កម្មវិធីពិព័រណ៍នេះ រៀបចំរយៈពេល ៤ថ្ងៃ ពីថ្ងៃទី២០ ដល់ថ្ងៃទី២៣ ខែឧសភា ឆ្នាំ២០២៦ នៅមជ្ឈមណ្ឌលធនធាននៃអង្គជំនុំជម្រះ​វិសាមញ្ញក្នុងតុលាការកម្ពុជា (អ.វ.ត.ក.) ចាប់ពីម៉ោង ៩ព្រឹក ដល់ម៉ោង ៨យប់។

លោក ក្រាញ់ តូនី បានថ្លែងក្នុងពិធីបើកពិព័រណ៍ នារសៀលថ្ងៃទី២០ ខែឧសភា ថា ការរៀបចំការតាំងពិព័រណ៍សំណងនៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា នេះឡើង គឺដើម្បីបង្ហាញពីសិទ្ធិក្នុងការទាមទារសំណង លើកតម្លៃបទពិសោធ និងតម្រូវការរបស់ដើម្បបណ្តឹងរដ្ឋប្បវេណី និងអ្នករស់រានមានជីវិតក្នុងដំណើរការស្វែងរកយុត្តិធម៌ និងលើកទឹកចិត្តឱ្យមានការបង្កើតភាពជាដៃគូ និងការប្តេជ្ញាចិត្តបន្តដោះស្រាយតម្រូវការរបស់ជនរងគ្រោះនាពេលអនាគត។ ចំណែក ការតាំងពិព័រណ៍សៀវភៅវិញ លោកថា ធ្វើឡើងដើម្បីចូលរួមរម្លឹកដល់ការចងចាំពីព្រឹត្តិការណ៍ក្នុងរបបខ្មែរក្រហម បង្ហាញពីការរួមចំណែករបស់ អ.វ.ត.ក ក្នុងដំណើរការស្វែងរកយុត្តិធម៌ ការផ្សះផ្សារជាតិ ការថែរក្សាសន្តិភាព និងការចងចាំ។

លោក ក្រាញ់ តូនី សង្កត់ធ្ងន់ថា៖ “ព្រឹត្តិការណ៍នេះ ពិតជាមានសារៈសំខាន់ណាស់សម្រាប់យុវជនជំនាន់ក្រោយ ក្នុងការស្រាវជ្រាវ និងអានសៀវភៅ ការទស្សនាការតាំងពិព័រណ៍ ដើម្បីយល់ដឹងពីប្រវត្តិសាស្ត្រ និងអត្តសញ្ញាណរបស់ខ្លួន”។ លោក ក៏បានបន្ថែមទៀតថា៖ “ទោះបីជាយ៉ាងនេះក្តី ក៏នៅមានសំណើ និងតម្រូវការរបស់ជនរងគ្រោះ ឬដើមបណ្តឹងរដ្ឋប្បវេណីមួយចំនួនទៀតមិនទាន់ត្រូវបានដោះស្រាយបាននៅឡើយ។ ដូច្នេះ តាមរយៈការតាំងពិព័រណ៍នៅថ្ងៃនេះ ខ្ញុំសង្ឃឹមថា អង្គការដៃគូជាតិ និងអន្តរជាតិ ម្ចាស់ជំនួយ និងរាជរដ្ឋាភិបាល នឹងបន្តជួយគាំទ្រដល់ពួកគាត់”។

ពិព័រណ៍នេះ មានការចូលរួមពីស្ថាប័នបោះពុម្ពផ្សាយ អង្គការអប់រំ បណ្ណាល័យ និងអង្គការដៃគូជាច្រើន តាមរយៈស្តង់ពិព័រណ៍ចំនួន៤០ស្តង់ ក្នុងនោះក៏មានស្តង់សម្រាប់ដើមបណ្តឹងរដ្ឋប្បវេណីផងដែរ។ ការតាំងបង្ហាញសៀវភៅ គឺពាក់ព័ន្ធនឹងប្រវត្តិសាស្ត្រ អក្សរសាស្ត្រ សិទ្ធិមនុស្ស សន្តិភាព សៀវភៅសម្រាប់កុមារ និងឯកសារអប់រំផ្សេងៗ។ ជាមួយគ្នានេះ ពិព័រណ៍រយៈពេល ៤ថ្ងៃ នឹងមានការពិភាក្សាឬកិច្ចសន្ទនាអន្តរជំនាន់ជាមួយភ្ញៀវកិត្តិយស រួមមាន  លោក ខៀវ កាញារីទ្ធ,  លោក ព្រុំ សុខា , លោកស្រី ប៉ុក ណណ្តា ​(Pok Nanda) និងលោកស្រី សុភីលីន ជាម សាភីរ៉ូ, (Sophiline Cheam Shapiro) ព្រមទាំងមានការចាក់បញ្ចាំងខ្សែភាពយន្តពាក់ព័ន្ធសម័យខ្មែរក្រហម ដែលបានផលិត និងដឹកនាំដោយបញ្ញវ័ន្តខ្មែរ និងអ្នកមានស្នាដៃល្បីទៀតផង។ នេះ បើតាមការបញ្ជាក់របស់ លោក ក្រាញ់ តូនី៕

The post លោក ក្រាញ់ តូនី៖ ពិព័រណ៍ក្នុងឱកាសទិវាជាតិនៃការចងចាំមិនត្រឹមរម្លឹកដល់ជនរងគ្រោះក្នុងរបបខ្មែរក្រហមទេ ក៏អប់រំដល់យុវជនជំនាន់ក្រោយ appeared first on Kampuchea Thmey Daily.

ពិព័រណ៍ រៀបចំឡើងដោយមានគោលបំណង ៦។ ទី១ ដើម្បីបង្ហាញអំពីសិទ្ធិទទួលបានសំណង និងការវិវត្តរបស់គម្រោងសំណងនៅក្នុងបរិបទរបស់ អ.វ.ត.ក.។ ទី២ នាំឱ្យមានការយល់ដឹងច្បាស់លាស់និងងាយស្រួលអំពីប្រព័ន្ធសំណងរបស់ អ.វ.ត.ក. ចាប់ពី​ដំណាក់កាលដាក់ពាក្យរហូតដល់ការអនុវត្ត។ ទី៣ គោរព ផ្ដល់តម្លៃ សេចក្តីត្រូវការ និងសេចក្តីថ្លៃថ្នូររបស់ដើមបណ្តឹងរដ្ឋប្បវេណី និងជនរងគ្រោះ។ ទី៤ ជំរុញការឆ្លុះបញ្ចាំងប្រកបដោយស្ថាបនាអំពីសមិទ្ធផល ដែនកំណត់ និងឥទ្ធិពលនៃសំណងដែលតុលាការបានផ្តល់។ ទី៥ បង្ហាញពីគំនិតផ្តួចផ្តើមរបស់អង្គការសង្គមស៊ីវិល ដែលបន្តគាំទ្រជនរងគ្រោះលើសពីក្របខណ្ឌយុត្តិធម៌របស់ អ.វ.ត.ក. និងទី៦ ជំរុញភាពជាដៃគូ គំនិតថ្មីៗ និងការប្តេជ្ញាចិត្តសម្រាប់ស្ថាប័នកេរដំណែក អ.វ.ត.ក. នាពេលអនាគត។

សម្រាប់ពិព័រណ៍សំណងនៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា នឹងដាក់តាំងបង្ហាញអំពីគម្រោងសំណងនៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជានៅក្នុងបរិវេណនៃមជ្ឈមណ្ឌលធនធាន អ.វ.ត.ក. តាមរយៈរូបថត ឯកសារ សក្ខីកម្ម និងផ្ទាំងព័ត៌មានអប់រំផ្សេងៗ ដែលបង្ហាញពីដំណើរការនៃសំណង ចាប់ពីគោលការណ៍ រហូតដល់ការអនុវត្តជាក់ស្តែង និងផលទទួលបានពីសំណងទាំងនោះដល់ជនរងគ្រោះ និងក្នុងសង្គមទាំងមូល។

រីឯ ពិព័រណ៍សៀវភៅស្ដីពី “អក្សរសាស្ដ្រ ប្រវត្តិសាស្ដ្រដើម្បីការចងចាំ” ធ្វើឡើងដើម្បីរម្លឹកកដល់ការចងចាំពីព្រឹត្តការណ៍ក្នុងរបបខ្មែរក្រហម ក្នុងទិវានៃការចងចាំ២០ ឧសភា ឆ្នាំ២០២៦ ដែលផ្តោតសំខាន់ទៅលើសៀវភៅប្រវត្តិសាស្រ្ត សៀវភៅច្បាប់ និងប្រភេទសៀវភៅមួយចំនួនទៀត ដើម្បីបង្ហាញនូវការរួមចំណែករបស់ អ.វ.ត.ក.ដែលបានធ្វើការងារលើដំណើរការស្វែងរកយុត្តិធម៌ ការផ្សះផ្សា ការចងចាំ សន្តិភាព ដែលជាកេរដំណែលមិនអាចកាត់ថ្លៃបាន។ បន្ថែមពីនេះ ពិព័រណ៍នឹងមានស្ដង់ដាក់លក់និងចែកចាយសៀវភៅនិងឯកសារផ្សេងៗពាក់ព័ន្ធនឹងប្រវត្តិសាស្ត្រ ច្បាប់ យុត្តិធម៌អន្តរកាលនិងឯកសារអប់រំផ្សេងៗ ដោយមានការចូលរួមពីអ្នកនិពន្ធ បណ្ណាល័យ បណ្ណាគារ ស្ថាប័នអប់រំនិងសង្គមស៊ីវិល។ ក្រៅពីស្ដង់ពិព័រណ៍សៀវភៅ កម្មវិធីនេះក៏នឹងមានការធ្វើបទបង្ហាញ កិច្ចពិភាក្សា និងការចាក់បញ្ចាំងភាពយន្តឯកសារ ផងដែរ។

រយៈពេល ៤ថ្ងៃ នៃការរៀបចំពិព័រណ៍ រំពឹងថានឹងមានការចូលរួមពីជនរងគ្រោះ ដើមបណ្តឹងរដ្ឋប្បវេណី យុវជន អ្នកស្រាវជ្រាវ អង្គការសង្គមស៊ីវិល ដៃគូអភិវឌ្ឍន៍ និងសាធារណជនទូទៅ ដើម្បីរួមគ្នាឆ្លុះបញ្ចាំងអំពីសារៈសំខាន់នៃការចងចាំ ការទទួលខុសត្រូវ និងការផ្សះផ្សានៅក្នុងសង្គមកម្ពុជា៕

The post ស្អែកនេះ អង្គជំនុំជម្រះវិសាមញ្ញក្នុងតុលាការកម្ពុជា រៀបចំពិព័រណ៍សៀវភៅ ក្នុង​ឱកាសទិវាជាតិនៃការចងចាំ appeared first on Kampuchea Thmey Daily.

កញ្ញា នរៈ វត្តី ដែលមានវ័យ១៩ឆ្នាំ ជានិស្សិតផ្នែកច្បាប់ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានធ្វើទស្សនកិច្ចសិក្សានៅ អ.វ.ត.ក. ក្នុងនាមជាឯកអគ្គរដ្ឋទូតជំនួស ដើម្បីស្វែងយល់បន្ថែមអំពីការរួមចំណែកដ៏សំខាន់របស់សាលាក្តី ក្នុងការលើកកម្ពស់យុត្តិធម៌ ការទទួលខុសត្រូវ និងការកសាងសន្តិភាពនៅកម្ពុជា។

ក្រោយពីបានស្វែងយល់ពីសមាសភាគសំខាន់នៅក្នុងមជ្ឈមណ្ឌលធនធានរួចមក ឯកអគ្គរដ្ឋទូតជំនួសរូបនេះ បានជួបពិភាក្សាការងារមួយចំនួនជាមួយថ្នាក់ដឹកនាំអ.វ.ត.ក. ដែលមានវត្តមានលោក ហែម ក្រាញ់តូនី ប្រធានរដ្ឋបាលស្តីទីនៃ អ.វ.ត.ក. ដោយបានផ្តោតសំខាន់ទៅលើការគាំទ្ររបស់ប្រទេសអាល្លឺម៉ង់ តាមរយៈកម្មវិធី Civil Peace Service ទាក់ទងនឹងដំណើរការផ្លូវច្បាប់របស់ អ.វ.ត.ក. កេរដំណែល និងការអភិរក្សបណ្ណសារ ព្រមទាំងទស្សនវិស័យនាពេលអនាគតនៃយុត្តិធម៌អន្តរកាល។

ដំណើរទស្សនកិច្ចនេះ បានឆ្លុះបញ្ចាំងអំពីការប្តេជ្ញាចិត្តរួមរវាង អ.វ.ត.ក. និងស្ថានទូតអាល្លឺម៉ង់ ក៏ដូចជាអង្គការ Plan International Cambodia ក្នុងការលើកកម្ពស់សមភាពយេនឌ័រ ការពង្រឹងសមត្ថភាពយុវតីកម្ពុជាក្នុងភាពជាអ្នកដឹកនាំក្នុងវិស័យច្បាប់ ការទូត និងកិច្ចសហប្រតិបត្តិការអន្តរជាតិ។

អ.វ.ត.ក. បានបង្ហាញក្ដីមោទនភាពក្នុងការគាំទ្រគំនិតផ្តួចផ្តើមនានា ដែលជំរុញការចូលរួមរបស់យុវជន ភាពជាអ្នកដឹកនាំរបស់ស្ត្រី និងឱកាសស្មើភាពសម្រាប់មនុស្សគ្រប់រូប។

គួរបញ្ជាក់ថា យុទ្ធនាការ Girl Takeover បានគាំទ្រដល់យុវតីកម្ពុជា ឱ្យសម្រេចក្តីប្រាថ្នារបស់ពួកគេ ដោយបានផ្តល់នូវឱកាសឱ្យពួកគេបានបោះជំហានចូលក្នុងតួនាទីជាអ្នកដឹកនាំ និងទទួលបានបទពិសោធក្នុងការធ្វើសេចក្តីសម្រេចចិត្តដោយផ្ទាល់។ តាមរយៈការដើរតាមគន្លងអ្នកដឹកនាំ យុវតីកម្ពុជា នឹងបានឃើញពីរបៀប ដែលឯកអគ្គរដ្ឋទូតដោះស្រាយបញ្ហាប្រឈម ទំនាក់ទំនងប្រកបដោយប្រសិទ្ធភាព និងការសម្រេចចិត្តនានា។

យុទ្ធនាការនេះ ក៏នឹងផ្តល់ឱកាសឱ្យយុវតីបង្កើតបណ្តាញទំនាក់ទំនងជាមួយអ្នកជំនាញ និងអ្នកដឹកនាំ ក្នុងដំណើរការងារពេញមួយថ្ងៃនេះ ហើយក៏បានជំរុញនឹងលើកទឹកចិត្តយុវតីឱ្យបន្តមានទំនុកចិត្តព្រមទាំងបានពង្រឹងភាពជាអ្នកដឹកនាំរបស់ពួកគេ៕

The post អ.វ.ត.ក ស្វាគមន៍យុវតី នរៈ វត្តី ដែលជ្រើសឱ្យដើរតួជំនួសជាឯកអគ្គរដ្ឋទូតអាល្លឺម៉ង់ មួយថ្ងៃដើម្បីស្វែងយល់តួនាទីដ៏សំខាន់របស់សាលាក្តីនេះ appeared first on Kampuchea Thmey Daily.

ពិព័រណ៍ រៀបចំដើម្បីបញ្រ្ជាបការយល់ដឹងអំពីការរៀបការដោយបង្ខំ និងអំពើហិង្សាផ្លូវភេទក្នុងរបបខ្មែរក្រហម, ទទួលស្គាល់ការឈឺចាប់ ផ្តល់កិត្តិយស និងសេចក្តីថ្លៃថ្នូរដល់ជនរងគ្រោះ និងអ្នករស់រានមានជីវិតពីអំពើទាំងនេះ, លើកកម្ពស់ការយល់ដឹងអំពីការទទួលខុសត្រូវផ្នែកច្បាប់, លើកកម្ពស់ការផ្សះផ្សានិងការសះជាក្នុងសហគមន៍។ ពិព័រណ៌នេះ មានការចូលរួមសហការដោយក្រសួងកិច្ចការនារី សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងអង្គការដៃគូមួយចំនួនផងដែរ។

ចំពោះការការបើកពិព័រណ៍នឹងប្រព្រឹត្តទៅនៅមជ្ឈមណ្ឌលធនធាន អ.វ.ត.ក. ដោយបានចែកជា ២វគ្គ គឺវគ្គទី១ ក្រុមពិភាក្សា និងវគ្គទី២ ការប្រកាសបើកពិព័រណ៍ ព្រមទាំងមានការចូលរួមពី បណ្ឌិត ម៉ុង ឬទ្ធី សមាជិកព្រឹទ្ធសភាកម្ពុជា និងលោកស្រី អ៉ឹង កន្ថាផាវី រដ្ឋមន្ត្រីក្រសួងកិច្ចការនារីផងដែរ។

សម្រាប់កម្មវិធីតាំងពិព័រណ៍ នឹងមានបង្ហាញប្រធានបទសំខាន់ៗដូចជា ១.គោលនយោបាយ និងគោលបំណងនៃបក្សកុម្មុយនីស្តកម្ពុជា ពាក់ព័ន្ធនឹងអាពាហ៍ពិពាហ៍ដោយបង្ខំ។ ទី២. អនុវត្តគោលនយោបាយនេះទៅលើប្រជាជន និងការរកឃើញផ្នែកអង្គច្បាប់របស់ អ.វ.ត.ក. ចំពោះអំពើអមនុស្សធម៌តាមរយៈការរៀបអាពាហ៍ពិពាហ៍ដោយបង្ខំ និងអំពើហិង្សាផ្លូវភេទ ក្នុងបរិបទនៃការរៀបអាពាហ៍ពិពាហ៍ដោយបង្ខំ។ ៣. រឿងរ៉ាវ និងផលប៉ះពាល់នៃការរៀបអាពាហ៍ពិពាហ៍ដោយបង្ខំ និងការរំលោភផ្លូវភេទក្នុងបរិបទនៃការរៀបអាពាហ៍ពិពាហ៍ដោយបង្ខំទៅលើជនរងគ្រោះ។ ៤.ការទទួលខុសត្រូវរួម៖ រឿងរ៉ាវអំពីភាពរឹងមាំ យុត្តិធម៌អន្តរកាល និងការអំពាវនាវឱ្យអនុវត្តសកម្មភាពសម្រាប់ការការពារ និងការស្តារសេចក្តីថ្លៃថ្នូរពួកគាត់ឡើងវិញ។

បើតាម អ.វ.ត.ក. បញ្ជាក់ថា ការរៀបអាពាហ៍ពិពាហ៍ដោយបង្ខំក្នុងរបបខ្មែរក្រហម បានបំផ្លាញដល់ការរៀបអាពាហ៍ពិពាហ៍បែបប្រពៃណី និងបង្កើតបរិយាកាសនៃការភ័យខ្លាចទូលំទូលាយ ដែលការយល់ព្រមពិតប្រាកដមិនអាចធ្វើទៅបាន។ ទាំងស្ត្រី និងបុរស គឺជាជនរងគ្រោះនៃអាពាហ៍ពិពាហ៍ដោយបង្ខំ។ បន្ថែមពីនេះ ចំពោះករណីអាពាហ៍ពិពាហ៍ដោយបង្ខក្នុងរបបខ្មែរក្រហម ក៏ត្រូវបានស៊ើបអង្កេត និងជំនុំជម្រះនៅក្នុងសំណុំរឿង ០០២/០២ ផងដែរ៕

The post អង្គជំនុំជម្រះវិសាមញ្ញក្នុងតុលាការកម្ពុជា រៀបចំពិព័រណ៍ស្តីពីផលវិបាកនៃការរៀបការដោយបង្ខំ និងអំពើហិង្សាផ្លូវភេទក្នុងរបបខ្មែរក្រហម appeared first on Kampuchea Thmey Daily.

វិញ្ញាបនបត្រនេះបញ្ជាក់ពីការប្តេជ្ញាចិត្តរបស់ អ.វ.ត.ក. ដើម្បីរក្សានូវស្តង់ដារអន្តរជាតិក្នុងការថែរក្សាបណ្ណសារ ការអភិរក្ស និងគ្រប់គ្រង ការទទួលបានព័ត៌មាន និងការការពាររយៈពេលយូរអង្វែងនៃបណ្ណសារឯកសារតុលាការ និងពហុព័ត៌មាន។

ការទទួលបានវិញ្ញាបនបត្រស្តង់ដារ ISO នេះ លោក ក្រាញ់ តូនី រដ្ឋលេខាធិការនៃទីស្តីការគណៈរដ្ឋមន្រ្តី និងជាប្រធានរដ្ឋបាលស្តីទី អ.វ.ត.ក. បានលើកឡើងថា រឹតតែធ្វើឱ្យសាធារណជន ជនរងគ្រោះ និងមនុស្សជំនាន់ក្រោយ កាន់តែជឿជាក់លើបណ្ណសាររបស់ អ.វ.ត.ក. តាមរយៈការគ្រប់គ្រងប្រកបដោយសុចរិតភាព ភាពអាចប្រើប្រាស់បាន និងការអភិរក្សដែលមានស្តង់ដារខ្ពស់។

លោក ក្រាញ់ តូនី បន្ថែមថា «តាមរយៈវិញ្ញាបនបត្រនេះ អ.វ.ត.ក. កំពុងតែបង្កើតនូវគំរូថ្មីក្នុងការគ្រប់គ្រងបណ្ណសារនៅកម្ពុជា និងអន្តរជាតិ។ យើងប្តេជ្ញាចែករំលែកជំនាញនិងឧត្តមានុភាពរបស់យើង ការពង្រឹងស្តង់ដារបណ្ណសារដែលមានជំនាញវិជ្ជាជីវៈ និងរួមចំណែកដល់វប្បធម៌យុត្តិធម៌និងការចងចាំជាសាកល»។

បន្ទាប់ពីការបញ្ចប់ការងារតុលាការ រាជរដ្ឋាភិបាលកម្ពុជាបានប្តេជ្ញាចិត្តនឹងបន្តកេរដំណែលរបស់ អ.វ.ត.ក. តាមរយៈការបង្កើតឱ្យមានស្ថាប័នកេរដំណែលថ្មីមួយ ដែលផែនការរៀបចំស្ថាប័នសាធារណៈនេះកំពុងតែដំណើរការទៅមុខរួចហើយ ដែលក្នុងនោះបណ្ណសារជាសសរស្តម្ភដ៏សំខាន់មួយក្នុងចំណោមរចនាសម្ព័ន្ធថ្មីនោះ ធ្វើយ៉ាងណាធានាថាការងារថែរក្សានិងចែករំលែកឯកសារតុលាការរបស់ អ.វ.ត.ក. នឹងនៅតែជាការរួមចំណែកដល់យុត្តិធម៌ ការផ្សះផ្សា និងការទប់ស្កាត់អំពើប្រល័យពូជសាសន៍។

តាមលោក ក្រាញ់ តូនី បណ្ណសាររបស់ អ.វ.ត.ក. មិនត្រឹមតែជាឃ្លាំងផ្ទុកនូវឯកសារតុលាការពីការជំនុំជម្រះក្តីខ្មែរក្រហមប៉ុណ្ណោះទេ ប៉ុន្តែក៏ជាគ្រឹះនៃដំណើរនៃការទទួលខុសត្រូវផ្នែកព្រហ្មទណ្ឌរបស់កម្ពុជាផងដែរ។ បណ្ណសារនេះ ជាឃ្លាំងមានផ្ទុកឯកសារសំណុំរឿង សក្ខីកម្មរបស់ជនរងគ្រោះ និងវីដេអូសវនាការដ៏ទូលំទូលាយ៕

The post បណ្ណសារដែលផ្ទុកឯកសារនៃសាលាក្ដីខ្មែរក្រហមត្រូវបានទទួលស្គាល់ជាសកលនូវស្តង់ដារ ISO appeared first on Kampuchea Thmey Daily.

សហភាពសហព័ន្ធយុវជនកម្ពុជា (ស.ស.យ.ក.) និងអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃទី០៩ ខែកក្កដា នេះ បានចុះហត្ថលេខាលើអនុស្សរណៈនៃការយោគយល់គ្នា ដើម្បីចែករំលែកចំណេះដឹង បទពិសោធច្បាប់ និងសច្ចធម៌ប្រវត្តិសាស្រ្តនៃ របបកម្ពុជាប្រជាធិបតេយ្យពីអង្គជំនុំជំម្រះវិសាមញ្ញក្នុងតុលាការកម្ពុជា។

ពិធីចុះហត្ថលេខាប្រព្រឹត្តក្រោមអធិបតីភាពរបស់ លោក សុះ មុះសិន អនុប្រធានសហភាពសហព័ន្ធយុវជនកម្ពុជា និងជាតំណាងដ៏ខ្ពង់ខ្ពស់របស់ ប្រធានសហភាពសហព័ន្ធយុវជនកម្ពុជា ហ៊ុន ម៉ានី និង លោក ក្រាញ់ តូនី រដ្ឋលេខាធិការទីស្តីការគណៈរដ្ឋមន្ត្រី និងជាប្រធានរដ្ឋបាលស្តីទីនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅមជ្ឈមណ្ឌលធនធាននៃ អ.វ.ត.ក.និង សមាជិកគណៈកម្មាធិការកណ្ដាល ស.ស.យ.ក. គណៈរដ្ឋមន្រ្តីនិងមន្រ្តី អ.វ.ត.ក. ជាច្រើនរូប។

លោក ក្រាញ់ តូនី ឱ្យដឹងថា ក្រោយពីបញ្ចប់ការងារកាត់សេចក្តីសាលាក្តីខ្មែរក្រហមមក អ.វ.ត.ក. មានកេរដំណែលមួយដែលត្រូវផ្ទេរដល់យុវជនជំនាន់ក្រោយជាទំពាំងស្នងឬស្សី អាចសិក្សាស្វែងយល់ពីអតីតកាលដ៏ខ្មៅងងឹត ដើម្បីឈានដល់ការអភិវឌ្ឍប្រសើរឡើង។

លោកបានបន្តថា អ.វ.ត.ក. មានគោលដៅអប់រំឲ្យបានទូលំទូលាយបន្ថែមទៀតទៅដល់យុវជន ក្រៅពីបណ្ណាសារ អ.វ.ត.ក. មានរថយន្តចល័តទៅតាម ២៥ខេត្តក្រុង ហើយដើម្បីសម្រេចបានគោលដៅមួយនេះ អ.វ.ត.ក. នឹងសហការជាមួយ ស.ស.យ.ក. ដែលនឹងចុះអនុសារណៈនាពេលបន្តិចទៀតនេះ។

លោក សុះ មុះសិន កោតសរសើរ និងវាយតម្លៃខ្ពស់ចំពោះ អង្គជំនុំជម្រះ វិសាមញ្ញក្នុងតុលាការកម្ពុជា ដែលបានសម្រេចសមិទ្ធផល ការងារនាពេលកន្លងមក។ លោក ក៏បានថ្លែងអំណរគុណទៅដល់ អ.វ.ត.ក. ដែលបានអនុញ្ញាតឲ្យ ស.ស.យ.ក. ចូលរួមសហការជាមួយដើម្បីសម្រេចបានគោលដៅរួម និងសមស្របទៅតាមចក្ខុវិស័យរបស់ ស.ស.យ.ក. ដែលផ្តោតសំខាន់ទៅលើការបណ្តុះបណ្តាលទៅដល់យុវជន សិស្សានុសិស្ស ដែលនឹងក្លាយជាបញ្ញវន្ត ឲ្យបានសិក្សាស្វែងយល់ពីផ្លូវច្បាប់ និងប្រវត្តិសាស្រ្តដែលបានកើតឡើង ដើម្បីកុំឲ្យក្លាយជាអ្នកវង្វេងប្រវត្តិសាស្រ្ត។

លោក សុះ មុះសិន ក៏បានគូសបញ្ជាក់ថា ការចុះអនុស្សរណៈនេះ នឹងបង្កើនកិច្ចសហការ រវាង សហភាពសហព័ន្ធយុវជនកម្ពុជា និងអង្គជំនុំជម្រះវិសាមញ្ញ ក្នុងតុលាការកម្ពុជា លើការងារចែករំលែកចំណេះដឹង បទពិសោធច្បាប់ និងសច្ចធម៌ប្រវត្តិសាស្រ្តនៃ របបកម្ពុជាប្រជាធិបតេយ្យពីអង្គជំនុំជំម្រះវិសាមញ្ញក្នុងតុលាការកម្ពុជា តាមរយៈកម្មវិធីរួមគ្នានៃកម្មវិធីបណ្តុះបណ្តាលនានា មានដូចជា សិក្ខាសាលា ការបង្កើតកម្មវិធីរួមគ្នា ការស្រាវជ្រាវ ផ្នែកច្បាប់ និងប្រវត្តិសាស្ត្រ ទស្សនកិច្ចសិក្សា កម្មវិធីរថយន្តចល័តក្នុងការផ្សព្វផ្សាយឯកសារពាក់ព័ន្ធនឹងចំណេះដឹងច្បាប់ និងប្រវត្តិសាស្ត្រ៕

The post ស.ស.យ.ក ចាប់ដៃជាមួយ អ.វ.ត.ក. ដើម្បីចែករំលែកចំណេះដឹង បទពិសោធច្បាប់ និងសច្ចធម៌ប្រវត្តិសាស្រ្តនៃរបបកម្ពុជាប្រជាធិបតេយ្យ appeared first on Kampuchea Thmey Daily.

ក្នុងជំនួបដដែលលោកស្រីបាន គូសបញ្ជាក់ជូ សម្ដេចធិបតី អំពីបទពិសោធ និងបេសកកម្មការងាររបស់លោកស្រី នាពេលកន្លងមកក្នុងការទប់ស្កាត់ និងបង្ការអំពើប្រល័យពូជសាសន៍ នៅតាមបណ្ដាប្រទេសដូចជា បូស្ន៊ី ហេហ្សេហ្គូវីន (Bosnia and Herzegovina) និងរ៉វាន់ដា (Rwanda) ហើយគោលបំណងនៃបេសកកម្មសំខាន់មួយរបស់លោកស្រីនៅកម្ពុជានាពេលនេះ គឺដើម្បីចូលរួមក្នុងសន្និសីទស្តីពី “អនាគតកម្ពុជាដោយគ្មានអំពើប្រល័យពូជសាសន៍ ៖ ការការពារ និង ការឆ្លើយតប តាមរយៈការអប់រំ និងការថែទាំសុខភាព”។

លោកស្រីអគ្គលេខាធិការរង ក៏បានវាយតម្លៃខ្ពស់ចំពោះកិច្ចសហប្រតិបត្តិការប្រកបដោយជោគជ័យរវាង អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) និង អង្គការសហប្រជាជាតិ និងការបញ្ជ្រាបការយល់ដឹង ការអប់រំអំពីអំពើប្រល័យពូជសាសន៍ ដល់យុវជន សិស្ស និងនិស្សិត តាមរយៈការបណ្ដុះបណ្ដាលតាមសាលារៀន  ទាំងសាលារដ្ឋ និង ឯកជន ចាប់ពីកម្រិតចំណេះទូទៅ ដល់កម្រិតសាកលវិទ្យាល័យ ក្នុងក្របខ័ណ្ឌទូទាំងប្រទេស។

លោកស្រីអគ្គលេខាធិការវាយតម្លៃខ្ពស់ចំពោះជោគជ័យដ៏ត្រចះត្រចង់របស់កម្ពុជា ក្នុងការរៀបចំដំណើរការនៃ អ.វ.ត.ក. ហើយលោកស្រីបានគោរពបញ្ជាក់ថា    មេរៀន  និងបទពិសោធរបស់កម្ពុជា គួរតែត្រូវបានចែករំលែកជាមួយបណ្ដាប្រទេសជុំវិញពិភពលោក និងការបន្តកិច្ចសហប្រតិបត្តិការរវាងអង្គការសហប្រជាជាតិ និងរាជរដ្ឋាភិបាលកម្ពុជាលើការអនុវត្តគម្រោងស្វ័យអភិវឌ្ឍនានា (Home Grown Project)។

ជាការឆ្លើយតប សម្ដេចធិបតី បានសម្ដែងនូវក្ដីសោមនស្សរីករាយ ដែលបានជួបពិភាក្សាការងារជាមួយលោកស្រី អគ្គលេខាធិការរង  និងអរគុណចំពោះចំណាប់អារម្មណ៍របស់លោកស្រីអំពីជោគជ័យរបស់កម្ពុជា ពាក់ព័ន្ធនឹងការអប់រំផ្សព្វផ្សាយ បញ្ជ្រាបការយល់ដឹងអំពីអំពើប្រល័យពូជសាសន៍។ សម្ដេចធិបតីបានគូសបញ្ជាក់ថា ការអប់រំដល់មនុស្សជំនាន់ក្រោយ គឺពិតជាមានសារសំខាន់ ហើយការណ៍នេះ មិនត្រឹមតែជាការអប់រំអំពីអំពើប្រល័យពូជសាសន៍ ដែលបង្កឡើងដោយរបបខ្មៅងងឹតខ្មែក្រហមទេ ថែមទាំងជាការរួមចំណែកទប់ស្កាត់ និងបង្ការការវិលត្រលប់មកវិញនៃអំពើដ៏សាហាវយង់ឃ្នង់ មិនអាចពរណ៌នាបានក្នុងសង្គមកម្ពុជា។

ជាមួយគ្នានេះ សម្ដេចធិបតីបានគូសបញ្ជាក់ថា រាជរដ្ឋាភិបាលនឹងបង្កើតវិទ្យាស្ថានមួយ ដើម្បីចងក្រង គ្រប់គ្រងឯកសារ និងជាមណ្ឌលស្រាវជ្រាវ ចែករំលែកការយល់ដឹង និងផ្ដល់ព័ត៌មានដល់អ្នកជំនាន់ក្រោយ អ្នកសិក្សាស្រាវជ្រាវ និងសាធារណជនទូទៅ ដើម្បីជាការស្វែងយល់បន្ថែមអំពីអំពើប្រល័យពូជសាសន៍ ក៏ដូចជាជោគជ័យ និងដំណើរការនៃ  អ.វ.ត.ក.។

ជាទីបញ្ចប់ សម្ដេចធិបតីបានគូសបញ្ជាក់ថា ចំពោះកិច្ចសហប្រតិបត្តិការលើគម្រោងស្វ័យអភិវឌ្ឍ (Home Grown Project) សម្ដេចបានជំរុញនិងលើកទឹកចិត្តឱ្យតំណាងអង្គការសហប្រជាជាតិ បន្តកិច្ចសហការជាមួយក្រសួង ស្ថាប័នពាក់ព័ន្ធនៃរាជរដ្ឋាភិបាលកម្ពុជា បន្ថែមទៀត ដើម្បីបន្តអនុវត្តទិសដៅការងាររបស់ខ្លួន ឈានទៅសម្រេចជោគជ័យនៃការអនុវត្តគម្រោងនេះ៕

The post UN ៖ ជោគជ័យនៃដំណើរការ អ.វ.ត.ក.​ និងការទប់ស្កាត់អំពើប្រល័យពូជសាសន៍នៅកម្ពុជា ជាមេរៀនសម្រាប់ប្រជាជាតិក្នុងលោក​ appeared first on Kampuchea Thmey Daily.

លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានលើកឡើងថា កិច្ចសហការភាពជាដៃគូរវាងប្រព័ន្ធផ្សព្វផ្សាយរបស់រដ្ឋ និងមជ្ឈមណ្ឌលធនធាននៃអ.វ.ត.ក. មានសារៈសំខាន់ណាស់ ហើយស្របទៅនឹងគោលបំណងរបស់ក្រសួងព័ត៌មាន និងរាជរដ្ឋាភិបាលកម្ពុជា ក្នុងការផ្សព្វផ្សាយ ដល់ប្រជាពលរដ្ឋទូទាំងប្រទេសកម្ពុជា និងនៅលើសកលលោក ឱ្យបានដឹង និងយល់អំពីសមិទ្ធផលសម្រេចបានជាប្រវត្តិសាស្ត្រក្នុងដំណើរការនៃសាលាក្តីខ្មែរក្រហមអស់រយៈពេល១៦ឆ្នាំកន្លងមកនេះ ព្រមទាំងភារកិច្ច និងសកម្មភាពការងារសំខាន់ៗ ដែលអ.វ.ត.ក. បាន និងកំពុងបន្តអនុវត្តក្រោយដំណើរការនៃសវនាការសាលាក្តី។ លោក លើកឡើងបែបនេះ ក្នុងកិច្ចប្រជុំមួយ ដែលធ្វើឡើងនៅមជ្ឈមណ្ឌលធនធានអ.វ.ត.ក. ដឹកនាំដោយ លោក ក្រាញ់ តូនី ប្រធានរដ្ឋបាលស្តីទីនៃអ.វ.ត.ក.នៅរសៀលថ្ងៃទី១៥ ខែឧសភា ឆ្នាំ២០២៤ ព្រមទាំងមានការចូលរួមពីតំណាងប្រព័ន្ធផ្សព្វផ្សាយរដ្ឋនៃក្រសួងព័ត៌មានមកពី៖ អគ្គនាយកដ្ឋានទីភ្នាក់ងារសារព័ត៌មានកម្ពុជា(AKP), អគ្គនាយកដ្ឋានទូរទស្សន៍ជាតិកម្ពុជា(TVK), អគ្គនាយកដ្ឋានវិទ្យុជាតិកម្ពុជា(RNK), និង APPរបស់ក្រសួងព័ត៌មានផងដែរ។

ក្នុងកិច្ចប្រជុំនោះ អនុរដ្ឋលេខាធិការ បានលើកឡើងផងដែរអំពីសារៈសំខាន់ក្នុងការផ្តល់ព័ត៌មាន និងចំណេះដឹងក្នុងចំណោមយុវជនទាំងអស់ ឱ្យបានដឹងអំពីយុត្តិធម៌ ដែលតុលាការកូនកាត់មួយនេះសម្រេចបាន ជូនដល់ជនរងគ្រោះក្នុងរបបប្រល័យពូជសាសន៍ ក៏ដូចជាសម្រាប់ប្រជាជាតិទាំងមូល ជាពិសេសដើម្បីឱ្យបានយល់អំពីប្រវត្តិសាស្រ្តដែលប្រទេសកម្ពុជាបានធ្លាក់ចូលទៅក្នុងរបបវាលពិឃាត ដែលក្រុមខ្មែរក្រហមបានប្រព្រឹត្តអំពើដ៏សាហាវព្រៃផ្សៃ និងការសម្លាប់យ៉ាងរង្គាលលើប្រជាជនកម្ពុជាស្លូតត្រង់អស់ជាង៣លាននាក់ និងបានធ្វើឱ្យប្រជាជនកម្ពុជាទទួលរងនូវទុក្ខវេទនារកទីបំផុតគ្មាន។ លោកនិយាយថា ៖ «ការផ្សព្វផ្សាយអំពីសមិទ្ធផលរបស់សាលាក្តីនេះក៏ជាការចូលរួមក្នុងការបណ្តុះមនសិការបស់យុវជនជំនាន់ក្រោយឱ្យស្រលាញ់ ថែរក្សា និងការពារសន្តិភាព និងលើកកម្ពស់ស្មារតីមោទនភាពជាតិដោយក្រោយសង្គ្រាមដ៏រ៉ាំរ៉ៃ កម្ពុជាបច្ចុប្បន្នមានសន្តិភាពពេញលេញ ជាគំរូសម្រាប់ជាតិសាសន៍ដទៃទៀតនៅលើពិភពលោក»។

ចំណែក លោក ក្រាញ់ តូនី ប្រធានរដ្ឋបាលស្តីទីនៃអ.វ.ត.ក. បានលើកឡើងថា៖ «​មជ្ឈមណ្ឌល​ធនធាន អ​.​វ​.​ត​.​ក​. ត្រូវបានបង្កើតឡើង និងបានដំណើរយ៉ាងល្អ ជាពិសេសក្នុងដំណាក់ក្រោយដំណើរសវនាការសាលាក្តីបានបញ្ចប់ដើម្បី​ឆ្លើយតប​ទៅនឹង​តម្រូវការ​​ផ្សព្វផ្សាយ និង​អប់រំ​ពាក់ព័ន្ធ​នឹងសមិទ្ធផលនៃ​ដំណើរការ​ជំនុំ​ជម្រះក្តី និង​ការងារ​គ្រប់គ្រង​បណ្ណសារ ​ឱ្យបាន​ទូលំ​​ទូលាយ​ដល់​សាធារណជន និង​តាមដាន​ការអនុវត្ត​ការងារ​នានាក្នុងក្របខណ្ឌ​បណ្តឹងរដ្ឋប្បវេណី និងការផ្តល់យុត្តិធម៌សម្រាប់​ជនរងគ្រោះ​នៃ​របប​ខ្មែរក្រហម​»​។ លោកបន្ថែមទៀតថា៖ «​អ្វីដែលអង្គជំនុំ​ជម្រះក្តីនៃសាលាក្តីកូនកាត់សម្រេចបានមានលក្ខណៈជាប្រវត្តិសាស្ត្រសម្រាប់ប្រជាជនកម្ពុជា និងសម្រាប់មនុស្សលោក ដោយមានភាគីជាតិកម្ពុជា និងភាគី​អង្គការសហប្រជាជាតិ ព្រមទាំង​សហគមន៍​អន្តរជាតិ ​បានផ្ដល់​ការគាំទ្រ​ដល់​ដំណើរការ​នៃតុលាការទាំងមូល និងការកាត់សេចក្ដីប្រកបដោយភាព​រលូន ទាន់ពេលវេលា និង​ទទួលបាន​ជោគជ័យ ដែលជាការរួមចំណែកដល់ការថែរក្សាសុខសន្តិភាព ការបង្រួបបង្រួមជាតិ ព្រមទាំងចូលរួមលើកកម្ពស់ស្មារតី៧មករា ១៩៧៩ ថែមទៀត»។

ក្នុងកិច្ចប្រជុំនោះ ភាគីទាំងពីរ ក៏បានពិភាក្សាគ្នាផងដែរលើលទ្ធភាពក្នុងការរៀបចំនាពេលខាងមុខឱ្យមានអនុស្សរណៈយោគយល់គ្នាលើកិច្ចសហប្រតិបត្តិការផ្សព្វផ្សាយសមិទ្ធផលការងារ និងសកម្មភាពរបស់ អ.វ.ត.ក. ក្រោយដំណើរការសវនាការតុលាការបានបញ្ចប់ ខណៈ អ.វ.ត.ក. បានបើកទ្វារជាសាធារណៈដើម្បីផ្តល់ព័ត៌មានដល់សាធារណជន ជាពិសេសយុវជនឱ្យទទួលបាននូវចំណេះដឹង តាមរយៈការសិក្សា​ស្រាវជ្រាវ និងស្វែងយល់អំពីកិច្ចខិតខំប្រឹងប្រែងក្នុងក្របខណ្ឌស្វែងរកយុត្តិធម៌ជូនជនរងគ្រោះនៃរបបកម្ពុជាប្រជាធិបតេយ្យ។ ​មជ្ឈមណ្ឌល​ធនធាន​នេះមានផ្នែកសំខាន់ៗ ចំនួន ​៦ គឺ៖ ​បណ្ណាល័យនិង​កន្លែង​ស្រាវជ្រាវ​, គេហទំព័រ​ថ្មី​​, និ​ហិត​ដ្ឋា​ន​បណ្ណសារដែលមានឯកសារចំនួន២.៤លានទំព័រ​, បន្ទប់​ប្រើប្រាស់​ពហុ​បំណង​សម្រាប់​រៀបចំ​សិក្ខាសាលា​និង​តុលាការ​និម្មិត​, បន្ទប់​ពិគ្រោះ​យោ​ប​ល់និង​តាំងពិព័រណ៍, និង​ឧទ្យាន​សម្រាប់​ការចងចាំ​។

គួររំលឹកថា អង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក.) ត្រូវបានរៀបចំឡើងក្រោមកិច្ចព្រមព្រៀងរវាងភាគីរាជរដ្ឋាភិបាលកម្ពុជាជាមួយអង្គការសហប្រជាជាតិ នៅខែមិថុនា ឆ្នាំ២០០៣ ប៉ុន្ដែតុលាការនេះ គឺជាតុលាការ ឯករាជ្យម្ចាស់ការ មិនចំណុះរាជរដ្ឋាភិបាលឬអង្គការសហប្រជាជាតិទេ ដើម្បីដំណើរការកាត់សេចក្ដីឧក្រិដ្ឋកម្មដែលបានប្រព្រឹត្ដឡើងនៅប្រទេសកម្ពុជាក្នុងអំឡុងរបបខ្មែរក្រហម ពីឆ្នាំ១៩៧៥-១៩៧៩។  ចាប់ពីខែកុម្ភៈ ឆ្នាំ២០០៦ រហូតមកដល់ខែសីហា ឆ្នាំ២០២២ អង្គជំនុំជម្រះវិសាមញ្ញក្នុងតុលាការកម្ពុជា បានចំណាយថវិកាចំនួន ៣៣៧,៧០លានដុល្លារអាមេរិក ទៅលើបេសកកម្មរបស់អង្គជំនុំជម្រះវិសាមញ្ញក្នុងតុលាការកម្ពុជាទាំងមូល។

ក្រោយសាលាក្តីខ្មែរក្រហម បានឈានមកដល់ទីបញ្ចប់នៃការកាត់ក្តីទៅលើមេដឹកនាំខ្មែរក្រហម អង្គការសហប្រជាជាតិ បានបន្តធ្វើការជាមួយរាជរដ្ឋាភិបាលកម្ពុជា រយៈពេល៣ឆ្នាំទៀត ដោយចាប់ផ្តើមនៅក្នុង ឆ្នាំ២០២៣ រួមមាន៖ ទី១-មុខងារសេសសល់ផ្នែកយុត្តាធិការរួមទាំងការគ្រប់គ្រងបណ្ណសារ ឱ្យអនុលោមតាមបទដ្ឋានអន្តរជាតិ និងទី២-មុខងារមិនមែនផ្នែកតុលាការដែលផ្តោតទៅលើការងារផ្សព្វផ្សាយសមិទ្ធផលរបស់ អ.វ.ត.ក. និងការពិនិត្យតាមដានការអនុវត្តគម្រោងសំណងដល់ដើមបណ្តឹងរដ្ឋប្បវេណី ដែលមានសារៈសំខាន់ក្នុងការធានាថា «កេរដំណែល និងជនរងគ្រោះនៃរបបខ្មែរក្រហមមិនត្រូវបានគេបំភ្លេចចោល» ក្រោយពេលបញ្ចប់អាណត្តិការងាររបស់អង្គជំនុំជម្រះវិសាមញ្ញក្នុងតុលាការកម្ពុជា៕

The post ប្រព័ន្ធផ្សព្វផ្សាយរដ្ឋ៤ និងមជ្ឈមណ្ឌលធនធាននៃ អ.វ.ត.ក. ត្រៀមផ្សព្វផ្សាយសន្និសីទស្ដីពី «អនាគតកម្ពុជាគ្មានអំពើប្រល័យពូជសាសន៍» appeared first on Kampuchea Thmey Daily.