Asian Mixed Martial Arts Championship Archives - Kampuchea Thmey Daily

ដៃគូប្រកួតរបស់អត្តពលិកកម្ពុជាថ្ងៃនេះ ជើងឯកគុនចម្រុះអាស៊ី

chean virakbot — Fri, 12 Jul 2024 03:44:47 +0000

ការប្រកួតគុនចម្រុះជើងឯកអាស៊ី លើកទី២ ឆ្នាំ២០២៤ នៅលើទឹកដីកម្ពុជា ឈានដល់ថ្ងៃទី២ ហើយក្នុងការប្រកួតវគ្គជម្រុះ និងមានកីឡាករខ្លះឈានដល់វគ្គពាក់កណ្តាលផ្តាច់ព្រ័ត្រ។ កីឡាករកម្ពុជាមួយចំនួនទទួលបានជ័យជម្នះ ខណៈមួយចំនួនក៏បរាជ័យក្នុងការប្រកួតថ្ងៃទី១កាលពីម្សិលមិញ។

សម្រាប់ថ្ងៃទី២នេះ កីឡាករ កីឡាការិនីកម្ពុជាទាំងអស់ត្រូវបន្តការប្រកួតទៀត។ ខាងក្រោមជាដៃគូរបស់កីឡាករ កីឡាការិនីកម្ពុជា។

កីឡាការិនី ទួន ស្រីភីន vs Sitohang Melpida (ឥណ្ឌូណេស៊ី)
កីឡាការិនី អ៊ុំ ថារ័ត្ន vs Kwan Holly Hoi Ling (ហុងកុង) លើកទី២
កីឡាការិនី នៅ ស្រីពៅ vs Putri Aprillia Eka (ឥណ្ឌូណេស៊ី)
កីឡាករ ផេង បញ្ញា vs Catalan Rene (ហ្វីលីពីន) លើកទី២
កីឡាករ ហ៊ុន គឹមហៀង vs Pandaan Arthur Andre (សិង្ហបុរី)
កីឡាករ សែន ចន្ទរិទ្ធីគុណ vs Yang Ji-Hua (ឆាយនីសតៃប៉ិ)
កីឡាការិនី ខៀវ ចិន្តារ័ត្ន vs Puspitasari Nurdiana (ឥណ្ឌូណេស៊ី)
កីឡាករ រិន សារ័ត្ន vs Lee Chilu (ឆាយនីសតៃប៉ិ)
កីឡាករ អាត ធាន vs Safarov Yoqubjon (កាហ្សាស្ថាន)
កីឡាករ រិន សារ័ត្ន vs Zhi Hao Teo (ម៉ាឡេស៊ី) ប្រកួតទី២
កីឡាករ ឡុង ឡា vs Tse Brian Sheung Chi (ហុងកុង)
កីឡាការិនី គន្ធ វ៉ាន់នីតា vs Sze Teng Pang (ម៉ាឡេស៊ី)

អត្ថបទ៖ វីរបុត្រ

The post ដៃគូប្រកួតរបស់អត្តពលិកកម្ពុជាថ្ងៃនេះ ជើងឯកគុនចម្រុះអាស៊ី appeared first on Kampuchea Thmey Daily.

ល្ងាចនេះ កម្ពុជាសម្តែងយុទ្ធគុនខ្មែរបុរាណ៦ប្រភេទដល់ភ្ញៀវ១៨ប្រទេស

chean virakbot — Thu, 11 Jul 2024 00:57:52 +0000

កម្ពុជានឹងសម្តែងបង្ហាញយុទ្ធគុនខ្មែរបុរាណចំនួន៦ប្រភេទផ្សេងគ្នាដល់ភ្ញៀវអន្តរជាតិ១៨ប្រទេសដែលបានចូលរួមក្នុងព្រឹត្តិការណ៍ប្រកួតគុនចម្រុះជើងឯកអាស៊ី លើកទី២ នាល្ងាចថ្ងៃទី១១ ខែកក្កដា នៅវិមានពហុកីឡដ្ឋានជាតិអូឡាំពិក ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ក្នុងពិធីបើកការប្រកួតគុនចម្រុះអាស៊ីជាផ្លូវការ នឹងមានរបាំជូនពរ ពិធីដង្ហែគណៈប្រតិភូ គោរពទង់ជាតិនៃព្រះរាជាណាចក្រកម្ពុជា និងពិធីសច្ចាប្រណិធានរបស់អត្តពលិក និងអាជ្ញាកកណ្តាល។ បន្ទាប់មកមានការថ្លែងសុន្ទរកថារបស់លោកទេសរដ្ឋមន្ត្រី ថោង ខុន ទទួលបន្ទុកអភិវឌ្ឍចលនាកីឡា សុន្ទរកថារបស់លោក Gordon Tang អនុប្រធានក្រុមប្រឹក្សាអូឡាំពិកអាស៊ី និងជាប្រធានសមាគមកីឡាគុនចម្រុះអាស៊ី និងជាពិសេសសុន្ទរកថា និងគោះឃ្មោះដើម្បីបើកជាផ្លូវការរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

បន្ទាប់មកនឹងមានពិធីសម្តែងយុទ្ធគុនខ្មែរបុរាណដែលមាន៦ផ្សេងគ្នាគឺ ការសម្តែងគុនខ្មែរ យុទ្ធក្រមខម ក្បាច់គុនកងយោធពលខេមរភូមិន្ទ គុនចំបាប់ខ្មែរបុរាណ គុនខែល និងគុនល្បុក្កតោ ហើយចុងក្រោយជាការសម្តែងរួមគ្នា។

នេះជាលើកទី១ហើយដែលកម្ពុជាសម្តែងបង្ហាញយុទ្ធគុនខ្មែរជាច្រើនប្រភេទក្នុងព្រឹត្តិការណ៍ផ្លូវការធំៗ។ កន្លងមកភាគច្រើនសម្តែងតែល្បុក្កតោ ក្បាច់គុនកងយោធពលខេមរភូមិន្ទ ក៏ដូចជាសិល្បៈផ្សេងៗ។

ការប្រកួតគុនចម្រុះអាស៊ី លើកទី២ នៅថ្ងៃទី១១-១២-១៤ ខែកក្កដា ឆ្នាំ២០២៤ ដែល១៨ប្រទេសចូលរួមនេះរៀបចំដោយគណៈកម្មាធិការជាតិអូឡាំពិកកម្ពុជា សហព័ន្ធកីឡាយុទ្ធគុនចម្រុះអាស៊ី (AMMA) និងសហព័ន្ធកីឡាយុទ្ធគុនចម្រុះកម្ពុជា។ គោលបំណងធំបំផុតនៃការរៀបចំព្រឹត្តិការណ៍នេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាផ្លូវការ ស្តង់ដាត្រឹមត្រូវដើម្បីចូលក្នុងព្រឹត្តិការណ៍កីឡាអាស៊ី និងកីឡាអូឡាំពិក។

ការប្រកួតគុនចម្រុះជើងឯកអាស៊ី លើកទី២ នៅប្រទេសកម្ពុជា ក៏ជាការប្រកួតជម្រុះដើម្បីជ្រើសរើសជ័យលាភីទៅចូលរួមប្រកួតក្នុងព្រឹត្តិការណ៍«កីឡាក្នុងសាល និងក្បាច់គុនអាស៊ី (Asian Indoor and Martial Arts Games) នាខែវិច្ឆិកា ឆ្នាំ២០២៤ នៅប្រទេសថៃ។

កម្ពុជាបានត្រៀមអត្តពលិកទាំង១៦រូបរួចហើយគឺកីឡាករ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុន, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីតភូថង, ហាត ភី ខណៈកីឡាការិនីមានដូចជា ខៀវ ចិន្ដារ័ត្ន, នៅ ស្រីពៅ, គុណ វ៉ាន់នីតា, សំ ថារ័ត្ន និង ទួន ស្រីភីន៕

អត្ថបទ៖ វីរបុត្រ

The post ល្ងាចនេះ កម្ពុជាសម្តែងយុទ្ធគុនខ្មែរបុរាណ៦ប្រភេទដល់ភ្ញៀវ១៨ប្រទេស appeared first on Kampuchea Thmey Daily.

កម្ពុជានឹងបង្ហាញ ទស្សនីយភាពប្លែកមិនធ្លាប់មានក្នុងពិធីបើក MMA ថ្ងៃស្អែក

chean virakbot — Wed, 10 Jul 2024 03:33:11 +0000

កម្ពុជាក្នុងនាមជាម្ចាស់ផ្ទះបានគ្រោងបង្ហាញទស្សនីយភាពពិសេសប្លែក និងមិនធ្លាប់មានសម្រាប់ពិធីបើកការប្រកួតគុនចម្រុះជើងឯកអាស៊ី លើកទី២ ឆ្នាំ២០២៤ ល្ងាចថ្ងៃទី១១ ខែកក្កដា នៅវិមានពហុកីឡដ្ឋានជាតិអូឡាំពិក ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឲ្យដឹងថា រហូតដល់ពេលនេះ កម្ពុជាបានត្រៀមរួចរាល់ហើយសម្រាប់ការរៀបចំព្រឹត្តិការណ៍ប្រកួតគុនចម្រុះអាស៊ី លើកទី២។ ក្នុងនាមជាម្ចាស់ផ្ទះ កម្ពុជានឹងបង្ហាញផ្ទាំងទស្សនីយភាពពិសេសប្លែក និងមិនធ្លាប់បានបង្ហាញពីមុន។

ក្រោយពេលចុះពិនិត្យផ្ទាល់នៅកន្លែងរៀបចំនៅវិមានពហុកីឡដ្ឋានជាតិកាលពីល្ងាចថ្ងៃទី៩ ខែកក្កដា លោក វ៉ាត់ ចំរើន បានប្រាប់ដល់អ្នកសារព័ត៌មានថា ៖«យើងមានការសម្តែងក្នុងពិធីបើកនេះខុសប្លែកពីមុនគឺសម្តែងពីភាពសំបូរបែបនៃយុទ្ធគុនខ្មែរបុរាណ។ ចូលរួមជាមួយនឹងការរៀបចំឲ្យមានទស្សនីភាពប្លែកៗ និងអ្វីដែលមិនធ្លាប់មានពីមុន។ ដូចជាការសម្តែងវាយខែល យើងមិនធ្លាប់សម្តែងទេពីមុន តែឥឡូវនេះ យើងយកមកបង្ហាញដល់បងប្អូន ក៏ដូចជាភ្ញៀវអន្តរជាតិ១៨ប្រទេសដែលបានមកកម្ពុជា»។

អ្វីដែលកាន់តែពិសេសទៀតនោះ កម្ពុជាទទួលបានបទពិសោធ និងចំណេះដឹងច្រើនពីអ្នកជំនាញគុនចម្រុះអន្តរជាតិ។ លោក វ៉ាត់ ចំរើន បានឲ្យដឹងថា ខាងភាគីគុនចម្រុះអន្តរជាតិបាននាំយកអ្នកជំនាញការគ្រប់ទាំងអស់ដើម្បីធ្វើការជាមួយម្ចាស់ផ្ទះកម្ពុជាទាំងការងាររៀបចំ និងបច្ចេកទេស។

លោក វ៉ាត់ ចំរើន បានលើកឡើងថា ៖«ជាពិសេស ការងារបច្ចេកទេសមិនមែនជាការប្រកួតធម្មតា ដូច្នេះត្រូវការរៀបចំប្រព័ន្ធឌីជីថលទំនើបមួយដើម្បីបញ្ជាក់ពីយុត្តិធម៌ និងភាពត្រឹមត្រូវនៃកីឡា។ ពួកគេមានប្រព័ន្ធដាក់ពិន្ទុ ប្រព័ន្ធទិន្នន័យ ដែលចេញពិន្ទុដោយស្វ័យប្រវត្តិ ហើយមានការហាត់រៀបចំច្បាស់លាស់ណាស់។ ភាពប្រាកដប្រជាក្នុងបច្ចេកទេសដាក់ពិន្ទុគឺជារឿងសំខាន់»។

លោករដ្ឋលេខាធិការក្រសួងអប់រំ យុវជន និងកីឡារូបនេះបានបន្ថែមថា ខាងភាគីអន្តរជាតិក៏បានយកចិត្តទុកខ្លាំងលើប្រព័ន្ធផ្សព្វផ្សាយ។ ដូច្នេះភាគីកម្ពុជាជាម្ចាស់ផ្ទះ និងប្រព័ន្ធផ្សព្វផ្សាយដូចជាទូរទស្សន៍ជាដើមគឺបានរៀនសូត្រច្រើនណាស់ពីជំនាញការអន្តរជាតិដែលបានមកជួយកម្ពុជា។

តាមកម្មវិធីគ្រោងទុក នៅថ្ងៃទី១១ ខែកក្កដា ឆ្នាំ២០២៤ ដែលជាថ្ងៃទី១ គឺមានការប្រកួតជម្រុះជុំទី១គ្រប់វិញ្ញាសាទាំងអស់ចាប់ពីម៉ោង៩ព្រឹកដែលអ្នកគាំទ្រអាចចូលទស្សនាដោយសេរី។ នៅពេលល្ងាចគឺជាពិធីបើកផ្លូវការក្រោមអធិបតីភាពសម្តេចធិបតីនាយករដ្ឋមន្ត្រីនៃកម្ពុជា ប៉ុន្តែមិនអនុញ្ញាតឲ្យមហាជនចូលទស្សនាផ្ទាល់ទេ។

នៅថ្ងៃទី២ពោលគឺនៅថ្ងៃទី១២ ខែកក្កដា ជាការប្រកួតវគ្គពាក់កណ្តាលផ្តាច់ព្រ័ត្រ និងថ្ងៃទី៣ ត្រូវនឹងថ្ងៃទី១៣ ខែកក្កដា គឺជាការប្រកួតវគ្គផ្តាច់ព្រ័ត្រ ពិធីបំពាក់មេដាយ និងពិធីបិទ។

អត្ថបទ៖ វីរបុត្រ
រូបថត៖ Cambodia 2023

The post កម្ពុជានឹងបង្ហាញ ទស្សនីយភាពប្លែកមិនធ្លាប់មានក្នុងពិធីបើក MMA ថ្ងៃស្អែក appeared first on Kampuchea Thmey Daily.

ម៉ឺន មេឃា កំពុងចាប់អាជីពកីឡា៤ប្រភេទផ្សេងគ្នា

chean virakbot — Tue, 09 Jul 2024 03:50:32 +0000

កីឡាករប្រដាល់ ម៉ឺន មេឃា កូនប្រុសរបស់លោកគ្រូ អេ ភូថង ជាអត្តពលិកកម្ពុជាម្នាក់ដែលជំនាញ៤ប្រភេទកីឡាផ្សេងគ្នា និងកំពុងសកម្មក្នុងប្រភេទកីឡាទាំងនោះ។

កីឡាដំបូងគឺគុនខ្មែរដែល ម៉ឺន មេឃា ចាប់ផ្តើមហ្វឹកហាត់តាំងពីកុមារភាពជាមួយនឹងឪពុកបង្កើតជាគ្រូបង្វឹក។ រូបគេបានចេញប្រកួតគុនខ្មែរតាំងពីតូចរហូតដល់បច្ចុប្បន្ន។ រូបគេបានប្រកួតគុនខ្មែររាប់រយដង និងបានឈ្នះខ្សែក្រវាត់ជាច្រើនគ្រឿង។ គុនខ្មែរជំនាញចម្បងក្នុងចំណោមកីឡាទាំង៤ប្រភេទ។

បន្ទាប់មក រូបគេបានចាប់ផ្តើមបន្ថែមជំនាញកីឡាវ៉ូវីណាមដែលត្រូវបានគេដឹងជាកីឡាប្រពៃណីរបស់ប្រទេសវៀតណាម។ សម្រាប់កីឡានេះ ម៉ឺន មេឃា បានចេញប្រកួតអន្តរជាតិជាច្រើនដូចជាកីឡាស៊ីហ្គេម កីឡាវ៉ូវីណាមអាស៊ាន ការប្រកួតអន្តរជាតិកម្រិតតំបន់ និងពិភពលោកជាច្រើនទៀត។

រូបគេបានឈ្នះមេដាយមាសកីឡាស៊ីហ្គេម ឆ្នាំ២០២២ វិញ្ញាសាប្រយុទ្ធទម្ងន់៦៥គីឡូក្រាម។ នៅស៊ីហ្គេម ឆ្នាំ២០២៣ ដែលកម្ពុជាជាម្ចាស់ផ្ទះ រូបគេបានឈ្នះមេដាយមាសវិញ្ញាសាដដែលនេះទៀត ព្រមទាំងបានឈ្នះមេដាយក្នុងការប្រកួតអន្តរជាតិផ្សេងៗទៀត។

អ្វីដែលគួរឲ្យចាប់អារម្មណ៍ថែមទៀតនោះ ម៉ឺន មេឃា បានបន្ថែមជំនាញប្រដាល់ឃីកបុកស៊ីងទៀត។ សម្រាប់ជំនាញថ្មីនេះ រូបគេពិតជាធ្វើបានល្អមែនទែនដោយមិនទាន់ចាញ់សោះទាំងការប្រកួតនៅប្រទេសកម្ពុជា និងនៅប្រទេសចិន។

ឥឡូវនេះ ម៉ឺន មេឃា បានចាប់ផ្តើមហ្វឹកហាត់កីឡាគុនចម្រុះ (MMA) មួយទៀតដែលបានក្លាយជាប្រភេទកីឡាថ្មីបំផុតសម្រាប់ខ្លួន។ រូបគេត្រូវបានសហព័ន្ធកីឡាប្រដាល់គុនចម្រុះកម្ពុជាជ្រើសរើសចូលក្រុមជម្រើសជាតិដើម្បីប្រកួតព្រឹត្តិការណ៍ផ្លូវការលំដាប់អាស៊ីគឺ Asian Mixed Martial Arts Championship លើកទី២ ដែលប្រទេសកម្ពុជាធ្វើជាម្ចាស់ផ្ទះ និងមានប្រទេសជាង២០ចូលរួមនៅថ្ងៃទី១១-១២-១៣ ខែកក្កដា ឆ្នាំ២០២៤ នៅពហុកីឡដ្ឋានជាតិអូឡាំពិក។

ទោះបីជាយ៉ាងណា រហូតដល់ពេលនេះ ម៉ឺន មេឃា បានប្រកួតកីឡា២ប្រភេទក្នុងនាមជាកីឡាករជម្រើសជាតិគឺ វ៉ូវីណាម និងគុនចម្រុះ ខណៈ គុនខ្មែរ និងឃីកបុកស៊ីងគឺការប្រកួតលក្ខណៈអាជីព។

មិនត្រឹមតែប៉ុណ្ណោះ រូបគេធ្លាប់ប្រកួតប្រដាល់សកលថែមទៀតដោយធ្លាប់ឈ្នះមេដាយក្នុងការប្រកួតសកលជ្រើសរើសជើងឯកថ្នាក់ជាតិទៀតផង ប៉ុន្តែរូបគេមិនធ្លាប់ប្រកួតសកលជាមួយកីឡាករបរទេសទេ។

ការប្រកួតគុនចម្រុះអាស៊ីនេះមិនដូចការប្រកួតគុនចម្រុះអាជីពដែលរៀបចំតាមសង្វៀនឯកជនទេ។ ការប្រកួតនេះ គណៈកម្មការបានដកក្បាច់ណាដែលគ្រោះថ្នាក់ ហើយការដេកអោបគ្នាលើក្តារទីលានបានត្រឹមតែរយៈពេល១៦វិនាទីប៉ុណ្ណោះ។ អាជ្ញាកណ្តាលនឹងបំបែកឲ្យឈរប្រកួតឡើងវិញ។ ការកំណត់ច្បាប់ប្រកួតបែបនេះដើម្បីជំរុញកីឡា MMA ចូលក្នុងព្រឹត្តិការណ៍ផ្លូវការដូចជា កីឡាស៊ីហ្គេម កីឡាអាស៊ី ឬកីឡាអូឡាំពិក។

ម៉ឺន មេឃា ស្ថិតក្នុងចំណោមអត្តពលិកគុនចម្រុះ១៦រូបដែលកម្ពុជាត្រៀមក្នុងនាមជាម្ចាស់ផ្ទះគឺកីឡាករ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ចន្ទឫទ្ធិគុន, ហ៊ុន ចន្ទរាជ, ធាន អាន, ចាន់ រតនា, ហាត ភី ខណៈកីឡាការិនីមានដូចជា ខៀវ ចិន្ដារ័ត្ន, នៅ ស្រីពៅ, គុណ វ៉ាន់នីតា, សំ ថារ័ត្ន និង ទួន ស្រីភីន៕

អត្ថបទ៖ វីរបុត្រ

The post ម៉ឺន មេឃា កំពុងចាប់អាជីពកីឡា៤ប្រភេទផ្សេងគ្នា appeared first on Kampuchea Thmey Daily.

ការប្រកួតគុនចម្រុះអាស៊ីនៅកម្ពុជាបើកឲ្យមហាជនចូលទស្សនាឥតគិតថ្លៃ

chean virakbot — Fri, 05 Jul 2024 09:39:35 +0000

គណៈកម្មាធិការជាតិអូឡាំពិកកម្ពុជាដែលជាអ្នករៀបចំព្រឹត្តិការណ៍កីឡាគុនចម្រុះជើងឯកអាស៊ី លើកទី២ ចាប់ពីថ្ងៃទី១១-១២-១៣ ខែកក្កដា ឆ្នាំ២០២៤ នៅពហុកីឡដ្ឋានជាតិអូឡាំពិក បានបើកឲ្យមហាជនចូលទស្សនាផ្ទាល់ដោយឥតគិតថ្លៃ។

ដើមឡើយ គណៈកម្មការរៀបចំការប្រកួតបានកំណត់ឲ្យមានការលក់សំបុត្រចូលទស្សនាសម្រាប់មហាជន ដើម្បីឲ្យស្របទៅតាមគោលការណ៍របស់កីឡាអន្តរជាតិ ពីព្រោះគ្រប់ព្រឹត្តិការណ៍ប្រកួតកីឡាត្រូវតែលក់សំបុត្រ។

ទោះបីជាយ៉ាងណា ពិធីបើកមិនអនុញ្ញាតឲ្យមហាជនចូលទស្សនាផ្ទាល់ឡើយ។

គោលបំណងនៃការរៀបចំព្រឹត្តិការណ៍គុនចម្រុះនេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាផ្លូវការ ស្តង់ដាត្រឹមត្រូវដើម្បីចូលក្នុងព្រឹត្តិការណ៍កីឡាអាស៊ី និងកីឡាអូឡាំពិក។

អត្ថបទ៖ វីរបុត្រ

The post ការប្រកួតគុនចម្រុះអាស៊ីនៅកម្ពុជាបើកឲ្យមហាជនចូលទស្សនាឥតគិតថ្លៃ appeared first on Kampuchea Thmey Daily.

ដើម្បីជាតិ កញ្ញា ទួន ស្រីភីន មិនខ្វល់រឿងគ្រោះថ្នាក់ក្នុងការប្រកួតគុនចម្រុះអាស៊ី

chean virakbot — Fri, 05 Jul 2024 03:45:25 +0000

កីឡាការិនីប្រដាល់គុនខ្មែរ ទួន ស្រីភីន មិនធ្លាប់បានហ្វឹកហាត់កីឡាគុនចម្រុះ (MMA) មុនពេលសហព័ន្ធកីឡាគុនចម្រុះកម្ពុជាជ្រើសរើសយកកញ្ញាជាកីឡាការិនីជម្រើសជាតិចូលរួមប្រកួតគុនចម្រុះអាស៊ី លើកទី២ ឆ្នាំ២០២៤ ដែលកម្ពុជាធ្វើជាម្ចាស់ផ្ទះ។

ទួន ស្រីភីន បានប្រាប់ថា បន្ទាប់ពីវិលត្រឡប់មកពីប្រកួតគុនខ្មែរនៅប្រទេសបារាំងកាលពីថ្ងៃទី២ ខែមិថុនា និងដល់ថ្ងៃធ្វើសន្និសីទសារព័ត៌មានអំពីការប្រកួតចម្រុះអាស៊ី កាលពីថ្ងៃទី១២ ខែមិថុនា មក កញ្ញាមិនទាន់បានហ្វឹកហាត់គុនចម្រុះម្តងណាសោះ បើទោះបីជាមានឈ្មោះចូលរួមប្រកួតគុនចម្រុះអាស៊ីក៏ដោយ។

ចាប់ពីថ្ងៃទី១៣ ខែមិថុនា ទើបកញ្ញា បានចូលជំរំហ្វឹកហាត់គុនចម្រុះជាមួយកីឡាករ កីឡាការិនីជម្រើសជាតិផ្សេងទៀតនៅក្លិប Cambodian Top Team ដែលមានលោកគ្រូ ហ៊ុន ចន្ទរាជ និងគ្រូជំនាញគុនចម្រុះជាច្រើនរូបទៀត។ កីឡាការិនី ទួន ស្រីភីន បានប្រាប់ថា សម្រាប់ការហ្វឹកហាត់ និងប្រកួតគុនចម្រុះលើកដំបូងនេះគឺប្លែក ពិបាកសម្រាប់នាង ពីព្រោះមិនមែនជាជំនាញរបស់ខ្លួន។

ស្រីភីន បាននិយាយថា ៖«ខ្ញុំធ្លាប់តែវ៉ៃឈរ តែមកហ្វឹកហាត់វ៉ៃឈរ ដេក អង្គុយ អីចឹងទៅវាពិបាក តែអារម្មណ៍ខ្ញុំអត់ភ័យខ្លាចអ្វីទេ។ ខ្ញុំធ្វើចិត្តឲ្យសប្បាយៗ ជិតដល់ថ្ងៃប្រកួតហើយ»។

ជាពិសេសទៀតនោះ ការជាប់ជម្រើសជាតិគឺជាក្តីស្រមៃរបស់នាងតាំងពីតូចមិនថាកីឡាអ្វីនោះទេគឺជាអ្វីដែលកញ្ញាលះបង់គ្រប់បែបយ៉ាងដើម្បីជាតិ។ កញ្ញាបានលើកឡើងថា ៖«ខ្ញុំដឹងថា ពិបាក តែប្រកួតតំណាងជាតិ យើងជាម្ចាស់ផ្ទះ។ សហព័ន្ធគុនចម្រុះផ្តល់ឱកាសឲ្យខ្ញុំគឺខ្ញុំត្រូវតែលះបង់គ្រប់បែបយ៉ាងដើម្បីជាតិ។ ទោះបីជាខ្ញុំជួបបញ្ហា ឧបសគ្គគ្រោះថ្នាក់យ៉ាងណា ក៏ខ្ញុំមិនសោកស្តាយដែរគឺលះបង់ដើម្បីជាតិដែរ»។

កីឡាការិនីគុនខ្មែររូបនេះសង្កត់ធ្ងន់ថា ៖«វាមានតម្លៃធំធេងណាស់សម្រាប់ខ្ញុំក្នុងនាមជាកីឡាការិនីតំណាងជាតិ។ ពាក្យថា តំណាងជាតិ ឬជម្រើសជាតិគឺជាក្តីសុបិនតាំងពីតូច»។

កញ្ញា ទួន ស្រីភីន បន្ថែមថា ៖«ក្បាច់គុន យើងមិនត្រូវចេះតែមួយមុខទេគឺយើងត្រូវចេះច្រើនមុខ ពីព្រោះយើងត្រូវវ៉ៃគុនខ្មែរ គុនចម្រុះ ឃីកបុកស៊ីងជាដើម។ ការបន្ថែមបច្ចេកទេសកីឡាកាន់ច្រើន គឺកាន់តែល្អ»។

នេះជាកីឡាទី២ដែលកីឡាការិនី ទួន ស្រីភីន ទទួលបានឱកាសប្រកួតឲ្យតំណាងជាតិ បន្ទាប់ពីកញ្ញាធ្លាប់ជាប់ជម្រើសជាតិគុនខ្មែរសម្រាប់ការចូលរួមប្រកួតក្នុងកីឡាស៊ីហ្គេម ឆ្នាំ២០២៣ ដែលកម្ពុជាជាម្ចាស់ផ្ទះ។ នៅពេលនោះ កញ្ញាទទួលបានមេដាយប្រាក់។

ទួន ស្រីភីន ស្ថិតក្នុងចំណោមកីឡាការិនី៥រូបគឺ ខៀវ ចិន្ដារ័ត្ន, នៅ ស្រីពៅ, គុណ វ៉ាន់នីតា, សំ ថារ័ត្ន និងកីឡាករ១១រូបគឺ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុន, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីតភូថង និង ហាត ភី សម្រាប់់ការប្រកួតគុនចម្រុះអាស៊ី លើកទី២ នៅថ្ងៃទី១១-១២-១៣ ខែកក្កដា ឆ្នាំ២០២៤ នៅវិមានពហុកីឡដ្ឋានជាតិអូឡាំពិក។

ទួន ស្រីភីន ទទួលបានមេដាយប្រាក់ស៊ីហ្គេម

គោលបំណងធំបំផុតនៃការរៀបចំព្រឹត្តិការណ៍គុនចម្រុះនេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាផ្លូវការ ស្តង់ដាត្រឹមត្រូវដើម្បីចូលក្នុងព្រឹត្តិការណ៍កីឡាអាស៊ី និងកីឡាអូឡាំពិក។

អត្ថបទ៖ វីរបុត្រ

The post ដើម្បីជាតិ កញ្ញា ទួន ស្រីភីន មិនខ្វល់រឿងគ្រោះថ្នាក់ក្នុងការប្រកួតគុនចម្រុះអាស៊ី appeared first on Kampuchea Thmey Daily.

លោក ហ៊ុន ចន្ទរាជ ថា ច្បាប់ប្រកួត MMA អាស៊ីល្អសម្រាប់អ្នកកីឡាគុនខ្មែរ

chean virakbot — Thu, 04 Jul 2024 01:31:44 +0000

លោក ហ៊ុន ចន្ទរាជ ជាគ្រូបង្វឹក និងជាកីឡាករផងបានចាត់ទុកច្បាប់ប្រកួតគុនចម្រុះជើងឯកអាស៊ី (Asian Mixed Martial Arts Championship) មានអំណោយផលល្អសម្រាប់កីឡាករ កីឡាការិនីគុនខ្មែរនៅពេលកម្ពុជាធ្វើជាម្ចាស់ផ្ទះនាថ្ងៃទី១១-១២-១៣ ខែកក្កដា ឆ្នាំ២០២៤។

លោក ហ៊ុន ចន្ទរាជ

គ្រូបង្វឹកដែលមានបទពិសោធច្រើនបានឲ្យដឹងថា ការប្រកួតគុនចម្រុះអាស៊ីនេះមិនដូចការប្រកួតគុនចម្រុះអាជីពដែលរៀបចំតាមសង្វៀនឯកជនទេ។ ការប្រកួតនេះ គណៈកម្មការបានដកក្បាច់ណាដែលគ្រោះថ្នាក់ ហើយការដេកអោបគ្នាលើក្តារទីលានបានត្រឹមតែរយៈពេល១៦វិនាទីប៉ុណ្ណោះ។ អាជ្ញាកណ្តាលនឹងបំបែកឲ្យឈរប្រកួតឡើងវិញ។ ការកំណត់ច្បាប់ប្រកួតបែបនេះដើម្បីជំរុញកីឡា MMA ចូលក្នុងព្រឹត្តិការណ៍ផ្លូវការដូចជា កីឡាស៊ីហ្គេម កីឡាអាស៊ី ឬកីឡាអូឡាំពិក។

លោក ហ៊ុន ចន្ទរាជ បាននិយាយថា ៖«ខ្ញុំគិតថា ច្បាប់ MMA នេះ វាស្រួលសម្រាប់កីឡាករគុនខ្មែរយើង។ និយាយទៅអត់គ្រោះថ្នាក់អ្វីទេ។ គេធ្វើឲ្យមានសុវត្ថិភាពខ្ពស់»។

អ្នកលេងគុនខ្មែរមានបទពិសោធច្រើន បូករួមទាំងការហ្វឹកហាត់គុនចម្រុះថែមទៀតនោះបានធ្វើឲ្យថ្នាក់ដឹកនាំ និងគ្រូបង្វឹកមានក្តីសង្ឃឹមខ្ពស់ក្នុងការទទួលបានមេដាយក្នុងនាមជាម្ចាស់ផ្ទះ។

លោក ហ៊ុន ចន្ទរាជ

លោកបានឲ្យដឹងថា ៖«យើងបានប្រមូលផ្តុំហ្វឹកហាត់តាំងពីខែមេសា។ ខ្ញុំមើលឃើញថា កីឡាករ កីឡាការិនីជម្រើសជាតិយើងទាំងអស់មានការរីកចម្រើនខ្លាំង។ កីឡាករមួយចំនួននឹងធ្វើបានល្អ ហើយអាចឈានដល់វគ្គផ្តាច់ព្រ័ត្រ។ អ្នកថ្មីៗក៏យើងសង្ឃឹមដែរ ពីព្រោះពួកគាត់យកចិត្តទុកដាក់ បច្ចេកទេសក៏ល្អ។ ជាពិសេសកីឡាករដែលប្រកួតវិញ្ញាសាទម្ងន់ស្រាល គឺសង្ឃឹមខ្ពស់»។

ក្នុងចំណោមកីឡាការិនី៥រូប លោកគ្រូ ហ៊ុន ចន្ទរាជ មានសង្ឃឹមច្រើនចំពោះកីឡាការិនី គុណ វ៉ាន់នីតា ដែលប្រកួតវិញ្ញាសាទម្ងន់ក្រោម៧០គីឡូក្រាម។ លោកបានឲ្យដឹងថា ដោយសារវិញ្ញាសាទម្ងន់ធ្ងន់មិនសូវមានកីឡាការិនីពីបណ្តាប្រទេសផ្សេងច្រើនចូលរួម។

លោក ហ៊ុន ចន្ទរាជ បន្ថែមថា ៖«យើងសង្ឃឹមគាត់ (វ៉ាន់នីតា) ឈ្នះមេដាយមាស ដោយសារទម្ងន់ធ្ងន់នេះអត់សូវមានបេក្ខនារីច្រើនទេ»។

កីឡាការិនី គុណ វ៉ាន់នីតា និង Thiago

សម្រាប់កម្ពុជាបានត្រៀមអត្តពលិកទាំង១៦រូបរួចហើយគឺកីឡាករ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុន, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីតភូថង, ហាត ភី ខណៈកីឡាការិនីមានដូចជា ខៀវ ចិន្ដារ័ត្ន, នៅ ស្រីពៅ, គុណ វ៉ាន់នីតា, សំ ថារ័ត្ន និង ទួន ស្រីភីន។

ព្រឹត្តិការណ៍ប្រកួតគុនចម្រុះអាស៊ីគឺរៀបចំដោយគណៈកម្មាធិការជាតិអូឡាំពិកកម្ពុជា សហព័ន្ធកីឡាយុទ្ធគុនចម្រុះអាស៊ី (AMMA) និងសហព័ន្ធកីឡាយុទ្ធគុនចម្រុះកម្ពុជា។ គោលបំណងធំបំផុតនៃការរៀបចំព្រឹត្តិការណ៍នេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាផ្លូវការ ស្តង់ដាត្រឹមត្រូវដើម្បីចូលក្នុងព្រឹត្តិការណ៍កីឡាអាស៊ី និងកីឡាអូឡាំពិក។

អត្ថបទ៖ វីរបុត្រ

The post លោក ហ៊ុន ចន្ទរាជ ថា ច្បាប់ប្រកួត MMA អាស៊ីល្អសម្រាប់អ្នកកីឡាគុនខ្មែរ appeared first on Kampuchea Thmey Daily.

Thiago ដាក់គោលដៅមេដាយមាសពីកីឡាគុនចម្រុះអាស៊ី

chean virakbot — Wed, 03 Jul 2024 03:40:21 +0000

កីឡាករ សែន ចន្ទឬទ្ធីគុណ (Thiago Teixeira) បានដាក់គោលដៅយកមេដាយមាសក្នុងការប្រកួតកីឡាគុនចម្រុះជើងឯកអាស៊ី លើកទី២ ឆ្នាំ២០២៤ ដែលកម្ពុជាធ្វើជាម្ចាស់ផ្ទះនៅថ្ងៃទី១១-១២-១៣ ខែកក្កដា នៅវិមានពហុកីឡដ្ឋានជាតិអូឡាំពិក។

នេះជាការប្រកួតក្នុងព្រឹត្តិការណ៍ផ្លូវការជាលើកដំបូងសម្រាប់ Thiago បន្ទាប់ពីរូបគេទទួលបានសញ្ជាតិខ្មែរកាលពីខែមេសា ឆ្នាំ២០២៣។ សម្រាប់ការប្រកួតតំណាងជាតិលើកដំបូងនេះ លោកជឿជាក់លើសមត្ថភាពរបស់ខ្លួនដែលអាចនឹងទទួលបានសមិទ្ធផលជូនជាតិ។

ក្នុងបទសម្ភាសជាមួយសារព័ត៌មាន«កម្ពុជាថ្មី» កីឡាករវ័យច្រើន សែន ចន្ទឬទ្ធីគុណ បានបង្ហាញអារម្មណ៍រីករាយ និងមានមោទនភាព។ លោកបានឲ្យដឹងថា ៖«យើងបានខិតខំប្រឹងប្រែងហ្វឹកហាត់ខ្លាំងជារៀងរាល់ថ្ងៃ។ យើងបានហ្វឹកហាត់ក្នុងក្រុមអត្តពលិកកម្ពុជារួមគ្នា ហើយយើងបានព្យាយាមជួយគ្នាទៅវិញទៅមកដើម្បីកែលំអឲ្យកាន់តែប្រសើរឡើង»។

លោកបន្តថា ៖«ខ្ញុំធ្លាប់ហ្វឹកហាត់ក្បាច់គុនជឺជីតស៊ូជាង៥ឆ្នាំ និង MMA។ ខ្ញុំធ្លាប់ហ្វឹកហាត់នៅក្នុងក្លិបគុនអាជីព។ ដូច្នេះខ្ញុំមានការរីកចម្រើនផ្នែកជំនាញក្រោម បូករួមទាំងជំនាញវ៉ៃឈររបស់ខ្ញុំ និងគុនខ្មែរផង។ ខ្ញុំបានត្រៀមខ្លួនរួចរាល់សម្រាប់ការប្រកួតដើម្បីទទួលបានមេដាយមាស»។

ក្រៅពីការហ្វឹកហាត់ជាមួយគ្រូដែលមានជំនាញគុនចម្រុះច្បាស់ ការហ្វឹកហាត់ជាមួយមិត្តរួមជាតិគឺជាការចែករំលែកតាមបទពិសោធតាម និងជំនាញរៀងខ្លួន។ Thiago ប្រាប់ថា ៖«រាល់ថ្ងៃ យើងបានហ្វឹកហាត់ជាមួយគ្នា។ ចំណេះ ជំនាញ បទពិសោធដែលយើងមាន យើងតែងតែជួយគ្នាទៅវិញទៅមក។ ជាពិសេសយើងមានគ្រូបង្វឹកដែលមានខ្សែក្រវាត់ខ្មៅផ្នែកកីឡាជឺជីតស៊ូ។ គាត់មានបច្ចេកទេសច្រើន អីចឹងបានហ្វឹកហាត់ជារៀងរាល់ថ្ងៃ»។

Thiago បានប្តេជ្ញាថា ៖«ក្តីរំពឹងរបស់ខ្ញុំគឺធ្វើឲ្យបានល្អបំផុតតាមដែលអាចទៅរួច។ ខ្ញុំជឿជាក់លើព្រះជាម្ចាស់។ ខ្ញុំជឿជាក់លើខ្លួនឯង ស្មារតីរបស់ខ្ញុំខ្លាំងដែលខ្ញុំដាក់គោលដៅយកមេដាយមាស»។

ព្រឹត្តិការណ៍ប្រកួតគុនចម្រុះអាស៊ីគឺរៀបចំដោយគណៈកម្មាធិការជាតិអូឡាំពិកកម្ពុជា សហព័ន្ធកីឡាយុទ្ធគុនចម្រុះអាស៊ី (AMMA) និងសហព័ន្ធកីឡាយុទ្ធគុនចម្រុះកម្ពុជា។ នេះជាការប្រកូតផ្លូវការ ប៉ុន្តែមិនមែនជាការប្រកួតគុនចម្រុះអាជីពដូចសង្វៀនឯកជនរៀបចំដែលមានក្បាច់គ្រោះថ្នាក់ និងសាហាវៗនោះទេ។ គោលបំណងធំបំផុតនៃការរៀបចំព្រឹត្តិការណ៍នេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាផ្លូវការ ស្តង់ដាត្រឹមត្រូវដើម្បីចូលក្នុងព្រឹត្តិការណ៍កីឡាអាស៊ី និងកីឡាអូឡាំពិក។

ការប្រកួតគុនចម្រុះជើងឯកអាស៊ី លើកទី២ នៅប្រទេសកម្ពុជា ក៏ជាការប្រកួតជម្រុះដើម្បីជ្រើសរើសជ័យលាភីទៅចូលរួមប្រកួតក្នុងព្រឹត្តិការណ៍«កីឡាក្នុងសាល និងក្បាច់គុនអាស៊ី (Asian Indoor and Martial Arts Games) ឆ្នាំ២០២៤ នៅប្រទេសថៃនាខែវិច្ឆិកា។

ក្នុងនាមជាម្ចាស់ផ្ទះ កម្ពុជាបានត្រៀមអត្តពលិកទាំង១៦រូបគឺកីឡាករ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុណ, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីតភូថង, ហាត់ ភី ខណៈកីឡាការិនីមានដូចជា ខៀវ ចិន្ដារ័ត្ន, នៅ ស្រីពៅ, គុណ វ៉ាន់នីតា, សំ ថារ័ត្ន និង ទួន ស្រីភីន៕

អត្ថបទ៖ វីរបុត្រ

The post Thiago ដាក់គោលដៅមេដាយមាសពីកីឡាគុនចម្រុះអាស៊ី appeared first on Kampuchea Thmey Daily.

Asian Mixed Martial Arts Championship Archives - Kampuchea Thmey Daily

ដៃ​គូ​ប្រកួត​របស់​អត្តពលិក​កម្ពុជា​ថ្ងៃ​នេះ ជើង​ឯក​គុន​ចម្រុះ​អាស៊ី

ល្ងាចនេះ កម្ពុជាសម្តែង​យុទ្ធ​គុន​ខ្មែរបុរាណ​៦​ប្រភេទ​ដល់ភ្ញៀវ១៨ប្រទេស

កម្ពុជា​នឹងបង្ហាញ​ ទស្សនីយភាព​​​ប្លែក​មិន​ធ្លាប់​មាន​ក្នុង​ពិធី​បើក MMA ថ្ងៃស្អែក

ម៉ឺន មេឃា កំពុងចាប់អាជីពកីឡា៤ប្រភេទផ្សេងគ្នា

ការ​ប្រកួត​គុនចម្រុះ​អាស៊ី​នៅ​កម្ពុជា​បើក​ឲ្យមហាជន​ចូល​ទស្សនាឥតគិតថ្លៃ

ដើម្បី​ជាតិ កញ្ញា ទួន ស្រីភីន មិនខ្វល់​រឿង​គ្រោះ​ថ្នាក់ក្នុងការប្រកួតគុនចម្រុះអាស៊ី

លោក​ ហ៊ុន ចន្ទរាជ​ ថា ច្បាប់​ប្រកួត MMA អាស៊ី​ល្អ​សម្រាប់អ្នកកីឡាគុនខ្មែរ

Thiago ដាក់គោលដៅ​មេដាយមាសពីកីឡាគុនចម្រុះអាស៊ី

ដៃគូប្រកួតរបស់អត្តពលិកកម្ពុជាថ្ងៃនេះ ជើងឯកគុនចម្រុះអាស៊ី

ល្ងាចនេះ កម្ពុជាសម្តែងយុទ្ធគុនខ្មែរបុរាណ៦ប្រភេទដល់ភ្ញៀវ១៨ប្រទេស

កម្ពុជានឹងបង្ហាញ ទស្សនីយភាពប្លែកមិនធ្លាប់មានក្នុងពិធីបើក MMA ថ្ងៃស្អែក

ការប្រកួតគុនចម្រុះអាស៊ីនៅកម្ពុជាបើកឲ្យមហាជនចូលទស្សនាឥតគិតថ្លៃ

ដើម្បីជាតិ កញ្ញា ទួន ស្រីភីន មិនខ្វល់រឿងគ្រោះថ្នាក់ក្នុងការប្រកួតគុនចម្រុះអាស៊ី

លោក ហ៊ុន ចន្ទរាជ ថា ច្បាប់ប្រកួត MMA អាស៊ីល្អសម្រាប់អ្នកកីឡាគុនខ្មែរ

Thiago ដាក់គោលដៅមេដាយមាសពីកីឡាគុនចម្រុះអាស៊ី