ក្រុមយុវជន ចុះទៅបង្រៀនសិស្សពីចំណេះដឹងផ្នែកហិរញ្ញវត្ថុនៅខេត្តកំពង់ចាម ដើម្បីការពារខ្លួនពីការឆបោក

នៅថ្ងៃទី១០ ខែឧសភា ឆ្នាំ២០២៥ យុវជនមួយក្រុម ដែលជា ក្រុមការងារគម្រោង “រៀនពីលុយ ៣.០” នៃសភាយុវជន Youth Assembly បានចុះទៅបង្រៀនដល់សិស្សានុសិស្សអំពីចំណេះដឹងផ្នែកហិរញ្ញវត្ថុ នៅអនុវិទ្យាល័យ អង្គរ ស្ថិតនៅ ស្រុកកំពង់សៀម ខេត្តកំពង់ចាម ដើម្បីឱ្យពួកគេយល់ដឹងបន្ថែមពីបញ្ហាហិរញ្ញវត្ថុ និងការពារខ្លួនពីការឆបោក។

បើតាមទំព័រហ្វេសប៊ុករបស់ Youth Assembly គម្រោង “រៀនពីលុយ ៣.០” ជាគម្រោងរៀបចំ និងដឹកនាំដោយយុវជន ដែលមានអនុវត្តជាការបង្រៀនវគ្គខ្លី ដល់សិស្សានុសិស្ស កម្រិតអនុវិទ្យាល័យ និងវិទ្យាល័យ នៅតាមរាជធានី-ខេត្ត។ គម្រោងនេះ ចុះទៅចែករំលែកចំណេះដឹងពីការគ្រប់គ្រងចំណូល ចំណាយ និងការការពារខ្លួនពីការឆបោក ផ្នែកហិរញ្ញវត្ថុ។ សម្រាប់គោលបំណងធំនៃគម្រោង គឺចង់ឲ្យសិស្សទទួលបានចំណេះដឹងពីចំណូល ចំណាយ និងចេះសន្សំ មួយវិញទៀត អាចការពារខ្លួនពីការឆបោកផ្នែកហិរញ្ញវត្ថុបានគ្រប់សកម្មភាពនៃការឆបោក ដើម្បីជួយខ្លួនឯង គ្រួសារ សហគមន៍ និងសង្គមជាតិ។ ជាក់ស្តែង ចំពោះការចុះទៅបង្រៀននៅខេត្តកំពង់ចាមនេះ ធ្វើដោយក្រុមការងារគម្រោង “រៀនពីលុយ ៣.០” នៃសភាយុវជន Youth Assembly សហការជាមួយក្រុមការងារនៃ ធនាគារជាតិនៃកម្ពុជា និងក្រុមការងារសមាគមមីក្រូហិរញ្ញវត្ថុកម្ពុជា។

ក្នុងឱកាសនោះ ក្រៅពីសិស្សានុសិស្សទទួលបានចំណេះដឹងផ្នែកហិរញ្ញវត្ថុ ក៏បានស្វែងយល់ពី ប្រវត្តិនៃធនាគារនៃកម្ពុជា ច្បាប់ និងបទបញ្ញតិ្ត ការឆបោកផ្នែកហិរញវត្ថុ សកម្មភាពនៃការឆបោក សេវាហិរញ្ញវត្ថុក្រៅប្រព័ន្ធ ផលវិបាកនៃការប្រើប្រាស់កម្ចីក្រៅផ្លូវការ ដែលចែករំលែកដោយ ក្រុមការងារនៃធនាគារជាតិនៃកម្ពុជាថែមទៀតផង។  

ចំណែក សមាគមមីក្រូហិរញ្ញវត្ថុកម្ពុជា ក៏បានលើកទឹកចិត្តដល់សិស្សានុសិស្ស ឱ្យមានការចាយវាយសន្សំសំចៃ និងចេះសន្សំប្រាក់ ព្រមទាំងចែករំលែកចំណេះដឹងបន្តដល់សិស្សានុសិស្សឯទៀតនៅក្នុងសាលារៀនដែរ៕