ជាមួយគ្នានេះដែរ ឯកឧត្ដម ហ៊ុន ម៉ានី លើកទឹកចិត្តដល់ក្រុមការងារទាំងអស់ឱ្យបន្តបេសកកម្មដើម្បីបុព្វហេតុជាតិមាតុភូមិតាមរយៈការងារជួយសង្គម និងការងារស្ម័គ្រចិត្តបន្តទៀត ពីព្រោះសង្គមជាតិមួយនេះត្រូវការយុវជនស្ម័គ្រចិត្ត ដែលមានបេះដូង និងឆន្ទៈចំពោះបុព្វហេតុរួម ហើយការងារស្ម័គ្រចិត្តគឺជាសាលារៀនសម្រាប់បណ្តុះស្មារតីនេះដ៏ស័ក្តិសមបំផុត។

ឯកឧត្ដម ប្រធានគណៈកម្មការរៀបចំព្រឹត្តិការណ៍អង្គរសង្ក្រាន្ដអំណរគុណដល់ថ្នាក់ដឹកនាំក្រុមការងារ និងយុវជនស្ម័គ្រចិត្ត ក្រុមការងារទាំងអស់នៅក្នុងចង្កោមទាំង៩ នៃគណៈកម្មការរៀបចំព្រឹត្តិការណ៍អង្គរសង្ក្រាន្តឆ្នាំ ២០២៥ ចំពោះការចូលរួមទាំងកម្លាំងកាយ ចិត្ត និងពេលវេលាក្នុងការរៀបចំ និងអនុវត្តតាមផែនការសកម្មភាពដែលនាំឱ្យអង្គរសង្រ្កាន្តទទួលបានលទ្ធផលជាទីមោទនៈ។

គួរជ្រាបថា ចង្កោមទី១ ដែលឯកឧត្ដម ហ៊ុន ម៉ានី អរគុណមុនគេគឺជាចម្កោមដែលដឹកនាំដោយឯកឧត្ដមផ្ទាល់ និងប្រធានក្រុមការងារ សមាជិក សមាជិកា នៃក្រុមការងាររដ្ឋបាល ក្រុមការងារហរិញ្ញវត្ថុ និងឧបត្ថមគាំទ្រ ក្រុមការងារផ្សព្វផ្សាយ និងទំនាក់ទំនងសាធារណៈ ក្រុមការងាររូបភាព និងវីដេអូឯកសារព្រឹត្តិការណ៍អង្គរសង្ក្រាន្ដ និងក្រុមការងារពិធីសាសនា។ ចង្កោមទី២ គឺជាក្រុមការងារកម្មវិធីតន្ដ្រីសួស្ដីឆ្នាំថ្មី និងផ្សាយផ្ទាល់ ក្រុមការងារសម្របសម្រួលតារា ក្រុមការងារសម្របសម្រួលសិល្បកបុរាណ ក្រុមការងារកម្មវិធីសួនមុនីហទ័យ ក្រុមការងារប្រណាំងរទេះគោ ក្របី។

ចង្កោមទី៣ គឺជាក្រុមការងារកម្មវិធីយុទ្ធគុនចម្រុះខ្មែរបុរាណ ក្រុមការងារកម្មវិធី របាំបុរាណ ប្រពៃណី និងប្រជាប្រិយ ក្រុមការងារកម្មវិធីបណ្ដែតគោមបួងសួង។ចង្កោមទី៤គឺក្រុមការងារផ្គត់ផ្គង់ទឹក អនាម័យ សាធារណៈ និងបរិសា្ថន ក្រុមការងារសម្របសម្រួលយុវជន និងផ្គត់ផ្គង់ភេសជ្ជៈ ក្រុមការងារកម្មវិធីសួនញញឹមអង្គរ ក្រុមការងារកម្មវិធីល្បែងប្រជាប្រិយ និងទាញព្រ័ត្រមិត្តភាពអង្គរសង្ក្រាន្ដ ក្រុមការងារកម្មវិធីតស់ៗ លេងទឹក ក្រុមការងារកម្មវីធីភូមិត្នោត ក្រុមការងារកម្មវិធីភូមិរចនា ក្រុមការងារកម្មវិធីសួនកុមារ ក្រុមការងារកម្មវិធីផ្សារស្ទឹងសៀមរាប ក្រុមការងារសម្របសម្រួលកម្មវិធីតាមតំបន់ផ្សេងៗ, ផ្នែកសម្របសម្រួលកម្មវិធីដងស្ទឹងសៀមរាប ផ្នែកសម្របសម្រួលកម្មវិធីនៅតំបន់ផាប់ស្ទ្រីត ផ្នែកសម្របសម្រួលកម្មវិធីនៅតំបន់អង្គរឃ្យុងយូ។

ចង្កោមទី៥ គឺក្រុមការងារកម្មវិធីក្បួនដង្ហែអង្គរសង្ក្រាន្ដ។ចង្កោមទី ៦គឺក្រុមការងារដឹកជញ្ជូន ក្រុមការងារផលិតផល ស.ស.យ.ក. ក្រុមការងារកម្មវិធីភូមិខ្ញុំ។ចង្កោមទី៧ គឺជាក្រុមការងារសន្ដិសុខ សណ្ដាប់ធ្នាប់ ចរាចរណ៍ និងបង្ការអគ្គីភ័យ ក្រុមការងារសង្គ្រោះបឋម និងបន្ទាន់ និងក្រុមការងារខ្លឹមសារ និងប្រតិកម្មរហ័ស។ចង្កោមទី៨ ក្រុមការងារពិធីការ និងពិធីបើកព្រឹត្តិការណ៍ និងក្រុមការងារប្រកួតអុកចត្រង្គ និងចង្កោមទី៩ ជាក្រុមការងារ សមាជិក សមាជិកានៃក្រុមការងារកម្មវិធីពិព័រណ៌ពាណិជ្ជកម្ម៕

The post ឯកឧត្ដម ហ៊ុន ម៉ានី៖ អង្គរសង្ក្រាន្ត បន្សល់ទុកនូវអនុស្សាវរីយ៍ចង់ចាំមិនភ្លេចសម្រាប់យុវជនស្ម័គ្រចិត្ត appeared first on Kampuchea Thmey Daily.

ចំណែក​កីឡាករ ឈាវ បូរ៉ា ដែល​ធ្លាប់​ជា​ជើង​ខ្លាំង​ប្រចាំ​ព្រឹត្តិការណ៍​អង្គរសង្ក្រាន្ត​ ទទួល​បាន​ចំណាត់​ថ្នាក់​លេខ​៣ ហើយ​កីឡាករ សុខ លីមហេង ទទួល​បាន​ចំណាត់​ថ្នាក់​លេខ​៤។

លោក​ គុជ គឹមឡុង ប្រធានសហព័ន្ធកីឡាអុកចត្រង្គកម្ពុជា បាន​ចាត់​ទុក​ការប្រកួតកីឡាអុកចត្រង្គ ​ដើម្បី​អបអរសាទរព្រឹត្តិការណ៍អង្គរសង្ក្រាន្ដឆ្នាំ​២០២៥​ ទទួល​បាន​ជោគជ័យខ្លាំង។ ក្នុង​នោះ​ចំនួន​កីឡាករ​បាន​កើន​ឡើង បច្ចេកទេស​របស់​កីឡាករ​កាន់​តែ​ល្អ​ប្រសើរ​ និងសន្ទុះការគាំទ្ររបស់មហាជន​កាន់​តែ​ច្រើន។ ការ​រីក​ចម្រើន​ទាំង​នេះ​ជា​ផ្នែក​​ដ៏សំខាន់​សម្រាប់​ត្រៀម​កីឡា​ស៊ីហ្គេម លើកទី៣៣ នៅថៃ ចុង​ឆ្នាំ​នេះ។

ការ​ប្រកួត​កីឡា​អុកចត្រង្គ​ដើម្បី​អង្គរសង្ក្រាន្ត​ ឆ្នាំ​២០២៥​ បាន​រៀបចំ​​​ច្រើន​ដំណាក់​កាល និង​សម្រិត​សម្រាំង​បំផុត។ ដំបូង​ឡើយ​ប្រកួត​ប្រកួត​ជ្រើស​រើស​ជើង​ខ្លាំង​នៅ​តំបន់​ទាំង​៨​ទូទាំង​ប្រទេស​ដើម្បី​ជ្រើស​រើស​​បាន​កីឡាករ​ល្អ​៨​រូប​ និង​កីឡាករ​ជា​និស្សិត​២​រូប​ទៀត​ដើម្បី​បាន​បេក្ខជន​១០​រូប​ចូលរួម​ប្រកួត​​ ក្នុងព្រឹត្តិការណ៍អង្គរសង្រ្កាន្តឆ្នាំ២០២៥ ក្រោមប្រធានបទ ញញឹមសាទរសង្រ្កាន្តឆ្នាំថ្មី។

ជ័យលាភី​

• ជា ស៊ីដេត ជា​ជើងឯក (ស្តេចអុកចត្រង្គ)
• ម៉េង សេរីសម្បត្តិ ជា​ជើងឯករង
• ឈាវ បូរ៉ា ទទួល​បាន​​ចំណាត់ថ្នាក់លេខ ៣
• សុខ លីមហេង ទទួល​បាន​ចំណាត់ថ្នាក់លេខ៤

អត្ថបទ៖ វីរបុត្រ

The post ជា ស៊ីដេត ជា​ស្តេច​អុក​ចត្រង្គ អង្គរសង្ក្រាន្ត​ប្រចាំ​ឆ្នាំ​២០២៥ appeared first on Kampuchea Thmey Daily.

ព្រឹត្តិការណ៍អង្គរសង្ក្រាន្ត នឹងរៀបចំឡើងរយៈពេល ៣ថ្ងៃ ចាប់ពីថ្ងៃទី ១៤-១៦ ខែមេសា នៅលើទឹកដីអង្គរ នាខេត្តសៀមរាប ដើម្បីចូលរួមអបអរសាទរពិធីបុណ្យចូលឆ្នាំប្រពៃណីជាតិខ្មែរ ដែលជាព្រឹត្តិការណ៍វប្បធម៌ប្រចាំឆ្នាំ និងទាក់ទាញទេសចរជាតិ-អន្តរជាតិច្រើនបំផុត។

អនុប្រធានក្រុមការងារទំនាក់ទំនងសាធារណៈនៃព្រឹត្តិការណ៍អង្គរសង្ក្រាន្ត លោក សុខន តារាពី បានបង្ហើបឱ្យដឹងថា ព្រឹត្តិការណ៍អង្គរសង្ក្រាន្តឆ្នាំនេះ​ នឹងផ្តល់ភាពភ្ញាក់ផ្អើល កាន់តែអស្ចារ្យ ដោយនឹងមានការសម្តែង​ទស្សនីភាពមហោស្រពបុរាណខ្នាតធំ។

លោកថា ព្រឹត្តិការណ៍នេះ នឹងមានការលេងល្បែងប្រជាប្រិយខ្មែររហូតទៅដល់ជា ២០ ប្រភេទ ហើយល្បែងប្រជាប្រិយខ្លះយើងប្រហែលមិនធ្លាប់ឃើញ ឬមិនធ្លាប់លេង ប៉ុន្តែនៅអង្គរសង្ក្រាន្តយើងនឹងយកល្បែងទាំងនោះនាំឱ្យបងប្អូងលេង ហើយត្រូវតាមក្បួនខ្នាតដូនតាយើង ។ លោកបន្តថា៖«ព្រោះល្បែងប្រជាប្រិយខ្លះ យើងយកចេញពីចម្លាក់តាមប្រាសាទ និងមានការស្រាវជ្រាវតាមតំបន់តាមមូលដ្ឋាន»៕

The post ផ្ទាំងទស្សនីយភាពជាច្រើន ត្រៀមបង្ហាញនៅអង្គរសង្ក្រាន្ត appeared first on Kampuchea Thmey Daily.

ព្រឹត្តិការណ៍អង្គរសង្ក្រាន្ត នឹងរៀបចំឡើងរយៈពេល ៣ថ្ងៃ ចាប់ពីថ្ងៃទី ១៤-១៦ ខែមេសា ខាងមុខនេះ នៅលើទឹកដីអង្គរ នាខេត្តសៀមរាប ដើម្បីចូលរួមអបអរសាទរពិធីបុណ្យចូលឆ្នាំប្រពៃណីជាតិខ្មែរ ដែលជាព្រឹត្តិការណ៍វប្បធម៌ប្រចាំឆ្នាំ និងទាក់ទាញទេសចរជាតិ-អន្តរជាតិច្រើនបំផុត។

លោក សុខន តារាពី ប្រាប់កម្ពុជាថ្មីឱ្យដឹងថា អ្វីដែលក្រុមការងារបានរៀបចំនឹងផ្តល់ភាពភ្ញាក់ផ្អើលហើយអស្ចារ្យ ។ ភាពអស្ចារ្យនោះ សំដៅទៅលើការរៀបចំផ្ទាំងទស្សនីយភាពបុរាណខ្នាតធំ និងគាស់កកាយ ល្បែងប្រជាប្រិយខ្មែរពីមុនៗយកមកលេងកម្សាន្តនាព្រឹត្តិការណ៍នេះ។ លោកថ្លែងថា៖«ជាទូទៅព្រឹត្តិ​ការណ៍អង្គរសង្ក្រាន្ត យើងតែងរៀបចំទស្សនីយភាពមហោស្រពបុរាណខ្នាតធំ ឆ្នាំនេះនឹងមានល្ខោនមហោរី ល្ខោនខោ និងរបាំបុរាណជាច្រើនប្រភេទ នឹងសម្តែងនៅលើឆាកនាព្រឹត្តិការណ៍អង្គរសង្ក្រាន្ត»។

បើតាមលោក តារាពី អ្វីដែលយើងធ្វើទាំងអស់នេះសុទ្ធតែបានសិក្សាស្រាវជ្រាវ ហើយមានការផ្តល់យោបល់ និងដឹកនាំដោយចាស់ព្រឹទ្ធាចារ្យ លោកគ្រូ អ្នកគ្រូសិល្បៈ ទាំងផ្នែកល្បែងប្រជាប្រិយ ក៏ដូចជារបាំ និងផ្ទាំងទស្សនីយភាព សុទ្ធតែយើងបានចងក្រង គាស់កកាយអ្វីដែលជាក្បួនច្បាស់បុរាណយកមកផ្សព្វផ្សាយ។

លោកថា ព្រឹត្តិការណ៍នេះ នឹងមានការលេងល្បែងប្រជាប្រិយខ្មែររហូតទៅដល់ជា ២០ ប្រភេទ ហើយល្បែងប្រជាប្រិយខ្លះយើងប្រហែលមិនធ្លាប់ឃើញ ឬមិនធ្លាប់លេង ប៉ុន្តែនៅអង្គរសង្ក្រាន្តយើងនឹងយកល្បែងទាំងនោះនាំឱ្យបងប្អូងលេង ហើយត្រូវតាមក្បួនខ្នាតដូនតាយើង ។ លោកថា៖«ព្រោះល្បែងប្រជាប្រិយខ្លះ យើងយកចេញពីចម្លាក់តាមប្រាសាទ និងមានការស្រាវជ្រាវតាមតំបន់តាមមូលដ្ឋាន ។ ចំណែកម្ហូបអាហារក៏ដូចគ្នា នឹងមានបង្ហាញម្ហូប និងបង្អែមខ្មែរនៅតាមសហគមន៍»។

សូមជម្រាបថា អង្គរសង្ក្រាន្ត គឺជាព្រឹត្តិការណ៍ប្រចាំឆ្នាំដ៏សំខាន់មួយត្រូវបានរៀបចំឡើងលើកដំបូងកាលពីឆ្នាំ ២០១៣ ដើម្បីចូលរួមអបអរសាទរពិធីបុណ្យចូលឆ្នាំប្រពៃណីខ្មែរ និងបង្ហាញវប្បធម៌ខ្មែរគ្រប់ទម្រង់ផ្សារភ្ជាប់បេតិកភណ្ឌវប្បធម៌អរូបី និងបេតិកភណ្ឌរូបី។ ព្រឹត្តិការណ៍ដ៏អស្ចារ្យនេះ មិនត្រឹមតែលើកកម្ពស់ប្រពៃណីវប្បធម៌ខ្មែរប៉ុណ្ណោះទេ ថែមទាំងជះ​ឥទ្ធិ​ពល​ជាវិជ្ជមានដល់សេដ្ឋកិច្ចផងដែរ។ ព្រឹត្តិការណ៍នេះត្រូវបានក្លាយជាព្រឹត្តិការណ៍សកលទូទាំងប្រទេស ដោយរដ្ឋបាលរាជធានី-ខេត្ត បានរៀបចំសង្ក្រាន្តនៅតាមមូលដ្ឋានរៀងៗខ្លួនដើម្បីអបអរពិធីបុណ្យចូលឆ្នាំខ្មែរ៕

The post ព្រឹត្តិការណ៍អង្គរសង្ក្រាន្ត នឹងមានការសម្តែងទស្សនីយភាពមហោស្រពបុរាណខ្នាតធំ appeared first on Kampuchea Thmey Daily.

គោលបំណងនៃការរៀបចំកិច្ចប្រជុំនាឱកាសនេះ គឺធ្វើឡើងដើម្បីបង្ហាញពីវឌ្ឍនភាពការងាររៀបចំរបស់ក្រុមការងារគ្រប់ចង្កោមនៃគណៈកម្មការរៀបចំព្រឹត្តិការណ៍អង្គរសង្រ្កាន្តឆ្នាំ២០២៥ ក៏ដូចជាពិនិត្យ ពិភាក្សា ឆ្លងយោបល់ និងបន្តរៀបចំផែនការដើម្បីអនុវត្តការងារត្រៀមឆ្ពោះទៅថ្ងៃព្រឹត្តិការណ៍ ធ្វើយ៉ាងណាឱ្យអង្គរសង្ក្រាន្តឆ្នាំ២០២៥ បានប្រព្រឹត្តទៅដោយរលូន និងជោគជ័យ។ កិច្ចប្រជុំនេះមានការចូលរួមពីសំណាក់ឯកឧត្តម លោកជំទាវ អស់លោក លោកស្រី ជាប្រធានចង្កោម ប្រធាន និងតំណាងក្រុមការងារ ព្រមទាំងសមាជិកសមាជិកាក្រុមការងាររៀបចំប្រមាណ ២០០ នាក់។

សូមជម្រាបជូនថា ការវិលត្រឡប់មកវិញនៃព្រឹត្តិការណ៍អង្គរសង្ក្រាន្តឆ្នាំ២០២៥ ក្រោមប្រធានបទ «ញញឹមសាទរសង្ក្រាន្តឆ្នាំថ្មី» គឺដើម្បីឆ្លើយតបទៅនឹងបំណងរបស់ប្រជាពលរដ្ឋជាច្រើនដែលតែងទន្ទឹងរង់ចាំវត្តមានព្រឹត្តិការណ៍នៅលើទឹកដីនៃខេត្តសៀមរាប។

ទន្ទឹមនឹងនេះ គោលបំណងចម្បងនៃការរៀបចំព្រឹត្តិការណ៍អង្គរសង្ក្រាន្ត គឺដើម្បីចូលរួមលើកស្ទួយមរតកវប្បធម៌អរូបី លើទីតាំងនៃមរតកវប្បធម៌រូបី ជាពិសេសបង្កើតនូវឱកាសជួបជុំ ផ្ដល់នូវបរិយាកាសសប្បាយរីករាយ ស្នាមញញឹម ដល់មហាគ្រួសារខ្មែរនាឱកាសបុណ្យចូលឆ្នាំថ្មីប្រពៃណីជាតិ។

នាសន្និសីទសារព័ត៌មាន ស្តីពីព្រឹត្តិការណ៍អង្គរសង្ក្រាន្ត ឯកឧត្តម ហ៊ុន ម៉ានី បានបញ្ជាក់ថាព្រឹត្តិការណ៍អង្គរសង្ក្រាន្ត ឆ្នាំ២០២៥ នៅខេត្តសៀមរាប នឹងមានភាពអស្ចារ្យ សប្បាយរីករាយលើសពីធម្មតា ដោយមានការយាងរបស់ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ដើម្បីបួងសួងចម្រើនសេចក្តីសុខដល់កម្ពុជា។

ឯកឧត្តម ហ៊ុន ម៉ានី បានបន្តថា ៖«ព្រឹត្តិការណ៍អង្គរសង្ក្រាន្ត ឆ្នាំនេះ គឺមានប្រធានបទ«ញញឹមសាទរសង្ក្រាន្តឆ្នាំថ្មី» ប្រាកដណាស់ នឹងរៀបចំពិធីនេះឱ្យកាន់តែមានភាពទាក់ទាញថែមទៀត ដោយនឹងនាំយកនូវកម្មវិធីសប្បាយៗផ្សេងៗ ទៅតាមទំនៀមទម្លាប់ប្រពៃណីរបស់ខ្មែរ យកមកបង្ហាញដល់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ បានទស្សនាដោយក្តីរីករាយ»៕

The post ស.ស.យ.ក. កំពុងរៀបចំផែនការឆ្ពោះទៅព្រឹត្តិការណ៍អង្គរសង្ក្រាន្ត appeared first on Kampuchea Thmey Daily.

បន្ទាប់ពិធីក្រុងពាលី គណៈកម្មការរៀបចំព្រឹត្តិការណ៍អង្គរសង្ក្រាន្ត នឹងរៀបចំសន្និសីទសារព័ត៌មាន ស្តីពី៖ ការរៀបចំព្រឹត្តិការណ៍អង្គរសង្ក្រាន្តឆ្នាំ២០២៥ ក្រោមប្រធានបទ « ញញឹមសាទរសង្ក្រាន្តឆ្នាំថ្មី » វេលាម៉ោង ៩ ព្រឹក នៅទីតាំងក្នុងតំបន់ភូមិខ្ញុំ មុខអង្គរប្រាសាទអង្គរវត្ត។ នេះបើយោងតាមសេចក្តីជូនដំណឹងរបស់ គណៈកម្មការរៀបចំព្រឹត្តិការណ៍អង្គរសង្ក្រាន្ត ដែលកម្ពុជាថ្មីទទួលបាននៅថ្ងៃនេះ។

សន្និសីទសារព័ត៌មាននេះ មានវាគ្មិនចូលរួមពីសំណាក់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោក សុខ សប្បាយណា ប្រធានក្រុមប្រតិបត្តិ ព្រឹត្តិការណ៍អង្គរសង្ក្រាន្ត លោក ប្រាក់ សោភ័ណ អភិបាលនៃគណៈអភិបាលខេត្តសៀមរាប និងជាប្រធានសហភាពសហព័ន្ធយុវជនកម្ពុជាខេត្តសៀមរាប និងលោក ហង់ ពៅ អគ្គនាយកអាជ្ញាធរជាតិអប្សរា។

គួរជម្រាបថា ព្រឹត្តិការណ៍អង្គរសង្រ្កាន្ត ត្រូវបានផ្ដួចផ្ដើមរៀបចំឡើងជាផ្ទាំងទស្សនីយភាពវប្បធម៌ចាប់តាំងពីឆ្នាំ ២០១៣ លើទឹកដីអង្គរនៃខេត្តសៀមរាប ដោយសហភាពសហព័ន្ធយុវជនកម្ពុជា (ស.ស.យ.ក.) ។ ព្រឹត្តិការណ៍នេះ រៀបចំឡើងក្នុងគោលបំណងដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ជាមហាគ្រួសារខ្មែរតែមួយ និងដើម្បីលើកស្ទួយវប្បធម៌ខ្មែរដ៏ផូផង។ តាមរយៈព្រឹត្តិការណ៍ជាតិដ៏ធំនេះ កម្ពុជាបានបំបែកកំណត់ត្រាពិភពជាច្រើនរួមមានឯតទគ្គ​កម្ម រាំម៉ាឌីហ្សុនច្រើនជាងគេ , បេះដូងក្រដាសច្រើនជាងគេលើពិភពលោក, និង អន្សម​យក្សមាន​ទម្ងន់​ ៤ ០៤០ គីឡូ​ក្រាម។

ព្រឹត្តិការណ៍អង្គរសង្ក្រាន្ត ត្រូវបានរៀបចំគំរប់ខួប ១០ឆ្នាំ យ៉ាងអធិកអធម កាលពីឆ្នាំ ២០២៣។ យ៉ាងណាមិញឆ្នាំ ២០២៤ ព្រឹត្តិការណ៍នេះ ពុំបានរៀបចំដូចសព្វដង ប៉ុន្តែអនុញ្ញាតឱ្យនៅតាមបណ្តារាជធានី ខេត្ត រៀបចំសង្ក្រាន្តចូលឆ្នាំថ្មី នៅតាមទីតាំងរៀងៗខ្លួន។ ដើម្បីអបអរសាទរ និងរំឭកព្រឹត្តិការណ៍ជាតិ ក៏ដូចជាលើកស្ទួយវប្បធម៌ជាតិ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានប្រកាសជាសាធារណៈឱ្យរៀបចំព្រឹត្តិការណ៍នេះឡើងវិញ៕

The post ពិធីក្រុងពាលីបើកការដ្ឋានព្រឹត្តិការណ៍ អង្គរសង្ក្រាន្ត នឹងរៀបចំថ្ងៃទី ៩ ខែមីនា appeared first on Kampuchea Thmey Daily.

នាពិធីខាងលើ សម្តេចធិបតី ហ៊ុន ម៉ាណែត ថ្លែងកោតសរសើរក្រសួងវប្បធម៌ និងចំពោះក្រុមការងារទាំងអស់ ដែលបានរៀបចំចុះបញ្ជីបេតិកភណ្ឌររបស់ខ្មែរជាបន្តបន្ទាប់ទៅក្នុងអង្គការយូណេស្កូ។ សម្តេចមានប្រសាសន៍ថា៖« ក្នុងមួយឆ្នាំជាងនេះតាំងពីចាប់កំណើតរាជរដ្ឋាភិបាលថ្មី យើងបានដាក់ប្រាសាទកោះកេរ ចុះបញ្ជីក្រមា ហើយយើងកំពុងរៀបចំបញ្ជីសង្ក្រាន្តកម្ពុជាយើងទៅក្នុង(អង្គការយូណេស្កូ) សូមបន្តកិច្ចការងារនេះ ដើម្បីឱ្យពិភពលោកបានឃើញនូវអ្វីដែលបុព្វបុរស​យើងបានខិតខំដើម្បីជាបេតិកភណ្ឌពិភពលោក និងមនុស្សជាតិ។

សម្តេចបន្តថា ស្នាដៃដ៏មហិមានេះ ត្រូវចែករំលែកឱ្យអន្តរជាតិបានទទួលស្គាល់ ពិតណាស់គេមិនយករបស់យើងទេ ប៉ុន្តែអ្វីដែលសំខាន់គឺជាសម្បតិ្តវប្បធម៌មនុស្សជាតិដែលបុព្វបុរសយើងកសាង ចែករំលែកដើម្បីជាផលប្រយោជន៍រួមនៃមនុស្សជាតិ ជាកម្មសិទ្ធិ និងជាអត្តសញ្ញាញរបស់ខ្មែរ។ សម្តេចបញ្ជាក់ថា៖«ប៉ុន្តែក្នុងដំណាក់ការនេះខិតខំធ្វើយ៉ាងណាផ្សាយបន្ថែមនូវអ្វីដែលជារបស់ខ្មែរទៅកាន់ពិភពលោក ដែលមូលដ្ឋានមួយនោះតាមរយៈចុះបញ្ជីបេតិកភណ្ឌ»។

សម្តេចធិបតី ហ៊ុន ម៉ាណែត ក៏​បានជំរុញលើកទឹកចិត្តដល់ក្រសួងវប្បធម៌ និងចិត្រសិល្បៈ បន្តការងារដ៏មានតម្លៃ នៃការចុះបញ្ជីទាំងបេតិកភណ្ឌរូបិយ និងអរូបិយ ដែលជាមោទនភាព និងបន្តពង្រឹងរូបភាពកម្ពុជាលើឆាកអន្តរជាតិតាមរយៈវិស័យសិល្បៈ វប្បធម៌។ សម្តេចធិបតី ក៏ស្នើឱ្យក្រសួងស្ថាប័នពាក់ព័ន្ធ ជាពិសេសក្រសួងបរិស្ថានបន្តពង្រឹងកិច្ចការសហការ និងដាក់ចេញនូវគោលការណ៍គ្រប់គ្រង បន្តចុះបញ្ជីនៅលើតំបន់ធម្មជាតិនានាទាំងក្នុងបញ្ជីបេតិកភណ្ឌជាតិ របស់អង្គការយូណេស្កូ ក៏ដូចជាក្នុងបញ្ជីយន្តការតំបន់អាស៊ានជាដើម៕

The post សម្តេចធិបតី ស្នើឱ្យបន្តកិច្ចការរៀបចំចុះបញ្ជីសង្ក្រាន្តខ្មែរចូលក្នុង អង្គការយូណេស្កូ appeared first on Kampuchea Thmey Daily.

លោក ហួត ហាក់ រដ្ឋ​មន្រ្តីក្រសួងទេចរណ៍ថ្លែងក្នុងកម្មវិធីបិតអង្គសន្និបាតប្រចាំឆ្នាំ២០២៤ និងទិសដៅឆ្នាំ២០២៥កាលពីថ្ងៃទី២៧ ខែកុម្ភៈថា វិស័យទេចរណ៍បានទទួលរងនូវ​ផលប៉ះពាល់យ៉ាងដំណំអស់រយៈពេលជាច្រើនឆ្នាំចាប់តាំងពីការផ្ទុះការរីករាលដាលនៃជំងឺកូវីដ១៩ និងការបន្តអូសបន្លាយពេលនៃសង្គ្រាមរុស្ស៊ី និងអ៊ុយក្រែន ប៉ុន្តែវិស័យនេះបានត្រឡប់ មកភាពល្អប្រសើរក្នុងរយៈពេលពីរ​ឆ្នាំចុងក្រោយនេះទោះបីជាជម្លោះភូមិសាស្រ្ត នយោបាយនៅបន្ត។

លោកថា កាលពី២០២៤ កម្ពុជាទទួលបានភ្ញៀវទេសចរអន្តរ ៦,៧ លាននាក់ កើនឡើងប្រមាណ ២៣% ធៀបនឹងឆ្នាំ២០២៣ ជាមួយទេសចរជាតិ ប្រមាណ ២២,៥២ លាននាក់ កើនឡើង ២០,១% ធៀបនឹងឆ្នាំ២០២៣។  

ជាមួយគ្នានេះដែរ ក្នុងឆ្នាំ២០២៣, ចំណូលទេសចរណ៍អន្តរជាតិមានចំនួន ៣,០៨៣លានដុល្លារ អាមេរិក ខណៈដែលក្នុងឆ្នាំ២០២៤ ចំណូលទេសចរណ៍អន្តរជាតិមានចំនួន ៣,៦៣៧លានដុល្លារ អាមេរិក ដោយរួមចំណែកប្រមាណ៩,៤% នៃផលិតផលក្នុងស្រុកសរុប

លោកថា ៖«តាមការព្យាករណ៍ ក្នុងឆ្នាំ២០២៥, ចំណូលទេសចរណ៍អន្តរជាតិមានចំនួន ៥,១០០លានដុល្លារអាមេរិក ដោយរួមចំណែកប្រមាណ១០,៥% នៃ ផលិតផលក្នុងស្រុកសរុប»។

លោកបណ្ឌិត ធួន ស៊ីណាន ​ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា (PATACC) បានថ្លែងប្រាប់កម្ពុជាថ្មី​ថាចំនួនភ្ញៀវទេចរអន្តរជាតិមកទស្សនាកម្ពុជាបានបន្តកើនឡើងចាប់តាំងពីចុងឆ្នាំមុនរហូតមកដល់បច្ចុប្បន្ន ជាពិសេសកំណើនភ្ញៀវមកពីប៉ែកអឺរ៉ុប។ ប៉ុន្តែលោកថា ស្របពេលដែលវិស័យទេសចរណ៍ទាំងមូលកំពុងមានកំណើន កម្ពុជាគួររៀបចំនូវព្រឹត្តិការណ៍ទេចរណ៍នានាដើម្បីបន្តទាក់ទាញភ្ញៀវឱ្យមកកាន់តែច្រើន។

លោកបានថ្លែងថា៖«វាជាសញ្ញាល្អនៃការវិវត្តន៍វិស័យទេចរណ៍  សម្រាប់កំណើនតាមផ្លូវអាកាសនាដើមឆ្នាំនេះឆ្លុះបញ្ចាំងពីភាពប្រសើរឡើងនៃវិស័យនេះ ដូច្នេះនៅពេលរដូវក្សត់ភ្ញៀវនាពេលខាងមុខ ទាំងវិស័យឯកជន និងរដ្ឋត្រូវសហការគ្នារៀបចំនូវយន្តការ ឬព្រឹត្តិការណ៍នានាដើម្បីរក្សានូវកំណើននេះ»។​

ខណៈស្ថានភាពរដូវធ្លាក់ចុះនៃភ្ញៀវទេចរនឹងមកដល់ក្នុងរយៈពេលដ៏ខ្លីខាងមុខនេះ លោក​ ហួត​ ហាក់បានលើកឡើងអំពីយុទ្ធសាស្រ្ត​របស់ក្រសួងក្នុងការ​​ស្នើសុំរាជរដ្ឋាភិបាលដាក់ ចេញនូវយុទ្ធនាការសម្រាប់ពង្រឹងស្ថានភាពទេសចរណ៍ក្នុងរដូវកាលបៃតង (Green Season) ខាងមុខ ដោយ​ស្នើសុំរៀបចំកម្មវិធីលើកទឹកចិត្តសម្រាប់ជំរុញកញ្ចប់ទស្សនកិច្ចទេសចរណ៍ ក្នុងស្រុក កញ្ចប់ទស្សនកិច្ចសម្រាប់សិស្ស-និស្សិត, កម្មករ-កម្មការិនី, បុគ្គលិកសេដ្ឋកិច្ចក្រៅប្រព័ន្ធ និងយុទ្ធនាការបញ្ចុះថ្លៃសេវាកម្មទេសចរណ៍។

ជាមួយគ្នានេះដែរ លោកថា តាមរយៈការជំរុញការអនុវត្ត​ផែនការមេអភិវឌ្ឍន៍ទេចរណ៍​ខេត្តសៀមរាប ខេត្ត​មណ្ឌលគិរី, ខេត្តកែប, ផែនការអភិវឌ្ឍទេសចរណ៍នៅថ្នាក់ក្រោមជាតិ និងផែនការអភិវឌ្ឍន៍ ទេសចរណ៍មូស្លីម, ក្រសួងទេសចរណ៍ ក៏បាននឹងកំពុងរៀបចំកសាងផែនការយុទ្ធសាស្ត្រជាតិ អភិវឌ្ឍន៍ទេសចរណ៍, សេចក្តីព្រាងគោលនយោបាយទេសចរណ៍ពិសិដ្ឋ ដែលមានគោលដៅ លើកកម្ពស់ភាពប្រកួតប្រជែង ភាពធន់ និរន្តភាព និងបរិយាបន្ន។

លោកថា ៖«ដោយឈរលើគោលការណ៍គ្រឹះ «ទេសចរណ៍ផ្សារភ្ជាប់នឹងទឹកដី», និងដើម្បីរក្សាឧត្តមភាពប្រកួតប្រជែង និងរក្សាកេរ្តិ៍ឈ្មោះកម្ពុជា ជាគោលដៅទេសចរណ៍សុវត្ថិភាព, ផ្តល់ភាពកក់ក្តៅ, ស្អាត, វៃឆ្លាត និងបៃតង ដោយរក្សាភាពជា ខ្មែរដោយ ការងារអាទិភាពមួយចំនួនដែលក្រសួងដាក់ចេញនាពេលខាងមុខ រួមមាន​ ការទាញប្រយោជន៍ឱ្យអស់សក្តានុពលពីគោលដៅទេសចរណ៍ដែលមានស្រាប់ដោយ ឈរលើគោលការណ៍អភិរក្ស, អភិវឌ្ឍ និងរក្សាចីរភាព»៕

The post កម្ពុជា៖ វិស័យទេចរណ៍​នឹងបង្កើតចំណូលជាង​៥​ពាន់លានដុល្លារចូលចរន្តសេដ្ឋកិច្ចសម្រាប់ឆ្នាំ២០២៥ appeared first on Kampuchea Thmey Daily.