អាមេរិកទំនង​នឹង​ដាក់សម្ពាធឲ្យ​ជប៉ុនជួយក្នុងសង្គ្រាមអ៊ីរ៉ង់ អំឡុង​ជំនួប​នៅ​សេតវិមាន

នៅថ្ងៃព្រហស្បតិ៍​ទី​១៩​ខែ​មីនា​ឆ្នាំ​២០២៦​នេះ ពិភពលោកកំពុងអ៊ុតមើល​​ជំនួបនៅសេតវិមាន​រវាងប្រធានាធិបតី ដូណាល់ ត្រាំ និងនាយករដ្ឋមន្ត្រីជប៉ុន លោកស្រី Sanae Takaichi។

យោង​តាម​​ទីភ្នាក់ងារ​ព័ត៌មាន​រ៉យទ័រ អ្វីដែលជាកម្មវត្ថុចម្បងនៃជំនួបនេះ គឺលោកត្រាំ​គ្រោងនឹងជំរុញ​ឲ្យ​ជប៉ុនបញ្ជូនកប៉ាល់ទៅជួយបោសសម្អាតមីន និងការពារនាវាដឹកប្រេងនៅច្រកសមុទ្រ Hormuz ដែលជាសរសៃឈាមសេដ្ឋកិច្ចដ៏សំខាន់។ ទោះបីជាកន្លងមក លោកត្រាំ​ធ្លាប់បានរិះគន់សម្ព័ន្ធមិត្តថាផ្តល់ការគាំទ្រ «ត្រឹមតែបង្គ្រប់កិច្ច» ក៏ដោយ ក៏​ប៉ុន្តែលើកនេះលោកទំនង​ជា​​នៅតែទទូចសុំ​ឲ្យ​ទីក្រុងតូក្យូចេញមុខជួយការពារផ្លូវទឹកដ៏មានសារៈសំខាន់មួយនេះ។

ស្ថានភាពនេះបានធ្វើ​ឲ្យលោកស្រី Takaichi ធ្លាក់ក្នុងស្ថានភាពដ៏លំបាកបំផុត។ ម្ខាង លោកស្រីមានគោលដៅចង់កែប្រែរដ្ឋធម្មនុញ្ញសន្តិនិយមរបស់ជប៉ុន​ឲ្យ​មានអំណាចយោធាឡើងវិញ ប៉ុន្តែម្ខាងទៀត លោកស្រីត្រូវប្រឈមមុខនឹងការប្រឆាំងយ៉ាងខ្លាំងក្លាពីប្រជាជនក្នុងស្រុកដែលមិនចង់​ឲ្យ​ជប៉ុនពាក់ព័ន្ធនឹងសង្គ្រាម។ ដើមឡើយ ជំនួបនេះគ្រោងនឹងជជែកតែពីរឿងពាណិជ្ជកម្ម និងការគំរាមកំហែងពីប្រទេសចិនប៉ុណ្ណោះ ប៉ុន្តែដោយសារដំណើរទស្សនកិច្ចរបស់លោកត្រាំ ទៅកាន់ទីក្រុងប៉េកាំងត្រូវបានពន្យារពេល ទើបបញ្ហាសង្គ្រាមនៅអ៊ីរ៉ង់បានក្លាយជាប្រធានបទក្ដៅបំផុតជំនួសវិញ។

ក្រៅពីកម្លាំងជើងទឹក អាមេរិកក៏រំពឹងថាជប៉ុននឹងចូលរួមសហការផលិតគ្រាប់មីស៊ីល ដើម្បីបំពេញឃ្លាំងអាវុធរបស់អាមេរិកដែលកំពុងស្រកចុះដោយសារសង្គ្រាមនៅអ៊ីរ៉ង់ និងអ៊ុយក្រែន។ ដើម្បីជាការឆ្លើយតប លោកស្រី Takaichi ត្រៀមនឹងប្រកាសថា ជប៉ុននឹងចូលរួមក្នុងគម្រោងការពារមីស៊ីល «Golden Dome» ដើម្បីតាមដាន និងទប់ទល់នឹងការគំរាមកំហែងពីលើអាកាស។ លើសពីនេះ ដើម្បីបន្ធូរបន្ថយពន្ធនាំចូលពីអាមេរិក លោកស្រីក៏ត្រៀមនឹងសន្យាដាក់ទុនវិនិយោគប្រមាណ​៦០ពាន់លានដុល្លារ បន្ថែមទៀតលើវិស័យថាមពល និងរ៉ែសំខាន់ៗផង​ដែរ៕

ប្រែសម្រួល៖ ឈាង