កីឡា

លោក ហ៊ុន ចន្ទរាជ ថា ច្បាប់ប្រកួត MMA អាស៊ីល្អសម្រាប់អ្នកកីឡាគុនខ្មែរ

បានផុស

៩ ខែ មុន

នៅ

ថ្ងៃព្រហស្បតិ៍ ៤ កក្កដា ២០២៤

ដោយ

លោក ហ៊ុន ចន្ទរាជ ជាគ្រូបង្វឹក និងជាកីឡាករផងបានចាត់ទុកច្បាប់ប្រកួតគុនចម្រុះជើងឯកអាស៊ី (Asian Mixed Martial Arts Championship) មានអំណោយផលល្អសម្រាប់កីឡាករ កីឡាការិនីគុនខ្មែរនៅពេលកម្ពុជាធ្វើជាម្ចាស់ផ្ទះនាថ្ងៃទី១១-១២-១៣ ខែកក្កដា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រូបង្វឹកដែលមានបទពិសោធច្រើនបានឲ្យដឹងថា ការប្រកួតគុនចម្រុះអាស៊ីនេះមិនដូចការប្រកួតគុនចម្រុះអាជីពដែលរៀបចំតាមសង្វៀនឯកជនទេ។ ការប្រកួតនេះ គណៈកម្មការបានដកក្បាច់ណាដែលគ្រោះថ្នាក់ ហើយការដេកអោបគ្នាលើក្តារទីលានបានត្រឹមតែរយៈពេល១៦វិនាទីប៉ុណ្ណោះ។ អាជ្ញាកណ្តាលនឹងបំបែកឲ្យឈរប្រកួតឡើងវិញ។ ការកំណត់ច្បាប់ប្រកួតបែបនេះដើម្បីជំរុញកីឡា MMA ចូលក្នុងព្រឹត្តិការណ៍ផ្លូវការដូចជា កីឡាស៊ីហ្គេម កីឡាអាស៊ី ឬកីឡាអូឡាំពិក។

លោក ហ៊ុន ចន្ទរាជ បាននិយាយថា ៖«ខ្ញុំគិតថា ច្បាប់ MMA នេះ វាស្រួលសម្រាប់កីឡាករគុនខ្មែរយើង។ និយាយទៅអត់គ្រោះថ្នាក់អ្វីទេ។ គេធ្វើឲ្យមានសុវត្ថិភាពខ្ពស់»។

អ្នកលេងគុនខ្មែរមានបទពិសោធច្រើន បូករួមទាំងការហ្វឹកហាត់គុនចម្រុះថែមទៀតនោះបានធ្វើឲ្យថ្នាក់ដឹកនាំ និងគ្រូបង្វឹកមានក្តីសង្ឃឹមខ្ពស់ក្នុងការទទួលបានមេដាយក្នុងនាមជាម្ចាស់ផ្ទះ។

លោកបានឲ្យដឹងថា ៖«យើងបានប្រមូលផ្តុំហ្វឹកហាត់តាំងពីខែមេសា។ ខ្ញុំមើលឃើញថា កីឡាករ កីឡាការិនីជម្រើសជាតិយើងទាំងអស់មានការរីកចម្រើនខ្លាំង។ កីឡាករមួយចំនួននឹងធ្វើបានល្អ ហើយអាចឈានដល់វគ្គផ្តាច់ព្រ័ត្រ។ អ្នកថ្មីៗក៏យើងសង្ឃឹមដែរ ពីព្រោះពួកគាត់យកចិត្តទុកដាក់ បច្ចេកទេសក៏ល្អ។ ជាពិសេសកីឡាករដែលប្រកួតវិញ្ញាសាទម្ងន់ស្រាល គឺសង្ឃឹមខ្ពស់»។

ក្នុងចំណោមកីឡាការិនី៥រូប លោកគ្រូ ហ៊ុន ចន្ទរាជ មានសង្ឃឹមច្រើនចំពោះកីឡាការិនី គុណ វ៉ាន់នីតា ដែលប្រកួតវិញ្ញាសាទម្ងន់ក្រោម៧០គីឡូក្រាម។ លោកបានឲ្យដឹងថា ដោយសារវិញ្ញាសាទម្ងន់ធ្ងន់មិនសូវមានកីឡាការិនីពីបណ្តាប្រទេសផ្សេងច្រើនចូលរួម។

លោក ហ៊ុន ចន្ទរាជ បន្ថែមថា ៖«យើងសង្ឃឹមគាត់ (វ៉ាន់នីតា) ឈ្នះមេដាយមាស ដោយសារទម្ងន់ធ្ងន់នេះអត់សូវមានបេក្ខនារីច្រើនទេ»។

សម្រាប់កម្ពុជាបានត្រៀមអត្តពលិកទាំង១៦រូបរួចហើយគឺកីឡាករ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុន, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីតភូថង, ហាត ភី ខណៈកីឡាការិនីមានដូចជា ខៀវ ចិន្ដារ័ត្ន, នៅ ស្រីពៅ, គុណ វ៉ាន់នីតា, សំ ថារ័ត្ន និង ទួន ស្រីភីន។

ព្រឹត្តិការណ៍ប្រកួតគុនចម្រុះអាស៊ីគឺរៀបចំដោយគណៈកម្មាធិការជាតិអូឡាំពិកកម្ពុជា សហព័ន្ធកីឡាយុទ្ធគុនចម្រុះអាស៊ី (AMMA) និងសហព័ន្ធកីឡាយុទ្ធគុនចម្រុះកម្ពុជា។ គោលបំណងធំបំផុតនៃការរៀបចំព្រឹត្តិការណ៍នេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាផ្លូវការ ស្តង់ដាត្រឹមត្រូវដើម្បីចូលក្នុងព្រឹត្តិការណ៍កីឡាអាស៊ី និងកីឡាអូឡាំពិក។

ការប្រកួតគុនចម្រុះជើងឯកអាស៊ី លើកទី២ នៅប្រទេសកម្ពុជា ក៏ជាការប្រកួតជម្រុះដើម្បីជ្រើសរើសជ័យលាភីទៅចូលរួមប្រកួតក្នុងព្រឹត្តិការណ៍«កីឡាក្នុងសាល និងក្បាច់គុនអាស៊ី (Asian Indoor and Martial Arts Games) នាខែវិច្ឆិកា ឆ្នាំ២០២៤ នៅប្រទេសថៃ៕