ឡៅ សៃណេត Archives - Kampuchea Thmey Daily

ឡៅ សៃណេត នៅតែមិនអាចឈ្នះ មហាម៉ាត់ ខណៈអ្នកគាំទ្រមួយចំនួនមិនអស់ចិត្តរឿង ៥-០

Sina Noun — Tue, 30 Sep 2025 03:26:49 +0000

ជំនួបដ៏កក្រើកតាំងពីទឹកទី១ ដល់ទឹកទី៥ លទ្ធផលចុងក្រោយកីឡាករ ឡៅ សៃណេត នៅតែមិនអាចយកឈ្នះលើដៃគូចាស់ មហាម៉ាត់ ក្នុងជំនួបដណ្ដើមខ្សែក្រវាត់ XTREME CAMBODIA KUN KHMER កាលពីថ្ងៃទី២៧ ខែកញ្ញា ឆ្នាំ២០២៥ នៅសង្វៀនហង្សមាស។

កីឡាករ មហាម៉ាត់

គូសងសឹក និងដណ្ដើមខ្សែក្រវាត់ខាងលើនេះគឺមិនបណ្ដោយឲ្យនាទីដើរដោយអត់ប្រយោជន៍នោះឡើយ ពោលតាំងពីទឹកទី១ មកគឺបើកការប្រយុទ្ធគ្នារហូតតែម្ដង។ ម្នាក់ៗចេញអស់ក្បាច់ស្នៀតដែលខ្លួនមានហើយ ព្រោះចង់ឈ្នះខ្សែក្រវាត់ផង និងដណ្ដើមកេរ្តិ៍ឈ្មោះពីគ្នាជាថ្មីទៀត។

យ៉ាងណាក្រោយបញ្ចប់ការប្រកួតទាំង ៥ទឹក ចៅក្រមដាក់ពិន្ទុមើលឃើញថាជ័យជម្នះបានទៅកីឡាករអាហ្វនីស្ថាន មហាម៉ាត់ ដដែល។ ដូច្នេះការខំប្រឹងទាំងការហ្វឹកហាត់ និងការប្រកួតរបស់ ឡៅ សៃណេត នៅតែមិនទាន់ឈ្នះសងសឹងលើ មហាម៉ាត់ វិញបាន។

កីឡាករ មហាម៉ាត់

ក្រោយបញ្ចប់ការប្រកួតគេឃើញនៅលើបណ្ដាញសង្គមមានការជជែកវែកញែកគ្នាច្រើនអំពីលទ្ធផលចៅក្រុមសម្រេចឲ្យ មហាម៉ាត់ ឈ្នះដោយលទ្ធផល ៥-០ អំឡុងពេលនោះ។ អ្នកគាំទ្រមួយចំនួននៅតែមិនទាន់យល់ត្រង់ចំណុច នៃចៅក្រមសម្រេចឲ្យចាញ់ដោយឯកច្ឆន្ទទើបមានការជជែកវែកញែកអំពីលទ្ធផលរបស់ សៃណេត។

កីឡាករ ឡៅ សៃណេត

ជាមួយគ្នានោះលោក ឡៅ ស៊ីណាត ដែលជាពូបង្កើតរបស់ ឡៅ សៃណេត បានស៊ែរូបភាព នៃការប្រកួតរបស់ក្មួយអមដោយសំណេរថា «កីឡាមានតែប៉ុណ្ណឹង បើមិនឈ្នះ គឺចាញ់»។ លោកក៏បានបកស្រាយខ្លះដែរអំពីលទ្ធផលចៅក្រុមឲ្យចាញ់ ៥-០ នេះថាដោយសារតែចៅក្រមដាក់ពិន្ទុទាំង៥ មើលឃើញថាចាញ់ដូចៗគ្នាទើបចេញលទ្ធផលមកបែបនេះ។

កីឡាករ ឡៅ សៃណេត

បញ្ជាក់ដែរថា កីឡាករ ឡៅ សៃណេត បានចាញ់កីឡាករ មហាម៉ាត់ ចំនួន ២លើកហើយក្នុងជំនួបដណ្ដើមខ្សែក្រវាត់។ លើកទី១ ខ្សែក្រវាត់ DAZZ ចាញ់ដោយអាជ្ញាកណ្ដាលបញ្ឈប់ក្នុងទឹកទី៤ កាលពីថ្ងៃទី៣ ខែឧសភា ឆ្នាំ២០២៥ នៅសង្វៀន TV5។ លើកទី២ ខ្សែក្រវាត់ XTREME CAMBODIA KUN KHMER ចាញ់ដោយពិន្ទុ កាលពីថ្ងៃទី២៧ ខែកញ្ញា ឆ្នាំ២០២៥ នៅសង្វៀនហង្សមាស៕

ខ្សែក្រវាត់ DAZZ ដែលឈ្នះ សៃណេត លើកទី១ នៅ TV5

អត្តបទដោយ៖ នួន ស៊ីណា

The post ឡៅ សៃណេត នៅតែមិនអាចឈ្នះ មហាម៉ាត់ ខណៈអ្នកគាំទ្រមួយចំនួនមិនអស់ចិត្តរឿង ៥-០ appeared first on Kampuchea Thmey Daily.

មានការចែករំលែកច្រើនពីអ្នកគាំទ្រប្រដាល់គុនខ្មែរចង់ឲ្យ ឡៅ សៃណេត ប៉ះ មហាម៉ាត់

Sina Noun — Fri, 21 Mar 2025 04:38:17 +0000

ប៉ុន្មានថ្ងៃមកនេះគេមើលឃើញថាមានការស៊ែចែករំលែក និងផ្គូផ្គងឲ្យប៉ះគ្នារវាងកីឡាករ ឡៅ សៃណេត និងកីឡាករអាហ្វហ្គានីស្ថាន មហាម៉ាត់ ព្រោះចង់ដឹងរវាងអ្នកទាំងពីរមួយណាខ្លាំងជាង។

រូបភាពហ្វេសបុក ឡៅ សៃណេត

មហាម៉ាត់ បន្ទាប់ពីយកឈ្នះ ពេជ្រ សឹង្ហៈ ជាលើកទី២ និងទទួលបានខ្សែក្រវាត់ថ្មីថ្មោងនេះមហាជនអ្នកគាំទ្រប្រដាល់ រួមទាំងអេដមីនមួយផងចំនួនផងនោះបានចាប់ផ្ដើមផ្គូផ្គងឲ្យរូបគេប៉ះជាមួយត្រកូល ឡៅ គឺ ឡៅ សៃណេត វិញម្ដង។

ការស៊ែចែករំលែកចង់ឲ្យប៉ះគ្នានេះ ព្រោះតែមហាជនមើលឃើញពីសមត្ថភាព មហាម៉ាត់ ល្អខ្លាំង និងយកឈ្នះជើងខ្លាំងទម្ងន់ស្រាលកម្ពុជាជាច្រើននាក់រួចហើយដូចជា ប៊ន ពន្លឹក ឬទ្ធិ ទេវតា ប៊ុនតុង គុនខ្មែរ ឡុង ពិសិដ្ឋ ពេជ្រ សឹង្ហៈ ទទួលបានពានរង្វាន់ផង និងឈ្នះខ្សែក្រវាត់ផង។

រូបភាពហ្វេកបុកផេក Hang Meas Kunkhmer

ដោយសារតែទម្រង់វាយកាច និងកាយសម្បទាធំល្អផងនោះទើបមហាជនចង់ឲ្យប៉ះ ឡៅ សៃណេត ដែលជាជើងខ្លាំងកំពុងឡើងកូដរួមទាំងកាយសម្បទាខ្ពស់ប្រហាក់ប្រហែលគ្នាទៀតផង។ អ្នកទាំងពីរនេះទំនងមិនយូរនោះទេ អាចនឹងប៉ះគ្នាហើយ ព្រោះសន្ទុះនៃការគាំទ្រពីមហាជនច្រើនចង់ឲ្យសាកក្បាច់គុនខ្មែរ និងចង់ដឹងថានរណាជាអ្នកឈ្នះផង។ ដូច្នេះហើយជឿជាក់ថាតាមបណ្ដាស្ថានីយនឹងរៀបចំឲ្យមានការប្រកួតនេះឡើងជូនអ្នកគាំទ្រគុនខ្មែរបានទស្សនាក្នុងពេលវេលាសមស្របណាមួយ។

រូបភាពហ្វេសបុក ឡៅ សៃណេត

បញ្ជាក់ដែរថា មហាម៉ាត់ ជាកីឡាករបរទេសដែលកំពុងស្នាក់នៅ និងហ្វឹកហាត់ជាមួយលោក សេន ប៊ុនថេន ក្នុងក្លឹបសេនប៊ុនថេនប៉ែនកាក់គុនខ្មែរ។ ថ្មីៗនេះ មហាម៉ាត់ ទើបឈ្នះពានរង្វាន់ម៉ារ៉ាតុងផង និងឈ្នះខ្សែក្រវាត់ X TREME របស់ទូរទស្សន៍ហង្សមាសផង។ ចំណែក ឡៅ សៃណេត ជាជើងខ្លាំងរបស់កម្ពុជាមួយរូបក្នុងវិស័យគុនខ្មែរនេះ។ ខ្សែក្រវាត់ ពានរង្វាន់ មេដាយ គឺក្មួយបង្កើតរបស់លោក ឡៅ ស៊ីណាត រូបនេះឈ្នះអស់ហើយនាពេលកន្លងមក។ បើ ឡៅ សៃណេត ប៉ះ មហាម៉ាត់ មែនតើបងប្អូនយល់ថាអ្នកណានឹងឈ្នះការប្រកួតមួយនោះ? បើប៉ះគ្នាមែនតើចប់ទឹកទេមើលទៅ៕

អត្ថបទដោយ៖ នួន ស៊ីណា

The post មានការចែករំលែកច្រើនពីអ្នកគាំទ្រប្រដាល់គុនខ្មែរចង់ឲ្យ ឡៅ សៃណេត ប៉ះ មហាម៉ាត់ appeared first on Kampuchea Thmey Daily.

ឱកាសល្អសាងកេរ្តិ៍ឈ្មោះ ឡៅ សៃណេត វ៉ៃដណ្តើមខ្សែក្រវាត់នៅជប៉ុនថ្ងៃស្អែក

chean virakbot — Sat, 01 Jun 2024 03:36:40 +0000

ស្របពេលវិស័យកីឡាប្រដាល់គុនខ្មែរកំពុងមានកេរ្តិ៍បោះសំឡេង និងពង្រីកខ្លួនលើឆាកអន្តរជាតិ កីឡាករ កីឡាការិនីគុនខ្មែរជាច្រើនរូបទទួលបានឱកាសទៅប្រកួតនៅក្រៅប្រទេស ជាពិសេសប្រទេសជប៉ុនដែលឧបត្ថម្ភគាំទ្រដោយភេសជ្ជៈប៉ូវកម្លាំងគ្រុឌ។

ម្ចាស់មេដាយមាសកីឡាស៊ីហ្គេមវ័យក្មេង ឡៅ សៃណេត កីឡាករ អ៊ួច ធារិទ្ធ និងកីឡាការិនី ធន់ ស្រីពេញ ត្រូវប្រកួតជាមួយកីឡាករ កីឡាការិនីម្ចាស់ផ្ទះជប៉ុននៅថ្ងៃអាទិត្យ ទី២ ខែមិថុនា ឆ្នាំ២០២៤។ ជាពិសេសកីឡាករ ឡៅ ស៊ីណេត វាយដណ្តើមខ្សែក្រវាត់ពីម្ចាស់ផ្ទះជប៉ុនក្នុងតំណែងរងគូឯកក្នុងកម្មវិធី Sukwankinton។

ដើម្បីចូលរួមគាំទ្រ និងផ្តល់កម្លាំងចិត្តដល់អត្តពលិកកម្ពុជាពីទីក្រុងតូក្យូប្រទេសជប៉ុន ភេសជ្ជៈប៉ូវកម្លាំងគ្រុឌ ក្រៅពីចូលរួមឧបត្ថម្ភក្នុងការចេញទៅប្រកួតនៅជប៉ុន ក៏បានមកនូវការផ្សាយបន្តផ្ទាល់ជូនអ្នកគាំទ្រនៅកម្ពុជាបានទស្សនាតាមរយៈកញ្ចក់ទូរទស្សន៍ជាតិកម្ពុជាចាប់ពី៣:៣០នាទី រសៀល ម៉ោងនៅកម្ពុជា ត្រូវនឹងម៉ោង៥:៣០នាទីល្ងាចនៅប្រទេសជប៉ុន។

ជូនពរកីឡាករ កីឡាការិនីធ្វើដំណើរប្រកបដោយសុវត្ថិភាព ខិតខំឲ្យអស់ពីសមត្ថភាព និងទទួលបានជោគជ័យជូនជាតិ។ មិនថាលទ្ធផលយ៉ាងណាក្តី ក៏ភេសជ្ជៈប៉ូវកម្លាំងគ្រុឌនៅតែបន្តគាំទ្រ ផ្តល់ជាកម្លាំងចិត្ត និងថាមពលជាកត្តាលីករជួយជម្រុញនៅពីក្រោយ ដល់កីឡាករ កីឡាការិនី។

សម្រាប់ការចេញដំណើរទៅក្រៅប្រទេសជាលើកដំបូងនេះ ឡៅ សៃណេត បានប្តេជ្ញាយកខ្សែក្រវាត់មកប្រទេសកម្ពុជាវិញឲ្យបាន។ លោក លីដា ជាអ្នកដឹកនាំកីឡាករ កីឡាការិនីគុនខ្មែរទៅប្រកួតនៅជប៉ុនបានលើកឡើងថា អ្នកលេងគុនខ្មែរទៅប្រកួតលើកនេះសុទ្ធតែមានទំនុកចិត្តក្នុងការទទួលបានជ័យជម្នះ។ «មែនទែនទៅ ខ្ញុំស្ទើរតែមានទំនុកចិត្ត១០០%លើកីឡាករ ឡៃ សៃណេត ដែលគាត់នឹងនាំខ្សែក្រវាត់មកប្រទេសកម្ពុជាយើង ដោយសារតែគាត់មានកម្លាំងចិត្ត ទំនុកចិត្ត វិជ្ជាគុនគឺគ្រប់គ្រាន់។ មិនត្រឹមតែប៉ុណ្ណោះ ការចេញទៅនេះក៏ជាឱកាសភ្ជាប់ទំនាក់ទំនង ហើយអាចនាំកីឡាករជប៉ុនមកប្រកួតនៅសង្វៀនគ្រុឌគុនខ្មែរវិញម្តង»។

សូម្បីតែផេកខាងកម្មវិធីរបស់ជប៉ុនបាននិយាយថា កីឡាករគុនខ្មែរ ឡៅ សៃណេត បានឈ្នះខ្សែក្រវាត់គ្រុឌគុនខ្មែរកាលពីថ្ងៃទី១៨ ខែឧសភា ឆ្នាំ២០២៤ មុនពេលកីឡាកររូបនេះធ្វើដំណើរមកប្រកួតដណ្តើមខ្សែក្រវាត់នៅប្រទេសជប៉ុន។ គ្រុឌតែងតែពីជួយផ្គត់ផ្គង់ និងគិតគូរដល់ជីវភាពរបស់កីឡាករគុនខ្មែរ! គ្រុឌគុនខ្មែរ ថែអត្តសញ្ញាណខ្មែរ នាំគុនខ្មែរ ល្បីលើឆាកអន្តរជាតិ! ទទួលយកថាមពលជាមួយគ្រុឌ!

អត្ថបទ៖ វីរបុត្រ

The post ឱកាសល្អសាងកេរ្តិ៍ឈ្មោះ ឡៅ សៃណេត វ៉ៃដណ្តើមខ្សែក្រវាត់នៅជប៉ុនថ្ងៃស្អែក appeared first on Kampuchea Thmey Daily.

ឡៅ សៃណេត Archives - Kampuchea Thmey Daily

ឡៅ សៃណេត នៅតែមិនអាចឈ្នះ មហាម៉ាត់ ខណៈអ្នកគាំទ្រមួយចំនួនមិនអស់ចិត្តរឿង ៥-០

មាន​ការ​ចែករំលែក​ច្រើន​ពី​អ្នកគាំទ្រ​ប្រដាល់​គុន​ខ្មែរ​ចង់​ឲ្យ​ ឡៅ​ សៃណេត​ ប៉ះ​ មហាម៉ាត់​

ឱកាសល្អសាងកេរ្តិ៍ឈ្មោះ ឡៅ សៃណេត វ៉ៃដណ្តើម​ខ្សែ​ក្រវាត់នៅជប៉ុនថ្ងៃស្អែក

មានការចែករំលែកច្រើនពីអ្នកគាំទ្រប្រដាល់គុនខ្មែរចង់ឲ្យ ឡៅ សៃណេត ប៉ះ មហាម៉ាត់

ឱកាសល្អសាងកេរ្តិ៍ឈ្មោះ ឡៅ សៃណេត វ៉ៃដណ្តើមខ្សែក្រវាត់នៅជប៉ុនថ្ងៃស្អែក