ព័ត៌មានអន្ដរជាតិ

អាមេរិកបង្កើនវត្តមានកងទ័ពនិងយុទ្ធោបករណ៍នៅជិតវ៉េណេស៊ុយអេឡាយ

បានផុស

៦ ខែ មុន

នៅ

ថ្ងៃព្រហស្បតិ៍ ៤ ធ្នូ ២០២៥

ដោយ

សហរដ្ឋអាមេរិកបានបង្កើនវត្តមានយោធារបស់ខ្លួនបន្ថែមទៀត នៅដែលអធិបតេយ្យ ព័រតូរីកូ (Puerto Rico) ដែលគ្រប់គ្រង់ដោយសហរដ្ឋអាមេរិក នៅតំបន់សមុទ្រការ៉ាប៊ីន ជិតប្រទេសវ៉េណេស៊ុយអេឡា ដោយការដាក់ពង្រាយយន្តហោះ Osprey នាវាកងទ័ពជើងទឹក និងពលទាហាន ស្របពេលដែលក្រុងវ៉ាស៊ីនតោនបង្កើនសម្ពាធលើវ៉េណេស៊ុយអេឡាកាន់តែខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកើនឡើងនេះកើតឡើងប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីវ៉េណេស៊ុយអេឡា លោក នីកូលាស់ ម៉ាឌូរ៉ូ (Nicolas Maduro) បានបញ្ជាក់ការហៅទូរស័ព្ទ «ប្រកបដោយការគោរព និងស្និទ្ធស្នាល» ជាមួយប្រធានាធិបតីអាមេរិក លោក ដូណាល់ ត្រាំ (Donald Trump) ដែលលោកបានចាត់ទុកថាជាការបើកសក្តានុពលសម្រាប់ការទូត។

ផ្ទុយទៅវិញ ប្រធានាធិបតីសហរដ្ឋមអាមេរិក លោក ដូណាល់ ត្រាំ បានបង្កើនការដាក់សម្ពាធឲ្យលោក ម៉ាឌូរ៉ូ បោះបង់អំណាចនៅវ៉េណេស៊ុយអេឡា ហើយថា ការវាយប្រហារចូលប្រទេសនេះនឹងធ្វើឡើងក្នុងពេលឆាប់ៗ ប៉ុន្តែលោក មិនបានបញ្ជាក់ពីពេលវេលាជាក់លាក់នោះទេ។

រ៉យទ័របានរាយការណ៍កាលពីថ្ងៃចន្ទដោយដកស្រង់ប្រភពចំនួនបួនដែល បានដឹងពីការហៅទូរស័ព្ទរវាងលោក ម៉ាឌូរ៉ូ និង លោកត្រាំ ថា ម៉ាឌូរ៉ូ បានប្រាប់ លោក ត្រាំ ថាគាត់សុខចិត្តចាកចេញពីប្រទេសវេណេស៊ុយអេឡា ប្រសិនបើគាត់និងគ្រួសាររបស់គាត់ទទួលបានការលើកលែងទោសតាមផ្លូវច្បាប់ពេញលេញ រួមទាំងការដកទណ្ឌកម្មរបស់សហរដ្ឋអាមេរិក និងការបញ្ចប់សំណុំរឿងដ៏លេចធ្លោមួយនៅចំពោះមុខតុលាការឧក្រិដ្ឋកម្មអន្តរជាតិ។

ការចង់បានរបស់លោក ម៉ាឌូរ៉ បែបនេះ ធ្វើឡើងបន្ទាប់ពីសម្ពាធរបស់សហរដ្ឋអាមេរិកជាច្រើនខែមកលើប្រទេសវ៉េណេស៊ុយអេឡា រួមទាំងការវាយប្រហារប្រឆាំងនឹងទូករត់ពន្ធគ្រឿងញៀន ការគំរាមកំហែងនៃសកម្មភាពយោធា និងការចាត់តាំងក្រុម Cartel de los Soles ជាក្រុមភេរវករបរទេស៕

រ៉ាន់ រើយ