ហៀរទឹកមាត់ Archives - Kampuchea Thmey Daily

ធ្លាប់ដេកហៀរទឹកមាត់អត់? នេះជាមូលហេតុ និងវិធីបំបាត់

Sonya — Fri, 03 Dec 2021 09:40:00 +0000

ការដេកហៀរទឹកមាត់ កើតឡើងនៅពេលទឹកមាត់មានបរិមាណច្រើន នៅក្នុងមាត់ ហើយគ្រប់គ្នា អាចមានបញ្ហានេះ យូរៗម្តង។ ប៉ុន្ដែបើការហៀរទឹកមាត់នេះ កើតឡើងជាទៀងទាត់ និងច្រើន វាអាចជាសញ្ញានៃការវិវត្តជំងឺ ឬរាងកាយយើងដំណើរការមុខងារខុសប្រក្រតី។

១. ហេតុអ្វីបានយើងដេកហៀរទឹកមាត់?

ពេលយើងដេក សាច់ដុំផ្ទៃមុខរបស់យើង ក៏មិនដំណើរការដែរ ហើយនៅពេលទឹកមាត់មានបរិមាណពេញក្នុងមាត់ វាចាប់ផ្ដើមហៀរចេញមកខាងក្រៅ។ នេះក៏ដោយសារសាច់ដុំផ្ទៃមុខផងដែរ ដែលធ្វើឲ្យមាត់ចំហ។ អ៊ីចឹងហើយ បានជាពេលភ្ញាក់មក យើងឃើញខ្នើយសើម។

ការហៀរទឹកមាត់ច្រើន អាចជាសញ្ញា នៃជំងឺប្រព័ន្ធសរសៃប្រសាទ ឬបណ្ដាលមកពីការស្ទះសំបោរ។ អ្នកហៀរទឹកមាត់ ក៏អាចបណ្ដាលមកពីបញ្ហាសុខភាពជាច្រើនទៀតផងដែរ ដូចជា ជំងឺដាច់សរសៃឈាមខួរក្បាលជាដើម។

២. តើយើងអាចបំបាត់បញ្ហានេះ ដោយវិធីណា?

– សម្អាតប្រហោងច្រមុះ

មូលហេតុមួយ នៃការដេកហៀរទឹកមាត់ បណ្ដាលមកពីការស្ទះនៅក្នុងច្រមុះ ដែលធ្វើឲ្យយើងដកដង្ហើមតាមមាត់ និងធ្វើឲ្យហៀរទឹកមាត់។ ដូច្នេះ ការសម្អាតសំបោរនៅក្នុងប្រហោងច្រមុះ អាចជួយមិនឲ្យដេកហៀរទឹកមាត់បាន។ ការមុជទឹកក្តៅ ក៏ជួយសម្អាតច្រមុះ និងធ្វើឲ្យដកដង្ហើមស្រួលផងដែរ នៅពេលយប់។ យើងក៏អាចប្រើផលិតផលផ្សេងទៀត ដើម្បីសម្អាតប្រហោងច្រមុះផងដែរ។

– ផ្លាស់ប្ដូរទម្លាប់គេង

ការដេកហៀរទឹកមាត់ អាចបណ្ដាលមកពីទម្លាប់ដេកផ្កាប់មុខ ដែលធ្វើឲ្យទឹកមាត់ហៀរចេញមកខាងក្រៅ ដូច្នេះយើងគួរទម្លាប់ដេកផ្ងាវិញ ព្រោះឥរិយាបទបែបនេះ មិនធ្វើឲ្យហៀរទឹកមាត់ចេញក្រៅទេ ទោះបីមានការផលិតទឹកមាត់ជាច្រើន។ ការដេកលើខ្នើយខ្ពស់ ក៏ជួយមិនឲ្យហៀរទឹកមាត់ផងដែរ។

– ពិនិត្យបញ្ហាគេងមិនដកដង្ហើម (Sleep Apnea)

គេងមិនដកដង្ហើម ជាបញ្ហាមិនប្រក្រតី ដែលមនុស្សម្នាក់ មានដំណើរការដកដង្ហើមមិនស្រួល។ វាបណ្ដាលឲ្យរំខានការគេង ភ្ញាក់កណ្ដាលយប់ អស់កម្លាំង និងងងុយគេងសឹងពេញមួយថ្ងៃ។ ហើយការហៀរទឹកមាត់ និងស្រម៉ុក ជាសញ្ញាសំខាន់ នៃការកើតមានបញ្ហាគេងមិនដកដង្ហើម។ ប្រសិនសង្ស័យមានបញ្ហានេះ យើងត្រូវទៅពិគ្រោះជាមួយគ្រូពេទ្យ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ គេងហៀរទឹកមាត់ អាចជាបញ្ហាសុខភាពត្រូវការការព្យាបាល

ចុចអាន៖ អនុវត្តគន្លឹះទាំងនេះ ធានាថានឹងបំបាត់ការគេងស្រមុក លែងរំខានដំណេកអ្នកជិតខ្លួន

The post ធ្លាប់ដេកហៀរទឹកមាត់អត់? នេះជាមូលហេតុ និងវិធីបំបាត់ appeared first on Kampuchea Thmey Daily.

គេងហៀរទឹកមាត់ អាចជាបញ្ហាសុខភាពត្រូវការការព្យាបាល

Sonya — Wed, 11 Aug 2021 09:50:00 +0000

និយាយត្រង់ចុះ គ្មានអ្នកណាចូលចិត្តគេងហៀរទឹកមាត់ទេ សូម្បីគ្នាយើងចូលចិត្តគេងហៀរខ្លួនឯងក៏មិនចង់ដែរ តែខ្លះថាធ្វើម៉េចបើទម្លាប់បែបនេះចង់កែក៏មិនបាន ខ្លះថាគេងហៀរដោយមិនដឹងខ្លួន។ ប៉ុន្តែ ការគេងហៀរទឹកមាត់គ្នាយើងភាគច្រើនគិតថាជាទម្លាប់នោះ មិនត្រូវទាំងស្រុងទេត្រូវនិយាយថា វាជាបញ្ហាសុខភាពដែលត្រូវដោះស្រាយ។ ខាងក្រោមនេះ អាចពន្យល់គ្នាយើងឲ្យដឹងខ្លះៗ ពីបញ្ហាសុខភាពមួយចំនួននាំឲ្យគេងហៀរទឹកមាត់។

១- ទីតាំង និងរបៀបគេង

មូលហេតុភាគច្រើនបណ្តាលឲ្យគេងហៀរទឹកមាត់ គឺដោយសារទីតាំង និងរបៀបគេង អំឡុងពេលដែលយើងកំពុងលង់លក់តែម្តង ដែលនាំទឹកមាត់ងាយនឹងចេញមកក្រៅដោយសារទំនាញផែនដី។ ទីតាំងយើងគេង ជារឿយៗនាំឲ្យទឹកមាត់មានឱកាសហូរចេញមកក្រៅបានយ៉ាងងាយ ខណៈគ្នាយើងមួយចំនួនមានទម្លាប់គេងបែរទៅចំហៀង ឬគេងផ្កាប់មុខ តែងជួបបញ្ហាហៀរទឹកមាត់ពេលគេងនេះឯង ពិសេសពេលយើងព្យាយាមដកដង្ហើមតាមមាត់ ឬគ្នាយើងមានប្រហោងច្រមុះតូចចង្អៀត ជាហេតុនាំឲ្យដំណក់ទឹកមាត់ដែលប្រមូលផ្តុំអាចហៀរចេញមកក្រៅ ពេលយើងបើកមាត់ដកដង្ហើម។

២- ស្ទះឆ្អឹង ឬរន្ធច្រមុះ

បើគ្នាយើងហៀរសំបោរដោយសារជំងឺផ្តាសាយ ឬដោយសារឆ្លងរោគអ្វីមួយនៅច្រមុះ អាចនឹងសង្កេតឃើញថា ចំនួនទឹកមាត់របស់យើងនឹងកើនឡើងខុសធម្មតា។ បើយើងឧស្សាហ៍មានបញ្ហារលាកច្រមុះ ឬប្រហោងឆ្អឹងច្រមុះខុសពីអ្នកផ្សេង យើងច្បាស់ជាសង្កេតឃើញមានសម្បូរទឹកមាត់គ្រប់ពេលតែម្តង។ ការស្ទះរន្ធច្រមុះ កាន់តែជំរុញឲ្យយើងដកដង្ហើមតាមមាត់ច្រើនជាងមុនអំឡុងពេលគេង ហើយការដកដង្ហើមតាមមាត់ដូចរៀបរាប់ខាងលើនឹងធ្វើឲ្យទឹកមាត់ហូរចេញមកក្រៅបានយ៉ាងងាយ។

៣- ជំងឺច្រាលទឹកក្រពះ

ជំងឺច្រាលទឹកក្រពះ (GERD) មកពីពាក្យពេញ Gastroesophageal reflux disorder សំដៅលើអាការៈច្រាលទឹកអាស៊ីដពីក្នុងក្រពះមកខាងលើចូលទៅក្នុងបំពង់អាហារ នាំឲ្យខូតខាតបំពង់អាហារតែម្តង។ ជំងឺ GERD អាចបង្កឲ្យមានបញ្ហាពិបាកលេបអាហារ ឬធ្វើឲ្យយើងមានអារម្មណ៍ជាប់ដុំអ្វីមួយនៅបំពង់ក ហើយអារម្មណ៍នេះ នឹងនាំឲ្យគ្នាយើងមួយចំនួនកើនទឹកមាត់កាន់តែច្រើន ពិសេសអំឡុងពេលគេង។

– ឥទ្ធិពលពីថ្នាំពេទ្យ

ថ្នាំពេទ្យមួយចំនួនអាចនាំឲ្យយើងកើនឡើងកម្រិតទឹកមាត់។ ជាក់ស្តែងពពួកថ្នាំ Antipsychotic ពិសេសថ្នាំ Clozapine និងថ្នាំប្រើព្យាបាលជំងឺ Alzheimer (ជំងឺម្យ៉ាងដែលកើតលើប្រព័ន្ធសរសៃប្រសាទរបស់មនុស្សចាស់ដូចជាធ្លាក់ចុះការគិត ឬភ្លេចភ្លាំង) ក៏សុទ្ធតែបង្កឲ្យហៀរទឹកមាត់ដូចគ្នា។ រីឯពពួកថ្នាំផ្សះ ក៏នាំឲ្យកើនកម្រិតទឹកមាត់ច្រើនដែរ។

៥- បញ្ហាពិបាកលេបអាហារ

ពាក្យបច្ចេកទេហៅថា Dysphagia គឺសំដៅលើលក្ខខណ្ឌណាមួយនៃបញ្ហាពិបាកលេបអាហារ។ នៅពេលកម្រិតទឹកមាត់យើងកើនឡើងកាន់តែច្រើន ក៏អាចជារោគសញ្ញាបញ្ហាសុខភាពមួយនេះ។ ជំងឺ Parkinson’s ជំងឺ Muscular dystrophy និងមហារីកមួយចំនួនសុទ្ធតែអាចបង្កឲ្យពិបាកលេបអាហារបាន។

៦- ជំងឺគេងមិនដកដង្ហើម

នៅពេលយើងមានជំងឺគេងមិនដកដង្ហើម ដំណេករបស់យើងនឹងរងការរំខាន ដោយសាររាងកាយឈប់ដកដង្ហើមពេលខ្លះអំឡុងពេលគេង។ គេងហៀរទឹកមាត់អាចជាកត្តាប្រឈមបង្កទៅជាជំងឺគេងមិនដកដង្ហើម ដែលជាអាការៈសុខភាពធ្ងន់ធ្ងរមួយ ទាមទារធ្វើរោគវិនិច្ឆ័យឲ្យបានជាក់លាក់។ បើគ្នាយើងមានបញ្ហាគេងហៀរទឹកមាត់ពេលយប់ យើងត្រូវសួរខ្លួនឯងថា តើនឹងមានរោគសញ្ញាជំងឺគេងមិនដកដង្ហើមដែរឬទេ ខណៈរោគសញ្ញាជំងឺនេះមានដូចជា៖

– ស្រមុកខ្លាំង
– ភ្ញាក់ពីដំណេកភ្លាមៗ ឬមានអារម្មណ៍មិនអាចដកដង្ហើមបាននៅពេលយប់
– មានបញ្ហាផ្ចង់អារម្មណ៍ ឬពិសេសផ្តោតលើអ្វីមួយនៅពេលថ្ងៃ
– ទើបតែភ្ញាក់បានប៉ុន្មានម៉ោង ស្រាប់តែងងុយគេងខ្លាំង
– ឈឺ ឬស្ងួតក ពេលក្រោកពីគេង

បើប្រទះខ្លួនឯងមានបញ្ហាដូចរៀបរាប់ខាងលើ កុំអែអង់ ត្រូប្រញាប់ទៅពិគ្រោះជាមួយគ្រូពេទ្យជាបន្ទាន់៕

អត្ថបទផ្ដល់សិទ្ធិ៖ Hello គ្រូពេទ្យ

The post គេងហៀរទឹកមាត់ អាចជាបញ្ហាសុខភាពត្រូវការការព្យាបាល appeared first on Kampuchea Thmey Daily.