អាការចាញ់កូន Archives - Kampuchea Thmey Daily

អាការមុនមករដូវ អាចច្រឡំនឹងអាការ មានផ្ទៃពោះដំបូង?

សាង ស្រីល័ក្ខ — Tue, 30 Nov 2021 03:00:00 +0000

រោគសញ្ញាមុនមករដូវមួយចំនួន ដូចរោគសញ្ញាមានផ្ទៃពោះដំបូងអ៊ឹចឹង ដែលធ្វើស្រីៗយើងដែលមានគ្រួសារហើយច្រឡំ ឬសង្ស័យថា មានផ្ទៃពោះ។ តើអាការៈមុនមករដូវ និងមានផ្ទៃពោះដំបូងដូចគ្នានិងខុសគ្នាដូចម្តេចខ្លះ?

មុនពេលមករដូវ ២ សប្តាហ៍រាងកាយរបស់យើងផលិតអ័រម៉ូនប្រូហ្សេស្តេរ៉ូន (progesterone) ដែលជាអ័រម៉ូនសំខាន់សម្រាប់ទ្រទ្រង់ការមានគភ៌ដំបូង។

កម្រិតអ័រម៉ូននេះនឹងកើនខ្ពស់ក្នុងអំឡុងពេល ១សប្តាហ៍បន្ទាប់ ទោះបីជាយើងមិនមានផ្ទៃពោះក៏ដោយ។ ការកើនឡើងនៃកម្រិតអ័រម៉ូននេះអាចបណ្តាលឱ្យយើងមានការផ្លាស់ប្តូរទាំងផ្លូវកាយ និងផ្លូវចិត្ត ដែលជារោគសញ្ញាមុនមករដូវ។

ប្រសិនបើយើងមានផ្ទៃពោះ រោគសញ្ញានៃការមានផ្ទៃពោះអាចលេចឡើងមុនពេលយើងបាត់រដូវចាប់ពី ១សប្តាហ៍ទៅ ១០ថ្ងៃ ពោលគឺនៅសប្តាហ៍ទី ១ នៃការបង្កកំណើតតែម្តង។

អាការមុនមករដូវ និងមានផ្ទៃពោះដំបូងអាចមានលក្ខណៈស្រដៀងគ្នាដូចខាងក្រោម៖

ឡើងទម្ងន់
សុដន់រីកធំ ហើម និងឈឺ ឬរមាស់ចុងសុដន់
ឈឺក្បាល
អស់កម្លាំង
ប្រែប្រួលអារម្មណ៍ (ឆេវឆាវ ឆាប់ខឹង ថប់បារម្ភ បាក់ទឹកចិត្ត)
រមួលក្រពើ
ឈឺចង្កេះ
ទល់លាមក
ហើមពោះ
ញុំាច្រើន

ភាពខុសគ្នា

ការធ្លាក់ឈាមពេលមករដូវខុសពីការធ្លាក់ឈាមពេលមានផ្ទៃពោះដំបូង។ ការធ្លាក់ឈាមពេលមានផ្ទៃពោះដំបូងកើតឡើងដោយសារស៊ុតបង្កកំណើតភ្ជាប់ខ្លួននឹងជញ្ជាំងស្បូន (ស៊ុតកាច់សម្បុក) ហើយកើតឡើងនៅចន្លោះពេលនៃការមករដូវដែលធ្វើឱ្យយើងច្រឡំថាមករដូវ។ ប៉ុន្តែការធ្លាក់ឈាមនេះមិនសូវច្រើន និងមិនយូរដូចការធ្លាក់ឈាមពេលមករដូវទេ ហើយមានពណ៌ស្រាលជាង ឬមានពណ៌ត្នោត។
ការរមួលក្រពើមុនពេលមុនមករដូវមានសភាពធ្ងន់ជាងពេលមានផ្ទៃពោះដំបូង។
អាកាៈចង្អោរ និងក្អួតច្រើនកើតមានក្នុងពេលមានផ្ទៃពោះដំបូង។
ចុងសុដន់ ឬតំបន់ជុំវិញក្បាលសុដន់ឡើងពណ៌ខ្មៅគឺជាសញ្ញានៃការមានផ្ទៃពោះដំបូង។

អាការៈមុនមករដូវ និងការមានផ្ទៃពោះដំបូងមានលក្ខណៈដូចគ្នាច្រើន ជាពិសេសការធ្លាក់ឈាមពេលស៊ុតកាច់សម្បុកដែលធ្វើឱ្យយើងច្រឡំថាមករដូវ។ វិធីសាស្រ្តល្អបំផុតក្នុងការបំបាត់មន្ទិលសង្ស័យគឺការធ្វើតេស្តទឹកនោមពិនិត្យផ្ទៃពោះ៕

អត្ថបទ៖Hello Krupet

ចុចអាន៖អាហារ ៧ មុខកំពុងពេញនិយខ្លាំង តែបំផ្លាញសុខភាពច្រើនជាងអ្វីដែលអ្នកគិត

The post អាការមុនមករដូវ អាចច្រឡំនឹងអាការ មានផ្ទៃពោះដំបូង? appeared first on Kampuchea Thmey Daily.

បន្ថយអាការចាញ់កូន រមួលក្រពើពេលពពោះ កុំរំលងផ្លែឈើទាំងនេះ

សាង ស្រីល័ក្ខ — Wed, 15 Sep 2021 06:05:00 +0000

សម្រាប់ស្រ្តីមានផ្ទៃពោះ ជារឿងសំខាន់ណាស់ដែលត្រូវញ៉ាំ អាហារសម្បូរដោយសារធាតុចិញ្ចឹម និងចៀសវាងអាហារដែលសម្បូរខ្លាញ់ និងមានស្ករច្រើន។ បន្លែ និងផ្លែឈើជាប្រភពអាហារសម្បូរសារធាតុចិញ្ចឹមសម្រាប់ស្រ្តីមានផ្ទៃពោះ។ ពេលយើងមាន បន្លែ និងផ្លែឈើក្នុងរបបអាហារ យើងនឹងទទួលបានវីតាមីន រ៉ែ និងជាតិសរសៃ ដែលខ្លួនយើង និងកូនក្នុងផ្ទៃត្រូវការ។ តើអ្វីផ្លែឈើណាខ្លះងាយរក ហើយមានប្រយោជន៍ច្រើនដល់ស្រីៗកំពុងពពោះ?

១. ផ្លែក្រូច

ផ្លែក្រូចមិនត្រឹមតែជួយបំពេញជាតិទឹកដល់រាងកាយស្រ្តីមានផ្ទៃពោះនោះទេ តែនៅមានហ្វូឡេត ដែលមានសារសំខាន់ណាស់ជួយការពារខួរក្បាល និងឆ្អឹងខ្នងកូនក្នុងផ្ទៃកុំឲ្យមានបញ្ហា។

ក្រៅពីនេះផ្លែក្រូចក៏ជាប្រភពវីតាមីន C ផងដែរ ដែលវីតាមីននេះ ជាសារធាតុប្រឆាំងអុកស៊ីតកម្ម ជួយការពារការខូចខាតកោសិកា និងជួយរាងកាយស្រូបជាតិដែកបានល្អទៀតផង។

២. ស្វាយទុំ

ផ្លែស្វាយក៏សម្បូរវីតាមីន C និងវីតាមីនA។ ខ្វះវីតាមីន A ពេលកើតធ្វើឲ្យទារកប្រឈមនឹងផលវិបាកផ្សេងៗខ្ពស់ ដូចជាឆ្លងរោគផ្លូវដង្ហើម និងរាករូសជាដើម។

ជាការណែនាំស្រ្តីមានផ្ទៃពោះមិនគួរញ៉ាំស្វាយទុំច្រើនពេកទេក្នុងមួយថ្ងៃ ដោយថាអាចនាំឲ្យលើសវីតាមីន A ថ្វីបើករណីនេះជាករណីកម្រក៏ដោយ។ ស្ត្រីមានផ្ទៃពោះគួរញ៉ាំក្នុងកម្រិតសមល្មម និងញ៉ាំជាមួយផ្លែឈើផ្សេងៗទៀត។

៣. ផ្លែប័រ

សម្រាប់ផ្លែប័រឯណេះវិញសម្បូរទៅដោយវីតាមីន C, B, K ជាតិសរសៃ Choline ម៉ាញ៉េស្យូម និងប៉ូតាស្យូម។ ស្រ្តីមានផ្ទៃពោះមួយចំនួនអះអាងថាផ្លែប័រជួយកាត់បន្ថយអាការៈចង្អោរពេលមានផ្ទៃពោះ ដែលនេះទំនងមកពីរ៉ែម៉ាញ៉េស្យូម និងប៉ូតាស្យូម។

ប៉ូតាស្យូម ក៏បន្ធូររោគសញ្ញារមួលក្រពើរបស់ស្រ្តីមានផ្ទៃពោះផងដែរ។ អាការៈរមួលក្រពើ ច្រើនកើតឡើងដោយសារតែរាងកាយខ្វះម៉ាញ៉េស្យូម និងប៉ូតាស្យូម។ ចំណែកCholineវិញមានប្រយោជន៍ជួយដល់ការលូតលាស់ផ្នែកខួរក្បាល និងប្រព័ន្ធប្រសាទកូនក្នុងផ្ទៃ។

៤. ចេកទុំ

ចេកទុំ ក៏ជាប្រភពនៃប៉ូតាស្យូម វីតាមីនB6, C និងជាតិសរសៃ។ បន្ថែមអាហារសម្បូរជាតិសរសៃដូចជាចេកទុំទៅក្នុងរបបអាហារក៏អាចជួយកាត់បន្ថយបញ្ហាទល់លាមករបស់ស្រ្តីមានផ្ទៃពោះដែរ។ ការសិក្សាផ្សេងទៀតបង្ហាញថាវីតាមីនB6 ជួយបន្ធូរអាការៈចាញ់កូនរបស់ស្រ្តីមានផ្ទៃពោះផងដែរ។

៥. ផ្លែប៉ោម

ផ្លែប៉ោមសម្បូរជាតិសរសៃ និងវីតាមីន C, A ប៉ូតាស្យូម និងpectin ផងដែរ។ Pectin ជាព្រីបាយអូទិក(prebiotic) ជួយចិញ្ចឹមបាត់តេរីល្អក្នុងពោះវៀន។ ដើម្បីទទួលបានសារធាតុចិញ្ចឹមល្អៗពីផ្លែប៉ោម យើងគួរញ៉ាំទាំងសម្បក តែត្រូវប្រាកដថាបានលាងសម្អាតស្អាតជាមុនសិន។

ញ៉ាំផ្លែឈើពេលពពោះជួយឲ្យយើង និងកូនមានសុខភាពល្អ។ ផ្លែឈឺកំប៉ុងអាចជាជម្រើសល្អសម្រាប់ស្រ្តីពពោះដែរ តែត្រូវប្រាកដថាមិនមានបន្ថែមជាតិស្ករ។ ដើម្បីដឹងច្បាស់ពីផែនការអាហារពេលមានផ្ទៃពោះ ស្រីៗយើងគួរពិភាក្សាជាមួយគ្រូពេទ្យ៕

អត្ថបទផ្ដល់ដោយ៖ Hello Krupet

ចុចអាន៖ស្ត្រីមានផ្ទៃពោះ កុំញ៉ាំស៊ូស៊ីសាច់ឆៅ ប្រយ័ត្នបង្ករោគធ្ងន់ធ្ងរដល់កូនក្នុងផ្ទៃ

ចុចអាន៖ដំណាប់ល្មើល្អចំពោះសុខភាពមនុស្សទូទៅ ជាពិសេសជួយស្ត្រីសម្រាលកូនបានលឿន

The post បន្ថយអាការចាញ់កូន រមួលក្រពើពេលពពោះ កុំរំលងផ្លែឈើទាំងនេះ appeared first on Kampuchea Thmey Daily.