អត្តពលិក ប៊ូ សំណាង Archives - Kampuchea Thmey Daily

ប៊ូ សំណាង ជាប់ក្នុងការប្រកួតអស្ចារ្យបំផុត១៥ប្រចាំឆ្នាំ២០២៣របស់Guardian

chean virakbot — Wed, 03 Jan 2024 08:19:01 +0000

សារព័ត៌មានអង់គ្លេស The Guardian បានសម្រិតសម្រាំងក្នុងការប្រមូលព្រឹត្តិការណ៍ប្រកួតកីឡាដ៏អស្ចារ្យបំផុតចំនួន១៥ប្រចាំឆ្នាំ២០២៣។ ក្នុងចំណោមការប្រកួតដែលអស្ចារ្យ រំជើបរំជួល និងបំបែកកំណត់ត្រាជុំវិញពិភពលោក ក៏មានការរត់ប្រណាំងរបស់កីឡាការិនីកម្ពុជា ប៊ូ សំណាង ក្នុងព្រឹត្តិការណ៍កីឡាស៊ីហ្គេម លើកទី៣២ ដែលប្រទេសកម្ពុជាធ្វើជាម្ចាស់ផ្ទះ។

ការប្រកួតវាយសី២១១ប៉ះទើបរកឃើញអ្នកឈ្នះ

ការប្រកួតវាយសីវាយគូនារីដ៏អស្ចារ្យរវាងកីឡាការិនី Thinaah Muralitharan និង Pearly Tan ទល់នឹង Rena Miyaura និង Ayako Sakuramoto ក្នុងព្រឹត្តិការណ៍ BWF Malaysia Masters ខែឧសភា។ នេះជាការប្រកួតដែលវាយទៅ វាយមកចំនួន២១១ដងទើបរកឃើញអ្នកទទួលបានពិន្ទុ។

គ្រាប់បាល់លឿនបំផុត

កីឡាករ Gioacchino Giardina ប្រធានក្រុមរបស់ក្លិ SC Mazarese បានប្រើពេលត្រឹមតែ៣.៨១វិនាទីប៉ុណ្ណោះក្នុងការរកបានគ្រាប់បាល់ដែលបានក្លាយជាការរកគ្រាប់បាល់លឿនបំផុតក្នុងប្រវត្តិសាស្ត្របាល់ទាត់អ៉ីតាលី។ គ្រាន់តែអាជ្ញាកណ្តាលភ្លំកញ្ចែបើកការប្រកួតភ្លាម កីឡាករ Gioacchino ស៊ុតចូលភ្លាមក្នុងលីគលំដាប់ទី៥របស់អ៉ីតាលី កាលពីខែកុម្ភៈ។

ទាត់បាល់បកចូលទីដ៏កម្រ

កីឡាករ George Slaney រកបានគ្រាប់បាល់ដ៏អស្ចារ្យនៅពេលអ្នកចាំទីរបស់ក្រុម Greenwich Battle Cruisers បានទាត់បាល់ឡើងទៅលើ ហើយបាល់មិនទាន់ធ្លាក់ដល់ដីផង កីឡាករ George ទាត់បកពីចម្ងាយទៅវិញចូលទីបានសម្រេចក្នុងលីគ Sunday League ខែមីនា ដែលក្រុម Greenwich Challenge បញ្ចប់ដោយលទ្ធផលស្មើគ្នា ២-២ នឹងក្រុម Greenwich Battle Cruisers។

ទាត់វាត់នាគកន្ទុយចូលទីមិនធ្លាប់មាន

កីឡាករ Charlie Unwin របស់ក្លិប Chells Rovers បានបង្កើតការភ្ញាក់ផ្អើលនៅពេលទាត់ក្បាច់នាគវាត់កន្ទុយចូលទីរបស់ក្រុម The Cock FC បានសម្រេចក្នុងលីគ Sunday League បានជួយក្រុមរបស់ខ្លួនទទួលជ័យជម្នះ ៥-៤។

ទាត់បាល់ដូចចាប់ដាក់

អ្នកគាំទ្ររបស់ក្រុមបាល់ទាត់ San Jose Earthquakes ម្នាក់បានបង្កើតការចាប់អារម្មណ៍មិនស្ទើរទេនៅពេលទាត់បាល់ពីចម្ងាយដោយជើងឆ្វេងទៅចំណុចកែបាល់ ហើយបាល់បានរត់ទៅដល់ចំណុចរង្វង់សជាកន្លែងកែបាល់ដូចចាប់ដាក់។ នេះជាល្បែងកម្សាន្តដែលមានអ្នកគាំទ្រ៤នាក់ចូលលេងទាត់បាល់ទៅកន្លែងកែបាល់ថាតើនរណាធ្វើបានល្អជាងគេ ប៉ុន្តែបែរជាម្នាក់ធ្វើបានល្អឥតខ្ចោះ១០០%។

សត្វសុនខដណ្តើមបាល់ពីអ្នកចាំទី

សត្វសុនខមួយបានដណ្តើមបាល់ពីអ្នកចាំទីនៅពេលការប្រកួតរវាងក្រុម Alebrijes Oaxaca និង Dorados ចុងម៉ោងបន្ថែមក្នុងប្រទេសម៉ិកស៊ិក។ នៅពេលខ្សែបម្រើលើកបាល់ទៅ ហើយអ្នកចាំទីក៏លោតចាប់បាល់ ពេលនោះសុនខមួយបានចូលទៅដណ្តើម និងបានខាំបាល់រត់ពេញទីលានដែលបានធ្វើឲ្យល្បីយ៉ាងខ្លាំងលើបណ្តាញសង្គមទូទាំងពិភពលោក។

ស៊ុតមិនចូលទោះគ្មានអ្នចាំទី

ការប្រកួតបាល់ទាត់ម្ខាង៥មួយនៅប្រទេសតួកគី មានក្រុមមួយស៊ុតមិនចូលសោះ បើទោះជាមានគ្នា៣ទៅ៤នាក់នៅមុខទេ ហើយគ្មានអ្នកចាំទីដោយមានតែខ្សែការពារម្នាក់ប៉ុណ្ណោះ។ ក្រុមម្ខាងនោះស៊ុតទៅស៊ុតមកអត់ចូល។ វាមិនមែនជាការសម្តែងទេ ប៉ុន្តែជាការលេងមិនអាជីពពិតប្រាកដដែលបានធ្វើឲ្យវីដេអូនេះមានការចាប់អារម្មណ៍យ៉ាងខ្លាំង។

ការប្រកួតគ្រីឃីត ថែមលោតទាត់

ការប្រកួតកីឡាគ្រីឃីតក្នុងតំបន់ប្រទេសឥណ្ឌាមួយបង្កើតការចាប់អារម្មណ៍យ៉ាងខ្លាំង។ នៅពេលកីឡាករម្នាក់គប់គ្រាប់បាល់ ហើយកីឡាករម្នាក់ទៀតវាយដំបងបានធ្វើឲ្យគ្រាប់បាល់ខ្ទាត់ឆ្ងាយស្ទើរក្រៅរង្វង់ទៅហើយ។ ពេលនោះខ្សែការពារម្នាក់នៅជុំវិញបានយកដៃចាប់ ហើយបោះឡើងលើ ប៉ុន្តែគ្រាប់បាល់បែរជាចេញក្រៅដោយច្បាប់មិនត្រូវឲ្យប្រើដៃនៅក្រៅរង្វង់ រូបគេបានលោតទាត់ឲ្យគ្រាប់បាល់ចូលក្នុងរង្វង់វិញ។

ការប្រកួតកីឡា Curling ដ៏អស្ចារ្យ

កាលពីខែមេសា កីឡាករស៊ុយអែត Niklas Edin ជើងឯកពិភពលោក Curling ៦សម័យកាលបានធ្វើនូវអ្វីដែលហៅថា «ការស៊ុតដ៏អស្ចារ្យ»ក្នុងប្រវត្តិសាស្ត្រកីឡា Curling ពិភពលោក។ កីឡាករស៊ុយអែតតាមពីក្រោយកីឡាករន័រវេស២ពិន្ទុសម្រាប់ការវាយគ្រាប់ចុងក្រោយ។ ការប៉ុនប៉ង់របស់គាត់ចុងក្រោយបានឈូសថ្មការ៉ូខុសពីធម្មតា ហើយទីបំផុតគ្រាប់ Curling ទទួលបានពិន្ទុដ៏ជោគជ័យ។

ការវាយកូនហ្គោលលឿនបំបែកកំណត់ត្រាហ្គីណេស

កាលពីខែមុន លោក Luke Willett បានបំបែកកំណត់ត្រាហ្គីណេសពិភពលោកតាមរយៈការវាយកូនហ្គោល៩រន្ធលឿនបំផុត។ លោកបានវាយ១រន្ធរត់ទៅមួយរន្ធទៀត ហើយវាយ១រន្ធរត់ទៅមួយទៀតដោយ៩រន្ធប្រើពេលត្រឹមតែ២០នាទី និង១២.៤៧វិនាទីប៉ុណ្ណោះនៅទីលានវាយកូនហ្គោល Jumeirah Golf Estates ក្នុងទីក្រុងឌូបៃ។

ការប្រកួតស្នូកឃ័រប្រើបច្ចេកទេសពិសេស

កាលពីខែមករា ដើមឆ្នាំ២០២៣ កីឡាកររហស្សនាម«បុរសអ្នកវេទមន្ត» Chris Melling បានយកឈ្នះ Gary Clarke ដោយបច្ចេកទេសអស្ចារ្យបំផុតដើម្បីឡើងទៅកាន់វគ្គ១៦រូបចុងក្រោយនៃការប្រកួតស្នូកឃ័រ 2023 Ultimate Pool Champions League។ វាជាបច្ចេកទេសពិបាកយល់សម្រាប់អ្នកអត់ចេះកីឡាស្នូកឃ័រ ប៉ុន្តែលក្ខណៈពិសេសនេះ លោកបានវាយផ្លូវកាត់ដើម្បីយកឈ្នះយ៉ាងលឿន។

ជិះកង់ក្នុងទូកដែលបាឡុងហោះលើអាកាស

កាលពីមេសា កីឡាករជិះកង់អង់គ្លេស Kriss Kyle បានសម្តែងសមត្ថភាពជិះដ៏អស្ចារ្យប្រកបដោយគ្រោះថ្នាក់នៅកន្លែងជិះដូចជាទូកត្រូវបានបាឡុងហោះឡើងលើកម្ពស់៦១០ម៉ែត្រ។ ពេលនោះលោកបានជិះកង់បែបស្គីទៅមក ចុះក្រោម ឡើងលើ មើលទៅពិតជាគ្រោះថ្នាក់ណាស់។

ជិះស្គីលើទឹកកកលេងស្បែងសៀក

លោក Joe Cronquist បានជិះស្គីលើទឹកកកនៅជើងភ្នំ Teton។ នៅពេលចុះពីទីទួល លោកលេងល្បែងបោះឧបករណ៍ឡើងលើ៣គ្រាប់ និងលោតក្រឡាប់ខ្លួនដោយមិនឲ្យឧបករណ៍ណាមួយធ្លាក់ដល់ដីឡើយ។

រៀបល្បែង Rubik បំបែកកំណត់ត្រាពិភពលោក

បុរសអាមេរិកឈ្មោះ Max Park បានបំបែកកំណត់ត្រាពិភពលោកក្នុងការលេងឧបករណ៍ Rubik ដោយបានប្រើពេលត្រឹមតែ ៣.១៣វិនាទីប៉ុណ្ណោះដើម្បីរៀបឲ្យក្រឡាពណ៌ត្រូវគ្នា។ កំណត់ត្រាចាស់បុរសចិន Yusheng Du ប្រើពេល៣.៤៧វិនាទីកាលពីឆ្នាំ២០១៨។

ការរត់របស់ ប៊ូ សំណាង ធ្វើឲ្យពិភពលោកភ្ញាក់ផ្អើល

កីឡាការិនីរត់ប្រណាំងកម្ពុជា ប៊ូ សំណាង បានធ្វើឲ្យពិភពលោកចាប់អារម្មណ៍យ៉ាងខ្លាំងនៅពេលនាងរត់ចម្ងាយ៥០០០ម៉ែត្រក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។ ថ្វីបើដឹងខ្លួនស្ថិតនៅចុងក្រោយ និងភ្លៀងធ្លាក់យ៉ាងខ្លាំង ក៏កីឡាការិនីវ័យក្មេងកម្ពុជាមិនបោះបង់ចោលការប្រកួតឡើយ។ នាងរត់រហូតដល់ទីបញ្ចប់ ក្រោមតំណក់ទឹកភ្លៀង ហើយបានអរគុណដល់អ្នកគាំទ្រនៅពហុកីឡដ្ឋានជាតិមរតកតេជោ។

ស្មារតីជាអ្នកកីឡារបស់ ប៊ូ សំណាង បានយកឈ្នះចិត្តមនុស្សរាប់រយលាននាក់ ហើយសារព័ត៌មានធំៗទាំងពិភពលោកបានចេញផ្សាយពីនាង។ តាមរយៈភាពអត់ធន់ តស៊ូ និងជម្នះនឹងឧបសគ្គបានធ្វើឲ្យពិភពលោកចាប់អារម្មណ៍យ៉ាងខ្លាំងចំពោះប្រទេសកម្ពុជាដែលរៀបចំកីឡាស៊ីហ្គេមជាលើកដំបូងដ៏ជោគជ័យ៕

ប្រែសម្រួល៖ វីរបុត្រ
ប្រភព៖ Guardian

The post ប៊ូ សំណាង ជាប់ក្នុងការប្រកួតអស្ចារ្យបំផុត១៥ប្រចាំឆ្នាំ២០២៣របស់Guardian appeared first on Kampuchea Thmey Daily.

ច្បាស់មុនគេ កម្ពុជានឹងធ្វើរូបសំណាកកីឡាការិនី ប៊ូ សំណាង និង ប៉ាល់ ឆរស្មី

chean virakbot — Wed, 06 Sep 2023 03:56:08 +0000

កីឡាការិនីរត់ប្រណាំង ប៊ូ សំណាង និងកីឡាការិនីវ៉ូវីណាម ប៉ាល់ ឆរស្មី ស្ថិតក្នុងចំណោមអត្តពលិកជម្រើសជាតិកម្ពុជាដែលត្រូវបានជ្រើសរើសដើម្បីធ្វើរូបសំណាកតំណាងឲ្យវីរភាពរបស់ពួកគេសម្រាប់តម្កល់ទុកនៅវិមានឈ្នះឈ្នះ។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានឲ្យដឹងថា បន្ទាប់ពីរៀបចំព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ប្រកបដោយជោគជ័យ កម្ពុជានឹងជ្រើសរើសអត្តពលិកឆ្នើមៗដែលមានស្នាដៃជូនជាតិដើម្បីធ្វើសំណាក់របស់ពួកគេ។

លោកមានប្រសាសន៍ថា ៖«ឥឡូវនេះ កំពុងស្ថិតក្នុងនីតិវិធីរៀបចំនៅឡើយ។ ក្នុងនោះវីរភាពដ៏លេចធ្លោជាងគេគឺមានកីឡាការិនី ប៊ូ សំណាង ម្នាក់ហើយ។ ក្រៅពីនោះ យើងនឹងជ្រើសរើសយកអត្តពលិកដែលឈ្នះមេដាយមាសលេចធ្លោជាងគេ និងអ្នកដែលឈ្នះមេដាយមាសច្រើនជាងគេ។ អីចឹងយើងមាន២រូបហើយគឺកីឡាការិនី ប៉ាល់ ឆរស្មី និងកីឡាការិនី ប៉ូ សំណាង ដែលទទួលបានរង្វាន់ស៊ីហ្គេមនៅពេលបិទ»។

«អ្នកផ្សេងទៀត យើងកំពុងតែបន្តធ្វើការជ្រើសរើស។ យើងនឹងធ្វើការជាមួយក្រសួងការពារជាតិអំពីការឆ្លាក់រូបសំណាក និងប្រវត្តិរូបរបស់ពួកគាត់នៅក្នុងផ្ទាំងជាប្រវត្តិសាស្ត្រ នៅវិមានឈ្នះឈ្នះដែលទទួលបានការឯកភាពពីសម្តេចតេជោរួចហើយ ហើយសម្តេចពិជ័យសេនា ទៀ បាញ់ ជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម CAMSOC ក៏បានខិតខំប្រឹងធ្វើកិច្ចការនេះ ហើយកិច្ចការនេះនឹងធ្វើឲ្យបានរួចរាល់ក្នុងពេលឆាប់ៗ»។

នៅពេលសួរថា តើជ្រើសរើសអត្តពលិកប៉ុន្មាននាក់ និងមានការជ្រើសរើសថ្នាក់ដឹកនាំ ឬគ្រូបង្វឹកដើម្បីធ្វើសំណាកដែរឬទេ? លោក វ៉ាត់ ចំរើន បានឆ្លើយថា ៖«យើងមិនទាន់បានកំណត់ចំនួនអត្តពលិកទេ ពីព្រោះកំពុងពិនិត្យមើលទីកន្លែងដែលរៀបចំដាក់រូបសំណាក។ នៅក្នុងប្រវត្តិកីឡាគឺគេយកវីរភាពរបស់កីឡាករ កីឡាការិនីជាធំ»។

ប៊ូ សំណាង ជាកីឡាការិនីរត់ប្រណាំងជម្រើសជាតិកម្ពុជាដែលធ្វើឲ្យពិភពលោកចាប់អារម្មណ៍យ៉ាងខ្លាំងតាមរយៈឆន្ទៈ និងការតស៊ូក្រោមដំណក់ទឹកភ្លៀងដោយមិនបោះបង់ចោលការប្រកួត បើទោះបីជាដឹងថា ខ្លួនស្ថិតនៅចុងក្រោយគេ។ នេះហើយជាស្មារតីកីឡា ស្មារតីអូឡាំពិក និងស្មារតីជីវិតនៃការតស៊ូដែលធ្វើឲ្យពិភពលោករំជួលចិត្តយ៉ាងខ្លាំង និងមានមនុស្សរាប់ពាន់លាននាក់បានចាប់អារម្មណ៍មកកម្ពុជាក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។

ប៉ាល់ ឆរស្មី ជាកីឡាការិនីវ៉ូវីណាមជម្រើសជាតិកម្ពុជាដែលបានឈ្នះមេដាយមាសច្រើនជាងគេបំផុតក្នុងចំណោមម្ចាស់មេដាយមាសស៊ីហ្គេមរបស់កម្ពុជា។ វីរកីឡាការិនីរូបនេះទទួលបានពានរង្វាន់ជាអត្តពលិកឆ្នើមប្រចាំព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ បន្ទាប់ពីបានឈ្នះមេដាយចំនួន៦គ្រឿងគឺមាស៤ ប្រាក់១ និងសំរិទ្ធ១៕

អត្ថបទ៖ វីរបុត្រ

The post ច្បាស់មុនគេ កម្ពុជានឹងធ្វើរូបសំណាកកីឡាការិនី ប៊ូ សំណាង និង ប៉ាល់ ឆរស្មី appeared first on Kampuchea Thmey Daily.

ការតស៊ូរបស់អត្តពលិក ប៊ូ សំណាង រំជួលដល់បេះដូងឧកញ៉ា ស្រី ចាន់ថន អាណិតឧបត្ថម្ភ ៥លានរៀល

Sophal Tuon — Wed, 10 May 2023 06:05:41 +0000

ភ្នំពេញ ៖ ដោយឃើញពីភាពតស៊ូ និងអត់ធ្មត់រត់ក្រោមដំណក់ទឹកភ្លៀង ទោះបីជាប់លេខក្រោយគេយ៉ាងណា ក៏ដោយនោះ អត្តពលិក ប៊ូ សំណាង បានអន្ទងចិត្តលោកឧកញ៉ា ស្រី ចាន់ថន ឱ្យចូលរួមឧបត្ថម្ភថវិកា ៥ លានរៀល ដល់រូបនាង។

លោកឧកញ៉ា ស្រី ចាន់ថន បានប្រកាសថា «ជំរាបសួរបងប្អូនជនរួមជាតិជាទីគោរពដោយការមើលឃើញ ពីកាតស៊ូរបស់ប្អូនស្រី ប៊ូ សំណាំង ដែលជាកីឡាការិនីរត់ប្រណាំងចម្ងាយម៥០០០ម៉ែត្រ ដែលគាត់មិន បានទទួលជ័យជំនះក៏ពិតមែនតែគាត់អាចយកបេះដូងមហាជនបានរាប់ម៉ឺននាក់»។

លោកកញ៉ា ស្រី ចាន់ថន បានបញ្ជាក់ថា «ខ្ញុំបាទសូមប្រកាសថានឹងឧបត្ថម្ភថវិកាទៅប្អូនស្រីចំនួន៥លានរៀល ដើម្បីជាការលើកទឹកចិត្ត ដោយប្អូនស្រីមិនបានបោះបង់គោលដៅនោះទេទោះបីជាប្អូនស្រីរត់ដល់ គោលដៅក្រោយ គេក៏ដោយបងស្រឡាញ់ និងការតស៊ូរបស់ប្អូនស្រីណាស់សូមប្អូនស្រីប្រឹងប្រែងបន្ថែមទៀតសង្ឃឹមថាថ្ងៃណាមួយ ប្អូននឹងទទួលបានជ័យជម្នះ។ខ្មែរស្រឡាញ់ខ្មែរ ខ្មែរគាំទ្រខ្មែរ ខ្មែរលើកស្ទួយខ្មែរខ្មែរអាចធ្វើបាន»។

សូមបញ្ជាក់ថា នៅក្នុងព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ អត្តពលិកខ្មែរកញ្ញា ប៊ូ សំណា បានឆក់បេះដូងប្រជាពលរដ្ឋកម្ពុជាស្ទើគ្រប់រូប និងនៅជុំវិញពិភព លោក បន្ទាប់ពីសកម្មភាពរត់ចម្ងាយ៥០០០ម៉ែត្រ (៥គីឡូម៉ែត្រ)ក្រោមដំណក់ទឹកភ្លៀងទោះបីជាប់លេខក្រោយគេយ៉ាងណាក្តី ប៉ុន្តែភាពអត់ធ្មត់ព្យាយាមក្នុងនាមអត្តពលិកខ្មែម្នាក់មិនបោះ បង់ចោលការប្រកួតនោះឡើយ៕ អត្ថបទ៖ ចាន់រ៉ា

The post ការតស៊ូរបស់អត្តពលិក ប៊ូ សំណាង រំជួលដល់បេះដូងឧកញ៉ា ស្រី ចាន់ថន អាណិតឧបត្ថម្ភ ៥លានរៀល appeared first on Kampuchea Thmey Daily.

អត្តពលិក ប៊ូ សំណាង Archives - Kampuchea Thmey Daily

ប៊ូ សំណាង ជាប់ក្នុងការប្រកួតអស្ចារ្យបំផុត១៥ប្រចាំឆ្នាំ២០២៣របស់Guardian

ច្បាស់​មុន​គេ កម្ពុជានឹងធ្វើរូបសំណាកកីឡាការិនី ប៊ូ សំណាង និង ប៉ាល់ ឆរស្មី

ការតស៊ូរបស់អត្តពលិក ប៊ូ សំណាង រំជួលដល់បេះដូងឧកញ៉ា ស្រី ចាន់ថន អាណិតឧបត្ថម្ភ ៥លានរៀល

ច្បាស់មុនគេ កម្ពុជានឹងធ្វើរូបសំណាកកីឡាការិនី ប៊ូ សំណាង និង ប៉ាល់ ឆរស្មី