លោកអភិបាលខណ្ឌបានមានប្រសាសន៍ថា អត្តសញ្ញាណប័ណ្ណសញ្ជាតិខ្មែរ គឺជាឯកសារផ្លូវច្បាប់ដ៏សំខាន់សម្រាប់ប្រជាពលរដ្ឋគ្រប់រូប ដែលបញ្ជាក់ពីអត្តសញ្ញាណ និងសញ្ជាតិរបស់ខ្លួន។ ការមានអត្តសញ្ញាណប័ណ្ណត្រឹមត្រូវ និងមានសុពលភាព អាចជួយសម្រួលដល់ការទទួលបានសេវាសាធារណៈនានារបស់រដ្ឋ ការចុះឈ្មោះបោះឆ្នោត ការសិក្សា ការងារ ការធ្វើលិខិតស្នាមផ្សេងៗ ព្រមទាំងការប្រើប្រាស់សេវាហិរញ្ញវត្ថុ និងសេវាសង្គមផ្សេងៗទៀត។

លោកអភិបាលខណ្ឌក៏បាន អំពាវនាវដល់យុវជនដែលទើបគ្រប់អាយុ និងប្រជាពលរដ្ឋដែលអត្តសញ្ញាណប័ណ្ណផុតសុពលភាព សូមអញ្ជើញមកធ្វើ និងប្តូរអត្តសញ្ញាណប័ណ្ណឱ្យបានទាន់ពេលវេលា ដើម្បីធានាថាមានឯកសារផ្លូវច្បាប់ត្រឹមត្រូវសម្រាប់ប្រើប្រាស់ក្នុងជីវភាពប្រចាំថ្ងៃ។

លោកអធិការនគរបាលខណ្ឌ ក៏បានណែនាំដល់ប្រជាពលរដ្ឋឱ្យយកចិត្តទុកដាក់ថែរក្សាអត្តសញ្ញាណប័ណ្ណរបស់ខ្លួន និងរួសរាន់មកបំពេញបែបបទធ្វើថ្មី ឬប្តូរថ្មី នៅពេលអត្តសញ្ញាណប័ណ្ណផុតសុពលភាព ដើម្បីជៀសវាងការលំបាកក្នុងការប្រើប្រាស់សេវាផ្សេងៗ និងធានាបាននូវផលប្រយោជន៍ស្របច្បាប់របស់ខ្លួន។

សូមជម្រាបជូនថា សម្រាប់ប្រជាពលរដ្ឋនៅក្នុងមូលដ្ឋានខណ្ឌឫស្សីកែវ ដែលអញ្ជើញមកទទួលសេវារួមមាន៖ ផ្ដល់អត្តសញ្ញាណប័ណ្ណថ្មី សម្រាប់អ្នកទើបគ្រប់អាយុក្នុងឆ្នាំ២០២៦ មានចំនួន ២១៧៨នាក់ ប្រុស១០៦២នាក់​ ផ្ដល់ជូនបានចំនួន៩២៨នាក់ ប្រុស៤៤៨នាក់​ និងកំពុងបន្តផ្សព្វផ្សាយដល់អាណាព្យាបាល​ និងសាម៊ីខ្លួនដែលទើបគ្រប់អាយុមកធ្វើអត្តសញ្ញាណប័ណ្ណ។  ប្រជាជនមានអ្តសញ្ញាណប័ណ្ណផុតសុពលភាពត្រឹមឆ្នាំ២០២៦ នេះ​ មានចំនួន២២៧៨៧នាក់ ប្រុស១១១១៨នាក់​ បានមកប្តូយកអត្តសញ្ញាណប័ណ្ណថ្មីមានចំនួន១០៤៣៥នាក់ ប្រុស៤៧៥៩នាក់ ។ តួរលេខខាងលើគិតពីថ្ងៃ១ ខែមករា ឆ្នាំ២០២៦ ដល់ថ្ងៃទី៣១ ខែឧសភា ឆ្នាំ២០២៦៕ អត្ថបទ ៖ សំណាង

The post អាជ្ញាធរខណ្ឌឫស្សីកែវ លើកទឹកចិត្តពលរដ្ឋមកធ្វើអត្តសញ្ញាណប័ណ្ណសញ្ជាតិខ្មែរ ឬ ប្តូរប័ណ្ណថ្មី ឱ្យទាន់ពេលវេលា appeared first on Kampuchea Thmey Daily.

លោកវីរៈសេនីយ៍ទោ សាន សីហ៊ាន នាយការិយាល័យអត្តសញ្ញាណកម្ម នៃស្នងការដ្ឋាននគរបាលខេត្តបាត់ដំបង បានដឹកនាំកម្លាំងចុះទៅបំពេញបែបបទនឹងធ្វើអត្តសញ្ញាណប័ណ្ណជូនប្រជាពលរដ្ឋដល់មូលដ្ឋានតែម្ដង។

លោកនាយការិយាល័យបានបញ្ជាក់ថា មន្ត្រីជំនាញនឹងចុះធ្វើអត្តសញ្ញាណប័ណ្ណជូនប្រជាពលរដ្ឋតាមមូលដ្ឋានដោយចល័តគោលដៅ គ្រប់ស្រុកនៅក្នុងខេត្តបាត់ដំបង បើទោះបីជានៅតាមបណ្ដាប៉ុស្តិ៍ ហ្នឹងនៅតាមអធិការដ្ឋាន មានម៉ាស៊ីនថតនិងមានមន្ត្រីជំនាញចាំធ្វើអត្តសញ្ញាណប័ណ្ណជូនប្រជាពលរដ្ឋក៏ដោយ ប្រជាពលរដ្ឋខ្លះនៅតែមិនទាន់បានទៅធ្វើ ទាំងយុវវ័យដែលគ្រប់អាយុ ក៏ដូចជាអ្នកដែលកាន់អត្តសញ្ញាណប័ណ្ណហួសសុពលភាព។

ដូច្នេះការិយាល័យជំនាញ នៅតែបន្តចុះតាមមូលដ្ឋានគ្រប់ច្រកល្ហក ដើម្បីឲ្យពួកគាត់បានមកធ្វើគ្រប់ៗគ្នា ដោយពឹងផ្អែកទៅលើអាជ្ញាធរមូលដ្ឋាននិងលោកមេភូមិ ដើម្បីឲ្យពួកគាត់ធ្វើការផ្សព្វផ្សាយឲ្យ ប្រជាពលរដ្ឋបានដឹងអំពីការចុះធ្វើអត្តសញ្ញាណប័ណ្ណរបស់ការិយាល័យជំនាញនៅពេលដែលត្រៀមចុះទៅកាន់មូលដ្ឋានណាមួយ។

លោកបានបន្ថែមថា ជាក់ស្ដែងនៅរសៀលថ្ងៃទី៦ ខែឧសភា ឆ្នាំ២០២៦ នេះ គឺកម្លាំងរបស់លោកបានចុះទៅកាន់ទីតាំងបរិវេណវត្តសូភី ស្ថិតក្នុងសង្កាត់រតនៈ ក្រុងបាត់ដំបង  គឺមានប្រជាពលរដ្ឋមកធ្វើអត្តសញ្ញាណប័ណ្ណថ្មី ក៏ដូចជាអត្តសញ្ញាណប័ណ្ណហួសសុពលភាព យ៉ាងច្រើនកុះករ ដែលក្នុងនោះមានទាំងពលរដ្ឋខ្មែរ ហើយក៏មានជនជាតិខ្មែរអ៊ីស្លាមជាច្រើននាក់ផងដែរ ដើម្បីឲ្យពួកគាត់មានអត្តសញ្ញាណប័ណ្ណខ្មែរកាន់គ្រប់ៗគ្នា៕ អត្ថបទ៖ សោ និយមរ័ត្ន

The post សមត្ថកិច្ចក្រុងបាត់ដំបង បន្តចុះធ្វើអត្តសញ្ញាណប័ណ្ណថ្មី ជូនប្រជាពលរដ្ឋដល់មូលដ្ឋាន appeared first on Kampuchea Thmey Daily.

អគ្គនាយកដ្ឋានអត្តសញ្ញាណកម្ម ចាត់ទុកដូច្នេះ បន្ទាប់កាលពីពេលថ្មីៗនេះ មានករណីផ្សព្វផ្សាយវីដេអូពីពលរដ្ឋម្នាក់ដែលបានយកសន្លឹក អត្តសញ្ញាណប័ណ្ណសញ្ជាតិខ្មែរ ទៅប្រើប្រាស់ជាឧបករណ៍ដេញហ្គីតាលេងកម្សាន្ត បណ្តាលឱ្យបាក់ របក ខូចខាត ខុសពីទម្រង់ដើមនៃអត្តសញ្ញាណប័ណ្ណ។

នៅក្នុងសេចក្ដីជូនព័ត៌មាន ចេញថ្ងៃទី២៤ ខែតុលា អគ្គនាយកដ្ឋានអត្តសញ្ញាណកម្ម សរសេរដូច្នេះ៖«អគ្គនាយកដ្ឋានអត្តសញ្ញាណកម្ម សូមជម្រាបជូនថា ការប្រើប្រាស់អត្តសញ្ញាណប័ណ្ណសញ្ជាតិខ្មែរ ក្នុងគោលបំណងមិនត្រឹមត្រូវ បានធ្វើឱ្យខូចខាតអសារបង់ដែលជាការខ្ជះខ្ជាយការចំណាយថវិការដ្ឋ។»។

មិនត្រឹមតែករណីបុរសម្នាក់យកអត្តសញ្ញាណប័ណ្ណទៅដេញហ្គីតាកម្សាន្ត ដែលទើបនឹងកើតឡើងថ្មីៗនេះទេ អគ្គនាយកដ្ឋានអត្តសញ្ញាណកម្ម អះអាងថា តាមការកត់សម្គាល់របស់ខ្លួន គឺឃើញថា កាលពីពេលកន្លងទៅ មានប្រជាពលរដ្ឋមួយចំនួនតូចមិនបានយល់ពីសារសំខាន់ នៃអត្តសញ្ញាណប័ណ្ណសញ្ជាតិខ្មែរនោះទេ និងបានប្រើប្រាស់ខុសពីគោលបំណងនៃការផ្តល់ជូន ដោយមិនបានប្រុងប្រយ័ត្ន និងមិនបានថែរក្សាឱ្យបាន ត្រឹមត្រូវគត់មត់ដូចគ្នា។

ជុំវិញករណីនេះ អគ្គនាយកដ្ឋានអត្តសញ្ញាណកម្ម អំពាវនាវដល់ប្រជាពលរដ្ឋគ្រប់រូប ដែលកំពុងប្រើប្រាស់អត្តសញ្ញាណប័ណ្ណសញ្ជាតិខ្មែរ មេត្តាយកចិត្តទុកដាក់ថែរក្សាឱ្យបានគត់មត់ ដើម្បីជួយសន្សំ សំចៃថវិការដ្ឋ និងលើកតម្លៃអត្តសញ្ញាណរបស់ជាតិ​ ពីព្រោះថា រាជរដ្ឋាភិបាលបានទទួលបន្ទុកចំណាយទាំងស្រុងទៅលើ ការផលិត និងផ្តល់អត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋគ្រប់រូបដោយឥតគិតថ្លៃ ក្នុងគោលបំណងគាំពារប្រជាពលរដ្ឋ។

តាមអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ  អត្តសញ្ញាណប័ណ្ណសញ្ជាតិខ្មែរ គឺជាឯកសារផ្លូវការដ៏មានសារសំខាន់ សម្រាប់បញ្ជាក់អត្តសញ្ញាណ ជាពលរដ្ឋខ្មែរ និងត្រូវផ្តល់ជូនប្រជាពលរដ្ឋខ្មែរគ្រប់រូប សម្រាប់ប្រើប្រាស់ក្នុងជីវភាពប្រចាំថ្ងៃ ដើម្បីទទួលបាននូវសិទ្ធិ និងផលប្រយោជន៍ស្របច្បាប់ជាមូលដ្ឋានរបស់បុគ្គល។

យោងតាមប្រកាសលេខ៦៣៧៥ ប្រ.ក របស់ក្រសួងមហាផ្ទៃស្តីពីនីតិវិធី លក្ខខណ្ឌ នៃការសុំផ្តល់ និងប្រើប្រាស់អត្តសញ្ញាណប័ណ្ណសញ្ជាតិខ្មែរ ត្រង់ប្រការ៧ បានកំណត់ថា “ប្រជាពលរដ្ឋដែលទទួលបាន អត្តសញ្ញាណប័ណ្ណសញ្ជាតិខ្មែររួចហើយ ត្រូវថែរក្សាឱ្យបានល្អ បង្ការការបាត់ ឬខូច ដើម្បីទុកប្រើប្រាស់ជា ប្រយោជន៍ផ្សេងៗតាមការកំណត់នៃច្បាប់”៕

The post អគ្គនាយកដ្ឋានអត្តសញ្ញាណកម្ម៖ ការយកអត្តសញ្ញាណប័ណ្ណ ទៅដេញហ្គីតា ជាទង្វើមិនគប្បី បង្ហិនថវិការដ្ឋ appeared first on Kampuchea Thmey Daily.

អ្នកនាំពាក្យ​រង​ក្រសួងមហាផ្ទៃ បណ្ឌិត ទូច សុ​ឃៈ (​សុ​ខៈ​) បាន​ឱ្យ​ដឹង​ថា ការផ្តល់​អត្តសញ្ញាណ​ប័ណ្ណ​សញ្ជាតិ​ខ្មែរ​នេះ​ ត្រូវ​បាន​ធ្វើឡើង​យ៉ាងសកម្ម​ជាប្រចាំ​ថ្ងៃ បន្ទាប់ពី​ប្រជាពលរដ្ឋ​ខ្មែរ​បាន​ដាក់​ពាក្យ​បំពេញបែបបទ និង​ឯកសារ​ត្រឹមត្រូវ​គ្រប់គ្រាន់​មកកាន់​មន្ត្រី​អត្តសញ្ញាណ​កម្ម​ទូទាំងប្រទេស។

ជាក់ស្តែង រយៈពេល​៧​ថ្ងៃ​កន្លងទៅ មន្ត្រី​អត្តសញ្ញាណ​កម្ម​ទូទាំង​ប្រទេស​បាន​ប្រើប្រាស់​វិធីសាស្ត្រ​អចល័ត និង​តាម​រថយន្ត​ចល័ត​សម្រាប់​ការ​ផ្តល់សេវា​អត្តសញ្ញាណ​ប័ណ្ណ​ជូន​ប្រជាពលរដ្ឋ​ចំនួន​ជាង​៩​ពាន់​ស្លឹក​ដែល​បង្ក​លក្ខណៈ​ងាយស្រួល និង​ឆាប់រហ័ស ដើម្បី​ប្រជាពលរដ្ឋ​យក​ទៅ​ប្រើប្រាស់​បំពេញ​សំណុំ​ឯកសារ​ផ្សេងៗ តាមផ្លូវ​ច្បាប់​។

ក្រៅពី​ការងារ​ផ្តល់​អត្តសញ្ញាណ​ប័ណ្ណ អ្នកនាំពាក្យ​រង​ក្រសួងមហាផ្ទៃ​បានឱ្យដឹង​បន្ថែម​ថា មួយ​សប្តាហ៍​មកនេះ អាជ្ញា​ធរមាន​សមត្ថកិច្ច​ក្របខណ្ឌ​ក្រសួងមហាផ្ទៃ​ទូទាំង​ប្រទេស​ចាប់​កម្រិត​ក្រសួងមហាផ្ទៃ​រហូតដល់​ប៉ុស្តិ៍​នគរបាល​រដ្ឋបាល​តា​ម​មូលដ្ឋាន​បាន​ផ្តល់​សេវា​អត្តសញ្ញាណ​កម្ម​ជាង​២​ម៉ឺន​ទៀត​ជូន​ប្រជាពលរដ្ឋ​ជាប្រចាំ​ប្រកបដោយ​ភាពកក់ក្តៅ ក្នុងនោះ រួមមាន សេវា​លិខិតឆ្លងដែន​បាន​ចំនួន​សរុប ៥.៧៨៦​លិខិត សៀវភៅ​ស្នាក់នៅ​ចំនួន​សរុប ២.៣២៦ ក្បាល​សៀវភៅ​គ្រួសារ​ចំនួន​សរុប ១.៨៥៧ ក្បាល និង​លិខិត​ធ្វើដំណើរ​មាន​ចំនួន​សរុប ១.៤១១​លិខិត​។

ចំពោះ​ការងារ​ផ្តល់​អត្តសញ្ញាណ​ប័ណ្ណ​សញ្ជាតិ​ខ្មែរ​នេះ លោក​អភិ​សន្តិ​បណ្ឌិត ស សុខា ឧបនាយករដ្ឋមន្ត្រីរ​ដ្ឋ​មន្ត្រី​ក្រសួងមហាផ្ទៃ ធ្លាប់​បានដាក់​គោលការណ៍​ណែនាំ​ឱ្យ​អគ្គនាយកដ្ឋាន​អត្តសញ្ញាណ​កម្ម សិក្សា​តាម​បណ្តា​ច្រកចេញចូល​តែមួយ សំដៅ​ជំរុញ​ការ​ផ្តល់​សេវា​ធ្វើ​អត្តសញ្ញាណ​ប័ណ្ណ ជូន​ប្រជាពលរដ្ឋ​ឱ្យបាន​ឆាប់រហ័ស ជាពិសេស ពិនិត្យ​លទ្ធភាព​ធ្វើ​អ្វី​បន្ថែម​ទៀត​លើស​ពី​អ្វីដែល​កំពុង​ធ្វើ ដើម្បី​ពង្រឹងគុណភាព​ផ្តល់​សេវា​ជូន​ប្រជាពលរដ្ឋ​។ កាលពី​ខែកញ្ញា ឆ្នាំ​២០២៣ កន្លងទៅ លោក​អភិ​សន្តិ​បណ្ឌិត ស សុខា បាន​មានប្រសាសន៍ថា «​តើ​យើង​អាច​ធ្វើ​អី​លើស​ពី​ហ្នឹង​បន្ថែម ដើម្បី​ពង្រឹង​គុណភាព​ផ្តល់​សេវាកម្ម ១ ដែល​មាន​ទំនុក​ចិត្ត​ពី​ប្រជាពលរដ្ឋ​? ក្នុង​នីតិកាល​ទី​៧ នេះ ខ្ញុំ​ចង់​ដាក់​គោលការណ៍ ១ គឺ​ផ្តល់​ភាព​កក់ក្តៅ​ដល់​ប្រជាពលរដ្ឋ​ ពាក្យ​នេះ​អាច​ពិបាក​នឹងធ្វើ តែបើ​យើង​មាន​ឆន្ទៈ​ដូចគ្នា យើង​អាច​នឹង​ធ្វើបាន​»៕

The post រយៈពេល​១​សប្តាហ៍ មន្ត្រី​បាន​ផ្តល់​អត្តសញ្ញាណ​ប័ណ្ណ​សញ្ជាតិ​ខ្មែរ​ជាង​៩​ពាន់​សន្លឹក​ជូន​ប្រជាពលរដ្ឋ​ដោយ​ឥតគិតថ្លៃ នៅ​ទូទាំងប្រទេស appeared first on Kampuchea Thmey Daily.

លោក ទូច សុឃៈ (សុខៈ) បានឱ្យដឹងថា នៅថ្ងៃទី២២ ខែមេសា មន្ត្រីទទួលបន្ទុកសេវាអត្តសញ្ញាណកម្មទូទាំងប្រទេស បានផ្តល់អត្តសញ្ញាណប័ណ្ណសញ្ជាតិខ្មែរចំនួន ៦៩៤សន្លឹក។ នៅថ្ងៃទី២៣ ខែមេសា បានផ្តល់ចំនួន ១៩៤៣សន្លឹក។ នៅថ្ងៃទី២៤ បានផ្តល់ចំនួន ២០៨០សន្លឹក។ នៅថ្ងៃទី២៥ បានផ្តល់ចំនួន ២០៦៣សន្លឹក។ នៅថ្ងៃទី២៦ បានផ្តល់ចំនួន ១៧៣៨សន្លឹក។ នៅថ្ងៃទី២៧ បានផ្តល់ចំនួន ១៧៨៧សន្លឹក និងថ្ងៃទី២៨ ខែមេសា បានផ្តល់ចំនួន ៧៦២សន្លឹក។

សូមបញ្ជាក់ថា រយៈពេល៥ថ្ងៃកាលពីថ្ងៃទី១៧ រហូតដល់ថ្ងៃទី២១ ខែមេសា ឆ្នាំ២០២៤ បន្ទាប់ពីបញ្ចប់ការឈប់សម្រាកអបអរសាទរឆ្នាំថ្មីប្រពៃណីជាតិ កន្លងមក មន្ត្រីទទួលបន្ទុកសេវាអត្តសញ្ញាណកម្មទូទាំងប្រទេស បានបន្តបំពេញតួនាទី និងភារកិច្ច ផ្លល់សេវាជូនប្រជាពលរដ្ឋយ៉ាងសកម្មជាប្រក្រតី ក្នុងនោះ មានអត្តសញ្ញាណប័ណ្ណសញ្ជាតិខ្មែរចំនួន ៨ ៨៧២សន្លឹក បានបន្តផ្ដល់ជូនប្រជាពលរដ្ឋ ដោយឥតគិតថ្លៃផងដែរ។

អត្តសញ្ញាណប័ណ្ណសញ្ជាតិខ្មែរ ជាបណ្ណសម្រាប់សម្គាល់អត្តសញ្ញាណសញ្ជាតិខ្មែរលើបុគ្គលម្នាក់ៗមានសញ្ជាតិជាខ្មែរ។ អត្តសញ្ញាណប័ណ្ណសញ្ជាតិខ្មែរមានសារៈសំខាន់ ឬសារៈប្រយោជន៍ ដើម្បីប្រជាជនយកទៅប្រើប្រាស់បំពេញសំណុំឯកសារផ្សេងៗ តាមផ្លូវច្បាប់។ ជាមួយគ្នានេះ ប្រជាពលរដ្ឋខ្មែរទាំងពីភេទមានអាយុពី១៥ឆ្នាំឡើង អាចស្នើសុំធ្វើអត្តសញ្ញាណបណ្ណសញ្ជាតិខ្មែរ នៅអធិការដ្ឋាននគរបាលក្រុង ស្រុក  ខណ្ឌ ឬនៅស្ថានីយ៍ចល័ត នៃឃុំ សង្កាត់ របស់ខ្លួន តាមការជូនដំណឹងរបស់អាជ្ញាធរ។

កន្លងមក លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញឱ្យអគ្គនាយកដ្ឋានអត្តសញ្ញាណកម្ម សិក្សាតាមបណ្តាច្រកចេញចូលតែមួយ ដើម្បីជំរុញការផ្តល់សេវាធ្វើអត្តសញ្ញាណប័ណ្ណ ជូនប្រជាពលរដ្ឋឱ្យបានឆាប់រហ័ស ជាពិសេសពិនិត្យលទ្ធភាពបន្ថែមទៀត ដើម្បីឈានទៅពង្រឹងគុណភាពនៃផ្តល់សេវាជូនប្រជាពលរដ្ឋ៕

The post ១សប្តាហ៍ មន្ត្រីផ្តល់អត្តសញ្ញាណប័ណ្ណជាង១ម៉ឺនសន្លឹកដល់ប្រជាពលរដ្ឋដោយមិនគិតថ្លៃ appeared first on Kampuchea Thmey Daily.

ថ្លែងនៅក្នុងឱកាសបើកសិក្ខាសាលាផ្សព្វផ្សាយស្តីពី «វិស័យមីក្រូហិរញ្ញវត្ថុនៅកម្ពុជា ជូនអ្នកពាក់ពន្ធនៅក្នុងស្រុកសន្ទុក ខេត្តកំពង់ធំ កាលពីថ្ងៃទី១៣មិថុនា លោក រ័ត្ន សុវណ្ណនរៈ បានសូមណូមពរដល់សមត្ថកិច្ចពាក់ព័ន្ធ ពិសេសអាជ្ញាធរ​មូលដ្ឋាន ឲ្យចូលរួមអប់រំ និងជួយពន្យល់ប្រជាជន អ្នកប្រើប្រាស់ប្រាក់កម្ចីក្នុងមូលដ្ឋានរបស់ខ្លួន ឲ្យបានយល់ពី​ផលប្រយោជន៍នៃការប្រើប្រាក់កម្ចី ពោលរាល់ប្រាក់កម្ចីត្រូវប្រើឲ្យចំគោលដៅ និងគោរពតាមកាតព្វកិច្ចសង។ ជាមួយនេះត្រូវអប់រំប្រជាជនកុំឲ្យលង់ តាមការឃោសនាមិនសមហេតុផល របស់ជនបោកប្រាស់ ឬអ្នកចងការ​ប្រាក់ក្រៅច្បាប់ហើយ ការខ្ចីប្រាក់ត្រូវធ្វើនៅតាមគ្រឹះស្ថានមីក្រូទទួលស្គាល់ដោយច្បាប់ ទើបចាកផុតពីបំណុលវន្ត័ករ និងទទួលបានការរីកចម្រើនសម្រាប់គ្រួសារ។

ពាក់ព័ន្ធនឹងបញ្ហានេះ ថ្លែងនៅក្នុងកិច្ចប្រជុំត្រួតពិនិត្យផលទ្ធផលការអនុវត្តផែនការយុទ្ធនាការផ្តល់អត្តសញ្ញាណប័ណ្ណ​សញ្ជាតិខ្មែរទុតិយតា នៅព្រឹកថ្ងៃទី ១៣ ខែមិថុនានេះ សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួង​មហាផ្ទៃមានប្រសាសន៍ថា នាពេលដ៏ខ្លីខាងមុខនេះ កម្ពុជា​នឹង​លុបបំបាត់ឲ្យអស់ចំពោះករណី​យកអត្តសញ្ញាណ​ប័ណ្ណសញ្ជាតិខ្មែរទៅប្រើប្រាស់ខុសគោលដៅ ជាពិសេសការអត្តសញ្ញាណ​ប័ណ្ណសញ្ជាតិខ្មែរយកទៅ​បញ្ចាំជាមួយមី​ក្រូហិរញ្ញវត្ថុ និងខ្ចីប្រាក់ក្រៅប្រព័ន្ធ ជាដើម។

សម្ដេចក្រឡាហោម ស ខេង បានបន្តថា « បញ្ហានេះនឹងលែងមានតទៅទៀត បន្ទាប់​ពី​សេចក្តីព្រាងច្បាប់ស្តីពី​អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ត្រូវបានអនុម័តដាក់ឱ្យប្រើប្រាស់​ជាផ្លូវការនាពេលដ៏​ខ្លីខាងមុខនេះ»។

លោក សុខ វឿន ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា បញ្ជាក់ឲ្យដឹងថា បច្ចុប្បន្នវិស័យមីក្រូហិរញ្ញវត្ថុ​បាននិងកំពុង មានភាពរីកចម្រើនគួរឱ្យកត់សម្គាល់ ឆ្លុះបញ្ចាំងពីកំណើនបរិយាបន្នហិរញ្ញវត្ថុរួមមាន សមតុល្យឥណទាន ក៏ដូចជាការដាក់ប្រាក់បញ្ញើរបានកើនឡើជាបន្តបន្ទាប់ ព្រមទាំងមានភាពកាន់តែប្រសើរឡើង នូវចំណេះដឹងផ្នែក​ហិរញ្ញវត្ថុ​ក្នុង​ចំណោមប្រជាពលរដ្ឋកម្ពុជាថែមទៀតផង៕

អត្ថបទ៖ សំអឿន

The post មន្រ្តីធនាគារជាតិ៖ អត្តសញ្ញាណប័ណ្ណ និងសៀវភៅគ្រួសារលែងមានតម្លៃ​សម្រាប់ធានាបញ្ចាំកម្ចីធនាគារ appeared first on Kampuchea Thmey Daily.