ព័ត៌មានអន្ដរជាតិ

អារ៉ាប់រួម (UAE) រងផលប៉ះពាល់ធ្ងន់ធ្ងរជាងគេក្នុងចំណោមប្រទេស៦នៅមជ្ឈិមបូព៌ា

បានផុស

៣ ខែ មុន

នៅ

ថ្ងៃសុក្រ ៦ មីនា ២០២៦

ដោយ

ការវាយប្រហាររបស់សហរដ្ឋអាមេរិកនិងអ៊ីស្រាអែលលើអ៊ីរ៉ង គិតត្រឹមថ្ងៃទី៦ខែមិនានេះ មានរយៈពេល៧ថ្ងៃជាប់គ្នាហើយ។ ការវាយប្រហារនេះបានបំផ្លាញហេដ្ឋារចនាសម្ព័ន្ធអ៊ីរ៉ង់ មជ្ឈមណ្ឌលបញ្ជាការ រោងចក្រនុយក្លេអ៊ែរ សាលារៀន ជាពិសេសសម្លាប់មនុស្សចំនួន ១ ២០០នាក់ រួមទាំងកុមារចំនួន ១៨១នាក់ផងដែរ។

យោងតាម Al Jazeera ផ្សាយថ្ងៃទី០៦ ខែមីនា ឆ្នាំ២០២៦, ប្រតិបត្តិការយោធាបច្ចុប្បន្ន ដែលលោកត្រាំផ្តល់ រហស្សនាមថា «ប្រតិបត្តិការ Epic Fury» សម្រាប់ភាគីអាមេរិក និងប្រតិបត្តិការ Genesis (ឬប្រតិបត្តិការ តោគ្រហឹម) សម្រប់ភាគីអ៊ីស្រាអែល បានចាប់ផ្តើមនៅថ្ងៃទី២៨ ខែកុម្ភៈ ឆ្នាំ២០២៦ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា ថ្ងៃទី២៨ ខែកុម្ភៈ ជាថ្ងៃដែលសហរដ្ឋអាមេរិក និងអ៊ីស្រាអែលបានបើកការវាយប្រហារគោលដៅជាង ១ ០០០ រួមទាំងមជ្ឈមណ្ឌលបញ្ជាការ និងរោងចក្រនុយក្លេអ៊ែរ។

ថ្ងៃនេះជាថ្ងៃទី៧ នៃការវាយប្រហារតាមអាកាសយ៉ាងខ្លាំង នៅតែបន្តលើទីក្រុងតេហេរ៉ង់ និងទីក្រុងដទៃទៀត ដោយមន្ត្រីសហរដ្ឋអាមេរិកបានព្រមានថានឹងកើនឡើងយ៉ាងខ្លាំងថែមទៀតក្នុងយុទ្ធនាការនេះ។

យ៉ាងណាមិញនៅក្នុងការវាយប្រហារចំនួន៧ថ្ងៃមកនេះ វាមិនត្រឹមតែប៉ះពាល់តែប្រទេសអ៊ីរ៉ង់តែមួយនោះទេ ប៉ុន្តែប្រទេសក្នុងឈូងសមុទ្រក៏ប៉ះពាល់មិនធម្មតាដែរ ព្រោះតែអ៊ីរ៉ង់សងសឹកលើអាមេរិក-អ៊ីស្រាអែល។

យោងតាម Atlantic Council ផ្សាយថ្ងៃទី០៣ ខែមីនា ឆ្នាំ២០២៦, ប្រទេសដែលប៉ះពាល់ខ្លាំងជាងគេ គឺប្រទេសមីរ៉ាតអារ៉ាប់រួម (UAE) ជាប្រទេសដែលងាយរងគ្រោះបំផុត ចំពោះការសងសឹករបស់អ៊ីរ៉ង់។ ខណៈប្រទេសជាច្រើនដែលមានសម្ភារៈយោធាអាមេរិកត្រូវបានកំណត់ជាគោលដៅ តែអារ៉ាប់រួមទទួលរងថ្មបាក់ធ្ងន់បំផុតនៃការវាយប្រហារសងសឹករបស់អ៊ីរ៉ង់។

អារ៉ាប់រួម៖ បានរងការវាយប្រហារកាន់តែខ្លាំង បើប្រៀបធៀបទៅនឹងឧប្បត្តិហេតុកន្លងមក មានទាំងការវាយប្រហារលើសណ្ឋាគារ Palm Jumeirah នៃទីក្រុងឌូបៃ អាប៊ូដាប៊ី និងមូលដ្ឋានទ័ពអាកាសជាច្រើន។

បារ៉ែន៖ ទីស្នាក់ការកណ្តាលកងនាវាចរទី៥ របស់កងទ័ពជើងទឹកសហរដ្ឋអាមេរិកនៅទីក្រុងម៉ាណាម៉ាត្រូវបានកំណត់គោលដៅដោយមីស៊ីល និងដ្រូនម៉ាក Shahed បណ្តាលឱ្យមានអគ្គិភ័យក្នុងតំបន់លំនៅដ្ឋានជាច្រើន។

គុយវ៉ែត៖ មូលដ្ឋានទ័ពអាកាស Ali al-Salem និងអាកាសយានដ្ឋានអន្តរជាតិគុយវ៉ែតត្រូវបានវាយប្រហារដោយមីស៊ីលផ្លោង និងយន្តហោះគ្មានមនុស្សបើក(ដ្រូន)។

កាតា៖ មីស៊ីលអ៊ីរ៉ង់វាយប្រហារមូលដ្ឋានទ័ពអាកាស Al Udeid និងប្រព័ន្ធរ៉ាដាផងដែរ ។

អារ៉ាប៊ីសាអូឌីត៖ ការវាយប្រហារប្រឆាំងនឹងទីក្រុងរីយ៉ាដ ខេត្តភាគខាងកើត និងអាកាសយានដ្ឋានសំខាន់ៗ។

អ៊ីស្រាអែល៖ ត្រូវបានកំណត់គោលដៅដោយប៉ុនប៉ងវាយប្រហារជាង ៩០ដង តាំងពីថ្ងៃទី២៨ ខែកុម្ភៈ និងថ្ងៃទី០៤ ខែមីនា ដោយមានការវាយប្រហារដោយផ្ទាល់ក្នុងតំបន់ដែលមានប្រជាជនរស់នៅច្រើន៕

ប្រែសម្រួល៖ ណឺ មិនា