Cambodian Premier Youth League Archives - Kampuchea Thmey Daily

សហព័ន្ធបញ្ជាក់៖«តាមបច្ចេកទេស លីគយុវជននឹងធ្វើរាល់ឆ្នាំ»

chean virakbot — Wed, 24 Apr 2024 01:15:42 +0000

សហព័ន្ធកីឡាបាល់ទាត់កម្ពុជានឹងរៀបចំការប្រកួតបាល់ទាត់លីគបាល់ទាត់យុវជនជារៀងរាល់ឆ្នាំ ប្រសិនបើគ្មានឧបសគ្គរាំងស្ទះដល់ការរៀបចំ។

សម្រាប់ការចាប់ផ្តើមរដូវកាលដំបូង សហព័ន្ធកីឡាបាល់ទាត់កម្ពុជានឹងរៀបចំការប្រកួតលីគយុវជនចំនួន២កម្រិតផ្សេងគ្នាគឺ លីគយុវជនអាយុក្រោម១៦ឆ្នាំ និងលីគយុវជនអាយុក្រោម១៩ឆ្នាំ ដែលនឹងមានក្លិប សមាគមបាល់ទាត់ចំនួន១១ចូលរួមប្រកួតប្រជែង។ ការប្រកួតគ្រោងនឹងធ្វើជារៀងរាល់ឆ្នាំ ប្រសិនបើគ្មានបញ្ហារាំងស្ទះ។

លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាបានប្រាប់សារព័ត៌មាន«កម្ពុជាថ្មី»ថា កន្លងមកធ្លាប់រៀបចំការប្រកួតជើងឯកយុវជនដែរ ប៉ុន្តែមិនបានទៀងទាត់រាល់ឆ្នាំទេដោយសារខ្វះថវិកា និងវិបត្តិកូវីដ-១៩ផង។

លោកមានប្រសាសន៍ថា ៖«យើងមានជម្រើសខាងផ្នែកបច្ចេកទេស ហើយក៏អាស្រ័យទៅលើហិរញ្ញវត្ថុដែរ។ ការប្រកួតលីគយុវជននេះ បើតាមតម្រូវការខាងបច្ចេកទេសគឺយើងមានផែនការរៀបចំការប្រកួតជារៀងរាល់ឆ្នាំ ក៏ប៉ុន្តែដូចកន្លងមកអីចឹង យើងបានខកខាន។ ទី១ដោយសារមានវិបត្តិកូវីដ-១៩ ហើយទី២មានវិបត្តិហិរញ្ញវត្ថុ។ យើងអត់មានអ្នកឧបត្ថម្ភ។ ម្យ៉ាងទៀត ខាង FIFA គ្មានកញ្ចប់ថវិកាសម្រាប់រៀបចំការប្រកួតលីគយុវជនទេ។ បើរៀបចំយើងត្រូវចំណាយដោយខ្លួនឯង។ នេះហើយជាបញ្ហាប្រឈម ប៉ុន្តែបើយើងមានកញ្ចប់ថវិកា យើងនឹងធ្វើជារៀងរាល់ឆ្នាំ»។

លីគយុវជនអាយុក្រោម១៦ឆ្នាំមាន១០ក្រុមចូលរួមប្រកួត

យុវជនណាហ្គាវើលដ៍
សមាគមកីឡាបាល់ទាត់ខេមរភូមិ
អង្គរថាយហ្គឺរ
ព្រះខ័នរាជស្វាយរៀង
ភ្នំពេញក្រោន
វិសាខា
ISI ដង្កោសែនជ័យ
បឹងកេត
សាលាតម្រង់ទិសរាជធានីភ្នំពេញអាយុ១៥ឆ្នាំ និង
ក្លិបសៀមរាប យូណាយធីត

លីគយុវជនអាយុ១៩ឆ្នាំក៏មានក្រុម១០ចូលរួមប្រកួត

ណាហ្គាវើលដ៍
សមាគមកីឡាបាល់ទាត់ខេមរភូមិន្ទ
អង្គរថាយហ្គឺរ
ព្រះខ័នរាជស្វាយរៀង
ភ្នំពេញក្រោន
វិសាខា
ISI ដង្កោសែនជ័យ
បឹងកេត
សាលាតម្រង់ទិសរាជធានីភ្នំពេញអាយុ១៨ឆ្នាំ
សាលាបាល់ទាត់ជាតិបាទីអាយុ១៦ឆ្នាំ

តាមការគ្រោងទុក កម្មវិធីប្រកួតលីគយុវជនកម្ពុជានឹងចាប់ផ្តើមនៅថ្ងៃទី១៩ ខែឧសភា ឆ្នាំ២០២៤។ រូបមន្តនៃការប្រកួតគឺវិលជុំសន្សំពិន្ទុ២ជើង (ក្នុងដី និងក្រៅដី) មុនពេលយកក្រុមកំពូលទាំង៤ឡើងទៅប្រកួតជុំទី៣ដែលមាន៣ប្រកួតទៀត។ ក្រុមមានពិន្ទុខ្ពស់ជាងគេជាជើងឯក៕

អត្ថបទ៖ វីរបុត្រ

The post សហព័ន្ធបញ្ជាក់៖«តាមបច្ចេកទេស លីគយុវជននឹងធ្វើរាល់ឆ្នាំ» appeared first on Kampuchea Thmey Daily.

នេះជាអ្វីដែលអ្នកគាំទ្រចង់ឃើញ លីគយុវជនគ្រោងចាប់ផ្តើមខែឧសភា

chean virakbot — Sat, 20 Apr 2024 01:36:00 +0000

សហព័ន្ធកីឡាបាល់ទាត់កម្ពុជានឹងរៀបចំការប្រកួតបាល់ទាត់ជើងឯកខេមបូឌានលីគយុវជន នៅខែឧសភា ឆ្នាំ២០២៤នេះដោយមាន២កម្រិតអាយុផ្សេងគ្នាគឺ លីគយុវជនអាយុក្រោម១៦ឆ្នាំ និងលីគយុវជនអាយុក្រោម១៩ឆ្នាំ។

តាមការគ្រោងទុក លីគយុវជនអាយុក្រោម១៦ឆ្នាំមាន១០ក្រុមក្នុងនោះ ក្រុមបាល់ទាត់សាលាតម្រង់ទិសរាជធានីភ្នំពេញអាយុក្រោម១៥ឆ្នាំ ខណៈលីគយុវជនអាយុក្រោម១៩ឆ្នាំក៏មាន១០ក្រុម ក្នុងនោះក្រុមសាលាបាល់ទាត់ជាតិបាទីអាយុ១៥ឆ្នាំ និងក្រុមសាលាតម្រង់ទិសរាជធានីភ្នំពេញអាយុ១៨ឆ្នាំ។

ការបង្កើតឲ្យមានការប្រកួតលីគយុវជន ឬកម្មវិធីប្រកួតកម្រិតយុវជនទៀងទាត់គឺជាមូលដ្ឋានគ្រឹះដ៏សំខាន់ក្នុងការអភិវឌ្ឍបាល់ទាត់ទាំងក្រុមឯកជន និងក្រុមជម្រើសជាតិ។

លោក Kazunori Ohara អតីតនាយកបច្ចេកទេសរបស់សហព័ន្ធកីឡាបាល់ទាត់កម្ពុជាធ្លាប់បានប្រាប់សារព័ត៌មាន«កម្ពុជាថ្មី»ថា ការអភិវឌ្ឍបាល់ទាត់យុវជនកម្ពុជាមានបញ្ហាប្រឈមច្រើនទាំងនៅសាលាបាល់ទាត់ជាតិបាទី និងសាលាតម្រង់ទិស២៥ខេត្តក្រុង ពីព្រោះមានតែកម្មវិធីហ្វឹកហាត់ ប៉ុន្តែខ្វះកម្មវិធីប្រកួតជាក់ស្តែងទៀងទាត់។

លោក Oleg Starynskyi គ្រូបង្វឹកភ្នំពេញក្រោននៅពេលផ្តល់បទសម្ភាសជាមួយ«កម្ពុជាថ្មី»បានលើកឡើងថា រឿងមួយដែលលោកខកចិត្តគឺមិនទាន់មានការប្រកួតកម្រិតយុវជនឲ្យបានទៀងទាត់ ចាប់តាំងពីលោកបានមកស្នាក់នៅប្រទេសកម្ពុជាតាំងពីឆ្នាំ២០១៦។ លោកបានសង្កត់ធ្ងន់ថា ក្រុមបាល់ទាត់ជម្រើសជាតិមួយមិនអាចខ្លាំងបានទេ ប្រសិនបើខ្វះការអភិវឌ្ឍ និងប្រកួតប្រជែងកម្រិតយុវជន។

លីគយុវជនអាយុក្រោម១៦ឆ្នាំ (?–??)

បឹងកេត
វិសាខា
ព្រះខ័នរាជស្វាយរៀង
សមាគមកីឡាបាល់ទាត់ក្រសួងការពារជាតិ
អាយអេសអាយ ដង្កោសែនជ័យ
ភ្នំពេញក្រោន
ណាហ្គាវើលដ៍
អង្គរថាយហ្គឺរ
សៀមរាប យូណាយធីត
សាលាតម្រង់ទិសរាជធានីភ្នំពេញ

លីគយុវជន អាយុក្រោម ១៩ឆ្នាំ (?–??)

បឹងកេត
វិសាខា
ព្រះខ័នរាជស្វាយរៀង
សមាគមកីឡាបាល់ទាត់ក្រសួងការពារជាតិ
អាយអេសអាយ ដង្កោសែនជ័យ
ភ្នំពេញក្រោន
ណាហ្គាវើលដ៍
អង្គរថាយហ្គឺរ
សាលាបាល់ទាត់ជាតិបាទីអាយុ១៥ឆ្នាំ
សាលាតម្រង់ទិសរាជធានីភ្នំពេញអាយុ១៨ឆ្នាំ

បើគ្មានការប្រែប្រួលទេ កម្មវិធីប្រកួតលីគយុវជនកម្ពុជាគ្រោងនឹងចាប់ផ្តើមនៅខែឧសភា ឆ្នាំ២០២៤។ ការបង្កើតឲ្យមានលីគយុវជនពិតជាសំខាន់ណាស់សម្រាប់កម្ពុជាក្នុងប្រកួតពានរង្វាន់អន្តរជាតិទាំងកម្រិតអាស៊ាន និងអាស៊ី ជាពិសេសកម្ពុជាដាក់គោលដៅឆ្ពោះទៅជុំចុងក្រោយជើងឯកពិភពលោក ឆ្នាំ២០៣៨៕

អត្ថបទ៖ វីរបុត្រ

The post នេះជាអ្វីដែលអ្នកគាំទ្រចង់ឃើញ លីគយុវជនគ្រោងចាប់ផ្តើមខែឧសភា appeared first on Kampuchea Thmey Daily.

Cambodian Premier Youth League Archives - Kampuchea Thmey Daily

សហព័ន្ធបញ្ជាក់៖«តាមបច្ចេកទេស លីគយុវជននឹងធ្វើរាល់ឆ្នាំ»

នេះជាអ្វីដែលអ្នកគាំទ្រ​ចង់ឃើញ លីគយុវជនគ្រោងចាប់ផ្តើមខែឧសភា

នេះជាអ្វីដែលអ្នកគាំទ្រចង់ឃើញ លីគយុវជនគ្រោងចាប់ផ្តើមខែឧសភា