ឆ្លងចរន្តអគ្គិសនីឆេះរោងចក្រផលិតស័ង្កសី គាបស្នោ ១ កន្លែង រងការខូចខាត នៅសង្កាត់ត្រពាំងក្រសាំង

កាលពីវេលាម៉ោង ២ និង ២០ នាទីរសៀល ថ្ងៃទី ២៩ ខែឧសភា ឆ្នាំ ២០២៦ ម្សិលមិញ រោងចក្រផលិតស័ង្កសី គាបស្នោ (KO PVC) ១ កន្លែង ស្ថិតនៅផ្លូវឆេកូ ភូមិក្រាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ត្រូវបានអគ្គិភ័យឆាបឆេះយ៉ាងសន្ធោសន្ធៅរងការខូចខាត ដោយមូលហេតុបណ្តាលមកពីឆ្លងចរន្តអគ្គិសនី។

ម្ចាស់ទីតាំងឈ្មោះ ហុង ប៉ាវម៉េង ភេទប្រុស អាយុ ៥៤ ឆ្នាំ ជនជាតិខ្មែរ មុខរបរម្ចាស់រោងចក្រ។ ទីតាំងខាងលើប្រភេទសំណង់ ថ្មដែកប្រក់ស័ង្កសី ទំហំ ៣០០០ ម៉ែត្រការ៉េ ដោយឃ្លាំងទំហំ (១៥ ម៉ែត្រ x ២៥ ម៉ែត្រ) សម្ភារ រួមមាន ៖ អ៊ីស៊ីឡុងចំនួន ១០ តោន និង ម៉ាស៊ីនផលិតគ្រាប់ជ័រចំនួន ៤ គ្រឿង។

ក្នុងវង្វង់ប្រតិបត្តិការនេះ ប្រើប្រាស់រថយន្តការិយាល័យពន្លត់អគ្គិភ័យស្នងការដ្ឋាននគរបាលរាជធានីចំនួន ២៣ គ្រឿង ប្រើប្រាស់ទឹកអស់ចំនួន ១៥ គ្រឿង ស្មើនឹង ៩០ ម៉ែត្រគូប។ រថយន្តអគ្គិភ័យកងពលតូចង ៧០ ចំនួន ៨ គ្រឿង ប្រើប្រាស់ទឹកអស់ចំនួន ៤គ្រឿង ស្មើនឹង ២៤ ម៉ែត្រគូប។ រថយន្តអគ្គិភ័យតម្រួតបទបញ្ជា ១ គ្រឿង ប្រើប្រាស់ទឹកអស់ចំនួន ១គ្រឿង ស្មើនឹង ៦ ម៉ែត្រគូប។ រថយន្តអគ្គិភ័យក្រុមហ៊ុនស្រាបៀរកម្ពុជា ១ គ្រឿង ប្រើប្រាស់ទឹកអស់ចំនួន ១ គ្រឿង ស្មើនឹង ៦ ម៉ែត្រគូប។ រថយន្តអគ្គិភ័យ បុរី ប៉េង ហួត ចំនួន ២ គ្រឿង ពុំបានប្រើប្រាស់ទឹក។

គ្រោះអគ្គិភ័យខាងលើមិនមានមនុស្សរងរបួស និង រាលដាលដល់ផ្ទះអ្នកជិតខាងនោះឡើយ ដោយពន្លត់ចប់កាលពីវេលាម៉ោង ១៥ និង ២០ នាទីរសៀល នាថ្ងៃខែឆាំ្នដដែល៕
អត្ថបទ ៖ សុខា