ហ្សេលេនស្គី ប្រាប់​ថា ការពិភាក្សាជាមួយបេសកជន​អាមេរិក ប្រព្រឹត្តទៅ«យ៉ាងល្អប្រសើរ»

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បាន​​លើក​ឡើង​កាលពីថ្ងៃព្រហស្បតិ៍​ទី​២៥​ខែ​ធ្នូ​ឆ្នាំ​២០២៥​ថា លោកបានជួបពិភាក្សា«យ៉ាងល្អប្រសើរ» ជាមួយលោក Steve Witkoff និងលោក Jared Kushner ដែល​ជា​បេសកជនរបស់ប្រធានាធិបតី​អាមេរិក ដូណាល់ ត្រាំ ខណៈកិច្ចខិតខំប្រឹងប្រែងផ្នែកការទូតកំពុងបន្តស្វែងរកដំណោះស្រាយបញ្ចប់សង្គ្រាមរបស់រុស្ស៊ីនៅអ៊ុយក្រែន។

យោង​តាម France24 នៅក្នុងការបង្ហោះលើបណ្តាញសង្គម លោកហ្សេលេនស្គី បានលើកឡើងថា ការពិភាក្សាបានផ្តោតលើ «ព័ត៌មានលម្អិតសំខាន់ៗ» នៃការចរចា និងរួមបញ្ចូលនូវគំនិតទាំងឡាយណាដែលលោកយល់ថា អាចរួមចំណែកដល់ «លទ្ធផលរួម និងសន្តិភាពយូរអង្វែង»។

លោកបានថ្លែងអំណរគុណដល់បេសកជនទាំងពីរ ចំពោះអ្វីដែលលោកបានពណ៌នាថាជាវិធីសាស្ត្រប្រកបដោយន័យស្ថាបនា និងសកម្ម ដោយលោកបញ្ជាក់ថា «មានគំនិតល្អៗជាច្រើនដែលអាចសម្រេចបាននូវលទ្ធផលរួមមួយ»។

ការអត្ថាធិប្បាយនេះបានធ្វើឡើងមួយថ្ងៃបន្ទាប់ពីលោកហ្សេលេនស្គី បាននិយាយថា អ៊ុយក្រែនទទួលបានការយល់ព្រមលើការកែសម្រួលមួយចំនួននៅក្នុងកំណែចុងក្រោយនៃសេចក្តីព្រាងផែនការសន្តិភាពដែលដឹកនាំដោយអាមេរិក។ ក្របខណ្ឌការងារចំនួន២០ចំណុច ដែលត្រូវបានយល់ព្រមដោយអ្នកចរចាអាមេរិក និងអ៊ុយក្រែន ពេលនេះកំពុងស្ថិតក្រោមការពិនិត្យដោយទីក្រុងមូស្គូ។

លោកហ្សេលេនស្គី បានទទួលស្គាល់ថា ចំណុចខ្លះនៃសំណើនេះនៅតែជាបញ្ហាចម្រូងចម្រាស ប៉ុន្តែលោកថា ទីក្រុងកៀវ​បានទទួលជោគជ័យក្នុងការលុបចោលនូវបទប្បញ្ញត្តិដែលតម្រូវ​ឲ្យ​មានការដកទ័ពជាបន្ទាន់ពីតំបន់ Donetsk ឬការទទួលស្គាល់ការគ្រប់គ្រងរបស់រុស្ស៊ីលើទឹកដីដែលត្រូវបានកាន់កាប់។

ដោយឡែក រុស្ស៊ីបាននិយាយថា ការចរចាជាមួយ​អាមេរិកកំពុងមានការរីកចម្រើនជាលំដាប់។ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាន​ប្រាប់​ថា ការចរចាកំពុងដំណើរការ «យឺតៗតែមានភាពរឹងមាំ» ខណៈពេលដែលលោកស្រីបានចោទប្រកាន់ប្រទេសអឺរ៉ុបខាងលិចមួយចំនួនថា កំពុងព្យាយាមបង្អាក់ដំណើរការនេះ។

ទោះបីជាមានការទាក់ទងតាមផ្លូវទូតក៏ដោយ រហូតមកដល់ពេលនេះ ទីក្រុងមូស្គូមិនទាន់បង្ហាញសញ្ញានៃការបោះបង់ចោលការទាមទាររបស់ខ្លួន​ឲ្យ​អ៊ុយក្រែនដកទ័ពទាំងស្រុងចេញពីតំបន់ភាគខាងកើតដែលស្ថិតក្រោមការកាន់កាប់របស់រុស្ស៊ីនៅឡើយទេ៕

ប្រែសម្រួល៖ ឈាង