ធ្វើបានយ៉ាងល្អ Faris Hammouti បង្ហាញខ្លួនដំបូងឲ្យ ព្រះខ័នរាជស្វាយរៀង

chean virakbot — Fri, 22 Aug 2025 01:53:12 +0000

ខ្សែការពារចំណូលថ្មី Faris Hammouti របស់ក្លិបបាល់ទាត់ព្រះខ័នរាជស្វាយរៀង ធ្វើបានយ៉ាងល្អសម្រាប់ការបង្ហាញខ្លួនលើកដំបូងឲ្យក្លិបក្នុងពានរង្វាន់ក្លិបកំពូលអាស៊ាន ASEAN Club Championship យប់ថ្ងៃទី២១ ខែសីហា ឆ្នាំ ២០២៥។

កីឡាករ Faris Hammouti ត្រូវបានក្លិបព្រះខ័នរាជស្វាយរៀង នាំចូលក្នុងនាមជាកីឡាករលេងពានរង្វាន់អន្តរជាតិ ដោយរូបគេជាកីឡាករបរទេសទី៧ ខណៈពានរង្វាន់ក្នុងស្រុកអនុញ្ញាតឲ្យចុះឈ្មោះកីឡាករបរទេសតែ ៦ នាក់ប៉ុណ្ណោះ។

សម្រាប់ការប្រកួតពានរង្វាន់អន្តរជាតិផ្លូវការជាលើកដំបូង ព្រះខ័នរាជស្វាយរៀង បានដាក់ខ្សែការពាររូបនេះឲ្យពេញម៉ោងតែម្តង។ វត្តមានរបស់កីឡាករហូឡង់-ម៉ារ៉ុករូបនេះផ្តល់ឱកាសឲ្យខ្សែការពារ សឿយ វិសាល និង សុផល ឌីម៉ង់ បានសម្រាក។ រូបគេបានក្លាយជាចំណែកដ៏សំខាន់នៅតំបន់ការពារតាមរយៈបច្ចេកទេសច្បាស់ៗ និងមានទំនុកចិត្ត ហើយអាចរួមចំណែកជួយដល់បម្រើកណ្តាលថែមទៀត។ មិនថាបាល់លើ ឬក្រោមទេគឺរូបគេធ្វើបានយ៉ាងល្អ។

កីឡាករ Faris Hammouti អាយុ ២៨ ឆ្នាំ កម្ពស់ ១.៨៦ម៉ែត្រ កើតនៅប្រទេសហូឡង់ ប៉ុន្តែកាលពីយុវជន រូបគេលេងឲ្យជម្រើសជាតិម៉ារ៉ុក។ កីឡាករធ្លាប់លេងឲ្យក្លិប Jong Almere City ពីឆ្នាំ ២០១៧-១៨ និងក្លិប Almere City ពីឆ្នាំ ២០១៨-២២ នៅប្រទេសហូឡង់។ បន្ទាប់មក រូបគេចូលរួមជាមួយក្លិប Den Bosch និង Emmen នៃលីគលំដាប់ទី២ប្រទេសហូឡង់ពីឆ្នាំ ២០២២-២៤ មុនពេលចូលរួមជាមួយ ព្រះខ័នរាជស្វាយរៀង នៅឆ្នាំ ២០២៥។

កីឡាករ Faris Hammouti ធ្លាប់លេងឲ្យជម្រើសជាតិម៉ារ៉ុកអាយុ ២០ឆ្នាំ កាលពីឆ្នាំ ២០១៧។

សូមបញ្ជាក់ថា ព្រះខ័នរាជស្វាយរៀង បានយកឈ្នះ Shan United ដោយលទ្ធផល ៣-០ សម្រាប់ការប្រកួតបើកឆាកពានរង្វាន់ក្លិបកំពូលអាស៊ាន ASEAN Club Championship យប់ថ្ងៃទី២១ ខែសីហា ឆ្នាំ ២០២៥។ ការប្រកួតទី២ ពួកគេនឹងធ្វើដំណើរទៅប្រទេសវៀតណាម ប៉ះ ក្រុម Nam Dinh នៅថ្ងៃទី២៥ ខែកញ្ញា ឆ្នាំ ២០២៥។ ការប្រកួតទី៣ ព្រះខ័នរាជស្វាយរៀង ទទួលក្រុមខ្លាំងម៉ាឡេស៊ី Johor Darul Tazim នៅពហុកីឡដ្ឋានជាតិ មរតកតេជោ ថ្ងៃទី៤ ខែធ្នូ ឆ្នាំ ២០២៥។ ការប្រកួតទី៤ ទទួលក្រុមខ្លាំងរបស់ថៃ Bangkok United នៅពហុកីឡដ្ឋានជាតិ មរតកតេជោ ថ្ងៃទី២៩ ខែមករា ឆ្នាំ ២០២៦ និងចុងក្រោយធ្វើដំណើរទៅប្រទេសសិង្ហបុរី ប៉ះក្រុម Lion City Sailors នៅថ្ងៃទី៥ ខែកុម្ភៈ ឆ្នាំ ២០២៦៕

អត្ថបទ៖ វីរបុត្រ

The post ធ្វើបានយ៉ាងល្អ Faris Hammouti បង្ហាញខ្លួនដំបូងឲ្យ ព្រះខ័នរាជស្វាយរៀង appeared first on Kampuchea Thmey Daily.

ព្រះខ័នរាជស្វាយ នាំចូលអតីតយុវជន Feyenoord ត្រៀមលេងពានអន្តរជាតិ

Kosal Sem — Fri, 01 Aug 2025 06:50:15 +0000

ក្លិបបាល់ទាត់ព្រះខ័នរាជស្វាងរៀង បានប្រកាសនាំចូលកីឡាករបរទេសថ្មីម្នាក់ទៀត នៅថ្ងៃ ព្រហស្បតិ៍ ទី ៣១ ខែ កក្កដា ឆ្នាំ ២០២៥ គឺកីឡាករជនជាតិ ម៉ារ៉ុក សញ្ជាតិ ហូល្លង់ Faris Hammouti។

Faris Hammouti

Faris Hammouti អាយុ ២៨ឆ្នាំ ដែលលេងតួនាទីជាខ្សែការពារស្លាបស្តាំ ធ្លាប់មានបទពិសោធជោគជាំ ក្នុងការលេងនៅលីគក្នុងប្រទេស ហូល្លង់។ រូបគេបានចាប់ផ្តើមអាជីពដំបូងជាយុវជនថ្នាលរបស់ក្លិប Feyenoord។ លុះដល់ឆ្នាំ ២០១៧ រូបគេបានផ្លាស់ទៅកាន់ក្លិបក្នុងលីគទី ២ ហូល្លង់ Amere City ពីឆ្នាំ ២០១៧ ដល់ ២០២២។

ក្រោយមក រូបគេបានផ្លាស់ទៅចូលរួមជាមួយក្លិប FC Den Bosch ២ រដូវកាលពីឆ្នាំ ២០២២ ដល់ ២០២៤។ បន្ទាប់មកទៀតនៅរដូវកាល ២០២៤-២០២៥ រូបគេបានផ្លាស់ទៅកាន់ក្លិប FC Emmen ក្នុងលីគទី ២ ហូល្លង់ មួយរដូវកាល មុនផ្លាស់មកកាន់ក្លិប ព្រះខ័នរាជស្វាយរៀង នៅរដូវកាលនេះ។

Faris Hammouti

គួរឱ្យដឹងថា ក្លិបព្រះខ័នរាជស្វាយរៀង បានបំពេញលក្ខខណ្ឌនាំចូលកីឡាករបរទេសគ្រប់ ៦ នាក់រួចរាល់ហើយសម្រាប់ការប្រកួតប្រជែងពានលីគកំពូលកម្ពុជា Cambodian Premier League និងពានសម្តេចតេជោ ហ៊ុន សែន ប៉ុន្តែការនាំចូលកីឡាករ Faris Hammouti ម្នាក់ទៀត គឺដើម្បីត្រៀមលេងពានអន្តរជាតិដូចជា AFC Challenge League និងពាន ASEAN Club Championship Shopee Cup៕

Faris Hammouti

អត្ថបទ៖ សេម កុសល

The post ព្រះខ័នរាជស្វាយ នាំចូលអតីតយុវជន Feyenoord ត្រៀមលេងពានអន្តរជាតិ appeared first on Kampuchea Thmey Daily.

Faris Hammouti Archives - Kampuchea Thmey Daily

ធ្វើ​បាន​យ៉ាង​ល្អ Faris Hammouti បង្ហាញ​ខ្លួន​ដំបូង​ឲ្យ​ ​ព្រះ​ខ័ន​រាជ​ស្វាយរៀង

ព្រះខ័នរាជស្វាយ នាំចូលអតីតយុវជន Feyenoord ត្រៀមលេងពានអន្តរជាតិ

ធ្វើបានយ៉ាងល្អ Faris Hammouti បង្ហាញខ្លួនដំបូងឲ្យ ព្រះខ័នរាជស្វាយរៀង