​ការងារ​បម្រើ​ការ​នៅ​សាកលវិទ្យាល័យ​កំពុង​រៀន​​ផ្ទាល់ បម្រើ​ការ​ជា​​បុគ្គលិក​ក្រុមហ៊ុន បម្រើ​​សេវា​កម្ម​ភោជនីយដ្ឋាន​ ឬ​ការ​បង្រៀន​ក្មេង​ៗ​ជា​ដើម​​ ។ តែ​យ៉ាង​ណា ការ​ងារ​ដែល​មិន​ត្រូវ​នឹង​ជំនាញ​ គឺ​ជា​ជម្រើស​ទី​២​ ដែល​នឹង​នៅ​តែ​ផ្តល់​នូវ​ចំណេះ​ដឹង បទ​ពិសោធ ថវិកា និង​​បណ្តុះ​ជា​ជំនាញ​មួយ​ថ្មី​ផង​ដែរ​សម្រាប់​​សិស្ស​និស្សិត​ ។

២. ការ​​​ដាក់​លក់​​របស់​ប្រើ​ប្រាស់​​លើ​អន​ឡាញ​

បណ្តាញ​សង្គម​​ប្រើ​ប្រាស់​សព្វ​ថ្ងៃ ក៏​​ត្រូវ​បាន​​គេ​​ប្រើ​សម្រាប់​កន្លែង​រក​ចំណូល​មួយ​ផ្នែក​សម្រាប់​​​ជីវភាព​បាន​ផង​ដែរ​។ ជា​ឧទាហរណ៍​ ដូច​ជា​ការ​បង្កើត​ទំព័រ​​ នៅ​លើ​បណ្តាញ​សង្គម​ហ្វេសប៊ុក (Facebook) សម្រាប់​ដាក់​លក់​ផលិត​ផល ​ឬ​របស់​របរ​ប្រើ​ប្រាស់សម្រាប់​​​រក​ជា​​ប្រាក់​ចំណេញក៏​ជា​គំនិត​មួយ​​ដែល​សិស្ស​និស្សិត​អាច​អនុវត្ត​បាន​ ។

៣. ច្នៃ​ទេពកោសល្យ​​ផ្ទាល់​ខ្លួន​ទៅ​ជា​ចំណូល

ជំនាញ​គូរ​គំនូរ និពន្ធ​សៀវភៅ​ ចម្អិន​ម្ហូប​ ឬ​ផាត់​មុខ​ ដែលចំណេះ​ជំនាញ​ទាំង​នេះ សិស្ស​និស្សិតក៏​អាច​ច្នៃ​វា​ជា​ចំណែក​នៃ​ការ​រក​ចំណូល​បន្ថែម​បាន​ផង​ដែរ ហើយ​ពិសេស​គេ​ក៏​បង្កើត​​វា​ ជា​អាជីវកម្ម​ដោយ​ខ្លួ​ន​ឯង ឬ​​ច្នៃ​ជា​សេវា​លក់​ដល់​ក្រុមហ៊ុន​ដែល​មាន​តម្រូវ​ការ​ក៏​បាន ។

៤. ការ​បង្កើត​ប្លុក (Blog) ឬ​ វីដេអូ​ Vlog សម្រាប់​រក​​តម្រូវ​ការ​ផ្សព្វផ្សាយ​

ការ​​ចេះ​បង្កើត​វីដេអូ​​ផ្សព្វផ្សាយ​ ជា​ចំណេះ​ដឹង ការ​កម្សាន្ត​ឬ​សរសេរ​ជា​ប្លុក​ (Blog) ចែក​រំលែក​​ជា​គន្លឹះ​​ប្លែក​ៗ​មាន​ប្រយោជន៍​ដល់​សាធារណជន​​​ក៏​អាច​​ជា​គំនិត​មួយ​ផង​ដែរ​សម្រាប់​​និស្សិត​ ដែល​មាន​តម្រូវ​ការ​ប្រាក់​ចំណូល​បន្ថែម​ពី​សេវា​ផ្សព្វផ្សាយ​ពាណិជ្ជកម្ម​​​​។ បើ​ទោះ​ជា​ការងារ​នេះ ទាម​ទារ​ពេល​វេលា​ច្រើន​ ​មិន​អាច​ផ្តល់​​ផល​​ចំណេញ​ជា​ថវិកា​ភ្លាម​ៗ​​ក៏​ពិត​មែន តែ​សិស្ស​និស្សិត​ក៏​នៅ​អាច​ពិចារណា​​បាន​។

៥. ទុក​ឲ្យលុយ​សម្រាក​ខ្លះ

ពិត​ណាស់​ សម្រាប់​សិស្ស​-និស្សិត​ដែល​​ត្រូវ​រ៉ាប់​រង​ចំណាយ​ផ្ទាល់​ខ្លួន​ច្រើន ក៏​អាច​ពិចារណា​​ការ​ទុក​លុយ​សម្រាក​ខ្លះ ពោល​គឺ​ការ​ចាយ​វាយ​រិះ​ថាំ ​​ឬ​ដាក់​វិន័យ​លើ​ការ​​ចាយ​វាយ ជា​​ការ​កាត់​បន្ថយ​ការ​ចំណាយ។ លើស​ពី​នេះគេ​ក៏​អាច​អនុវត្ត​ការ​ចាយ​វាយ​បែប​វៃ​ឆ្លាត​ផង​ដែរ ​ពោល​គឺ​​ចំណាយ​តែ​លើ​របស់​របរ​ដែល​ចំបាច់​ ឬ​ចំ​ពេល​ដែល​​ទំនិញ​ចុះ​តម្លៃ​ក៏​ជា​​ចំណែក​មួយ​ជួយ​​សន្សំ​ដល់​ថវិកា​ក្នុង​អំឡុង​ពេល​រៀន​សូត្រ​ផង​ដែរ៕

​​​​​​​​ដោយ​៖ មាន​ រតនា

The post គន្លឹះខ្លះៗជួយសិស្សនិស្សិតអាចរកចំណូលបន្ថែម ពេលកំពុងសិក្សា appeared first on Kampuchea Thmey Daily.

ការបញ្ជាក់នេះ​ បានធ្វើឡើងគ្រាដែលសម្ដេចធិបតី ហ៊ុន ម៉ាណែត បានអញ្ជើញជាអធិបតីក្នុងពិធីបិទកិច្ចប្រជុំត្រួតពិនិត្យប្រចាំឆ្នាំ ២០២៣ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី ៤ នាព្រឹកថ្ងៃទី ១៤ ខែកុម្ភៈ ឆ្នាំ ២០២៤នេះ។  

នៅក្នុងកម្មវិធីនេះ សម្ដេចធិបតី ហ៊ុន ម៉ាណែត មានប្រសាសន៍ថា កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដែលជារបៀបវារៈអាទិភាព នៅក្នុងយុទ្ធសាស្រ្ដចតុកោណទាំង ៤ ដំណាក់កាល​ របស់រាជរដ្ឋាភិបាល ក្នុង ៤នីតិកាលកន្លងមក បានបង្កើតសមិទ្ធផលជាប្រវត្តិសាស្រ្ដជាច្រើននៅកម្ពុជា ទាំងសមិទ្ធផលក្នុងការកែលម្អអភិបាលកិច្ច នៃការគ្រប់គ្រងហិរញ្ញវត្ថុសាធារណៈ និងទាំងសមិទ្ធផលក្នុងទិដ្ឋភាពនៃការរីកចម្រើនផ្នែកសង្គម-សេដ្ឋកិច្ចរបស់កម្ពុជា។

សម្ដេចនាយករដ្ឋមន្ត្រី បានបន្តថា លើមូលដ្ឋាននេះ រាជរដ្ឋាភិបាល អាណត្តិទី ៧ នៃរដ្ឋសភា​ នៅតែផ្ដល់នូវសារៈសំខាន់ខ្ពស់ លើកម្មវិធីកែទម្រង់ខាងលើនេះ ដោយកំណត់កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ជារបៀបវារៈគោលនយោបាយអាទិភាព ក្នុងមុំទី ២ នៃស្នូល និងក្នុងមុំទី ៣ នៃប​រិស្ថានគ្រប់ដណ្ដប់របស់យុទ្ធសាស្រ្ដបញ្ចកោណ ដំណាក់កាលទី ១៕

The post រាជរដ្ឋាភិបាល អាណត្តិទី ៧ នៅតែផ្ដល់សារៈសំខាន់ខ្ពស់ លើកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ appeared first on Kampuchea Thmey Daily.

ទោះយ៉ាងណា នៅក្នុងវិស័យមីក្រូហិរញ្ញវត្ថុទាំងមូល នៅតែមានទុនគ្រប់គ្រាន់ក្នុងការចាក់បញ្ចូលទៅក្នុងទីផ្សារ ជាពិសេសផ្តោតទៅលើសហគ្រាសធុនមីក្រូ និងមធ្យម ឱ្យស្របតាមយុទ្ធសាស្ត្ររបស់រាជរដ្ឋាភិបាល ក្នុងការជំរុញ​នូវកំណើនសេដ្ឋកិច្ចកម្ពុជា។ នេះជាការបញ្ជារបស់លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា។

ថ្លែងប្រាប់កម្ពុជាថ្មី លោក កាំង តុងងី បានឱ្យដឹងទៀតថា នៅឆ្នាំនេះ ការផ្តល់ឥណទានរបស់វិស័យមីក្រូហិរញ្ញវត្ថុ ត្រូវធ្វើឡើងក្នុងស្ថានភាពដែលយកចិត្តទុកដាក់ខ្ពស់ជាងមុន ដើម្បីធានាបានថា ឥណទានដែលបានផ្តល់ជូនពលរដ្ឋ គឺជាឥណទានដែលជួយច្រើនជាងផ្តល់ការលំបាក។

លោក តុងងី បានពន្យល់ដូច្នេះថា« យើងដឹងហើយ កម្ចី ឬឥណទាន ប្រៀបដូចជាកាំបិតមុខពីរ បើយើងប្រើមិនស្រួល ឬមិនចំគោលដៅនឹងក្លាយជាសម្ពាធទៅលើក្រុមគ្រួសារ ទៅលើអតិថិជន ផ្ទុយទៅវិញប្រសិនបើពលរដ្ឋប្រើប្រាស់​កម្ចីត្រូវចំគោលដៅ កម្ចីនេះនឹងជួយឱ្យមានកំណើនប្រាក់ចំណូល ក៏ដូចជា ជូយជំរុញកំណើនសេដ្ឋកិច្ចជាតិផងដែរ»។

​​អ្នកនាំពាក្យសមាគមមីក្រូហិរញ្ញវត្ថុកម្ពុជា បានលើកឡើងថា ធនាគារ មីក្រូហិរញ្ញវត្ថុ នឹងរឹតបន្តឹងទៅលើការផ្តល់គុណ​ភាពនៃឥណទាន ប៉ុន្តែមិនមានបញ្ហាទៅលើការផ្តល់ទុនដល់​អតិថិជននោះទេ ពោលគឺមីក្រូហិរញ្ញវត្ថុមានទុនគ្រប់​គ្រាន់ក្នុងការចាក់បញ្ចូលទីផ្សារ ឱ្យតែពលរដ្ឋមានផែនការអាជីវកម្មច្បាស់លាស់ គុណភាពនៃការប្រើប្រាស់កម្ចី គឺមានស្ថានភាពល្អ។

​​​បើតាមលោក កាំង តុងងី តម្រូវការនៃការប្រើឥណទាននៅឆ្នាំ ២០២៣ មានការធ្លាក់ចុះបន្តិច ខណៈដែលប្រាក់បញ្ញើ​ពលរដ្ឋមានការកើនឡើង ដែលនេះជាសញ្ញាបង្ហាញពីស្ថិរភាពនៃវិស័យហិរញ្ញវត្ថុកម្ពុជា បើទោះជាមានបញ្ហាប្រឈម​ខ្លះពីឥណទានមានហានិភ័យ(ឥណទានដែលពលរដ្ឋបង់លើស៣០ថ្ងៃ) យ៉ាងណាក៏ដោយ។

នៅក្នុងវិស័យមីក្រូហិរញ្ញវត្ថុឥណទានដែលប្រជាពលរដ្ឋបង់លើសពី ៣០ថ្ងៃ ជាទូទៅមានកម្រិតត្រឹមតែ ១ភាគរយ​ប៉ុណ្ណោះ ដែលនៅលើពិភពលោកចាត់ទុកថា ជាតួលេខដែលទាបបំផុត។ ប៉ុន្តែតួលេខនេះ បានចាប់ផ្តើមកើនឡើង នៅពេលដែលកើតមានជំងឺកូវីដ-១៩ រហូតដល់ ៣ភាគរយ។ បន្ទាប់ពីជំងឺកូវីដ ក៏កើតមានវិបត្តិសេដ្ឋកិច្ចសកល ដែលធ្វើឱ្យសេដ្ឋកិច្ចកម្ពុជា មានការធ្លាក់ចុះនាំឱ្យឥណទានមានហានិភ័យកើនឡើងដល់ជាង ៦ភាគរយនាពេល​បច្ចុប្បន្ននេះ។ បើទោះជាឡើងដល់កម្រិតមួយដែលកម្ពុជា មិនធ្លាប់ជួបពីមុនមក តែធៀបនឹងបណ្តាប្រទេសដទៃកម្ពុជា នៅតែទាបជាងគេឆ្ងាយ ដោយប្រទេសខ្លះឡើងដល់ ១០ ទៅ ៣០ភាគរយឯណោះ។ នេះជាការបញ្ជាក់​បន្ថែម​របស់លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា៕

​

The post ឆ្នាំ ២០២៤ មិនរំពឹងឥណទានមានកំណើន​ដោយបន្តរងឥទ្ធិពលវិបត្តិ​សេដ្ឋកិច្ចសកល appeared first on Kampuchea Thmey Daily.