១. ប្រតិបត្តិការរបស់ក្រុមហ៊ុន Singapore Airlines នៅកម្ពុជា

• ក្រុមហ៊ុន Singapore Airlines (SIA) បានផ្តើមបម្រើសេវាកម្មនៅប្រទេសកម្ពុជា ចាប់តាំងពីឆ្នាំ ១៩៩២ តាមរយៈម៉ាក SilkAir។ ឆ្នាំនេះ គឺជាឆ្នាំទី ៣៣ នៃការដំណើរការនៅទីផ្សារកម្ពុជា ហើយក៏ត្រូវគ្នាជាមួយខួប ៦០ ឆ្នាំនៃទំនាក់ទំនងការទូតរវាងសិង្ហបុរី និងកម្ពុជា។

• បច្ចុប្បន្ន SIA មានជើងហោះហើរ ២១ ដងក្នុងមួយសប្តាហ៍ពីភ្នំពេញទៅសិង្ហបុរី និងរហូតដល់ ១៤ ដងក្នុងមួយសប្តាហ៍ពីសៀមរាបទៅសិង្ហបុរី។ តាមរយៈទីស្នាក់ការកណ្ដាលនៅ សិង្ហបុរី អតិថិជនដែលហោះហើរពីកម្ពុជា អាចភ្ជាប់ដំណើរទៅកាន់គោលដៅជាង ១២៥ ទូទាំងពិភពលោក។

២. Singapore Airlines ផ្តល់បទពិសោធអាកាសចរណ៍លំដាប់ថ្នាក់ពិភពលោក

• ក្រុមហ៊ុន Singapore Airlines បន្តពង្រឹងជំហឧស្សាហកម្មរបស់ខ្លួន ដោយផ្ដោតសំខាន់ទៅលើគោលការ ៣ ធំៗ ដែលជាការប្តេជ្ញារបស់ប្រេន៖ (១) សេវាកម្មល្អឥតខ្ចោះ (Service Excellence) (២) ផលិតផលឈានមុខ (Product Leadership) និង (៣) ពង្រីកបណ្ដាញតំណភ្ជាប់ (Network Connectivity)។

• សេវាកម្មល្អឥតខ្ចោះ ៖ បន្តលើកកម្ពស់ស្តង់ដារនៃសេវាកម្ម ដោយផ្តល់បទពិសោធល្អបំផុតផ្ដើមពីមុនការហោះហើរ រហូតដល់ទីបញ្ចប់។ អ្នកដំណើរនឹងទទួលបានការស្វាគមន៍យ៉ាងកក់ក្ដៅស្របទៅតាមបែបបទវប្បធម៌អាស៊ី ដែលផ្ដល់នូវអារម្មណ៍មួយហាក់ដូចជាអ្នកមិនបាននៅឆ្ងាយេពីផ្ទះ។ បាហុនិកា និង បាហុនិកៈ របស់ SIA ទើបតែទទួលបានពាន “World’s Best Cabin Crew” ពី Skytrax ថ្មីៗ ក្នុងឆ្នាំ ២០២៥ នេះ។

លើសពីនេះ ដើម្បីបំពេញតម្រូវការអតិថិជន SIA ក៏កំពុងប្រើប្រាស់បច្ចេកវិទ្យា AI ដើម្បីវិភាគទិន្នន័យអ្នកដំណើរឱ្យ និងត្រឹមត្រូវជាងមុន។

• ផលិតផលឈានមុខ ៖ SIA បន្តវិនិយោគលើផលិតផលដែលមានបច្ចេកវិទ្យាទំនើបៗ និងមានគុណភាពខ្ពស់ ដើម្បីរក្សាជំហជាក្រុមហ៊ុនឈានមុខក្នុងវិស័យអាកាសចរណ៍។ បច្ចុប្បន្ន SIA ប្រើយន្តហោះជាច្រើនប្រភេទ រួមទាំង Airbus A350-900 ដែលដំណើរការនៅលើជើងហោះហើរពីភ្នំពេញទៅសិង្ហបុរី។ អ្នកដំណើរអាចរីករាយជាមួយនឹងប្រភេទកៅអី Business Class ដែលបទបែនបានតាមតម្រូវការ និងប្រភេទកៅអី Economy Class ដែលរចនាឡើងផ្តោតទៅលើផាសុកភាពអ្នកដំណើរ ភ្ជាប់ជាមួយនឹងខ្នើយបង្អែកសម្រាប់ទម្រក ដែលអាចបត់បានដល់ទៅ ៦ ទិស។

ការហោះហើរនេះក៏ផ្តល់ជូនបទពិសោធន៍អាហារដែលបានឆ្លងកាត់ការសម្រិតសម្រាំង និងប្រើប្រាស់ Wi-Fi ឥតគិតថ្លៃ។ នៅខែវិច្ឆិកា ឆ្នាំ ២០២៤ ក្រុមហ៊ុនបានប្រកាសផែនការដំឡើងកាប៊ីនជំនាន់ថ្មីសម្រាប់យន្តហោះ Airbus A350-900 ចំនួន ៤១ គ្រឿង សម្រាប់ការហោះហើររយៈពេលវែង (long-haul) និង រយៈចម្ងាយឆ្ងាយ (ultra-long-range)។ ការវិនិយោគជាង ១.១ ពាន់លានដុល្លារ ស៊ីង្ហបុរីនេះ គឺដើម្បីលើកកម្ពស់បទពិសោធការធ្វើដំណើរដែលទំនើប និងប្រណិតភាពសម្រាប់អតិថិជនទូទាំងបណ្តាញ។

• ពង្រីកបណ្ដាញតំណភ្ជាប់ ៖ អតិថិជនអាចជ្រើសរើសពីជើងហោះហើរចំនួន ៥ ក្នុងមួយថ្ងៃ ពីកម្ពុជាទៅសិង្ហបុរី ហើយអាចបន្តភ្ជាប់ដោយរលូនតាមទីស្នាក់ការកណ្ដាលនៅ សិង្ហបុរី ទៅកាន់គោលដៅនានាទូទាំងពិភពលោក។ ការផ្លាស់ប្តូរដោយងាយស្រួលនេះ អនុញ្ញាតឱ្យអ្នកដំណើរអាចបន្តទៅកាន់គោលដោទេសចរណ៍ពេញនិយមដូចជា អឺរ៉ុប អូស្ត្រាលី និងជប៉ុន។ ក្រុមហ៊ុន SIA នឹងបន្តពង្រីកបណ្តាញជើងហោះហើរ និងកែតម្រូវការផ្ដល់ជូនឱ្យសមទៅនឹងតម្រូវការទីផ្សារដែលកំពុងទាមទារ ព្រមទាំងស្វែងរកឱកាសដើម្បីរីកលូតលាស់ថ្មីៗ។

៣. Singapore Airlines ស្វាគមន៍ការសម្ពោធអាកាសយានដ្ឋានអន្តរជាតិតេជោ

• ការបើកប្រើអាកាសយានដ្ឋានអន្តរជាតិតេជោ (KTI) គឺជាជំហានដ៏សំខាន់មួយក្នុងការអភិវឌ្ឍហេដ្ឋារចនាសម្ព័ន្ធវិស័យអាកាសចរណ៍នៅកម្ពុជា ហើយក៏ជានិមិត្តសញ្ញាបញ្ជាក់ថា  កម្ពុជា កំពុងក្លាយជាគន្លងអាកាសចរណ៍សំខាន់ក្នុងតំបន់។ អាកាសយានដ្ឋានថ្មីនេះ នឹងអនុញ្ញាតឱ្យ Singapore Airlines ផ្តល់សេវាភ្ជាប់ដំណើរដោយរលូន ជម្រើសការហោះហើរច្រើនជាងមុន និងបទពិសោធធ្វើដំណើរលំដាប់ពិភពលោក សម្រាប់ធ្វើដំណើរទៅ  និងមកពីកម្ពុជា ព្រមទាំងឆ្ពោះទៅកាន់គោលដៅផ្សេងៗទៀតទូទាំងពិភពលោក។

• ការផ្ដល់បទពិសោធកម្រិតថ្មីទៅកាន់អតិថិជននៅអាកាសយានដ្ឋានថ្មីនេះ នឹងជួយជំរុញការខិតខំប្រឹងប្រែងរបស់ Singapore Airlines ក្នុងការភ្ជាប់អ្នកដំណើររវាងកម្ពុជា សិង្ហបុរី និងបណ្តាញគោលដៅទូទាំងសកលលោក។ អ្នកដំណើរអាចរំពឹងទុកនូវបទពិសោធការដំណើរដែលរលូនជាងមុន ដោយសារការកែលម្អហេដ្ឋារចនាសម្ព័ន្ធ រួមមាន ប្រព័ន្ធ Smart Gates និងការរួមបញ្ចូលគ្នារវាងស្ថាបត្យកម្មបែបប្រពៃណីខ្មែរ កាត់សម័យទំនើបនៅអាកាសយានដ្ឋានថ្មីនេះ។

• បន្ទាប់ពី Singapore Airlines ផ្លាស់ទីតាំងប្រតិបត្តិការទៅកាន់អាកាសយានដ្ឋានថ្មីនេះ យើងនៅតែប្តេជ្ញាចិត្តរក្សាស្តង់ដារសេវាកម្មកម្រិតខ្ពស់ ដែលអតិថិជនរំពឹងទុកពី Singapore Airlines។ ក្រុមហ៊ុននឹងធ្វើការជិតស្និទ្ធជាមួយអាជ្ញាធរអាកាសយានដ្ឋានអន្តរជាតិតេជោ ដើម្បីធានាថា ការផ្លាស់ប្តូរនេះមានភាពរលូន និងងាយស្រួលសម្រាប់អតិថិជន។

៤. ការប្រតិបត្តិការក្រុមហ៊ុនវិស្វកម្មរបស់ Singapore Airlines នៅកម្ពុជា (SIAEC)

• នៅខែកុម្ភៈ ឆ្នាំ ២០២៥ ក្រុមហ៊ុន SIA Engineering Company Limited (SIAEC) បានចុះហត្ថលេខាសហការជាមួយក្រុមហ៊ុន Cambodia Airport Investment Co., Ltd ដើម្បីបង្កើតសេវាកម្មថែទាំយន្តហោះនៅអាកាសយានដ្ឋានអន្តរជាតិតេជោ។ ការសហការនេះ មិនត្រឹមតែជួយទ្រទ្រង់ទីផ្សារអាកាសចរណ៍សម្រាប់អ្នកដំណើរ និងសារពើភ័ណ្ឌឱ្យកើនឡើងប៉ុណ្ណោះទេ ប៉ុន្តែវាក៏បង្ហាញពីគោលជំហរនៃការដាក់ចិត្តដើម្បីទទួលបានប្រតិបត្ដិការដែលរលូន និងការអភិវឌ្ឍក្នុងតំបន់ដោយក្រុម SIA Group ផងដែរ។

៥. ការប្តេជ្ញារបស់ Singapore Airlines ទៅលើការវិនិយោគនៅប្រទេសកម្ពុជា

• ប្រទេសកម្ពុជាបន្តជាទីផ្សារសំខាន់សម្រាប់យើងនៅតំបន់អាស៊ីអាគ្នេយ៍ ដោយមានកំណើនការលូតលាស់គួរឱ្យ កត់ សម្គាល់នៅក្នុងវិស័យអាកាសចរណ៍។ ក្រុមហ៊ុន SIA នឹងបន្តការតាំងចិត្តក្នុងការផ្តល់សេវាកម្មនៅក្នុងទីផ្សារមួយនេះ ហើយនឹងបន្តផ្តល់បទពិសោធការធ្វើដំណើរលំដាប់ថ្នាក់ពិភពលោក សម្រាប់អតិថិជនរបស់យើង៕

អត្ថបទពាណិជ្ជកម្ម

The post ក្រុមហ៊ុន Singapore Airlines បន្តប្តេជ្ញាចិត្តធ្វើដំណើរការនៅក្នុងទីផ្សារអាកាសចរណ៍កម្ពុជា appeared first on Kampuchea Thmey Daily.

 លោក Julien Nargeot អនុប្រធានក្រុមហ៊ុន Gulfstream Aerospace Corporation  បានបង្ហាញចំណាប់អារម្មណ៍ដូច្នេះ ក្នុងពេលសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព នារសៀលថ្ងៃទី១៦ ខែតុលា ឆ្នាំ២០២៤ ។

ក្នុងឱកាសនៃជំនួប លោក Julien Nargeot បានសម្ដែងនូវការកោតសរសើរចំពោះការអភិវឌ្ឍរីកចម្រើនយ៉ាងឆាប់រហ័សលើគ្រប់វិស័យនៅកម្ពុជា និងការចាប់អារម្មណ៍ចំពោះទីផ្សារអាកាសចរណ៍នៅកម្ពុជា។

លោក Julien Nargeot បានគោរពជម្រាបជូនសម្ដេចធិបតីថា ក្រុមហ៊ុន Gulfstream Aerospace Corporation គឺជាក្រុមហ៊ុនផ្ដល់សេវាហោះហើរឯកជនឈានមុខរបស់អាមេរិក ដោយផ្តោតលើការផ្តល់សេវាហោះហើរជាលក្ខណៈឯកជន សម្រាប់អ្នកដំណើរ និងធុរជន។

ជាការឆ្លើយតប សម្ដេចបវរធិបតីបានស្វាគមន៍ចំណាប់អារម្មណ៍របស់ក្រុមហ៊ុន ចំពោះទីផ្សារនៅកម្ពុជា។   សម្ដេចបវរធិបតីបានគូសបញ្ជាក់ថា តាមរយៈកំណើនសេដ្ឋកិច្ចប្រកបដោយភាពធន់ ក៏ដូចជាសម្ទុះនៃការអភិវឌ្ឍលើគ្រប់វិស័យរបស់កម្ពុជា ការធ្វើធុរកិច្ចក្នុងវិស័យអាកាសចរណ៍នៅកម្ពុជា នឹងផ្តល់ឱកាសដល់ក្រុមហ៊ុន ព្រោះទីផ្សារកម្ពុជាត្រូវបានផ្សារភ្ជាប់ជាមួយតំបន់ និងពិភពលោក។

 បន្ថែមលើនេះ សម្ដេចបវរធិបតីក៏បានលើកទឹកចិត្តឱ្យក្រុមហ៊ុនបន្តពិភាក្សាជាមួយក្រសួង ស្ថាប័ន និងដៃគូពាក់ព័ន្ធនានា ដើម្បីស្វែងយល់លម្អិតបន្ថែមអំពីសក្តានុពលនៃការវិនិយោគនៅក្នុងទីផ្សារអាកាសចរណ៍នៅកម្ពុជាផងដែរ៕

The post ក្រុមហ៊ុនសេវាហោះហើរឯកជនរបស់អាមេរិកបង្ហាញចំណាប់អារម្មណ៍ចំពោះទីផ្សារអាកាសចរណ៍កម្ពុជា appeared first on Kampuchea Thmey Daily.

លោក Hoyeon Chang, អគ្គនាយកនៃក្រុមហ៊ុនអាកាសចរណ៍ Korean Air​ ប្រចាំនៅកម្ពុជាបានថ្លែងមកប្រាក់កម្ពុជាថ្មីថា បច្ចុប្បន្ន Korean Air ហោះហើរជាប្រចាំថ្ងៃរវាងអាកាសយានដ្ឋានអន្តរជាតិ សេអ៊ុល-អ៊ីនឈុន (ICN) និងអាកាសយានដ្ឋានអន្តរជាតិភ្នំពេញ (PNH)។ ចំពោះផ្លូវហោះហើរនេះ ក្រុមហ៊ុនប្រើប្រាស់យន្តហោះ Airbus A330 ​ ដោយប្រើទាំងសម្រាប់ដឹកអ្នកដំណើរ និងដឹកទំនិញ។

លោកថា ជើង​ហោះ​ហើរ​ចេញ​ដំណើរ​ចេញ​ពី​ទីក្រុង​សេអ៊ូល-អ៊ីនឈុន នៅ​ម៉ោង ១៨:៤០ ម៉ោង​ក្នុង​ស្រុក ដោយ​មក​ដល់​ភ្នំពេញ​នៅ​ម៉ោង ២២ និង ១០ នាទី​ម៉ោង​ក្នុង​ស្រុក។ ជើង​ហោះ​ហើរ​ត្រឡប់​ចេញ​ពី​រាជធានី​ភ្នំពេញ​នៅ​ម៉ោង ២៣:៤០ ម៉ោង​ក្នុង​តំបន់ ​​ចុះចត​នៅព្រលានយន្តហោះ សេអ៊ូល-អ៊ីនឈុន នៅ​ម៉ោង ០៧:០០ ម៉ោង​ក្នុង​ថ្ងៃ​បន្ទាប់។ កាលវិភាគនេះត្រូវបានរៀបចំឡើងដើម្បីបង្កើនប្រសិទ្ធភាពការតភ្ជាប់សម្រាប់អ្នកដំណើររបស់យើង និងបង្កើនប្រសិទ្ធភាពប្រតិបត្តិការ។ ម៉ោងហោះហើរអាចផ្លាស់ប្តូរដោយផ្អែកលើតម្រូវការប្រតិបត្តិការ និងការកែតម្រូវតាមរដូវកាល។

លោកបានលើកឡើងថា​​ ក្នុងរយៈពេល៨ខែកន្លងមកនេះ ក្រុមហ៊ុនអាកាសចរណ៍ Korean Air បានសង្កេត​ចរាចរណ៍អ្នកដំណើរមានកំណើនខ្ពស់លើជើងហោះហើររវាងកូរ៉េខាងត្បូង និងកម្ពុជា។​ ក្រមហ៊ុនទទួលបានកំណើនប្រចាំឆ្នាំគឺ២១%  បើ​ធ្វើការប្រៀបធៀបទៅនឹងឆ្នាំ២០១៩​កើនឡើងខ្ពស់ជាង៤៣%​។

លោកបានថ្លែងបន្តទៀតថា៖«តួលេខទាំងនេះបង្ហាញពីការងើបឡើងវិញ និងកំណើនដ៏រឹងមាំនៅលើជើងហោះហើរកូរ៉េ-កម្ពុជា ដែលលើសពីកម្រិតមុនការរាតត្បាត។ ចំនួន​អ្នក​ដំណើរ​ពី​កូរ៉េ​មក​ភ្នំពេញ​ខ្ពស់​ជាង​បើ​ធៀប​នឹង​ទិសដៅពី​កម្ពុជាទៅកូរ៉េ។ យើងសង្កេតឃើញថាប្រទេសកម្ពុជាមានបេតិកភណ្ឌវប្បធម៌ និងតំបន់ប្រវត្តិសាស្ត្រដ៏សម្បូរបែបនៅតែបន្តទាក់ទាញភ្ញៀវទេសចរកូរ៉េ ហើយយើងក៏ឃើញការកើនឡើងនៃអ្នកដំណើរដែលឆ្លងកាត់ព្រលានយន្តហោះអ៊ិនឈនជាចំណុចឆ្លងកាត់ដើម្បីភ្ជាប់ទៅកាន់គោលដៅផ្សេងទៀតនៅក្នុងបណ្តាញហោះហើររបស់យើង ដោយវាបញ្ជាក់ពីសារៈសំខាន់ជាយុទ្ធសាស្ត្រនៃផ្លូវហោះហើរនេះ»។

លោកថា​បច្ចុប្បន្ន ក្រុមហ៊ុនអាកាសចរណ៍ Korean Air បន្តវាយតម្លៃលក្ខខណ្ឌទីផ្សារ និងតម្រូវការអ្នកដំណើរ ដើម្បីបង្កើនប្រសិទ្ធភាពលើបណ្តាញហោះហើររបស់ខ្លួន។ លោកថា៖«យើងវាយតម្លៃជាប្រចាំនូវឱកាសដើម្បីបង្កើនសេវាកម្មរបស់យើង ដោយផ្អែកលើនិន្នាការនៃការធ្វើដំណើរ និងការពិចារណាលើប្រតិបត្តិការ។ យើងនឹងចែករំលែកព័ត៌មានថ្មីៗសម្រាប់រដូវកាលខាងមុខ ថាតើពេលវេលាសមស្របពេលណានោះ»។

នៅក្នុងរយៈពេល ៨ ខែឆ្នាំ ២០២៤ (មករា-សីហា) កម្ពុជាទទួលបានភ្ញៀវអន្តរ​ជាតិសរុប​ចំនួន​ជាង​ ៤,២៩ លាននាក់ (៤ ២៩១ ០៥៨) មានការកើនឡើង ២២,៥ ភាគរយ បើធៀបនឹង​រយៈ​ពេល​ដូចគ្នាក្នុងឆ្នាំ ២០២៣ ដែលមានចំនួន ៣,៥ លាននាក់។

យោងតាមក្រសួងទេសចរណ៍ ក្នុងចំណោមទេសចរអន្តរជាតិជាង ៤,២៩ លាននាក់ថៃឈរនៅ​លំដាប់​លេខ​រៀងទី ១ មានចំនួន ១ ៣៤០ ៧៥០ នាក់ កើន ១៣% វៀតណាមចំនួន ៨៦៨ ៤៤៥ កើន ៣៥,៣% ចិន ៥៣៨ ៨៣៤ កើន ៤៧,៧% ឡាវ ២៤២ ១០៤ កើន ១៣,៧% និង​អា​មេរិក ១៤០ ៨៥៧ កើនឡើង ១៧,៧%៕

The post Korean Air នឹងបង្កើនជើងហោះហើរមកកម្ពុជា ខណៈមានការកើនឡើងខ្លាំងនៃអ្នកដំណើរ appeared first on Kampuchea Thmey Daily.

ភ្នំពេញ៖ ក្រុមហ៊ុនអាកាសចរណ៍ អ៊ែរ អេស៊ា បានអបអរការទទួលជ័យជម្នះចំនួនពីរផ្ទួនគ្នាក្នុងពិធីប្រគល់ពានរង្វាន់គោលដៅទេសចរណ៍ពិភពលោកប្រចាំទ្វីបអាស៊ី និងអូសេអានី World Travel Awards Asia and Oceania 2024  នៅទីក្រុងម៉ានីលកាលពីយប់មិញនេះ ដោយត្រូវបានទទួលស្គាល់ថាជាក្រុមហ៊ុនអាកាសចរណ៍ដែលមានតម្លៃទាបបំផុតឈានមុខគេនៅតំបន់អាស៊ីក្នុងរយៈពេល 9 ឆ្នាំជាប់ៗគ្នា និងជាក្រុមហ៊ុនអាកាសចរណ៍ដែលមានសេវាបដិសណ្ឋារកិច្ចលើយន្តហោះល្អក្នុងតម្លៃទាបបំផុតឈានមុខគេនៅតំបន់អាស៊ីក្នុងរយៈពេលប្រាំបីឆ្នាំជាប់ៗគ្នាផងដែរ។

ភាពឈានមុខគេរបស់ក្រុមហ៊ុន អ៊ែរ អេស៊ា ក្នុងប្រភេទធំៗពីរត្រូវបានលេចឡើងម្តងហើយម្ដងទៀត ដែលធ្វើឡើងដោយឆ្លងកាត់ដំណាក់កាលបោះឆ្នោតជ្រើសរើសពីសំណាក់អតិថិជន ស្ថានប័នឧស្សាហកម្មអាកាសចរណ៍ និង​ភ្ញៀវទេសចរណ៍រាប់លានអ្នកទូទាំងតំបន់​។

យោងតាមកំណត់ត្រារយៈពេល 23 ឆ្នាំរបស់ខ្លួននៃកិច្ចប្រតិបត្តិការពហុមជ្ឈមណ្ឌលបណ្ដាញផ្លូវអាកាសដែលវិវត្ដក្នុងតំបន់អាស៊ី ក្រុមហ៊ុន អ៊ែរ អេស៊ា​ បន្តផ្តល់នូវការកែលម្អតាមបទពិសោធរបស់អតិថិជន ដោយស្របតាមការប្ដេជ្ញារបស់ខ្លួនក្នុងការផ្ដល់ជូននូវជម្រើសនៃការធ្វើដំណើរក្នុងតម្លៃទាបបំផុត។​ តាមរយៈការកែលម្អជាបន្តបន្ទាប់សម្រាប់ដំណើរការកក់​​ ចំណុចទំនាក់ទំនងការធ្វើដំណើរ ក៏ដូចជាសេវាកម្មសម្បូរដ៏បែបចម្រុះច្រើនមុខទៀតប្រកបដោយភាពច្នៃប្រឌិតដើម្បីតម្រូវដល់ភាពងាយស្រួលសម្រាប់អតិថិជន ក្រុមហ៊ុនអាកាសចរណ៍ អ៊ែរ អេស៊ា ធានាទាំងការផ្ដល់នូវតម្លៃដ៏សមរម្យបំផុត និងគុណភាពខ្ពស់ដើរទន្ទឹមគ្នា។​​

ចំពោះការបើកដំណើរការឡើងវិញ និងគម្រោងបើកដំណើរការប្រើប្រាស់នូវកងនាវាអាកាសចរណ៍របស់ខ្លួននាពេលខាងមុខនេះ នឹងមិនត្រឹមតែអាចនាំឱ្យក្រុមហ៊ុន AirAsia ស្វែងរកទិសដៅថ្មីៗប៉ុណ្ណោះទេ ថែមទាំងអាចពង្រីកផ្លូវហោះហើរដោយឆ្លងកាត់ទ្វីបផ្សេងៗគ្នាផងដែរ នេះជាការពិតជាក់ស្ដែងដូចនឹងការផ្ដល់ជូននូវតម្លៃដ៏សមរម្យបច្ចុប្បន្ននេះដែរ។

លោក Bo Lingam ដែលជានាយកប្រតិបត្តិនៃក្រុមហ៊ុនអាកាសចរណ៍ AirAsia Aviation Group Limited បានលើកឡើងថា​ ” វាពិតជាពានរង្វាន់ដ៏អស្ចារ្យមួយនឹកស្មានមិនដល់ ដែលត្រូវបានទទួលស្គាល់ដោយអ្នកបោះឆ្នោតជាច្រើន ហើយបាននាំយើងឱ្យឈ្នះពានរង្វាន់នេះនៅក្នុងកម្មវិធីលំដាប់អន្ដរជាតិ World Travel Awards ដែលស្ដែងឱ្យឃើញពីការពេញចិត្តពេញថ្លើមពីសំណាក់ភ្ញៀវទេសចរណ៍របស់យើង។​ ដោយមានសន្ទុះភ្ញៀវទេសចរណ៍កើនឡើងយ៉ាងច្រើនកុះករជាង 800 លាននាក់ ចាប់តាំងពីថ្ងៃដំបូងទល់រហូតមកដល់សព្វថ្ងៃនេះ ដំណើរនៃភាពរីកចម្រើនរបស់យើងផ្អែកទៅលើការបង្កើតនូវភាពច្នៃប្រឌិតថ្មីៗ និងការកែលម្អតម្រូវសម្រាប់ភាពងាយស្រួល។

“នៅក្នុងឆ្នាំ 2024 យើងរំពឹងថានឹងដំណើរការជើងហោះហើរចំនួន 440, 000​ ។ ដោយសន្ទុះនៃការរីកលូតលាស់របស់យើងជាមួយនឹងយន្ដហោះ និងផ្លូវហោះហើរថ្មីៗនោះ គឺទទួលបានដោយការប្រកាន់ខ្ជាប់នូវគោលជំហរដ៏រឹងមាំនៃប្រតិបត្ដិការ និងយោងទៅតាមបទពិសោធរបស់អតិថិជនផ្ទាល់ ហើយក៏បានមកពីការស្ទង់មតិដោយផ្ដល់ពិន្ទុពីអ្នកផ្សព្វផ្សាយសុទ្ធសាធ ខណៈពេលដែលប្រតិបត្តិការហោះហើររបស់យើងបានពង្រីកច្រើនជាង 6 ដងមកហើយ ចាប់តាំងពីឆ្នាំ 2021 ។ “

“ពេលសម្លឹងឆ្ពោះទៅកាន់អនាគត យើងពិតជាមានក្ដីរំភើបរីករាយចំពោះផែនការរបស់យើងក្នុងការតភ្ជាប់ទៅកាន់ទ្វីបកាន់តែច្រើន ជាមួយនឹងការបន្ថែមជម្រើសជើងហោះហើរ បូករួមនឹងការផ្ដល់នូវតម្លៃដ៏សមរម្យ និងសេវាកម្មដ៏ល្អឥតខ្ចោះដល់ភ្ញៀវទេសចរណ៍របស់យើង  ដោយយើងអនុវត្តតាមគោលការណ៍និរន្ដរភាពយ៉ាងយកចិត្តទុកដាក់ក្នុងការប្រតិបត្តិការរបស់យើង។”

“យើងសូមអរគុណយ៉ាងជ្រាលជ្រៅដល់អ្នករៀបចំកម្មវិធី World Travel Awards ដៃគូឧស្សាហកម្មអាកាសចរណ៍របស់យើង​ទាំងអស់ និងភ្ញៀវទេសចរណ៍របស់យើងសម្រាប់ការជឿទុកចិត្ត និងការគាំទ្រ។ ពានរង្វាន់ទាំងនេះគឺជាសក្ខីភាពមួយដែលបញ្ជាក់ពីកិច្ចខិតខំប្រឹងប្រែរបស់ AirAsia Allstars ជាង 21,000 នាក់របស់យើង ដែលទទួលភ្ញៀវយ៉ាងចិត្តទុកដាក់ និងចាត់ទុកពួកគេជាវត្ថុដ៏មានតម្លៃលើសពីអ្វីៗទាំងអស់​ ហើយយើងនឹងនៅតែបន្ដវិវឌ្ឍឱ្យកាន់តែប្រសើរឡើងជានិច្ច។

Suhaila Hassan នាយកក្រុមហ៊ុន AirAsia Group of Cabin Crew បានបន្ថែមថា “ការផ្ដោតលើគោលការណ៍ប្រតិបត្ដិការដ៏ល្អឥតខ្ចោះរបស់យើងតាមរយៈការផ្ដល់នូវជើងហោះហើរក្នុងតម្លៃទាបនេះ បានជំរុញឱ្យមានផលប្រយោជន៍ច្រើនក្នុងការចំណាយដ៏សមរម្យបំផុត ស្របពេលយើងកំពុងបន្ដលើកកម្ពស់គុណភាពសេវាកម្មបន្ថែមផ្សេងៗទៀត។​ ជាមួយនឹងអ្នកបម្រើការលើយន្ដហោះ 5000 នាក់ ដែលជាអ្នកផ្ដល់សេវាកម្មដ៏មានជំនាញ និងឆ្លងកាត់បទពិសោធបម្រើភ្ញៀវលើយន្ដហោះរាប់លាននាក់ពីមួយឆ្នាំទៅមួយឆ្នាំ​ ក្រុមហ៊ុន អ៊ែរ អេស៊ា ក៏បានជាប់ឈ្មោះជាជម្រើសអាកាសចរណ៍ល្អជាងគេ ដែលមានសេវាបដិសណ្ឋារកិច្ចលើយន្តហោះល្អលើសពីតម្លៃដែលចំណាយ​នៅតំបន់អាស៊ីក្នុងរយៈពេល 8 ឆ្នាំជាប់ៗគ្នា នេះហើយដែលបញ្ជាក់ឱ្យឃើញពីការប្ដេជ្ញារបស់ពួកគេ​ និងជំរុញឱ្យយើងនៅតែបន្ដវិវឌ្ឍន៍ថែមមួយកម្រិតទៀត។​”

លោក Graham Cooke ស្ថាបនិក និងជាប្រធាននៃកម្មវិធីពានរង្វាន់គោលដៅទេសចរណ៍ពិភពលោក World Travel Awards ក៏បានមានប្រសាសន៍ផងដែរថា “ក្រុមហ៊ុន AirAsia នៅតែបន្តគ្រប់គ្រងពានរង្វាន់សម្រាប់សេវាកម្មជើងហោះហើរដែលមានតម្លៃទាបជាងគេនេះ។ សូមអបអរសាទរដល់ក្រុមហ៊ុន អ៊ែរ អេស៊ា ដែលបានធ្វើសម្រេចម្តងទៀតនៅក្នុងប្រភេទពានរង្វាន់សំខាន់ៗចំនួនពីរនៅទូទាំងទ្វីបអាស៊ី និងអាស៊ីប៉ាស៊ីហ្វិក។ ហើយយើងនឹងទន្ទឹមរង់ចាំមើលក្រុមហ៊ុន AirAsia Group នឹងលេចខ្ពស់ឡើងជាបន្តបន្ទាប់ក្នុងប៉ុន្មានឆ្នាំខាងមុខនេះ។”

គួរបញ្ជាក់ផងដែរថា៖ ក្រុមហ៊ុន Airline Group ក៏ត្រូវបានទទួលស្គាល់នៅក្នុងឆ្នាំ 2024 ថាជាក្រុមហ៊ុនអាកាសចរណ៍ដែលមានតម្លៃទាបបំផុតក្នុងពិភពលោករយៈពេល 15 ឆ្នាំជាប់ៗគ្នា ហើយត្រូវបានទទួលស្គាល់ថាជាអាកាសចរណ៍ដែលមានសុវត្ថិភាពជាងគេលើពិភពលោកក្នុងចំណោមក្រុមហ៊ុនអាកាសចរណ៍ដែលមានតម្លៃជើងហោះហើរទាបដទៃទៀត។

ជាមួយគ្នានេះដែរ ដោយស្របតាមកិច្ចខិតខំប្រឹងប្រែងដើរតាមគោលការណ៍និរន្ដរភាព ដោយរួមបញ្ចូលទាំងជាមួយកិច្ចសន្សំសំចៃលើការប្រើប្រាស់ប្រេងឥន្ធនៈក្នុងវិស័យឧស្សាហកម្មអាកាសចរណ៍របស់ខ្លួន ក្រុមហ៊ុន AirAsia ត្រូវបានឈរក្នុងចំណាត់ថ្នាក់របស់យុទ្ធនាការកិច្ចគាំពារដើម្បីនិរន្ដរភាពបរិស្ថាន Gold Environmental Sustainability  ដែលត្រូវបានវាយតម្លៃ និងត្រួតពិនិត្យរបាយការណ៍ដោយមជ្ឈមណ្ឌលអាកាសចរណ៍CAPA-Envest Global Airline Sustainability Benchmarking Report ក្នុងឆ្នាំ 2023 ។

កាន់តែពិសេសបំផុតនោះ ដើម្បីជាការអបអរជ័យជម្នះដ៏អស្ចារ្យនេះ ក្រុមហ៊ុន AirAsia នឹងផ្តល់ជូននូវតម្លៃប្រូម៉ូសិនសម្រាប់ជើងហោះហើរក្នុងស្រុកពីរាជធានីភ្នំពេញទៅខេត្តសៀមរាប ព្រមទាំងជើងហោះហើរអន្តរជាតិពីរាជធានីភ្នំពេញទៅកូឡាឡាំពួរក្នុងតម្លៃចាប់ពី 49 ដុល្លារក្នុងមួយជើង។ សម្រាប់ជើងហោះហើរទាំងអស់ អ្នកអាចកក់បានចាប់ពីថ្ងៃនេះរហូតដល់ថ្ងៃទី 08 ខែកញ្ញា ឆ្នាំ 2024 តាមរយៈកម្មវិធីទូរស័ព្ទដៃ AirAsia MOVE (អតីត airasia Superapp) និងគេហទំព័រ airasia.com ចំពោះការធ្វើដំណើរចាប់ពីថ្ងៃទី 17 ខែកុម្ភៈ ឆ្នាំ 2025 ដល់ថ្ងៃទី 31 ខែមករា ឆ្នាំ 2026។

** តម្លៃសំបុត្រហោះហើរក្នុងមួយជើង បានរួមបញ្ចូលទាំងពន្ធអាកាសយានដ្ឋាន ថ្លៃបន្ថែមប្រេង និងថ្លៃសេវាកម្មផ្សេងៗតាមការអនុវត្ត។​

លក្ខខណ្ឌផ្សេងៗត្រូវបានអនុវត្ត។

The post ក្រុមហ៊ុន អ៊ែរ អេស៊ា នៅតែបន្តឈានមុខគេជាមួយនឹងតម្លៃជើងហោះហើរដ៏សមរម្យបំផុត ដោយបានឈ្នះពានរង្វាន់ក្នុងកម្មវិធី World Travel Awards Asia appeared first on Kampuchea Thmey Daily.

អ្នកឧកញ្ញ៉ា គិត ម៉េងប្រធានក្រុមហ៊ុន រ៉ូយ៉ាល់គ្រុបថ្លែងថា ការដាក់ឱ្យដំណើការនៃក្រុមហ៊ុន CamJets រ៉ូយ៉ាល់គ្រុបធ្វើឡើងកាលពីថ្ងៃទី២១ ខែសីហា ឆ្នាំ២០២៤ នៅអាកាសយានដ្ឋានអន្តរជាតិភ្នំពេញ ​។

អ្នកឧកញ្ញ៉ា គិត ម៉េងបានថ្លែងថា៖«CamJets រ៉ូយ៉ាល់គ្រុប នឹងកំណត់ឡើងវិញនូវភាពប្រណីតជាមួយនឹងសេវាកម្មយន្តហោះឯកជនផ្តាច់មុខ ដែលរៀបចំឡើងសម្រាប់អ្នកធ្វើដំណើរប្រកបដោយការយល់ដឹង ដែលរំពឹងថានឹងទទួលបានសេវាកម្មល្អឥតខ្ចោះ»។

«ចាប់ពីពេលដែលអតិថិជនឡើងលើយន្តហោះទំនើបបំផុតនេះ អតិថិជននឹងទទួលបាននូវបទពិសោធដែលអតិថិជនមិនធ្លាប់ទទួលពីមុនមក។ CamJets រ៉ូយ៉ាល់គ្រុប ត្រូវបានបំពាក់ដោយផ្នែកខាងក្នុងដ៏ប្រណីត បច្ចេកវិទ្យាទំនើបទាន់សម័យ និងបរិក្ខារដែលអាចប្ដូរ តាមបំណងបានយ៉ាងពេញលេញ»។  នេះបើយោងតាមអ្នកឧកញ្ញ៉ា គិត ម៉េង។

លោកបានគូសបញ្ជាក់ទៀតថា ការបើកដំណើរការប្រតិបត្តិការហោះហើររបស់ក្រុមហ៊ុន CamJets រ៉ូយ៉ាល់គ្រុប នឹងផ្តល់នូវជម្រើសដ៏ធំទូលាយសម្រាប់អ្នកធ្វើដំណើរអាជីវកម្មដែលត្រូវការសេវាកម្មកម្រិតខ្ពស់សម្រាប់យន្តហោះឯកជន ក៏ដូចជាការរួមចំណែកក្នុងការអភិវឌ្ឍវិស័យអាកាសចរណ៍កម្ពុជាផងដែរ។

បើយោងតាមរបាយការណ៍ពីអាកាសចរណ៍ស៊ីវិលដែលកម្ពុជាថ្មីទទួលបាននៅព្រឹកថ្ងៃទី៩ខែសីហា ចំនួនអ្នកដំណើរចេញ-ចូល មានប្រមាណជាង ៣លាននាក់ (៣,០៣៦,៩៤៤ នាក់) ក្នុងនោះរួមមានអ្នកដំណើរអន្តរជាតិ(ក្រៅស្រុក) មានចំនួន ២,៨៨៤,៧៤៦នាក់ (ទ្វេទិស) ខណៈអ្នកដំណើរក្នុងស្រុក មានចំនួន ១៥២,១៩៨នាក់ (ទ្វេទិស)

ជាមួយគ្នានោះដែរ ​ចំនួនជើងហោះហើរ ចេញ-ចូល​ (ទ្វេទិស) អាកាសយានដ្ឋានអន្តរជាតិអន្តរជាតិទាំងបី(០៣) ​ ភ្នំពេញ-សៀមរាប-ព្រះសីហនុ) មាន ២៨,៧២៥ ជើង​។ ដោយក្នុងនោះជើងហោះហើរអន្តរជាតិ(ក្រៅស្រុក) មានចំនួន ២៥,៩១៧ ជើង (ទ្វេទិស) ខណៈជើងហោះក្នុងស្រុក មានចំនួន ២,៨០៨ ជើង (ទ្វេទិស) ដោយមិនរាប់បញ្ជូលការហោះហើររំលង និងការហោះហើរផ្សេងៗ៕

The post ក្រុមហ៊ុនរ៉ូយ៉ាល់គ្រុបបើកដំណើរការយន្តហោះឯកជនដើម្បីចាប់យកកំណើននៃកំណើនតម្រូវការលក្ខណៈឯកជន appeared first on Kampuchea Thmey Daily.

សេចក្តីព្រាងច្បាប់ខាងលើនេះ មាន៣មាត្រា។ រាជរដ្ឋាភិបាលបានរៀបចំសេចក្តីព្រាងច្បាប់នេះឡើង ស្របតាមអនុសញ្ញាស្តីពីឯកភាវូបនីយកម្មនៃវិធានមួយចំនួនពាក់ព័ន្ធនឹងការដឹកជញ្ជូនអន្តរជាតិតាមផ្លូវអាកាស ហៅថា អនុសញ្ញាម៉ុងរ៉េអាល់ឆ្នាំ១៩៩៩ ត្រូវបានចុះហត្ថលេខាកាលពីថ្ងៃទី២៨ ខែឧសភា ឆ្នាំ១៩៩៩ នៅទីក្រុងម៉ុងរ៉េអាល់ ប្រទេសកាណាដា នៅក្នុងឱកាសសន្និសីទអន្តរជាតិស្តីពីច្បាប់ដឹកជញ្ជូនតាមផ្លូវអាកាសពីថ្ងៃទី១០ ដល់ថ្ងៃទី២៨ ខែឧសភា​ ឆ្នាំ១៩៩៩ និងបានចូលជាធរមាននៅថ្ងៃទី៤ ខែវិច្ឆិកា​ ឆ្នាំ២០០៣។ បើគិតត្រឹមខែកក្កដា​ ឆ្នាំ២០២៣ រដ្ឋភាគីបានផ្តល់សច្ចាប័នរួចរាល់មានចំនួន ១៣៩ប្រទេសហើយ។

តាមការបញ្ជារបស់រដ្ឋសភា ការផ្តល់សច្ចាប័នអនុសញ្ញាម៉ុងរ៉េអាល់ឆ្នាំ១៩៩៩ កម្ពុជានឹងទទួលបានអត្ថប្រយោជន៍ដូចជា កិច្ចសហប្រតិបត្តិការល្អរបស់កម្ពុជាជាមួយអង្គការអាកាសចរណ៍ស៊ីវិលអន្តរជាតិ សមាគមដឹកជញ្ជូនតាមផ្លូវអាកាសអន្តរជាតិ និងដើម្បីលើកកម្ពស់កេរ្តិ៍ឈ្មោះកម្ពុជាលើឆាកអន្តរជាតិ​ និងបើកឱកាសកាន់តែច្រើនសម្រាប់កម្ពុជាក្នុងការចូលរួមដោយផ្ទាល់ទៅក្នុងយន្តការដឹកនាំរបស់អង្គការអាកាសចរណ៍ស៊ីវិលអន្តរជាតិ។ មួយវិញទៀត គឺការធានាជំរុញទាក់ ទាញវិនិយោគ​ និងកំណើនសេដ្ឋកិច្ច ទេសចរណ៍ ការងារ ចំនួនអ្នកធ្វើដំណើរតាមផ្លូវអាកាស ព្រមទាំងការតភ្ជាប់វប្បធម៌រវាងប្រជាជន​ និងប្រជាជន និងផ្តល់ទំនុកចិត្តកាន់តែខ្ពស់ដល់អ្នកធ្វើដំណើរតាមផ្លូវអាកាស​ និងសហគ្រាសដឹកជញ្ជូនអន្តរជាតិតាមផ្លូវអាកាសជាដើម។

សម័យប្រជុំពេញអង្គរដ្ឋសភា នាព្រឹកថ្ងៃនេះ បានពិភាក្សា​ និងអនុម័តសេចក្តីព្រាងច្បាប់មានសារៈសំខាន់នេះ មួយមាត្រាម្តងៗ និងបានអនុម័តជាឯកច្ឆន្ទលើសេចក្តីព្រាងច្បាប់ទាំងមូល។ ក្នុងនោះ ក៏មានតំណាងរាជរដ្ឋាភិបាល គឺរដ្ឋលេខាធិការដ្ឋានអាកាសចរណ៍ស៊ីវិល ដើម្បីការពារ និងបកស្រាយលើសេចក្ដីព្រាងច្បាប់នេះផងដែរ៕

The post រដ្ឋសភាអនុម័តសេចក្ដីព្រាងច្បាប់នៃអនុសញ្ញាស្ដីពីវិធានពាក់ព័ន្ធការដឹកជញ្ជូនអន្តរជាតិតាមផ្លូវអាកាស appeared first on Kampuchea Thmey Daily.

ដំណើរការជើងហោះហើរលេខ EK348 ដោយយន្តហោះ Boeing 777-300ER របស់ក្រុមហ៊ុនអាកាសចរណ៍បានមកដល់អាកាសយានដ្ឋានអន្តរជាតិភ្នំពេញនៅថ្ងៃទី០១ ខែឧសភា ហើយត្រូវបានស្វាគមន៍ដោយ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ជាមួយនឹងការសម្តែងរបាំប្រពៃណីខ្មែរ។

គណៈប្រតិភូជាន់ខ្ពស់របស់ក្រុមហ៊ុនអាកាសចរណ៍ Emirates អមដោយប្រព័ន្ធផ្សព្វផ្សាយអន្តរជាតិ ត្រូវបានទទួលស្វាគមន៍ដោយ លោក Cyril Girot នាយកប្រតិបត្តិក្រុមហ៊ុន អាកាសយានដ្ឋានកម្ពុជា។ គណៈប្រតិភូជាន់ខ្ពស់ត្រូវបានដឹកនាំដោយ លោក Nabil Sultan អនុប្រធានប្រតិបត្តិផ្នែកលក់ និងអ្នកគ្រប់គ្រងប្រចាំប្រទេសរបស់ក្រុមហ៊ុន Emirates និងលោក Orhan Abbas អនុប្រធានជាន់ខ្ពស់ផ្នែកប្រតិបត្តិការពាណិជ្ជកម្មតំបន់ចុងបូព៌ាសម្រាប់ក្រុមហ៊ុនអាកាសចរណ៍ Emirates និង លោក Mohammed Al Qassim អ្នកគ្រប់គ្រងប្រចាំប្រទេសកម្ពុជា។

លោក Nabil Sultan បានអត្ថាធិប្បាយលើប្រតិបត្តិការឡើងវិញរបស់ Emirates មកកាន់ទីក្រុងភ្នំពេញថា “បេតិកភណ្ឌវប្បធម៌ដ៏សំបូរបែប និងសេដ្ឋកិច្ចដែលកំពុងរីកចម្រើនរបស់កម្ពុជា ធ្វើឱ្យប្រទេសនេះក្លាយជាគោលដៅទាក់ទាញសម្រាប់ការធ្វើដំណើរកម្សាន្ត និងអាជីវកម្ម។ យើងពិតជារំភើបរីករាយណាស់សម្រាបផ្លូវហោះហើរដ៏ល្អនេះ ដើម្បីផ្សាភ្ជាប់ម្តងទៀតនូវបណ្តាញហោះហើរនៅតំបន់ចុងបូព៌ាដ៏ធំទូលាយរបស់យើងដែលមានស្រាប់។ តាមរយៈសេវាកម្មភ្ជាប់រវាងប្រទេសសិង្ហបុរី និងភ្នំពេញ យើងក៏អាចគាំទ្រសកម្មភាពពាណិជ្ជកម្ម និងពាណិជ្ជកម្មរវាងមជ្ឈមណ្ឌលក្នុងតំបន់ទាំងពីរ និងជួយសម្រួលដល់ការដឹកជញ្ជូនទំនិញនាំចូល និងនាំចេញដ៏ងាយស្រួលរវាងសិង្ហបុរី កម្ពុជា និង សហព័ន្ធអារ៉ាប់រួម ក៏ដូចជាទីផ្សារផ្សេងទៀតនៅក្នុងបណ្តាញសកលរបស់យើង”។

លោកបានបន្តថា “យើងសូមថ្លែងអំណរគុណដល់ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល និងអាជ្ញាធរមូលដ្ឋានក្នុងប្រទេសកម្ពុជាសម្រាប់ការគាំទ្ររបស់ពួកគេក្នុងការសម្រួលដល់ការវិលត្រឡប់នៃប្រតិបត្តិការរបស់យើងមកកាន់ទីក្រុងភ្នំពេញ ហើយទន្ទឹងរង់ចាំក្នុងការផ្តល់ជូននូវបទពិសោធន៍ទេសចរណ៍លំដាប់ពិភពលោកសម្រាប់អតិថិជន និងការជំរុញភ្ញៀវទេសចរកាន់តែច្រើនទៅកាន់ប្រទេសសិង្ហបុរី និងប្រទេសកម្ពុជា”។

លោក Cyril Girot នាយកប្រតិបត្តិក្រុមហ៊ុន អាកាសយានដ្ឋានកម្ពុជា បានមានប្រសាសន៍ថា “អាកាសយានដ្ឋានអន្តរជាតិភ្នំពេញបន្តកសាងបណ្តាញផ្លូវហោះហើរអន្តរជាតិរបស់ខ្លួនឡើងវិញ ខណៈដែលក្រុមហ៊ុនអាកាសចរណ៍ Emirates តភ្ជាប់ផ្លូវហោះហើររបស់ខ្លួនឡើងវិញជាមួយរាជធានីរបស់ព្រះរាជាណាចក្រកម្ពុជា។ នេះជាដំណឹងដ៏ល្អសម្រាប់អ្នកដំណើរដែលនឹងមានជម្រើសក្នុងការធ្វើដំណើរក្នុង និងក្រៅប្រទេសកាន់តែច្រើនដែលធ្វើឲ្យប្រសើរឡើងនូវបទពិសោធន៍ធ្វើដំណើររបស់ពួកគេបន្ថែមទៀត”។

នៅប្រទេសសិង្ហបុរី សេវាកម្មបន្ថែមថ្មីនេះ ត្រូវបានប្រារព្ធឡើងនៅក្នុងកន្លែងសម្រាកក្នុងអាកាសយានដ្ឋានដោយមានពិធីកាត់នំខេកនៅចំពោះមុខ ឯកឧត្តម Jamal Abdulla Mohammed Bin Abdulwahab AlSuwaidi, ឯកអគ្គរដ្ឋទូតសហព័ន្ធអារ៉ាប់រួមប្រចាំប្រទេសសិង្ហបុរី, លោក វី សាមឌី លេខាទីមួយស្ថានទូតកម្ពុជាប្រចាំប្រទេសសិង្ហបុរី, លោក Steven Ler ប្រធានសមាគមជាតិនៃភ្នាក់ងារទេសចរណ៍សិង្ហបុរី (NATAS)។ ជើងហោះហើរប្រចាំថ្ងៃរបស់ Emirates EK348 ចាកចេញពីទីក្រុងឌូបៃនៅម៉ោង០២:៣០ ហើយមកដល់សិង្ហបុរីនៅម៉ោង១៤:០៥។ បន្ទាប់មកជើងហោះហើរចេញដំណើរពីសិង្ហបុរីនៅម៉ោង ១៥:៣៥ និងមកដល់ភ្នំពេញនៅម៉ោង ១៦:៣៥។ ជើងហោះហើរ EK349 ត្រលប់មកវិញរបស់ Emirates ចាកចេញពីភ្នំពេញនៅម៉ោង ២០:៥០ ហើយមកដល់សិង្ហបុរីនៅម៉ោង ២៣:៥០។ បន្ទាប់មកជើងហោះហើរចេញដំណើរពីសិង្ហបុរីនៅម៉ោង០១:៤០ ថ្ងៃបន្ទាប់មកដល់ទីក្រុងឌូបៃនៅម៉ោង០៤:៥៥ ដែលពេលវេលាទាំងអស់គឺក្នុងស្រុក។

ជំរុញសកម្មភាពពាណិជ្ជកម្មពីប្រទេសកម្ពុជាជាមួយ Emirates SkyCargo

ក្នុងរយៈពេល២ ឆ្នាំចុងក្រោយនេះ ក្រុមហ៊ុន Emirates SkyCargo បានដឹកជញ្ជូនទំនិញ ២.៤២០ តោនទៅកាន់ និងពីទីក្រុងភ្នំពេញតាមរយៈផ្លូវគោក និងភាពជាដៃគូអន្តរបណ្តាញដោយផ្តល់នូវការតភ្ជាប់តាមរយៈប្រទេសថៃ និងម៉ាឡេស៊ីទៅកាន់បណ្តាញសកលដ៏ធំរបស់ក្រុមហ៊ុនអាកាសចរណ៍។ ជាមួយនឹងការបើកដំណើរការជើងហោះហើរប្រចាំថ្ងៃ ក្រុមហ៊ុន Emirates SkyCargo នឹងសម្រួលប្រតិបត្តិការ និងពង្រឹងទំនាក់ទំនងពាណិជ្ជកម្មរវាងកម្ពុជា និងពិភពលោកកាន់តែទូលំទូលាយជាមួយនឹងសមត្ថភាពដែលអាចផ្ទុកបាន៣០០ តោនក្នុងមួយសប្តាហ៍ទៅកាន់ទីផ្សារសំខាន់ៗ ដូចជា អារ៉ាប់រួម សហរដ្ឋអាមេរិក កាណាដា ហូឡង់ និងចក្រភពអង់គ្លេស។

ជាមួយនឹងការត្រៀមខ្លួនសម្រាប់កំណើនទីផ្សារគួរឱ្យកត់សម្គាល់ ក្រុមហ៊ុន Emirates SkyCargo នឹងគាំទ្រដល់អាជីវកម្មកម្ពុជាតាមរយៈការនាំចេញទំនិញរបស់ពួកគេទូទាំងពិភពលោកតាមរយៈមជ្ឈមណ្ឌលទំនើបបំផុតរបស់ខ្លួននៅទីក្រុងឌូបៃ។ ទំនិញដែលរំពឹងទុកសំខាន់ៗ រួមមានសម្លៀកបំពាក់ សម្លៀកបំពាក់ដែលផលិតរួចរាល់ ផ្លែឈើស្រស់ សាច់ និងសម្ភារៈ ផ្សេងទៀតដែលនឹងត្រូវដឹកជញ្ជូនយ៉ាងឆាប់រហ័ស ប្រកបដោយប្រសិទ្ធភាព និងអាចទុកចិត្តបានតាមរយៈផលិតផលឯកទេសពហុបញ្ឈររបស់ក្រុមហ៊ុនអាកាសចរណ៍។

បទពិសោធន៍ហោះហើរកាន់តែប្រសើររបស់ក្រុមហ៊ុនអាកាសចរណ៍ Emirates

ក្រុមហ៊ុនអាកាសចរណ៍ Emirates ដំណើរការយន្តហោះ Boeing 777-300ER ទំនើបរបស់ខ្លួនក្នុងការកំណត់រចនាសម្ព័ន្ធបីថ្នាក់ចំពោះជើងហោះហើរទៅកាន់ទីក្រុងភ្នំពេញដោយផ្តល់ជូននូវបន្ទប់ឯកជនចំនួន ៨ នៅក្នុង First Class, ៤២ កៅអីនៅក្នុង Business Class និង៣០៤ កៅអីធំទូលាយនៅក្នុង Economy Class។

អ្នកដំណើរដែលជិះយន្តហោះជាមួយ Emirates អាចរីករាយជាមួយនឹងបទពិសោធន៍ដ៏ល្អបំផុតនៅលើអាកាសជាមួយនឹងបទពិសោធន៍ម្ហូបដែលមិនអាចកាត់ថ្លៃបាន មុខម្ហូបក្នុងតំបន់ជាច្រើនដែលត្រូវបានចម្អិនដោយក្រុមមេចុងភៅដែលទទួលបានពានរង្វាន់ បំពេញបន្ថែមដោយជម្រើសជាច្រើននៃភេសជ្ជៈ។ អតិថិជនអាចអង្គុយសម្រាកលំហែកាយជាមួយនឹងមាតិកាជាង ៦.៥០០ នៃមាតិកាកម្សាន្តជាសកលដែលបានរៀបចំយ៉ាងលម្អិតជាង ៤០ ភាសា រួមទាំងភាពយន្ត កម្មវិធីទូរទស្សន៍ តន្ត្រី ផតខាស ហ្គេម សៀវភៅអូឌីយ៉ូ និងជាច្រើនទៀត ព្រមទាំងកម្មវិធីកម្សាន្តលើយន្តហោះដែលឈ្នះពានរង្វាន់របស់ Emirates ។

ក្រុមហ៊ុនអាកាសចរណ៍នេះ បានឈ្នះពានរង្វាន់ជាច្រើនក្នុងប្រវត្តិសាស្ត្រជោគជ័យរបស់ខ្លួន រួមទាំងក្រុមហ៊ុនអាកាសចរណ៍លំដាប់ពិភពលោក APEX ឆ្នាំ ២០២៤ សម្រាប់ការផ្តល់សេវាអតិថិជនឆ្នើម និងសម្រាប់ការបង្ហាញពីស្តង់ដារពិភពលោកខ្ពស់បំផុតនៃសុវត្ថិភាព និងសុខុមាលភាព និរន្តរភាព និងបទពិសោធន៍ដែលភ្ញៀវទទួលបាន។ ឧបករណ៍គ្រឿងបរិក្ខារប្រកបដោយនិរន្តរភាពនៃ Economy Class របស់ Emirates ក៏ទទួលបានពានរង្វាន់ IFSA ឆ្នាំ ២០២៤ សម្រាប់ ‘Best Onboard Amenity’ ផងដែរ៕

The post ក្រុមហ៊ុនអាកាសចរណ៍ Emirates ដំណើរការជើងហោះហើរមកទីក្រុងភ្នំពេញឡើងវិញ appeared first on Kampuchea Thmey Daily.

យោងតាមរបាយការណ៍ប្រចាំឆ្នាំរបស់សមាគមខាងលើដែលផ្សាយដោយ AFP, ឆ្នាំមុន មានគ្រោះថ្នាក់ធ្ងន់ធ្ងរតែមួយលើកប៉ុណ្ណោះ នោះគឺហេតុការណ៍ធ្លាក់យន្តហោះដឹកអ្នកដំណើរ ATR turboprop ដែលដំណើរការដោយក្រុមហ៊ុនអាកាសចរណ៍ Yeti របស់ប្រទេសនេប៉ាល់ ដោយបានសម្លាប់មនុស្សចំនួន៧២នាក់។

IATA អះអាងថា ខ្លួនបានរាប់ឧបទ្ទវហេតុចំនួន២៩លើកផ្សេងទៀតក្នុងឆ្នាំដដែលនោះ ប៉ុន្តែមិនមានអ្នកស្លាប់ឬខូចយន្តហោះអ្វីទេ។ 

បើងាកទៅមើល​ឆ្នាំ​២០២២ឯណោះវិញ មានគ្រោះ​ថ្នាក់​កើត​ឡើង​សរុប​៤២​លើក ហើយក្នុង​នោះ​មានហេតុការណ៍សាហាវចំនួន៥លើក ដែលឆក់យកជីវិតមនុស្ស១៥៨នាក់។

តាមរបាយការណ៍របស់ IATA, ឆ្នាំ២០២៣ មានហានិភ័យនៃការស្លាប់និងគ្រោះថ្នាក់ទាបបំផុត មិនធ្លាប់ជួបក្នុងកំណត់ត្រា។ អត្រាធ្លាក់ទាបនេះត្រូវបានគេកត់ត្រា ថ្វីបើចំនួនជើងហោះហើរកាលពីឆ្នាំមុនបានស្ទុះឡើង១៧% ស្មើនឹង៣៧.៧លានជើងក៏ដោយ។

លោក Willie Walsh អគ្គនាយក IATA និយាយថា “ត្បិតអីការហោះហើរគឺជាជម្រើសមានសុវត្ថិភាពបំផុតមួយរបស់អ្នកដំណើរក៏ដោយ ប៉ុន្តែវាតែងតែមានចំណុចត្រូវកែលម្អ ខណៈដើមឆ្នាំ២០២៤នេះ ហាក់មានហេតុការណ៍កើតឡើងផ្ទួនៗគួរឲ្យកត់សម្គាល់ តួយ៉ាងដូចជាករណីឆេះយន្តហោះនៅទីក្រុងតូក្យូប្រទេសជប៉ុន ជាដើម”។

សូមបញ្ជាក់ថា IATA តំណាងឲ្យក្រុមហ៊ុនអាកាសចរណ៍ចំនួន៣២០ ដែលរួមចំណែក៨៣%នៃចរាចរណ៍ផ្លូវអាកាសទូទាំងពិភពលោក ហើយស្ថិតិរបស់ IATA មិនរាប់ជើងហោះហើរអាជីវកម្ម យោធា និងឯកជនឡើយ៕

អត្ថបទ៖ សុខ សុវណ្ណ

ចុចអាន៖ ភាពតានតឹងនៃវិស័យអាកាសចរណ៍នៅអ៊ឺរ៉ុប កំពុងផ្ទុះឡើង

The post ២០២៣ ជាឆ្នាំសុខសាន្តបំផុត សម្រាប់វិស័យអាកាសចរណ៍ពិភពលោក appeared first on Kampuchea Thmey Daily.